وفي الجزء الثالث من رواية اولاد سلطان يا تري ماذا سنري من أحداث جميلة ومشوقة مع ابطالنا ؟ دعونا نعرف ذلك في السطور التالية بإذن الله مع الكاتبة ميشو محمد .
الجزء الثالث من رواية اولاد سلطان
كريمه سمعت راي سلطان راجلها وفعلا اتصلت بـ وفاء عمت ايلاف
كريمه: الوو كيف حالك
ايلاف: ايوواه اهلين
كريمه: وين عمتك يابنت
ايلاف: اهاا خالتي كريمه عمتي عندها زبونه مشت بتحنيها
كريمه جتها فكرة: اهاا تعرفي تحني حنة هندية انتي؟! يعني مزود تعرفي ترسمي
ايلاف: اي نعرف بس تفضلي لل.. قاطعتها
كريمه: لا نبيك تجي لحوشنا نبيك تحني بنت ضرتي
ايلاف: اهاا مانقدرش الحق عمتي مهناش واني بروحي لو رجعت انجي حاظر
كريمه: اهاا تو نكلمها اني ع رقمها
ايلاف: تمام
كريمه: باه بسلامه.. وصكرت
ــــــــــــــــــ
معتصم يجهز مع خوه ف الاثات
صدام: يسلمو عصومي
معتصم: حيلي نهدد
، ـــــــــــــــــ
عهد: ياام خيرك معاش تكلمي فيا ز قبل
حليمه: قتله بوك انك بتفسخي
عهد: حي عليك من قالك بنفسخ ياام حرام عليك
كليمه عيطت: انتتتي قلتي تعاركتو ومعاش تبييييه
عهد: انيي امتى؟! اهاا وقتها كنت معصبه ياام صدقتي انتي احمدي ربي لحصلت حد يرضا بيا 
حليمه:حتى ني عارفه غير نسخن فيك 
عهد:اليوم بيجيب الاثاث مزال ع عرسي عشرين يوم
حليمه : فكه فكه
عهد: تو تستاحشوني ماتخافيش
ــــــــــــــــــــ
وفاء خشت:ايلاااف وينك
ايلاف:اني هني نقراا ياعمتي
وفاء:تمشي غضوا نحنو شيماء بنت فاطمه
ايلاف:بري حناها انتي اني بنقرا
وفاء:تمشي غضوا و شوفي حوشهم الكبير هدا حوش سلطان ره
ايلاف.الشيخ سلطان؟!
وفاء.اي هو
ايلاف:تمام خلاص غضوا
وفاء:اي قالت غضوا
ـــــــــــــــــــ
تاني يوم
كريمه جهزت الحنه
كريمه: اني بنحني يابنات شيماء تحني؟!
شيماء:يعععع اني نحني العفو
كريمه:فاطمه تحني
فاطمه:اي علاش لا
شيماء: قرف وخمر
كريمه:ف بنيه تحني بلهندي شن رايك؟!
شيماء:اهاا هنديه تمام عادي
طقققق طققق
كريمه فرحت ناضت:اهلين تفضلو
(اهلين وانستونا وكيف حالك ووووو)
ف الصالة
ايلاف قعمزت جنب عمتها
ايلاف:محلاها بنتهم شن اسمها
وفاء بصوت واطي:اسكتي اسمها شيماء
وتين خشت تجري: ميمه برا مطر
كريمه:باهي قعمزي هني صقع برا
وتين شافت ايلاف:هادي انتي ..وقربت سلمت
وفاء حنت كريمه ايدها وبدت ف فاطمه
شيماء: يععع يامه تقرف يعع عليكم
ايلاف ضحكت
شيماء: نجيبلك المزود تحنيني ؟!
