الجزء التاسع من رواية الزوجة التائهة بين الأحلام والواقع

الطريق مازال طريق علي ابطالنا والرواية مليئة بالجميل من المواقف لذلك هيا لنرتشف من جميل الكلمات من ابداع الكاتبة المبدعة كيندا، هيا بنا .

الجزء التاسع من رواية الزوجة التائهة بين الأحلام والواقع

احمد …… سوال التانى هوا انتى ماتجوعيش يابنت لانى بصراحه ميت بجوع ومن بكرى ندير فى روحى ايتكيت ومانجوعش بس والله ماعاد فيها
ليلى …. ههههههه خلاص حبيبى حتى انى جعت تعالى نتعشو فى اقرب مكان
وطبعا بالفعل مشو لمطعم صغير وقعمزو ووصلتهم لستت الاكل الموجود وخدو منها شن يبو وحطولهم العشى وهنا احمد قاللها …
احمد … سوالى تالت ليك هوا …. اول ماشفتينى فى فترة الخطوبه شن خديتى اول انطباع للوهله الاولى ..
ليلى …. هههههههههه مش رح نقولك …
احمد … بتقوليلى غصبا عنك … ولا نلوحك من فوق المطعم ..
ليلى … اوك رح نقولك انى عارفاتك مهبول …… حسيت انك عصبى وصعب وجاف والحق خفت منك وبعدها غمضت عيونها طول *ـ*..
احمد ….. انتى شفتى حاجه ….. مهبول انى راهو مهبوووول وتوا خلى نكملو ماكلتنا وبعدها نمشو للسينما نتفرجو على فيلم شن رايك ؟؟؟
ليلى ….. لالا ماخاطريش اليوم … خاطرى نتمشى فى الشوراع بس
احمد …. اوك خلاص ومازال حقا نبى نعرف عليك كل شى
ليلى …… هههههه اوك
وطبعا تعشو وليلى قعدت تشوفله اكتر ما تاكل وكأنها كانت تبى تملى عينها من طريقة تصرفاته ضحكاته وحركاته وكل شى حتى حركة ايديه فا هل ليلى بدت تتعمق فى حبه من غير ماتحس …
….. كملو عشاهم ودفعو الفاتوره وطلعو وقعدو يتمشو فى طريق زى المراهقين الا اول مره يعرفو بعض وفجأه قالتله …
شن رايك نلعبو لعبة صراحه مع بعض ؟؟؟؟
فاقللها اوك بس بشرط اولا اننا خلاص نروحو لانى تعببببببببت وتانى شى بدون مشااااااكل ولا زعل لانى نعرف انا صراحه عندنا حنى الشعب الليبى بعدها طول دق فى بعض وترريش شعر ,….. بعدها طول ضحكو وكملو طريقهم ومشو للاوتيل غيرو ملابسهم وخشت للحمام غسلت وجهها وتوضت وفتحت شنطتها صغيره الا فيها كريماتها وحاجاتها الخاصة بالحمام وطلعت منها حبوب منع الحمل وخدت حبه فى ايدها وقعدت تشبحلها شوى وبعدين غمضت عيونها وخدتها وبعدها طلعت و صلاة العشى هيا وهوا وقعمزو على سرير وبدت هيا فى الاسئله …
هيا …..انت علاش عاملتنى من اول ماعرفتك بجفاء وحتى فى الخطوبه رفضت اننا نتواصلو مع بعض وبعد زواج شرط عليا شرو ط قاسيه هلبه ؟؟؟
هوا ….. تبى الحق وبدون زعل كنت نبى نطفشك ههههههه خيرك تشبحيلى هكى ايه ايه نبى نطفشك ههههه انتى قولتى مانزعلش ها …… اى وحاولت انى حتى موعد العرس نستعجل بيه باش ترفضى وحتى اول ليله لما روحت بيك درت نكد كله وفى صبح معاملتى ليك كانت قاسيه شوى بس سبب كل هدا بصدق لانى كنت مش طايق نفسى اصلا ولا كنت نتخايل انا رح تكون واحدة تانيه مرتى غيرها ؟؟؟
هيا …. وشن الا غصبك من الاول انك تتزوج وحده وانت فى داخلك وحده تانيه ؟؟؟؟
