في هذا الجزء سوف نعرف ماذا سوف يحدث لشمسي بعد الصدمة التي تعد هي الثانية وكيف سيكون تأثيرها عليه وكيف سوف يتعامل معها ؟ أسئلة كثيرة محيرة تدور في بالنا كلنا وإجابتنا في السطور القادمة فهيا بنا نبدأ قراءة الجزء سوياً .
الجزء التاسع من رواية حالة حب للكاتبة لوزة ليبية
سكت شمسي انطمس حتى كلمة اتخيل نفسه ان كاميرا ادور عليه و خلفية المكان اتغيرت لاسود والاغنية هادي تتردد في راسه ..طفاك القدر ياشمعتي… خلاني اجر بحسرتي شن لي بهالعمر يادنيتي …محسود على حظي وقسمتي…
ومع اخر كلمة طاح شمسي واطفت الشمعة ….
*خيال هذا شوية دراما هههه*
جمانة تبكي – عارفاتك شن حتقول شمسي ….
شمسي – ارج…. ار …
جمانة – اي ارجعتله شمسي والعشية قال بيجينا للحوش معناها بيراضيني فهمت عليا
* في اللحظة هادي معش عرف شن يقول شمسي…فتح بطم جاكيت متعه و فك القرواطة ونحها مرة واحدة… شافلها شافلها ومعش تمالك نفسه سكر قبضة يده وضربها في راحة يدها الثانية ….و ناض وقف شافلها نظرة الم و مسح شعر راسه وتلفت مشي دون مايضيف كلمة
جمانة – شمسي ….شمسي
[حي عليا اتكنطى مني شوره … عليك عملة…. شمسي ماعمره مشي وخلاني بشكل هذا… عارفة روحي انكنطي لكن نبيه حاتم خيرهم الناس مايبوش يفهموني ….زعما نلحقه لالا خلي نقعد اهنا اكيد حيوليلي ]
~~~
شمسي خش للحمام الرجالي …. حس بضيقة خاطر …. غسل وجه وقام راسه شاف روحه في المرايا وقال –
انا انحبك وانتي تحبي واحد تاني ايحب واحدة ثانية واضحة ياجمانة ماتحتاجش تفسير …. كيف رضيتي ترجعليه كيف …. لما سيباته صاحبته رجعلك انتي ….كنت نتوقعك صاحبة قرار ومبدئ لكن ياودي عواطفك اتحكمت بيك بنسبة كبيرة …. تعبت انا تعبت تالث مرة يصيرلي هكي مرة قتلي بنتجوز …. مرة الثانية ريفاء اتوفت …المرة التالثة لما لقيت جمانة من بعد غياب طلعت كانت مخطوبة وبترجع لخطيبها ….
* خدي كينكس شمسي مسح وجهه وطلع من الحمام ..وجوه متكهرب مش شايف حد قدامه …
رجع قعمز بحداها ف الكفتيرية وهوا متعفلق…وجمانة تشبحله
شمسي بنبرة صوت حادة – تو نرجع خليك اهنا
جمانة شداته من يده كلقطة عفوية وقتله – شمسي خيرك
شاف من طرف عينه ليدها ورافع حاجبه وقالها – شي ماشي محل اللي برا تو انجيك
جمانة – به ارفعني معاك مانبيش نقعد اهنا
شمسي اتنهد وقالها – مش معطل
جمانة – به انجي معاك مانبيش نقعد بروحي
شمسي – باهي هيا 
* ناضت جمانة وراه وهوا يتحرك بخطوات واسعة …لين مش ملحقة عليه….طلعوا من المطار التركي ….فيه محل عالزاوية خشله شمسي
خدي دخان وطلع وطلعت معاه جمانة …. كان فيه كراسي بعد المحل بعدة خطوات … فقعمز شمسي وقفت عليه جمانة وقتله – من امتى ادخن ….
شمسي ماردش عليها … نفث دخانه مرة تلو الاخرة لين تمه وشلع واحد ثاني ….
