وفي الجزء الثالث والثلاثون من رواية عاصفة الصمت دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء الثالث والثلاثون من رواية عاصفة الصمت
* لبنى متوترة وخايفة تجرح رامي بنظرة عيونها كمثﻻ تنظرله نظرة مش حلوة بدون قصد هدا من غير ان حبيبها نزار موجود … طلعوا عالممر هناء ولبنى وخششتها للمربوعة
رامي عيونه ف الوطى ويهز ف رجله متوتر ونزار يشبح للبنى وكانه بيدير معاها مقابلة شرعية …
لبنى : السﻻم عليكم …
رامي ونزار : وعليكم السﻻم …
*قامت راسها لبنى وشافت رامي اللي كان طرف وحليق انيق وحليوة اصبح شيباني مكرمش بلون بني
غمضت عيونها لبنى وفي اللحظة هادي قام راسه رامي …
فتحت ععيونها وابتسمت وقتله :
هكي رامي انهون عليك ليك شهر مروح ومادورتنيش
{شفشة اشي كيف ادلع فصوتها عالولد}
رامي : ماه انشغلت شوي بس
* ومش قادر رامي يقيم راسه يشوفلها شوية وينزل راسه متحشم من شكله
لبنى : ربي ايعاونك …
رامي : الله يسلمك
لبنى : كيف حالك استفقدتك هلبا
نزار : هئ احم
{له له له غير بشوية علينا }
رامي : حتى انا …. قوليلي كيف حالك وشن اخر اخبارك
لبنى : بخير مدام انت بخير
{ياناري عليا ياكيتي كية مقعمز اتقول مزهرية }
رامي : الحمدلله على كل حال …
* رامي شاد دمعته *
لبنى : عﻻش منزل راسك واﻻ ماتبينيش نشوف عيونك العسليااااات ^^
{موت يانزار مافيش من يدلل عليك الله غالب }
رامي : ﻻﻻ مافيش داعي
لبنى : هاه اماﻻ كيف امممم ماتبيش توريني عيووونك زعلت منك
رامي : ﻻﻻ ماتزعليش اه شوفي عيوني …
* قام رامي طاقية الكاب وشافت لبنى وجهه بوضوح وعيونه الهدوب كيف بيبدو ينبتوا … انتفضت لبنى ﻻ شعوريا … لمحها رامي فرد الكاب ونزل راسه تاني …
رامي صوته تعرعج متأثر قال : قتلك مافيش داعي يالبنى
لبنى : ليش مافيش داعي ؟؟ بلعكس فيه داعي … لما انشوف عيونك نرتاح يارامي
{اضضضرررب فوق ياااا …شورها اتحبه الدعوة … }
رامي : راضية بيا هكي يالبنى واﻻ غير تجاملي فيا …
لبنى : ﻻ مانج…
قاطعها رامي وقالها : لو كان غاصبك نزار ومفنص فيك في الحوش بش تقبلي بيا قوليلي مانبيش انعيش على شفقة حد …
نزار : ماغصبتهاش
رامي : استنى يانزار … قوليلي يالبنى غاصبك نزار عليا
لبنى : ﻻ
رامي : باهي يابنت ناس راضية بيا هكي بشكلي هدا ؟؟
سكتت لبنى وتتدكر في كﻻم نزار وقت فسخت منه غادة …هيا مش بنت اصل لو بنت اصل راهو قعدت معاه …
{خيرها ساكتة …بس ان شاء الله ماتجرحاش ياربي ان شاء الله مايصيرش فيه زيني … بس عﻻش انحس بشعور الغيرة؟؟ }
لبنى : راضية بيك يارامي
رامي : بصدق يالبنى قولي الحق
* لبنى قريب تبكي من وجه رامي
وبدت اتفكر … استغفر الله ياربي ماتوقعتش هكي بيكون شكله … كيف اندير كيف ….
