وفي الجزء الثامن من رواية بقايا امرأة هل سنري تطور كبير في الأحداث ؟ ام ستكون الأحداث في صف احد الأبطال دون الآخر ؟ اسئلة كثيرة تدور في البال سوف نعرف إجابتها سريعاً داخل سطور الرواية، لذلك هيا بنا لنبدأ القراءة سوياً .
الجزء الثامن من رواية بقايا امرأة
واول ماقعمز قعدة مريم تشرب فى طاسة الميه وتشبحله بلؤم … وهوا يشبحلها شبحه مليانه كلها مشاعر وعتاب ولؤم .. ونسرين مركزه معاهم زوز بس مدايره روحها غبيه ومش فاهمه شى … وهنا قالت
نسرين .. احم احم … بنخش لتوليت .. مريم صبى لى وائل فى صونيته …
وخشت لتواليت وسكرت باب الحمام … وهوا اول ماسمعها سكرت الباب .. ناضب بسرعه وشد فى ايد مريم وقاللها
وائل… انى خلاص اعصابى نار … علاش امس مسكره تلفونك علااااااش ؟ قسما بالله لو ماتتكلمى الا ماندير فيك شى توا .. ومش هامنى حد ..\
مريم … انت مهبووووول ؟؟ حول ايدك نسرين تطلع وتشوفنا … وائل بعد … بععععععد …
بس هنا وائل ماعدلش عليها وفقد توزانه وخدها فى حضنه وقاللها …. \
وائل … معاش تبعدى عليا حبييبتى … انى مش قادر نبعد عليك … انى مش طايق حياتى ..
مريم … وائل بالله عليك بعد .. نسرين تطلع يامهبول .. والله تقتلك وتقتلنى ..
وائل .. خلينا نقولولها وخلى ينتهى كل شى توا .. انى خلاص معاش فارق معاى شى وخلى تاخد الا تبيه ..
مريم … انت شن تقول .. نقص صوتك … انت تبينى نتخلى على صديقتى الوحيده .. انت مش عارف نسرين شن بنسبالى …
وائل .. << ضرب ايده فى الحيط وقعد يعيط بصوت واطى >> … خيرا ماعرفتيش صاحبتك لما كنا كل يوم فى بريطانيا نتكلمو شات وفيديو ؟؟ خيرا ماعرفتيهاش لما مشيتى ولامس معاى فى الاستراحه وووو خلينى ساكت خير … مانبيش نقول شن صار… ردى عليا .. انتى تلعبى بيا ؟؟ انى تخليت على صغارى وام صغارى وشريتك … وانتى تقوليلى توا صاحبتى … قسما بالله يامريم لو ماتنهى كل المهزله هيا الا ماانى ننهيها لاانى بطريقتى …
مريم .. انى الا نلعب ولا انت ؟؟ انى الا كنت ولامس معاك وانت امس معاها .. انت كيف ماتكزش من نفسك فهمنى .. \
وائل … انتى شن تقولى ؟ قسما بالله من لما روحت ماحطيت ايدى عليها … وانتى عارفه … من قالك الكلام هوا؟؟
مريم … نسرين قالتلى وهدا الا خلانى نسكر تلفون وينحرق قلبى .. انى مش متخيله انك تكون مع حد غيرى … ومش رح نسامحك لو يوم ضعفت قدامها ..
وائل .. شن تقولى انتى؟؟ تى والله والله ماعاطيها حتى وجه ولانطيف نقرب من دار الا هيا فيها اصلا …ى
مريم … خلاص …ى خليك تتصرف هكى معاها … وانى رح نقنعها انكم تطلقووانه ماينفعش تكملو مع بعض … وبعدين نبعد عليها انى ونتزوجوو .. بس مش انى الا نطلع خاينه صديقتهامع راجلها وواخدته منها ..
وبين هالحور الا صاير بينهم وهوا ماسك فى ايدها بالقوه وبعين قويه ..كانت نسرين تشوفلهم من ورا شق الباب وحاطه ايدها على فمها وكاتمه عيطتها … وبعدين خشت للحمام تجرى واستفرغت كل الا فى بطنها … ووقفت على الحوض .. وقعدة تشوف للمرايه وتبكى … تبكى … وتصبر وتترجى فى روحها انها تقعد قويه للاخير وتكمل الا بداته |… وهدا اقل شى تقدر تديره فى الوقت الحالى … ولو فى لحظه هيا ماخدتش حقها باايدها …مستحيل رح تقدر تاخده بعدين …
وهنا قربعت باب الحمام على اساس طلعت منه .. وحاولت تبتسم … وبعدين طلعت .. ولقتهم كل واحد ياكل فى صونيته وكأن مافى بينهم اى شى ..
