الجزء التاسع من رواية الحلال والحرام

بعد 4 أيام /

ملك : طالعه تجنني يا نور لما اتشوفك ام هيثم توا تحبك

نور : خايفه اشويه زعما يحكيلهم يلي صار معايا بالضبط

ملك : لا ما اعتقدش وهو يحبك ويبي يتزوجك ويستر عليكي يعني مستحيل ايقولها مرات يرفضو لو علموهااا

نور : خايفه مش عارفه ليش والله وتوا الوقت يجري وهيثم مزال ما جاب امه مع ان اليوم الموعد يلي عطاه لخالي مفتاح وشافت الساعه لقتها حوالي 6 نزلو دموعها

ملك : ياعمري شنو صايرلك عليش الخوف هضا واكيد توا يجو ما تخافيش وبحتت في باب الغرفه يدق : من ؟؟

مفتاح : انا افتحيلي وكان واضح صوته ان في حاجه

عدت ملك فتحتله خش وكانت معاه فاطمه وزوجته

نور بحتت فيهم ونزلت راسها حست ان في حااجه توجع

مفتاح قمعز جنبها ومسك يدها : انا حانقولك شنو صار بس نبيكي تكوني قويه وما تزعليش اتصل بيا هيثم توا وكان واضح ان زعلان ومضايق لان عمه بالغصب طلب منه عنوان السكن عشان يسأل عليك ولما رفض هيثم يعطيه تأكد من ردت فعله ان في شي ما يبيه يعرفه وقعد يفتن لخوه يلي خرب علي ولده ان مافيش خطبه الا لو عطاهم العنوان وبعد عطاه لهم عدو سألو عليك الجيران واصحاب المحلات ومع الاسف الشديد حكو علي عيوبك قبل ميزاتك ورفضو يجو يطلبوك لهيثم بس هو جاي في الطريق ويبي يطلبك بروحه بدون عيلته

نور نزلو دموعها وقعدت تبكي : ليش ما سمع كلامهم وخلاني مافيش داعي يطلبني انا وحده سيئه اصلا

مفتاح : ما اتقوليش هكي والراجل ناوي الحلال وانا معاه مش ضده ويلي يدير فيه هو الصح لكن عيلته غلطانه وانتي وافقي يا بنتي بالنسبه ليا حانوافق عليه حتى لو بمهر قليل لأنك غاليه بس فجأه صبت وبحتت فيهم وهي تمسح في دموعها : خلاص يا خالي دابينه ناوي يطلبني قوله يستعجل في العرس بسرعه والوقيه ما نبيها نبي مصحف شريف وسبحه لانهم غاليات عندي مش الذهب

وقتها زغرتت امها وغزاله وملك يلي فرحو بموافقتهااا

مفتاح ابتسم : مبروك وفعلا المصحف والسبحه غاليات وانا واجد فرحتلكم شكله جاه الباب يدق وعدا فتحله لقاه مصبي عند الباب وجايب معاه صاحبه ووالد صاحبه بس ابتسم علي تصرفات هيثم يلي كان متحشم بكل وبهدوء قال : السلام عليكم وانا اسف والله متحشم منك والله يسامح عمي خرب عليا ماتوقعت يطلب العنوان عشان يسأل عليها ونزل راسه والحزن واكله

مفتاح : ما تزعلش وارفع راسك فوق انت مش غلطان ويلي ادير فيه كبير ومايديره الا الراجل عطاه كلمه وما طنشها ويبي الحلال خشو تفضلو ومرحبتين بيكم نورتو

وتفاجئء بعد عرف علي نفسه والد صاحب هيثم لما خشو للمربوعه : انا بأذن الله حاندير المستحيل عشان هيثم يتصالح مع عيلته وهو مش غلطان وحانعرفك علي نفسي انا اسمي الشيخ محمود وهضا ولدي اسلام ويلي معرفنا عالشاب هيثم هو بنتي صاحبة اخته وهو كويس وما شاء الله عليه معتبره ولدي زي اسلام ويلي داره هيثم ما يديره الا الراجل وهضا وعد مني حتى لو جبت شيوخ المدينه كلها علي حوش عيلة هيثم حايقتنعو والبنت تغيرت هضا يلي حكاه بس الناس الله يصلحهم يحبو يقولو العيوب وماستروش عالبنت وان شاء الله خير

