الجزء السابع من رواية عشقها لعنة

مريم: مافي شي بيني وبينه ولا معاه ولا مع غيره كلل شي صار بسب ليلة الفضانيه طلب انه يخش يلبسني ورفضت قصدي الفضانية ف الشقه فوق وزحمه ومانقددرش ورفضتت وبعد الفضانية بليلة بدي يتمدى معاي ف الكلام ع الهاتف قفلت الهاتف لهديه ليا وبعدين فتحت وكلمته بهدو وقتله غلط ليقولي فيه وحراام صح مجرد درشه لكن ميتمدااااش بدي يسب فيا بسبااات ماعمري توقعت نسمعهم منه هاننني مع انه هو الغالط وسككتت درت ع الجرح ملح وسكتت وف نفس اليوم ماما ونديم خدو القفطان متع الاجرة عشان يرجعوه وهما طلعوو وباب طقق صح اني هبلة وديما نفتح بدون مانقولي مني واصلا مايجينا حد قربت بنفتح لكن قلبي نغزني شفت السحارة وكان هو عمر خشيت خديت المفتاح وصكرت الباب بلمفتاح من داخل وهو سمع الطقات ضرب الباب ونزل وفسخ مني صح فرحت لكن الناس كلها وبفت ضديييي خصوصنا لم سمعو من عمر انه اني سببب ويسالو فيا خيرك ماقدرتش نتكللللم (دمعتها نزلت) وكلللل شافو عمر البريئ واني الشيطان والى اليوم ماما تسال فيا شن سبب الفسخ مقدرتش نقول لحدد حتى اختي مقلتلهاش

عزو اتكى ع الحيط وقعمز جنبها بهدؤ ويسمعلها لم حس باانها تفضفضله وترتاحله

مريم تبكي: ف الجامعه صح كللل بنت ف الجامعه تتعرض لحاجات اخييي ومش حلوة ف يوم حتى دارين حاظره نزلنا للكافي نفطرو نقصوزي فلوس صاحب الكافي قالي انه عادي بما اني بنت كويس وناخد منه رجعت للبنات وفطرنا وحني قعدين مقعمزين يخش عمر ويضرب صاحب الكافي وهني عرفت اي شخص يضحك ف وجهي او يتصرف معاي بطريقه حلوة بيطيح ف مشاكل والراجل مسكين من يوم الضرب معاد جي للجامعه وهدا كللله بسببي (شافتله) انت اكيد تقول امور تافها وهو ميخوفش لانك متعرفاش هكي تقول

عزو: واني بندير بنفس طريقته هو لو مزال نشوفه معاك…. سكت… مانبيش نندفع تتشوفي قدامك

مريم مسحت دموعها وقفت: مع هدا كله خلاص عيش مرتاح بلا مشاكل واني عادي يفرج عليا ربي

عزو وقف: انتي بديتي تهميني ولجاتيلي وفضفضتيلي يعني ارتحتيلي ووتقتي فيا اكثر من امك واختك ومعا هدا تبي تتخلي عليا مريم اني نحسس ره

مريم سكتت

عزو: كلامك ز السيف تقريبا شقتي مزال قعده واني رح نتصرف

مريم طلعت هاتفها من جيبها ومدته لعزو

عزو: شنو هدا

مريم: خلي الهاتف معاك

عزو: عنده رقمك يعني

مريم: اي عنده بس اني معاد نبي نتواصل مع حد الفترة هادي عادي تخليه معاك

عزو: اكيد… وحطه ف جيبه

مريم ركبت مع الدروج

عزو اتكه ع الحيط فجاة باب العمارة نفتح وخش عمر

عمر: بسسبسس ياحلوة

مريم تلفتت بفجعه وعطاته بضهرها وركبت تجري من الدروج ولحقها شدها ف زاوية الدروج

عمر: تعرفي من هدا عزو هدا من عيلة متع بابا وماما يعني كلب بوه فهمتي مايمشيش معاك

مريم ساكته

عمر نزل عيونه شافها من فوق لعند لوطى: تمشي معاي نغيرلك جوك ووعد نتزوجو هيااا وععددد

مريم ترجف ف الزاوية: مانبيش

عمر حط ايده ع ايده وغرس اظافره ف ايدها بغلللل ورقوووة لدرجه ظوافره انطبعوو ع ايد مريم