مريم … خيرك عطلتى فى الحمام فيك شى ؟؟
نسرين … لالا … مافيا شى … كملو اكلكم انتم بنشوف صغار وبنمشى … \
وائل … نسرين انى طالع تبى شى ؟
وهنا نسرين خشت لدار صغار وانهارت بالبكى … وهوا كان كيف خاش لدار باش يكرر سؤاله ..
وائل .. نسرين .. خيرك ؟؟
نسرين << مسحت دموعه بسرعه وعطته بالقفى وقالتله >> .. مش عارف خيرنى شكلها حصلتها برده وزكمه من مكيف … لا لا سلامتك حبيبى مانبى شى …
وائل … اوك انى ماشى ..
نسرين … سكر الباب وراك ..
مريم … انى بنلقط معاين على صفره نسرين مازال تبى تاكلى ؟؟
نسرين . لا لا ..
وهنا مريم خشت وكيف بتدخل معاين وبتحطهم فى حوض جى وائل من وراها وطبس عليهافى ودنها وقاللها …
وائل … تبى شى اميرتى 
مريم .. بعد ياصايع مرتك تخش وتشوفنا .. خيرك بديت مراهق انت هههه ببببعد
ومشت جيهة تلاجه تحط فى الاكل … \
ووكيف طلع لقى نسرين قدامهم …
نسرين … خيرك فى شى وائل << وشبحتله شبحت غباء وكانها ماشافتش او سمعت شى وتوا كيف وصلت مش من اول ماخش للمطبخ …
وائل … اه لا كنت نبى نشرب ميه بس ..
نسرين .. مالقى وطاوسى قاعدين على طاوله …
وهنا مريم شبحت لنسرين وكأن بدى يضربها خنس .. بس نسرين ابتسمت وقالتلها …
نسرين .. راجل هوا ديما مدهوبه شيرته |<3
مريم .. ربى يحفظكم لبعض يارب
نسرين .. ويحفظك ويخليك ليا .. ياااوفى واخلص صديقه انتى ولو يرجع بيا زمان مستحيل نبدلك بقى مليون بنت
مريم … << حاولت تغير موضوع >> … اى حقا شنى نحس اليوم جوك مع وائل تمام
نسرين … اى والله وبطنى توجع فيا من صبح ونرجع .. ياخوفى يطلع تالت ملحق فى طريق …
مريم … << جتها جمله زى الكف وصاعقه بالنسبه ليها >> … تالت شنى ؟؟
نسرين … هههههههههه شنى تالت شنى .. بيبى
مريم … مش قولتيلى مايصير شى بينكم ؟؟
نسرين .. مش كل شى نحكيلك فيه انى .. كنت نحكيلك على مشاكلنا بس .. ماكنتش مهتمه نحكيلك على الايام الا كنا فيها سعداء مع بعض ..
مريم … اه .. نسرين انتى مرتاحه مع وائل ؟؟ قاعده تحبيه ؟؟
نسرين << نزلت عينها وتلفتت جيهة الحوض وبعدين قالتلها >> .. اكيد مش راجلى وحبيبى ..
مريم … كيف تقولى هكى وانتى عارفه انا فى حد فى حياته ؟؟ كرامتك يانسرين وين ؟؟
نسرين .. كرامتى ؟؟ هيا لما المراه تتخلى على راجل كان كل شى بالنسبه ليها … رح تكون معدومة كرامه ؟؟
مريم … لو انى منك .. مستحيل نقعد معاه لو اكتشفت انا يخون فيا … انى والله خايفه عليك يانسرين ..
نسرين .. ماتخافيش عليا حبيبتى واطمنى رح نعرف نحل مشاكلى صح .. اه … اه .. بطنى … ااااه ..
مريم … خيرك ؟؟ شن فى ؟؟
نسرين … بطنى بنمووووووت … عطينى تلفونك بسرعه بسرعه بنكلم وائل
وهنا مريم خافت ..لانها كانت مسجله رقم وائل بى حبيبى … وقالتلها ..
مريم … رح نتصل بيه انى ملى عليا الرقم … انتى خليك مرتاحه واعطينى رقم بس …
نسرين … مش عارفه نسيته … اه بطنى .. اكيد بعد هوا … بطنى بنموووووت ..
