ونكمل قراءة احداث روايتنا التي شارفت قليلاً علي الإنتهاء لكن مع ذلك مازال هناك الكثير من المواقف المميزة المليئة بالجرأة والحماسة والحيوية بين ابطال قصتنا وحبكة الرواية الجميلة التي تفاجأنا في كل جزء، لذلك هيا بنا سريعاً لنبدأ قراءة أحداث الجزء الثامن عشر سوياً لنتعرف علي كل جديد في رواية همس العيون .
الجزء الثامن عشر من رواية همس العيون للكاتبة لوزة ليبية
نورس:الو
وسيم:اهلين
مدت نورس النقال ل هديل
هديل:منو
وسيم:انا وسيم شن اخبارك نورس
هديل:اهلين وسيم…انا هديل تمام بخير شن اخبارك انت
وسيم:تمام ….اسمعي هديل تره اعطيني نورس
هديل:اوك لحظة بس ….
مدت هديل النقال ل نورس وهمستلها :وسيم
خدت النقال نورس وردت:الو اهلين وسيم
وسيم:اهلين بيك …نورس بعدين في العشية وقت بنجوكم حنحط شروط تعجيزية باهي وانتي ارفضي
نورس:اوكي بس زي شنو الشروط
وسيم:مازال مافكرتش المهم ناقشيني وديري روحك متعصبة
نورس:اوكي ماتوصي حريص ههههه
وسيم:هههه تم
نورس:بس فهمني ! عﻻش بدير هدا كله
وسيم:تو بديري روحك مش فاهمة وقطة بريئة … كان عندي الظابط بطوبته ﻻفة عالراجل جايني دايخ من هالخبر
نورس:هههه
وسيم:شيطانة
نورس:به منين جبت رقمي
وسيم:خديته من اميرة اختي
نورس:اها اوكي …
وسيم:اوكي نتلاقو سلام
نورس:سلام
نورس سارحة وهديل تشبحلها ع جنب
هديل:به وبعدين
نورس:وسيم قالي ع خطة
هديل:خطة شنو
نورس:ان هوا بيحط شروط ومش حنتفقوا
هديل:حلووو معناها اياد كلمه
نورس:ايه
وصل اياد للحوش خش وسكر الباب
اياد:السلام عليكم
خ مريم:وعليكم السﻻم
اياد:كيف حالك يمى
خ مريم:الحمدلله كيف حالك انتا
اياد:الحمد لله كويس …اماﻻ وين سرور
خ مريم:ف المطبخ
اياد:به تمام بالله يمى وتيلي حاجة ناكلها مابين ماخديت دوش ونبيك ف موضوع مهم جدا
خ مريم:ان شاء الله خير
اياد:خير خير
خش اياد لداره خدي حوايجه لقي نقاله يرن فا رد
اياد:اها صلاح
صلاح:مش عارف جاني احساس انك بتكلم العويلة
اياد:ايه ايه شوية ونقولهم تو نتلاقو بعدين مع العشية ونقولك شن صار تمام اوكي ..سلام
ومشي للحمام بيدوش
خ مريم ناضت زي الطلقة ومشت ل سرور
خ مريم:سرور سروووور نحي سماعات اللي ف ودانك
سرور:اها نعم ماما
خ مريم:خوك حسه جايب موضوع
سرور :موضوع شنو واما خو
خ مريم:اياد قالي نبيك ف موضوع مهم شوره جايبلك عريس
سرور:وبالك الموضوع المهم ليه ويبي يخطب
خ مريم:مش عارفة فيسع ديريله حاجة ياكلها
سور:به اوكي
بعد شوي طلع اياد من الحمام … وقعمز بحدا امه … ههدرزو شوي
خ مريم:شن الموضوع
اياد:ايه … هدا ياسيدي بن سيد جايين زوز عرسان ل سرور
على خطمت سارة وسمعت هالكلمتين جتهم تجري وقتلهم :ئه ماشاااء الله زوز عرسان خيرنا احنا واﻻ مش غاسلين وجوهنا 
تعرف لمن اتجيب
خ مريم:تسكتي ياام لسان طويل
اياد:هههههه بكل انتي سارة ادكري فيا بواحدة
سارة:بجديات شنو زوز عرسان هادي اعدل يااخي واحد ليا وواحد ليها
خ مريم:تي اتحشمي اتحشمي خوك الكبير ياشفشة
اياد:عادي خليها يمى اتقول اللي فبالها
خ مريم:ما مخليها هكي اﻻ انت راهو … حتى قدام ناس كلمتها طول اتحطها ماادور حد
اياد:ههههه تي غير خلونا ف موضوعنا نبي حل انا
خ مريم:حل كيف لشنو
اياد:الزوز هادو صحابي … حاير كيف ندير
ع خشت سرور جايبة صفرة ماكلة ل اياد
اياد:صحيتي
سرور :سلمك
اياد:قعمزي قعمزي مدايرين اجتماع
سرور:اجتماع شنو
اياد:هدا ياس..