مريم ترجف

عزو طلع من غرفة الكهرباء حس بحركه فوق لكن مدورش طلع ولم شاف نفس سيارة بكري رجع ركب بسرررع وشاف ايده ف ايدها ومحاصره ف زاوية

عزو: ارخي البنت

عمر رخها وبعد وقرب وقف قدام عزو بصوت مستفز : اقلللب وجهككك من قدااامي

عزو شافله واشر بعيونه بمعنى اركبي

مريم ركبت تجري

عمر شافلها كيف ركبت: علاش تركب خايف علها تنصدم فيك

عزو: اي خايف علها تنصدم فيا لاني لفهمته متحبش العنف والشخص العصبي فـااني مش رح نخلها تشوف هدا كله… وجبد عمر ودفه من الدروج بكللل قوة ونزل وقامه ودفه من جديد لعند موصلو ف الدور الاول دفه تاني ونزل

عمر شاد ف الحديد متع الدروج وقف طلع سكين من جيبه

عزو كلام مريم يتردد ف ودنه قرببب

عمر قربله بمسكين لكن عزو شد السكين بيديه الزوز

عزو: تشوف ف الدم لينزل من ايديا هدا انت بتحتاج منه لو ماتقلبش وجهك من قدامي صدقني ماتفتح عيونك الاف المستشفى واني عزو

عمر قعد يحرك ف السكين

.

.

.

طلبتها

بسمه تشوف ف دارين: يلا مالا مناخركمش

زهرة: سلمك

بسمه: بسلامه

زهرة وصلتها لباب: سلمك مع السلامه

دارين قعمزت بفرح لكن قدام جداها دايره روحها عاديه

زهرة:من جيهتي اني موافقه هو قنين ومشالله

دارين ترطب ف جو:منين قنين عاادي ياحناي لا قنين لا شي حنطي طويل بسس

زهرة:لااا قنين غير انتي ذوقك مش حلو اشش لحيته وشعيراته وطول ف عرض

دارين داخلها نغاار

زهرة: نوضي نقعمزو ف جنان قريب يجي جدك

وهما طلعو وخش عبدالواتق

عبدالواتق:مسيكم بلخير

دارين:خير يصيبك

زهرة:عندنا ليك خبر حلو

عبدالواتق:اسكتي اني نقول الاول عندي خبر حلو

دارين فرحت:قوول

عبدالواتق: بما ان حفيدتي الاميرة زعلانه غضوا بنمشوو للمصيف حجزنا يومين وحمزة متعصب مني ومتغشش حتى هو كلمته وقال باهي وحجزتله

دارين:ااشششيه

عبدالواتق:جهزو روحكم من اليوم غضوا بعد المغرب بنطلعو من هني

امجد وايوب خشو لجنان:سلام عليكم

كلهم:وعليكم السلام

وحكالهم عبدالواتق وامجد وايوب قالو لا وعندهم خدمه وهكي

عزو خش وعطول بدون مايشوفلهم ركب لحوشهم بدون كلام

امجد:خيره هدا

ايوب:ابصر

دارين حست انه منها

دقايق ونزل عزو

عبدالواتق:قول السلام عليكم ياولد

عزو شافلهم وقرب: السلام عليكم

كلهم: وعليكم السلام

دارين وقفت:هدا شنو لفي وجهكك خيره حاجبك مفتوح

عزو شافله:عركه صغيرة استرينا انتي

جده وقف:مع مني متعارك

امجد وايوب شافو بعض وضحكوو

زهرة:خوكم حاجبه مفتوح وتضحكو

امجد:هدا حاجبه مفتوح واجعني لمعارك معاه ابصر مات ولا ف المستشفى

ايوب:ياجداي هدا ايده تقيله الله لا يوريك

عزو:عركه خفيفه وتمت

جده:مع مني العركه نتكلم فيييك

عزو عطاه بضهره:مش مهم ..وطلع

.

.

مريم تتعشى ع سفرة

نديم يتعشى:عمر ف المستشفى

سميه شافت مريم

مريم تاكل عادي لكن تبي تعرف شن صار فيه ومتقدرتش تسال خاها

سميه:مع مني العركه خيره

نديم:مانعرفش واني راكب قالو الجار الجديد فايت عليه بطريحه وفايت بعينه قالو عمر عينه مشت

مريم :صحتين

.

.