ايلاف:اي جيبي
شيماء جابت المزود وايلاف بدت ترسملها
بعددد وقت كملت
وجت وتين
وتين مدت ايدها:حتى ني نبي
ايلاف:باه تعالي هي
شيماء:اني يديا فيهم حنه بري وتين حطي هاتفي ف الشحن تلقيه فوق ف داري
وتين:باه…ومشت لغرفة
ايلاف تصكر ف المزود بس شيماء ناشتها وايد ايلاف تلبزت
شيماء: حي بري اغسلها
ايلاف وقفت:وين حمام
شيماء تنادي:وتيييين ياوووتييين
وتين نازله تجري من الدروج طاحت وبدت تعيط
شيماء: شكلها طاحت
ايلاف: تو نشوفها..وركبت لـ وتين
انس ف غرفتها فاق ع صوت وتين طلع ونزل شاف معاها بنت نزل فكرها شيماء لانه وتين منسجمه معاها فكرها وتين قرب
انس:اوقفي مصار شي، وانتي لابسة وين ماشيه
ايلاف فتح عيونه وتلفتت ووقفت بسرعه من الصدمه وقريب طاحت من الصدمه
انس شد ايدها من صدمته هو التاني
ايلاف شافت ايدها:حيي عليك تحنيت
انس حول ايده وشاف الحنه ف ايديه:…وركب
ايلاف نزلت مع وتين ومغسلتش الحنه
انس بيغسل ايده جاه اتصال وقعد يتكلم ع الهاتف ونسي ايده ولم صكر الخط حاول يغسلها بس خلاص يبست تحولت شوية بس قعدات العلامات
ـــــــــــــــــــــــــــــــــــــــــــــ
ف الليل
كلهم يتعشو
انس لابس قوانطي ع ايده وماحد ملاحظ
وتعشو امورهم تمام
ف الصالة صدام عيونه ف هاتفه 
انس يقلب ف القنوات
معتصم يناشب ف وتين:خلاص بري لـ شيماء
انس جت عينه ع القوانطي اذكرها
معتصم يشوف ف انس:خيرك ز المرآة الملتزمه لابس قوانطي
انس: صقع
معتصم يبصر قرب سحب القوانطي 
:محني؟
:محني؟انس قبض ايده: يانننننم…وناض طلع
صدام:فوته ياراجل
انس سمعه رجعله
صدام وطلع
انس شاف معتصم: عيل انت عيييل…وركب لغرفته لكن وقفه صوت بوه
سلطان:انس
انس تلفت:هااا
سلطان:وراي للمربوعة
انس لحقه وايده ف جيبه
سلطان قعمز:قعمز نبيك ف موضوع
انس:شن في…..وقعمز
سلطان تحمحم:هحححم صدام خوك الصغير وخطب وبااسس عيلة وانت السنه الجايه بيكون عمرك 30سنه شن تستنى
انس: عادي مش شرط نتزوج
سلطان: هدا نص دينك وانت عندك فلوس ومش ناقصك شي وهدا حرااام انك ترفض الشي هدا وانت تعرف
انس: اني خطبت وجربت
سلطان: البنت الاوله مش نصيبك وبعدين انت لفسخت مش هي
انس:وووواك
سلطان:الشي هدا حراام
انس ساكت
سلطان: امك شافتلك بنت تخدم
انس وقف:تمام تمام كلموها نظمو اموركم ..وطلع
انس ركب غرفته لم سمع انها تخدم فكرها كبيرة وتشتغل بشهادتها
ــــــــــــــــــــــــــــ
مروو يومين
شيماء تتصفح عاادي وصلها طلب مراسله
شيماء فتحت الطلب وقالت ممكن يكون هو بس ميعرفش انها شيماء
(سلام عليكم)
شيماء:(وعليكم السلام)
(شيماء اني مازن)
شيماء نصدمت:معقولا نفس المازن صاحب انس
وكلماته قتله نعرفك تفضل في شي
قاللها انه شافها ومعجب بها
وطبعاا يكذب لانه ميعرفش شيماء ولا شايفها ولا شي
شيماء صكرت نت
ـــــــــــــــــــــــــــــــــ
انس لبس وطلع:شن صار
عبود:البضاعه نضيفه
انس:كوويس حني خدينها بـ سته الف وانت تبيعها لـ مازن بـ تمانيه الف
عبود:تمانيه؟!