قعمزت وقتله – شمسي اتكلم
شمسي – شن بنقول ؟؟؟ سن تبيني انقول تره
جمانة – كان نندري عليك بتتكنطى بشكل هذا راني ماحكيتلكش
شمسي – لا باهي اللي حكيتي …. اقلها الواحد يعرف راسه من رجليه
جمانة – خيره صوتك هكي
شمسي – مخنوق
جمانة – بجديات ماحسبتكش بتحرج….. باهي لو انت ف مكاني شن ممكن ادير
شمسي – هي نوضي الرحلة بتطلع
جمانة – باه جاوبني
وقف شمسي ولوح دخانه وعفس عليه وقال – ماعنديش اجابة
نوضي هي
ناضت جمانة وحست بالذنب حست بشعور غريب اول مرة شمسي يتصرف معاها بطريقة جافة …. اضايقت من الموقف وندمت انها قالتله
رجعوا للمطار وركبوا طيارتهم واقلعت الطايرة ….
جمانة – كابتن شمسي تبي تشرب حاجة
شمسي – لا لا
جمانة – اوكي …
* بعد شوي ناض المساعد وخش للحمام انتهزت الفرصة ومشتله
وقفت جنب كرسيه
شمسي – وقفتك اهنا مش امان ارجعي لكرسيك
جمانة – شمسي ماتعاملنيش هكي … احكي معاي ناقشني
شمسي هز كتافه – ماعنديش مانقول الحق
جمانة – به بالك تبي تشرب حاجة
شمسي – لا شكرا …
جمانة – شمسي بطل من الرسميات اللي تتكلم بيها
شمسي – سامحيني انتي مخطوبة وزي مانرضاش حد يهدرز ع خطيبتي فبالاكيد خطيبك مايرضاش حد يهدرز ع خطيبته اللي هوا انتي يامخطوبة …
اضايقت جمانة من هالجملة وقتله – بس انت صديقي والا نسيت
شمسي – لو كنت خاطب البنت اللي فبالي ماكنتش حنكلم بنت تانية ونقول عليها صديقتي
* مع هزة راس هكي وغمزة وتلفت للقدام *
سكتت جمانة حساته يعطي فيها كلام صواريخ ارض جو ….
[اللطف كلامه زي السم هذا شنو … ]
(معليشي كلام حار لكن الحرارة اللي فقلبي احرف ياجمانة )
وبينما هيا تتكلم بينها وبين نفسها وخرت بشوي بشوي واصدمت في المساعد … تلفتت وقتله – اه اسفة
مساعد – فيه حد يمشي بالظهر
جمانة – سامحني كنت سارحة ..
* طلعت من غرفة القيادة ورجعت لمكانها ….
[باهي فرضا انه يبيني شمسي … انا مانحسش بناحيته مشاعر حب…. القلب ومايريد علاش التصرفات هادي معاي ]
فات الوقت وشمسي طول الوقت امكزم وجمانة حاسة انها حتفقد شمسي وما ان وصلوا ليبيا …. مامشاش لريسبشن زي كل مرة بش يغير رحلاتها الجاية معاه اكتفى انه خش للمكتب وقعمز ….
