الجزء العاشر من رواية الحلال والحرام

اسلام : شنو صار طمنيني والله علي نار قاعد انا

نسرين : حاسه ان في أمل واكيد حايوافقو عليك

اسلام ابتسم : الحمدلله ياربي والله فرحت هضا احلى خبر نسمعه واطلبي يلي تتمنيه ايجي لعندك يا عسوله

نسرين ضحكت : مانبيش غير سلامتك وهيا نروحو

اسلام : اصيله من يوم يومك وعدو مع بعضهم وكان فرحان واجد اول ما وصلو للحوش وقالوها للعيله فرحت الام واجد والشيخ ابتسم : ان شاء الله ربي يوفقك ويسعدك يا وليدي سعادتك وفرحتي بيك كبيره

اسلام : شكرا يا غالي وربي يحفظك ويطولنا بعمرك

امه زغرتت وكانت فرحانه واجد مع ان مزال ما اتصلو ولا قالو الرد بس كان في أمل وعندهم ثقه في الموافقه

في الليل

ملك من الظهر وهي تفكر ومستغربه ليش لحقها الراجل يلي ساعد صاحب الحافله وشنو يبي منها بس فاتت الموضوع بعد نسرين بلغتها توا ان رغد بعتتلها مسج علي موافقة عيلتها فرحت واجد بردها : مبروك فرحت واجد

نسرين : حتى خويا فرحان ماتوقع يردو في نفس اليوم

ملك : المهم ردو وان شاء الله الف مبروك وعقبالك يارب

نسرين : ييي نسيت ما قتلك ولد عمي يبي يخطبني

ملك : باهي ان شاء الله الف مبروك فرحتلك يا حنه

نسرين : الله يبارك فيكي وعقبالك انتي ونرجس ووفاء

ملك ضحكت : يا حسره علينا نحنا ال3 ما انظنيش والله

نسرين : عليش التشاؤم وتفائلي خير وان شاء الله نصيبكم حلو وتفرحو بيه طول عمركم وربي يحفظك

ملك : ونعم بالله تسلمي يا غاليه ويحفظك

الشيخ محمود يفكر في موضوع هيثم وعيلته حكاه مع شيوخ يعرفهم عشان يمشو زياره لحوش عيلة هيثم حددو الموعد للمشي وبعد وصل الشيخ محمود ومعاه الشيوخ ال4 رحب بيه الحاج ميلاد والد هيثم ووفاء خشو للمربوعه الرجاله وهيثم واسلام قعدو معاهم

الحاج ميلاد : اهلين فيكم ونورتونا يا شيوخ ويبحت في ولده هيثم وكان متعقد منه ومن تصرفاته

شيخ محمود : النور نورك بس وين خوك محمد ؟

ميلاد : والله محمد في حوشه عليش في حاجه

محمود : ما حكيتلك وقتلك عالتليفون نبي نحكو بموضوع هيثم ونور يلي انتو رافضينها ولازم يكون موجود بينا توا عشان نحكو ونتفاهمووو

ميلاد : انا حكيتله بس مايبيش ايجي ولا يتفاهم

الشيخ منتصر : براحته ولكن انت المسؤل عن ولدك مش هو ويلي قاعد يصير غلط يا حاج وحرام عليك

ميلاد : يا شيخ حط نفسك مكاني معقوله نزوج ولدي وحيدي لبنت زي نور والجيران قالو ان من وفاة باتها وهي تطلع بلبس مش مستور وتتقرب من الرجاله واجد

محمود : لا حول ولا قوة الا بالله يا حاج انت مافيش داعي تسمع لأعراض الناس وهيثم ولدك يعرف كل شي هي حكتله وحتى نصحها انها تستر نفسها ومايبيش حد يشوفها ولا قدر اصلا ان يبحت فيها بالملابس هذي وهو يعرف وفاهم كل شي وراضي بالمستوره بس حرام عليك ترفض البنت وترضاها لبنتك انت ؟

ميلاد عصب : بنتي اشرف منها وما تطلعش هكي

شيخ عمر : والله حرام عليك البنت معذوره ومافيش حد ما يغلطش هي غلطت وندمانه ندم شديد

شيخ توفيق : الكلام صحيح يا حاج ميلاد وربي غفور رحيم وتعرفو عليها انتو للبنت واكيد توا تحبوها