مفتاح : بصراحه انا ليا الشرف اني نحكي معاك توا وربي يحفظك كلامك مسك وجواهر وبارك الله فيك يا شيخي

محمود : فيك بارك الله وهضا هيثم تعرفه وسألت عليه زي ما قالي وانا قتلك معتبره ولدي فعشان هكي بنت اختك الكريمه حانطلبوها له ويلي تطلبوها حاضرين فيها

مفتاح ابتسم وبحت في هيثم : الانسان يلي جبته اليوم لحوش نور شاهد علي كلامي هو وولده وبحت في الشيخ محمود وهو يبتسم : انا وياها موافقين بس نور طالبه مصحف شريف وسبحه بدل الذهب وبالنسبه للمهر والكسوه نحنا موافقين علي كل شي أتجيبوه لهااا

هيثم مصدوم : بس يا عمي من حقها نور تاخد الوقيه

الشيخ : يا هيثم يلي حكاته نور ما اديره الا بنت الاصول ربي يحفظها ويبارك فيها ونادرا يلي تطلب مصحف الحق

مفتاح : أنا عجبتني فيها واجد وان شاء الله الف مبروك

هيثم ابتسم : كسوة نور 4000 والمهر أمتعها 5000 والمأخر 20 وقيه ونور يا عمي غاليه واجد حانجيبلها طاقم ذهب مع المصحف وهضا قراري بدون ترااجع

مفتاح : بس هضا واجد وانت تشتغل علي تاكسي !!

هيثم بأبتسامه : حتى لو كان عندي تاكسي بس انا عندي ومش ناقصني شي وسيارة تاكسي لان انحبها وبسس

الشيخ : مزبوط هيثم يحب يسوق التاكسي وعنده ذكريات واجد معاها السياره هذي وهو عمره 33 سنه

مفتاح : اها سألت عليه بس ما حكوليش عن وضعه بكل قعدو يشكرو فيه وهضا يلي يهمني هو سمعته يلي مسك

اسلام اول مره يحكي : اول شي فرحتلك يا هيثم وان شاء الله ألف مبروك ربي يسعدك ويحنن قلب عيلتك وتاني شي نحنا فرحانين واجد عشان تعرفنا عليك يا عمي مفتاح راجل طيب واصيل ونادرا لو شفناا زيك

مفتاح : بارك الله فيك وربي يحفظك وعقبالك تتزوج

الشيخ : ناويها بأذن الله غار البنت مختفيه لها كم يوم ترجا فيها بنتي عشان تحكي معاها لكن ماعش جات وبأذن الله بكرا لو ماجتش حاتمشيلهم في الحوش

مفتاح : باهي ما شاء الله مبروك وان شاء الله كويسين

الشيخ : لما وصفلي اسلام العنوان اذكرته الراجل هضاا هما يسكنو اقريب واجد من حوشي ومسكين عنده ولده مصاب بفايروس الايدز مش قادر يرفع راسه برا لكن انا مستحيل نرفض خطبة ولدي من بنته عشان الخبر هضا خاصة ان البنت سمعتها مسك وهي اصلا ما تطلعش من الحوش بكل مانعها باتها الله يهديه انها تقرا وتتعلم بس وافق في الاواني الاخيره انها تقرا في الخلوه في الجامع وشافها اسلام وعجباته البنت وقال نبيها ويبي الحلال

مفتاح : لا حول ولا قوة الا بالله ربي يصبره مسكين ومزبوط البنت ما ذنبها شيء ويلي غالط خوها مش هي

اسلام : كلامك درر وانا راضي والحمدلله عالنصيب الحلو

هيثم ابتسمله علي كلمته وهمسله : شكلك فرحان بكل

اسلام : طاير من الفرحه وان شاء الله خير عندهم مختفيه هي وامها ماعدوش للجامع والله مشغول عليهم

هيثم : لو في حاجه صايره راه سمعتها مش قلتو يسكنو اقريب منكم يعني ما اتخافش وان شاء الله خير

