وفي الجزء الحادي عشر من رواية قد كفاني دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة آيه إبراهيم .
الجزء الحادي عشر من رواية قد كفاني
وبقينا عايشين في حب واسرة متساندة ومرت الأيام من غير تفاصيل تذكر والتؤام دخلو الروضة ومن صغار انا معلماهم على التعاليم الإسلامية زي الصلاة وازكار الصباح والمساء والصدقة وغيرها كان حلمي أنهم يحفظو القران وعمرهم اقل من العشرة فعشان كدا بديت ليهم الحفظ من عمرهم ستة سنوات وبديهم نصائح بعد صلاة المغرب وكنت براقب هل كلامي مأثر على تعاملهم بين الناس مرة كنا قاعدين نشرب الشاي رئبال طلع ورقة وشخبط فيها انا ما كنت منتبهة معاهو ابوهو قال ليهو دا شنو يا أسد الرمال!؟ (العائلة كلها بتقول ليهو رئبال أسد الرمال) قال ليهو انا حاليا زعلان وقاعد اكتب الكلام دا في الورقة ابوهو ضحك وعاين لي نظام شوفي دي حركاتك قال ليهو طيب انت شفتا منو بمعمل كدا؟ قال ليهو امي بتعمل كدا انا ضحكتا وقلتا ليهو طيب انت منو القال لك انا بكون زعلانة لمن اعمل كدا؟ قال لي والله م عارف لكن عندي احساس بيقول كدا ابوهو ضحك
وقال ليهو انت شنو عرفك بالاحساس اشرب شايك وارح الروضة رتال كانت قاعدة كدا قالت لي ابوها والله يا ابوي رئبال دا حساس شفتا لمن نكون في الروضة وشاف ولد او بت م أكل طوالي بقسم من فطورو ومرات ولا بفطر ذاتو رئبال لكزا بطرف يدو عشان م تتكلم
لمن ابت تسكت قال ليها ريتال انتي عويرة ولا شنو!؟ الحاجات الذي دي م بحكو بيها، الزول لو مد يدو وادا زول حاجة يدو اليسار م تعرف يدو اليمين ادت شنو وقام باسني في راسي ويدي ونفس الشي لابوهو وقال لي انا اتاخرت مع السلامة يمة ومسك اختو من يدها وطلع انا بقيت مبتسمة ،ياسر قال لي العيال ما خلو لك شئ شكلك وتعاملك قلتا ليهو رئبال دا بذكرني بتعاملي مع امي وابوي 
قال لي فعلا كما تدين تدان قال لي الليلة ارح معاي الشركة قلتا ليهو ما ماشه انا ح اعمل شنو في الشركة !؟ قال لي ولا حاجة بس ساي كدا عاوزك جنبي
وبعدين انتي نهائي ما بتسألني من شغلي ليه ؟قلتا ليهو والله يا ياسر انا ما عندي معرفة عن كلام الشركات دا حدي أكل وطبخ ونضافة وإن إتجاوز ادا بقرا كتب دينية قال لي عليك الله مره واحده قلتا ليهو مدام اصريت ما مشكلة لكن ترجعني قبل جيت الأطفال من الروضة قال لي جدا ما عندك مشكلة هسي مسافة انا أستحم انتي ألبسي مشيت لبستا عبايتي ونقابي وإنتظرتو لمن جهز وطلعنا اول ما عاوزة اركب العربية فتح لي الباب هو عاينت ليهو كدا نظام دي شنو حركات العرسان دي
هو فهمني وضحك وقال لي تركبي ولا اغير راي واغفلو اخليك تفتحيهو براك قلتا ليهو شكلك كدا مزاجك رايق فعشان دا ح اركب بأدبي قال لي مزاجي ما يكون رايق كيف وانت الليلة ماشة معاي الشركة !! قلتا ليهو جد قال لي اي عندك شك قلتا ليهو ابدا والله طول الطريق هو يضحك ويتونس معاي بس ما عارفة ليه بتعامل معاهو ببرود ما بظهر زعلي ولا فرحي ولا ردة فعل حتى حبي ليهو ما بظهرو الإ من خلال تعاملي لكن ما حصل قلتا ليهو بحبك لكن هو ما حصل شكى مني المهم وصلنا الشركة ودخلنا اول دخلتي كدا اشوف لك بنات إن ما قلتو م شاء الله ما بتقدرو تعاينو ليهم مرتين ياسر دخل المكتب وقال لي اتونسي مع البنات ديل انا ما عندي نية اتعرف على زول بس ياسر ختاني امام الأمر الواقع ومشى مني مشيت عليهم وسلمتا وسألتهم عن أحوالهم وبديت اتعرف عليهم في واحدة منهم نزلت فيني اسألة زي المطر قالت لي اسمك منو ؟ قلتا ليها مهجة محمد قالت لي اسمك حلو قلتا ليها من زوقك
