وفي الجزء الثامن هل يا تري سنري تصادم بين أبطال الرواية ؟ أم ستزداد روابط الحب فيما بينهم ؟ كل هذا وأكثر سوف نعرفه سوياً داخل أحداث رواية تزوجنا ولكن هل يبقي الحب للكاتبة كيندا ، هيا بنا .
الجزء الثامن من رواية تزوجنا ولكن هل يبقي الحب
وصلوووو للحوش وركبت منى ونزلت عزوزتها …
ويايدوبك منى سكرت باب شقه وغيرت بيجامتها وبتحط سزوة القهوه على نار … رن باب الحوش … ومنى قالت ..
منى …. ديماااااااا وهوا ناسى حاجه … هياااااااا ..
وفتحت الباب ومن غير حتى ماتشوف من العين صغيره واول مافتحت الباب لقت قدامها ..
سوسن …. ان شالله غير جيت فى وقت مناسب بس 
منى … ههههه لا لا خودى راحتك حبيبتى كيف وصلت انى .. خشى خشى تفضلى ..
سوسن .. عزوزتك قاعده هنا ؟؟
منى .. ههههه لا لا طلعت مع وائل عندها جلسة علاج طبيعى
سوسن .. اه مالا خلى نخش ونهدرز براحتى هههههه ..
منى .. خشى لدار التقعميز شوووى بس نزل القهوه من على نار ونلحقك باش نهدرزو على كيفنا
سوسن …. ماشى ماشى
خشت سوست للدار وقعمزة وبعدين لحقتها منى وحطت القهوه على طاوله وصبتلها ..
وخشو فى الكلام من هنا وهنا وضحك وتهدريز لحد ما قالت منى لى سوسن …
منى … توا انتبع فى مسلسل << اوراق متساقطه يهببببل >>
سوسن … مالا انى خلى نستادن منك ونخليك براحتك ..
منى … لا لا اقعدى بالله انى ماصدقت غير بنقعد مكسده بروحى ..
سوسن … مالا تم ههههه صامدونا هنا .. انى اصلا حشيشتى تركى …
وفجاه فتحت منى تلفزيون ماباش ينفتحلها وعلى قد ماحاولت ولا قال ينفتح فاقالتلها سوسن …
سوسن … خيره ماباش يخدم ؟؟
منى … اكيد عزوزتى اشبح كيف فركساته .. لانه كان يخدم .. توا شن الحل ..
سوسن … ماعليكش الا بى سيف .. فوق الكترونات وتمخميص ماتفهمى شى ..هههههه .. خلاص توا نكلمه يجى يعدلهولك ويركب
منى … دقيقه بس استنى نكلم وائل قبل
سوسن … اكيد حبيبتى شاوريه وتعالى لبين ماشربت قهوتى …
طلعت منى من دار وخشت للمطبخ وطلعت شيشة مياه من التلاجه واتصلت بى وائل وقالتله…
منى … اهلين وائل انت مازال متاخر ؟؟
وائل … ايه حبيبتى كيف بدينا توا فى تسخين .. علاش ..
منى … تلفزيون خارب وانى وسوسن نبو نتفرجو على تلفزيون … وهيا اقترحت عليا انا تجيب خوها يعدله .. شن رايك انت ؟؟
وائل … والله مادما هيا معاكم اوك .. خلاص قوليلها تجيبه… واصلا الولد باين عليه خلوق ومتربى وولد ناس .. مهم انتى حبيبتى البسى وشاحك وحطى عبايه عليك بس
منى … اكيد حبيبى من غير كلامك خلاص سلام مالا تأخرت على بنت
وائل … سلام حبيبى
مشت منى لى سوسن وقالتلها ..
منى … خلاص قوليله يجى ..
سوسن … اوك ..
وبعدين اتصلت بيه وقالتله ..