(الله غالب دام انها تبيه خلاص بس والله حقير كيف ياخد منها فلوس كيف؟؟ والله ماهو راجل … ولا ينحسب عالرجالة ….خايف عليك ياجمانة بجديات غدوة حيخليك تخدمي وياخد معاشك ويذلك بيه تقعدي تتجدي فيه انه يعطيك فلوس بش تشري حاجة معينة ….اخ اخ لو كان نعرف طريقه هالتافه بس …. المشكلة مش في هكي المشكلة ان هيا تبيه …. هيا تبيه …. تبيه )
ومع كلمة تبيه حس شمسي بغصة فقلبه …. حط وجهه بين يديه … بعدين نحاهم ووقف عالروشن … اذكر ريفاء فتخيلها واقفة قدامه قتله … شمسي على سلامتك حبيبي
شمسي – الله يسلمك ياروحي
استحشتك ريفاء
…حتى انا استحشتك شموستي
وفي اللحظة هادي خش عليه معتز وشافه يتكلم بروحه هزه وقاله
– صحصح ياصاحبي لامتى بتقعد هكي … خلي الماضي وكون في حاضرك جمانة وفكر في مستقبلك كيف بتكون انت وياها
تلفتله شمسي ابتسم ابتسامة تهكم و رد عليه – جمانة بح يامعتز … راحت خدوها مني … رحل خلاهن في مصفاق اللي كاين للعقل رواق
معتز – غير قعمز قعمز …. قعمز ياراجل واحكيلي
قعمز شمسي وحكي لمعتز شن صار معاه وشن قتله جمانة
معتز – لا حول ولا قوة الا بالله … من جدها هادي موليتله
شمسي – بش توجع هادي ياصاحبي ؟؟؟ توجع والاه لما ايخلوا شخص صادق …شخص جاد …شخص ايحب من قلبه ويمشوا لشخص كذاب هلفوت ياخد منهم في الفلوس…. توجع لما انت تبدى اتفكر فيها طول الوقت تستنى امتى يصبح الصبح بش تتلاقى معاها ….وتفرح لما تلقاها مبتسمة وتكون مبسوط لما اتكون معاك وتحط راسك ع المخدة في الليل تحلم بيها وتستنى فيها اتحس بيك واتحبك ببش تخطبها وتتجوزها فجاة اتقولك …. انا مختوبة وفساخت وتوا رجعت لختيبي
توجع هادي والا لا وياريته خطيب امقوم معاملة صفر اهتمام مافيش وخناب
معتز – اختيارها هكي تبي والاه تتحمل مايجيها وماتهمش روحك ع خاطرها ليبيا معبيا بنات
شمسي – جيت خاطم لقيت السبول امسبل من الحب الاحرف والفراق ايهبل …. حبيتها يامعتز حبيتها …. لدرجة اني حبيت ريفاء في ظل جمانة …. لقيتها تشبها فتعرفت عليها مدة بسيطة وخطبتها وحبيتها ..
معتز – عارف عارف وكنت انقولك ياشمسي راهو مايجيش… انت خطبت ريفاء لانها في ملامحها تشبه جمانة راك تظلم البنت في حبك ياشمسي …
شمسي – ماظلمتهاش يامعتز ….
كنت ليها الاب والام والاخ والصديق قبل الحبيب …. يوم اللي تقول اخ في عز الليل والشتي نطلع ونمشيلهم نرفعها للعيادة …يوم اللي تزعل من امها لانها مادارتلهاش حفلة عيد ميلادها نديرلها انا اتقول عرس وغيره وغيره من الحاجات …قصدي والله ماقصرت معاها في حاجة لا عاطفيا ولا ماديا…
معتز – به انسى انسى والا نقولك ف سفرة من سفراتك تجوز اجنبية وروح ببها
شمسي – مش نوعي الاجنبية … نبي حب يقعد معاي العمر كله مش يوم اللي انروح اهنا اتقولي هيا نرجعوا لبلادي … والا طلقني وتمشي وتخليني …. ماتنفع بيا غير الليبية يوم محنتي توقف معاي وتكون جنبي اتهون عليا همي
معتز – امممممم باهي ربي يسخرلك الحال
شمسي – بس سكرته موضوع الجواز والحب والتكبيد …. صدق السوكني شن درت ف روحي خشيت سريب الحب
معتز – ماتقولش هكي تو تلقى حب حياتك …. خلي انوض انا وراي رحلة
شمسي – عندي رحلة بالاقامة كنت بنلغيها ع خاطر جمانة لكن ماصارش
معتز – اه وين
شمسي – تلاتة ايام لفيينا
معتز – توا ؟؟
شمسي – لا بعدين قبل المغرب بشوية ….
