الجزء الخامس من رواية صدفة ولكن

وفي الجزء الخامس من رواية صدفة ولكن للكاتبة لوزة ماذا يا تري سيحدث من جديد المواقف داخل طيات الجزء ؟ دعونا نعرف إجابة ذلك التساؤل في السطور التالية بإذن الله مع ابطال الرواية .

الجزء الخامس من رواية صدفة ولكن

بعتتله مسج عماد  انا موافقة<3
حطت النقال مايا ورقدت
عماد كان قاعد مع وائل يهدرزو شاف نقاله لقي مسج قال ان شاء الله مش صدمة  بس ساد حياتي كلها مشت صدمات وفتح المسج وفرح  عيونه قلوووب  مشي يجري لدار معيشة الي قاعدة فيها امه وبوه … احم
بوي امي نبيكم ف موضوع 
عمي علي وخ صبحية : شنو فيه قول 
انا قررت نخطب
خ صبحية فرحت بالخبر وقالت : ياو الله نهار سعيد لولولولولي
عمي علي :تسكتي اسكتي يامرا ليل جيران يسمعونا يقولو عيلة دردنو
خ صبحية : يامنال يامنال
منال : نعم يمى نعم
خوك بيخطب
منال : ايه نعرف  قعدت تشبحلها خ صبحية  شبحة متع تعرفي وماقلتيش وانتي النهار على طوله معاي ف الحوش …بعدين استدركت روحها منال امها بتحطلها كلام من شبحتها مشي قالت قصدي سمعتكم توا وقعدت تضحك ههههههه
عمي علي : باهي ومن قررت تاخد ياولدي
جيرانة اللي قبالتنا
عمي علي اما جيران ..قصدك هادو متع الحاج صالح ؟؟؟؟؟؟؟
عماد : لالا يابوي
حوش فلان عرفتهم عندهم ولد اسمه حاتم
عمي علي : ايه عرفتهم عيلة ماشاء الله باهي على بركة الله
عماد : يمى هوا قدام الحوش بري حتى غدوة خودي منال وامشو اخطبوها
خ صبحية : باهي ان شاء الله غدوة 6 هكي نمشيلهم لولولولووولي
عمي علي : تي شن قلنا عاد
خ صبحية : مش مصدقة عماد قال بنتزوج ليا قريب 4 سنين نجري ف جرته
وبدو في نشفاتهم خ فطومة وعمي علي
قالهم عماد امالا انا تو نستاذن بنرقد عندي دوام غدوة تصبحو ع خير مشي يجري عماد لداره طفى الضي وخش تحت اليرغان واتصل بمايا
طبعا مايا راقدة
اتصل تاني ردت عليه مايا
الو
عماد : نقولك حاجة
مايا : امممم قول
عماد : < 3انحبك 
نطت مايا من فراشها قتله شن اتقول مانسمعش فيك
قالها انحــــ  ــــبــ  ــــكـ
قعدت اتمتم تقول واخيرا نطقتها هاجوهرة    
سمع كلمة جوهرة
قالها يامهبولة نقولك انحبك  تقوليلي جوهرة
قعدت مايا تضحك ورقعتها وقتله كلمتك هادي جوهرة واغلى من الجواهر
عماد : ياسلام تريتك شاعرة وانا ماندريش ,,, اسمعي بتجي العمل غدوة
مايا : لالا خديت اجازة
عماد : باهي بش نهدرز مع وردة ع راحتي خوتينا واخيرا
مايا : عماااااااد وردة شنو والله نقطفها نخليها ساق بس هني روحك
عماد هههههههههههههههههههههه نبصر ياهمي ياغيورة بري ارقدي بري
مايا : هههههههه طيحتلي قلبي غدوة حنشدها اتصالت ورا وردة ….وصلك المسج ؟؟
عماد : مسج شنو ماجاني شي
مايا : بجديات ؟؟ ”
عماد : ايه قصدك بعتي مسج شنو فيه
مايا : مانيش قايلة
عماد : تي قولي
مايا : لالا
عماد : باهي ياشينة برااااحتك
مايا : اشبح !
عماد : هياااا بنرقد تصبحي ع خير
مايا : قصدك زعلت ؟؟؟
عماد : لالالا مازعلتش عندي دوام بس هيا حبوبتي ارقدي توا
مايا اوكي تو نبعته تاني مسج
عماد : ماتبعتي شي ارقدي بس يلا سلام
مايا : سلام
رقدت مايا…. وعماد قعد فايق ايفكر لحد ماخداااه النوم
صبح الصبح ناض عماد خدي دوش ولبس كاجوال.. صبح ع امه ولقاها موتيتله قهوته خداها معاه وطلع للعمل ويدير ف رنات لمايا
فاقت مايا دارتله رنة عاودلها
عماد صباح الورد والعسل والشهد يااحلى من العسل
مايا : صباح الفل والياسمين لعيونك الحلوة
عماد : قصدك عيوني حلوات ههههههه بنسجله كاعتراف
مايا : هههههههه ايه حلوات ربي يحفظك
عماد :باهي اللي سمعنا منك كلمة حلوة
مايا : هههههههه سادك انا حلوة كان نقولك كلامي الحلو معش نلقى فيك شي
عماد:اما انتي اللي يقدرك بس ايجي يحاسبني هههههههههه يلا سنفورتي وصلت الشركة انا خلي نخش انوقع ونكمل شغلي ونكلمك نوضي انتي ضمي وشوفي امورك
مايا : عماد بنضم من ساعة 7:30 بنولي نرقد توا واصلا الحوش مضموم ناقصاته كنسة بسيطة بالهوفر وخلاص
عماد : كسووووولة هيا امشي كملي نووومك هههه سلام
مايا : اوك سلام
كملت مايا نومتها لين جتها امها ساعة 11 مايا نوضي ..نوضي يابنت
نعم نعم يمى شنو فيه