سوسن … الوووو
سيف … يانعم … منين جاتك تتصلى مش ترنى اكيد فى مصلحه .. من الاخير انى مش فى حوش ومش فاضى ومش قادر ولااستطيع وخارج الخدمه مؤقتا وبالعربيه الرقم الدى اتصلت بيه خارج الخدمه مؤقتا طووط طوط طوط .. مازل ماده وجهك ..
سوسن … اوك خلاص توا نقوللها سلام ..
سيف … من هيا الا تقوليلها … اااااااااستنى يابللللللللى منى هيااااا ..
سوسن … منى تبيك تصلح ديجتل متعها مش عارفه خيره ..
سيف …. انى فم الباب افتحيلى … وقسما بالله تقوليلها شى تشوفى عداب الهدهد …
خش سيف وسلم على منى وعطاته ريموت ومشت تسخن فى قهوه وهنا سوسن لحقتها وقالتلها ..
سوسن … منى انى بنخش الحمام دقيقه بالله وين ؟؟
منى … اهو قبالتك حبيبتى
واستنت منى سوسن لين تطلع من الحمام بس سوسن عطلت والقهوه بردت فاقررت انها تخششها بروحها وخلاص ..
واول ماخشت لقاته عاطى بالقى ويواسى فى الوصله .. فاقالت ..
منى … احم احم .. تفضل القهوه ..
سيف … شكرا ولو علاش تعبتى روحك .. وهوا كيف بيشد الفنجان تعمد يحط ايده فوق ايدها الا شاده بيها فنجان ومسكها فامنى ارتبكت وبتجبد ايدها تبزع الفنجان على الارض فاطبست بسرعه تقيم فنجان وهوا طبس معاها بس اول ماقامت وجهها لقت عيونه مقابل عيونها ووجهه قبالة وجهها والمسافه الا بين وجهه وجهها ماتفرقش على المسافه الا بين الحاجب والحاجب ..
ناضت بسرعه وهوا ناض وتلفت بسرعه ورجع لديجتل وهيا طلعت للمطبخ تجرى … بينما هوا ماقعدش 5 توانى الا وكان تلفزيون يخدم .. وحط ريموت وطلع وقبل مايطلع وقف على باب وقاللها ..
سيف …. انى متأسف جدا وسامحينى … رونتلك البساط بالقهوه .. وطلع وسكر الباب
منى … ماقالتش ولاكلمه قعدت عاطيته بالقفى بس .. لانها ولاول مره تعرف شن معنى الخوف وشن معنى وائل بالنسبه ليها ….
طلعت سوسن من الحمام …. ومنى قبل ماتطلع سوسن من الحمام مسحت دموعها وخد طلية صابون ومشت تحك فى البساط وعلى خشت سوسن قالتلها ..
سوسن … ماتقوليليش رونلك البساط ؟؟
منى … لا لا عادى مهم رجع التلفزيون << وحاولت تبان طبيعيه قد الامكان >>
سوسن … هاتى نسعادك ؟؟
منى … تبى تساعدينى افتحى على ام بى سى درما بس لانا بادى ليه 10 دقايق او ربع ساعه
قعدت منى وسوسن يتفرجو وفى بعض الاحدات كانت محزنه بس مش لدرجه انا منى تبكى …
سوسن … الله الله عليك قداش شاعريه هههههههه هدا كله على خاطر المسلسل .. نهار ابيض عيونك انتفخو من البكى ههههه..
بينما منى حقيقة مكانتش تبكى على خاطر المسلسل لانا العيون كانو فيه والعقل يخمم فى الموقف…. وشعورها انها غالطه مش مفارقها برغم انها مادرتش شى غلط …… بس للحظه تماسكت نفسها وقالت …
منى ….. هههههه انتى نقيتى فيها اهو تم خلاص ..
سوسن … ساعه كم توا ؟؟
ساعه 8 ونص علاش ؟؟
سوسن … خلاص بروح نهارى توا سيف يقعد يلقح لامى ..
وهنا منى بمجرد ندكر اسمه نقبض قلبها وقالتلها ..