معتز – باهي ياوحش ربي يحفظك
شمسي – ان شاء الله ياغالي ….تو نتلاقوا في القايلة كان ماعندك شي
معتز – لا ماعندي شي في القايلة ….يلا سلامات توا وقت علبا
شمسي – اوك سلامات
~~~~
نورة – والله امس مارقدت ياعفاف
عفاف – تفكري في السحنة جمانة والاه
خ نعيمة – ع اساس انا جاني نوم والله قعدت غير نخمم فيها
عفاف – والمشكلة هيا راقدة ورايقة
نورة – مرات انحس فيه غباء
عفاف – مش غير غباء
خ نعيمة – اخ وخلاص نوضي نوضي ديرينا قهوة والله راسي نحس فيه امصدع
عفاف – هيا هي ….تذكر القط يجيك اينط …
نورة – هيا تتصل ؟؟
عفاف – ايه …….. ها جمانة
جمانة – ايوه عفاف شن الجو
عفاف – باهية …
جمانة – اسمعي … رتبي الحوش
عفاف – علاش من جاينا
جمانة – حاتم جاي هوا وامه العشية
عفاف – افففففف منه ماصدقنا ارتحنا منه ياجمامة رديتيهونا تاني
جمانة – باهي ياعفاف تو انروح انضم بروحي
عفاف – مصحك مش على هكي يابلي ….هكي هكي بنضمه انا … ندوي على حاتم كشخص والله مانعرف كيف متحملتيه
جمانة – استغفر الله ياربي مهم عطيتك علم قولي ل امي هي باي
عفاف – باي
وفي هاللحظة خطم شمسي شافلها وتلفت دون ان يبتسم …. لحقاته جمانة – شمسي شمسي
تلفتلها وقال – نعم انسة جمانة
جمانة – هههه انسة جديدة هادي ؟؟؟
شمسي ابتسامة صفراء – نعم محتاجة حاجة ؟
جمانة -اه لا شي
شمسي – اوكي نستأذنك ….
جمانة – اتفضل
وقفت عالريسبشن جمانة …
ريسبشن – رحلتك لشرق ل البيضاء
جمانة – مع مني
ريسبشن – طاقم الكابتن فتحي
جمانة – ئه والكابتن شمسي ؟؟
ريسبشن – الاردن
جمانة – ماينفعش تغيريني معاه
ريسبشن – لا اسفة
جمانة – اممم باهي شكرا
ركبت رحلتها جمانة وبعد ماروحت … ادور في شمسي مالقتاش …تتصل بيه خارج التغطية
فاكملت رحلاتها روحت بيها عفاف و
مع العشية لبست وتت روحها وتستنى في حاتم
~~~
منيرة – وين ماشي سنفوري
حاتم – ماشي ل امي بنشوفها نطمن عليها ونرجعلك
منيرة – باهي ماتعطلش
حاتم – باه
~~~
معتز – ها وين انتا ؟؟؟؟
شمسي – بش عندك رحلة انت
معتز – مشيت وروحت وين انت
شمسي – قدام حوش جمانة
معتز – شن ادير غادي
شمسي – نستنى ف خطيبها الكلب
معتز – بلا عار ياراجل … شن موقفك قدامها
شمسي خبط ع مرش الجنبي بيده وقال – راسي دخن يامعتز راسي دخن مايستاهلهاش افهم
معتز – ارجع بلا هبال ارجع عندك رحلتك بتطلع
شمسي – لا مش راجع بنهدد خطيبها يرجعلها فلوسها
معتز – به شن بتقوله تره ؟؟؟ وكان عرف بيك بيقولك انت منين عرفت شن حتقول تره …..
شمسي – حنقول اني عرفت عن طريق اختها مثلا واني جيت من وراء علم جمانة وحنهدده لين يرجعلها فلوسها … حقير ياراجل شايف ان ماغندهاس خوت ولاد بيدير فيها مايبي
معتز – قلتها انا … قلتها فبالي مستحيل يمشيها شمسي لازم بيدير حاجة واللي فبالي حق صار
شمسي – خلاص غير سكر انتا نتم الموضوع ونجيك غادي
معتز – توا اتروح …
شمسي – ماتنفخليش راسي نتم الموضوع قبل مانيش
* سكر الخط شمسي وهو متعفلق …. طلع باكو الدخان ولقي فيه اخر طرف ولعه وينفخ فيه بكل غل…
~~~
* حاولت اتشوف منو لكن الراس مش باين …. خدت نقالها واتصلت ب شمسي … وشفاته كيف مد يده وخدي النقال … ورده مكانه ….انصدمت جمانة وحطت يدها ع فمها…. [نهار ابيض شمسي اهنا … حي عليا اكيدة جاي بيكلم حاتم والا اشبح شن بيدير …. ياريتني ماحكيتله ياريتني ….خلي نبعتله مسج ] >>>شمسي رد عليا ضروري …
قري شمسي المسج وعاودلها طول يحساب اشبح شن صار
شمسي – اه شنو فيه جمانة
جمانة – شمسي انا نشوف فيك … شن جيبك اهنا
شمسي – جيت نشوفك
جمانة بكل غضب – انت مش جاي اتشوفني عارفة شن فيه فبالك روح خير ياشمسي
شمسي – مافي شي فبالي اطمني
جمانة – انت جاي تبي اتخليني في موقف بيني وبين حاتم
شمسي – انا ياجمانة ؟؟؟ انا اندير هكي ؟؟؟
جمانة انفعلت زيادة عن اللزوم وقالت – ايه كلكم ماتبوش حاتم يكون معاي …روح ياشمسي ماتدخلش في حياتي
شمسي سكت وجعه كلامها واكتفى بكلمة واحدة – حاضر …
سكر الخط ومشي دعس عالمطار ….
