وفي الجزء الأول من رواية عاصفة الصمت للكاتبة لوزة دعونا نبدأ في قراءة كيف ستبدأ الرواية وأحداثها وعن شخصيات ابطالها ؟ وكل ذلك وأكثر في السطور التالية بإذن الله ونتمني لكم قراءة مشوقة وحلوة بإذن الله .
الجزء الأول من رواية عاصفة الصمت
نزار مواليد 1974.. ولد واحد وزوز خوات تؤم 1982 مروة وصفاء … وامهم رقية …
(كل الروايات اللي فاتوا كانوا الشباب مبسوطين وبخدمهم وحياشهم واتيات و اخﻻقهم عال العال وامورهم طيبة..تعالوا مع بعض نحاكوا موضوع اخر … في عام 1998 طرابلس…
اي ان عمر نزار 24 عام وخواته التؤم 16 العام …
فاطمة : على اساس اتخيطي وانتي اتبيعينا ف حوايج القدم متع بناتك
خ رقية : ﻻ اللطف قتلك العيون ولو بالهون ومعش انخيط
زهرة :هه
خ رقية :و حوايج الباهيات متع مروة وصفاء انبيع فيهم اللي مخيطتهملهم قبل ومالبسوهمش هلبا
فاطمة : ﻻ ياللا ماقلتيش الدوة اهياه قلتي امعش انخيط بس العيون ولو بالهون … نحساب عاد ان عندك بضاعة مخيطة وواتية وجديدة وهوا تاريته اتبيعينا ف القديم
خ رقية : باهي به مش لدرجة اتكدبيني يافاطمة انتي اللي يومها اتلوقني مع سميرة مش فاضية باللي نقولك فيه
فاطمة :ماكدبتكش انا لكن مانحبش من يستغفلني ايواااه
خ رقية : باه وين فراشيتي بنروح
فاطمة : اهيا فراشيتك
خ رقية : بسﻻمة
فاطمة : سلمك
*روحت خ رقية للحوش خشت ودموعها ع خدها *
نزار : قداش لينا متخرجين ومافيش خدمة يا عصام
عصام : مشكلة والبﻻد حصار اممم حقا عمي يشتغل في مصنع متع طوب نكلمه بالك يخششنا ف معاه
نزار : شن بنشتغلوا نقيموا الطوب ونستفوه
عصام : اي حاجة
نزار : ياريت والله ظروفنا المادية معش تسمح اﻻيام هادي
عصام : به خﻻص نكلمه ونقولك
نزار : باهي تمام … اونه بعدين كلمني عالهاتف واﻻ تعال للحوش
عصام : ان شاء الله به
نزار : هي سﻻم
عصام : سﻻمات …
*روح نزار من راس الشارع وخش للحوش وشاف امه مهمومة قعمز جنبها *
نزار : خيرك يمى
خ رقية : مافي شي غير حايرة شن ندير غدي
نزار : ﻻﻻ حاس فيه حاجة
خ رقية : تناوشت انا وجارتنا
نزار : من من الجارات
خ رقية : بعد هالعمر ياولدي اتطلعني كدابة
نزار : منو يمى قوليلي
خ رقية :مش مهم منو … وجعتني ف نص كبيدتي اتكدب فيا وقدام جارتنا التانية … عيش وملح بينا وفي اﻻخير اديرلي هكي
نزار : به غير احكيلي
خ رقية : * حكت لنزار *
نزار : خزيه والله ماتتحشم
خ رقية : عيب معش تقول هكي مهما كان اكبر منك
نزار : باهي … الله يسامحك قتلك يمى معش تخدمي …خﻻص بارك الله فيك خدمتي وكبرتيني وخرجتيني خﻻص انا تو نخدم ونصرف عالحوش
خ رقية : احح ان شاء الله …
اي قولي شن صار
نزار : والله شن بنقولك …الحق ماخليت وين لدت كل مكان نمشيله مايبوش يوظفوني
خ رقية : ياحليييلي من الفجر وانا ندعي اتحصل خديمة ….معش فيه مونة ف الحوش ياريتك حتى تعلمت صنعة بوك
نزار : شن صنعة بوي يمى … تي انا لحقت نتعلم منه صنعة… اتوفى وانا عمري 11 العام
خ رقية : به كيف الدبارة ياولدي
نزار : عصام قالي عمه يشتغل ف مصنع طوب … بالك يشغلني معاه
خ رقية : ان شاء الله يشغلك يارب
نزار : ان شاء الله … شن اماﻻ وين مروة وصفاء
خ رقية : في السطح يغسلوا ف البسطات
نزار : به وين الغدي جعان
خ رقية : اهو تو نديرلك خبيزة وشامية
نزار : شن خبزة وشامية يمااا
خ رقية : مافي شي ف الحوش احمدد موﻻك
نزار : باهي الحمدلله على كل حال
عصام : السﻻم عليكم …
معتوق : وعليكم السﻻم كيف حالك ياولدي
عصام : بخير ياعمي كيف حالك انت
معتوق : اهو الحمد لله نبرزوا
عصام : باهي تمام بكل كيف حال العويلة
معتوق : ابخير … شن سبب الزيارة اليوم
عصام :والله ياعمي جايك ف طلب هكي
معتوق : شنو
عصام : بالك اتحصلنا خدمة انا و صاحبي نزار … زبطه نزار واﻻه
معتوق : اي زبطه .. لكن
عصام : بالله ماترفض ياعمي
معتوق : مايبوش عمالة حاليا ونبي انخششك انت وخوك علي
عصام : تو يدور خدمة تانية علي
معتوق : ﻻ والله مانقدر .. اﻻقربون اولى من المعروف ياولدي وحتى كان بنخشش نزار وحاتم ﻻ بيحرج مني وحتى بوك ايقولي كيف ماتشغلش ولدي معاك
عصام : باهي ياعمي اللي اتشوفه … السﻻم عليكم
معتوق :وعليكم السﻻم ..
