وفي الجزء الثاني من رواية بايرة حلتنا دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة مريم أحمد .
الجزء الثاني من رواية بايرة حلتنا
طبعا خشمي بقى ملح ملح وما عرفت أودى وشي وحسيت نفسي مهبطه والدنيا دايرة ولافة بي
قلت ليهو بهجمة كدة شنووو أمك
! قال لي ما أمي لا البتجيكم من الصباح وبتكرهكم البيت والبتبزق وهي بتتكلم
قلت ليهو وحات أسم الله أنا ما قايلاها أمك لاني لو كنت قايلاها ما كان أتكلمت قدامك
قال لي المرة الجاية ما تتكلمي وتقطعي في الناس سااي يا أستاذة وخلي عندك شوية زوق وبطلي الهمجية الانتي فيها دي وعاين لي من فوق لتحت وأداني ليك تحميرة جامدة كدي وفات خلاني بتلفتجريت جرى على بيتنا عاد تاني أوريهو وشي كيف وأنا قطعت في أموشوية وقعدت ليك في نص السرير وفجاة كان أتذكر ليك أنو دة ولد محاسن المغترب البتتكلم لينا عنو طوالي وولدي فعل وولدي ترك ورسل لينا وسوا لينا وجاب لينا… أنا كيف ممكن أنساهو، لكن عاد الجنا كان شافع عان هسي بقى كبير وسمح كيف فعلا الزول ما شين الزول مفلس بسيلا أنا ما شفتو لي زي سبعة سنين لانو قبل هو يسافر ويغترب بتلاتة سنين أنا كان مشيت ناس حبوبتي قريت الثانوي عندهم ولمن جيت راجعة قالو لي أنو سافر فما شفتو قريب، بقيت بفكر وبتخيل أني عرستو وجبنا عيال والضحكة من الاضان لي الاضان، وأنا في عز سرحتي ديك أحس ليك بلبعة حارة في نص ضهري، عاينت لقيتها دي ننو صحبتي قلت ليها حسبي الله دي شنو دي اليد العندك دي! تقول يد فندق شدة ما قويةقالت لي أسحريني بالله قلت ليها قطعتي لي سرحتي وبعدين مالك ضاربني كدي كاتلة ليك زول أنا يا بت الناس! قالت لي سرحانة وين بناديك لي ساعة ما بتنضمي أكيد سرحانة في العرس صح! أصلو دي أمور البايرات قلت ليها لا عاجباني إنتي المعرسة وعندك خمسة عيال قالت لي على الاقل أنا مختوبة لكن إنتي الما حصل نضمو فيكقلت ليها قربتا يختي شهر شهرين وتسمعي ميامن عرسوها
قالت لي حلم الجعان عيش قلت ليها مشششم كنت دايرة أحكي ليك لكن بعد كدي تشمي قدحة قالت لي لالا خلاص النبي فيك كان تكلميني قلت ليها قبل شوية مشيت الدكان و…. حكيت ليها الحصل كلو، قالت لي سمح قلتي لي! قلت ليها ملاك نازل من السماء يا بتي قالت لي عاد لازم تجازفيهو بي أي طريقة قلت ليها دة كلامك اكيد ح أعرسو لكن عارفة شنو شلت هم ولادة الغربة قالت لي بسم الله هو إنتي متين لاقيتهو عشان تفكري في الولادة!قلت ليها يا بت أنا أخترت اسماء العيال زاتو قالت لي بري بورتك كعبة يختييي قلت ليها الله يفكها قالت لي أميين لكن نسيتي أنك قطعتي في أمو يمكن ما يعاين ليك تانيقلت ليها حريقة فيها ما الكلام القلتو عنها صحي دايرين يخلوني ما أعبر واتكلم دا أنا كاتمة جواي حاجات كتتتيرة وبعدين أحسن زاتو قلتلو لي ولدها عشان يوصل ليها الكلام وتبطل البتعمل فيهو دة، بقينا بنتونس وبنفكر نجيب رأس الجنا كيف جاتنا أمي تكورك قالت لي يا بت يا ميامن قلت ليها أها أها قالت لي قومي غسلي العدة قامت قيامتكقلت ليها وحات الله ما بقدر أنا فترانة فتر بعدين مافي زول غيري في البيت دة جنكم ميامن ميامن هسي كان عرستا بتنادو لي منو! قالت لي البورة جننتك