رامي : بصدق اتكلمي
* ومعش قدرت اتشد دمعتها دمعوا عيونها …شافها رامي وقال : عرفت الجواب يالبنى… انتي خفتي مني ومن شكلي وبكيتي …
{باهي بش كان شديتي دمعتك لين روحنا خير }
لبنى : ﻻﻻ مش هكي
رامي : ﻻﻻ خﻻص لبنى مافيش اﻻ هكي … شن اللي بيخليك تبكي غير شكل الشيباني المكرمش
نزار : ماتقصدش هكي يارامي ..
وقف رامي ووقف عالروشن وقال : ماتبررلهاش انا عارف الشي هدا حيصير قتلك خليني نفسخ من اﻻول انت عاندت وخليتها تشبحني وتخاف مني
لبنى : ﻻﻻ انا بكيت يارامي مش ﻻني خايفة منك او مش موافقة بيك بكيت ﻻن تمنيت اللي صارلك صارلي بدالك انت … مانتحمل فيك شي يارامي
{باهي مافيش حد بيقولي كلمتين حلوات يرطبلي قلبي }
رامي : ماترقعيش يالبنى
لبنى : مارقعتش يارامي
جي جنبها وقعمز رامي وقالها : متاكدة ؟؟؟ جسمي كله زي وجهي راهو ….
سكتت لبنى وبكت تاني
رامي : حنفسخ يالبنى وبالله مانبيش نسمع كلمة ﻻ منك نزار وﻻ منها خلوني انعيش ماتبقالي من عمر
نزار : غير اس …
رامي : خﻻص نزار …. شفت بعيني… تبكي خاطرها مش متقبلني وكﻻمها اتقول فيه تجامل فيا واﻻ ساخفة عليا
{ياودي ياضرسي زدتي عقدتيها حسك }
لبنى : انت راضي بقرارك هدا يارامي ؟؟
رامي : راضي ايه
لبنى : به وانا
رامي : انتي بنت ماشاء الله قنينة وجميلة وابتسامتك اتجيب نص وﻻد ليبيا ربي يبعتلك نصيبك شاب احلى مني
لبنى : بس انا تعودت عليك وشارياتك وانتي بعتني
رامي : مابعتكش مابعتكشششش
والله اقريب انروح روحي من الروشن راهوو حسوا بيا خلوني انعيش وحداني مانقعدش نفكر اهو شبحتلي متقززة مني اهو مشت حوش اماليها بتفتك مني ومن وجهي
لبنى : انت ظلمتني انا مش هكي يارامي وعلى راحتك يارامي اللي يريحك ديره …
رامي : تم
نزار : خﻻص بري يالبنى لخالتك وقوليلها قالك نزار هيا …
وقفت لبنى وقال : باهي هي… ربي يسعدك يارامي …
رامي : ويسعدك يارب ….ماتحرجش مني يانزار
نزار : ﻻﻻ ماحرجتش هادي قسمة ونصيب … خلي نروح بالعيلة وتو نوليلك نسهروا الليلة شن رايك
رامي : معليشي خليها غدوة واﻻ بعده
نزار : ان شاء الله به هي نستادنك
رامي : ادنك معاك ياطيب
* روح رامي ويشوف ل لبنى ف المراية وقارن حواجبه …
خ رقية : معليشي يالبنى ماتغششيش روحك القسم ع الله
نزار : رافعك بش تبكي انا ! قولي
لبنى : والله ماقصدي
نزار : تي شن ماقصدكش هادي … شديتي روحك لين تروحي
لبنى : وجعني الولد والله بكيت على حاله بس
نزار : وجعك حاله ماه عارفتيه خظهكي بيكون شكله
لبنى : باهي خيرك اتكشخ عليا
نزار : زدتيه الولد على مابيه انا ماغصبتكش عليه لكن حتى ماقتنعتيش بيه ابتسمتي في وجهه وقلتي كلمة طيبة …
لبنى : قلت كﻻم طيب مش غير كلمة
خ رقية : اخﻻص انت وياها خﻻص انهو مافيش نصيب
نزار : باهي به دارت زي هديكا اللي ماتتسمى
لبنى : تو انا زيها نزار !
