الجزء الرابع عشر من رواية حوش جدي

وفي الجزء الرابع عشر لنري ماذا سيحدث من أمور ومواقف جميلة داخلها وهل سنري تطور سريع في الأحداث أم لا ؟ هيا بنا لنبدأ القراءة للتعرف علي كل ذلك .

الجزء الرابع عشر من رواية حوش جدي

وفجأه كيف وسام بينوض .. شرين تلفونه … ولقى رقم امه …فقال ..
امه … الووووو
وسام … ايوا امى ان شالله خير ؟؟
امه … نهال جنبك ؟؟
وسام … لا لا فى مطبخ نهال … شن فى ؟؟
امه …. راهو …… بو نهال مريض هلبببه .. وتوا دخلوه فى عنايه … واحنا بنقعدو مع عمتك فى مستشفى …. فارد بالك تقول لنهال شى وكانا سألتك على موضوع قولها امى اتصلت ولقت تلفونك خارج الخدمه واتصلت بى وقالتلى احسن من قبل بس شدوه فى مستشفى ..
وسام …. ماشى ماشى خلاص تهنى انتى وبعون الله مايصير الا خير .. مهم طمنينا عليه اول بااول … استنى قبل ماتسكرى … امتى مروحين ؟؟
امه ….. مانعرفش … وفى الاغلب حتى نروح … نمشى لحوش عمتك ونجى وبوك رح يبات فى مستشفى …
وسام … تعالو هنا ..
امه …. مادبينا نهال ماتعرف شى … انت تعرف انا قلبها مايتحملش الرعشه ….
وسام …. ماشى ماشى …
امه …. خلاص …. بنسكر توا … وقول لنهال تبات مع حناها … وانت بات جنب خوتك فوق ..
وسام … اكيييد … مالا بنبات جنب نهال … خيررررك امى ؟؟
امه …. ماشى ماشى … وان ديما لسانك مش محادى ودانك ..
وسام … خلاص برى وطمنينا عليه …
وهنا على طلعت نهال وسمعت الكلمه الاخيره بس من حديته فاقالتله …
نهال …. اه وسام خالتى كانت تكلم فيك ؟؟ اعطيهاااالى بسرعه
وسام …. سكرت خلاص …. وقالتلى اتصلت بى نهال بس لقيتها خارج الخدمه … وقالتلى الحمد لله مافيشى شى غير شدوه فى مستشفى
وطلبو عليه شوية تحليل ..
نهال … تحلييييل شنى … علاش شن فيه بابا ؟؟؟
وسام …. استغفر الله ياربى … مافيشى شى تفاولى خير مجرد تحليلات روتينيه بس … حتى انى كانا نمشى يطلبوها عليا … يالله مهم مادمك
اطمنتى على بوك توا خشى ارقدى والصباح رباح ماشى ؟؟
نهال … يارب يرجع للحوش فى اقرب وقت يارب …خلاص .. حتى انى حاسه روحى تعبانه وبنرقد … خلاص تصبح على خير ..
وسام .. << ناض من كرسى وقاللها … وانتى من اهل الخير ….
مشت نهال جيهت بابا الداخلى ووهيا كيف بتخش تلفتت وقالتله …
نهال … وسام ؟؟
وسام … نعم ؟؟
نهال …. ربى يخليك ليا 
وسام … حتى انتى … حبيبتى
اول ماسمعت نهال هالكلمه وجهها ولا احمرررر ومعاش قدرت تقيم عينها فيه … وخشت بسرعه وسكرت الباب وراها ..
اما وسام ركب … وخش لداره ورقد بعد مادر لفه على خوته الولاد وطفى تلفزيون …
فاتت الليله زى اى ليله فى حوش جدى … وناضت نهال صبح على صوت حناها تقربع فى جنان فاناضت وخشت للتوليت وبعدها طلعت واول ماشافتها حناها قالتلها ….
حناها << ورييده >> … نهااااااال بنتى … مالا وين خالتك منجوهه سميحه ….