منى … سامحينى كانا عطلتك خلاص وكرريها مره تانيه
سوسن … اى حقا قبل ماننسى هكا ..
منى … شن هدا ؟؟؟
سوسن .. هادى جارتنا امارتيه جابت ولد بعد 16 سنه انتظار وهيا جارتك على فكره بس دور الا فوقك مهم هيا ماقدرتش تنزلك وقالتلى قوليلها تجى ظرورى .. وراهو المره لو مامشيتلهاش تزعل لانا كرشت فيا لين تحشمت …
منى … باهى شن لمه بسيطه ؟؟
سوسن … لا لا مدايرته فى فندق ياماما 5 نجوم هههههه لمه لينا حنا ياحنا ليبيات تلقيهم داكتهم فى دار وحده تقول ربطة معندوس وتقولك لمه … ههههههههه
منى … ههههههههه
سوسن .. هههههههه انى بنطلع توا ونهااررررررك ماتمشيش راهو اسبوع بكرا ساعه 7 واسم الفندق وعنونه تلقيه فى البطاقه .. هيا سلااااام ماما ترنلى باااااى
سكرت منى وراها الباب وقدت تلود وتربز وبعدين قررت انا تقيم تلفون وتتصل بى هدى وتحكيلها كل شى قبل مايروح وائل .. فامشت تجرى لتلفون وقامت سماعه واتصلت وردت عليها سهيله وما طولتش معاها لين قالتلها …
منى …. سهيله هدى جنبك ؟؟
سهيله … اى جنبى هكا خوديها ..
منى … اه هدى شن حالك ليك وحشه ياكلبببببه
هدى … حتى انتى والله وقداش مره بنطلب منك رقم نقال وائل وننسى ..
منى … خلاص قبل مانسكر توا نعطيهولك …. مهم توا نبيك فى موضوع ضرورى .. جنبك حد ؟؟
هدى … لا لا .. كانت سهيله جنبى وطلعت جتها مكالمه من مجد … وخالتى طالعه تعزى ..
منى … معناها الحوش فاضى تمااااام .. نبى نحكيلك حاجه وخايفه منها موووت ومانبيش الكلام يطلع حتى لسهيله ..
هدى … شن فى طيحتى قلبى يامنى ..
وبالفعل منى حكت لهدى على كل الا صار من طق طق لسلام عليكم وهدى كانت ردة فعلها …
هدى … خلعتينى نحسابه حاجه كبيره ياعطيهالك مرات الولد مش قصده ومرات مش مركز علاش انتى تفكيرك مشى الا بعيد .. وبعدين هوا حد فى زمن الشاحح ده يلقى معجبين ويقول لا هههههههه مهم انتى ماتعطيشى وجه بس لكن لايمنع انك تحسى باانوتك شوى لما يحطك فى راسه … بس اهم شى ديما بينى روحك حرفه ووعره وكان طق فى صحيح قولى لوائل وهوا يعرف يتصرف معاه ..
منى … انى نقوووول كيف طيحتى خووووى هههههه تريتك ماشالله مدرسه وانى مانندريش هههههه..
هدى … مش تعرفى بس .. ههههههه برى حسه خلاص توا مؤيد يضبح من فوق .. اسمعى مهم بكرا بنكلمك ظهر ردى عليا ضرووووى …
منى …. مع ساعه كم ؟؟ لانى بكرا بنمشى مزين راهو ..
هدى …. مزين غبر فيك يابلوووه بديتى حتى فى المزين من توا ههه شن عندك ؟؟
منى … هوا الحق بنمشى لبيوتى سنتر وبندير حاجات ظوفراى وشعرى ومكياجى .. وتبى الحق والله كانا دبى مش غاليه رانى كل يوم فى بيوتى شكل بس الله غالب معيشه هنا نار شوى وبدات المنطقه الا احنا فيها .. صح الشقه صغيره بس الحى كله راقى والطراز شقق اجنبى والشقه زى ماتبى انتى كبرها … والله نتمنى جيتكم بساعه ودقيقه بس ..