سارة:جاينك زوز عرسان ريتي سعدك لوين واصل او… حتى هما العيون الزرق … كله منك يمى توحمتي ع عيون بابا كنهدا توا عيوني زرق مش عسليات
اياد:ياسارة خلي ندوو كلمتين ع بعضهم ياسبحان الله
سارة:به سكتت خلاص
اياد:المهم ياسرور هادو الزوز صحابي…
خ مريم:به من هما شن يشتغلو
اياد:واحد منهم تعرفوه … صلاح
سرور:مستحيل
اياد:علاش
سرور:سامحني وخيي عارفاته صاحبك لكن مستحيل ناخده
اياد:الولد كويس راهو
سرور:عارفاته بما انه صاحبك معناها كويس لكن مانبيشي
سارة:اشي كيف تتجكتر المعفنة !
اياد:عطيني سبب واحد مقنع
سرور:سمين وانا مانحبش السمان وصاحبك هدا نشوف فيه سمين من وقت كنت صغيرة معناها مافيش امل انه يضعف
خ مريم:عيب ياسرور
سارة:طيح سعدك وخيرهم السمان مش ناس او
اياد:خلاص خليها ياسارة ع راحتها معش تضغطي عليها
خ مريم:به شن بتقول لصاحبك تو
اياد:والله ماني عارف
خ مريم:به والتاني
اياد:التاني اسمه وسيم يشتغل شرطي اقصر مني بشوية
سرور:المهم مش سمين
اياد:ﻻ مش سمين وعيونه ملونات زيك …هاه شنو باهي ؟؟
سرور:مش عارفة ..بس لو انك عارفه ولد كويس خلاص
اياد:باهي كوويس معناها وسيم مش صلاح…اممم غير زيدي فكري ف صلاح وراس وخيتي والله شاب كويس ومافيش منه ودمه خفيف نوتق فيه اكثر من اي شي تاني … انا مانبيش نجبرك عليه….مانبيشكش في القدام اتقولي اياد ضغط عليا وزوجني بسيف لكن زيدي فكري فيه …
سرور:والله عارفه انه كويس وولد ناس بس مانبيش سمان … مانحبهمش
اياد يفكر شن هالعملة هادي توقعتها بتوافق ع صلاح ياربي كيف ندير صاحبي كيف بنصده استغفر الله ياربي
خ مريم:ماتحرجش روحك يا اياد قول لصلاح الزواج قسمة ونصيب تبي نكلمه انا نكلمه
اياد:اخخخخ … ﻻﻻ تو نكلمه انا ونفهمه وخﻻص
سرور:سامحني بنحطك ف موقف
اياد:ﻻﻻ اﻻمور طيبة وخيتي اهم حاجة راحتك هدا زواج دوم مش يوم
سارة: ان شاء الله ربي ايتمم ع خير .. وعقبالي
اياد: إن شاء الله شن نبي غير نشوفكم متزوجات متستتات ومتريحات … وبالنسبة لوسيم قال بيجي غدوة هوا وعيلته
خ مريم:قوله خليه بعد ايام اقلها نوتوا رواحنا
اياد:ان شاء الله حنقوله
نورس:خيره اياد فايتني ومعش دورني من بكري نتصل بيه
هديل:بالك مشغول
نورس:امممم ممكن …
خلي نزيد نتصل
اياد:ايون
نورس:اهلين
اياد:اهلين بيك
نورس:وييييينك حبيبي من بكري نتصل بيك
اياد:توا كيف خشيت داري كنت مقعمز مع العويلة
نورس:اها اوكي
اياد:اكيدة تقصقصي تبي تعرفي شن صار مع وسيم واﻻه هههه
نورس:ههههه ﻻﻻ عرفت
اياد:كيف عرفتي
نورس:من وسيم
اياد:شنو شن حسك قلتي ؟
نورس:من وسيييم
اياد تعفلق وطارتله فقالها:سكري التلفون
نورس:عﻻش
اياد:سكري التلفون نورس
نورس:شنو فيه عل….
