الجزء الرابع من رواية سر سعادتي

وفي الجزء الرابع من رواية سر سعادتي دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .

الجزء الرابع من رواية سر سعادتي

رنت مسرة رنتين وراء بعض ليوسف
شاف يوسف لنقاله ورده مكانه
ويبكبك يبي يتصل ومش عارف كيف وف نفس الوقت مايبيش مرته اتحس ناض وقف وقالها تصبحي ع خير ومشي بعدين دار روحه رجع بش ياخد موبايله وخش دار النوم واتكى ع السرير

مسرة دارت رنة ل عفاف
عفاف عاودت
مسرة:الووو عفاف يوسف ماردش عليا
عفاف :بالك مشغول ف المحل
مسرة:محل عينك ليل توا
عفاف:كملتيلي رصيدي هيا باي
مسرة:باي …
نقال مسرة يشرين
مسرة:الو
يوسف:مرحبا
مسرة:مرحبتين
يوسف:كيف الحال
مسرة:تمااااام….كيفك انت؟ يوسف :كويس الحمد لله
مسرة:حقا معليشي امبدري خوي كان قاعد ماقدرتش نرد عليك
يوسف:مش مشكلة قلت اكيدة مشغولة
مسرة:امممم باهي شن مداير
يوسف:مكسد كنت نتفرج ع تلفزيون
مسرة:اها كويس ..
يوسف:شن مدايرة انتي وكيف كان يومك ف العمل
مسرة:باهية والعمل كويس الحمد لله..وانت شن جو العمل
يوسف:تمام الحمد لله
مسرة:ممكن نسألك سؤال
يوسف:تفضلي
مسرة:مواليد كم يوسف؟
يوسف:شيباني الحق
مسرة:هههههههههههه
يوسف:هههه بجديات شيباني مواليد 76
مسرة:الله يبارك العمر كله 
يوسف:الله يسلمك
بعد ربع ساعة
نقولك حاجة مسرة..
مسرة:هههه تفضل
يوسف:بصدق هكي ابتسامتك حلوة ماشاء الله ديما مبتسمة
مسرة:ههههه تسلملي
يوسف:ديما هكي يعني
مسرة:هههه وجهي ديما هكي حتى لما نكون راقدة ماما تلقى فيا مبتسمة وبنات خالتي يحسابوني نتسهوك وهوا حق نكون راقدة
يوسف:ماشاء الله..
يوسف سمع حركة ف وسط الحوش قال لمسرة:مسرة توا ليل الليل نخاف عليك خوك يكبسك …تو نكلمك بكرة اوكي
مسرة:اوكي رد بالك ع روحك ليلة سعيدة
رد عليها :حتى انتي ليلة سعيدة ف امان الله
هوا سكر من اهنا وحط تلفونه ع الكمدينو جاته رويدة فتحت الباب
رويدة:بش بترقد !
يوسف: وصل لسرير ماجانيش نوم
رويدة طفت الضي وفتحت الصهارة وقتله:اسمع غدوة نبي نمشي حوش امي
ماتقولش ﻻ ليا مدة ماشفتهاش
يوسف فباله نرفعك عادي اصﻻ فراقك عيد ورد عليها:ان شاء الله خﻻص انحطك قبل مانمشي العمل
رويدة: اوكي…
تلفت جيهة تانية وبيرقد وسارح ف صوت مسرة وابتسامتها لين خداه النوم مافاق اﻻ على ايد رويدة نوض نوض يوسف هيا ساعة 6:45 هياااا
يوسف:ماتعرفيش تنوضي بطريقة الطف من هكي ؟؟
رويدة:نوض والنبي تره وانت حشيشتك فلسفات مانحبش نتكلم هلبا ف الصبح
يوسف:استغفر الله ..حدديلي حوايجي ووتي قهوة ديري حاجة كويسة ولو مرة
رويدة:ياسﻻم اللي يسمع يقول ماعمري درت حاجة كويسة.
ناض يوسف يبرطم خدي دوش صلى الصبح وشرب قهوته ولبس لبسته وطلع لسيارته ولحقاته مرته …
حطها ف حوش امها
وبمجرد مانزلت مرته شيط بسيارته وفتح الرواشن اﻻربعة نسمة الصبح حلوة وفتح fm اغنية فيروز حبيتك بالصيف وحبيتك بالشتي