في راسك الماكن دة وطبيعي حتكوني فترانة من كتر القولات والقطعية مع الاسمها نسيبة دي، نسيبة طوالي قالت ليها هسي نسيبة مالا يا خالتي سالتك أنا! قالت ليها إنتي وهي الاتنين فارغات وقليلات أدب أمرقن على العدة دي سريييع، قومتنا بالغصب مشينا غلسنا العدة وتابعنا باقي ونستنا، أها قريب المغرب كدي ننو قالت لي ماشة بيتهم قلت ليها أرح النقدمك قالت لي الليلة الزوق دا جايباهو من وين! معلم الله ساكنة في الحلة دي لي أكتر من عشرين سنة ما حصل مرة قلتي لي أرح نقدمك الا أكركك أنا بيدي حتى تمشي الليلة خبارك! ما تكوني عيانة بسسقلت ليها قايلاني ماشة عشان خاطر عيونك لا يا السمحة أنا ماشة كان أشوفو في الشارعقالت لي وانا أقول مالك أتاري الموضوع كدي عاد قهرتك بالله يا بت أمي قلت ليها يلا أنكري قدامي، مرقنا وأتقدلنا في الشارع ومشينا بي راحتنا لحدى ما وصلتها قريب لي بيتها وأخدنا لينا ونسة نص ساعة حتى بعد داك جيت راجعة، لقيتو ليك قاعد في مصطبتهم وبشرب في سجائر، في قلبي قلت أريتني كان سجارة أححييي انا
يلا هم بيتهم قصاد بيتنا وفاتح فينا، بقيت ماشة وبعاين ليهو وفاتحة خمشي مرتين لقدام وريالتي سايلة وهو لمن شافني مركزة معاهو قام غمز لي وأنا من اللبشة ما أنتبهت لي الحجر القدامي وجيت واقعة وشلوفتي دقت الواطةجا جاري وشغال يقول لي يا ساتر يا ساتر وماسك الضحكة بالجلالة، قومني على حيلي وكان ماسكني من يدي أنا هنا تهتأ لمكان بعيددد وأتخيلت أننا في المطار مسافرين شهر العسل وهو ماسكني من يديقال لي هيي يا إنتي سرحتي وين! قلت ليهو فكني كلو بي سببك قال لي هو شنو البي سببي! قلت ليهو الوقعة قال لي لييه أنا جيت وقعتك ما براك وقعتي، في قلبي قلت عامل نفسك ما فاهم يا إبن اللذينفكيت يدي منو ومشيت بيتنا بسرعة وقبل أدخل لقيت أمي واقفة جنب الباب وشايلة خرطوش موية في يدها قالت لي وأخيرر شرفتي دة كلو بتقدمي فيها ما كان تقعدي تشربي معاها شاي المغرب مرة واحدة قلت ليها انا..هو.. قالت لي ما ما عندك كلام تقوليهو خشي لي جواً تخش فيك حيطة يا وسخة غايتو أنا نهائي ما ربيت
دخلت كدة أدتني ليك زعطة بالخرطوش أنا لمن حسيت روحي طلعت قلت ليها لييه بس العنف دة كلو يا نبع الحنان! قال لي يعنوفك بشنو أقول ليك بطلي كلام كتتير وطيري أزفتي طلعي السراير برة وفرشيهن قلت ليها الله يجيب راجلي ويخارجني منكم قالت لي ما تدعي سااي لانو دعوتك دي السقف ما واصلاهو ليك كم سنة بتدعيها ولي الان ما شفنا نتيجة قلت ليها حتشوفي بعينك قالت لي طيري الطيارة لا جابتك ولا ودتك يا اللتخة أصلا ما بتقضي غرض زي الناس، مشيت طلعت السراير برة في الحوش وفرشتهم وجيت رقدت في سريري وبقيت بحلم وبتخيل حياتي حتكون كيف لمن أعرسو وأشيل وأتقلب في السرير أخر حاجة حضنت مخدتي ونمت..
☆☆☆☆☆☆☆☆☆☆
اشوفكم…
☆يتبــــــــــــــــــــــــــــــــــــــــــــع☆☆
لقراءة الجزء التالي : الجزء الثالث من رواية بايرة حلتنا
لقراءة الجزء السابق : الجزء الأول من رواية بايرة حلتنا
للإطلاع علي فهرس اجزاء الرواية : جميع روابط اجزاء رواية بايرة حلتنا للكاتبة مريم أحمد
جميع الحقوق محفوظة للكاتبة مريم أحمد .