انس:لسمعته
عبود:ومازن بيشري؟!
مازن خش:اي ناخدها بعشرة
انس شافله ع جنب
مازن:بعشرة انت واخدها بسته واني وبنشرها منك بعشرة
انس: شاطر
مازن: بس البضاعه بنجربها
انس:اي جرب
ــــــــــــــــــــــــــ
كريمه قابلة ايلاف وعرفت قصتها انه امها متوفيه وعايشه ف حوش جدها بس ميتين وقعده مع عمتها ومع بوها
وكلهم يخدمو وايلاف قعده تقرا
خطبوها وبدون راي ايلاف بوها وعمتها وافقو وبعدين عطو علم لـ ايلاف
ايلاف وافقة ع نظرة شرعية لكن كانت متاكده انها بتاخد الولد الصغير مفكراته اسمه انس لانه مفكره انه انس اب وتين وعرفت انه صدام خاطب ومعتصم متعرفاش ولاشيفاته بس فكرت انه هو انس
ـــــــــــــــــــــــــــــ
تسريع الاحدات
ف يوم المقابله
انس ف المربوعة وخشت ايلاف
ايلاف بتقول السلام عليكم طلعت منها:هدا انت
انس وقف: انتي بيعطوك ليا شن بنربيك عندي
ايلاف: بلا سماطه قصدي انت مش متزوج وعندك بنت
انس: تستغبي ولا اتستعبطي
ايلاف سكتت
انس:وتين بنت خوي الميت عاصم
ايلاف: ربي يرحمه
انس حسها هاديه وطيبه:سلمك اي فشني تخدمي؟!
ايلاف:نقرا اني
انس: شن تخصصك؟!
ايلاف:محاسبه
انس: من الاخير وبدون كثر دوه اسالي لعندك
ايلاف تحشمت كان عندها هلباا اسالة : معنديش اسالة
انس حسها متحشمه:اني اسمي انس محامي عمري 29 سنه شن تبي تعرفي تاني
ايلاف ضحك من الحشمه:لا شي
انس:اوكى، وانتي؟!
ايلاف:اهاا اني ايلاف نقرا محاسبه عمري 19 سنه
انس: تعرفي شن يعني نظرة شرعيه
ايلاف تلبككت وسكتت
انس: يعني حلال تسالي اي سؤال وحلالك تشرطي ونفس الشي حلالك تعترضي
ايلاف:شرطي واحد قرايتي
انس:اوكى واني موافق لكن مش متاكد اني بنسمع موافقتك ع شروطي
انس: الاول والاهم فيهم وقبل مانقوله خلي ف راسك انع اني كنت خاطب وفسخت بسبب الشرط هدا هو مهما صار مستحيل تكذبي بحرف تبي تقولي متخلف اي شي حرة بس اني مخلوق ندفنك ف مكانك لو تكذبي بحرف عليا
ايلاف ساكته
انس:وتاني شي اني سكني عائلي يعني ف حوش العيلة بس ف جناح خاص بيا
والتالث شرطي هو ممنوع الصالات والحفلات
ايلاف شافتله تواني: شروطك نفس قانوني العائلي نوعا ما موافقه عن اذنك وطلعت
ـ
رجع انس وجوه مقلوب كان مضغوب وكللل همه انه يقول انه رااافض لكن تعب من كلام بوه هدا حرام وووووو قرر يوافق ويكمل الموضوع بطلاق عشان يتصكر الموضوع 
ــــــــــــــــــــــــــ
ــــــــــــــــــــــــــ|||||
ــــــــــــــــــــــــــ
انس شرط تكون خطبه ف نهاية الاسبوعين هادم وتكون خطبه عائلية ووافقو
وتمت الخطبه ف ابسسسط البساطه وكريمه لبسة ايلاف
ايلاف غيرت قفطانها: مش طايقني حسيته
حنين بنت جيرانهم:لالا شكله غارق هدا علاش قرب الموعد
ايلاف بتبكي:اني شفته ياحنين تي كبير وامه حسيتها تخاف منه هدا كف منه نموت تحته
حنين: انتي وشطارتك ياماما
ايلاف: خامرة طول عمرك تفوو فاش تفكري
حنين:نفس لتفكري فيه
ــــــــــــــــــــــــــ
ورحو وغيرو
انس خش وبدو يباركوله ويقعمزو
كريمه:اي مشالله علها تخدم وتقرا
انس ركز:اي صح نسيت مسالتش هي تقرا فاش تخدم؟!
