الجزء التاسع من رواية إمرأة بلا هوية

وفي الجزء التاسع من رواية إمرأة بلا هوية دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة بت محمد جمال الدين .

الجزء التاسع من رواية إمرأة بلا هوية

رهف وشها بقي احمر من الغضب وقالت ليها بعد وقفت: اذا سمحتي م تجيبي سيره حبوبه وراعي لي حرمه انها ميته وانا م عايزه منكم حاجه انتو الضيعتو حقي بعد عرفتو اني حامل ب ولد،،،وم معروف عملتو لي شنو في الاكل لانو بعد طلعت منكم مباشره جاني الم والجنين سقط ،،،، م علينا،،، لما جيت كنت عايزه شهاده الوفاه،، بس خلاص م عايزه منكم حاجه بعرف استخرجا كيف ،،،،
كريم فضل متنح في رهف وهي بتتكلم مع المرأه واول م طلعو سألها في حيره : كيف عرفتي المعلومات دي ؟
رهف في فتور : لما عاينت للبيت حسيت اني بعرفو وبعد جات بت المرحوم اتذكرت موقف انا كنت حامل وكراهيتهم الشديده لي واتذكرت اخر مره عزمونا غدا والمرحوم فرح شديد وقال لي اولادي عازمننا وقلبي كان مقبوض بس مشيت لانو حسيت بالفرحه في عيونه،، ومنهم للمستشفي وبعدها المرحوم اتوفي وخسرت ولدي ،،،
خطاب جا عليهم بالعربيه وكريم استأذن ومشي ،،، رهف حكت لي خطاب اي حاجه وقال ليها : ولا يهمك عندي صحبي ضابط كبير بخدمني في اوراقك دي كلها ،،،،
رهف : بس كأنك م فرحت ب التحسن الحصل لي دا ؟ 
خطاب : معقوله يا عمري ؟ انا لو بي يدي اشيل ذاكرتي دي واختها ليك يا حبيبه قلبي  انتي م عارفه مكانتك شنو يا انا 
رهف : تسلم يارب
خطاب : سنفورتي 
رهف في احتجاج : عليك الله انا قصيره للدرجه دي ؟ 
خطاب : انا عاجباني كدا 
رهف : يعني قصيره 
خطاب : بحبك وبموت في بحه صوتك 
رهف : انت خلاص قربت تجن
خطاب : معذور وحياتك  منو البقدر يصمد قدام الجمال دا ؟
رهف في تهرب : يلا نمشي الصيدليه اتأخرت انا…..
خطاب تلفونو رن عاين للشاشه وقال : اوووف كل م اكون سعيد وفي حلم تجي
ميناس وتصحيني علي كابوس ،،،، فتح الخط : اهلين ميناس
ميناس : م عايزه اطول عليك ،،،،، انت عندك حق مفروض م نتخلي عن رهف،،،، انا وامي وافقنا انها تجي تعيش معانا معززه مكرمه،،،، عشان تعرف انا بقدرك كيف ي ابو محمد  واذا عايزه اجي اعتذر ليها م عندي مانع ،،،،
خطاب قفل وراسو يودي ويجيب  ياربي القيامة عايزه تقوم ولا شنو ؟ ولا دا مخطط من ميناس؟؟؟
رهف لاحظت شروده وقالت : خير في حاجه حصلت ؟
خطاب حكي ليها بالموضوع كله واحتارت شديد بس قال ليها الخيار عندك
اذا حبيتي تمشي انا م عندي مانع واي قرار انا معاك ،،،،
رهف في حيره : انا بفضل البعد عشان م تكون في مشكله ،،،،
خطاب : يبقي خلاص اوك يلا نمشي الصيدليه ،،،