هدى … دوووختى وخشيتى فى موووضوع تانى .. خلاص بكرا مع ساعه 12 نتصل بيكم بتوقيتكم انتم ههههه ماتخافيش ماشى …سلام ..
منى .. اوك .. سلام … استنى سجلى رقم يابلووووه ههههههه … سجلتيه صح كله … اووووك باااى
سكرت هدى تلفون وهنا اول خشت عزوزتها للحوش ونحت جبتها لانها كانت برا وقالتلها …
عزوزتها … هدى مؤيد سنه يانادى برى برى شوفيه بنيتى لاينطلسله عرق ولا اتنين .. ماهو احنا بناكلوك ..
هدى .. ههههههه لا لا خالتى غير اكيد يبى حاجه مهمه .. << بعدين شبحت لسهيله وقالتلها>> ..سهيله نشوف مؤيد شن يبى وتعالى نطلعو نسيقو جنان << وغمزتلها وقالتلها نبيك فى موضوع >>..
سهيله … ماشى ماشى شوفيه وتعالى اهو نستنى فيك ..
ركبت هدى فوق واول ماوصلت لشقتها وفتحت الباب قالتلها …
هدى … علاش العياط يامؤيد .. شن بنمووووت انى متلا ؟؟
مؤيد .. نحسابه خطوفك بس هههههه
هدى … اه اه اه اه بارررررررد ..
مؤيد … بارررررد .. اخرمره قولتيها دفعتى تمن غالى .. تعالى تعالى .. تعالى هنا بكل احترام خير مايصير فيها جرى ..
هدى … ههههههههههه كانك قدرت تلحقنى هههههههههه
مؤيد … افتحى دار .. افتحىىىىى دار تندمممممى ياهدى .. انتى هكى رح تشددى العقاب هههههههه وانتى تعرفى عقابك كيف يكووون ..
هدى …. مش رح نطلع من دار لحد ما تطلع من الحوش ..
مؤيد … انى طالع باهى لكن حساباتك بعدين .. تى لما نقطعك تقطيع بالساطور ..انتى اصلا تبى قنط من جديد ..
هدى … هههههه قطعنى حته حته وارمينى فى اى حته انا كنت بحبك انت دلوقتى بحب 100 ..
مؤيد … 100 حححححححححححححححححححى عليك حى توى والله الا مانتحاسبو سلام ..
فتح الباب وقربعه ولبد وراء الباب … ومافاتتش دقيقتين الا وهدى قالت …
هدى …. واخيررررررا طلع اوووووف … وفتحت باب وهى ترقص وتقول
<<قطعنى حته حا ا ا ا ا اهه ههه هههه ههه هههه هههه ههه هه
مؤيد ….. ههههههههه صار 100 صار تعالى هنا اااااااااااااااااااااااااااااا هههههههههههههه
هدى …. مؤؤؤؤؤؤؤؤؤيد خلاااااااص والله كنت نبصر .. انى حتى 50 ماطقيتش هههههههههههههههههه
مؤيد … 50 … حىىىىىى على امها هاااااادى نوايه على موتها الليله ….
وفاتت الليله على مؤيد وهدى … زى كل الليالى نشاف وضحك ولعب وعراك وكل وحد يستفز فى تانى بطريقته .. بس فى الاخير يجمعهم قلب واحد فى حوش واحد ….
مؤيد … صباح الخير ياخميرة نوووون فيقى .. صار قطعنى صار ..
هدى … خلاص بطل براده ههههههههه ..
هيا نوضى فطيرنى جعااااااان بنمووووووت ..
هدى .. شنى اليوم انت خديت اجازه ؟؟
مؤيد …. خيرك يادعوه اليوم عيد العمال ..
هدى … خيره كترة الاعياد عندنا .. قريب يديرو عيد لرقاصات هههههههه
مؤيد … يانااااااس كانا سمعها حد انى متبرى منها ومانعرفهاش واول مره شفتها امس الحق وكانت ليله نايس ههههههه ..