علي : يانزااار … نزاااااار
مروة : نزاار.. نزار نوض .. فيه ولد يضبح عليك برا
نزار : باهي هي اهو نايض …
ناض نزار وطلع لشاب
علي : خييير
نزار : خيرات
علي :تي وين من نهار اتخرجت معاد ريناك
نزار : اهو قاعد ف هالدنيا … خش خش
علي : ﻻﻻ مستعجل غير سمعت ايحطوا ف ملفاتهم ف القوى العاملة فجيت انقولك بالك بتقدم عندهم
نزار : من اللي حصلت اﻻفادة مشيتلهم طول وقدمت ملفي وكل اسبوع نمشيلهم ويقولولي مازال
علي : والله مشكلة
نزار : ان شاء الله خير وخﻻص …
علي : ان شاء الله هي سﻻمات توا
نزار : سﻻمات …
{قعدت بﻻ عمل منين بنصرف على العيلة منين ؟؟كيف اندير بس… نخنب نقتل …الحالة معش اتسر بكل… يلعن بو القرش }
نزار :وين ماشية يمى
خ رقية : ماشية لجيران
نزار : شن فيها الصرة ؟؟؟؟
خ رقية : ﻻ شي
نزار : يمى شن فيها الصؤة اللي رافعتها
خ رقية : شوية حويجات
نزار :وﻻش مطلعتيهم ؟؟ ماشية بتبيعيهم يمى ؟؟؟ حوايج صفاء ومروة واﻻه
خ رقية : ايه شن بندير مافيش ماناكلوا
نزار : خشي يمى خشي
خ رقية : خلي نمشي
نزار : ورحمة بوي اﻻ ماتخشي خﻻص خشي اهو تو نطلع ندور خدمة تاني ..ساد اللي صار امبكري
خ رقية : اح وخﻻص… خليتني نمشي ياولدي
نزار : ﻻﻻ اهو تو نلبس الشبشب ونمشي ندور خدمة
خ رقية : باهي ربي معاك
نزار : ان شاء الله خلي نلبس شبشب… ايوااه هي سﻻم
خ رقية : سﻻم ف امان الله ياولدي
طلع نزار من الحوش وهوا مش عارف وين يمشي واﻻ وين ايلود مشي لعصام…وعصام قاله ان عمه ماوافثش… طلع من عند عصام وكمل مشواره وكل مكان يمشيله مايحتاجوش عمال … مشي لدكاكين .. لجمعيات ماحصلش… في اﻻخييير خطم من قدام مصنع لقي واحد زميله من الثانوي وقري معاه ف الجامعة
نزار : اوووووووووو حاتم
حاتم : اوووو نزار شن اﻻمور
نزار : اهو الحمدلله شن مداير
حاتم : اهو مكسدة
وقعمزوا هما اﻻتنين على بلوكات ف الشارع
نزار : وينك معش قابلت ف الجامعة معش شفناك ياراجل
حاتم : سيبتها القراية قداش ليا
نزار : ﻻﻻ عﻻش
حاتم : ظروف والله … شن صار فيك انتا
نزار : كملت واتخرجت
حاتم : كويس توا اكيدة مهندس قد الدنيا ف شركة واﻻ مكان مرموق
نزار : بالله يا حاتم خليها ف سرك
حاتم : عﻻش ..