نزار : شن الفرق ! بكيتي ف وجهه متع راني مانبيكش افهم بروحك واجعني حالي بنتحوزك لبن الراجل قالي بالك مفنص فيها
لبنى : باهي شنو بنكدب عليه حق والله ماقدرتش نستوعب الموقف ياخالتي كان تشوفيه بس بالك اطيحي سايخة
نزار : شوفي الكﻻم هي وتقولي مش زيها … اقلها قلتيهاله بطريقة باهية
لبنى : ماﻻخير مافيش نصيب بيني وبينه يانزار الزواج مش بلعافية
خ رقية : ياسر انت وياها وصلنا للحوش وانتو طول طريق تتعاركوا
نزار : ماقلتش بالعافية واﻻ شايفتني واخدلك طوبو ونعطي فيك طريحة بش تتجوزيه
لبنى : به شن معنى كﻻمك هي ادف فيا متع خوديه تبي واﻻ ماتبيش
نزار : نقصي صوتك وانزلي
* نزلوا كلهم وخشوا الحوش سكر نزار الباب وقالها : يعني انا في النهاية طلعتيني هكي ؟؟؟ خوديه بسيف به صحة ليك
لبنى : انت تنظر للموضوع من منظور انك انجرحت لما غادة فسخت منك وخايف على رامي يصير فيه نفس الشي
نزار : ايه مزبوط وين تندري عليه شن ايدير فروحه تو هي …الشيطان شاطر
لبنى : به هدا مايعنيش انك تغصبني ناخده
* خلتهم خ رقية وخشت هيا وبناتها ف ديارهم بيبدلوا حوايجهم ﻻن حتى تكلموا الزوز مش حيعدلوا *
نزار : انهارك احرف ع دماغك مزال تقولي تغصبني انوريك فاهمة ! مافيش مرة غصبتك على شي ماتبيشي … وانتهى الموضوع خﻻص معش اتزيدي فيه وﻻ حرف
ضيقتيلي خاطري …
* شبحتله لبنى شبحة حزن ومشت خشت لدارها *
صفاء : ربي يهديك بجديااات
مروة : لو انك سكتي وفتيه خير
صفاء : هو مضايق ع نفسه ومضايق ع صاحبه
لبنى : عفلقني لما قالي انتي زيها
مروة : تي هوا قاعد مكمود تحسابيه نسي لقطة الكلبة غادة
صفاء : ربي يهديك بجديات كان سكتي خير … راهو تكلم كلمتين وفات الموضوع
مروة : شن الصوت التكسير هدا ؟
صفاء : هي تفضلي انسة لبنى هي اهو ناضت عليه الحالة زدتيه على مابيه
*حطت لبنى وجها بين يديها وتبكي
خ رقية : غير بطل سلم ولدي ياسر يانزار انت الكبير العاقل ماتاخدش ع كﻻمها
نزار : وﻻ عمري غصبتها ع حاجة يمة
خ رقية : عارفة غير استهدى بالله
نزار : اتقولي خايف ع صاحبك يصيرله زيك ادكر فيا ان خطيبتي فسخت مني ع خاطر مبتور
مروة : نوضي صفاء لخوك نوضي
صفاء : الصبر ياربي ماصدقنا اطلع من اللي هوا فيه
خ رقية : غير اهفت يانزار
نزار : تعبان يمى تعبان
صفاء : هدي اعصابك نزار … لبنى مصدومة بس ماتقصدش كل اللي قالاته
نزار : تحسابيها صغيرة بش تقوليلي ماتقصدش اللي قالاته
خ رقية : معليشي يانزار فووت
نزار : باهي به … معليشي خلوني نبي نرقد …
خ رقية : رقاط شنو هدا …نوض اشرب معانا شويهية العشية وحلوات وبدل ساعة بساعة
نزار : ﻻﻻ تعبان وناعس وﻻجلي اتسطر فيا
صفاء : باهي … خﻻص خليه يمى… نوضي معاي
خ رقية : ربي ايهدي سرك ياولدي