هوا…… امى …. كان قلبها كل يوم ينحرق عليا لما تشوف فيا حابس روحى وشادها دخان بس …. تصورى خسيت نص من وزنى هههههه وبينى وبينك واللهى ماكان باايدى الموضوع وعضبا عنى لانى ماستوعبتش الموضوع بسهوله حسيت انا نضحك عليا وانى مستحيل نعرف نحب وحتى لما تجوزت كان برغبة امى بس وارضاء فيها باش تبطل بكى ونواح وزن كل يوم
هيا …… وشن الا تغيير فى موضوع ؟؟؟؟
هوا ….. تغيير هلبه وجودك فى حياتى غيرها كلها…. ولما كلمتها ماحسيتش نفس الا كنت قبل نحس بيه اتجاها ومش عارفه كيف صار هكى بس الشى الا بالفعل تأكدت منه انا << علاج صدمه بصدمه >> ههههههههه
ليلى ….. ههههههه قصدك انى صدمه … حول خلاص معاش تكلمنى … حول قووووتلك؛؛؛؛ بعد خلاص
احمد …. ههههههه غير تعالى ياشفشه والله مانقصد ههههههه
ليلى ….. وشفشفه فوقها خلاص خلاص انسانى
احمد ….. غير تعالى هنا ياودى نبى نقولك شى مهم هههههههههه ………………. ومشو فى خبر كاناااااااااااااااا لحد ماجى تانى يوم صبح وناضو ساعه 1 وتحديدا ناضت ليلى على صوت احمد وهوا يفتح فى روشن باش يدخن …..
ليلى …… لبسة روب نوم الخارجى وطلعتله صباح الورد حبيبى
احمد….. صبا ح الورد …. انى طلبت قهوه ورح توصلنا بعد شوى
ليلى …. اوك معناها انى خلينى نتصل بى ماما نطمن عليها وعلى بابا اوك حبيبى
احمد …. اوك
وطبعا ليلى اتصلت بى امها اكتر من مره وماباش يردو وعادوت تتصل وماباش يردو فا قالت لاحمد ..
ليلى …. احمد انى اتصلت بى حوشنا اكتر من مره بس مابوش يردو عليا ..
احمد … مرات راقدين او مش فاضيين او بايتين عند حد فاخلينا احنا توا نشربو قهوتنا ونطلعو ولما نروحو اطمنى عليهم وطبعا طلعو من الاوتيل بعد شرب قهوتهم بزبط كالعاده وتغدو مع بعض وهدرزو واتشاركو كل مواقفهم الحلوه والمره مع بعض وكان فى كل موقف يلقو رابط اقوى من الاقبله يقربهم من بعض حتى نظارتهم لبعض كان فيها رابط واحد …….. واشياء ماكانتش تخطر على بال اى حد فيهم داروها….. لعبو بتلج مشو لمدينة الالعاب خشو لسينما جرو فى الشوراع الفاضيه فى الليل االمتأخر وفات اليوم الاول,, والتانى,, والتالت,, والرابع,, لحد ماطقو اسبوعين وهما على نفس النمط من السعاده وتفاهم وجى اليوم الخامسطاش <<15>> الصبح تحديدا …
ليلى …. صباح الخير حبيبى
احمد…….طبعا قعد يشبحلها شبحه معناها حلووووو جدا ومعاها ابتسامه وبعدها رجع السيجاره فى فمه وقاللها صباح الورد
ليلى ….. على شنى تتفرج من روشن …
احمد ….. نتفرج على صغار كيف راكبين على بشكليطات ويلعبو مع بعض
ليلى ….. هيا شن رايك نديرو زيهم ….. هههههههه
احمد….. هيا ومن الا يولى فينا ههههههههه معناها خلاص نشرب قهوتى بس باش يتكيف دماغى وننزلو ليلى … اوك معناها انى خلينى ندير لفه على روحى ونغير لبسى اوك .
احمد … اوك وحتى انى بنغير حوايجى خلاص معناها نغيرو مع بعض ههههههه
ليلى….. انت معاش تتحشم حول هيا خلينى نمشى … حول خلاص يااحمددددد هههههههه بطل براده
وطبعا بدلو حوايجهم وقعدو يتمشو فى شوراع لحد مالقو مكان بجانب الهايد بارك فيه بشكليطات << وطبعا هما تواجدو فى المكان هوا هلبه لانا اوتيلهم قريب منه وفى نفس الوقت ليلى حبت المكان هدا هلبه نظرا لهدوئه ورومانسيته ومنظرالسنجاب والطبيعه والعصافير >> وهنا قالها…..
