الجزء التاسع عشر من رواية الزوجة التائهة بين الأحلام والواقع

هيا بنا سوياً لنبدأ قراءة الجزء التاسع عشر من الرواية الجميلة من إبداع المؤلفة كيندا بعنوان الزوجة التائهة بين الأحلام والواقع ، فهيا بنا .

الجزء التاسع عشر من رواية الزوجة التائهة بين الأحلام والواقع

احمد…. اطلعى انى فم الباب ومانبييييييش نخش اطللللعى تواااااااااا
طلعت ليلى وركبت سياره على فم ساكت وولع سياره وطلع بيها والغبره وراه وبعدين فجأه درس على جنب وقاللها…. … …..
احمد….. انتى تندرى على موضوع صفاء ؟؟؟ ردى
ليلى …. اما موضوع ؟؟؟؟
احمد…. ماتستعبطيش عليا موضوع زفته مع زفت الا تكلم فيه من هوا ؟؟؟ فهمينى ماتخلينيش نجن ؟؟
ليلى ؟؟؟ انى نحكيلك كل شى بس انت هدى اعصابك
احمد… نسمع فيك… ادوى
ليلى …. اول شى استهدى باللهى واستعود من شيطان
احمد…… اعود بالله من شيطان الرجيم … تفضلى ادوى
ليلى …. صفاء الا تكلم فيه فى اصل هوا خطيبها توا وهدا من حقها مهما انت قولت وافعلت فامن حقها انها تتعرف عليه لانا هدى حياه اكامله لا بتكملها معاه يااحمد
احمد…. علااااااااااااااااااااااش ماكلمتنيش وقالتلى من الاول انى طرطور اخر من يعلم يعنى مفروض اخلاقيا انى خوها وتجينى قبلك وانى مااضنيش انى كنت رح نقوللها لا
ليلى …. حبيبى … هيا ممكن تكون غلطت بس هيا صغيره وانت الكبير فالهدا حاول انك ماتقساش عليها وهيا جتنى انى وحكتلى لانها تعتبر فيا صديقه واخت ليها بس وتحشمت تدوى معاك بحكم فارق العمر الا بينكم بس هيا مادرت شى عيب او غلط فانتمنى انك انت تسامحها وماتقساش عليها لانا هيا على حسب كلام امه شن مازاللها شهر وبتمشى وبتخلينا فالهدا حاول ماتكسر خاطرها وينوجع خاطرها منك …
احمد….انى معاش فاهم شى … معاش فاهم شى …. قوليلى … هوا شن وصلله رقمها ؟؟؟ فهميهالى هيا … على حسب رساله الا قريتها انا هوا واخد عليها … مش شهر ولا اتنين …
ليلى …. نقولك بس توعدنى انك ماتكشخش ولاتعيط ووتفهم موضوع لانا خلاص الا صار صار …
احمد … شنى قوووولى …
ليلى …. هوا الحق …. هما كانو يكلمو فى بعض من فتره واختها نعجبت بيها وخطبوها …
احمد …. كيف يعنى … يعنى مش خطوبه تقليديه … ولاشى صح .. يعنى فيلم وضحكتو علينا كلنا صح … يعنى انى وامى طلعتولنا قرون صح جاوووووووووووبينى جاوبينى …
ليلى … احمد … موضوع مش زى ماانت فاهمه يااحمد افهمنى
…. قعد احمد يخبط على دومان ويقولها …. شن هوا الا مش فاهمه انا ….انا امى بعد عمرها هدا طلعتوها عبيطه ومش فاهمه شى وهوا جاى ويفيلم عليا فى حوشنا
ليلى …. حبيبى … انت حبيت فى حياتك صح ….هل معنى هدا انت لعبت بيها وانك مش كويس؟؟؟؟
احمد …. ماتقارنينيش بحد…. انى جيتها من الباب طول وكانو اهلها يندرو عليا نبيها ….
ليلى …. بس انتم كنتم على علاقه سنتين تقربيا وبعدها نخطبتم … لانا ظروف ماخلتكمش ترتبطو قبل وانت ماحسيتش انك غالط ولا شى …بس لما هيا حبت حب نظيف ونخطبت …. توا درتها مدايره جريمه …