اسلام : يارب وتوا خلينا فيك يا عريس وغمزله

لجين تبكي مزالت وحالتها حاله خشت عليها امها وقربت منها : يا بنتي حرام يلي اديري فيه تبيني نخسرك حتى انتي والله حيلي انهد وانتي لا تبي تاكلي ولا تشربي ولا شي حابسه روحك وتبكي ذبحتيني معاك والله بصعوبه متحمله يلي صاير وموت مايا قتلني لكن عايشه

لجين بصوت رايح ويوجع : أنا السبب في موتها انا حقيره

زينب : ماعش اتقولي هكي انتي مالكش ذنب في شي هضا عمرها هي عنيده وحاتقعد طول عمرها عنيده بنتي ونعرفها كويس ومستحيل تتغير ولا تمشي صح حاتقعد طريقها عوجه وتغلط مليون غلط انا عارفه ان صعب علينا يلي صار وفراقها يقتل قتل بس هي تريحت وانا والله مسامحتها ادعيلها بدل ما تبكي ادعي ربي يغفرلها ذنوبهاا واغلاطهااا هيا سلم بنتي صبي وتوضي وصلي وادعيلها من كل قلبك وكولي حرام عليك حقي حالتك ووجهك الاصفر لعند امتى تبي تقعدي هكي ارحميني والله تعبانه انا ام يا لجين توا تتحسني وان شاء الله تتزوجي وتعرفي شنو يعني ام وادبالك تنسي اختك لما تجيبي بنت سميها مايا وما تعاوديش نفس غلطتي انا وباتك يلي خلت مايا انسانه تانيه تغيرت واجد من طفله لبنت متفتحه علي كل شي وتبي ادير حاجه مع انها عارفه الصح من الغلط وعارفه الحلال من الحرام بس مع الاسف قعدت مستسلمه يلي اتحس بيه وتبي تغلط وتقعد مستمره في غلطها وانا نبيك اديري بالك انتي توا عمرك 20 سنه مزلتي صغيره وقدامك عمر ان شاء الله تتحسني ونفرحو بيكي ومايا في قلوبنا عايشه ومش حاتطلع ابداااا واطفالك علميهم الصح من الغلط كويس حفظيهم كتاب ربي وكوني زي ما كنتي قبل ماتموت اختك راه حالتك ذابحتني انا وباتك يلي بالأيش طلقاته الحكومه الأمريكيه بعد خدت بيناته كلهم ووصلتهم للحكومه الليبيه تعاطفو معاه ويلي فيه امكفيه اكيد خاصة بعد عديت وانهرت قدامهم وما خليتهم يحبسوه صدقيني باتك لو حبسوه حاندمرو كلنا صعب يا بنتي البنت تقعد بدون سند وهضا باتك يلي ايدير في المستحيل عشانك توا والله مزال زعلان ومضايق علي مايا وما كان قصده ان يقتلها عصب واجد منها ومن كلامها وربي يسامحهااا

لجين مسحت دموعها وحضنت امها يلي تحكي وهي تبكي وكانت منهاره وحالتها حاله حضنتها وبكت اخراا معاها وماقدرتش تنسى يلي صار وموت مايا ذابحهااا

ملك بحتت في نور وهي فرحانه : يا بنت تعرفي هيثم هضا يطلع خوه من ؟ عارفه البنات يلي حكيتلك عليهم نرجس ونسرين ووفاء خلاص هيثم اخته هي وفاء توا حكتلي ان خوها يبي بنت ولما حكتلي يلي صار بالضبط عرفت دغري ان هضا هيثم خاصة ان نسرين حكتلها علي جيت هيثم لعندهم وقعد في المربوعه مع باتها الشيخ وخوها اسلام وتوا قاعدين عندك ويحكو بسيرتك واكيد حايديرو المستحيل عشان الصلحه بين هيثم وعيلته

نور بعد سمعت يلي حكاته ملك في البدايه انصدمت ان هيثم طلع خوه صاحبة ملك ولكن اخر شي حكاته ملك تمناته يصير لان صعب عليها تتحمل زعل عيلته لولدهم وبسببها نزلو دموعها : ان شاء الله خير ويتصالحوو

