وفي الجزء الأول من رواية خط احمر للكاتبة ميشو محمد دعونا نبدأ بالتعرف علي بداية الأحداث مع ابطالنا ونبذة عنهم وكيف ستبدأ رحلتهم داخل الرواية ؟ كل هذا وأكثر سوف نعرفه سوياً في السطور التالية بإذن الله .
الجزء الأول من رواية خط احمر
في المربوعه المليانه رجاله وشيوخ عشان الصلح
شيخ المنطقه طاهر: ربي يصلح بالك يارايس مشكله بين شباب طايشين وحني الكبار نصلحوها
رايس شيباني: المشكله ياشيخ ولد ولدي قرب ماصبح عليه صبح قعد ملوح ف سريره
طاهر: نديرو صلح احسن ماتكبر
فجآة ينفتح الباب
اسكندر كان وجها مايبشرش بلخير:السلام عليكم
كلهم وعليكم السلام
اسكندر شافلها وهو قعد واقف: مرحبتين بيك انستونا
طاهر:الله يانسك
اسكندر:هئححم اي سامحوني انتم مرحب بيكم كا ضيوف وبس يعني فوتونا من جو الصلح، ،،،قاطعه
ضياء:ولدي غللط يااسكندر نعتررف، ،،قاطعه
اسكندر بحزم: ولدك غلط قتلي هه اي كيف غلط
خوي نضررب برصاصتين !!
جاي تقولي غلط (قعمز) فهمهالي كيف غلط
باسم ولد ضياء الكبير: اني متفهمك يااسكندر وعارف واجعك خاطرك ع خوك،،قاطعه
اسكندر :لا ياباسم منفهمش ف الدوه اني خوك لضررب خوي ولبسببه خوي قيس راقد ف المستشفى لتوا
اهو ياجماعة الخير نقولها وقدامكم عشان تعرفو ولدكم ادم رقبته ف ايدي سوا كان اليوم او غضوا
ضياء وقف: ادم قال بللغط ضرربه
طاهرشاف رايس:شنو يارايس من امتى صغار يتكلمو ف حظور الكبار
اسكندر وقف بهزوه:له ياشيخ الكبير ربي لا اني لا انت
الرايس وقف وشاد عكوزه:هدا لسمعتوه ولدنا قريب مشي فها وجايين تبو الصللح
ضياء: الشباب سكرانيين وبلغلط لصاار
الرايس: الباين انكم مستعجلين اسكندر وريهم الباب
طاهر فنص ف الرايس; تلز فينا
طلعووو
وقعدو ف المربوعه العيلة بس
الرايس: اسكندر ظهرري شفتو حفيدي قدامكم ارجل منكككم مقعمزين ز مالقيات العرس لا كلمه لا شور
هشام عم اسكندر:يابوي انت هكي تدعم ف اسكندر هكي بيزيد مايصدق روحه راه
اسكندر خش: حويج ماتبي شي
الرايس:وين خود شاهي
اسكندر:اتصلو بيا عند مريض يبي عملية العصر
الرايس:ربي يعاونك
اسكندر طلع
اسكندر ف السيارة :القصه زادت ماتعقدت
،
ضياء خش: اسكندر لكنت نقول عليه كويس ودكي يلزنني !!
رسل كانت مقعمزه ف البلكونه وسمعت بوها فتحت عيونها: لزز بوي هلحمار لمنربية، ،وناضت لصالة
رسل: كان تعرفي هل حمار شن دار
نور اختها الكبيرة شاده هاتفها: من هدا ?!
رسل قعمزت بعصبيه:اسكندر في غيره حمااار تخيلي لزز بوي من حوشهم
نور فتحت عيونها ع وسعهم: كيف لززه قصدك لزه لزه بجديات
رسل بتسهويك: لالا يبصرو منعرفش سمعت بوي قال لزه كان يطلع حق ياويله
نور:يااااي شن بديري انتي قدامه نمله
رسل: النملة من حجمها الصغير للعلم لو خشت ف ودن فيل تقتله
نور: بشوية عليك رسل خانم
رسل ناضت وطلعت: فاضيه اني نكلم فيك،،،وركبت غرفتها
رسل بترردد قامت هاتفها 
رسل: حبيبي القديم اليوم يلز بوي من حوشهم
رسل اتصلت برقم ل من سنتين ماتصلت بيه
يررن
اسكندر ف المستشفى
شاف رقمها ل قعد مسجله(النبض ديالي )
اسكندر يشوف ف الهاتف بترردد رد: الوو
رسل تلبكت: انت شن تحسس ??
اسكندر:عفووا
رسل: انت كيف تلز بوي يامتربي اهااا ولا قلة الاصل ماشيه ف دمك ?!
اسكندر يتمشى ف الممر :كييفي هو حوشي نلز نستقبل براحتي علاش عندك حصه ف حوشي اصلا كيف تتصلي وبتحاسبيني ولا شنو ?!