مريم …. رح نتصل بخوى يجى يرفعنا … انى هوا حطنى مبكرى …
نسرين … بالله كلميه بسرعه … رح نخش نلبس
مريم … اوك …
وهنا طلعت نسرين من دارها ومشت لجيهة فازه … ونحت الكاميرا .. وخشت بيها لدار نوم وسكرتها … وفتحت لاب توب بسرعه ونزلت فيديو وقصت منه مقاطع الا هيا مش واضحه فيهم والا باين فيها مريم ووائل على طاولة الاكل ومطبخ … وبعدين حطتهم فى سى دى … وحطتهم فى شنطتها … ولبست عبايتها … وطلعت من دارها .. واول ماطلعت قالتلها مريم …
مريم … اهو خوى مصعب قريب يوصل … خيرك عطلتى فى دار خفت عليك ؟؟
نسرين … خشيت لتوليت .. خلاص بطنى بنموووت يامريم …
مريم … شكله يكلكس … انزلى هيا …
نسرين .. نجيب صغار بس …
وجابت نسرين صغار … وقعمزة من تالى .. وقعمزة مريم من قدام …
واول ماتلفتت نسرين جنبها .. لقت جاكيت خو مريم … فاطلعت سى دى .. وحطاته تحت جاكيته … ودارت روحها طبيعيه جدااااا … واول ماوصلو للعياده .. خلت صغار عند مصعب ونزلو … وخشت لدكتور … ودارت مجموعة تحليلات … وكشوفات … وقاللها دكتور تولى تاخد تحليلاتها تانى يوم .. وفى احتمال انا يكونو نايضين عليها اعصاب معاده … وروحت … واول ماركبت لسياره وتلفتت .. لقت سى دى فى مكانه جنب جاكيت .. وفى اساسا شنطة سى دى يهات جنبه … فاخدت سى دى .. وحطته فى شنطه سديهات من فوق بينما كانت دروحها لاهيه تواسى فى صغار وتطلع فى شيشه من شنطتهم
مصعب … ان شالله خير ؟؟
نسرين .. لا لا الحمد لله … اكيد شوية ارق وبارك الله فيك …
وقعدة مريم تهدرز مع خوها … لحد ماحطو نسرين فم حوشها وهنا مصعب قال لى مريم ..
مصعب .. مريم … شن رايك تخلى نسرين ترتاح وتمشى تسايرنى ؟؟
مريم … وين ؟؟
مصعب … بنمشى نوقف على طابور بنزينه ومانبيش نكسد بروحى ..
مريم .. اوووك … نركب نجيب شنطتى بس ونجى …
نسرين .. بارك الله فيك مصعب ..
مريم … هاتى نركب معاك صغار …
نسرين .. اوك شدى غيت …
مريم .. صغارى هادم ياووووخيتى اموووووه |<3 بنربيهم انى
نسرين .. علاش امهم ماتت
مريم … بعيد السو شن تقولى انتى ظرورى تموتى باش نربيهم
نسرين … لا لا مش شرط … فى احتمال لو جيتى ضرتى ههههههههه
مريم … تتسهوكى انتى ؟؟ مبردك ؟؟
نسرين … هههههههه نبصر عليك ياغبيه
مريم .. مهم صحيتى على غدوا وخلى نمشى نسايره هداكا برغم فوق من نفسى … توا يقولى سايرنى وبعدها يقعد يعارك كان شاف حد قام عينه فيا … ويقعد يلعن ويسب … اخر مره قالى سايرنى خديت بونيه قعده لتوا مكانهاغ زرقه لانا شافنى من غير قصد ضحكت لى واحد والله من غير قصد
نسرين … شكله وعر سلامته وعصبى ومغيار ربك يستر عليك
مريم .. اسكتى ومع توا ركب شاشه صغيره فى سيارتها وعلى اساس موزيكا صوت صوره … بيزيد يتطبق قلبى اكتر … لكن الله غالب مانقدر نقوله لا … بيحطنى فى راسه ومش رح نسلم ..
نسرين .. خلاص كرريها مره تانيه
مريم … حسه يكلكس هههههه ان شالله حبيبتى وسلميلى على وائل
نسرين .. اكيد من غير كلامك
ومشت مريم … ونسرين شبحتلها شبحت خبت ولؤم ونهايه رح تشفى نص غليلها بس … اما نص تانى فااكيد رح تشفيه فى ضحكتها الاخيره ..
واول ما خشت مريم .. وقعمزة .. لقت خوها كيف خدى شنطة سى دى هات .. وفتحهم .. واول ماجبد اول باكو ابيض ؟… قعد يقلب فيه يمين ويسار .. وبعدين ولع سياره ومشى .. وفتح الباكو وحط السى دى فيه .. وشغل على بطمة التشغيل
يتبع………..
لقراءة الجزء التالي : الجزء التاسع من رواية بقايا امرأة
لقراءة الجزء السابق : الجزء السابع من رواية بقايا امرأة
للإطلاع علي فهرس اجزاء الرواية : جميع اجزاء رواية بقايا امرأة كاملة للكاتبة كيندا
جميع الحقوق محفوظة للكاتبة كيندا من ليبيا .