اياد:سكري التلفووون قتلككككك
نورس:به به باي
هديل:خيره اياد يلعلع
نورس:قالي اكيدة تبي تعرفي شن صار مشي قتله عرفت من وسيم
هديل:وانتي ﻻش قايلتله تعرفيه غيور وحزار
نورس:اما خير يعرف مني واﻻ من وسيم
هديل:يانورس مرات اديري ف لقطات غبية لين ننصدم فيك انتي اللي دات شخصية قوية هكي اديري
نورس:علاش كيف يعني
هديل:يفترض بيك قلتيله حبيبي بنقولك حاجة لمن ماتزعلش مني راهو صار كدا وكدا ماتحرجش مني
مش يقولك اكيدة تبي تعرفي تقوليله عرفت من وسيم
اياد اتكى ع كنبة ف داره ويفكر … ﻻش اتكلم فيه وسيم متناقشين فيه موضوع هدا … ﻻ اتكلم وﻻد عم و ﻻ وﻻد خال ﻻزم هكي تكسر كلمتي ماسد موقف الهكر زيده حتى هدا … ياودي يانورس بديتي اتعكي هلبا
ومن هون لهون بين ترتيبات وتحضيرات جت العشية وجو عيلة وسيم ل حوش نورس
بعد عشرة دقايق من كيف حالك وشن اخبارك بين خ سالمة وخ فاطمة(ام وسيم)خشو ف الموضوع
خ فاطمة: والله اليوم جاية بنخطب زي ماقتلك ف التلفون و ولدي وسيم مصر انه يقعمز يهدرز مع نورس بيقولها شروطه بش اللي بدايته نور اخره سلامة
خ سالمة:عين العقل … خلي يجي رياض ويقعمز معاهم وتو ييهدرزو
خ فاطمة:به تمام …
بعد ربع ساعة روح رياض وقعمز مع وسيم
رياض فباله هدراه الكبد مرزن دمك ياوسيم النم … متحملك غير ع خاطر نورس وعلى خاطر نبي اختك كنهدا راني مانقعمزش معاك حتى بالكدب
وسيم:صار حالك باهي رياض
رياض:معدلة شن امورك انت وشن مداير
وسيم:الحمدلله بخير
خ سالمة:ياهديل نادي نورس خلي تطلع ل وسيم ف المربوعة رياض جي
هديل:به
مشت هديل ل نورس ف المطبخ وقتلها :قتلك ماما اطلعي ل وسيم … استني ديري روحك فرحانة بش امي معش تزبط
نورس:به … تعرفي تاكلي بكﻻوة كلها نهارك احرف
هديل:من جابها
نورس:وسيم هههه
طلعت نورس من المطبخ وتوجهت للمربوعة ..
نورس:السلام عليكم
وسيم :وعليكم السلام
رياض:وعليكم السلام
قعمزت نورس بعيد عليهم
وسيم:كيف حالك يانورس
نورس:الحمدلله … كيف حالك انت
وسيم:نخش ف صلب الموضوع … شن شروطك يانورس واﻻ خلي نقول شروطي قبل
وسيم:بتلبسي خمار وسيارة حناخدها منك
رياض فباله ..مصح وجهك خمار مرة واحدة !
نورس ل وسيم:ﻻﻻ رافضة شرطك هدا
وسيم:عﻻش شن السبب
نورس:مش مقتنعة بيه الخمار ..
وسيم:اهو قتلك حنلبسك خمار تاني شرط …كان تبي تستمري ف العمل عادي بشرط انا ناخد معاشك كله …
رياض فباله وبنظرة حقد …حق ايه ماه تخدم عندك ياكلب
نورس:علاش انا نخدم ونتعب ف الحوش وبرا الحوش وانت اتجي بالبارد البريدي تاخدلي معاشي !
وسيم:انتي تخدمي بش تساعديني ف مصروف الحوش فانا ناخده بش ناخدلك الحاجات الضرورية فقط
تالت شرط …حوش اماليك مافيش مشي اﻻ يوم ف الشهر
رياض معش قدر يشد روحه فقاله : هلبا هكي بتشدها ع اماليها اللي ربوها
وسيم:يارياض مانقعدش كل شويى وتانية ماشي جاي جايبها عندكم
نورس:ﻻ يابابا هادو امالية شن بعدهم خلاص معناها نقعد غير ع زويلك بتاخدلي معاشي وبتفرض عليا خنار انا مش مقتنغة بيه وﻻ عمر حنقتنع بيه…
وسيم:شرطي الرابع عراس وصالات ﻻ
نورس:بتدفني في الحياة …. سامحني شروطك كلهم مش راضية بيهم … ﻻن مافيش وﻻ شرط اقتنعت بيه وحتى كان بابا اصر ان نتجوزو حتصير مشاكل بينا
وسيم وقف وقال:الباين مافيش نصيب هي السلام عليكم …
رياض:وعلييييكممم السلاااااااام ورحمة الله وبركااااته