هدى … خزى عليك .. حووول اجرى بنخش الحمام ..
خشت هدى للحمام وغلست وجهها وحكة سنونها وهوا نفس شى وقف جنبها وحك سنونه وبدى يحلق لروحه بس هيا حلقة نص وجهه حقيقة وهوا نص تانى . وتقريباااااا نص وجهه الا حلقتهوله يشرشر دم بس تقبلها مؤيد بغصه وابتسمه وقاللها ..
مؤيد .. كملى كملى << تعلم الحسانه فى رواس اليتامه >>
هدى …. حبببيى شن تبى تفطر اليوم ؟؟
مؤيد … اى شى من ايدك حلو ..
هدى … خلاص كملتلك تحليق ..وبنمشى نوتى الفطور
مؤيد … اه قصدك تشريح .. شكرا حبيبتى القديد الا فى وجههى واتى مازال على تمليح ونشر بس هههههه .. تااااانكيوووو بنك مصر
مشت هدى وهيا ميته بضحك لانها بصراحه عرفت كيف تنتقم من مؤيد وتقطعه حته حته بمكينة الحلاقه .. ومافاتتش 10 دقايق هالا والفطور كان واتى .. وهنا فطرو وهدى نزلت باش تكلم منى على تلفون بينما مؤيد نزل باش يهدرز مع امه وبوه … ولما نزل كالعاده لقى بوه يسقى فى الغرس وسهيله .. تكنس فى جنان .. فاقاللهم ..
مؤيد … صباااح الخير ..
هدى .. صباح الخير بابا .. صباح الخير سهيله ..
وبعدين جتها سهيله وقالتله …
سهيله … وينك يابلوه امس خوفتينى
هدى … تعرفى خوك انتى ههههه ماتخافيش بنسالك على مجد وانتى بس شن صار معاكم .. بس خليك شووووى بس نكلم منى ونرجعلك ..
سهيله … اوووك .. نستنى فيك وخشى تلقى امى داخل ..
خشت هدى وصبحت على امها وتاكدت لين الكل لاهى واتصلت بى منى وهنا قالتلها …
هدى … صباح الخير … خيرك ماترديش بسرعه ..
منى … هدا مش نقالى ياغبيه نسيتى .. وبعدين احنا فى طريق توا للمزين ..
هدى … عزوزتك معاك ؟؟
منى .. لا لا فى حوش بيحطنى وائل فى مزين وبيرجعلها .. باش يرفعا للعلاج بعدين لما يحطنى قى الفندق ..
هدى … خلاص نكلمك بكرا وقوليلى شن صار معاك ..
منى … اووك .. سلام وسلميلى على ماما وبابا وسهيله .. سلااام
وائل .. خيره هدى .. ان شالله خير ؟؟
منى .. تتطمن بس .. مهم لما نديرلك رنه روح بيا على الارضى ماشى .. وخودلى اليوم شفره وجهاز حبيبى
وائل … اوك ..
مشت منى للبيوتى ودارت شعرها ومكياجها وظوافرها ورجليها .. واول ماكملت كل شى اتصلت بيه وروحت للحوش باش تلبس حوايجها ويطلعو ..
خشت منى لدارها ولبست قفطانها مغربى الدهبى فى الاخضر .. ولبست الكندره ولبست تاكمها البسيط الا مرصع بالاحجار وكملت .. ووكيف بتطلع لوسط الحوش تشرب طاسة ميه خطمت على صال هالا مقعمز فيها وائل وامه وهنا
…….
يتبع…….
لقراءة الجزء التالي : الجزء التاسع من رواية تزوجنا ولكن هل يبقي الحب
لقراءة الجزء السابق : الجزء السابع من رواية تزوجنا ولكن هل يبقي الحب
للإطلاع علي فهرس الرواية : جميع اجزاء رواية تزوجنا ولكن هل يبقي الحب للكاتبة كيندا
جميع الحقوق محفوظة للكاتبة كيندا من ليبيا .