احمد … افهممممممممممممى علياااااااا …. انى ماقولتش هكى بس من حقى انى نعرف وانى تعفلقة لانها درقت عليا………. انتى ماتعرفيش هيا شنى بالنسبه ليا صفاء وانى عمرى ماكشخت عليها ولا رفضتلها شى … تى انى امس برغم انا راكبتنى نار مابيتش نحط ايدى عليها ومابيتش نخلى حد يمسها ولا يتدخل برغم انا لو يندرو خوتها يشردوها …. تى هيا كسرت خشوم 6 تريس فى الحوش ياليلى ومااعتبرتهمش …
ليلى … حبيبى هما حبهم طاهر وشريف …. فاعلاش كسرت خشمكم والحب مش حرام وانى عارفتها صفاء وانت تعرف اختك كويس
وخلاص يااحمد بنت توا نخطبت وعرسها قريب فالهدا انسى كل شى وابدى معها صفحه جديده …
احمد هنا شبحلها وسكت ونزل راسه حطه على دومان وقعد يفكر شوى وبعدين قاللها ….
احمد… انى بنروح بيك وبندير مشوار مهم اوك وارقدى ماتستنينيش
ليلى …. اوك حبيبى بس توا ساعه 10 امتى بتروح 12متلا ….
احمد …. هكى شى وماتستنينيش لانى مرات نروح بعد ….
ليلى … اوك حبيبى …
… وصلو للحوش ونزلت وركبو للشقه طول فتح باب شقه وحطلها شنطه فى دار نوم وطلع وقبل مايطلع قاللها …
احمد … تبى شى
ليلى …. لالا لا حبيبى سلامتك بس خلى نديرلك شى تاكله قبل ماتطلع
احمد … لا لا توا مستعجل بعدين توا نروح ناكل شى …. سلام….
وطلع ……….وهوا طالع تلاقت امه معاه وقالتله …..احمد وليدى …. نبيك فى موضوع راهو اناس الاكلمو صفاء ردينا عليهم بالموافقه وحددو يوم الفضانيه راهو بعد غدوه بيجو رجاله …
احمد ……. توا نروح ونتفاهمو … توا عندى مشوار ضرورى … سلام
طلع احمد روكب سياره….. وطلع تلفون صفاء وخدى رقم صهيب وضرب عليه من تلفونه ولما رد عليه صهيب قاله …
احمد …. ايوااااا …. منى معاى صهيب …
احمد….. اى اى وخى منى معاى ؟؟؟
احمد …. انى احمد خو صفاء الا امس بعتلها رساله ….. لاقينى قدام فيرندا نبيك ضرورى ربع ساعه ونكون غادى …
صهيب … اوك خلاص اصلا انى قريب من غادى 10 دقايق ونكون غادى
احمد …. اوك سلام
صهيب …. سلام
مشى كل واحد منهم ووصل صهيب قبل احمد غادى من خوف وخدى طاوله وقهوه وقعمز وواول ماوصل احمد ….
احمد … سلام عليكم …
صهيب … اهلين وخى تفضل تفضل … شن تشرب قهوه ولانطلبك شى تانى
احمد…. انى مش جاى نشرب شى انى جاى بس بنقولك كلمتين … انى لانبى نفتح موضوع رسالة امس لانا لو فتحته رح تخسرنى وتخسر صفاء ولا نبى نفتح موضوع انك كدبت عليا يوم ماتلاقينا لما تقدمتولهاوقتلى مانعرفهاش ….. بس انى نبى نقولك شى …. اختى بنعطيهالك امانه فى رقبتك تصونها وتحافظ عليها وتحترمها مش تفجر بيها الحوش … وانك تاخد معاها وتعطى فى الكلام الا مفروض مايندواش الا بعد زواج نتمنى انك تشفرها وهدا مش تدخل منى بس اختى ومن حقى نخاف عليها
صهيب …. واللهى يااحمد انى نحبها هلبه ورايدها بالحلال وامى بروحها كلمت امك وحددو يوم فضانيه وانى نتمنى تكون ليا اليوم قل بكرا وانى اسف جدا على الا صار امس وانى نوعدك من بكرا انى مش رح نتكلم معاها نهائيا لحد فاتحتنا الا لو فى شى ظرورى فقط وسامحنى هلبه لانى والله انى مقدر موقفك وبارك الله فيك انك تفاهمت وضعنا وسامحنى هلبه ياوخى راهوا جيتك وكلامك فوق راسى من فوق وواللهى انى متحشم منك ومن باقى الولاد هلبه الحق
احمد …. ولايهمك خلاص … خوى توا ممكن تطلبى قهوه هههههههه
