وفي الجزء الرابع جهز نفسك جيداً للكثير من الجمال والروعة التي لا مثيل لها داخل سطور الجزء ، فهيا بنا دون تضييع الكثير من الوقت لنبدأ قراءة كل حروف وكلمة للتعرف علي كل جميل .
الجزء الرابع من رواية حوش جدي
وسام ….. ههههههه صار نستر روحى … وشعرك الطايح هوا .. تابعى ولاشنى ؟؟؟
وهوا كيف حط ايده على شعرها باش يحشيه فى الواشح نفتح باب داره وخشت امه وقعدت تشبحلهم وهيا مش فاهمه ومصدومه وقالتلهم ….
امه … شن الا يصير هنا ؟؟
نهال … خالتى اه اه مافى شى انى بس كنت نبى نقووله ..<< وفجأه قطع عليها وسام وقاللها >>
وسام … خشت تبى تسالنى تبى شاهى ولا لا … فيها حاجه ؟؟
امه …. نهال اطلعى شوى حبيبتى نبى نكلم وسام فى كلمتين …
نهال … متأسفه جدااا ونستأدن منكم .
طلعت نهال وتضربيها بالموس ماتطلع منها قطرة دم … سكرت الباب وراها وجت بتمشى وبعدين وقفت شوى وحبت تسمع فى شن بيحكو …. وهنا سمعت خالتها تقوله ..
امه …. شن الا كان يصير بزبط .. انى مش عميه وشوفت كل شى شن فىىىىىى ؟؟
وسااام … هههههههه هادى اخر خطه توصلتيلها باش نخطبها ولا شنى … اااااامى شوفى مهما يصير حطى فى بالك حاجه وحده انى مش رح نخطب نهال ونهال ززززى اختى ..
امه … والا صار توا فى دار شن نسميه قووووول ؟؟
وسام …. ماصااااار شى فى دار طمنى وصدقينى يوم مايصير شى مش رح ندس عليك …وبالله موضوع اخدى اكتر من قيمته راهو .. وانى راسى بيتفجر وهدا علاش روحت معناها مش ناقصنى منك ليها …
امه … ماشى توا نشوفو << ياخبر اليوم بفلوس بكرا ببلاش >> وعلى فكره حط فى بالك نهال مش نهال رح نخطبلك مااااشى ..
وسام … جعان فى شى فى مطبخ يتاكل ؟؟
امه … انى نازاله عماتك يستنو فيا ….. خليك فى دارك معاش تطلع ….. البنات فى حووووش
.. قبل ماتطلع امه من دار تنطرة نهال للمطبخ … وامه طلعت من الحوش وسكرت باب وراها
ونهال قعدت لاهيه تطبيب فى شاهى للبنات وتقص فى كيكه وبينما هيا عاطيه بالقفى خش وسام للمطبخ وفتح تلاجه وطلع منها صونية الظولمه والمكرونه بشاميل وحطها فى ميكروف وبعدين قاللها …
وسام …. شفتى عبطك لوين وصلنا ؟؟
نهال … مابتش ترد عليه ووجعها الكلام الا سمعاته فى الدار وحسة انها اتضايقة بس مش عارفه علاش لانها عمرها معطت قيمه لكلام وسام قبل …
قعد ساكت وسام يستنى فى اى ردة فعل من نهال بس نهال خدت صفرة الكيكه والشاى وطلعت .. وهيا طالعه بصفره مد ايده وخدى صونية الكيكه من صفره وقاللها …
وسام … مش ضرورى 4 صوانى حتى تلاته ساد …
نهال … لو سمحت رد صونيه فى مكانها لو سمحت ..
وسام … توكلى على ربى وكملى طريقك … مش رح نردها ..
وهنا حطت سفره على طاوله وقربت منه وقالتله…
نهال …. لو سمحت نكلم فيك بالاحترام هات صونية الكيكه …
وسام …. بعدى شوى بنخش لدار … ولابتديرى زى دار نوم ..
نهال … انت وقح هاااااات الكيكه
وسام … انى وقح ؟؟؟ تى والله ماك وخدتيها باهى ..
وهنا صار فيها فكان وشحان على صونية الكيكه وهيا تجبد وهوا يجبد لحد ماجت صونيه ملبسه فى وجه وساام وهنا نهال كانت ردة فعلها كالااتى ..
نهال …. هههههههههههههههههههههههههههههههههههههههههههه …
مسح وسام الكيكه من وجهه وقاللها ….
وسام … انتى بجد تضحكى … << وخدى صونية الكيكه تانيه ولبسها على وجهها ونفلق بضحك …
وسام … ههههههههههههههههههه مش قتلك ياحلوه ماتلعبيش معاى ههههههه بس شكلك هكى احلى تصورى هههههه
وخدى صونية الحار ومش بيها لدار نومه ….
