الجزء الثالث من رواية الزوجة التائهة بين الأحلام والواقع

وفي الجزء الثالث دعونا سوياً نبدأ بالتعرف علي المواقف التي سوف تحدث مع ابطال الرواية وهل ستكون سعيدة ام حزينة يا تري ؟ كل هذا واكثر سنعرفه في السطور التالية من رواية الزوجة التائهة بين الأحلام والواقع .

الجزء الثالث من رواية الزوجة التائهة بين الأحلام والواقع

وطبعا جت ساعه 10 و11 و1 وعمتك ام احمد مبركه فى العزى ووو الحوش كله تنحى من ظلوع ليلى وفوقها لما لقت الظهر ادن قالت معاش فيها توا احمد ولولاد وبابا قريب يخشو والغدا مازال مانحط على نار خلى نحطه وخلاص ووو كيف حطت الغدا على نار وباديه تبخر فى حوش على خشت راجلها
احمد.. السلام عليكم
هيا ….. وعليكم السلام
هوا … مالا وين امى مش مبين صوتها فى الحوش
هيا .. امك مشت للعزى قالتلى واكيد توا على وصول .
هوا … باهى مالا كملى حاجتك مع امى ونبيك فى موضعيين نبى نحكيهم معاك بس مش توا زى ماقتلك كملى واركبلى فوق وتوا انى بنخش نرقد شوى ولما يوتى الغدا نوضينى
هيا…. ماشى حبيبى ونركبلك الغدا فوق نتغدا انى وياك مع بعض ولا تنزل تتغدى معاهم ..
هوا .. لالا اصلا انى بنتكى هنا فى مربوعه مع الولاد ولما يوتى الغدا نتغدو مع العويله زى ماكنا متفقين سنه الاوله كلها بناكلو معاهم
هيا .. ماشى ماشى قالتها وقلبها مغصوص وكملت باقى حاجتها فى غدا وطاب لغدا وعلى خشت عزوزتها
ام احمد ….. بنيتى ماااااااااااااشالله فالحه طالعتلى واللهى ريحة غداك تفحفح من بعيد وانى من فطور ماحطيت حاجه فى بطنى ياحنه مشيت لناس قسما بالله ماتهون عليهم فضلتهم حشاك على قد ما نوحت وندبت وعيطت مافى واحد فيهم مدلى حتى طويسه ميه لين طلبتها وشاط ريقى عليها
ليلى …. االله يهدى من خلق وفى خاطرها تقول يهديك ويهديهم من افعال جاهليه هادى وطبعا ضحكه شدتها بسيف على منظر عزوزتها وكيف تدوى وتوصف فى الا كانت تدير فيه وكلمه منها وكلمه من عزوتها على رنت تلفونها نقال الا محطوط فوق طاولة تلفزيون فى صاله
مروه …. ليلى .. ليلى تلفونك يرن ورديت عليه ..وطلعت بنت خالتك المتصله وقالتلك لما تفضى كلمنى
طبعا ليلى قالتلها باهى ومصدومه من واقحة البنت الا ردت على تلفونها من غير ادن منها وقالت فى خاطرها لاحول الله ياربى شن هالعيله الا طحت فيها لولا نصيب والظروف
مهم كملت الغدا وسقو وتغدو وبعدها قالتلها عزوتها
ام احمد … لا خلاص بنيتى والله ماعاد ماسه حاجه توا نغسلهم انى المعينات انتى برى دوشى وبدلى واركبى انتى وحميدا فوق عاد ماتجيش انتم قاعدين عرسان شنى لين نقولك انى
..ليلى .. طبعا علامات تعجب !! وفرحه فى نفس الوقت ماصدقت رخوها شوى خلى تتنفس مع راجلها وطبعا ركبت فوق لحوشها دوشت وجبدت شعرها وحطت شوى ميك اب وريحه ولبست ماكتب ربى ^ـ* وقعمزت تقلب فى تلفزيون على خشت احمد وطبعا اول ماخش ولو عيونه قلوب قلوب ونسى حتى الموضوع الا بيحكيلها عليه ومشو فى خبر كانا لين شرين نقالها بعد مغرب على امها تتصل بيها
ليلى… ماما حبيبتى استاحشتك حاسه نفسى ليا سنه ماسفتكش