قعدو يهدرزو ويحكو احمد لما حكى مع صهيب احترمه هلبه وحس انا هوا راجل وقد مسوليه ….. بينما ليلى كانت فى وقت هوا توتى فى روحها وفى الحوش قبل مايروح احمد وبعد ماجهزت كل شى نزلت لوطه وسلمت على ام احمد هدرزت عليها شوى بعدين مشت لى صفاء وقالتلها …
ليلى …. اسمعى بكرا ضرورى تجينى فوق نبيك ظرورى ومانقدرش نهدرز معاك اكتر من هكى لانا خايفه احمد يخش ويلاقانى مهم عصام وين توا ؟؟؟
صفاء….. تلقيه فى مربوعه .مقعمز يقلب فى تاب متعه ….
مشت ليلى لى عصام وطقطقت على باب وخشت وبعدين قاللها
عصام …. منى ..
ليلى …. عصام انى انى ليلى نخش …
عصام ….. خشى خشى …. اهلين ليلى شن اخبارك توا
ليلى … تمام عصام … باللهى عليك وخى جبت التورته الا قوتلك عليها …. على خاطر عيد ميلاد احمد
عصام ….. ايه ايه وخيتى تلاقيها فى فريز الكبير الا فى المخزن … جبتهالك من النحله غير دللى بس ياوخيتى
ليلى …. صحيت بارك الله فيك بكم خديتها ؟.؟
عصام …. عيب عاد ياليلى نحرج منك انى زى خوك ….. ومره هادى خليها عليا ياسيدى ماشى ههههههههه
ركبت ليلى فوق وحطت تورته فى تلاجه واتصلت بيه …
ليلى … اه حبيبى وينك مازال
احمد …. لا لا .. اهو جاى هيا شوى بس وطالع
.. ليلى … اوك نستنى فيك حبيبى ….
… خدت ليلى الشمع ولعاته فى صاله وفى دار نوم وحطت العشى والتورته على طاوله وبخة برفان الا يحبه احمد عليها فى الحوش كله وقعدت تستنى لحد ماشافت من روشن سيارته فامشت تجرى طول وطلعت تورته من تلاجه وحطتها وطفت ضى ووقفة ورا الباب واول مانفتح الباب شغلت موسيقا بريموت على موسيقا فرنساويه هاديه فيها اصوات موج البحر اكتر من صوت موسيقا وغمضتله عيونه وبعدها دخلاته لصاله وقالته كل عام وانت حبيبى |.|.. كل سنه وانت معاى … يااحلى راجل فى دنيا … يالى حلمت طول عمرى انى نوض وهوا جنبى ونرقد وهوا معاى ولو ماحلمتش بيه مش رح يكون كل يوم ليا حلو يااحلى شى فى عمرى انت …. وبعدها خداته وقعدو يرقصو شوى وفى اتناء رقصهم قاللها …
احمد …. ليلى ….. شن فى صونيه هديكا الا على طاوله؟؟؟؟
ليلى ……… هههههههههههه حتى وانت ترقص تفكر فى بطنك ههه نحسابك تشبحلى وانت عيونك معلقات فى صونيه الا وراى
احمد ….. هههههههههههه بنموت من جوع الله غالب بس انتى تهببببلى انتى وحركاتك مهبوله ههههههه وبعدين توا تشوفى هبالى على اصوله …
ليلى …. اوك حبيبى ههههههه … توا ساعه 12 تعالى نطفو شموعك قبل بعدين نتعشو مع بعض
احمد …. اوك حبيبتى ….
ليلى …. سنه حلوووووه ياجميل سنه حلوه سنه حلووووه سنه حلوه ياحمودى …. يالا حالا بالا كالا حيو ابو بصل حيكون عيد ميلادو الليله اجمل الاعياد فاليحيا ابو بصل ههههههههه اووووووووووف
… كل سنه وانت حبيبى يااحلى شيبانى فى دنيا اليوم بس خشيت 31 سنه وان شالله بطول العمر عليك….. بعدين تعشو وقامو المعايين فى حوض ووهيا كيف يتقيم باقى معايين قامها فى غمره وخش بيها لدار نوم وقاللها …
احمد ….. ليلى ليلتك ياجميل …. هههههههه عندى موضوع ليا مده نبى نهدرزه معاك فى دار وانتى مصكره دماغك عليه وباين يوم بس بينحل هههههه …. وصكر الباب برجله وخشو ومشو وفى خبر كانا لحد ساعه 9صبح فاقو على صوت تلفون احمد…. فاليلى شافت لى احمد وقالتله
ليلى …. تلفونك يشرين حبيبى …
احمد … ساعه كم توا ….
ليلى …. ساعه 9 حبيبى