ميلاد : انا ما دخلنيش بيه يبي يتزوجها يعدي ولكن مش حانخطبهااا له ولا حانحضر عرسه وينساااني

محمود : هضا ولدك مفروض تكون فخور بيه وتفرح لفرحته وبالنسبه لسبب رفضك نعاود ونقولك انت غلطان

ميلاد : عطيني اسباب مقنع اتخليها تطلع بالشكل هضا وين عيلتها لو متربيه صح ما اديرش هكي بعد باتها مات

هيثم عصب ورقيتله صبا دغري : يا باتي حرام عليك والله نور كويسه وهي تعذبت في حياتها ليش مش مصدقني دايرني نكذب عليك مستعد نحلف عالمصحف

شيخ عادل : لو بالطريقه هذي اتصدق ولدك يا ميلاد هيا يا هيثم ديرها واحلف عالمصحف واصيل وحق الله

شيخ محمود : ربي يحفظك احلف وخليك قوي

اسلام ابتسم : هيا احلف ومدله المصحف وقدامه باته ميلاد يلي مصدوم كلهم متعاطفين عالبنت ويشكرو في ولده علي اصراره عليها شافه خداه المصحف وحط ايده عليه وبحت في باته وبصوت هزه من مكانه : قسما بالله يا باتي وربي شاهد علي كلامي والشيوخ الخمسه شاهدين عليااا وعلي كلامي ان نور بنت طاهره وشريفه ونظيفه من جوا ويلي كان سبب غلطها هو باتها وانت عكسه انت علمتنا الصح والغلط وعيونه لمعت وانت درت ودرت وعلمت اختي وفاء بحب وود وما هنتها ولا غصبتها بس والد نور دمرها يا باتي يضرب فيها لليل ونهار ومش طايقها ولا يبي البنت كان يبي راجل بس ربي طعمه ببنت بريئه وملاك ما حمد ربي عالنعمه وذلها قدام الناس يجر فيها دايرها انها عار عالمجتمع وحاتغلط زي ما غلطو بنات واجد نسمعو عليهم بس صدقني يا باتي غصبا عليها كانت مجبوره ادير هكي لان امها ما كانت تساعد فيها وتخاف من زوجها المرحوم خوف لا يوصف فعشان هكي ماتبيش تقعد معاها في نفس الحوش وتذكر معاناتها يلي من طفولتها تعاني فيها وامها تتفرج عليها قررت انها لازم ادير حل وتغير من حياتها وتبي تتزوج بس بالحلال بس فكرت بطريقه غلط وان الحلال يجيها لما تلبس هكي وتطلع وادير يلي تبيها بحريه ولكن هي عرفت روحها غلطت واجد في تفكيرها وغيرت من روحها ولو اتشوفها اتحبها وتعتبرها بنتك مش زوجة ولدك نتمنه من كل قلبي ان ترضى عليا وتوافق علي زواجي من نور فرحتي من فرحتك وفرحة امي واختي بوجودكم تكمل معايا ارجوك يا غالي ما تردنيش ونزل راسه بحزن شديد

ميلاد تأثر واجد من يلي سمعه ومش هو بس يلي سمعو هالكلام كانت ام هيثم ووفاء يسمعو من بعيد في كل شي صار وقاله ولدهم والشيوخ وتأثرو واجد قعد الجو هادي واجد بعد كمل كلامه هيثم وكلهم يرجو في رد باته ميلاد يلي صبا وبحت فيه : مش عارف شنو أنقول مصدوم ماتوقعت ان الناس تفكر بالطريقه هذي وان الاب يحقد علي بنته والرسول الله ( صلى الله عليه وسلم ) قال ” لَآ تٌکْرهّوٌ آلَبًنِآتٌ فُهّنِ آلَمًؤنِسِآتٌ آلَغُآلَيَآتٌ ” لا حول ولا قوة الا بالله بس ربي يرحمه ويغفرله وأنت كبرت في عيني اكتر يا وليدي وسامحني عشان رفضت بدون ما نفهم ونصدق

هيثم مسك يده وباسها : ربي يطولنا بعمرك يا غالي

ميلاد : بأذن الله مافيش حد حايحكي حرف وعمك توا نتفاهم معاه ونفهمه وان شاء الله الف مبروك يا وليدي