مروة : نوضي بالكي نوضي بﻻ عياط زايد …
صفاء : والله وجعني نزار
مروة : ها شن قال
صفاء : واضح عليه متأثر وواجعته نفسه هلبا …
لبنى : كله مني ياريتني مادويت ياريتني مادووويت
صفاء : ايه ﻻن متاكدة كل اللي قاله ماقصده بيه شي … غير استاجع لنفسه ولصاحبه بس
خشت عليهم خ رقية وقالن : اتهنيتي يالبنة او … ماتقوليش الولد في فترة حساس … ماتقوليش نراعيه شوية بالكﻻم … ماتقوليش كانت عنده حالة نفسية …تناصي فيه كلمة بكلمة انتي وياه اتقول من ندك ﻻ حسبتي انه اكبر منك ﻻ درتيلي قدر انا موجودة بينكم
لبنى قامت راسها وتبكي قالت : قدرك فوق راسي ياخالتي انتي بحسبة امي لكن انا مش عارفة شن صارلي
خ رقية : حتى كان فيه فرصة بياخدك محيتيها هالفرصة … نسايس فيه امبكري ونقوله فيه بنت بنخطبهالك.. نتكلم عليك يادعوة
صفاء : لكن هيا مخطوبة كيف بتخطبيهاله
خ رقية : حلمت بيهم فسخوا وكنت عارفة ان خطوبتها مع رامي مش حتمشي للقدام … وانا انقوله ﻻ هالبنت تعرف بيك مبتور وترضى بيك ومش عارفة شنو …بكلمتين زي السم منك نوضتيله هم قلبه اﻻول والتاني وبينتي روحك بصورة مشوشة
لبنى : والله ماقصدي ياخالتي والله ماقصدي
مروة : خﻻص خﻻص سكروه الموضوع …حتى هوا مايبيش يتجوز راهو…. متحسس من رجله
{بإذن الله حنسافر مع السبوع الجاي نمشي نركب ساق اقلها لما نطلع لشارع انبان شخص طبيعي ااااخ وخﻻص … حتى لبنى طلع تفكيرها زي غادة … مانبيش نتجوز نبي نقعد هكي اريحلي … }
*مضى الوقت وكل مالبنى تبي اتخش لنزار فداره تبي تكلمه اتكشخ عليها خالتها خايفاته تزيد حالته…. طبعا نزار ﻻ طلع من الدار وﻻ خلي من يخشله …
لين ليل مع ساعة 1 هكي و اطمنت لبنى ان الكل ارقد… دارت نقرات لبنى ع باب نزار بظفرها وفتحت الباب … زبطها نزار ودار روحه راقد … قربت منه لبنى وحطتله ورقة جنب خده…
نزار : قيمي عليا ورقك
لبنى : كنت عارفة انك فايق
نزار : به قيميها
لبنى : سامحني نزار
نزار : مسامح دنيا واخرة
لبنى : والله مانقصد وﻻ كلمة من اللي قلته بالله عليك سامحني
نزار : باهي مسامحك خليني توا
لبنى : مش حنخليك
نزار : به شن تبي هي السماح وسامحناك خﻻص خلي المبتور فحاله
لبنى : نزار … انت تعرف اني مانفكرش بيك بطريقة هادي … تعرف يانزار … ماتقارنيش بغيري واللي صار اليوم مش مني اندفعت بكﻻمي مش عارفة شن صارلي
* قاعد نزار عاطي بظهر وقالها : يعني توا جاياني بش تفتحي الموضوع تاني
لبنى : ﻻ بس انت تتجاهل فيا يانزار حتى بعد ماكان رامي رافض نظراتك ليا كانت ارمي روحك عليه ووافقي بيه
نزار : لبنى خيرك ! شن التفكير هدا والله صدمتيني …
لبنى رجليها معش حملوها قعمزت وشدت صبعها الصغير وبدت تلعب بيه قريب تكسره