نهال …. صباح الخير ياحناى … خالتى قاعده فى مستشفى مع امى وبوى ..
حناها … اااااااه وامتى بتروح من سبيتار … ومن بيطيبنا عشانا ؟؟
نهال …. هههههه ماتخافيش ياحناى … انى نديرلك الا تبيه …
حناها …. ااااااه مالا عندى شوية قريقشات قايمتهم على خالتك سميحه من عيد … خاطر ديما هيا جارده الحوش هيا وصغارها سحيققه … ديرلى بيهم رشته برمه انى وجدك ….
نهال … حاضر من عيونى حناى ….
حناها …. وهداك النعجه المززيه وينه ؟؟
نهال … منى حناى ؟؟
حناها …. هدكا ام صوفه صفراء .. سام زفت …
نهال … ههههههههه سام شنى ياحناى .. وسام قصدك ؟؟ خيره ..
حناه .. وين نندرى انى على هالاسامى المكعفصه هادم مهم … هاك استنى ..<< ونحت من ردها محمرمه وفتحتها ووطلعت منهم دينار ونص ميتات طبيا وقالتلها … قوليله يجيبلى شب من عطريه الا جنبنا .. كمل منى …
نهال …. حاضر ينوض بس ونقوله ..
حناها … خلاص مالا انى بنولى نتكى …
نهال … ماشى حناى … جدى نايض ؟؟ بنضربه الليبره …
حناها … اى هونى تلقيه مفرش قدام خيبوط صغير بريله … يوم تانى ماجايته الا تكسيره على راسه شيبانى نحس .. يحسابنى مانزبط فيه لما يخلنى نرقد ويفتح على الكافرات .. ومداير روحه اعمى ومايشبحش … والله يوم تانى ماجياته الا بعصة مكنسه ومكسرتله سيقانه الا يمشى بيهم زى زقيا هما …
نهال … هههههههه … اهو ماشيه بنضربله اليبره وبنكنس جنان انى ..
مشت نهال لتلاجه وطلعت ابرة الانسولين وجرعه .. وخشت لجدها ضربتله يبره وطلعت لجنان ظماته وسيقاته وخشت للحوش ظماته وبخراته وماكملت دورتها الا وساعه 2 ونص ظهر …. صلت الظهر …. وركبت فوق باش تبدا فى عشى …
ركبت للحوش فوق واول ماوصلت لعتبة الحوش شمت ريحة منظف فاستغربت … وهنا شبح شوى للباب وطقت عليه .. ومافاتتش دقيقه الا ووسام فتح الباب باابتسامه … وخشت و خلى الباب مفتوح على وسعه الفردتين …. وقفت شوى تتفرج على حوش كيف يبرق برق بنظافه … وشافت وسام مداير كرسى ومقعمز فى وسط الحوش ويقول لى امجد …..
وسام ….. ححححححك الحمام باااااااهى … اى اى زيد نبى يلمع لمع …
امجد << رابط فوطه فوق راسه وشرط وتيشرت >> … حكيته نهاراسود … تى شنى تبنى نخرطه خرط .. وخيررررك انت تأمرنا بس نوض معانا ..
وسام …. تزبد كلمه تانيه 200 جنى انساهم الا طلبتهم منى … قصى … اكنس دروج باهى للتكسر مكنسه فوق راسك ….
نهال ….. ههههههههههههههههه وسام شن تديرو … كيف كنت بنركب انى نديرلكم كل شى ..
وسام … لا لاسادك انتى حوش جدى والعشى …
قصى … وانتى شن بتدير … ولاتامر فينا بس ..
وسام .. سكر فمك ولا لا …. قوتلك انى عليا مطبخ وصابون ..
نهال …. ههههههههههههههههههههههههههههههه والله انتم مهابيل  انى خاشه للمطبخ شن تبو اليوم على عشى ؟؟