احمد ….. شنى تقولى شنى ساعه 9 حى على امى حى عندى اجتماع يبدا ساعه 9
ليلى …. احمد تلفونك هاك
احمد …. الووو .. من معاى
سكرتيره …. اهلين باش مهندس … انى سكرتيرتك وحبيت نسالك بتجى للاجتماع اولا لانك لحد توا ماجتش …
احمد … اووك اوك اهو جاى فى طريق … سلام ….. وصكر تلفون وناض وهوا هارب عليه ضى ومتفاجئ بااتصالها .
ليلى …. منى الا كانت تكلم فيك كانى سمعت صوت بنت صح ؟؟؟؟
احمد ….. هادى سكرتيره تسال على موعد الاجتماع شن بيصير فيه …. وبعدين انتى من امتى تسالى ولا تتدخلى فى مكالماتى وشغلى انى من قبل نقولك خدمتى خط احمر …. ونوضى بسرعه ديرلى قهوه بسرعه لبين ماوتيت روحى
…. قعدت تشبحله ليلى وهيا مصدومه ومش فاهمه شى بعدين طلعت دارتله قهوه وقعدت تفكر فى داخلها وتقول من هادى الا ااول مره نعرف انها تكلم فيه وعلاش هيا اتصلت بيه تحديدا وهيا تفكر فاجت القهوه منها فا قامت سزوة القهوه فيسع وصبتها فى فنجان وطلعت ولما طلعت لاقاته طلع وسكر باب وراه من غير حتى ما يقولها تبى شى فا هنى عقالها قعد يدور ويدور وقعدت تضم فى حوش وهيا مش حاسه بنفسها نهائيا وعقلها فى عالم تانى وحست حاجه مقعمزه على قلبها وتقولها انا بنت هيا وراها شى << حاسه سابعه عند كل نساء >> طبعا وهدا الا حست بيه وقعدت تلود فى حوش وتضم بعدين تجى حاجه تغصلها قلبها تخليها مضايقه لاارديا ومافاقتش من تفكيرها الا على صوت الباب يطقطق …
ليلى .. منى ؟؟؟
صفاء … انى انى ياليلى افتحيلى …
ليلى … تفضلى صفاء خشى مرحبتين بيك … ههههه شن اخبارك بعد عملة امس ههههه
صفاء …. اسكتى ساكته …. غير تعالى نحكيلك شن صار تعالى …
ليلى …. استنى شوى نصبلك عصير وتورته ونجيك ….
صفاء …. انى مش برانيه ليلى اهو تو نخش معاك مطبخ وانتى كملى تطيب غداك اصلا نبيك فى موضوع طووويل فاكملى تطيب وانى نساعدك ونحكىلك هههههه
ليلى …. اوك هيا نوضى هيا
ناضو وحطتلها تورته وكاس العصير على طاوله وبعدها ليلى قعدت تطيب وصفاء تقرض فى سلاطه ويهدرزو كل واحده شن صار معاها بالتفصيل وبعد ماكملو كل وحده شن صار معاها قالتلها…..
ليلى ….. ههههههه انتى عرفتى انا احمد كان امس معاه كانا انى مانندريش
صفاء …. امس فى ليل موخر بعد مارقد عصام وتعرفيه انتى كانا رقد زى ميت هههههه خديت تلفونه وخشيت للحمام واتصلت بى صهيب نعرف منه شن صار فاحكلى شن صار فى الاول ولما تلقو واحمد شكله بيسامحنى ياليلى ههههههه الحمد لله ياربى غمه ونزاحت من على صدرى هدا وين بنحس براحه وبنحس بى فضانيه ههههههه الحمد لله ياربى …