شيخ محمود ابتسم : اصيل يا حاج وربي يحفظه لك

الحاج ميلاد : تسلم يا شيخ وسامحوني كلكم

نور خايفه واجد لان خالها قاللها ان هيثم حايمشي للحوش مع شيوخ لعيلته اليوم قعدت متوتره وتفكر في الموضوع خشت امها عليها وهي تبتسم : مبروك يا بنتي

نور بحتت فيها : يعني شنو وافقو عليااا

فاطمه : وافقو عليك توا هيثم قالها لخالك الحمدلله فرحتلك يا بنتي وحايجو يطلبوك رسمي بكرا

نور ابتسمت وكانت فرحانه واجد لان كملت فرحتها توا ماتبيش مشاكل لهيثم مع عيلته وبسببها قعدت هي وامها يجهزو لجيتهم بكرا وحتى عيت خالها جوهم عشان يساعدوهم وخالها مفتاح فرحان واجد وطاير عقله وكأن نور بنته كان فخور فيها واجد واليوم التاني جات عيلة هيثم لعندهم وكانو فرحانين واجد خاصة الصبايا لما شافو نور لأول مره ما توقعوها بالجمال هضا صبت ام هيثم وهي تبحت فيها وتبتسم : ما شاء الله هذي نور

فاطمه امها : اها هذي بنتي نور تعالي سلمي علي عمتك

نور وجها احمر قربت وسلمت علي ام هيثم يلي فرحت بيها وسلمت علي وفاء اخته وجات تبي اتخش من خجل

وقفتها ام هيثم : وين ماشيه خليكي هنا وربي يحفظك

فاطمه : قمعزي يا نور حداه عمتك تبي تشوفك كويس

ونور خلاص قريب ادوخ من الخجل ووجها احمر جات وقمعزت قريب منهاا وفرحت ام هيثم لا توصف ما توقعتها بالجمال هضا وكانت خجوله بكل قدامهم

ملك من بعيد تبحت فيها وتبتسم : الحلال جميل والله

__________

( كل الأدوية طعمها مُر الا القرآن )

زينب ادور علي بنتها لجين لقتها مقمعزه برا وشمس الصبح عاكسه عليها ابتسمت لما لقتها تقرا في المصحف بيقين ووجه ناير قربت منها : صباح الخير يا بنتي

لجين وقفت وبحتت فيها : صباح النور وكملت قرايتها

زينب قمعزت وهي فرحانه رغم انها كانت زعلانه علي بنتها مايا واجد لكن لما شافت لجين تقرا وناشطه في الصبح فرحت واجد بيهاا راجتها بعد كملت وسكرت المصحف وبساته : تقبل الله وربي يحفظك يا غاليه

لجين : تسلمي وحطت راسها في كتر أمها اقري عليا

زينب ابتسمت وقعدت تقرا عليها بعد حطت يدها علي راسها : حاسه روحك متريحه وناوي تردي للمصحه ؟

لجين بحتت فيها : صعب نرد للمكان هضاا بذات

زينب : بس نحنا نبوكي تتحسني ومانبوش نخسروك

لجين : ربي كريم حتى لو متت هضا قدري ونصيبي من الدنيا مش زعلانه واجد بس مانبيش نقعد في مصحه

زينب : انا خايفه عليك علي الاقل راجعي عند الداكتره كل اسبوع مرتين ونص السنه عندك جرعه تانيه وبحتت في يوسف خش وشافهم برا قرب منهم : السلام عليكم

ردو : وعليكم السلام وقمعزت لجين لما جاه باتهااا

يوسف : كيف حالكم اليوم شايف انكم متحسنين

لجين : الحمدلله علي كل حال وبفضلكم وبفضل ربي

يوسف : الحمدلله وانا كنت في المصحه الدكتور قال عادي تقعدي هنا بس اتجي كل وقت عشان يكشفو عليك

لجين : حاضر يا باتي وطمني عليك انت كيف حالك

يوسف : كويس قعدت لما شفتكم كويسين وبخير

زينب : شنو رايكم نطلعو ونغيرو جو مع بعضنا اشويه

يوسف : فكره حلوه وين حانمشو وانا مزلت مش عارف الاماكن كويس في المدينه بس توا نسأل الناس

زينب : خلاص اسألهم اليوم عشان نمشو مع بعضنا

لجين زعلت لان اول مره حايطلعو ويدهورو بدون مايا غمضت اعيونها ومسحت دمعه نزلت منهاا شافها باتها صبا وعدا بدون ما ايقول حرف وهمس الله يرحمك