كملت مايا نومتها لي ماجتها امها ساعة 11 مايا نوضي يابنت
نعم نعم يمى شنو فيه
توا كلمتني صبحية
مايا : تي من صبحية وزكية يمى بالله خليني نرقد
خ فطومة : تي نوضي كان نوم بينفع راهو نفع قطاطيس نوضي خ صبحية جارتنا بتجي تخطب اليوم
نطت مايا من السرير ولوحت اليرغان لين وصل فوق سرير دنيا
مايا : بالحق يمى بالحق ؟؟؟
خ فطومة : لالا نبصر عليك ولي ارقدي
مايا : غير قولي يمى
خ فطومة : ت ايه قالت بتجي العشية ولسانها ماهناهاش قتلي بنجيك العشية قتلها تفضلي مرحبتين بيك مشي قتلي ايه سلمك نبي نخطب بنيتك هههههههههه برغم ان خطباتك بالتلفون قبل ماتوصل
طلعت خ فطومة من الدار ومايا بدت اتفيق ف هالة ودنيا اللي اتقول راقدين ف بييير قعدت ادير ف رنات لعماد عماد ايشوف ف رنات كان عالق ف اجتماع مفاجئ ومايا تسحن خيره مايردش وخدت تلفون دنيا تتصل بفرح ينادي وماتردش عاودت تاني ردت فرح ايوه دنيا
مايا : انا مايا فرح عماد بيجي يخطب العشية
فرح : تتسهوكي
مايا :اقسم بالله جاي
فرح : دقايق انضم الحوش عالسريع ونجيكم ماتحكو ف شي من غيري ناضت هالة
قالت لماا خيرك دايرة الدوشة
مايا: ام عماد بتجي العشية
هالة : حقققق ؟؟؟
مايا : اييييه
دنيا فاقت : بجديات ؟؟
مايا : تي ايه قداش مرة بنقولها
هالة : حلوووو
شرين الحوش فتحت خ فطومة
فرح : صباح الخير خالتي
ه فطومة صباح النور بنيتي
فرح : وين البنات
خ فطومة : اونه قاعدات راقدات في الدار زي العزارى
خشتلهم فرح وصبحت عليهم وقتلهم ماشاء الله هالة ووراها مايا بدخ
مايا : والنبي غير راك اطرشقينا عين
فرح : قلنا ماشاء ياعفنة
هالة : شن بتلبسي مايا
فرح : البسي قفطانك اللي لونه ازرق ملكي حلو يطلع عليك
ناضت مايا لدولاب وفتحتاته وقتلها شنو هالة قنين ؟؟

هالة :ايه ايه حلو
ناضو هما الاربعة ضمو الحوش ووتو الغدي وروحت فرح قتلهم بعد ماتروح خالتي المراة اتصلو بيا بش انجي نقصقص هههههههه
مايا : اقعدي تغدي معانا
فرح : لالا مانفدرش بنروح نحط الغدي يلا باي
مايا : باي
شرين تليفون مايا لقاته عماد ردت قالها كيغ حالك وشن الجو
قتله تمام شنو روحت والا مازال
عماد قاعد ف الطريق زحمة شوي ,, وانتي شنو مدايرة
مايا : اهو مكسدة احتمال نطلعو لسوق في العشية
عماد : سوق شنو ؟؟ امتى مروحين
مايا : مانعرفش بالك بعد صلاة العشاء
عماد : ماحد كلمكم اليوم
مايا : لالا من بيكلمنا
عماد : سكري سكري شوية ونكلمك
مايا: وين ماشي ؟؟
عماد : غير سكري ندير تلفون بس
مايا : تعال اهني نبصر عليك هههههه نحرقلك ف اعصابك بس
عماد : باهي باهي هوا انا ناقص حرق اعصاب امشي تو نوريك حرق الاعصاب في الجديد
مايا : هههه كلمتنا خ صبحية اليوم
عماد : باهي حلو يلا مرور توا ف الطريق سلام
مايا : اوكي رد بالك ع روحك سلام