طلع وسيم ورن ع امه بش تطلع
خ فاطمة:هي بسلامة مريم
خ مريم:بسلامة
رياض ل امه:متخلف متعقد درهلي كبدي قريب نضت عجنته طريحة
نورس دارت روحها حرجانة وقالت ل امها : مانبيشي ياماما مانبيشي
خ سالمة:علاش خيره
نورس:((حكت اللي صار))
خ سالمة:انهار حرف خيره هدا هبل بالك ولى ملتزم ؟
رياض:ملتزم عينه ﻻبس احسن لبس وشعره معبي جل
نورس:بالله ماما اوقفي معاي خايفة بابا يضغط عليا
خ سالمة: ﻻ مش حيظغط عليك كان سمع اللي سمعته
نورس:ان شاء الله …
ناضت نورس لدارها وخشت وسكرت الباب وارتمت ع سريرها وخدت نقالها بتتصل ب اياد
وسيم:ماصارليش منها نورس
خ فاطمة:اللطف خيرها شنو حتى كان مااعرفهاش قبل نقولو لكن هادي بنت عمك شايفها كدا مرة
وسيم:طبعها وافكارها ماعجبتنيش
خ فاطمة:بلا تزعبين عاد هي
وسيم:قلت لخوها مافيش نصيب
خ فاطمة:حشمتني قدام حوش عمك وسيم:هدا زواج يمى ﻻ حشمة وﻻ واحدة
صلاح:هاه بشر يابو صاحب شن صار
اياد:والله شن بنقولك
صلاح:قول قول
نقال اياد يرن
صلاح :رد عليها
اياد:ﻻﻻ مدايرتلي لقطة مش حلوة
صلاح:به هدرزلي شن صار ف الموضوع
اياد:ايه من امتى تلبس فيهم نظارات هادو … ديما تتسهوك عليا لما نلبس فيهم
صلاح:حبيتهم ع خاطرك هههه تي هيا شن صار
اياد:ااااا ايه اللي صار
**نقال اياد يرن
اياد:شوية خلي نرد عليه
صلاح:احححححح به رد هي
ناض اياد بعد من ع صلاح شوي ورد :انعم تفضلي
نورس:دووووودي حبيبي
اياد:شن تبي
نورس:حبوبي قاعد زعلان مني
اياد:مش فاضي انا توا
نورس:علاش شن ادير دووودي
اياد:مش فاضي وخلاص
نورس:اتهبل … اتهبل وانت معصب …. بنقولك شن صار امبكري ..
اياد:مانبيش نعرف
نورس:غير اسمعني حبيبي ….
اياد:مانبيش نسمع
نورس:غير اسمعني دودي خيرك امبكري فيه رقم غريب يرن عليا ردت عليه هديل وعرفاته وسيم المهم اتفقت انا وياه ع موقف ان الخطبة كيف بتتفركش وفعﻻ شبه تفركشت
اياد يكشخ :تي عارفها بتتفركش ﻻش مكلمة عمه وسيم
سمعه صلاح … تلفت اياد ل صلاح وتلفت عليه ونقص صوته وقالها: ﻻش تكلمي فيه وسيم ﻻاااش كنت حنتفق انا وياه ع طريقة تفركيشة شن خششك ف النص قتلك اطلعي منها واﻻه
نورس:اسفة حبيبي
اياد:امشي امشي قاعد نلقطلك فيهم عفساتك مش ناسي راه
نورس:والله ماقصدي ياروحي سامحني هالمرة وراس دودي حبيبي
اياد:ايه هوا هدا خوديني بلسان وخلاص
نورس:ههههههه انحبك وانت عصبي
اياد:وانا مانحبكش لما اديري حاجة من وراي وتوا صلاح يستنى تو نهدرزو بعدين فيه موضوع متاكد ان ماسمعتيشي من وسيم ونهارك اﻻحرف تتصلي بيه من فضول متاعك وتسأليه
نورس:ﻻﻻ مش حنتصل بحد باي حبيبي
اياد:باي
رجع اياد جنب صلاح وقاله :صلوحة من اﻻخير خايفك تفهمني غلط وموقف ما يفرق بينا
صلاح:ع حسب الموقف كان موقف قوي مرااات ايفرق بينا هههه
اياد سكت يفكر ويشوف ل الوطى نخاف تفهمني غلط وديرني بعتك ياصلاح على خاطر بنت موعرها لما تريس يقولك بعتني ع خاطر بنت اتحس روحك عيل
صلاح:تي هاه وين سارح
اياد:ااا اا …
يتبع…….
لقراءة الجزء التالي : الجزء التاسع عشر من رواية همس العيون للكاتبة لوزة ليبية
لقراءة الجزء السابق : الجزء السابع عشر من رواية همس العيون للكاتبة لوزة ليبية
لقراءة فهرس الاجزاء كاملة : جميع اجزاء رواية همس العيون كاملة للكاتبة لوزة ليبية
جميع الحقوق محفوظة للكاتبة لوزة .