وصل حاتم وامه رحبت بيهم جمانة وعيلتها ….بعد نص ساعة خشت امه للمربوعة وخشت معاها جمانة ….. هدرزوا شوي كيف حالك شن اخبارك وقالها
– حقا وين كنتي الصبح
جمانة – اه هئ احم….بديت نشتغل
حاتم – واين ؟؟؟؟؟؟؟؟؟
جمانة – مضيفة طيران
حاتم – شنهووووووو
جمانة – مضيفة طيراااان
حاتم حك شعره بصبعه وقالها – ندير روحي ماسمعتش اوك … وسيبيه
العمل ……
الحلقة العاشرة … حالة حب
حاتم – حقا وين كنتي الصبح
جمانة – اه هئ احم….بديت نشتغل
حاتم – واين ؟؟؟؟؟؟؟؟؟
جمانة – مضيفة طيران
حاتم – شنهووووووو
جمانة – زي ماسمعت
حاتم حك شعره بصبعه وقالها – ندير روحي ماسمعتش اوك … وسيبيه العمل
جمانة – كيف انسيبه حاتم
حاتم – ساهلة قعمزي في الحوش عدة ايام فايديرولك انقطاع بيب توك اتولي امسيبة العمل فيها صعوبة هادي
جمانة – ماقتلكش اشرحلي كيف انسيب العمل نحكيلك ان انا علاش بنسيبه
حاتم اشر على راسها وقالها – هكي بتسيبه ماعنديش بنات يشتغلوا شغلانة هايفة زي هادي
جمانة – الشغلانة الهايفة اللي تتكلم عليها اموكلة ناس فمعش تستهزا بأي عمل كان
حاتم – بلا بلا بلا العمل بتسيبه وصلت
ام حاتم – حاتم !
حاتم – نعم يمى ماتجيش معاها تره العمل هذا مستحيل تستمر فيه
امه – حاتم !
حاتم – باهي باهي يمى … تستمر فيه لحد مانتجوزو بعد الجواز مافيش
جمانة – به
حاتم – وحق ربي نسمع حاجة هكي والا هكي نقتلك
جمانة – ماعندك مابتسمع ياحاتم وانت تعرفني
حاتم – عارف عارف …
*طلع حاتم خاتم من جيبه ولبسه ل جمانة …. هدرزوا وروحوا هوا وامه
عفاف – بجديات تتكلمي انه طلع الخاتم من جيبه
جمانة – اي ماتوقعتس الحق
خ نعيمة – ها لا بالك متوقعة يجيبلك خاتم ف باكوه و يجيب معاه ورد و هداية
عفاف – تي هوا مافكرش حتى ايخش بحكة شكلاتة والا باكو عصير
نورة – ربي يهدي بجديات هازي هذا
خ نعيمة – خليها اتزيد تهز راسها خليها
ام بنسبة لشمسي … ركب طيارته للمغرب وسافر …فاتو تلاثة ايام رجع فيهم شمسي لليبيا …. و رجع حاتم لنفس عمايله … قلة اهتمام ومعاملة مش تمام … انقهرت جمانة من طبع حاتم … معاملة شمسي لجمانة اتغيرت تماما … اصبحت رسمية جدا … برغم انه يراقب فيها من بعيد لبعيد وكل طاقم في رحلتها ايوصيهم رد بالك عليها ….