دارين غسلت الماعين وعرفت جداه وحناها رقدو خنبت هاتف جداها وصكرت غرفتها

دارين اتصلت:حبيبي راقد

حمزة:دارين

دارين:اي

حمزة:لا وين راقد كنت ف المركز مروح توا

دارين:خدمه هكي ديما صبح وليل

حمزة:خدمه الشرطه مليهاش وقت معين كان عندي تحقيق بس

دارين :تعبان ؟

حمزة: لالا عادي شن اديري

دارين: كنت نغسل ف الماعين شفت جداي راقده مشططت الهاتف

حمزة ضحك:اعتراف بخنبه كان تشكيلي جداك انك خنبتيه تشوفي

دارين:اي خنبته شن بدير

حمزة: هلبااا حاجات

دارين:تضربني!!!

حمزة:دارين شن تقولي علاش نضربك اني مانضربش ف بنات لكن انتي غييير عن البنات لذالك بتتحسابي لكن مش بضرب

دارين:حمزززة كيف تحقق انت؟

حمزة:شن تبي فيا كيف نحقق نسالهم وهما يجاوبو ولو الكلام كذب نتصرف

دارين: كيف تتصرف انت ز المسلسلات تعذب ف الناس؟؟؟

حمزة بحزمه:اني نعذب ف الناس هكي فكرتي فيا اني صح نتصرف لكن مع مخلوقات مش من البشر

دارين: باه اسمع لو اني منسمعش كلامك شن ادير؟

حمزة: علاش متسمتيش كلامي اني مش رح نفرض رايي غليك اصلا وانتي تقدري تقرري عن نفسك وتعرفي للصحمن لغلط

دارين: مبردني متصله بيك ع اساله تافها

حمزة: بتمشي للبحر غضوا معاهم؟وطبعا من كلام جدك معاي واضح انكم مفتحتوش معاه الموضوع

دارين: خايفففه بجديات

حمزة يسوق: يعتبرك بنته مش حفيدته واضحه الررفض

دارين:علاش الرفض انت راجل ومانقصك شي وبعدين اني نحبك ومعاك

حمزة: واني نحبك ونموت عليك بس هكي حاسس وبتصير حساسيه بيني وبين جدك

دارين: ف شنو تفكر انت

حمزة: ف قصة مستواك ومستواي مثلا اني مش نفس طبعكم…قطعاته

دارين:جدي مش هكي انت شن تقول جدي ميشوفش ف الناس بفلوسها مستحيله واصلا ديما يقول الناس بمعدنها مش بفلوسها

حمزة: دارين

دارين:نعم

حمزة: نحبك

دارين :باه

حمزة ضحك:شن باهي اني قلت حاجه عادية

دارين:بلعكس واصلا نعرف انك تحبني ونموت فيا

حمزة.وشن تعرفي تاني

دارين: بديرني مرتك وام ولادك وبتتعارك معاي لم ينوض ولدنا يعيط

حمزة ضحك:مشالله عياط من اولها (تغير صوته) رح يكون ولدي نفس ما ولدك ومش عيب لو قمت ولدي اني وسكته

دارين: حليلي ني اي غضوا بتمشي معانا باهي عرفاتك بتقول لا وبتقول خدمه وبتقول عطيت لجدك كلمه لكن مانقدرش

حمزة ضحك من قلبه:مشالله وكيف عرفتي مشالله الحق بجديات ندهشت

دارين وراسي تعالى بنكسد بروحي

حمزة: تي راجل مسافر وهي حامل وعندنا وامي مانقدرش نخليهم يادارين افهميني

دارين:باه باي

حمزة درس السيارة قدام الباب:حرجتي بلله افهميني

دارين: لاا محرجتش بجديات بلعكس فهمتك

حمزة:يخليك ليا ياقلبي

دارين ابتسمت: هدا كله سواقه باي هدا كان ترفع مرآة حامل للمستشفى تجيب ف الطريق

حمزة ضحك:اني نسوق ببطىء لانك كلمتيني واصلا وصلت يادبه

دارين:توا قريب تلاته مرات نقولك باي باي بجديات

حمزة:تصبحي ع خير…وصكر للخط

.

.

.