كريمه:مزين تمكيج وتحني
انس وقف:نعممم علاش ماحد قالي
رانيا:معنديش علم حتى ني
كريمه:وين العيب
انس.انيي انس سلطان ناخد وحده تنظف ف شعر الناس وتمكيج ف الناس لااو فوق هدا كله تحني يعني يومها لم شفتها كانت تحني فيكم
كريمه:ووين المشكله شاطرة ومتعلمه كل شي
انس تعصب: شيماء عندك رقمها
شيماء:اي عندي
كريمه عيطت عليه:شن بدير نكلم فيك
انس سجله من شيماء:هكي تو نتفاهم معاها….وركب لجناحه
انس اتصل ومنتبهش انه الساعه 2.00
ايلاف راقده شفاته رقم غريب دارت الهاتف صامت 
وكملت نوم
وكملت نومانس اتصل اتصل وبعتلها رسالة (اني انس افتحي الخط)
وهي راقده
ناضت الصبح ساعه تسعه شافت المكالمات ورسالة معدلتش ناضت غسلت وجها
وشافت هاتفها ولع قربت وكان انس المتصل
ايلاف:ايوواه
انس: وين هاتفك شفتي المكالمات
ايلاف:كان صامت خير شن في
انس:انتي تشتغلي
ايلاف:اي نشتغل علاش
انس: تبي تكملي معاي اني ميشرفنيش مرتي تخدم الناس ولا تخدم
ايلاف:عفواا
انس: مكانش عندي علم بخدمتك وتوا عرفت خلاص معاد في خدمه
ايلاف: اسمعني…قاطعها
انس تعصب:هي كلمة واكيد سمعتها وفهمتي عليا
ايلاف: لكن…قاطعها
انس:مافيش لكن خدمه تتوقف ولو نعرف انك مشيتي للخمر لتخدمي فيه اعتبري نفسك لا شفتيني ولا خطبتك ولا صار شي وصلت
ايلاف:لا انت شايف روحك هلبا عفكرة شن الاسلوب الزفت هدا صبح خدمتي مش رح توقف اني منديرش ف شي عيب ولـ تبي اديره ديره عندك اربعه حيوط اضرب راسك وين ماتبي….وصكرت الخط عليه
انس شاف الشاشة بصدمه:هادي تتكلم معاي هكي الحساب كبر …ونزل
انس:ياام يااام
فاطمه:امك ادوش خيرك
انس:خالتي تتصلي بـ امها الفرخه هادي وتكلمها توقف خدمه وكان رفضت انها توقف خدمه قوليلها بنتكم عندكم ولا نعرفوهم لا يعرفونا وتم
فاطمه:استهدي بلله حرام عليك البنيه امها متوفيه وعايشه مع عمتها
انس:ميهمنيش لعندي قلته ولوونعرف انها مشت لخدمته متع الخمر والدوه الفاضيه اني بنفسخ واهو عطيتك علم …وطلع
سلطان كان ف الصالة وسمعه: اتصلي بيهم يافاطمه كلم انس صح هو من حقه يتشرط هادي بتكون مرته
فاطمه اتصلت وعطتهم علم وزينب وافقت
زينب:ايلاف ايلااف
ايلاف طلعت من غرفتها :نعم
زينب:اتصلت عمتك فاطمه وقلتلك معادش في خدمه
ايلاف تعصبت وعضت سنونها وخشت غرفتها
ايلاف خشت غرفتها واتصلت واتصلت بعد تالت مكالمه رد علها
ايلاف:شن مفكرني انت سكرتيرة عندك ترد امتى ماتبي
انس يسوق:ياقليلة الادب اعرفي روحك فمن تكلمي