{باهي طلعت خير ماتزيد توجعني بكﻻمها … بكل هلبنة هادي }
سكتت لبنى وتبكي ..عﻻش هكي شن درت انا في الوقت اللي كان قريب ايكون نزار ليا فركشت كل شي …. يعني خطرلي نهب فيه اﻻ توا …مبردني الولد محتاج لحد يكون جنبه …ياريتني سكتت ولو شوي في السيارة …
نزار : اه ياربي فرج عليا … منين بنلقاها منين … من غادة اللي خلتني واﻻ من لبنى اللي مرة اتحن ومرة تقسى
لبنى : مانقسى عاللي يحبه قلبي مانقسى عاللي يريده الخاطر .. مانقسى عليك يانور العين
تفتلها نزار وقالها : قاعدة اهنا انتي
لبنى تبكي : سامحني نزار سامحني
وناضت تجري وارتمت عليه وهوا متلفت وقتله : انحبك عﻻش تفهم فيا غلط عﻻش
* ومسكره ايدها وتخبط فيه*
لبنى : بالله عليك افهم مش متخيلة روحي مع حد غيرك … انحبك انت وانت مش شايفني ارجوك نترجاك تفهم
نزار : معش تخبطيني راني انحس
لبنى : عﻻش متلفت عليا انثى جنبك وانت ماتحركتلكش ولا ذرة مشاعر
{من قال لوﻻ الحرام والعيب راني خديتك وحطيتك جنبي ليل نهار }
لبنى : نزار
نزار : ياهم نزار
لبنى : انا همك توا … باهي يانزار سامحني … تصبح ع خير
* وقفت لبنى وتلفت نزار وجبدها من ايدها جت فوقه والعين ف العين قالها : به اتحبيني عﻻش تجرحي فيا بكﻻمك ….
لبنى : ماجرحتكش كان كﻻم ومش قصدي بيه شي… صدقني نزار انت حتى لو مقعد انشيلك شيل في هالعين …. كﻻمي كان…كان مجرد ردة فعل بس عاللي صار ووجعي على رامي خﻻني نبكي …اي بنت فمكاني كانت حتبكي …
نزار واساها كويس
وحطها جنبه وتلفتها وقالها بهمس : معش تبكي … ديما نقولك مانتحملش نشوف دموع ع خدودك …
لبنى : به حس بيا بس حس بيا
نزار : حاس بيك ..
* مسحلها دمعته بطرف صبعه *
لبنى : وسامحني عاللي صار
نزار : مسامحك
لبنى : من قلبك
نزار : من قلبي
* قدمت شوي لبنى وباساته على خده … وقتله : انحبك نزار …
لبنى : ههههه لما نكون بحداك ننسى نفسي كل القواعد والحدود اطير …
نزار : اممم لأي درجة تحبيني
لبنى : بﻻ حدود … الى ماﻻ نهاية
نزار : وعﻻش تحبيني
لبنى : اممم ﻻنك كل شي فحياتي
نزار : تبي الحق
لبنى : ايه
نزار : بعد ماروحت ماضايقتش ع خاطر رامي…ضايقني كﻻمك ف سيارة… وحتى انا اضايقت لنفسي قعدت نشوف ان الموقف مشابه ادكرت حاجة مانبيش ندكرها
لبنى بصوت معسول : به معش نضايقك بكﻻمي وعد …
(معليشي اليوم خطرت عليا رومنسية ههههه اللي مايبيش يقراه يدور عﻻمة # هادي اي ان تم النص )
معش شد روحه عمك الراجل قربها ليه اكثر واكثر وحط راسه بحدى رقبتها وخدي نفس عميييق … راس لبنى كان جنب رقبة نزار فقبلته فرقبته….
نزار : هههه عيب عيب ياضرسي مانتحملش نخاف نضعف قدامك …
لبنى : انا لحبيبي وحبيبي الي
نزار : ياعصفورة بيضاء لا بقى تسئلي ….