مريم خافت من الخوف بدت تعض ف اظافرها تبي تعرف شن صار وواقفه ع الشباك

عزو وصل ونزل قرب بيخش

مريم بسرعه حدفت عليه من فوق ورقة

عزو تعصب لم شافلها ابتسم وقام الورقه فتحها مكتوب فها(انت كويس؟! ضربته صح اني عرفت بكل شي)

عزو رجع لسيارة طلع قلم وقلب الورقه وكتب من الخلف

قام رشاده صغيره لف الورقه علها واشر لـ مريم تبعد من الشرفه متع الشباك وحدفها

مريم عدلت وشاحها وفتحتها:(مادوريش خدي نصيبه اني كويس مصار شي)

مريم خدت ورقه جديده (شغلتني عليك….)وحدفتها وخشت

عزو خدي الورقه وركب

.

.

دارين ف الصالة تتفرج

عبدالواتق ناض:نوضي ارقدي سلم بنتي

دارين:حاظر (بعد سكوت)جدي نبي جواب ع سؤال

عبدالواتق:تفضلي بدون اذن

دارين تلبببكت عدلت تقعميزتها:توا انت مش ديما تقولي الناس بمعدنها ومش بفلوسها…قاطعها يضحك

عبدالواتق يضحك

دارين

عبد الواتق: ياملعونه عرفتك علاش ع حمزة

صح

دارين سكتت وخلت روحها عاديه

عبدالواتق: حناك حكتلي قبل العشي لم انتي ف المطبخ الحق كيف حمزة مافي صح فقير وقد حاله لكن صدقيني يابنت كريم واسلوب مشالله وعادي الراي رايك والشور شورك بكرى نحكو لبوك وناخدو رايه… قطعااته

دارين: ميهمنيش رايه ياجدي

عبدالواتق: عيب يابنت هدا بوك

دارين: اي بوي وهدا لوجعني اصلا .. وناضت متنرفزة وخشت غرفتها ومضايققه من بوها هلباا

وهي كيف بتخش سمعت مسج ف هاتف حناها مشت للهاتف بهدؤ شافت المسج

زهرة: خلي الهاتف عندك لو ف شي وتبيه

دارين خدت الهاتف: صحيتي تصبحي ع خير.. وخشت

المسج من رقم حمزة( رقدتي؟!)

دارين تسطحت(لا فايقه)

حمزة يشرب ف نسكافيه شاف المسج(بنتصل تمام؟؟)

دارين(عادي)

ترن

حمزة: مستاحشك للوح

دارين ضحكت: للوح صار شن يعني للوح

حمزة ضحك: هلبااا يعني اي وينك

دارين: قعده حناي فتحت الموضوع مع جدي وز ممتاكده جدي مش متع مظاهر لكن الخوف من بوي

حمزة: بوك؟! اهااا تصدقي منعرفاش مع اني عمامك نعرفهم لكن العم جاسم منعرفاش الحق

دارين: احسن كان متعرفاش خير

حمزة: خيرك تحكي هكي ف حساسيه بينكم ؟؟

دارين: لا شي بس لوح بنت وهي طولها شبر عمرها متجاوزش 15اليوم قالت حناي من عمري يوم واني عندهم ولااا حس عنده بنت يصرف عليا صح ويبعتلي ف فلوس لكن محسيتش بمعنى العيلة نهااائي حشا حناي وجدي ربي يخليهم ليا وعمامي

حمزة: ربي يجمع شملكم

دارين: مافيش خدمه غضوا؟؟

حمزة: لا في غير حسيتك اضايقتي بكري مهنتيش عليا

دارين: لالا مزعلتش لا شي امتى تنوض غضوا

حمزة: اممم التمانيه غضوا

دارين: للطف ديما هكي التمانيه بكررري

حمزة: لابكري لاشي لانه ف متهمين بيتحولو غضوا

دارين: ياناااري ربي يفك اسرهم

حمزة: ياروحي متدعيلهمش مافي حد يستحق دعوه الاوغاد هادم كان الموضوع يرجعلي نفرغ ف ف الزنزانه

دارين خافت: اهدى علاش هكي تحكي

حمزة تنرفز وقف ناض شرب اميه: اسف سمعتك الفاظ هادي لكن دمي محروق معاد تدعي لحد ماتعرفيشي

دارين: حمزة حسيتك عصبي هلبااا وخصوصا لم ضربت الدكتور حسيتك مش متفهم متحبش تتفاهم كله ضرب

