وفي الجزء الأول من رواية بايرة حلتنا من إبداع الكاتبة مريم أحمد دعونا نري كيف ستبدأ أحداث الرواية وعن شخصيات أبطالها ؟ كل ذلك وأكثر في السطور التالية بإذن الله ولا تنسونا بجميل تعليقاتكم المميزة حول أحداث الجزء .
الجزء الأول من رواية بايرة حلتنا
كنت البايرة الوحيدة في حلتنا البنات الاكبر والاصغر مني كلهن عرسن الا أنا قاعدة وحارسة بيت أهلي التقول غفير، والعريس يا كافي البلا أصلو ما داير يجي ويخارجني من الحله المشؤمة دي، طبعا نهائي ما حصل مرة نضمو فيني وما قالو فلان داك دايرني ولا بالغلط سااي
كان كنت سمحة معليش كنت حاقول أنو كاتبني عند فكي عشان كدي ما جاني عريس لكن السماحة بجهة وأنا بجهة تانيه خالص، شفع الحلة كلهم من يشوفوني يقعدو يكوركو ميامن البايرة جات، ميامن البايرة جات
، شفع قليلن أدب خلاص وأنا يومي داقة واحد فيهم وهو يجري لي أمو وأنا انتظرها تجي عشان نرب الشكلة أصلي بحب المشاكل زي عيوني ورداحة ردح، ولساني أطول من السيخة..
أها في يوم جمعه كدي كنت ماشة الدكان وبطقطق في لبانتي وبتقدل ويا دنيا ما فيك الا انا، فجاة تجيني ليك كورة طايرة وتضربني في نص جبهتي، وجبتهي شدة ما كبيرة تحلف تقول صحراء قاحلةأتلفت على جهة الزول الرماها لقيتو دة ولد محاسن( دي جارتنا واحدة كدا نهائي ما بتبلع لي) في قلبي قلت الليلة وقعتك معااي كعبه يا ولد محاسن، كورك لي باعلى صوت عندو ” ميامن البايره أرمي الكورة ” هيي عان الجنا ده قوة عينو
مشيت عليهو ومسكتو من جضومو ووقعت ليك فيهو خبطيت من طرف، قلت ليهو أنت أهلك ما ربوك ولا شنو! أها نسيت ما هي أصلا أمك ما فايقة عشان تربيك من كترة المناسبات والجمعيات البتمشيها ما شاء الله الجحمانة أم كرش ما مخلية عرس ولا سماية ولا طهور ولا جمعية ما مشتو بلا ياخدك أنت وهي قال لي عشان قلت ليك بايرة يعني ما هو إنتي أصلا البايرة الوحيدة في الحلة دي وقعد يضحك قلت ليهو بايرة حبوبتك يا أبن الكلب قال لي كان حبوبتي بايرة أنا ما كان جيت معليش شكلو البورة ماكله معاك جنبه
قلت ليهو أنت ولد قليل ادب وأديتو كف لمن أضانو صنت وقلت ليهو مش دي كورتك أصبر لي وختيت يدي في شعري وبقيت بفتش لي في دبوس
، يلا شعري ما شاء الله غزير شددددديد لدرجة لو ختيت يدك فيهو بتروح عشان كدة بدس فيهو الدبوس عادي أصلا ما ح تتطعني لانو لمن تصل لي راسي ح تعدي مليون سنة من الغزارةمرقت الدبوس ونفست ليهو الكوره بتاعتو وكنت بعمل صوت مع صوت الكورة وهي بتتنفس حق سيت داكالشافع بقى يبكي ويتمردق في التراب أخر حاجه قام وقال لي والله الليله ما اخليك كان ما مشيت كلمت ليك أمي أصبري يا بايرة قلت ليهو أول شي غش مخاطتك دي بعدين أمشي كلمهاجرى جري وما أتكلم معااي، ما أشتغلت بيهو كتتير ومشيت أشتريت حاجاتي من الدكان وجيت راجعة ولسه بتقدل، فجاة أسمع ليك زول بقول ” هديك ليها البايرة الشاكلتني” عاينت تجاة الصوت أشوف ليك ود محاسن ومعاهو ولد واااي أنا بس، ولد زي صبااح العيد تحلف تقول شوكولاتة نوتيلا
الجلابيه السمنية دي كيف كيف واللحية تقول يا ليل والريحة واصلاني من بعيد، ياااخ ريالتي لمن سالت وأنا بعاين ليهو وقربت أقع لكن مسكت نفسي، في قلبي قلت أجي القمر بقى يظهر بالنهار وفي حلتنا كمان
!جو علي الولد قال لي معليش يا أخت بس مالك مع الشافع دا سوا ليك شنو عشان تنفسي ليهو كورتو؟! قلت ليهو أنت ما بتعرفو ده شافع قليل أدب وما مربى يقول لي أنا بايرة أخر زمن
الشافع قال ليهو والله يا سليم أخوي الحلة جت عليها بتقول ليها بايرة ما أنا بس قلت ليهو ههه+شفت هسي بقاك أخو عديل بعدين أنت يا السمح بتعرف أشكال زي ولد محاسن دة من وين! قال يعني عشان قال ليك بايرة يبقى ما مربى! قلت ليهو مربى ولا طحنية وههيي وقعدت أضحك بي أعلى صوت عندي هو بس كان بيعاين لي ومستغرب في الهمجيةقلت ليهو لا هو كيف يعني يقول لي كدي أنت شكلك جدديد في الحله دي وما بتعرفو هو وأمو، عاد ديك أسكت سااي النوع البجو لي الناس من قبل الواطة ما تصبح والبقعدو ساااعات طويلة لمن يكرهوك بيتك، والبغسلو يدهم لي الاكل قبل أسياد البيت، والبتبزق وهي بتتكلم وبزاقها كلو بكون في وشك، والكلامها كتتير تحلف تقول بالعة رداي، بري كعبة وجنها قطعية وكلام في الناس ويااهو ولدها طالع ليها قال ليهو خليها يا مصطفى أرح اشتري ليك كورة جديد قلت ليهو هيي أستنى أنت كيف بتعرف أسمو قال لي لاني فعلا أخوة والكنتي بتتكلمي عنها دي أمي يا بايرة
….
☆☆☆☆☆☆☆☆☆☆
اشوفكم…
☆يتبــــــــــــــــــــــــــــــــــــــــــــع☆☆
لقراءة الجزء التالي : الجزء الثاني من رواية بايرة حلتنا
للإطلاع علي فهرس اجزاء الرواية : جميع روابط اجزاء رواية بايرة حلتنا للكاتبة مريم أحمد
جميع الحقوق محفوظة للكاتبة مريم أحمد .