لبنى : انحبك نزار انحبك
نزار : حتى انا ياضرسي …
لبنى : انت شنو …
نزار : حتى انا انحبك
لبنى : من امتى…
نزار : ليا وقت انحس باحساس اتجاهك بس مانحسباش حب … كنت انحب شخص مايستاهلش الحب …
لبنى : ضمني ليك بقوة … ضمني نيزو
نزار : انتي بتهبليني يابنت … نوضي خير مااطب علينا خالتك رقية
لبنى : هههه والله ماقادرة انوض خليني جنبك .. … خليني قربك …عوضني عن سنين حبيتك فيها وانت مش واخد بالك …
نزار : سامحيني لبنى …
لبنى : مسامحاتك… اللي ايهم انك معاي توا…
نزار قرب منها … ولبنى اتقرب فكانت قبلة سريييعة جدا …
نزار : ههههه واااك ياربي منها
لبنى : ههههه نيزو
نزار : انعم … تي بطلي سحن ركبتك تحفر في جنبي …افردي رجليك
لبنى : هههه به هاه فردت رجليا …
* للحظة نزار معش مسك نفسه ففتحله بطمتين من توتتها
لبنى : هههههه كان ايقولي عيب عيب وهوا شوف شن يدير
نزار : هههه به اسف اسف
لبنى : به يﻻ نبي نعرف عﻻش اتقولي ضرسي اللبني
نزار : اياح بري بري مانيش قايل
لبنى : هههه هيا قووول وراس نيزو
نزار : ﻻﻻ فيش
لبنى : ههههه به قول
نزار : به لكن ماتضحكيش عليا
لبنى : ﻻﻻ مش حنضحك هي
نزار : اممم عندي ضرس لبني ماتنحاش… وسنوني من الخلف اضايقوا ونبت واحد جديد جنب اللبني … ومامشيتش قلعته
لبنى : هههههههه ببجديات تتكلم
نزار : اي بجد…فانتي ضرسي اللبني
لبنى : ههههههه
{نبيك حﻻلي يابنت والله شاد روحي بسيف… زعما نسئلها تتزوجيني واﻻ نديرهالها مفجأة غدوة … بنهبل يالبنى عليك بنهبل }
#
* في هاللحظة وصل مسج لنزار فمدتله التليفون لبنى
رامي >> نزار سامحني اتصلت ب لبنى هلبا مرات نبي نقولها سامحيني … ونبي نرجعوا عارفك صاحبي وحتوقف معاي … بجديات حسيت حاجة ناقصتني من بعد ماروحتوا … كلم ضرسك واقنعها
نستنى ف ردك ….
لبنى : خيرك نيزو عﻻش مﻻمحك اتغيرت شن قريت .
نزار : رامي يالبنى …
لبنى : خيره
نزار : هاك اقري …
* خدت تلفون لبنى وقرت المسج وانصدمت … *
لبنى : نزار … نزار كيف بتتصرف مانبيشي… نبيك انت …. بالله عليك ماتردنيش ليه ماصدقت
نزار : باهي غير اصبري … حتى لو مارديتكش ليه… مانقدرش نكون معاك يالبنى … صاحبي هدا
لبنى : ﻻﻻﻻ بالله عليك نزار كيف فرحت بيك
قعمز نزار وواسى روحه وقالها : به كيف اندير يالبنى كيف
لبنى : قوله ان خالتها ماوافقتش و و وان اللي يفسخ مرة معش عندنا ليه نصيب
نزار : حتى ولو معناها مانقدرش اندير وﻻ خطوة للقدام حنقعدوا هكي
لبنى : اخ وخﻻص ان شاء الله ربي يفرج علينا …
نزار : هي نوضي لدارك نوضي
لبنى : باهي حبيبي …تصبح ع خير
* من تاني يوم كلم نزار رامي وقاله على الكدبة اللي قالتها لبنى ..زعل رامي شوي ورضي …ومرت اﻻيام وكان كل يوم نزار ولبنى عايشين غراميات طالعين مع بعض ويتفسحوا ويهدرزوا وشبه نزار خطبها من امه هههه عاش معاها اجمل اللحظات.. مروة وصفاء بدو يشتغلوا ف الشركة وانطلقوا للحياة … بعد فترة اي مع نهاية سنة 2011 خدي نزار تدكرة وسافر ل المانيا ركب ساق وتعود عالمشي بيها … ورجع في شهر
3/2012
وقت رجع سمع بخبر رامي انتحر … استاجع لهلخبر المؤلم . . واكتئب رسمي …
بعد عدة اشهر قدم نزار في شركة وبدي يشتغل فيها … وباع الدوبلكس وفلوسه حرقهم و الفلوس اللي كانوا عنده حرقهم ﻻن فلوسهم ماكانوش حﻻل ورجع سكن ف حوشهم القديم … وربي هداه وبدي يصلي … ويمشي لدعوة اﻻسﻻمية مع العشية يحفظ في القران …
ميار : بابا بابا …
نزار : ياعيون بابا
ميار : ثتلك ماما العدي تاتي ..