احمد طلع توا يدهور في مزرعه امتعتهم وقطاطيسه يجرو حداه ويلعبو شاف أمه تمشي تدهور في شميسه يلي برا والجو كان سمح قرب منها وهو يبتسم : خير يا حاجه كيف حالك ما لقيتك جوا شنو اديري هنا ههه

امه بحتت فيه : طلعت قبل اشويه نتمشى والنشاط صحه لعمري انت وين كنت طالع بدري من الصبح

احمد : كان عندي شغل فجيت توا المهم نبي نحكي معاكي في موضوع وبصراحه متردد اشويه

امه : شنو في خوفتني ان شاء الله خير

احمد : ما اتخافيش بس ولدك كبر ويبي يتزوج

امه فرحت : يعني اخيرا قررت ياما دويتلك زمان وانت اتقولي مش مستعجل عالموضوع هضا ومزال بدري

احمد : وتوا غيرت رأي وما اتعبيش روحك ادوري لان في وحده شفتها صدفه عجبتني واجد ادب واخلاق ما شاء الله عليها ماقدرتش نشيلها من راسي ونويت عالزواج

امه ابتسمت : الحمدلله خفت انموت وما نزوجك

احمد : بعيد الشر عليكي ماعنديش غيرك في هالدنيا تبي تمشي وتخليني لمن وربي يطولي بعمرك ولا يحرمني منك

امه : تسلم يا وليدي وامتى نمشو نخطبوهاا لك البنت

احمد : بصراحه اليوم سألت الجيران عليهم وشكروهم ليا واجد واصلا كان واضح انهم ما شاء الله فعشان هكي مافيش داعي نحكولهم علي جيتنا ونبيك تمشي بنفسك وتقوليلهم بالضبط وين شفتها واني لحقت السياره وعرفت العنوان لو وافقو عليا نخطبوها رسمي

امه : خلاص شيلني بعدين في العشيه نشوفها ونحكي مع امها ونفهمها وين شفتها واحكيلي وين عشان نفهمهم

احمد ضحك : حاضر وبداه يحكي في كل حاجه وامه تبتسم وفعلا في العشيه شالها لحوش ملك وباتها مفتاح يلي عرف اسم الاب عن طريق الجيران وصل امه لعندهم وقعد في السياره لمح الستاره تتحرك فوق وعرفها وراه الستاره وتقصقص وتعرف من هضا بيب وقعد يبتسم

ملك وخرت ومصدومه هضا نفس الشخص شنو قصته وعليش جاب امه سمعت امها تنادي فيها عدت لعندها وبحتت فيها : نعم وجات عينها عالحاجه يلي تبتسم امها : هذي ام الشاب اسمه احمد لو تذكري لما عطلت الحافله من يومين خلاص هو شافك وعرف الحوش لما لحق سيارة باتك وانتي شفتيه كويس شنو رايك فيه لان ناوي يتزوج واختارك انتي وملك انحرجت بعد سألتها قدام امه وماعرفتش شنو اتقول عدت بدون ما اتقول شي وكانت متوتره بكل وحايسه في بعضها بعد وقت جاه باتها سمعاته خش وسلم عالحاجه لما شافها جوا قعدت تسمع فيهم شنو يحكو وكيف ولدها حقها ارتبكت واجد صبت وبحتت وراه الستاره وما خلاته يفطن لها وهو يراقب اعيونه عالروشن تعقدت وماعرفتش كيف حاتشوفه مره تانيه بعد وقت انفجعت لما طاحت حيطه في غرفتها خشت مع الروشن قربت منها ولقت ورقه ملفوفه عليها فتحتها وقرت شنو مكتوب فيها ( مافيش داعي للقصقصه توا في المقابله الشرعيه اتشوفيني وانشوفك مره تانيه وربي يحفظك ) همست انا قصقاصه طح سعده ما اوقحه يسحبني ميته عشان انشوفه وعزقت الحيطه طبت علي سيارته كسرتله المرايه بدون قصد ولا شافت وين طبت سكرت الروشن دغري وبالقوه بس انحرجت واجد لان سمعت صوت تكسير قعدت تحكي بروحها عليك فضيحه شنو ايقول عليا هضا

احمد فك المرايه الجانبيه وحطها في الدرج : من بدايتها معصبه علينا المدام يانعليا عليك حاله وبحت في امه طلعت توا وطلع معاها مفتاح يبي يشوف احمد ارتبك وقرب سلم عليه : اهلين ياعمي كيف حالك طيب