نزار : ماحصلتش عمل والحالة تضرب تعزق والله امبكري صار موقف مع العويلة هكي لين خنقتني العبرة …ماخليت وين لدت ماخليت وين حطيت ملفي
حاتم : ﻻ حول وﻻ قوة اﻻ بالله …
نزار : حالة وخﻻص
حاتم : الحق انت ياما وقفت معاي ايام الثانوي جي الوقت اللي نردلك فيه ولو جزء بسيط
نزار :مافيش بينا ياحاتم
حاتم : به شن رايك تخدم معاي ؟؟
نزار : نخدم ياريت… شن هيا الخدمة
حاتم : عندي خدمتين ف النهار نظاف ف المصنع هدا… وف الليل انبيع
نزار : شن اتبيع
حاتم : هات وذنك
نزار : هاه
حاتم بصوت همس : حشيش
نزار : اعوذ بالله
حاتم : ههههه خيرك انتفضت هكي
نزار : خلعتني الحق
حاتم : تي ماقتلكش دخنه واﻻ كوله.. بيع بس وتاخد حصتك من الفلوس مبلغ ف اليوم و اتروح بيهم وامورك طيبة
نزار : بش هادو فلوس حرام
حاتم : ﻻ حرام وﻻ واحدة … كان سبسته حرام لكن انت بتبيعه شن دخلك فيهم… اللي بيشروا حيشروا منك واﻻ من غيرك
نزار : ﻻﻻ
حاتم : غير انت فكر بس وبعدين رد عليا …عارفك دكي وحتمشي فيها الخدمة مزبوط ..
نزار : ﻻﻻ خليني نقدم ف خدمة النظافة
حاتم : انا نخدم نظاف تمويه بس …بش وقت نصرف عالعيلة مايقولوليش من وين نصرف عليهم
نزار : كم المعاش ف شغل نظافة هدا
حاتم : تبي تخلص يومية دينار ف اليوم وكان تبيها شهرية 30 نهاية الشهر
نزار : باهي حتى 30 كويسات
يمشونا حتى شوية ماكلة
حاتم : حتى انا هكي كنت انقول عموما مدير المصنع قاعد خشله كلمه
نزار : به هي
*خش نزار للمدير وكلمه واتفق معاه انه بيبدى من تاني يوم عمل نظاف ف المصنع * ….
وفاتت اﻻيام و30 دينار معش سدوا العيلة وقعد نزار يتسلف من المدير عالشهر لبعده وتجي شهور يشتغل بﻻ مرتب ﻻنه متسلفه من الشهر اللي فات …
وفي يوم ليل …متكي نزار ف وسط الحوش ..
{شمالها الحكاية اتزيد تتعقد الجمعية تبي فلوس بش نقدر ناخد طماطم وزيت ومكرونة وفلوس ل امي بش تاخد مستلزمات هدا من غير فلوس ومصاريف قراية مروة وصفاء ف المعهد يبو كراريس و حاجات شن اندير ياربي شن اندير }
صفاء : نزار
نزار : نعم
صفاء : نبي عشرة جني
نزار : وعﻻش النهار المبارك عشرة جني بحالها ….ماقلتيش حتى اجنية
صفاء : ماهو بنشري شنطة
نزار :وخيرها شنطتك ياصفاء
صفاء : اتقطعت ومنظرها مبهدل
نزار : والله ماعندي توا …كنت نحسب ف حق فلوس بش ناخد مونة من الجمعية
صفاء : به كيف اندير البنات معاي ف المعهد بشناطي جدد وانا ﻻ
نزار : باهي شن بندير نخنب ؟؟ اه قوليلي نمشي نخنب ؟؟ ماعنديش ! انولع ف روحي واﻻ شنو . راني نظاف والمعاش 30 دينار بس
جتهم خ رقية وقتلهم : خيركم شنو فيه
صفاء : قتله نبي شنطة ﻻن شنطتي تقطعت بدي يصيح عليا
نزار : استغفر الله العلي العظيم
خ رقية : انتي عارفة الحالة مهناكش يا صفاء … بري جيبيها شنطتك تو نخيطهالك
صفاء : خﻻص تو نخيطها بروحي ..
طلعت صفاء وخشت مروة
مروة : خيرها هادي
خ رقية : تتزعبن
مروة : اممم باهي … نزار عندك 5 دينار …
نزار : عندي الصبر
خ رقية : خلوه الولد منين بيجيبلكم وانتوا زي سﻻلة الفلوس انتي واختك
مروة : باهي بﻻش
خ رقية : ماتكدرش روحك يانزار .. معليشي … معيشة حرفة وخﻻص… حتى امبكري بنقعمز نخيط مفارش زي قبل ونبيعهم معش قدرت …عيوني خﻻص عليهم ضعفوا
نزار : ماتعبيش روحك بارك الله فيك خدمتي لين اتخرجت .. ان شاء الله ربي يسخر الحال و تفرج ..