رسل:مووقحححك ياتافه ادم حلف الف مرة وقال انه مضربش خوك برا دور من ضرب خوك اصلا المسدس لم كان مع ادم كان فااضي
اسكندر:حاجات تريس متدخلييش انتي باهي بري سلم بنتي
رسل غمضت عيونها وتنفس بعمق: اسسكندر ،،قاطعها
الكاتبة: ميشوو محمد اسكندر: اني عندي عملية توا يعني كان انتي فاضيه مش الكل ز حظرتك، ،،وصكر الخط
رسل: هدا راسه كابر ويبي التكسير رح يشوف
،،
ف المربوعه
ضياء وادم وباسم ويزن ف المربوعه
يزن:يابوي اسمعني اسكندر، ،،قاطعه
ضياء: يزن صكر السيرة اني متاكد اسكندر ممكن مغلول ع خوه بس مش قادر نستوعب يلزني
باسم: حتني مش فاهم شيييي
قاطعهم الباب يطقطق
خشت ربيعة مرت ضياء:السلام عليكم نوض باسم ولدك مريض حرارة من امبارح نوض شوفه
باسم وقف: كيف وامتى، ،،طلع وخش لصالة
باسم شاف ولده ل عمره سنه ونص راقد ع الكنبه قرب لمس راسه
ربيعة: امبارح اختك رسل عطاته خافض حرارة منفعش فيه شي برا عاينه
رسل تلمس ف جبين اسلام: عيط ورقد
باسم قامه: بنرفعه لكن شن فهمني ف الصغار اني
رسل:نمشي معاك ?!
باسم: اي البسي وجيبه اني برا نستنى فيك
رسل ركبت تلبس
باسم يشوف ف ولده
ربيعة:حرام عليك الولد ف رقبتك ياباسم ولدك صغير ومرتك متوفيه من سنة ونص، ،قاطعها
باسم بصوت واطي: منقدرش يام صكريه الموضوع تربحي
ربيعة: شنو لمتقدراش ولدك بيكبر يبي ربايه ويبي حد يعلمه ويكبره ولا تبي ولدك يكبر هكي مره عندك ومره ف حوش جداه ام امه
باسم طلع
ركب سيارته تنهد وولع السيارة
رسل لبسة وخدت اسلام وطلعت
ركبت مع باسم
باسم: من امتى مريض
رسل:امس الظهر مررض ش،،،قاطعها
باسم بعصبيه: من امس الظهر وتوا ادكرتو تقولولي
رسل:يما قالت بسيطه
باسم: ااخ يايما اخخخ ،،يسوق
لعند وقفو قدام المستشفى ونزلو وخشو
وخشو قسم الاطفال
رقدو اسلام وعطوه خافض حرارة
الدكتور: عطيته خافض حرارة ونشالله رح تنزل حرارته
رسل:نشالله شكرا
باسم كان برا
خشت رشا الممرضة: رسلل
رسل تلفتت:اهلا
رشا:خيرك مجتيش اليوم
رسل:وخده اجازه ظروف عائلية وغضوا نجي
رشا شافت مسلم: يرقبلك الولد
رسل:ولد خوي
باسم خش:رسل خليك معاه اني دقايق ونجي تمام
رسل:تمام
باسم طلع وركب فوق عشان يشوف قيس اخ اسكندر
اسكندر: ياسر انت مصدقت نوض
قيس عمره 23 بصوت واطي:مافيا شي اصلا
باسم طقطق وخش: السلام عليكم
اسكندر:وعليكم السلام
باسم خش: شن اخبارك ياقيس
قيس:كويس الحمدلله
اسكندر:انت شن ادير اهني مش اتفقنا ماحد يجي منكم
باسم: تي لالا عندي ولد مريض شوية رقدوه لوطى فاقلت نركب نشوف قيس
اسكندر:خيره ف شي خطير?!
باسم:لالا عيل صغير عنده حرارة بس
اسكندر: بوك تعصب من لدرته?! وكيف لزيته
باسم: مدورش كلنا نعرفو انه ادم كان عنده سلاح فاضي بدون رصاص يعني لم بوي يعرف انك درت هكي لمصلحة ادم رح يعدرك
اسكندر:الشخص لضرب قيس كان يبي فتنه تصير بينا واني لدرته كان عشان الناس يفكرو انه بجدد صارت فتنه
باسم: يصير خير هي الحمدلله ع سلامتك قيس نستادنكم اني
اسكندر : قيس اني بنمشي مع باسم نشوف حاله ولده
باسم: لالا مدورش خليك مع خوك
اسكندر : خيرك تلز انت بنشوف حالة الولد شغلتني
ونزلو مع بعض :-
ف الدروج
اسكندر: نشغل بالي اني وجدي ع لصار وكيف العم ضياء خدي عليا فكرة مش كويسه
باسم: المهم اني نعرف وبوي صدقني لمصلحة خوي ادم رح يتفهم لصار
،،
ف الغرفة
رشا: تو قريب يجي الدكتور ويطمنكم ع اسلام
رسل: نشالله
طقطق وخشوو
رسل تلفتت وهني شافت حبيبها ل من سنتين ماشفاته
اسكندر شافلها وعطول نزل عيونه: الف لاباس عليه
رسل نزلت عيونها: الله يسلمك
رشا: دكتور تقدر تشوفه الدكتور محسن عطاه خافض حرارة
اسكندر قربله وتلامس جبينه: بدت تنزل ممكن مافيش حرارة
باسم: يعني بسيطه مافي شي
اسكندر شافله: بسيطه مجرد برده ممكن سببتله حرارة هو كويس تقدر حتى تاخده
باسم شاف رسل: هي رسل خوديه
رسل قربت قامت اسلام
اسكندر: الف سلامه عليه
باسم: رسل بري لسيارة تو نلحقك، ،،رسل مشت
اسكندر تعدب هو اكثر بشوفتها
رسل طلعت: رشااا هدا من امتى يتشغل ف نفس مستشفى متعي
رشا:انتي خديتي اجازة الشهر وهو جي
رسل:كمملت، ،وعدلت اسلام وطلعت
باسم لحقها وروحو
في مكان تاني:
ايهاب راقد
خشت امه غرفته: نووض اسمع نوض المغرب قريب ياادن نووض
ايهاب لف وجها لجهه التانيه :يام الشمس قعده معاش تكدبي
عائشة:نووض تحررك
ايهاب :يااام تاعب
عائشة:مافيك شي نووض
ايهاب ناض وعطسس
عائشةشفتله: مرريض?!