نزار : هههه واااتي
ميار : تاااتي
نزار : واااتي
ميار : تاتي !
نزار : هههه به قولها نكتب هالسطرين ونجي
ميار : امممبه …
* رجع نزار كتب ف مدكرته …
اتجوزت لبنى ف نهاية سنة 2012 وبعد شهرين حملت لبنى وبعد تسعة شهور جابت طفلة حلوة سميتها ميار … وها اليوم احنا في تاريخ 30/4/2015 وهادي كانت قصتي من سنة 98 لحد توا … نتمنى ان قصتي عجبتكم
وماتزعلوش ﻻنها تمت اكيد لوزة حتكتبلكم قصة جديدة تتفاعلوا معاها بس ردوا بالكم تنسوني … تحياتي نزار الديناري ….
* وسكر المدكرة *
جت لبنى من خلف نزار وبساته ف رقبته وقتله : شن ادير حبيبي
نزار : هههه شي شي حبيبي
لبنى : يﻻ الغدي تاتي هههه
نزار : هيا ياروحي هي اممموه
* مشوا بيتغدوا فخدي اول كاشيك نزار وقال : ماكلة باردة ياشفشة
لبنى : هههه ماه حطيته ونستنى فيك وانت ممن بكري اشبح شن تكتب
نزار : كنت نحسب ف المعاش بنشري حاجات … نوضي نوضي سخنيه مانحبش ماكلة باردة
لبنى : به … شد ميورة ماتخليهاش تقربج الصفرة
نزار : به تعالي ميورتي الحلوة … تحبي بابا انتي
ميار : هباااااا
* مشت لبنى للمطبخ وحطت الصونية في الميكرويف وطلعت مدكرتها تكتب
* تزوجني نيزو في نهاية 2012 وكان عرس وﻻ اروع … واحﻻ لقطة لما درجوه وﻻد جيرانة بالنوبة وكان مع كل دقة طبلة قلبي ايدق… وكنت نرعش … لوقت ماخش غليا وقعمز جنبي … حسيت روحي مالكة العالم كله … حبيبي اللي حبيته صار نصيبي احﻻ يوم بنسبة ليا .. وهادي كانت قصة حياتي مع حبيبي نزار 
نزار : ياضرسي قتلك سخنيه مش تشي فيه النار
لبتى : هي جاية ياروحي …
* ماحبيتش نديرها نهاية تقليدية عرس والكلام ده هههه فختمتها هكي 
متابعين بصمت اعطوا رايكم ولو بكلمة
تمت …اتمنى انها نالت اعجابكم ..
لقراءة الجزء السابق : الجزء الثاني والثلاثون من رواية عاصفة الصمت
للإطلاع علي فهرس اجزاء الرواية : رواية عاصفة الصمت ( جميع الاجزاء كاملة ) للكاتبة لوزة
جميع الحقوق محفوظة للكاتبة لوزة .