اتصل ب مسرة
مسرة؛الو
يوسف:ياصباح الورد
مسرة:صباح النور
يوسف:كيف حالك اليوم
مسرة:تمام…وانت
يوسف:تمام…وين انتي
مسرة:في الحوش كيف بنطلع
يوسف:من يوصل فيك ..
مسرة: ع اساس خوي بيوصلني بس ماصارش حنمشي بروحي
يوسف:اها اوكي ردي بالك ع روحك
مسرة:اوكي ..سﻻااام
ومشي درس قدام المختبر يستنى فيها
بعد ثلت ساعة وصلت مسرة لجيهة المختبر
لمحها يوسف ونزل من سيارته وشبك ايديه
مسرة كانت تبربش ف نقالها
يوسف:ياصباح الورد
مسرة:هههههههه خلعتني ..صباح فل
هدرز عليها شوي وقالها :يﻻ وقت على الدوام توا
مسرة:دوام شنو ؟؟؟؟؟؟
يوسف تلكمس وقالها:دوامك انتي
مسرة:اها هههه باهي
يوسف: يﻻ خشي توا ف امان الله سﻻم
مسرة:ف امان الله..سﻻم

خشت مسرة للمختبر وعيونها قلوب قلوب
ركب يوسف سيارته ومشي للعمل وصل للمستشفى ومبتسم ومن فرحته بمسرة
شوي شوي يتصل بيها ويبعتلها مسجات وهيا نفس الشي دايرين رنة برنة
وعلى هالحال لين فاتو 5 شهور وحبا كلا منهما اﻻاااااخررررر
    ههههه
ويتغدو مع بعض ف المطعم وهدايا ودية بمعدل اسبوعيا هيا تشوف حاجة تعجبها تاخدهاله وهو كذلك

عفاف ل مسرة:شنو مافاتحكش يوسف ف موضوع خطوبة واﻻ حاجة
مسرة:ﻻﻻ
عفاف:ولأمته بتقعدي هكي ﻻزم تخليه يدير خطوة لقدام
مسرة:الحق انا مدمرة ﻻنه مافتحش الموضوع بس انحبه نخاف نقوله تعال اخطب يحسابني نرمي ف روحي
عفاف:ماك خايبة ! وبه من قال يحبك
مسرة:ﻻﻻ ايحبني وانا نموت فيه
عفاف:ع راحتك

وفي يوم ما مع ساعة 10 ليلا رويد ويوسف يتفرجو على تلفزيون جي برنامج العﻻقات العاطفية
مراة ف البرنامج تتكلم :اﻻزواج خائنين حينما ﻻ يجدون العاطفة والحب وعندما يحدث فراغ عاطفي بينه وبين زوجته فقد يلجؤن للبحث عن الحنية ف نساء اخريات وذلك لسببين اﻻول وهو عدم اهتمام المراة بزوجها وبيتها وعدم اعطاء الزوج حقوقه الزوجية
ام الثاني فقد يرجع الى كون الزوج ﻻ يكتفي بامراة واحدة
..غيرت رويدة القناة وناضت للمطبخ
رنت مسرة ع يوسف
شاف يمين يسار لقي رويدة مستمخة ف المطبخ فخش لدار الضيوف وبيتكلم
يوسف:سرورتي
مسرة:فوسي حبيبي
يوسف:استحشتك بيبي وينك اليوم واﻻ ماستحشتيش حبيبك
مسرة:استحشتك هلبااااا غير اليوم انشغلت شوي ماما مريضة
يوسف:ان شاء الله ﻻ باس عليها
شن عندها
مسرة:مش عارفة تعبانة شوي
شوره من تعب

رويدة قعمزت ف وسط الحوش وبتتفرج ع تلفزيون تسمع ف يوسف يهدرز بس ماعدلتش

يوسف ل مسرة: ردي بالك على ماما حبيبي باهي ..
مسرة:ان شاء الله

رويدة جاها خنس وادكرت كﻻم المديعة ان اﻻزواج خاينين وزاد الفضول وتبي تعرف من يكلم ﻻنه ايوشوش ويهمس فناضت وقربت من دار الجلوس…
يوسف ل مسرة: اليوم مشي عليا ابصر كيف من غيرك ومن غير صوتك وابتسامتك الحلوة معش تغيبي عليا حبيبي والله انتي سر سعادتي 
مسرة :ياااا روحي انت ان شاء الله ديما ايمنا سعيدة ياعمري..انحبك.

وطاحت دوة يوسف ف وذن رويدة
وحطت ايدها على فمها من صدمة و..
يتبع….

لقراءة الجزء التالي : الجزء الخامس من رواية سر سعادتي

لقراءة الجزء السابق : الجزء الثالث من رواية سر سعادتي

للإطلاع علي فهرس اجزاء الرواية : رواية سر سعادتي ( جميع الأجزاء كاملة ) للكاتبة لوزة

جميع الحقوق محفوظة للكاتبة لوزة .