طلعت نهال باقى الكيكه وقصتها ودخلتلهم صفره وقالتلهم …
نهال …. بلا تسهويك انتى وهياااا شدو شاى … واستنونى شوى بس نغسل وجهى وشعر ونجيكم ..
اميره …. هههههههههههه شن فى خيرا الكيكه ملكزه على شعرك .. وعلاش متتى غادى والله قريب روحنا
نهال … شوى بس ونجيكم …
خشت نهال للحمام وغسلت شعرها بسرعه وحطت فوطه على راسها وطلعتلهم …
واول ماخشتلهم بدو فيها سين وجيم وضحك ينسمع من هنا وغادى هما 3 … ونهال تبكى وتضحك زى مهبوله …
وللحظه حست انها تكره وسام … بس فى نفس الوقت تضحك … يعنى شن شعور هوا ؟؟؟
فاتت ساعه ورا ساعه .. وروحو صحابات نهال …. ونهال ظمت صاله وخشت للمطبخ وقعدت تغسل فى معايين وتستنى فى اى لحظه وسام يخش عليها … وحاولت تدير اى صوت باش تلفت لوسام انتباهه ويعرف انها فى مطبخ بس مافيش ولااى ردة فعل نهائيا منه … ولما يأست قررت انها تخطم جنب داره بشوى وتكبه عليه من بعيييييد و من غير مايحس …
… مسحت ايديها بالفوطه من الميه وطلعت من مطبخ ومشت للمر الا جنب الدار .. وكل ماتقرب من دار قلبها ينبض اكتر واول ماوصلت فم الباب لاقاته مردود فا كبهت بشوى وشمت ريحة برفان وسام فى الدار كلها … واول ماكبهت لقت وسام متلوح على سرير وراقد وصونية الاكل جنبه ومش ماس منها اى شى .. فاوخرت بشوووى ورجعت للمطبخ وطفت ضى مطبخ و نزلت لوطه للحوش ….. ولقت امها كيف بتروح وهنا امها قالتلها …..
امها …. اه نهال شنى مرتاحه هنا ؟؟
نهال … الحمد لله 
امها … كلمت فرج بكرا صبح يحطك عندنا وبعد بكرا بوك يحطك هنا ماشى ..
خالتها …. علا ش ان شالله خير ؟؟ وانى ماصدقت بنت جتنى يااامال ولا غيرتى رايك ؟؟
امها << امال >> … والله مكلمينى خطاب من الاسبوع الا فات وبكرا بعد صلاة العشاء بيجو يشوفوها …
نهال …. انتى عارفه انى مانحبش الخطوبات هياااااا … وبعدين علاش توا قولتيلى بس
امها ….. انتى غير شوفيهم وبعدين يومن عاش …… وها توا تصبحو على خير …
ركبت خالتها فوق لشقتها وخشت نهال ولقت حناها مقعمزه تسبح فى مربوعه فاتكت عليها وقالتلها ….
نهال …. حناى ..
حناها وريده … اه بنيتى خيرك ؟؟
نهال …. خرفيلى حكايه …
حناها … شن تبنى نخرفلك …
نهال …. بنت الباشا والفارس الابيض
بدت حناها تخرفلها و تمسح على شعرها ونهال تسمع لحناها وتدكر فى لقطات الا صارو معاها وتبتسم لحد مامشت فى سابع نومه … واول مارقدت خدت حناها مخده وحطتها تحت راسها وناضت خدت الحولى المعلق على روشن وحطاته عليها …
فاتت ساعه وراء ساعه وفاقت على صوت حناها مع ساعه 9 تقربع فى جنان .. تدور فى مالقى وكرونه … وهنا ناضت نهال وهيا تمسح فى عيونها وتتاوب وطلعت لجنان وقالت لحناها ..
نهال …. صباح الخير حناى … خيرك شن تدورى على صبح ؟؟
حناها …. يابنيتى نضت فجر باش نتوضى مالقيتش الكروانه والمالقى فى مكانهم وانى ديما نحط فيهم فوق فسكيه … شكله مفرخ شيطانى اشبح وين حطوهم … والله فجر لما خشيت لبيت الراحه باش نتوضى قريب نزلقت لانى مش متعوده ..
بالله شوفى مناجيه وين حطوهم يابنيتى ..
نهال …. حاضر حناى بس خالى طلع ؟؟
حناها …. كيف ناض .. يسخن فى كرهبا قالى ..