مفتاح : الحمدلله كويس والحاجه حكت كل شي

احمد ارتبك : وانا اسف عشان لحقتكم بس نبي نعرف العنوان كيف حانعرفه لو عديت بدون ما نلحقكم

مفتاح ابتسم علي كلمته : عليش تتأسف وانت جيت من الباب مش من الروشن وناوي الحلال وبأذن الله عطينا اسبوع بس اتفكر بنتي وانا نسأل عليك وكل شي نصيب

احمد : خلاص يصير خير وخودو راحتكم حتى لو شهر وتوا نوصفلك مكان شغلي ومزرعتنا وقعد يوصفله وامه فرحانه فيه لانها عارفته كويس وسمعته مسك هذي الام يلي واثقه في ولدها وفعلا مفتاح سأل عليه واجد وكلهم يشكرو فيه وحتى داير اعمال خيريه واجد ويلم في القطط المريضه من الشوارع يعالج فيهم ويطلق فيهم طلع دكتور بيطري وخبير فرح واجد مفتاح وحكاه لبنته عليه : الراجل كويس وما شاء الله عليه هو عمره 30 سنه بيناتكم 11 سنه بس مش مهم كل يلي يهمني يا بنتي ان الراجل كويس ومستحيل تلاقي واحد كيفه

ملك : مش عارفه شنو انقول والقرار قرارك في الاخير

مفتاح : يا بنتي انا موافق شنو قتلك قبل اشويه ليا كم يوم نسأل عليه عنده عياده بيطريه ويربي في القطط عنده ويعطي فيهم تبني ويصلي في الجامع وباين من وجه ان كويس بكل وحتى تأسف عشان لحقني نهارتها

ملك بحتت في امها يلي تبتسم : وافقي ومش حاتندمي

ملك بلعت ريقها : تمام يلي اتشوفوه وعدت تجري لغرفتها ومش قادره اتصدق يلي صار وخاصة انها لكم يوم تفكر في الموضوع وصلت صلاة استخاره واجد حست براحه وندمت واجد انها ما صلتش استخاره لقصة زياد وقتها وافقت علي عرضه دغري ونست الاستخاره وطلع سيء بس حمدت ربي انها عرفت معدنه قبل زواجها منه

تحدد عرس نور وهيثم في نهاية الشهر وماقصروش معاها فرحت واجد لان تريحت لهيثم من البدايه وتعلقت فيه واختارته دغري انه يكون زوج لهاا واما ملك انخطبت بشكل رسمي لأحمد وشفاته في المقابله طول الوقت يبتسم وهي اذكرت الرساله يلي لفها بالحيطه وعزقها وانها طلقتها وكسرت حاجه برا في سيارته نزلت راسها من الاحراج وخشت تجري لغرفتها وهو كان بشوش وبسمته علي وجه وكان متأنق ومستعجل عالعرس بس هي شرطت العرس بعد تكمل السمستر امتعها ووافق علي شرطهااا وحدد كل شي مع باتها وهو يتيم الاب

رغد خطبوها علي اسلام يلي شفاته في المقابله وكانت متحشمه بكل لان وفاء حكتلها انه انعجب بيها من لما شافها وقلبها ما هداه كل اشويه ترفع راسها تبي اتشوفه هو يرفع راسه ويبحت تنزل راسها دغري وهو نفس الشي ومافيش تبات بكل وباتها يراقب في حركاتهم الغريبه قال : كنكم كيف حاتشوفو بعضكم بحتي فيه وانت بحت فيها هذي النضره الشرعيه حلال مش حرام يا شباب

اسلام ابتسم : والله مرتبك ياعمي وبحت فيهاا اخراا وما نزلش راسه وهي بعد شفاته عدت بسرعه وخشت جوا

ضحكو هما الاتنين علي ردت فعلها وباتها فرح واجد لبنته كانت خجوله وهالشي احلى شي فيها الحشمه

عدا نجم وزوجته ونيسه ورغد لزيارة فتحي يلي واضح ان مريض وتعبان عرف ان رغد انخطبت : مبروك

رغد بحتت فيه : الله يبارك فيك ويشفيك

فتحي سكت وماردش عليها وبحت في باته

نجم بهدوء : انا سامحتك وربي يسامحك ويغفرلك

فتحي : انا غلطت والله عارف روحي غلطت وطريق الحرام يودي للهلاك وللموت انا ندمان واجد عارف اني تأخرت بس الشيطان شاطر يا باتي غلبني