حمزة: كويس هلبااا الوصف جديات

دارين: تهبل عصبيتك عليا حتى لم ضربت الدكتور صح غلط لكن دبت اني

حمزة: قريب فرريت بيه جاته بسيطه المهم خلينا منه

دارين: نعم

حمزة: دارين بنقول ع حاجات متعرفيهاش

دارين: تفضل بدون اذن

حمزة: دارين اني حوشي فوق امي يعني قبل متوصلني الموافقه التامه منكم نبيك تعرفي لاني خايف نظلمك معاي يعني مممن تقولي بعد فترة نغيرو بنقولك اني مش رح نتخلى ع امي… قطعاته

دارين وقفت ووفتحت الشباك: بلعكس اني نحب اجواء العيلة ومتعوده قصدي فوقنا اربعه حياش وعمامي فهمت عليا واصلا منحبش الوحده ونقعد بروحي

حمزة: نعرف وحاسس بيك اصلا وفي شي تاني رح نطلب نظرة شرعيه معاك ونحكيلك شروطي انتي بتتسمي مرتي تعرفي شن يعني يعني انتي مرت حمزة الوحيده ومستحيل تصير بعدك انتايه بنت امها وكل شروطي عادله ويفرحني انك توافقي

دارين: تخوف انت ره

حمزة بجد: مافي شي يخوف البصارة والدلاع لـ متعلمتيه عندكم عندي اني مافيش لو اطيحي مش رح يجي جهتك حد بتعتمدي ع نفسك لانك كبرتي جو البنت الدلوعه تم

دارين برجفه ف قلبها : انت متعصب من شي تفرغ ف عصبيتك فيا؟؟

حمزة: ابدا مجرد توضيح

ميشوو: اكيد مليتو شوية توا بنولعكم

#تسريع_الاحدات

جاسم اب دارين عطي القرار لجدها وطلب انه يتحمل المسؤليه

ف بيان دارين

دارين طلعت من الكوافير طبعاا كلنا نعرفو شعر دارين الطويل لعند مواخرتها

ومع عزو لعايش قصة حب مع مريم

دارين ركبت مع بوها: اهلين

جاسم: مبروك ربي يفرحك اكثر واكثر

دارين: تسلم

وعم السكوت لعند موصلت لصالة ونزلت

دارين مع قفطان ازرق غامممق لعاكس ع بشرتها البيضة وزايدها جمال كان كبيررر فخم مع تاج بسيط مع القفطان بسيط يعني مش كبيررر وتسريحه مفتوحه فلو

بااختصار دارين قعمزت وطلعت هاتفها شافت انه بدون لامسج لا شي

نطفي الاضائه وقعدت الاضائه الخفيه بس

خش حمزة بعططططر عبا الصالة لابس بدلة سوداء لكن بدون جاكيت يعني لابسها سروال وسوريه وقولف متعها بدون قرواطه بدون جاكيت سدواء مع ملامحه

ع اغنية ناصيف زيتون (مبروك عليكي)

الزغاريط عبت الصالة

وهلبااا بنات محسدية قالو انه احلا منها

حمزة وصللها

دارين كانت متفاجاة ايدها ع فمها بصدمه وفرح نزلتهم وضحكت: مش قلت مش رح تخش تكذب يعني

حمزة ابتسم شد ايدها قدام الناس: ف لحظظه محبيتش نرفضلك طلب

دارين ابتسمت تتلامس ف ايديه: يخليك ليا وميحرمني منك ياعمري

قربو بنات وصاحباتها يغنولها دارو العار

ماتقول علها بنت مدارس

ملايات عيون الفارس

حتى كان قصيره شوية

منطق واسلوب وشخصيه

حمزة شاد ايدها:قصدهم انتي منطق واسلوب شخصيه

دارين ضحكت:يسس زيد تهزى عليا انت متقصرش

حمزة ضغط ع ايدها ببصارة:ماتتكنطيش عيب الناس حي عليك تو نقولك كلمه تغير وجهك ره

دارين ابتسمت:لالا خليني ف حالي

حمزة: ضغغغط بنطلع النممم كيف تتنفسو انتم ريحه العطور تخنق

دارين: معاد تشم عطر حد غيري لو سمحت

حمزة ضحك والناس تشوفلهم

بسمه قالبه وجها جابت الدبل:هي لبسها

دارين شاده ايد حمزة بصوت واطي:حمزة امك مضايقه في شي

حمزةشاف امه : متشغليش بالك من الصبح ابصر خيرها

لبسو الدبل

وقطعو التورته

. .

..