ايهاب تعصصب:مالا علاش راقد يام خربتيلي نومي مروح من خدمتي بنرتاااح ،،وخش لحمام
عائشة:وين نعلم بيك مريض اني
دقايق طلع ايهاب لابس :اني بنرجع لخدمتي ،،،وطلع
ومشي لخدمته
،،
تاني يوم
طبعاا تمت اجازة رسل طبعاا هي ممرضة
لبسة سروال جينز ازرق وجاكيت تقيل شتوي بني وسبيتدرو بني ووشاح اسود
وطلعت تجرري ركبت
ادم: بنوصلك وننزل معاك بنشوف قيس
رسل ساكته
وهو كيف بيسوق يطلع قدامه باسم متعصب ضرب السيارة من قدام: انززل
ادم نزل:خيرك
باسم قرب بعصبيه : انت عليك مصيبه وبتطلع
ادم:بنشوف صاححبي وبعدين هو يعرف انه مسدسي كانن فاضي ويعرف انه رصاصتين لفي جسمه مش مني
باسم تنهد:واني نعرف بس افهم انه ف شخص يبي تصير عداوه بين عيلتنا وعيلة الرايس افهمم
ادم:كيف تعرف ?!
باسم: بعد مااسعفنا قيس اني شفت مسدسك ومشيت درت لفه ع المكان لقيت رصاص متع قناصه وللعلم الرصاصه التانيه كانت ليك مش ل قيس كان المفروض رصاصه ليك ورصاصه لصاحبك
رسل سمعت لصار نزلت:انت شن تقول
باسم: تعالي معاي انتي اني نوصلك
رسل مشت مع باسم: باسم فهمني
باسم: انتي صغيرة مش رح تفهمي
رسل:ياسر باسم اني عمري 20 سنه كبيرة وواعيه من حقي نفهم لصاير مع خوي
باسم يسوق: رسل مع الوقت تفهمي
رسل تعصبت شافت لشباك
ووصلت ونزلت
خشت شافت رشا ع الرسبشن: صباح الخير
رشا:صباح النور اسمعي اني كنت مداومه توا اني بنروح وانتي تشدي مكاني لعند تجي سارة متع الرسبشن تستلم
رسل:تمام
رشا من التعب روحت
رسل سيبت الرسبشن فاضي ومشت تاخد قهوة لانه مش فاطرة وبتعدل دماغها رجعت لرسبشن وف ايده القهوة بس شافت غزال واقف ع الرسبشن
رسل قرب: صباح الخير اسفه خليتك تستنى تفضل
ايهاب:صباح النور عادي مدوريش اساسا كيف وصلت
رسل حطت القهوة ابتسمت: تفضل اي خدمه
ايهاب: اهاا نبي نسال ع دكتور اسامه قالولي جراح كويس
رسل: اي كويس هو صراحه اني كيف وصلت فا منعرفش هو مداوم او مجاش منعرفش لو تبي اركب اسال عليه
ايهاب: اهاا لالا خلاص نجي عشيه اكيد موجود لاني مشغول شوية توا شكرا تعبتك،،تلفتت بيطلع
اسكندر خش شاف ايهاب: هدا انت
ايهاب ضحك سلم ع اسكندر:وين سنين ماشفتك
اسكندر:كنت نراجع ف مصر رجعت من شهر تقريبا المهم شن اخبارك
ايهاب:ماشيه
اسكندر:خيرك ف المستشفى لاباس
يتبع ……
لقراءة الجزء التالي : الجزء الثاني من رواية خط احمر
للإطلاع علي فهرس اجزاء الرواية : جميع اجزاء رواية خط احمر للكاتبة ميشو محمد
جميع الحقوق محفوظة للكاتبة ميشو محمد .
