الجزء الثامن والعشرون من رواية إمرأة بلا هوية

مهند أدهميوليو 8, 2022

0 1٬165 5 دقائق

وفي الجزء الثامن والعشرون من رواية إمرأة بلا هوية دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة بت محمد جمال الدين .

الجزء الثامن والعشرون من رواية إمرأة بلا هوية

مهند سكت مسافه وقال : رهف دي م حبت ولا ح تحب زول زي خطاب ريحي نفسك…
رؤي : بكره بذكرك !!
ودع رؤي في شرود وهو بفكر في كلامها وقبل م يقفل ليها باب العربيه قال : ح اشوفك بتين تاني ؟
رؤي مبتسمه : متي م تحب يا حب

رهف وصلت المكان المفروض تلاقي فيه رفقه ولما عينها وقعت عليها ،،،صرخت وجرت حضنتها وهي بتبكي وبعدها قالت : مشتاقه ليك حبيبتي
رفقه : انا كنت عايزه اجيك بس ابراهيم قاعد طول اليوم في البيت… الليله سافر طوالي اتصلت عليك..
رهف : حبيبتي  م تتخيلي فرحت قدر شنو لما اتصلتي علي،،،
يلا اوريك بيت اختك عايزه اشبع منك انا م صدقت اني لقيتك
رفقه : ابراهيم ضحي عشاني… اتحمل عقمي وكان ممكن يتزوج بس هو بحبني… لكن بعايرني كل يوم بعدم الخلفه
رهف في حزن : دي حاجه لا بيدك ولا يدو ،،، حاجه بأمر ربنا،، ومفروض لو بحبك صحي م يحسسك بالحاجه دي او يطلق سراحك… بعدين انتي صغيره وانا ح اعالجك م تخافي بوديك لي اكبر دكتور في البلد ولو دعا الامر بسفرك القاهره ،،،، واذا ابراهيم رفض م نجيب ليه سيره رايك شنو ؟
رفقه في فرح : يعني ممكن اتعالج واكون ام ؟ ابراهيم قال لي مستحيل تنجبي
رهف : ابراهيم هو منو عشان يقول ليك كدا ربنا كريم وبكره تملي الدنيا كلها اولاد… يلا غيري هدومك والبسي فستان من الدولاب وانا بجهز الاكل
رفقه : طيب
رهف : بالمناسبه انا راحله شقه تانيه قريبه من دي بعدين بوريك ليها بالبلكونه
رفقه في طيبه : طيب
رهف اتصلت بي الاء عشان تجي تسلم علي اختها وكمان طلبت من مهند يحجز ليها عند دكتور نساء وتوليد شاطر بكره عشان تلحق تقابل قبل ابراهيم يجي من السفر
رفقه في حزن : انا لكن م بقدر ابيت هنا كدا ح اخلي هدي براها وكمان اجيب ليها مشكله مع ابوها ،،،،
رهف قربت منها وقالت في حنان : رغم اني كنت بتمني اختي تبيت معاي لكن م مشكله بكره نتلاقي ونقابل الدكتور ،،،،
رفقه باستها وقالت في فرح : طيب