ايلاف تعصبت: واخدني بلغصب انت صح،للعلم حتى ني مش ميته ع منظرك بابا هو لوافق واني مكسرتش كلمته حط ف راسك اني مجرد شاب عادي لا خطيبي لا شي
انس يسوق:اهااا يعني القصة ف ايد بوك اي معنها حسني اسلوبك معاي خير مانتصرف
ايلاف: تسوق صح برا ياانس نشالله تنقلب بيك بالك نرتاح…وصكرت الخط
انس من قلة ادبها ضحك: محلاها زادت معجبتني
ــــــــــــــــــــــــــ
ضحى تنظف ف الغرف وصلت ف غرفة وائل ريحتها دخان فتمت الشبابيك وبدي اطبق ف ملابسة وجي ف ايده باكو دخان
ضحى نصدمت وقفت:وااائلل واااائل
وائل حس انها عرفت خش بسرعه:هااا
ضحى قامت الدخان:هدا لمني شنوو هدا
وائل جمد ف مكانه
ضحى تعصبت: انت طفل عمرك 12 سنه عيييل ودخنن انت صغيير
وائل:هدا ه هدا
ضحى:ماتكدبش مني عطاك فلوس مني يشريلك
وائل خاف: ماحد اني بروحي
ضحى:كذذذاب وائل مني علمك تكلم او نتصل بعمي
وائل سكت
ضحى خدت هاتف وائل واتصلت بصاحبه لؤي
ضحى:اهلين لؤي شجو….اسمع عادي تجي توا نبيك ف موضوع….تمام نستنى فيك…وصكرت اخط
ضحى خدت الهاتف:توا لم يجي صاحبك لؤي نعرفو القصة …طلعت وصكرت الباب ع وائل قعد يقربع وينادي ع ضحى
فدوى:خيره خوك
ضحى:مافي شي ياام
وطق الباب ضحى طلعت لـ لؤي
ضحى:اهلين لؤي شجو
لؤي:حمدلله وين وائل
ضحى: لؤي خش نبيك داخل
لؤي خش قعمزو
ضحى: لؤي ماتكذبش عليا لؤي وين يمشي قبل الجامع او بعد الجامع
لؤي تلبك:حددد نروحو مع بعض
ضحى: انتم ديما مع بعض يعني تعرف كل شي
لؤي تلبك: نروحو مع بعض
ضحى قامت هاتفها:اوكي خلي نتصل بـ اختك تفتش دارك
لؤي:علااش
ضحى:انت تعرف انه ووائل يدخن
لؤي خاف: وائل ميبيش يدخن هدا معتصم هو لـ قعد يقولنا ندخنو معاه وخدشالنا باكو دخان
ضحى:معتصم من معتصم
لؤي: ولد سلطان
ضحى تفكر الشيخ سلطان عنده صغار صغيرين:باهي لؤي عندك رقمه
لؤي:اي عندي لكن هاتفهي خليته ف الحوش حتى وائل عنده رقمه
ضحى مدت هاتف وائل لـ لؤي:خود هاتف وائل طلعلي رقمه
لؤي طلع الرقم:هدا
ضحى: تمام صحيت لؤي
لؤي وقف:سلمك وطلع
ضحى سجلت الرقم واتصلت
ضحى:الوو
معتصم:ايوواه
ضحى حست صوت راجل مش ولد صغير:لو سمحت نبي معتصم
معتصم متكي ع الكنبه: تفضلي شن تبيه
ضحى فكرت انه اب معتصم : اني ابلته عادي تعطيني نكلمه
معتصم فتحش عيونه ع وسعهم: اهاا انتي ابلته خير في شي هو طالع توا
معتصم مش فاهم شي
ضحى:اهاا اوكى بعدين نتصل لم يجي
معتصم:استاذة معتصم مني تبيه بالك غالطه
ضحى: هدا رقم معتصم سلطان