ليلى … الحمد لله … بس قوليلى وتيتو حاجات فضانيه او لا لى بكرا
صفاء …. امى اليوم بتطلع مع عصام وانى بنطلع معاها باش ناخدو حاجات وهيا مش كبيره بوه وخواله وعمه بس وخوتى الولاد وخالى كبير وصغير وخلاص
ليلى …. باهى الحمد لله معناها بكرا ان شالله توا نجى نساعدكم
صفاء …. لا لا صحيتى انتى مافيك طميعه هههههههه اهم شى خلى بالك من ولى عهد بس متعنا … خلاص انى بننزل قبل ماامى تبدا فى سفونية عبد الحليم حفاظ … ههههههههه ونهايتها بعون الله << سبه ودفله وشحت شعر >> بس عادى اهم شى ركبتلك وعرفت منك وخلينى على مقولةشيرين هههههههههه لاوم اعيش
ليلى …. خلاص حبيبتى ربى يوفقكم ان شالله يارب ويخليه من نصيبك واللهى فرحتلك هلبه زى وخيتى
صفاء …. حتى انى نموووت فيك يامعفنه اعطينى بوسه من هالخديدات الحلوات هما امووووووووه هههههههه خلاص باى توا قبل عقيد الا لوطا ينادى ههههه سلام
ليلى …. سلام حبيبتى واجبدى الباب وراك
طلعت وكملت ليلى الغدى وبعدها خشت دوشت وصلت ظهر وقعمزت على صالون وقعدت تتفرج وتقلب لحد صلاة مغرب وهيا تشبح للباب على امل انا احمد يخش وتستنى ساعه ورا ساعه لحد ما نعسها نوم وناضت على حاجه تخربش فيها على خشها ولما فتحت عيونها لقت احمد فا ناضت غمراته وقتله استاحشتك حبيبى علاش تأخرة ساعه كم توا …
احمد …. ساعه .. 10 حبيبتى ….
ليلى…… نسخنلك شى تاكله
احمد …. لا لا جبت عشى معاى فى دار تعالى تعالى نتعشو والله يفوتك نص عمرك ههههههه
احلى دجاجها محمره ههههههههه
ليلى .. تتسهوك انت
احمد …. عمرى تسهوكت عليك غير تعالى تعالى وخشت وخش وصكر الباب وراه ومش وفى خبر كانا لحد صبح ….. وصبح ناض احمد من غير مايفيقها وكتبلها رساله قبل مايطلع وقاللها …
ليلى حبيتى انى بنطلع لشركه شوى وبنروح عصر باش نحضر فضانيه فا ماتعبيش روحك وتطيبى شى وكانا حسيتى روح كويسه انزلى وهدرزى على امى لوطه ماشى …. امووووووووووه
…. ناضت ليلى من نوم وغسلت وجهها وبدت تضم فى حوش وهيا تضم لقت رساله على شكماجه قرتها وبعدها حطتها وطبست لى سرير يتاوسيه بس وهيا تنواسى فى مخده لقيت تلفون احمد نساه فاقاماته تبى تحطه على شكماجه وصلت رساله من رقم غريب فافتحت رساله و ……….

يتبع…..

لقراءة الجزء التالي : الجزء العشرون من رواية الزوجة التائهة بين الأحلام والواقع

لقراءة الجزء السابق : الجزء الثامن عشر من رواية الزوجة التائهة بين الأحلام والواقع

للإطلاع علي فهرس اجزاء الرواية : جميع الأجزاء كاملة لرواية الزوجة التائهة بين الأحلام والواقع

جميع الحقوق محفوظة للكاتبة كيندا من ليبيا .