روح حاتم وتغدوو وفتحت خالتي فطومة الموضوع لحاتم وقعدو يتناقشو القايلة كلها لين اذن العصر
قتله خ فطومة نوض توا صلي وبرا افتح المحل
حاتم : اوكي تمام
هالة ودنيا ايوتو في المطبخ
خشت مايا خدت دوش وبدت اتوتي في روحها ولبست فستانها ازرق الملكي
دارت ميك اب وطلعت لأمها وهالة قتلهم شنو رايك جتها خ فطومة نحي عليا تمرغيد الوجوه هدا امشي اغسلي وجهك وادهني كريمة عادية غير اتقول من اولها اشي المكياج اللي حاطاته امشي
مايا : باهي يمى ان شاء الله
هالة : اي مافيش خير من جمال طبيعي حطي كحل بس

مايا : اوكي اوكي
مشت مايا غسلت وجها وحطت كريم وجه ودارت كحل بسيط وقعمزت تستنى في ام عماد

جو العويلة خ صبحية ومنال شرينو على الحوش وفتحت هالة وقتلهم تفضلو وخشت هالة لللمبطخ توتي في العصير وشوكلاتة وبدو في السلام اننننه كيف حالك اننننه كويسة اننننه تمام الحمد لله انننه اننه وين جيتي خشي خشي تفضلي
خ صبحية سلمك وخيتي
قعمزو خ فطومة و خ صبحية يهدرزو
خ صبحية : كيف حالكم وشن مدايرين
خ فطومة : الحمد لله
خ صبحية : اني مش حنكثر عليك اني اليوم جاية بنخطب بنتك مايا لولدي عماد
خ فطمومة : عاشت الاسامي وشن يشتغل عماد
خ صبحية : يشتغل مهندس في شركة وعمره 30 عام و اونه احنا جيران مش حتوهو فينا وكنا نسكنو قبل في الفرناج عيلة فلان
خشت هلة جابت العصير وشوكلاتة ل خ صبحية ومنال
خ صبحية : هادي بنتك التانية
خ فطومة اي هادي بنتي اللي اكبر من مايا امس كانت فضانيتها
خ صبحية : ماشاء الله ربي ايبارك ,,, امالا وينها مايا خلي نتعرفو بيها
خ فطومة : شوية خلي اناديها
ونادتها وخشت مايا سلمت عليهم وقعمزت بحداهم
خ صبحية : ماشاء اللهم صلى عالنبي عليك عوينات ماشاء الله ان شاء الله تكوني من قسمنا يابنتي

وهدرزو وقالت خ فطومة ان شاء الله خير نشاورو خوها ونشوفو ردها ونردو عليكم ان شاء الله وعطت رقمها خ صبحية ل خ فطومة ..
وناضت بش اتروح هيا امالا بسلامة توا
خ فطومة خيرك مزال بكري
خ صبحية لا هوا داك بسلامة بسلامة

روح حاتم وجت فرح بش اتقصقص وتشاورو وقال حاتم تو نسأل عليهم مكان حوشهم القديم بالك هاربين والا حاجة
خ فطومة : هههههه يعطيهالك ياحاتم ايه عند الحق اسئل