قالت لي بتعرفي ياسر من وين؟ قلتا ليها انا زوجتو عاينت لي كدا بنظرات نظام شاف شنو فيك ؟ قالت لي اتزوجتو متين قلتا ليها قبل 6سنوات قالت لي طيب انتي هسي بتشوفي كيف مع النقاب المغطي عيونك دا ؟ وتمشي كيف ؟ بتتكلمي مع الرجال كيف ؟ هسي انا لو عاوزة البس فستان اكيد ح يقيدني فأكيد دا سلب مني حرتي صح؟ عاينت ليها كدا وقلتا في سري لالا الزولة دي اكيد ما طبيعية في دقيقتين جابت الأسئلة دي كلها من وين!! انا بقعد تلاتة ساعات ما بتكلم ولو سألتا بكون عن الأخبار فقط ما عندي شغلة في زول المهم بديت ارد عليها وقلتا ليها من ناحية النظر الشي الشفاف الفي عيوني دا ما بحجب النظر اما بنسبة لي المشي تمشي من غير تمايل من غير ما تلفتي نظر الرجال من غير ما يكون في الرجل شي بيصدر صوت زي الكعب العالي أو ما شابه ذالك اما بنسبة لي كلامي مع الرجال انا مع النسوان عندي مشكلة في الكلام خليك من الرجال واخيرا عن الحرة يا غالية انتي حرتك بتنتهي في عاوزة تاكلي شنو !عاوزة تقري شنو!! تتوظفي في أي مجال!!! دا حد حرتك اما الأحكام الشرعية دا نحنا بنفذها من غير ما نقول لي هي كدا من غير من نضع نظريات ليها الأحكام الشرعية واجب علينا ومن غير ما أشعر بديت اتكلم عن الحجاب والبنات كلهم كانوا بسمعوا في كلامي في واحدة قالت لي اقسم الله انتي متشددة ساي يعني هسي الربطة الفي نص العبابة ح يركز فيها منو؟ ولا الكعكة الفي الشعر دي بعاين ليها منو ؟ قلتا ليها دي حاجات بتنقص من درجة حجابك فعشان كدا لازم نبتعد منها في واحدة قالت لي طيب هسي انتي طلعي لي عيب في حجابي دا قلتا ليها انا اولا شئ ما بعيب زول انا لو اتكلمتا معاك بتكلم معاك من جانب النصيحة والنصيحة تكون في الخفاء وقولها علانية يعني تعيرا وتوبيخ قالت لي يعني افهم انو النقاب فرض قلتا ليها الله اعلم لكن اذا كان فرض قد نجونا واذا كان سنة فقد طبقنا واذا كان مندوب فقد امتثلنا قالت لي عندك اطفال قلتا ليها ليه ياسر ما كلمكم ؟ ما انتو زملاء في الشركة ؟ عاينت لي كدا بتعجب وقالت لي وانتي ياسر ما قال لك انو عمل ليهو باب منفصل عننا واذا عاوز يتكلم معانا بتصل تلفون والجهة دي من قبل تمانية سنوات ما قعد اتونس فيها مع بت عكس زمان قلتا ليها ايواا قلتا ليها عن اذنك لانو تاني احتمال تجيب لي اسألة من مافي وانا الليلة حاسة نفسي صرفتا عربي كتير مشيت مكتب ياسر لقيت معاهو ضيف قبل ادخل ضربتا الباب كدا على الخفيف ياسر قال لي اتفضل دخلتا قال لي هسي كنا في سيرتك عبد الكريم دي زوجتي مهجة مهجة دي صحبي البحكي لك عنو دايما كان خارج السودان طول الفترة الفاتت دي صحبو قال لي السلام عليكم ومبروك المواليد قلتا ليهو وعليكم السلام الله يبارك فيك قعدتا شوية وهم كانوا بتكلموا عن الشغل وكان معاهو ولد صغير جا علي وبقى يقول لي امي انا شلتو ابوهو قال لي عشان امو منقبة قايلك امو شلتو وطلعتا بيهو بره في حديقة الشركة وبقيت ألعب فيهو بعدو عرفني اني ما أمو لكن مع ذالك كان معاي قلتا ليهو ما شاءالله حلاتك اسمك منو؟ قال لي مؤن قلتا ليهو منو؟ قال لي مؤن ياسر كان ماري سمعني وعرف اني ما فهمتو قال لي قال لك مؤمن ضحكتا وبعدو رجعتو لي ابوهو وقلتا لي ياسر رجعني البيت عشان الأطفال بيكون رجعوا طلع معاي قال لي عاوزك دقايق بس لو ممكن قلتا ليهو ايوه قال لي الكلام ما بنفع كدا راح نطلع مشوار قلتا ليهو ابدا الأطفال بكونو جو انا الازم ارجع قال لي خلاص بكون سايق واتكلم معاك قلتا ليهو جدا ركبنا العربية قال لي مهجة انتي متين ح تفهمي انو حياتك ما انحكم عليها بأنو تربي عيالك وتهتمي بي انتي اكيد عندك احلامك الخاصة اكيد عندك اماني عاوزة تحققيها ما ممكن تضيع عمرك كلو بين ياسر وعيالو عاينت ليهو كدا وقلتا ليهو انت شايف كدا بس انا شايفه عكسك تماما انا لمن اهتم بك أو بعيال ياسر زي ما قلت انا بكون مرتاحة لأني اديت واجباتي على أكمل وجه وما حاسه انو كدا انا إنتهيت من حياتي لا بالعكس انتو كل حياتي ياسر وقف العربية وبقى بتبسم وبعاين لي قال لي افهم من كدا شنو !؟ قلتا ليهو انت فاضي انا ماشه اشوف عيالي قال لي عليك الله ما تقطعي قلبي وقوليها قلتا ليهو ياسر وسكتا مسافة وكان منتظر مني اكمل بالكلام الهو عايزو بس قلتا ليهو ارح ودني البيت والله زعل زعل وشو لمن اتغير وقال لي انتي ما عندك احساس ولا شنو !؟ 6سنوات وانا منتظر منك كلمة بحبك 6 سنوات وانا في الطالعة ونازلة بشكر فيك وانتي ما كلفتي نفسك تتطيب خاطري بكلمة واحدة من اربعة حروف ما شايفة انك اخدي حقك وزيادة ما ممكن حرام يأخ 
قلتا ليهو والله يا ياسر انا بحبك بس ما شرط اقول لك عشان تعرف فجأة كدا تعبير وشو اتغيرت من الحزن الشديد لي الفرح الشديد قال لي يعني خلاص اتنازلتي وقلتيها والله ما قادر أصدق دموعو نزلت
ااي جد يأخ قلتا ليهو هو يعني الموضوع دا مأثر عليك لي الدرجة دي قال لي وهو حاضني عليهو صدقي انا كنت خايف اموت من غير ما سمعها منك قلتا ليهو بالجد قال لي والله يا مهجة انا حبيتك اكتر من نفسي انا لو في يوم مر علي من غير ما اشوفك بحس الدنيا كلها مضلمة في وشي بحس اني مخنوق وانتي امان روحي بالجد انا ما عرفتا معنى الحب الإ بيك ومعاك ربنا يحفظك لي وما يورني في شر ابدا انا قلتا ليهو ياسر ما تتصور كمية الحب والوفاء الموجودة في قلبي لك انت اول انسان تدخل حياتي وأخرهم ما بنكر اني اتعمدتا انك ما تعرف مدى حبي لك لاني خايفة تضيع مني لانو قالوا الزول بعد اضمن مكانتو في قلب الزول البحبو وعارف انو مستحيل زولو البحبو يزعل منو ببداء بتغير وبقتل كل المشاعر الجميلة بأفعالوا
ضحك شديد وقال لي انتي تفكيرك غير تفكيري ولو كدا صح انا من ما بصحى بقول لك بحبك وقبل انو بقول لك بحبك ليه ما إتغيرتي علي ؟ قلتا ليهو لاني بحبك قال لي طيب كان تقيسيها على كدا وتقوليها بدل العذاب كدا كلو قلتا ليهو ما فكرتا فيها
وصلنا البيت وياسر كان فرحان شديد
قعدنا اتونسنا جنب الباب وبعدو دخلنا ولقينا الأطفال جو وطلعنا مشور كلنا جينا الساعة ١٠ بليل ……
————————————–
———————
*☆يتبــــــــــــــــــــــــــــــــــــــــــــع☆☆*
لقراءة الجزء التالي : الجزء الثاني عشر من رواية قد كفاني
لقراءة الجزء السابق : الجزء العاشر من رواية قد كفاني
للإطلاع علي فهرس اجزاء الرواية : رواية قد كفاني ( جميع الأجزاء كاملة ) للكاتبة آيه إبراهيم
جميع الحقوق محفوظة للكاتبة آيه إبراهيم .