معتصم ضحك:اي هدا رقمه وانتي ابلته فاش تقري فيه
ضحى خيره يضحك: استاذ للعلم ولدك بنتحاسب معاه
معتصم:خيره شن داير بسلامته 
ضحى: ولدك يدخن وهو يقرا مع خوي ومعلمه تدخين
معتصم فهم القصة:اهاا شن اسمه ولدك
ضحى:خوي وائل
معتصم:حقك عليا تو نتصرف معاه
ضحى:تمام…وصكرت الخط عليه
معتصم: تفوو عليه ولدي معلم الناس التدخين نهاره احرف لا ومتصله هي بكل تقة
شيماء: استاذ معتصم بتوصلني للكورس بعدين
معتصم: سواق عندك ملا تحسبيني
سلطان خش:سلام عليكم
معتصم وشيماء:وعليكم السلام
معتصم:احمم قصدي بري البسي تو نوصلك
شيماء:تبي كان العين الحمراء
شيماء ركبت غرفتها شافت رسايل ع المسنجر من مازن
مازن: وينك
شيماء (اني توا فتحت)
مازن (معاد تصكري)
شيماء(حاظر)
مازن (شيماء خليني نتصل نبي نسمع صوتك)
شيماء خافت (مازن مانبيش)
مازن تعصب:بنت النم بتعبني (اهاا تمام براحتك)
شيماء (بنصكر اني بعدين نفتح باي) وصكرت
مازن: هادي بتعبني الباين يلا عادي حتى هي اخت انس
ـــــــــــــــــــــــ
تاني يوم ف الكلية بعد امتحانهم صار مشكله بين شباب ف المدير طلب انه يكون ف امن ف فترة الامتحانات
يعني من غضوا بيدا ف امن ف كلية الطب
تاني يوم شيماء خشت الكلية كانت معبيه امن خشت لكن نصدمت لم شافت مازن لابس لبسة الشرطه وواقف مع الامن لكن هو مش منتبه علها يهبللل بلبسة الشرطه خشت وقلبها بيطلع
شيماء دارت امتحانها وطلعت وبتنزل شافت مازن ومعاه تلاته من الامن واقفين مع بعض قلبها 
هي نازلة
مازن انتبه علها لكن قعد ف مكانه
شيماء نزلت وقلبها بيطلع وصلت ف البنات قعمزت
ساجده:جاوبتي شيماء
شيماء:اي الحمدلله
شيماء فتحت نت
مازن (تقري طب؟!)
شيماء(اي شفتني)
مازن (شفتك وياريت ماشفتك)
شيماء استغربت (علاش)
مازن (تهبلي)
شيماء مابعتت شي
مازن(وينك توا)
شيماء(في كافي لوطى)
مازن صكر نت
شيماء: ساجده نوضي جيبلي نسكافيه تربحي
ساجده ناضت:اوكى حتى ني نبي اصلا ..وناضت
رحاب لحقتها
شيماء مقعمزة بروحها فتحت الكتاب تراجع ف اجوبتها فجآة تقرب ايد وتصكر الكتاب
شيماء تعصبت قامت عيونها ملامحها تغيرو:هدا انت
مازن ابتسم: مش كويس تراجعي اجوبتك هكي تتوتري اكثر
شيماء خافت:مازن امشي البنات يشوفونا اني الكل يعرفني هني
مازن:حتى ني الكل يعرفني من شن خايفه
شيماء: يقولو لـ انس او بابا
مازن:تمام ماشي المهم سمعت صوتك سلام…ومشي
ساجده جابت النسكافيه مع رحان:هدا كان واقف معاك؟!