هي تصبحي على خير يمى تعبان وبنرقد بش انقيق بكري
خ رقية : ان شاء الله خير …تﻻقي الخير
فتح باب المربوعة نزار وخش فيها وهو يفكر ف كﻻم حاتم …
{زعما نوافق بخدمة التانية متع حاتم ؟؟ لكن بيع حشيش والله انحس فيهم حرام … ﻻﻻ شن حرام عﻻش حرام …صح زي ماقال حاتم بيشروا مني واﻻ من غيري … باهي فلوسهم حلال يانزار هادو .. حﻻل حﻻل.. تجارة زيها زي غيرها وكاني نبيع ف دخان … لكن لكن .. مافيش لكن هوا هدا نوافق وخﻻص … باهي لو امي عرفت امممم تي منين بتعرف …. مشكلة لو عرفت . ﻻﻻ بﻻش خوف يانزار ﻻ تعرف وﻻ واحدة }
*ومن التخميم رقد نزار مافاقش اﻻ على صوت امه اتنوض فيه *
نزار : نضت نضت … صباح الخير
امه :صباح النور …نوض فيسع الفطير واتي
نزار : اوكي ناخد دوش ونصلي وانجي هي
*وقف نزار وهوا ماشي للحمام يسمع ف خواته يهدرزوا
صفاء : والله تستاهل اهو حصلتنا منها 20 دينار هالكلبة هادي
مروة : والله حرام عليك
{شن يديروا هادو منين جاهم عشرين دينار امس كانت تبي عشرة جنية بش تشري شنطة واليوم عندها عشرين كيف صار ؟؟}
*خشلهم نزار *
نزار : عشرين متع شنو انتي وياها
صفاء : امممم اممتع شي
نزار : بﻻ كدب عشرين متع شنو تكلمي انتي وياها …. ماتبوش تتكلموا ؟؟ نمد ايدي يعني
مروة : ص صفاء خانبة عشرين دينار من بنت صفنا
نزار قرن حواجبه وقال
بصوت عالي : اعﻻش تخنبي ياحمارة اعﻻش …
صفاء تبكي : م م ماه نبي ننشري كندرة
نزار : بالخنبة كان هدا ؟؟حتى انكان حالتنا المادية ماتسمحش ماتخنبيش ..عيب والله عيب
مروة : والله قتلها مايجيش هيا اصرت
نزار : اترديهملها فاهمة ؟؟
صفاء : كان بنردهملها بتقول عليا خنابة
نزار : بنفس الطريقة اللي خنبتي بيها رديهملها فاهمة
صفاء : باهي ان شاء الله
نزار : انتلفي انتي وياها للمعهد
*خش للحمام نزار خدي دوش و فطر وطلع ل المصنع…فاتت الساعات اﻻولى من العمل و نزار قعمز ف تركينة ياخد راحة و راسه يرفع ويجيب والوضع متازم ويفكر ف خنبة اخته …*
{ الوضع معش يسر اختي بدت اتمد ف ايدها وتخنب … ايييه بالله اليوم خنبت غدوة اشبح شن ادير…. الصبر ياربي الصبر… به منين بنجيب الفلوس منييين احسن شي نتسلف من المدير على الشهر الجاي زي مادرت الشهر اللي فات }
*وقف نزار نفض روحه ومشي لمكتب المدير ف المصنع *
طق طق طق
جمال : ادخل
نزار : السﻻم عليكم
جمال مقعمز ع مكتبه ومشغول يوقع ف وراقي رد ع نزار السﻻم من غير مايقيم راسه
نزار : استاد جمال
جمال : انعم
نزار : بالله نبي طلب هكي
*قام راسه جمال وقاله : ماتقولش فلوس
نزار : اي والله … نبي نتسلف عالشهر الجاي
جمال : ﻻﻻ مافيهاش كيف الشهر اللي فات متسلف عالشهر هدا وين نندري عليك مرات اتسيب عمل وتفواني وتبدى خالص من دقني شهر من غير تعب
نزار : شنو بنخنبك توا
جمال : من غير كﻻم زايد ارجع لخدمتك
*اتنرفز نزار وجاي بيستقيل بس جو قدامه امه وخواته فطلع وسكر الباب … وقعمز ف تركينة حاط ايده ع خده …
على خطمة حاتم …*
حاتم : غير فاش اتخمم
نزار : والله ماني عارف هكي ااﻻوضاع ملخبطة
حاتم : من ناحية شنو
نزار : من كل النواحي سبيزة مافيش مستلزمات كل شي ناقص ف الحوش
حاتم : به شن رايك فيه واحد صاحب سجل ف اللجان الشعبية واموره طيبة ويقبض ف معاشه
نزار : ﻻﻻ فكني منها الخدمة اهياه
حاتم : به اماﻻ وافق ع الخدمة اللي عرضتها عليك قبل شهور وريح روحك وريح عيلتك من المرمطة ياراجل … تقعد ف الحشايم مع المدير تتسلف منه وهوا يذل فيك
نزار : باهي حتى ولو لمن بنبيعه اللي تدوي عليه ..