..امها … والله يابنيتى حتى انتى خليتى حسك فى الحوش من اول ماخشيته فاضى بلاك وبوك قارنهم وشايل فى قلبه وساكت هوا اصلا من الاول مش راضى بى زيجة هالتفرفيش فى شهر تمو كل شى لولا انى الااصريت عليه وقتله ماتوقفش فى نصيبها البنت يالله مهم انتى شن حالك توا بنيتى ؟؟؟
ليلى .. الحمد لله وطمنى بابا وقوليله ماتخممش عليا رانى فرحانه وسعيده هلبه وشايلينى من على الارض شيل واحمد يحلف براسى مايحنت وردى بالك عليه ياماما راهو فيه القلب ومايتحملش التكديره والنكد وعاد قوليله بطل تدلع عاد مش اول واحد انت بنوته ياخدوها منه ههههههه وبوسيهولى هلبببببه
امها .. حاظر حبيبتى وانتى ردى بالك من روحك وطمنينى عليك باهى وسلميلى على العويله وراجلك وهيا توا مانطولش عليك فى امان الله
ليلى .. فى امان الله ماما
وعلى طلعت احمد من دوش قعد يضبح ليلى … ليلى … تعالى طلعليلى بيجامتى سودا
ليلى …. حاظر حبيبى هي اهو جيت
هوا…. من كان يكلم فيك
هيا .. ماما وبابا كانو يطمنو عليا
هوا .. اه وشن حال بوك امس حسيته تعبان شوى لما جيت قدام صاله بناخدك
هيا .. لا لا غير تعبان نايض عليه قلبه شوى ودكتور منبهه اكتر من مره مايسيبش دوا لانه رح يتعب من غيره بس هوا عنايدى مرات يفوت فيه وبيدا ينتكس بعدها .
هوا.. اه مالا توا ننحددو يوم نمشو نطمنو فىه عليه ضرورى عاد طالما هوا تعبان
هيا .. ان شالله حبيبى وربى مايحرمنى منك يارب …… اه حقا مش قتلى نبيك فى موضوع يين شن هما ..
احمد .. انتى غير يرى حطىلنا قهوه على نار واسبقينى لصاله وانى نسلت شعرى ونجيك وتوا نحكيلك
هيا … اوك بس تبيها معدله زى قهوتى اى معدله زى قهوتك
وطلعت دارت القيهوه الا تفحفح بالزهر من بعيد وحطتها وصبت فى الفليجينات على تقعميزته وقالها اسمعى نبى نقولك على موضعين اول موضوع انا عندى خالى خو امى مليونير واعطانى هدية زواجنا وهيا شهر عسل فى لندن وتداكر واوتيل على حسابه ووتى روحك نهاية الاسبوع متسقدين ان شالله ولكن زى موعدتك بكرا ان شالله نمشو نطمنو على بوك وبعد بكرا امى عازمه اقاربنا كلهم يعنى عزومه نساوين على خاطرك وهيا قبل تبيها لما تسكرى اسبوع عندنا بس بمااانا حنا متسقدين فاامى فتلهم تفضلو بعد بكرا لانا بعدها مسافرين….
….طبعا ليلى فرحة هلببببببببببه والفرحه مش سايعتها ودعت من وسط قلبها لخاله وطبعا قالت اكيد عزوزتى ماعفستش فيها لانه خوها بس وكان هدا راهو نكدت فيها بس الحمد لله وطبعا هيا شارده تفكر على صوت احمد .
احمد ….. ليلللللللللللى هاااااااااا وينك معاى ولانخترف بروحى
ليلى ….. ضحكت ههههههه ضحكه بريئه وقالتله لالا حبيبى معاك
هوا … مهم والموضوع التانى مش عارف كيف ينقولهولك الحق بس تسمعيه منى خير ماتسمعيه من حد تانى قى العزومه
هيا … شنى حبيبى ان شالله خير شن فى

يتبع …………

لقراءة الجزء التالي : الجزء الرابع من رواية الزوجة التائهة بين الأحلام والواقع

لقراءة الجزء السابق : الجزء الثاني من رواية الزوجة التائهة بين الأحلام والواقع

للإطلاع علي فهرس اجزاء الرواية : جميع الأجزاء كاملة لرواية الزوجة التائهة بين الأحلام والواقع

جميع الحقوق محفوظة للكاتبة كيندا من ليبيا .