نجم : بس عندك عقل وربي خلقنا بعقول انت كبير مش صغير بس مش حانكتر عليك حالتك شينه

امه تبكي : يانعليا يا وليدي والله خايفه نسمع خبرك

فتحي : عمري يا امي اهم شي سامحوني كلكم

رغد مدتله مصحف صغير وبحتت فيه : اقراه ديماا

فتحي ابتسم وخداه : شكرا وانا اسف علي كل شي

رغد فهمت قصده : انا مسامحتك وربي يشفيك

فتحي : المرض هضا بدون شفاء توا واحد مات له حوالي 4 سنين هنا علي اساس يتعالج بس مات منه وبكاه

نجم : الراجل مايبكيش ومن فوض امره لله كفاه

فتحي : ونعم بالله وصبا باس يد امه وباته وكان تعبان بكل من كل شي صار معاه وندمان ندم لا يوصف واما خالد قضيته كبيره عشان المخدرات وفوقها ايدز لكن يتعالج وطالب من معارفه يجيبوله دكتور شاطر من برا لعنده ويعالجه وفعلا جابوله وعطوله جرعات اباري لكن بفلوس عكس نادر ومراد وفتحي ياخدو في حبوب يلي ما فيها نتيجه ولا شي من المصحه يرجو في موتهم وبس

والايام تجري بسرعه عند نور وهيثم يلي عرسهم قريب هما واسلام ورغد مع بعضهم عشان صحبة اسلام بهيثم يبو الفرحه 2 والعيلتين حايسه وتعاني بس كان في فرحه عندهم خاصة نور وأمهاا يلي علاقتهم مع بعضهم احسن من قبل احترام وود وحب بين بعضهم والجيران مستغربين نور الجديده يلي لها فتره تطلع بلبس مستور وماتبحتش في حد ومعاها امها خشت لنفس المحل يلي خشتله من قبل ونابشها صاحب المحل وحتى لزها لما هناته وقالت انه مش راجل عشان عطاها رقمه وحطه في الشكاره بدون استئذان منها قعد يبحت ومستغرب وهي توري في دبلتها لانها متأكده ميه في ميه ان هضا واحد من الاشخاص يلي حكاه علي عرضها لعم هيثم وخدت منه ملابس واجد وامها اختارت معاها وهو فهم ان فعلا حاتتزوج طلعت من المحل بدون ماتبحت فيه ولا تعبره خشت بهدوء وطلعت بعد عطاته درس مستحيل ينساه ان لو مهما حكاه علي عرض وشرف البنت حاتتزوج في النهايه بالحلال ومن النفس الشخص يلي فتن عليها بعيلته لان مافيش حد اخر سأل عليها من بعدهم وتمشي بفخر قدام الجيران كلهم يلي قعدو يبحتو ومصدومين ان فعلا حاتتزوج بعد يلي صار معاها وهي تمشي وما نزلت راسها ابدا واعيون هيثم من بعيد في السياره يبتسم لان فهم تصرفاتها وهو جاه لان رايف عليها عدا وهو يفكر فيها ويرجا بفارغ الصبر اليوم يلي حاتعيش فيه معاه حايكون اسعد يوم في حياته حبها من اول ما شافهااا وتعاطف واجد معاها وكان راجل معاها ودافع عليها وما خلاها ابدااا وهالشي زاد حبها له

رغد جاهزه في كل شي وقطوستها تيلا زادت عليها فرحتها وطاير عقلها فيها من لطفاتها وباتها وامها حبوها للقطه وهي تعودت عليهم واجد وحبتهم اتجي تقمعز في كترهم وترقد معاهم عالسرير في الدفاء ورغد حاسه روحها في حلم وتتمنى ما اتنوض منه وجاه اليوم المنتظر للجميع طلعت نور ملكه بفستانها الأبيض ورغد تعتبر اصغر من نور ب 8 سنين عروس صغيره وجميله والفرحه باينه فيهم قعدات عالمسرح في قاعة العرس وكل عروس كنبه كبيره وبعيد عالتانيه بكم متر ووراها الساس مزين بأسمها عن طريق الانبولات والزينه والجو خيال بعد مرور وقت كانت زفة هيثم مع نور خش وكان انيق والعيون عليه مع امه واخته وفاء خش وقعد يمشي واعيونه علي اسم نور قرب من عروسته يبحت فيها ويبتسم رفع طرحتها وشافها واخيرا : الف مبروك علينا يا نور حياتي كلهاااا يلي من اول نضره سرقتي قلبي مني