حاتم : غير انت تعال الليلة وتقابل مع الراس متاعي وهوا توا يقولك
نزار : باهي به يستر الله
حاتم : خﻻص تلقاني ستنى فيك جيهة البيفي مع ساعة 10:30
نزار : باهي تو نشوف
حاتم : نستناااك مش ماتجيش
نزار : باهي ياحاتم وانت اتزن
حاتم : مانبيش نشوفك شاقي بس
طلع نزار من المصنع ومشي لحوش عصام مالقاشي فروح للحوش … وطول الوقت يحاول يتناسى الموعد اللي عطاهوله حاتم….وشيطانه ايوز فيه انه يمشي
وقرر انه يرقد بكري *
نزار : هي تصبحوا ع خير
مروة : مازال بكري قاعدة ساعة 8
صفاء : بيجيبوا مسلسل جديد ف القنفودة
نزار : ﻻﻻ ناعس
خ رقية : خلوه ع راحته برا اتكى وليدي امشي
نزار : اي ماشي هي
خش مربوعة واتكى ويتقلب يمين يسار يمين يسار معش جاه نوم ناض وفتح الضي وشاف ساعة لقاها العشرة.. وجمل يترددوا ف راسه
{تي برا لحاتم امشي…
لحاتم امشي برا
برا امشي لحاتم }
لبس حوايجه وطلع من المربوعة
خ رقية : اللطف وين ماشي
نزار : عندي ولد يستنى فيا عطيته موعد ونسيت
خ رقية : به ماتعطلش
نزار : باه
وبعد نص ساعة وصل عند حاتم
حاتم : تي خيرك تاخرت من بكري نستنى فيك ياراجل
نزار : ماه كنت انفكر
حاتم : معش اتفكر …راسك انت مش متع خدمة …امشي وراي وخﻻص
نزار : باهي وينه الراجل اللي قتلي عليه
حاتم :اصبر تو ايجي …
(بعد نص ساعة )
نزار : تي وينه
حاتم : تو ايجي خيرك انت … اهو جي هي
(صﻻح ملقب ب القيافة مواليد 1963 … عنده عﻻقات ف الدولة ويشتغل موظف لكن شغلته مش معروفة شن هيا )
صﻻح : السﻻم عليكم
حاتم : وعليكم السﻻم … مرحب بيك يااستاد
صﻻح : هوا هدا اللي قتلي عليه او
حاتم : اي هوا هدا حيعجبك يااستاد تريس ماﻻخير … وقبضاي
*فتحي نخص نزار بش يتكلم*
نزار : مرحبا
صﻻح : هو كشكل يبان اكبر من عمره بس مع هدا صغير
نزار : تي شن ص. .
*حاتم عفس ع رجل نزار*
حاتم : ايه صغير ف العمر لكن عقله كبير ويعجبك …
صﻻح : اممممم مضمون قصدك
حاتم : مية ف مية
صﻻح : به تمام … تعرف شن شغلك يا … شن اسمك قتلي
نزار : نزار
صﻻح : نزااار … حيتغير اسمك مع الوقت على حسب كفائتك ف الخدمة هادي… شغلك انك اتبيع كل البضاعة اللي عندك وتكون صدقات بشباب اللي من جيلك … رد بالك تاخد منها البضاعة
نزار : شن ناخ …
صﻻح : قاعد نتكلم انا … ماتقاطعنيش ف دوتي …رد بالك تاخد منها البضاعة نبي شخص صاحي ايبيع مش ايغفوه وياخدوها منه
حاتم : فهمت نزار
{مش مرتاحله … خلي نرجع للحوش ونقوله مانبيش نخدم}
حاتم : نزااار
نزار : فهمت فهمت
صﻻح : خود البضاعة من الكوفيني وتو يقولك الفار وين اتبيعهم
نزار : منو الفار
صﻻح : هئهئهئهئ اونه اللي بحداك كل يوم ايوليلي بنص البضاعة .. راك اتكون زيه
*اكتفى نزار ب ابتسامة صفراء ردا على كﻻم صﻻح
وخدي البضاعة من الكوفيني *
صﻻح : مع الفجر سلم البضاعة اللي فضلت ل سفيان ياحاتم
حاتم : تم يااستاد صﻻح
*وخر صﻻح بسيارته ومشي …. وفتح نزار شكارة الكحلة لقي فيها كياس صغيرات هروينة حشيش وحبوب *
حاتم : خيرك ترعش … شن متوقع تلقى فيها الشكارة حلوة واﻻ مستكة
*نزار جبهته ولت متعرقة وارتفعت درجة حرارته من الخوف*
نزار : اس اسمع خود برا بيعهم انت بنروح انا
حاتم : وراس امك ؟؟
نزار : ايه مممش ليا الحاجات هادي
حاتم : قوي قلبك بﻻ جو زايد
نزار : مانقدرش