استلمت رهف شغلها في الصيدليه ونبيل بشرح ليها وبوضح ليها الحاجات الصعبه ،،،،،
نبيل : ح اجيب قهوه اجيب ليك معاي ؟
رهف : ياريييت 
طلع نبيل وفي الطريق قابل ميناس سلم عليها في حراره وسألتو عن رهف ومشي يوصي على القهوه ،،،،
رهف شهقت لما شافت ميناس كانت لابسه فستان كاكاوي جميل ومطقمه ليه ب انناسي وكانت في قمه روعتها وجمالها ،،،، وقفت قداما في الكاونتر وسلمت عليها وقالت : خطاب قال لي انتي هنا ،،،،حبيت اجي بي نفسي اعتذر ليك واعزمك تجي تسكني معانا 
رهف عايزه ترد بس هي قاطعتها وهي ماشه علي الباب : منتظراك المساء يلا بااااي 
قابلها نبيل في الباب وقال : بدري ي مدام القهوة!!
ميناس في ابتسامة : شكرا دكتور نبيل،،،، مره تانيه 
رهف جسمها اتصبب عرق ودا خلي نبيل يقول ليها في قلق : رهف ،،،، خير حاسه ب حاجه ؟
رهف : لا بس حبه تعب بعد اشرب القهوه ببقي كويسه 
نبيل : ميناس نادر م تزورنا في الصيدليه
رهف : انت بتعرفها كويس ؟
نبيل في شرود : موش بالضبط،،،،، بس اذا اشتغلت بت في الصيدليه وبالذات لو كانت جميله جدا زياراتها بتكتر
رهف : هي كمان جميله جدا وانيقه
نبيل : خطاب وسيم جدا وشخصيه وجنتل مان وهي بتخاف عليه شديد بعدين مكافح وبحب الشغل ورجل اعمال ناجح وكمان لطيف وحباب يعني بصراحه الله يكون في عون مرته 
رهف سكتت ونبيل براقبا من بعيد في اعجاب لحدي م جات الاء من مشوارها وقالت ليهم وهي بتضحك : اوعك ي رهف تكوني حبيتي بلبل حبيبي دا ؟
نبيل في احتجاج : حبيبك منو دا ؟ اوع يكون انا ؟
رهف : هههههههه والله انتو عسل وانا سعيده اني معاكم عموما ي ستي اطمني ،،،،
نبيل همس لي الاء : خلاص جيتي ي فقر
الاء وهي بتضحك : اتخيلي ي هوفا نبيل م كان عايزني اجي بسرعه رغم اني غبت كتير 
رهف : هههههه معقوله ياخ والله المكان من غيرك موحش ،،،
الاء وهي بتعاين لي نبيل : شفت الناس البتقدر 
فجأه جات نهي اخت نبيل ومعاها ريان بت خالتها العايشه معاهم في البيت ،،،،
الكل رحب بيهم الا نبيل اضايق جدا لما شاف ريان وقال ليها بدون م يشعر : جيتي بتين انتي ؟ 
نهي حاولت تلطف الجو بعد شافت الضيق واضح علي اخوها : ريان اتصلت قالت يجي زول يجيبا من بيت عمها وانت بترجع متأخر بالليل قلت افضل اجي اجيبا انا وبالمره نغشي نسلم عليك وعلي الويه ونعزم نفسنا آيس كريم 
الاء : هلا هلا شرفتو والله ،،،
اتلفتت علي رهف وقالت : دي رهف موظفه جديده معانا ما
سكه قسم التجميل
رهف في رقه : اهلين 
الاء واصلت التعريف : نهي اخت نبيل ،،، اولي صيدله ،،، اما دي ريان بت خالتهم وعايشه معاهم في بيت واحد ،
رهف : اها  اتشرفت بمعرفتكم
الاء عاينت للساعه وقالت : نبيل ممكن تمشي عادي انا موجوده ومعاي رهف
نبيل : م حذريتي!!!! رهف معزومه معانا اصلا المحل قريب ،،،،
رهف : آسفه مره تا
قاطعتها نهي : عليك الله امشي معانا م بنأخرك 
ريان عاينت ليهم في ضيق واتلبشت وطلعت بره انتظرتهم…
بعد اصرار وافقت رهف تمشي معاهم ،،، نبيل طلب ليهم ترحال وهو ركب الموتر ووصل قبلهم محل الآيس كريم ،،،
بعد طلعو مباشره خطاب جا الصيدليه وانزعج جدا لما عرف انو رهف مشت معاهم رغم انو حاول يخفي انفعاله الا انو كان واضح جدا ،،،،،
بعد حوالي ربع ساعه خطاب اتصل بيها في ضيق : لسه عليك شويه ؟
رهف : انت جيت؟؟ آسفه م قدرت ارفض الدعوة لكن مسافه السكه واكون معاك ،،،،
خطاب قفل بدون م يقول شي وفضل داخل ومارق لحدي م رهف جات مع نبيل في الموتر ،،،،
خطاب غضب جدا وكتم غيظه وحاول يكون عادي بس رهف حست بيهو وطلعو علي طول ،،، وطول الطريق تعتذر وحتي م اتناقشت معاه في موضوع رجوعها البيت وهو بدون م يسألها وداها بيته طوالي وضغط على الجرس وجات هيلين عشان تفتح وهي بتفحص في رهف من فوق لي تحت وقبل م تقعد جات ميناس متشيكه اخر شياكه وسلمت وقعدت جنب رهف وهي عاديه جدا وبعدها قالت : من الليله دي،،،، اعتبري دا بيتك ،،، وانا اختك الكبيره ،،،،
————————————–
———————
*☆إمتناني *
*☆بت محمد جمال الدين☆*
*☆يتبــــــــــــــــــــــــــــــــــــــــــــع☆*

لقراءة الجزء التالي : الجزء العاشر من رواية إمرأة بلا هوية

لقراءة الجزء السابق : الجزء الثامن من رواية إمرأة بلا هوية

للإطلاع علي فهرس أجزاء الرواية : رواية إمرأة بلا هوية ( جميع الأجزاء كاملة ) للكاتبة بت محمد جمال الدين

جميع الحقوق محفوظة للكاتبة بت محمد جمال الدين