مريم ف الممر ع الهاتف: حبيبي قلبي وين

عزو : شن الدوشه لـ جنبك جيتي لصالة

مريم ضحكت: كنت مانبيش نقولك

عزو: تبصري انتي ف الصالة ف البيان؟

مريم: اي خيرك

عزو: لا شي اني مسيب البيان وصلتهم وبعدين بنرجع نروح بيهم ورجعتلك ف العمارة

مريم: حليلي باه تعالى لصالة ننزلك

عزو: اصلا تاخر الوقت كنت طالع

مريم: توصل رن عليا باي.. وصكرت

. .

. .

. .

بعد نص ساعه اهل حمزة روحو

مريم جنب دارين: محلاكم لكن مصح وجهكم تضحكو قدام الناس يشوفكم حد يقول عشرة

دارين ضحكت: معادش نتحشم اني

ترررن ترررن

دارين: حليلنا من عزو

مريم ضحكت: بارده

دارين: بتطلعيله؟!

مريم وقفت تعدل ف روحها: مالا علاش يتصل بيحكيلي حكاية النوم… عدلت قفطانها وركبت لبسة عبايتها وطلعت وراى الصالة شفاته واقف عطاها بضهره

مريم غطت وجها بنقاب لانه مكياجها جريئ وقربت بدون صوت تخلعه بشوية بشوية وصلت لعنده

عزو: كمية الغباء ظلك عاكس ياغبوو…وتلفت يضحك

مريم ضحكت: بارد كان تحبني راك سكتت وفوتتها وخليتني نخلعك

عزو: معنديش فيه جو تيك توك

ضي الكاشف متع الصالة من برا انطفي يرتاح من الغاز

مريم:ياامييي اني بنخش باي

عزو شدها:وين وين مشحطيني من العمارة هكي بدون كلمة حلوة بتخشي من قبل العطله معاد شفتك يابنت

مريم قامت النقاب:شوفني

عزو:توووا قمتيه الدنيا الظلام

الكاشف ولع

عزو شاف الكاشف ونزل عيونه لها وقعدو عيونه يلعبو ف تفصيل وجها عيونها انفها فمها تهبل

عزو قرب شد ايدها:تهبلي شن هدا

مريم رجفت بعدت ايدها ونزلت نقاب وخشت لكن من الكعب وتوتر بووم اطيح

مريم:لا ياربي

عزو قرب ركع شد رجلها:ماتخافيش مني هدا الركب كله لاني لمست ايديك اسسف

مريم نزلت عيونها بعدم رضا

عزو :توا بتقعدي تتطنشي عليا وبعدين كله بسببك علاش رفعتي النقاب

مريم بصوت واطي:خلاص

عزو:اسسف نتكلم اني مافيش خلاص

مريم حاولت توقف بس طاحت من جديد من رجلها ونزل قفطانها لكانت متحكمه فيه من الخصر لانه طويل ونفك ونزل لانه طويل

عزو شاف القفطان الاحمر الطويل وقف ومدلها ايده:هي

مريم شدت ايده ووقفت:شكرا

عزو ابتسم: طالعه ز الاميرات تهبلي

مريم ابتسمت: عيونك محليتني

عزو؛ رجلك كويسه؟

مريم:اي تمام مدورهاش عادي

عزو:من جابك؟

مريم:نديم

عزو:كلميه اني نروح بيك مع دارين نوصلوك

مريم:لالا قريب يوصل هو اصلا

عزو: طبعاا خوك كارهني تو بيجي بيتصل بيك متطلعيش طوول بنزله نرطبله جوه

مريم:يخليك ليا

عزو:وميحرمني منك

مريم :عن اذنك ..وخشت

.

.

وفعلا وصل نديم

عزو: اوو اهلا شجو

نديم: اهلات تمام شجوك

عزوقرب من الشباك:ماشيه انزل كسد معانا شوية نغيرلك جوك

نديم:لالا مشكور البيان يقربلك؟

عزو:اي تقدر تقول بيان اختي

نديم.ربي يهنيهم

عزو فتح الباب ع نديم :انزل انزل كسد هني معانا لعند ميطلعو عيلتك

نديم نزل

تتبع……..

لقراءة الجزء التالي : الجزء الثامن من رواية عشقها لعنة

لقراءة الجزء السابق : الجزء السادس من رواية عشقها لعنة

للإطلاع علي فهرس أجزاء الرواية : جميع روابط اجزاء رواية عشقها لعنة للكاتبة ميشو محمد

جميع الحقوق محفوظة للكاتبة ميشو محمد .