حاتم : تقدر … اسمع برا ل المناطق اللي نقولك عليها ورد بالك تكبسك الشرطة
نزار : شرطة شنو ياودي
حاتم : غير هيا برا
نزار : ماعنديش سيارة بش نمشي جيت بتاكسي.. وتوا شوارع فاضيات مافيش تاكسيات
حاتم : به به برا لمنطقة كدا … بحدا منطقتكم تو تلقى جماعة غادي معكسين جيهة ورشة العكنوني . ..زبطها واﻻه
نزار : ايه ايه زبطها
حاتم : خﻻص تلقى جميعة غادي
قولهم انا من طرف الفار وتو يزبطوا هما … وماديرش جو الخوف حمر عينك واشحط روحك… تسمع فيا شن انقول…
نزار : به به فهمت.. باهي عﻻش يبيع فيه عن طريقنا خليه يبيع بروحه بجملة
حاتم : سؤال غبي عموما زي ماقتلك … كيسة الهروينة الصغيرة بيعها ب 25… الحشيشة هادي الظرف ب 30 …. الحبوب الحبة بعشرة …فهمت
نزار : باهي باهي خﻻص …
حاتم :كان شداتك الشرطة ماتتكلمش مهما سؤلوك
نزار : ان شاء الله خير
(ومشي نزار للمنطقة اللي قاله عليه حاتم
ووقف بجنب بالو ضي ايشوف ل الجماعة اللي قاله عليها حاتم … وخايف ومش عارف كيف يتصرف)
{هيا يانزار … امشي تقدم ﻻﻻ خلي انروح … لكن تو حاتم يدير فيا حالة.. اففف بﻻ خوف ياولد هيااا}
*تقدم نزار بخطوات خوف وقلق وارتباك لجيهة الشباب بعدين شحط روحه ودار الوعارة *
نزار : اساويكم
الشباب : وعليكم السﻻم o_O
نزار : ااا هئ احم .. ا تبو حشيش
شاب : اااا شنووو
شاب 2 يوشوش لصاحبه : شرطي واﻻه حسه كمين
شاب : ايه ممكن …
شاب 3 :ﻻﻻ ماعندناش فيها الدوة هادي
شاب 2 : برا من اهني خير مانتفلووا فيك
نزار : باعتني الفار
شاب 2 : تي قول هكي ماﻻول
شاب 1 : عطلتوا علينا اليوم قريب كلينا بعضنا ياراجل
نزار : باهي شن تبوا عندي حبوب وحشيش
الشباب : حشيش
نزار : ب 30 هاك هي …
شاب : هما راص 20 ماعنديش غيرهم
نزار : ﻻ ب 30
شاب 2 : به لينا احنا بعشرين شن رايك
نزار قرن حواجبه ويفنص وطلع موس متعه وقال : ليك واﻻ لغيرك ب 30 بتاخد خود …ماتبيش بﻻش… بدير العنترة بناكلك ماكلة …وانت اختار شن يصلح بيك
شاب 2 : باهي نبصروا اهو عندي 30
نزار : حلو الكﻻم …
(باعلهم نزار واستفسر منهم عن باقي الجماعة اللي مزال يبو يشرو
وباع كل كمية ورجع ل حاتم مدله الفلوس )
حاتم : بعتها كلها ؟؟
نزار : ايه
حاتم : وعطوك فلوس تامات ؟؟؟
نزار : ايه
حاتم : اما انتاااا حسك خطير وعندك فيه وانا ماندريش المهم غدوة تو يعطيك صﻻح كل يوم يعطيك فلوس يوم اللي قبله وهكدا
نزار : بش قتلي بالشهر
حاتم : تي حد يرفس النعمة
نزار : باهي به انا بنروح توا ساعة 2 خﻻص
حاتم : نتﻻقوا غدوة سﻻم
(روح نزار دبة دبة لين وصل الحوش وخش)
خ رقية : وين لتوا
نزار : قاعدة فايقة يمى
خ رقية : نستنى فيك
نزار : كنت نلعب ف كورة انا وشباب
خ رقية : كورة شنو ف عقاب ليل ف ليل
نزار : شدوا فيا ماقدرتش نقولهم ﻻ
خ رقية : باهي اخر مرة معش تعطل هكي
نزار : ان ششاااء الله
على ثاني يوم الصبح
مشي نزار لحوش حاتم وطقطق فتحتله بنوتة صغيرونة
نزار : اهﻻ كيف حالك ياحلوة
البنت : كويسة
نزار : شن اسمك انتي
البنت : غادة
نزار : عاشت اﻻسامي ياكتكوتة … حاتم قاعد
غادة : ايه قاعد
نزار : به ناديهولي
غادة : به ستنى سوية
(بعد شوي )
غادة : قالك تو انجي
نزار : به .. تقري انتي
غادة : ايه صف تاني ابتدائي
نزار : اكيدة شطورة
غادة : هههه ايه
