وفي الجزء السادس عشر من رواية قد كفاني دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة آيه إبراهيم .
الجزء السادس عشر من رواية قد كفاني
الأسألة كلها كانت دايرة في راسي!! بس منو البجاوب عليها؟ ضاق صدري بعد وقفنا وانتظرنا الترحيل انا غيرت راي وقلت ما ماشي كيف اخلي اختي آمال براها وتاني قولتا اها طيب كيف أخلي ريتال براها 
في النهاية قولتا بقعد مع آمال وريتال بوصي ليها الأستاذة وفعلا دا الحصل ريتال مشت المدرسة وانا شلتا آمال ورجعتا البيت نظفتو وغسلت العدة وقعدتا ألعب في آمال كانت بتضحك شديد ما بكذب بس ضحكها كان ببكي شديد ما عارف ليه كنت دايما بقول اكيد كان ح تتضحك اكتر لو كانت امي عايشة
مرت الأيام عادي ريتال بتمشي المدرسة وتجي تشرح لي وايام الإمتحانات بمشي امتحن عادي مستواي كان متدهور آخر شئ لمن امتحنا في خامس جيت 32 من 40 بس كنت فرحان شديد لانو ريتال جات الخامسة يوم النتائج المدير قال الليلة عندنا تكريم لي الطالب المثالي
وتكريم للمتفوقين اخدنا نتائجنا ويوم كان مفتوح جات معانا عمتي جمان وخالتي مناسك المدير قال اتطلب من الطالب رئبال ياسر التقدم إلى خشبة المسرح قولتا ليهو بتعجب كدا انا قال لي اي انت كنت شايل آمال وكنت عاوز اديها لي عمتي بس المدير قال لي تعال انت والأمورة دي مشيت على المسرح والناس كلها عاوزين يعرفوا سبب انو ليه ناداني وانا براي كنت مستغرب قال ليهم بعد سلم الليلة ح أقدم شهادة الطالب المثالي لي رئبال ياسر المدرسة كلها كانت بتضحك وانا زاتي ضمن الناس الكانو بضحكو 
قولتا المدير دا راسو ما كويس ولا شنو!؟ طالب مثالي قال يأخ انا طيش الفصل كيف اكون المثالي المدير قال ممكن تسكتو عشان تسمعو السبب رئبال بس الناس ما ادتو طريقة عشان يتكلم وانا احترمتا نفسي براي وكنت عاوز انزل في ولد كدا من اولاد الحي ما عندي معاهو معرفة شخصية بس عارف اسمو مجتبى بقرا في تانية ثانوي طلع المسرح وقال لي رئبال انتظر مسك المايك وبدأ يتكلم وقال زعلان شديد من تصرفكم لو ما إحترمتو مشاعر رئبال على الأقل احترمو المدير كلامو أثر في السامعي وسكتو كلهم قال ليهم الضحك شنو في الموضوع!؟ رئبال بستاهل شهادة الطالب المثالي انتو ما عارفين المر بيهو بس شايفي الشخصية الضاحكة قدامكم دي لعلمكم دي وراها قصة طويلة شايفين البت المعاهو دي هو براهو رباها رئبال شخصية عظيمة شديد وانا بتشكر المدير على انو ما ما اخد بمستوى الأكاديمي بس اخد بالمستوى التربوي فعلا رئبال لو ما الظروف كان ح يكون مثالي في المستوى التعلمي برضو
بعد سكت الناس الكانت تضحك كلها عيونا اتملت دموع وبقو يصفقو وجا علي وطلع ساعة من يدو وقال لي والله لو كنت عارف انك انت الطالب المثالي كنت جهزتا هديتي من بدري بتمنى تقبل هديتي مع انها ما قدر المقام حضنتو وفرحتا انو لسه الدنيا فيها آمثال مجتبى وشكرتو على مبادرتو مؤمن جا واتكلم معاي وكان فرحان شديد اما ريتال كانت بتبكي وما قدرت تتكلم معاي دموعها كانت أصدق الكلمات الوصلتني من غير حروف استلمتا الشهادة ورجعنا البيت كنت حزين شديد كنت محتاج لي زول خفف عني كنت مشتاق لي غيث وليث الصحبة الثابتة الكنت معاهم من صغير قعدتا في البيت وكنت ببكي براي شويه كدا شميت لي ريحة حاجة زي الكأنها بادية تحترق جرت المطبخ وما لقيت حاجة بس عاينت بشباك المطبخ وكان مقاصد لي مكتبة امي كان الحريق بوحي انو المكتبة ما فضل فيها حاجة