ملك : ما اتخافيش حايتصالحو اطمني انتي وحضنتهااا

في اليوم التاني في الجامعه /

نسرين : حكاه باتي وخويا وبأذن الله يا ملك حايديرو المستحيل عشان يتصالح هيثم مع عيلته ويرضو بالبنت

ملك : صدقيني يا وفاء نور كويسه والجيران الله يهديهم حكوه علي عيوبها وتوا نحكيلكم قصتها كلها وبدت تحكيلهم علي نور وشنو صار معاها الا قصة الاغتصاب

وفاء وجعتها : مسكينه معقوله باتها قاسي هكي معاها

نرجس : هضا شي يصدق فعلا في رجاله مايحبوش بنات ويبو زوجتهم اتجيب ذكوره والرسول وصى عليهم لكن من يفهم يا بنات الرجاله عطبو حال بناتهم وخواتهم من ظلم وحبس واهانات وفاهمين الدين غلط زي البنت يلي يبيها خوك يا نسرين باتها وخوها حارمينها من دراسه

ملك انصدمت : معقوله للهدرجه توصل ربي يهديهم

وفاء : حرموها من القرايه عكس والد نور خلاها تقرا بس دمرهااا المهم انها تغيرت بعد صالحت امهاا المسكينه

وطبعا ملك سترت علي موضوع اغتصابها وحكت انها تغيرت بعد تصالحت مع امهاااا فقط ونور ماتبيش تسمع سيرة الاغتصاب يلي لعند هاللحظه مش ناسيته

رغد لها كم يوم في الحوش ما طلعتش ومهتمه بأمها يلي تعبانه واجد من قصة ولدها فتحي وزادت عليها كرعها بس تحسنت ونفسيتها ادمرت بعد شافت فتحي يلي قعد يبكي وحالته حاله وماقدرتش تنسى كلمته : مانبيش نموت يا امي سامحيني بس انا مانبيش انموووت

خش عليها نجم يلي توا الوقت غيرتله رغد الشاش واللصقه علي جرحه واهتمت بجرحه واجد وبادي يتحسن بحت فيها : هو ما يستاهل اديري في روحك هكي

فتحيه : هضا ولدي قطعه مني تبيني نفرح وهو يموت

نجم : ما قتلك افرحي بس حرام يلي اديري فيه

فتحيه : ماتحرمنيش منه خليني انشوفه ديما وانت شوفه وسامحه يبي رضاك عليه حرام عليك هضا ولدك في الاخير سامحه يلي فيه امكفيه لو تشوف حالته توجع

نجم تنهد : المره الجايه حانشوفه ونحكي معاه قبلك

فتحيه : بس ماتزعلش حرام زعلان ومضايق بروحه

نجم : لا مش حانزعله والمهم انا موصي ولد خويا علاء عالقطوسه قال نعرف صاحبي وعنده قطط يربي فيهم وحايكلمه ايجيبها اليوم لعندنا وانا نبيها هديه لرغد وادبالك تحكيلها عليها وماترفضيش وجودها هنا لان غلطنا زمان واجد وانا حكيت مع الشيخ بالموضوع هضا والقطط مش نجس ووجودهم في الحوش بركه ونعمه

فتحيه اذكرت يلي دراته في بنتها أول ما أتشوف القطوسه معاها نزلو دموعها : زمان غلطنا واجد حتى نحنا وانت قتلت القطوسه والنتيجه شوف ولدنا غلط وحايموت قدام أعيونه وبنتنا حرمناها من حاجات واجد واي شي تبيه لا مافيش حتى تليفون ما عندهاا ولا في صديقه تحكي معاها وهضا كله ما شكت ولا حكت رغد صابره ومتحمله وولدنا عايش حياته بالطول والعرض وغلط ونهايته الموت العلاج هنا بلهون ونحنا مش قادرين انديرو شي وقعدت تبكي وحالتها حاله : ياربي ساامحنااا

رغد سمعت امها تبكي طلعت من الكوجينه كانت اطيب في الغداء بس سمعت دق الباب نادت باتها : الباب يدق يا باتي جاها صوته من بعيد : ماتفتحيش توا نفتح انا وصبا دغري واعيونه عالباب خطم من جنبها وقبل ما يفتح الباب بحت فيها : في حاجه وراه الباب خليكي هنااا