طلعت نهال تدور فى الكروانه والمالقى البلاستك … ولقت صغار لاعبين بيهم وملوحينهم فى الحوض التراب متع شجرة البرسيانه الكبيره فاخدتهم غسلتهم وحطتهم فوق فسكيه .. وخشت للحمام ولبست حوايجها وطلعت مع خالها …
واول ماخشت لحوش بوها حست بشى يخنق فيها … وكانت تفوت ساعه كانها سنه …فاتت ساعه وراء ساعه لحد ماادن مغرب وفطرو وبعد ماكملو عشاهم … ام نهال قالت لنهال …
امها … خلى معاين العشى وبرى وتى روحك قبل ما يجو ناس …
نهال …. مازال وقت … خلى نغسل معاين قبل ..
امها …. قولنالك لا برى وتى روحك << ولا فجأه بدتى تحبى مطبخ ومعايين >>
ناضت نهال وهيا تتبرطم وطلعت اى لبسه من دولاب وخلاص وقامت شعرها قرن ومابتش تحط ولاقطرة مكياج على وجهها << ودارت اى طرق باش ماينعجبوش بيها >>
جو الضيوف للحوش ومافاتتش ربع ساع الا ونادت عليها امها … وبرغم كل محاولات نهال الا انا محاولتها بائت بالفشل والناس من ملامحهم كانو معجبين بنهال هلبه ويبوها لولدهم … والاسوء من هكى انا العريس موصفاته ممتازه .. مهندس ويخدم فى شركه ومعاشه ممتاز وعنده شقه فى طريق مطار حى الزهور وعمره 28 سنه وهوا واهله من عيله معروفه …. اما بالنسبه لام نهال فكانت الابتسامه من هنا وغادى تعطى … واول ماطلعو ناس خشت ام نهال لنهال وقالتلها …
امها … اهااااااااااا توا ماعندك شن بتقولى ..
نهال …. ماتطمنيش هلببببه خلى هما يوافقو قبل عليا …
امها … هما عطونى موافقه من توااااا …
نهال ….انى مانبيش نتزوج وانتى عارفه …
امها …. ولامتى بتقووولى هكى ؟؟؟ رددددى .. عمر يجرى وانتى جى الوقت الا تفتحى فىه حوش …
نهال … امى سكريه موضوع توا بالله عليك وخلينى وسكرى دار …
امها انى بنعطيك اسبوعين تفكرى بعدين انى رح نتخد معاك اجراءت تانيه …
اتكت نهال على فراشها بعد ماطفت ضى الدار متعها … وقعدت تفكر فى موضوع وتحاول تقنع نفسها بس بين الفكره والفكره كانت تتفكر وسام وتضحك وبعدين تستاقض وتقول لنفسها ….
لا لا شن غباااء هوا … هوا زى خوى وانى زى اختتتتتته ومافى شى تانى .. اكيد اصلا واضحه هههههههه باين بديت نخرف انى …
فاتت الليل كلهاااا على نهال وهيا ماشيه فى نوم عميق ومافاقتش الا على صوت بوها يقوللها …
بوها …. نهااااال ساعه 1 ظهر …. نوضى بنتى هياااا باش نحطك فى حوش جدك قبل مانطلع …
وهنا ناضت نهال وهيا فرحانه وكأنه اليوم عيد وقالتله…
نهال … دقيقه بس ونكون واتيه …
ناضت بسرعة البرك وبدلت حوايجها وطلعت …. وصلت لحوش جدها و وهيا راكبه لدروج حوش خالها ووصلت لاخر درجه وكيف مدت ايدها بطق طق … فتح وسام الباب … فابتسمتله وابتسملها وقالتله ….
نهال …. صبح الخير ..
وسام …. صباح الخير
خشت نهال للمطبخ طول وسلمت على خالتها وهنا خالتها قالتلها ..
خالتها …. شنى جوك تمااام اليوم
نهال ….. الحمد لله
وفى نفس اللحظه … وسام تدكر انا نسى نظراته فى مطبخ فاولى وسمع امه تقول …
امه …. شن صار مع خطاب امس ؟؟ امك اتصلت وتشكر وتمجد .. قالت مهندس ويخدم فى شركه وعنده حوش وسياره … شن عاجبك …
وفى اللحظ الا نهال بترد عليها … خش وسام وقاللها …
وسام …. شن بنت عمتى انخطبت الف الف مبروك ..
وهنا نهال انصمتت ومعاش عرفت شن تقول وحست بموس طعنها وقعدت تشبح لخالتها وقالتلها …
نهال …… اى شبه موافقه على موضوع ان شالله …
يتبع ………
لقراءة الجزء التالي : الجزء الخامس من رواية حوش جدي
لقراءة الجزء السابق : الجزء الثالث من رواية حوش جدي
للإطلاع علي فهرس الرواية : جميع الاجزاء كاملة لرواية حوش جدي للكاتبة كيندا
جميع الحقوق محفوظة للكاتبة كيندا من ليبيا .