رهف وصلت رفقه لحدي البيت وودعتها وهي بتبكي لانها ح تتحرم منها مده عشان ابراهيم بجي بكره زي م هدي اتصلت وقالت ليها وتاني م بسمح ليها تزورها علي قريب واجلو حجز الدكتور..
الاء اتصلت عليها وقالت جايبه معاها بنات يأجرو الغرفه…
رهف حددت ليهم الايجار واتفاوضو معاها واصرو انها تزل المبلغ شويه لانو كتير عليهم … بعد مشو رهف عاينت لي الاء وقالت : انتي متأكده انهم بنات شهاده عربيه ولا شهاده مرضيه ؟
يضحكو الاتنين وبعدها الاء قالت : م ح يضروك بي شي ،،، كلمت النجار بكره يجي ويفصل ليك الغرف عشان كل زول ياخد راحتو ،،،،، انتي استعملي حمامك الداخلي وهم البره والمطبخ مشترك م مشكله شرحت للنجار
رهف في حزن : طيب
الاء عاينت ليها وقالت : عايزه مهند يحس بيك صاح ؟
رهف في ارتباك : شنوو؟ والله ي الاء انتي بتقولي كلام غريب  كيف يعني انا بحب مهند ؟
الاء : بس تمام انا م قلت بتحبيه لكن طالما جات منك حلووو..
رهف في غضب : الويه عايزاني ازعل منك ؟
الاء : عايزاك تكوني مبسووطه ،،، المفروض انا صديقتك الوحيده يعني… انتي بتحبيه كأعنف م يكون الحب  مشاعرك تجاه يانعة بس قويه جدا حتي اقوي من مشاعرك تجاه خطاب .
رهف عيونها اتملت دموع وقالت : بس هو شاب وجيه ومشهور يعني البنات حواليه زي النحل في الخليه… وكمان انا ارمله صحبه كان ح يتزوجني،،،، يعني اذا هو حباني وقبل يتزوجني اهله م ح يوافقو
الاء : اذا حباك ح يتحدي العالم كله ويتزوجك وكونك ارمله م بتفرق معاه بعدين انتي عسل وصغيره الف واحد يتمناك ،،،،
رهف : تسلمي حبيبه دايما بتديني طاقه ايجابيه… بس قولي لي اعمل شنوو؟
الاء : اسمعيني انتي حياتك كلها مجازفات خوضي المعركه وفوزي بي قلبه…
سكتت وطلعت التلفون من شنطتها وقالت رهف : مليني رقم مهند بسرعه…
رهف نطتت عيونها : عاوزاه لي شنو؟
الاء : بعد شويه ح تعرفي بس اثقي فيني
رهف :…… .09122
الاء سيفت الرقم وعملت اتصال : الووو مهند… اخبارك شنوو؟ انا الاء صحبه رهف معليش شلت رقمك بدون اذنك،،،،، قبل اسبوعين كنت عايزه استشيرك في تصميم الشقه حقتنا عش الزوجيه  ،،، بس بتصل عليك تاني واجيك في المكتب…
مهند : مرحب بيك في اي لحظه المكتب مكتبك
الاء : تسلم يارب ،،، قبل م انسي ،،،،، رهف الليله او امس اتصلت عليك ؟
مهند في اهتمام : لا ابدا ،،، خير في حاجه؟
الاء : امس تلفونها طول الليل مشغول والليله نفس الشي من قبيل م قادره اصل ليها
مهند : مشغوول؟؟  غريب الموضوع دا ،،،
لحظه اشوف الحاصل شنو ؟
قفل بسرعه والاء صفقت وحضنت رهف : واااااو بلع الطعم  اسي ح يرجع ليك…
رهف : بس تلفوني م مشغول ولا شي
الاء : اسسسي يكون مشغول  ح اتصل عليك انتي افتحي الخط…
مهند قفل وحس بي ضيق شديد ،،، تلفونها مشغول ؟؟ حتي اقرب زوله ليها م بترد عليها معناه في حاجه ،،،، معقول تكون ارتبطت ؟ ليييي م تعيش حياتها صغيره وجميله والف من يتمناها …….
اياد جا طالع من المطبخ وشايل مك فيه قهوه ومداه لي مهند وهو بقول : المطبخ داير يطير طير جيب ليك وحده ترتبو ليك… الاسمها رؤي دي م بتخجل علي دمها يوم وتقول ارتب لي مهند دا الشقه حقتو هو قاعد براه… نسوان اخر زمن  لكن هي فاضيه من الكريمات ومشي مراكز التجميل كل يوم لما طلعت منها رهف كانت زي الفل …
مهند وهو شارد : بكره بتصل بي شركه نظافه الموضوع م خطير… بعدين البت ناعمه وبت عز ،،، تكون طول عمرها م غسلت كبايه..
اياد : اذا متيم بيها للدرجه دي رسل لي اخوانك ونمشي نكتب الكتاب .
مهند : انا م زول عرس انا بعشق الجمال بس بعدين زي رؤي دي م بتنفع لي عرس واسره لكن الصراحه عاجباني شديد ،،،،،،
رهف مسكت التلفون في يدها في توتر … شفتي ؟؟ م اشتغل بي شغله انا اصلا ولا علي باله ،،،،،، همه يكون كل يوم مع حسناء شكل،،
الاء : ح يتصل امكن في حاجه اخرتو ؟ انتي افتحي الخط… بعد اتصل عشان يتأكد انو تلفونك مشغول،،، اسمعي كلامي ،،،،،
قبل م تدخل مكالمه الاء اتصلت عليها بسمات زوجه عمها وهي بتكوورك : الحقينا ي بتي كريم عمل حادث وحاليا في العنايه المكثفه بين الموت والحياة ود عمك ضاع خلااااص…
————————————–
———————
*☆إمتناني *
*☆بت محمد جمال الدين☆*
*☆يتبــــــــــــــــــــــــــــــــــــــــــــع☆*