نور ابتسمت وبخجل قالت : الله يبارك فيك تسلم

هيثم : وانا اسعد انسان في الكون كله وطاير عقلي

نور وجها احمر قعد وهو يبحت فيها ويبتسم

واسلام يراجي في طلعت هيثم مع عروسته عشان ايخش بعدها وكان متوتر وكل اشويه يبحت في ساعته بعد وقت شافه فتح باب القاعه وكان فرحان ابتسم خاصة بعد شيرله من بعيد ان دوره رجاه يمشي وخش لقاه امه ونسرين يرجو فيه : متوتر في صبايا واجد جوا

امه ضحكت عليه : اها واجد ومافيش داعي تبحت فيهم انت امشي في اتجاه العروس وبس والف مبروك

اسلام باس يدها بحب : الله يبارك فيك يا غاليه هيا نمشو واخته نسرين تضحك عليه بعد هداه خشو مع بعضهم ورغد مصبيه وباقة الورد في ايديها وطالعه ملاك قرب اسلام منها وقلبه يدق بحت فيها وبتوتر رفع طرحتها قعد يبحت فيها لوقت وهي ترعش ومرتبكه

ابتسم وشافت بسمته زادت ربكتهاا : مبروك يا رغد وما شاء الله عليك سبحان يلي خلقك وهي خلاص حادوخ

وكلهم فرحانين واعيونهم علي العرسان يلي الصواره تصور فيهم مع بعضهم وما طلق يدها ابداا همسلها بصوت سحرها ( خلاص حلالي انتي ويدك في يدي علي طول )

والبنات منهبلات عليه ما توقعو ابدا ان الشاب يلي يحكو علي اخلاقه وان يقري في اطفال في الخلوه وحافظ كتاب ربي كله قعدن يحكن عليه ويقولو انه ما يتحشمش بكل بس جاتهم اخته بعد سمعتهم وبحتت فيهم : اسلام مش قصة ما يتحشم بس هو عريس وفرحان ان زواجه حلال ومافيش حشم فيه وهو فخور بييه وبعروسته يحبهااا قولن انكم غيارات عليك حسد استغفر الله وعدت لما سكتتهم كلهم وما قالو ولا حرف من كلمتها وصبت حداه ملك ونرجس ووفاء يلي قالت : شنو قلتي للبنات حسيناك مضايقه في حاجه سمعتيها منهم وضيقاتك ؟

نسرين : يانعليا عليك براده فيهم يعني خلاص لو هو ولد شيخ وحافظ كتاب ربي معناها ما يتحشم قتلهم هذي فرحة العريس ان زواجه حلال ومافيش حشم فيه وهو فخور بيه وبعروسته يحبهاا وقتلهم انكم غيارات عليك حسد قهرتهم وعديت زعمن كبدي وحق الله ربي يحفظهم من عيون الحساد ما شاء الله عليهم هما الاتنين

ملك ضحكت : اها بصراحه يجننو مع بعضهم لايقين

نرجس : فعلا وفرحة خوك اسلام ربي يدومها يارب

وفاء : انا خويا هيثم كان خجول اشويه ومرتبك

نسرين : كان حالته حاله وحياتك اول ماخش بس بعد شافها نساه كل شي لان يحبها وعجباته من اول ما شافها

ملك : ناعليا حب من اول نضره زي خطيبي احمد

نرجس : هههههه انتى عرسك بعد الامتحانات بوقت

ملك : ربي يعيني وخلاص وخايفه من الامتحانات واجد

وفاء : ما تخافيش واكتبي اسم احمد في شيتاتك توا تقري بضمير لما تقري اسمه صار منهبل عليكي

ملك ضحكت هي والبنات والاجواء خيال في العرس

يتبع ……….

لقراءة الجزء التالي : الجزء الحادي عشر من رواية الحلال والحرام

لقراءة الجزء السابق : الجزء التاسع من رواية الحلال والحرام

للإطلاع علي فهرس اجزاء الرواية : جميع روابط اجزاء رواية الحلال والحرام للكاتبة سلطانة كوكي

جميع الحقوق محفوظة للكاتبة سلطانة كوكي