(طلع حاتم )
حاتم : صباح الخير
نزار : صباح النور
حاتم : خشي داخل ياعزوزة اكيدة نفختي راس الولد
غادة : مش عزوزة انا مشناك راس الثومة خالتي مريومة
نزار : ههههههههه
حاتم : تي خشي داخل نعن شكلك عزوزة القايلة …
نزار : بشوية عالبنت
حاتم : ماينفعش فيها اﻻهكي
نزار : ماكنتش نحساب عندك خوات
حاتم : مش اختي هادي بنت عمي وديما نازلة عندنا زي السوسة ههههه
نزار: هههههه خﻻص خلي نخطبها اماﻻ عجبتني هههههه
حاتم : هيا ليك هالنفاخة العش هادي
نزار : هههههه… ها قولي شن صار امس
حاتم : شكر فيك استاد صﻻح قال من اول يوم فضى الشكارة
نزار : تﻻقيت معاه امس ؟؟
حاتم : ايه جي هوا بدل سفيان
نزار : اممم باهي لكن مادبيا نبدى نبيع من المغرب ﻻن مانبيش امي اتشك
حاتم : به عادي
*ومع الليل قبض نزار فلوسه 170 دينار … فرح بيهم وطار عقله
وعلى ثاني يوم الصبح مع ساعة11 طلع هوا وعصام مشوا لمحل خدي لخواته حاجات و مشي لجمعية شري سبيزة وكل شي وروح للحوش *
خ رقية : ماشااااااااء الله هدا كله جبته من الجمعية ؟؟
نزار : ايه يمى ومازال البرويطة التانية جايبها معاي عصام قاعدة قدام الباب ستني انجيبها
خ رقية : الله يبارك … بس منين جوك الفلوس
نزار : اليوم المدير زادنا المعاش
خ رقية : ئه غريبة عﻻش زادلكم المعاشات
{ياربي شن بنقولها شن بنقولها }
خ رقية :نزار ؟؟؟
نزار : ماهو اليوم عيد الفاتح عرفتي هدا باش زادنا المعاشات
خ رقية : اها ﻻ باه كان هكي … يامروة ياصفاااااء
صفاء : نعم
خ رقية : تعالي فيسع خوك ربي حن عليه وجاب سبيزة
صفاء : حقققق؟؟؟هاني جاية هي
نزار : جايب حتى كنيدرات وشنيطات ل مروة وصفاء
مروة : بجديات … تره تره
خ رقية : تي بشوية يادعوة دعستيلي صبعي
صفاء : ماهوو بنشوف نزار شن جاب …حولي يامروة ليا الكندرة هادي
{ليا وقت معش شفتهم فرحانات هكي … برغم ان ضميري مأنبني عالخدمة اللي نخدم فيها بس يﻻ معليشي المهم اسعدت امي وخواتي }
مروة : ﻻﻻ عينك انا شديتها قبل
خ رقية : بشوية ياهايشات منك ليها نزار : هههه خليهم يمى
خ رقية : ربي يفتحها ف وجهك يا وليدي
نزار : ان شاء الله يمى … هي طالع انا
خ رقية : شن الشكارة اللي رافعها شن فيها
نزار : امانة متع ولد ..
خ رقية : ها به
نزار : سﻻم
* ويوم عن يوم يكون صداقات ف اماكن تانية .. ويبيع وف غضون شهرين ولى خبرة وكل اللي يبيعلهم يخافوا منه وحالتهم المادية اتحسنت …و يوميا الشكارة ايفضيها من البضاعة ويسلم الفلوس ل صﻻح وصﻻح يعطيه حصته … وصﻻح عجبه نزار هلبا… وفي يوم ما كان نزار جاي ل صﻻح ف مكان ديما يلتقوا فيه بش يتفقوا و يسلم صﻻح البضاعة لأتباعه …
صﻻح : ف خﻻل شهرين قدرت تتبت نفسك وشخصيتك عاللي نبعت فيك ليهم … كان تقعد هكي حنعطيك هلبا مزايا
نزار :ان شاء الله …
صﻻح : عموما الليلة فيه صفقة جايتني عالميناء هيا مش ليا بس انا سمعت بيها ونبي نخنبها …و نبعتك انت وحاتم تقدر واﻻ ﻻ..
نزار : تم
صﻻح : عارفك قدها يانزار …. تعرف اتسوق ،؟؟
نزار : اي نعرف … تعلمت شوية من ولد
صﻻح : به تو نعطيك سيارتي العقرب ريح ادرسها بعيد شوي من الميناء و…
*وعلى خشة حاتم بقوة ويجري ومدهول *
حاتم : استاذ صﻻح استاد صﻻح
صﻻح : شنو خيرك خاش هكي
حاتم : الحويلو والجماعة
صﻻح : خيرهم !