شيماء: اي هدا شرطي يدور ف بنت الني قتله نعرفهاش بس
شيماء فتحت نت وصلتها رسالة
مازن(تصدقي اول مرة نشوفك كنت نعرف اسمك بس)
شيماء:(كويس واني نعرفك وشيفاتك مع انس قبل)
مازن: انس انس من بكري درهتلي كبدي ع صبح
شرطي مراد: امس ف محاولت خطف ف شخص حاول يخطف بنت من الكلية
مازن: خلاص بما انه ف امن معادش في مشاكل
شيماء ورحاب مقعمزين ف الساحه وساجده روحت خشت سيارة سودة مظلمه
مازن يشوف ف شيماء من بعيد وهي تضحك مع رحاب ويهدرزو لكن زاد تركيزه من السيارة لجنبهم كانت مظلمه
مازن يشوف ف السيارة كانت مقابلة شيماء ورحاب مازن شك ف البنات بحكم انه البنات كلهم طلعو من الامتحان يعني السيارة فمن تستنى
مازن قرب من السيارة
شيماء شافتله يقرب من السيارة لجنبهم
السيارة ولعت وقربت بتطلع مازن جي قدام السيارة وهكي السيارة وقفت
شيماء خافت وقفت وايدها ع فمها
مازن ضرب السيارة بيده من قدام وبصوت عالي:انزززل
تجمعو مجموعه من الامن مع مازن ونزلوهم من للسيارة مازن يفتش فيهم طلع هواتفهم
مازن خدي الهواتف بصوت عالي:افتحو الهواتف
الولاد الزوز فتحو هواتفهم
مازن يشوف ف الهواتف قام عيونه ف شيماء لقها تشوفله مازن حط الهواتف ف جيبه
مازن قرب من الشبابيك مزق السرفل المظلم:هدا تحولوه وهواتفكم بعد العصر تجو للمركز تاخدوهم الهواتف بيقعدو معاي…وخش للجامعه داخل
مازن خش واتصل بـ شيماء ع المسنجر
شيماء:الوو
مازن:خشي للقاعه متعكم تعالي..وصكر النت
شيماء خافت
رحاب:بوي جي باي
شيماء:سلام
شيماء خشت وقربت من قاعتهم:خيرك
مازن طلع الهواتف من جيبه وكان وجها ميتفسرش:تعرفي هادم شن فيهم الولاد لكانو ف السيارة مصورينك
شيماء سكتت
مازن بصوت حاد:تخيلي انهم طلعو بدون ميحس عليهم حد شن رح يصير بصورك ينزلو صورك ز هلبااا بنات ويكتبو فوق صورتك ليجيب رقمها ياخد هدية وتبدا صورتك زردة من قروب لقروب
شيماء خافت: اني مانعرفش
مازن تنهد:مش قصدي نخوفك المعنى لم تكملي امتحانك تقعدي ف الكافي ومعاد تقعمزي ف الساحه عارف انك قعمزتي مع صاحبك بصدفه وللعلم مصورين مجموعه بنات مش انتي بس
شيماء: تمام معاد تكرر
مازن ف وسط عصبيته ابتسم: خلاص تقدري تمشي
شيماء:والصور كيف بديرلهم
مازن بيتكلم قاطعه شرطي
شيماء طلعت
مراد:مازن مفروض حدفت الصور وعطيتهم هواتفهم وتمت
مازن؛ الصور لو مسحتهم يقدرو يطلعوهم
مراد بصوت حاد:انت تتحمل السؤاليه مش من حقك تاخد هواتفهم
مازن تعصب وطربق الهواتف ع الحيط بقوة:هكي ماحد ياخد الصور واني نتحمل السؤالية
مراد طلع
مازن لم الهواتف من الارض خدي الشفرات منه ولوحهم ف الكناسة (حشاكم)
شيماء شفاته لوحهم ف الكناسة
مازن ركب سيارته بعصبية وطلع
دقايق وجي معتصم روح بها
تتبع..
لقراءة الجزء التالي : الجزء الرابع من رواية اولاد سلطان
لقراءة الجزء السابق : الجزء الثاني من رواية اولاد سلطان
للإطلاع علي فهرس اجزاء الرواية : جميع روابط اجزاء رواية اولاد سلطان للكاتبة ميشو محمد
جميع الحقوق محفوظة للكاتبة ميشو محمد .