وسام …. خلاص هوا رمضان شن فيه … تلاته ايام بس … ديرى الا تشوفيه مناسب .. وانى شوى بس نشرف على معدومين ظمير فى نظافه هما ونلحقك …
نهال …. هههههههههه باهى يا ولده باشا انت 
خشت نهال ولبست مرقه وحطت شربه الحمرا على نار وحطت مرقة الرشته … وحط المفروم على نار وبدت تعجن فى عجينه ….
اما وسام استنى لين خوته كملوا لا فى ايدهم …. وخشو للمربوعه وفتحو على بلاى استيشن … وخش للمطبخ وقاللها ….
وسام … اسمعى انى نبى نساعدك لكن مانعرفش ندير الا مبكبكبه بس فافوتى تطيب .. خلينى نغسل معايين هههههههههههههههه
نهال … لا لا وسام عادى انى ندير كل شى … انت ارتاح ..
وسام … يهون عليا قلبى … ونخلى حبيبتى بروحها فى مطبخ ؟؟؟ << مع تسبيلة ونظرة حب >>
نهال …. هههههههههه بطل وسام ..
وسااااااااام …. وووووووووه عليا قتلتنى هالكلمه .. اللهم انى صائم يارب …
نهال …. وسام ونبى افتحلى حكة طماطم تلاقاه فى دولاب اللوطى غديكا وهاتها بسرعه …
وسام … <<< يجيب فى حكة طماطم >> نهال ممكن نطلب منك …
نهال … نعم ؟؟
وسام .. حاب نسمع منك كلمة حبيبى 
وهنا خش امجد للمطبخ وقال …
امجد …. احم احم … اللهم انى صام .. وطبس على قجر يفتش فيه ويغنى ويقول ..
<< هما يحبو بعض هما يحبو بعض يتلاقو ويمشو ويجو وهما يحبو .. >>
نهال سكتت شوى وحاولت تكتم ضحكتها وبعدين قالت ….
نهال … هههههههههههههههههههههههههههههههههههههه
وسام … شن تضحكى انتى ؟؟؟ وانت شن تبى فى مطبخ ؟؟
امجد …. خيرك انت من طق فيك .. ندور فى بطريات ..
وسام … برا فى دارى تلقاهم اطلع هيا ..
امجد … طلع وشبح لوسام وكمله الاغنيه << قلبه طق طق طق ووجهه يصب عرق ياسيدى >>
نهال …. ههههههههههههههههههههههههههههههههههههههههههههههههه خوك هوا يهببببببل 
وسام … يهببببل ؟؟ تعرفى مازال نلاقاك تبينى سنونك ولا تقولى لحد يهبل غيرى … نقتلك ونعتبر ربى ماخلقكش … وخلاص هي تلفتى واغسلى معايين ..
نهال … خيرك انت مهبول … هدا امجد وزى خووى ..
وسام … حتى خوك بصاره مع حد غيرى لا … فااااااهمه … وانى هكى مهبول هيا شن بتديرلى …
نهال …. مهبول على روحك يابابا …. انى مخطوبه وعرسى قريب …<< وضحكت >>
وهنا وسام شبحلها ….. وطلع وسيبلها مطبخ ….
تعفلقت نهال من ردة فعل وسام لانها كانت تبصر عليه … وقعدت تطيب وتستنى فيه بس … طلع من حوش وفص ملح واختفى …. بينما وسام …. حس انا نهال تلعب بيه … وحسها ضحكه نوعا ما ….. ونزل وقعمز فى حوش جده وقعد يسحن ويترد وماباش يركب للحوش لين ادن مغرب …
حطت نهال الفطور للولاد …. ونزلت فطورها باش تفطر مع جدها وحناها … بينما وسام ركب يفطر مع خوته فوق …. وبعدها غسل معايين متعهم وولع سيارته وطلع للمستشفى …
بينما نهال تعمدت انها ماتركبش …. وغسلت معايينها لوطت وقعمزة جنب حناها وجدها … يسمعو لشيخ …. وفجأه سمعت تلفونها يرن فامشت تجرى لانا توقعت امها تتصل فاردت وقالتله …..