حاتم : ضربوني وخنبوا مني البضاعة
*صﻻح كان مسترخي في كرسيه ولما سمع هالكﻻم وقف وقال : تي كيف … كيف يخنبوها منك ياحمار
حاتم : مش عارف كيف صارت اللقطة … غلطت وقلت اسمك قدامهم ضربوني وخنبوا مني البضاعة
صﻻح : ماك غبي واغبى من الغباء اتفيه عليك …. اننت تعرف ان بيني وبينهم موضوع كبير ﻻش فاتح فمك
نزار : نمشيلهم ؟؟
صﻻح : شن تمشيلهم شن بدير … اصﻻ يعرفوك انك تبعي شايفينك مع حاتم
حاتم : ﻻ شايفينه معاك
صﻻح : امتى
حاتم : ف ليلة من ليالي ياشبحوك تسلم بضاعة يا مش عارف المهم
صﻻح : تو نعرف كيف ناخد حسابي منهم يلعبوا معاي انا …. هه انوريهم اللعب شن شكله
نزار : والله بصدق خليني نمشيلهم وماتكون اﻻ راضي استاد صﻻح
صﻻح : ماكش قدهم يانزار !
نزار : بإذن الله والله ماتكون اﻻ راضي
صﻻح : به … به به خود معاك السﻻح هدا
نزار : ﻻﻻ مش ﻻزم سﻻح… معاي بوخوصة متاعي ساد
صﻻح : به برا … هادو مفاتيح السيارة
نزار : تمام
صﻻح : خود معاك هالفار هدا
نزار : ﻻﻻ خلي نمشي فيسع فيسع وانجي
صﻻح : تعرف مكانهم ؟؟
نزار : ايه نعرف
صﻻح : تمام … ماتعطلش نستنى فيك
نزار : به
*طلع نزار من اهنا وصﻻح اتلفت ل حاتم *
صﻻح : تاريتني ماخبتش لما سميتك فار … ياحشايم يابهادل تو باعتك اتبيع من سكات ماشيلهم وتقولهم صﻻح… وعارفهم مايحبونيش كﻻ انت غبي …وتقعد هكي طول عمرك … اتعلم من صاحبك اتعلمممم ياراس السطل
حاتم : علمناهم شحاتة سبقونا لبواب الجوامع
صﻻح : شنوو
حاتم : مانعرفش كيف صار الموضوع
صﻻح : به به نوض من قدام وجهي الله ﻻ يبشرك بالخير … ووتي روحك ابتمشي مع نزار الليلة للميناء
حاتم : ان شاء الله يااستاد …تبي مني شي توا
صﻻح : شي انتلف تلفة
حاتم : باهي سﻻم عليكم ..
*طلع حاتم من عند صﻻح وهوا يفكر … كيف هكي في شهرين قدر نزار يتقرب ل استاد صﻻح … وعﻻش استاد صﻻح ايحبه هكي برغم ان اقدم منه ف المواضيع هادي … اففف منك يانزار الهم… ف القراية ف الثانوي متفوق عليا وفي خدمة العفن متفوق عليا…انا غبي شغلته معاي … كنت نحسابه حينحرف ويدخن حشيش ويولي شخص منحط لكن اهو خدي بكﻻم استاد صﻻح ومادخنش افففف منك يانزار الهم اف *
نزار : وين الحويلو
اشكاب : شن تبي فيه
نزار : كلمة وقص الحويلو وين وماتكترش الرغوة
اشكاب : مانعرفش
*شد نزار اشكاب من تيشرت متعه وقاله : بتقول يااشكاب واﻻ نتصرف معاك تصرف مايسركش
اشكاب : باهي باهي … اونه ف المخزن
*رخي نزار اشكاب وشافله بتفنيصة مع قرنة حواجب ومشي ل الحويلو ف المخزن …مكان اضاءة خافتة ريحته حشيش فيه كلب ولف مربوط عاليمين كمل خطوتين القدام ونحى الستار لقي الحويلو مطبس عالطاولة ويشم ف البودرة قام راسه فجاة وقال : اووو غير من عندنا بس …الدراع اليمين للقيافة هههههه واﻻ مازال ماداركش دراعه اليمين
نزار : باختصار كلمتين وقص هات البضاعة
الحويلو : اما بضاعة يا كتكوت ياصغير انتا هههه مستغرب فيه القيافة باعتك
نزار عصر ايده : باختصار شديد وين البضاعة واﻻ
الحويلو : واﻻ شننو
نزار : واﻻ نعرف شغلي معاك
الحويلو : حق او هههه حسك خوفتني
نزار : البضاعة ؟؟؟
الحويلو : هي استنى هي …
*حط صوابعه ف فمه وصفر تصفيرتين … ويخشوا اربعة نفار *
الحويلو : دونكم ليه ياجميعا
يتبع ………
لقراءة الجزء التالي : الجزء الثاني من رواية عاصفة الصمت
للإطلاع علي فهرس اجزاء الرواية : رواية عاصفة الصمت ( جميع الاجزاء كاملة ) للكاتبة لوزة
جميع الحقوق محفوظة للكاتبة لوزة .