جريت جري شديد لي خالتي مناسك وختيت عندها آمال ورجعتا وهي زاتا اتخلعت وتطلعت وراي انا لمن قربت من المكتبة سامع صوتها كانت بتقول لي ارجع يا ولدي الله يهديك النار دي ما فيها لعب ارجع يأخ 
بس انا زي الما سامع دخلتا في المكتبة كنت خايف شديد خايف تاني ما اقدر اطلع وخايف القى كتب امي احترقت كنت بقى قرآن ويدعي من كل قلبي والدخان عما المكان وكان لونو اسود بطريقة تخوف لقيت عباية امي حقت الصلاة طوالي شلتها وبقيت اخد فيها الكتب كلها سامع في أصوات بره المكتبة بس ما ح اطلع ما لم اخد كل حاجة بتخص امي بس مرات الموقف ما بساعد الباب كان قريب يغفل وحاسي نفسي ما قادر اتنفس بعد تعب شديد حتى طلعتا كنت باخد انفاسي بصعوبة شديدة
وشايل معاي كتب امي في عبايتها ومبسوط شديد انو قدرتا اطلعو بس فجأة اتذكرت مذكرة امي في الرف التحت وانا ما شلتها كان في رجال الحلة مسكوني بعد طلعتا ويدي ورجولي اتعرضت لي حريق شديد بس برضو ما بهمني قولتا ليهم خلوني الراجل قال لي انت مجنون ولا شنو؟ كيف تدخل في نار زي دي عاين يديك دي اتأذو كيف وكان ضاغط على يدي وخايف اني ارجع قولتا ليهو فك لي يدي لأنها واجعني بعد فكاها طوالي رجعتا ودخلتا وكنت خايف اكتر من الأول لانو نسبة الخروج ضعيفة شديد كنت بقرا وبقرا قدرتي من القرآن لاحظتا انو النار بقت دخان واصلت قراية القرآن والدخان شوية شوية بقى اصلا مافي الإ في جهة الباب انا كنت مصدوم شديد كنت قاعد اتنفس عادي في حين أي زول يشوف الدخان الفي جهة الباب بقول انا ميت ميت
اخدتا الدفتر حق امي وطلعتا من غير ما يحصل لي شئ كنت مندهش شديد بعد طلعتا الراجل ما باقي ليهو شئ غير يضربني جو وجابو موية كتيرة بحيث يطفو النار الأصلا انتهت زمان
ما عارف السبب البيهو قام الحريق بس متأكد انو قرايت القرآن هي الطفتو بعدو الرجال قالوا الإ يمشو بي المستشفى بس انا ما عاوز امشي الراجل قال لي قبيل غفلتنا ودخلتا على مدار مرتين هسي اعتبر دا طلب من عمك وامشي معاي ما حاسي بالألم دي؟ قولتا في سري لي ما حاسي ما انا إنسان!؟ بس ما بخلي اختي براها قولتا لي خالتي اديني آمال عاوز اشيلا معاي قالت لي لالا انا بشيلا اصلا انا ماشه معاكم شكلها فهمة اني خايف عليها مشت سريع جابت لي غيار لانو ملابسي بقت عبارة عن سكن من شدة السواد مشينا الدكتور عمل لي مرهم الحريق وقال لي لازم الليلة تبيت في المستشفى لانو حريقك دا عميق وطوالي كتب لي درب لانو قال جسمي مهبط سكتا ساي وانا اصلا ما بعمل شئ الإ البكون في راسي طلع وبعدو الرجال طلعو فكيت الدرب سريع وقولتا لي خالتي ارح نرجع البيت قالت لي مافي كلام زي دا لازم تتم الأدوية ضحكتا وقلتا ليها مش قصدك المسح دا امي عندها في علبة الإسعافات الأولية بعملو براي في البيت وبكدا اقنعتها ورجعنا البيت الشي الواجعني اكتر انو آمال كانت بتبكي ورفعة لي يديها عشان اشيلا وانا ما بقدر عشان الحريق قولتا لي خالتي بعد نركب في الركشة ختيها لي في رجولي وفعلا بعد ركبنا ختتا لي في رجولي اخدت زمن وبعدو نامت قولتا اكيد بتكون جعانة بعد أصول بأكلها طول الطريق انا بفكر في المكتبة والحريق ليه بس المكتبة؟ وليه النار وقفت لمن قريت قرآن؟ وانا بعادتي ما بتكلم بالحاجة الشاغلة بالي نهائي خالتي مناسك قالت لي مالك سرحان قولتا ليها ما في حاجة بس قولتا ريتال بتكون جات من المدرسة وح تخاف لمن تلقني ما في. قالت لالا إطمن زمن رجوعهم من المدرسة لسه ما جا لانو الليلة الأحد قولتا ليها كان كدا خير وفي سري قولتا انا عارف الليلة ريتال ح تتأخر بس ما عرفتا اقول ليها شنو وصلنا البيت لقيت حبوبتي وجمان قاعدين في الحوش دخلتا عاوز اسلم عليهم جمان مسكت لي يدي وقالت لي دا شنو يا رئبال؟ خالتي مناسك قالت ليهم ولمن شوفتا رئبال اتحرق وتعبان مشيت معاهو المستشفى حبوبة اتشكرتها شديد وشالت منها آمال وقالت لي بقيت كيف؟ قولتا ليها كويس بس انتي ليه تعبتي نفسك وجيتي نحنا ما كل جمعة بنكون معاك قالت لي والله ما قدرتا وقت قالوا لي رئبال ولدك دخل في النار انا قربتا اجن انت ما عارف حبوبتك تعبانة وعيانة طول الوقت لي عاوز تزيد علي الطين بله وتاني قاعدة في البيت دا اصلو ما عندكم
قالت لي جمان امشي جيبي حاجاتهم قولتا ليها حبوبة يأخ الموضوع ما بستاهل وبعدين الدكتور قال ابوي لازم ما يحصل ليهو اي ضغط بمرور الزمن ح يتذكر وبعدو نحنا طوالي بنسكن معاكم قالت لي والله الليلة ياسر مشى القاهرة وكتبو ليهو عملية ومشت معاهو أريج بدعي ربنا انها تنجح لانو ما ساهله الفترة دي اقعدو معاي في بيتكم انا قولتا ليها ابوي سافر!! عشان عملية !!!!! دا كلو وانا ما عندي علم سبحان الله نفترض انو ابوي ما متذكر انتو زاتكم نسيتونا ولا شنو؟ حبوبة قالت لي لا ما كده بس أريج قالت لو عرفتو ح تقلقو وانت بتأكيد بتقول ماشي معاهو والقروش محتاجين ليها للعلاج سكتا منهم وجمان جهزت لينا اغراضنا وبعد جات ريتال وشافت يديني قعدت تبكي قولتا ليها ما تخافي دا حريق بسيط بعدو شلتا كتب امي وكل حاجة بتخصها مشينا لي خالتي مناسك وقولنا ليها انو ح نمشي نقعد مع ناس حبوبه مؤمن كان زعلان وما عاوزنا نمشي ودعناهم وطلعنا بعد وصلنا لقينا احمد ولد عمتي أريج بعد شافني جاني جاري هو اكبر مني لكن بريدني من لما كنا صغار كان دايما بقول لي ياريت لو امك هي امي كان الوقت كلو بحب يقعد معاي بس عمتي ما بتحب نهائي ولدها يكون معاي وكانت بتحاول بقدر الإمكان تبعدو مني جا وقال لي يدك مالا!؟ قولتا ليهو اتحرقت مسكها وقال لي واجعاك صح؟ ليه ما مشيت الدكتور؟ كلامو خلاني اتذكر غيث وليث لمن ضربتي الركشة كانوا بسألو مني والخوف ظاهر في عيونهم احمد قال لي شكلك تعبان تعال ارقد جوة في غرفتي مشيت معاهو وخليت آمال مع حبوبة قولتا ليهو ما ممكن نتصل لي ابوي عاوز اسأل منو؟ قال لي دقيقة بس مشى شال تلفون عمتي جمان وقال لي هسي بتصل لي امي بسألها؟ انا كنت مستغرب قولتا ليهو كيف شلتا تلفون عمتي من غير ما تستأذن قال لي اصلا انا عارف كلمة المرور مافي داعي عشان إستاذن لأنها خالتي وما عندها مشكلة وطوالي اتصل على امو واتونس معاها فترة طويلة انا نعستا غفيت من غير ما أشعر شوية سمعتو قال ليها خلاص بعد يطلع من العملية اتصلي لي خالتي عشان رئبال دا مقلق على ابوهو قالت ليهو رئبال الجابو لك شنو!؟ حكى ليها كل حاجة قالت ليهو خلي ينوم في غرفتي واعمل حساب نفسك وغفلت منو انا قولتا عمتي دي ذرة محنة ما عندها ما قالت ليهو رئبال الحريق كان خفيف عليهو ولا لا بس كل همها ولدا ما يقعد معاي قولتا كلو ما مهم بس ابوي يبقى كويس ويرجع لينا بسلامتو ان شاء الله ح نرجع بيتنا احمد حكى لي الكلام الدار بينو بين امو وقال لي خالي دخل العملية وسمعتا الآذان بأذن طوالي قومتا وانا ندمان اني قولتا ابوي متذكر كل حاجة ومقلق شديد اتوضيت وطلعتا على المسجد صليت وقعدتا في مكاني ساعات كنت بدعي ربنا يسهل على والدي بعد رجعتا البيت سألتا عن ابوي قالوا لي عمل العملية والحمد لله نجحت والله فرحتا شديد
ومشيت لي ريتال لقيتا فرحانة اكتر مني ادونا ليهو واتكلمنا معاهو بالتلفون وقال لينا ح ارجع بعد شهرين لانو عندي مقابلة بعد غفلتنا منو اتونست مع ناس عمتي وحبوبة كانت قاعدة وشايلة آمال ومبسوطة شديد عمتي عمت لينا الغدا وبعدو مر اليوم عادي من غير تفاصيل تذكر احمد كل يوم بثيت لي انو ممكن يكون اخو لي بس دا كلو ما بنسيني غيث وليث ومؤمن كنت مشتاق ليهم شديد قولتا لي عمتي اتصلي لي خالتي مثاني قالت لي كنت متواصلة معاها وقالت جايه في الأيام دي ومعاها مهاد انا فرحتي زادت اكتر واكتر وحمدتا الله انو واخيرا عائلتي ح تجتمع مع بعض بعد سنوات
من جانب ياسر انا من وفاة مهجة قلبي موجوع شديد كل القدرت اتوصل ليهو انو القتل مهجة حاقد على فرحتا وغيران منها وعبد الكريم اجتهد معاي وقدرنا نعرف انو في زول عمل لي اهلي سحر عشان نفترق والكلام كان واضح لانو بعد وفاة مهجة احمد اخد عيالو ورحل الخرطوم وقال لي بعد زوجتي تتحسن بنرجع فقررت الوهم الفاعل أننا فعلا اتفرقنا هو صح عملتا حادث وصح فترة ما كنت قادر امشي بس موضوع الذاكرة دا انا الإخترعتو واتصلت لي احمد وقولتا ليهو ما ترجع الإ لمن اطلب منك كان مستغرب شديد ما كان في زول عارف مخططاتي غير عبد الكريم بعد مضت الأيام الأولى من الوفاة اتفقنا مع جمان تخلق مشكلة مع مهاد عشان مهاد ترحل ويكون عندها سبب لي رحولها ومافي زول يشك انها خطة بعد هم رحلوا دخلتا عائلة عبد الكريم في بيت ناس مثاني لانو عبد الكريم اسرتو مافي زول بعرفها من حينا وقلنا انو هم اشترو البيت وكان برجع البيت متأخر عشان رئبال دقيق شديد وممكن يكشف كل حاجة كنت ماشي كويس بس الموازن اتقلبت علي يوم رئبال اتحرق انا خلاص الفيني انتهت وضميري مأنبني وقولتا كيف اخلي اولادي براهم هو صح رئبال واعي وعقلو كبير بس في النهاية لسه صغير ومفروض ما يتحمل كل المسؤولية دي طوالي خليت جمان تقول لازم يعملو لي عملية في القاهرة عشان زاكرتي ترجع بالفعل عملتا كدا وقولتا لازم اقعد شهرين عشان يحسو بالفعل انو كانت عملية كبيرة واتصلت على احمد وأنس وقولتا ليهم خلاص لغيت أي حاجة ارجعو واذا حصل اي حاجة نواجها ونحنا مع بعض وبعد الشهرين ح ارجع لي اولادي كفاية آمال تمت سنة ونص وبقت تتكلم وتقول لي رئبال بابا وهي بعيده مني انا خليت قاتل مهجة لي ربنا الله واحده ينتقم لي منو …..
————————————–
———————
*☆يتبــــــــــــــــــــــــــــــــــــــــــــع☆☆*
لقراءة الجزء التالي : الجزء السابع عشر من رواية قد كفاني
لقراءة الجزء السابق : الجزء الخامس عشر من رواية قد كفاني
للإطلاع علي فهرس اجزاء الرواية : رواية قد كفاني ( جميع الأجزاء كاملة ) للكاتبة آيه إبراهيم
جميع الحقوق محفوظة للكاتبة آيه إبراهيم .