نهال ….. ايوا … وسام وصلت ؟؟
وسام ….. نبى نفتح موضوع متع امك توا ؟؟
نهال … انت مهبووول ولا بعقلك … بوى فى مستشفى وانت بتفتح موضوع سخيف فى هالوقت ؟؟؟
وسام …. موووووضوع سخيف انى نبيك صح … موضوع سخيف انى مانتخايلش حياتى من غيرك صح .. موضوع سخيف انى نهبل لما نشوف انك ملك حد غيرى وفى اى لحظه ياخدك منى …. عندك الحق تقولى هكى انى الا حمار … ونستاهل كل شى ..
نهال … خيرررك انت بجد نجنيت ؟؟ نقولك بوى مريض وانت ماشى تقول لامى انى نبى بنتك ؟؟؟ وقولها تفسخ خطوبتها ؟؟ تى شن تبى امى تشك انا فى شى بينا وتخنقنى … وشن منظرى انى بعد مانطلع كدابه قوووولى .. وشن منظر خالتى لما تطلع كدابه ؟؟ ولا انت هدا كله مافكرتش فيه … مهم انت ترتاح بس ….. وسام افهمنى موضوع مش سهل زى ماانت متصور والله ماهو سهل … خلى الاوضاع تهدى شوى وبعدين نفكر وفى حل …
وسام … نهال سكرى خلاص ..
نهال … وسام افهمنى ..
وسام … نهااااااااال سكررررررررررررررررررى توااااااااااااااا
سكرة نهال التلفون وركبت فيها نار …. وبعدها دارت رنه لامها مابتش تعاودلها فادارت رنه لخالتها ردت عليها وقعد يتكلمو شوى وطمنتها وسكرت …
قعدت نهال تلود بين الحوش وجنان … مره تخش تهدرز مع حناها وجدها ومره تلود فى جنان … وهدا كله تستنى امتى يخش وسام ..
فاتت ساعه وراء ساعه …. تسحرت فيها وسحرت جدها وحناها …. وخشت رقدت بعد ما يأست انه يروح …. واول مافاتت ربع ساعه وبدى ينعس فيها نوم …. شرين تلفونها فاقامت تلفون وقالت ….
نهال …. الووووو
وسام …. اطلعى لجنان … انى برا ..
نهال … شن فى خيرك ؟؟
وسام … اطلعى نهال انى برا …
طلعت نهال لجنان ووقفت وقعدت تشوفله …
وهنا قعد يشبحلها شوى بعدين قرب بسرعه وخدها فى حضنه وقاللها …
نهال …. نهال انى مانتخيلش حياتى من غيرك … انى نحبك هلببببه … وانتى حياتى الا رسمتها معاك والا رح تكونى فيها كل مستقبلى واحلامى وطموحاتى … تعودينى تكونى ليا بس …
نهال …. ….. 
وسام …. ردى ؟؟؟ ؟
نهال …. حتى انى نحبك هلبه << وقعدت تبكى >>
ووخرها شوى وقعد يمسحلها فى دموعها … وكيف كان بيقوللها …. فتحت حناهم الباب عليهم وقالتلهم …
حناهم …… والله الا مانحرش امك فيك بااااااااهى … وين عصاة مكنسه وين ؟؟؟ تعااااااااااال هنااااااا
هرب وسام فوق يجرى وقعد يضحك وقال لنهال …
وسام … ماتخافيش غدوا صبح تنوضى تلقيها ناسيه كل شى ههههههههه تصبحى على خير 
وهنا نهال شبحت لحناها وهارب عليها ضى … وحناها قالتلها ….

يتبع ……..

لقراءة الجزء التالي : الجزء الخامس عشر من رواية حوش جدي

لقراءة الجزء السابق : الجزء الثالث عشر من رواية حوش جدي

للإطلاع علي فهرس الرواية : جميع الاجزاء كاملة لرواية حوش جدي للكاتبة كيندا

جميع الحقوق محفوظة للكاتبة كيندا من ليبيا .