رغد استغربت وهو فتح الباب وطلع سلم عالراجل وشاف البوكس الملون فيه قطه بيضه نوعها شيرازي وأعيونها جميله زرقه : شكرا عالتوصيله بارك الله فيك وكم خدمة التوصيل وسعر القطوسه علي كم وبحت فيها اخرا

رد : ولو يا عمي مستحيل ناخد منك شي وبالنسبه للقطه تبني هذي مش للبيع لان حرام بيع القطط اهم شي ديرو بالكم عليها وهي هاديه عمرها 5 شهور والكيس هضا في داري فود امتعها حبوب تاكل فيهم وتحبهم وبالنسبه لطعام الحوش تاكل في الدجاج المطبوخ مع البطاطا والكوسه تسدها يومين الطنجره وتاكل حتى في الدحي المطبوخ وأسمها مكتوب في القلاده علي رقبتها تيلا

نجم هز راسه وابتسم : تمام شكرا وبارك الله فيك في ميزان حسناتك وخداه الكيس منه : باهي بكم الطعام هضا والصندوق يلي قاعده فيه القطوسه اكيد بفلوس

رد : ياعمي قتلك مانبيش منك شي عيب هالكلام وعلاء خويا مش بس صاحبي وانا لازم نمشي توا وبحت في البوكس واشر لتيلا باي تيلا وعدا وهو يبتسم ويلي طلب منه ايجي يسلم القطوسه بنفسه هو رفيقه علاء كان مشغول واجد اليوم وعمه نجم يبي القطوسه اليوم فعشان هكي جاه ومابش ياخد حق الداري فود ولا البوكس يلي بفلوس يعتبرو وفي نفس الوقت اعتبرها هديه لعم صاحبه والرسول صلى الله عليه وسلم قال تهادو تحابو ركب في سيارته وعدا بس في الطريق الرئيسيه لقاه حافله موقفه في نص الطريق والناس كلها معصبه يبو يمشو قعدو يبيبو نزل من سيارته بعد وقفها علي جنب وعدا علي كرعيه لقاه صاحب الحافله يحاول يدفها شكلها عطلت ومافيش حد ساعده في دف الحافله زعل واجد عليه وخاصة ان الطالبات نازلات من الحافله عشان الثقل بس مايقدرنش يدفو معاه قعد يدف معاه هو بنفسه وجاه كم واحد خطمو توا وساعدوهم في دف الحافله الكبيره علي جنب عشان الناس تمشي وتهدأ

أحمد بحت فيه : شنو عطلها الحافله بالشكل هضا وشنو ناوي ادير في البنات من حايوصلهم للحوش توا

رد عليه : والله عطلت فجأه توا نكلم صاحبي عنده حافله يجي ياخدهم وانا حانصلح هذي يلي عطلتني وبهدلتني

احمد زعل علي وضعه : لا حول ولا قوة الا بالله باهي نقدر نساعدك في اي حاجه قولي والناس لبعضها يا طيب

رد : بارك الله فيك يلي درته معايا مش حاننساه وشكرا

احمد : مادرتش شي انا وطلع مبلغ بسيط حلف عليهم ياخده صاحب الحافله يلي واضح ان محتاج وعطلة الحافله بهدلاته خداهم وفرح بيهم واجد عدا احمد وشاف البنات قمعزن في الحافله لعند ما اتجيهم الحافله التانيه الا بنتين بس وحده يلي اعيونها عالطريق وشكلها مكلمه عيلتها قبل ما يمشي شور سيارته وقفاته وحده : لو سمحت وشكلها لحقاته وقف وبحت وراه لقاها ماسكه دزانه : طاح منك تواا الدزان وانت تمشي تفضل امتعك

تلمس جيبه وفعلا طايح منه ابتسم : شكرا وربي يحفظك

ملك مدتله الدزان بدون ما تلمس كف يده : العفوو وعدت لمكانها جنب صاحبتها ترجا واحمد يبحت ومستك فيها بالايش ركب في سيارته بس ماقدرش يمشي قبل ما يشوفها تمشي بعد حوالي 10 دقايق جات سياره ونزل منها باتها وملك تكر في ايد نرجس : هيا نوصلوك معانا