وفي ذات يوم …
شمسي شاف الجدول لقي رحلة ل ايطاليا مع جمانة ومعتز …
( على قد مانحاول نتجنبها اهو جت رحلتي معاها زعما انغيرها ؟؟؟ لا لا بالك نجرحها مهما كان تعتبر زميلة عمل …. يلا خلي نمشي وخلاص )
كانت واقفة جمانة في الممر ولا زالت اتفكر في شمسي.. فجأة شمسي هوا وحواء … شافتهم جمانة واغتاضت حيث انه كانت هيا الوحيدة اللي يهدرز معاها شمسي في المطار … حست بغيرة نوعا ما …. حطت نقالها في الشنطة ومشت اتوجهت للمهبط…..بعد كل الاجرائات الروتينية اقلعت طيارتهم هما الاتنين بعد عدة ساعات ….ماان وصلوا كان شبه التوقيت ليل …. وطيارة شمسي اصبح فيها عطل بطريقة ما يحتاج صيانة يوم ونص ع الاقل …بالاضافة الى ان مهندس الصيانة مش موجود
معتز – اخ ياسلام يوم ونص نغيرو جو في ايطاليا ولا اروع ياريته ديما فيها اعطال
شمسي – يلا قولتك نغيرو جو اول مرة نفرح بعطل حتى انا ههههه
معتز – شوف طليانيات ياراجل شوف ابيض عالاحمر عالشعر الاصفر ماتفهم شي
شمسي – هههههه هوا هذا مافالح غير في التكحيل انت
معتز – زود زود خلي نمشوا للفندق ناخدوا غرف وبعدين نطلعوا لسوق ماعنديش حوايج
شمسي – حتى انا مش جايب معاي …
* تلفت ل جمانة وقالها – تعالي معانا … فيه فندق قريب من اهنا حنابتوا فيه اليوم
جمانة – مامعاييش فلوس للفندق
شمسي – بلا دوة فارغة حتى لو عندك فلوس مش حنخليك اتخلصي
جمانة – امممم به اوكي
* ومشوا للفندق خدي دار بجنبها الدور التالث ومعتز في الدور الثاني…. وهما راكبين في الاصنصير وقف معتز في الدور الثاني وكملت جمانة وشمسي لدور اللي فوقه …. في خلال ما الاصنصير يتحرك جمانة شافت لشمسي وقتله – شمسي
شمسي – نعم
جمانة – علاش اتكلم فيا بطريقة هادي … قصدي والله ماتعودت عليك هكي … محتاجة نشكيلك ونحكيلك محتاجتلك بجديات
(علاش توجعيلي فقلبي ياجمانة علاش …. تحسابيني مستوعب فكرة انك تكوني لغيري والا تحسابي معاملتي هادي ليك ترضيني )
(علاش تشبحيلي هكي تو هي ؟؟؟ نظرتك اتقول انك تتغزلي فيا بينما ان في الواقع ربما تتخيلي فيا ختيبك )
جمانة – اتكلم شمسي …
شمسي – به شن تبيني انقول هي 
جمانة – علاش معاملتك هادي
شمسي – اللي بنقوله مش حيفيد خليني ياجمانة فحالي 
… انتي عندك حياتك الجديدة بلاش تخليني ننبش في ماضيا ونتكلم 
….
جمانة – به قص…
* انفتح الباب وصلوا لدور التالث طلع شمسي ووراه جمانة كملت كلامها – به قصدي شن دخل ماضيك في معاملتك الجافة هادي 
…. اتكلم ياشمسي اتكلم اتكلم ياشمسي 
….
تلفتلها شمسي وبكل انفعال مع حركة يديه قالها – انحبك ياهم شمسي انحبك
يتبع …..
لقراءة الجزء التالي : الجزء العاشر من رواية حالة حب للكاتبة لوزة ليبية
لقراءة الجزء السابق : الجزء الثامن من رواية حالة حب للكاتبة لوزة ليبية
للإطلاع علي فهرس الاجزاء كاملة : جميع اجزاء رواية حالة حب كاملة للكاتبة لوزة ليبية
جميع الحقوق محفوظة للكاتبة لوزة ليبية .