وفاتت ايام وسئل حاتم ولقاها عيلة تبارك الرحمن مطابقة للمواصفات الليبية ههههه وردت خ فطومة عليهم بالموافقة وحددو يوم للفضانية والبيان
ومايا اقريب اطير من الفرحة وجي اليوم الفضانية مشت مايا للمزينة هيا وفرح. من الصبح.. ودنيا وهالة ايوتو في الحوش والعشي والحلوات حايسات في المطبخ روحت مايا جايبها حاتم من مزينة كانت لابسة فستان بلون العنابي اللي اتحبه فوقه كاب حلو وبعدها ع طول خشو عيلة عماد كانو ايقيسو عليها من الروشن امتى اتروح ههههه خشو الرجالة قبل تناقشو وتمت فضانية ع خير عشوهم وروحو الرجالة خشو النساوين بالسوابيت وتزغريط 7 سوابيت ايحلو العين المغمضة دارت فرح الوشق اللي يفحفح من بعيد وتزغرط قعمزو العويلة ضيفوهم وعشوهم وخش السي عماد بالبدلة الكحلة ولبس مايا الدبلة وباسلها ايدها وخددها  هيا اتخزرطت لبساته دبلته وهمستله في وذنه انحبك 
قال للعويلة واخيرا قالتها ياناس قالت انحبك 
مايا ولى وجها احمررررررر قتله حشمتني يامجنون
عماد : هههههه عارف روحي مجنون
وكلها التورتة ووكلاته وشربو العصير 
وبيطلعو ايصورو مشت منال وهالة وحاتم معاهم للمصور خدو لقطات حلوة وروحو ومشي اليوم على الخير والكل فرحان

فاتت اسابيع وشهور عسل بينهم واحلا من العسل وفي يوم جمعة بتاريخ 15\11\2013
اتصل عماد بمايا ع الصبح صبح عليها وقالها جمعة مباركة حبيبتي
مايا : علينا وعليك حبيبي 
هدرزو شوي وقالها
يلا توا خلي نمشي نوتي روحي لجمعة
مايا : شنو بتلبس
عماد : مش عارف بدلة صدرة ممكن
مايا : هههههههههههههههه يابارد بجد شن بتلبس
عماد : بدلة عربية واضحة مرات زبون
مايا : اتهبل بالله تعال بيها بعد العصر لحوشنا
عماد : لالالا مافيش مش حنخليك تشبحيني
مايا : به تو انقيس عليك من الروشن
عماد : هههههه مش حتقدري
مايا : تو اتشوف
عماد : اوك حنشوف هههه يلا باي عسولتي
مايا : اوك باي حبيبي
ناضت مايا فطرت وخدت دوش وهدرزت مع خواتها وخشو ايطبو الغدي قالت مايا لهالة : بنقعد ف بلكونة حراسات
هالة : علاش
مايا :بش نشوف عماد بالزبون مايبيش يخليني نشوفه
هالة : هههههه مهبولة كان من زيك نمشي نقعدلهم ف حوشهم مشت
مايا : ههههههه
ومشت مايا وقفت ف بلكونة اذن الظهر وطلع وائل بس ماشي لصلاة الجمعة استغربت خيره ماطلعش
عماد وصل حتى لجامع طالع بكري بش معش اتشوفه بالعربي ايحب يحرقلها اعصابها ههههه
بعد صلاة الجمعة اتصلت بيه رد عليها قتله وييييينك شنو مامشيتش لجمعة
عماد : ههههه مشيت وصليت وانا توا ف حوش صاحبي تغدينا
مايا : باهي باهي تو انوريك 
عماد : نحبك وانتي معصبة …اسمعي صاحبي قالي على مظاهرة ف العشية طالع معاه بعد العصر
مايا : بالله فكنا من مظاهرات عماد روح وخلاص
عماد : تي شن انروح عطيت كلمة للولد ويبيني نمشي معاه ونطلعو مظاهرة واصلا واجعني حال طرابلس يامايا الحق مانقدرش نقعد في الحوش زي المرا

واحتد النقاش بينهم وقتله اوكي براحتك عماد يلا باي
عماد : مايا ماديريش الزعل قتلك سلمية مافيها شي اطمني والا عاجبك الوضع البلاد هكي وهيا تو صاحبي اينادي سلام
مايا : اوكي رد بالك على روحك سلام 
اذن العصر وصلو لجامع ..صلو العصر واتلقطو الناس
واتوجهو للمظاهرة السلمية وعماد وصاحبه شادين عرف من شجرة زيتون متجهين لجيهة غرغور وصارت رماية عشوائية رصاص وقذائف جت رصاصتين في عماد وطاح عرف الزيتون من ايده  …صحاب عماد شد عماد وقعد يجبد فيه 🙁 يبي يرفعه جيهة متقية قال عماد لصاحبه:  ا ا اسمع صلاح سلم لي سلملي ع امي و بوي وقولهم يسامحوني وقول لمايا انح ح ان بك
وتشهد وتوفى عماد من قبل حتى مايرفعوه للمستشفى   .

صدفة ولكن شاء القدر …

…انتهت …

لقراءة الجزء السابق : الجزء الرابع من رواية صدفة ولكن

للإطلاع علي فهرس أجزاء الرواية : جميع روابط اجزاء رواية صدفة ولكن للكاتبة لوزة

جميع الحقوق محفوظة للكاتبة لوزة .