نرجس معنده : لا توا نرجا مع البنات وقعدت معاك برا عشان ماتقعديش بروحك وتوا خليني نمشي خلاص

مفتاح : لا عيب ماتجيش حاتمشي معانا ونوصلوك اخرا

نرجس : بس ياعمي ولكن قطعتها ملك : قتلك هيا بلاش عناد وكرتها مع يدها بالغصب وخلتها تقعد في الخلف وهي قمعزت جنب باتها واحمد يضحك عالمشهد بعد شافهم عدو حرك سيارته وراهم بس كان يبي يمشي للمزرعه لكن غير طريقه ولحق سيارة البنت شافهم وصلو البنت التانيه وعدو لحوش واحد اخر وشكله حوشهم نزلت مع باتها ولما نزلت شفاته في السياره انصدمت بس ماحكتش لباتها شي وخشو جوا مع بعضهم وكانت تعبانه

احمد ابتسم : نضرتها وصدمتها واعره عليا هههه مش عارف ليش لحقتها بس ماقدرتش انضيع السياره هذي بذات وبحت في الحوش وخاصة الروشن يلي في الدور التاني سمعه انفتح وكان في ستاره عرفها هذي البنت ومستغربه ليش لحقها قعدت اعيونه عالروشن ويبتسم وفي نفسه والله يلي جابني وراك مش عارف ليش وبيب السياره تحيه لهااا وبقصد منه وعدااا بسرعه وطول الطريق يبتسم خاصة لما اذكر يلي دراته حطت الدزان في كفه بدقه بدون ما تلمسه وكانت ملاك جميله جدا طول الوقت يفكر فيها وخاصة لما كرت صاحبتها مع يدها بالغصب انها تمشي معاهم وهمس ربي يحفظهااااا

رغد بعد خش باتها وشايل معاه البوكس سمعت مواه القطوسه قدامها قعدت مصدومه بحتت في باتها يلي طلعها من البوكس المسكر وطلعت القطوسه تجري في الحوش ومستغربه المكان الجديد عليها ورغد تبحت فيها وابتسمت دغري : باتي انت جبتها ليا انا الحلوه هذي

نجم : عجباتك الهديه واسمها علي رقبتها في الطوق

رغد عدت لباتها وباست يده : شكرا وربي مايحرمنيش منك وحضناته والله فرحت بالهديه اول مره تجيبلي هديه فرحتني واجد وما كملت كلمتها بعد طلع من جيبه باكو تليفون وبأبتسامه : هذي الهديه التانيه جبتها الصبح وقلت نعطيها لك مع القطوسه ان شاء الله تعجبك

رغد مش مصدقه يلي قاعده اتشوف فيه : هضا ليا انا

باتها : طبعا كم عندي بنت انا وشاف القطوسه اتكر في الكيس يلي فيه الحبوب وتحاول تفتحه شافتها رغد ودغري طبست لعندها ومسكتها شافت الاسم تيلا ما احلاها تجنن جميله ما شاء الله عليها هههه شكلها جعانه توا نعطيها منه وفتحت الكيس ودكت راسها في الكيس دغري ما عطتها مجال تكبلها وقعدت تاكل وتقرمش في الحبوب ضحكت رغد عليها وقعدت تتلمس فيها كانت ناعمه ولطيفه بكل وباتها يبحت فيها ويبتسم : فرحتي

رغد : فرحت واجد ولكن فرحتي الاساسيه هي انت وامي وصبت بحتت فيه : ربي يحفظك ويطولنا بعمرك انت وامي ومايحرمنيش منكم ودمعو اعيونهاا مسحهم لهااا بحنان : خلاص ماعش تبكي ونبيك فرحانه وبس تمام

رغد : حاضر يا جنتنا وشالت تيلا بعد كلت وقربتها منه جرب امسكها لطيفه صدقني قمعز باتها وهي حطتها في كتره قعد يملس عليها وهي تدلع عليه وتموي وباين انها فرحانه واجد ابتسم هو ورغد يلي فتحت التليفون واول صوره تصورها هي باتها وهو شايل تيلا وفرحان بيهااا

في العشيه عدت نسرين للجامع واسلام خايف انها ماتجيش رغد اليوم ولو ماجتش حاتمشي اخته لعندها راجو حوالي ساعتين بس ماجتش وصلها اسلام لحوش رغد وبحت في نسرين : هيا امشي وطمنيني بعدهااا

نسرين : تمام ارجاني ونزلت رنت الجرس بعد وقت فتح الاب : اهلين ياعمي انا نعرف رغد في الجامع وانشغلت عليها واجد طمني عليها وهي قاعده عشان نشوفها

رد : اهلين تفضلي اها موجوده تلقيها جوا في السور

نسرين : شكرا وخشت جوا ادور عليها طلعت قدامها قطوسه تجري جات تبي تعيط لان طلعت فجأه قدامها ولكن رغد ضحكت خاصة علي شكل نسرين كيف قعد ووخرت : فجعتني الفرخه بس تهبل ما شاء الله عليها

رغد ابتسمت : مرحبتين بيك وشكرا علي جيتك

نسرين : ولو يا بنت كنك ماعش جيتي انشغلت عليك

رغد : والله ظروف امي كانت تعبانه وحتى باتي مانقدرش نمشي وهي تعبانه المهم كيف حالك انتي

نسرين : الحمدلله المهم انك ابخير شوفي حانحكي معاك بموضوع ونتمنه تسمعيني للاخير وما تعارضيش ابدااا

نجم خش جوا يبي يشوف فرحة بنته بالبنت يلي جات توا وسمعها قالت تبي تقوللها موضوع وقف وقعد يسمع في كل حرف حكاته : خويا من لما شافك اليوم يلي عديتي فيه قال نبي نخطبها ونبيها بالحلال انعجب بيك واجد وكلنا نرجو في الموافقه عشان نطلبوك رسمي

رغد مصدومه : بس انا مزلت صغيره عالزواج 18 سنه

نسرين ضحكت عليها : يابنت انتي مش صغيره نجيلي ياربي يلي تصغر في روحها هههه وانا اكبر منك بسنه وولد عمي يبي يخطبني قريب عادي الموضوع كنك

رغد : مش عارفه مانقدرش نوافق قبل مانقول لعيلتي

نسرين : احكيلهم ونتمنه تردي عليا وهضا رقمي كتبته لك في ورقه وان شاء الله تردي بالاخبار السعيده هيا مع السلامه وصبت تبي تمشي شافت العم نجم اشرلها اتجي بدون ماتحكي شي وبحت فيها : انتي لعيت من ؟؟

نسرين ابتسمت : انا بنت الشيخ محمود حسين نسكنو في الشوارع يلي بعدكم وخويا شاف بنتك وناوي الحلال والله

هز راسه بعد عرف الشيخ هضا واذكر لما سأله في الجامع عن القطوسه : سلميلي علي الشيخ يا بنتي وقوليله اسأل عليا قبل ما اتجي تطلب بنتي وكأن يلمح علي فتحي

قطعاته نسرين : ياعمي سألنا عليك وكلهم يشكرو فيك وسمعتك انت وبنتك مسك وانا رقمي عطيته لرغد توا لو موافقين نتمنه تردو علينا وتبلغونا بأسرع وقت وطلعت

اما نجم مصدوم لما حكت هكي خاصة ان قالت شيء هزه من مكانه ان سمعته هو وبنته مسك يعني ماجبتش سيرة ولده يلي غلط ونزل راسه قدام الناس والجيران يلي برا عدا شور رغد يلي مقمعزه ومش عارفه شنو ادير وكيف حاتقول لباتها وامها عالموضوع هضا خايفه ما يصدقوها او يشكو بأنها تعرفه مثلا بس تفاجأت بعد قمعز باتها وبحت فيها وقال !!!!!

اسلام : شنو صار طمنيني والله علي نار قاعد انا

نسرين : حاسه ان !!!!

يتبع ………..

لقراءة الجزء التالي : الجزء العاشر من رواية الحلال والحرام

لقراءة الجزء السابق : الجزء الثامن من رواية الحلال والحرام

للإطلاع علي فهرس اجزاء الرواية : جميع روابط اجزاء رواية الحلال والحرام للكاتبة سلطانة كوكي

جميع الحقوق محفوظة للكاتبة سلطانة كوكي