احمد ….. تركبى ولا وليتى فى كلمتك؟؟؟
هيا ….. عادى بس نتحشم نركبها قدام ناس هنا خلينا نخشو للحديقه ونركبها ؟؟؟
هوا … اصلا انتى تحسابنى بنخليك تركبى هنا فى وسط هالحشد …. ههههه بوعدك ياماما مانبداش حميدا كان خليتك… نبدا شيرين كان هدا … امشى امشى طول للهايد بارك وانتى ماتمشى الا بالعين حمرا ههههههه
هيا … هههههههه اى اى صدقتك
وبعدها ركبو وقعدو يلعبو بالبشكلايط تقول اطفال فرحانين وهيا طبعا فى الاول ركبت وطاحت وركبت وطاحت وعلمها مره واتنين وتلاته لحد ماعرفت تركبها صح بس بعد مامرمداته ودهشته وكرهته فى البشكلايط وبعدها لقو كرسى قريب من شجرات كبار وكان جو رومنسى جدا والغروب كان طالع من جيهتهم قعمزو وقعدو يشبحو لبعض وفجأه احمد قاللها …
ليلى انى عندى نيه يكون عندى بيبى منك ومش واحد بس لا
ليلى ….. مالا قداش تبى واحد ..
احمد … نبى هلببببببببببببه يعنى من الاخير زى طنجرة فوشار كل مره يطربق عيل هههههههه
ليلى …. هههههههه انت خلاص هبلت شكلك
احمد … مش قتلك انى مهبول انتى غير امشى وراى بس ورح نهبلك عما قريب هههههه ان شالله
ليلى ….. تعرف يااحمد شى لو جانى حد وقالى شن رايك فى احمد فى الخطوبه كنت سكتت وقتله اكيد رح ينكسر الحاجز الا بينا ولو سالونى اول ماتزوجنا نقولهم مش حاسه بأى امل فى علاقتنا بس لو سالونى توا ……
احمد ………… اصصصصصصصص نبى سوال هوا نسألهولك انى فى حد داتى … انتى حاليا شن حاسه اتجاهى ؟؟؟؟
ليلى …. سكتت فجأه وبعدين قتله …… انى جعت شنى مش رح ناكلو اليوم ههههههه
احمد …. تصورى لما قولتى هكى جوعتينى ههههههههههه
وبالفعل ناضو وقعدو يتمشو ويهدرزو لحد ماوصلو للمكان الا فيه بشكليطات وردوهم فى مكانهم وووقعدو يتمشو لحد ماوصلو لمطعم هندى وهنا قاللها …
احمد…… ضايقه قبل اكل هندى ؟؟؟
ليلى ….. لا واللهى ماحصلش شرف ونضوق بس سمعت انا فى مطعم فى لبييا يهبل اسمه سفير بس الحق مامشيتلاش قبل
احمد…… خلاص معناها هيا نخشو وضوقى واحكمى هههههههه وبعدين قولى احمد مارفعنيش خاطر انتم نساوين زى قطاطيس تاكلو وتنكرو هههههه
ليلى …. انى زى قطوسه يااحمد باهى ياه شكرا
احمد ……. هههههههههه لاحول الله ياربى يعنى وجعاتك كلمة قطوسه وماوجعاتكش تاكلى وتنكرى هههههههه اما انتى … ياسيدى انتى احلى قطوسه قابلتها فى حياتى ماشى ههههههه
ليلى ….. زيد زيد تسهوك عليا اصلا انى مانقدركش فى لبس هههههه
وخشو للمطعم وقعمزو على طاوله الا مقابله لى روشن وبعدها حطولهم لستة الاكل وقاللها ….
انى حاب نوكلك بدوقى مره هادى وانى طلبت ؛؛؛؛ كارى بالدجاج وكارى باللحم … وطبيخه الدجاج الهنديه …. ومشويات بالتابل الهندى…. وسلاطات والحلو طلبتلك نوع بسيط وخفيف وهوا نوعى مفضل فى حلو زى لقمة القاضى بس عليها مكسرات وعسل حقانى وهما يقولولها أصيده ههههههه
ليلى ….. اوك خلاص ورينى يادواق انت هيا
وبالفعل الاكل كان حلو وجو رومانسى جدا لانا كان على كل طاوله شمعه مولعينها وتطلع فى عطر هندى رومانسى مع موسيقه هنديه شاعريه والون خافته خلتهم يعيشو فى عالم تانى ونسو روحهم فى التهدريز والحكى لحد ساعه11 فى الليل طلعو من مطعم وقعدو يتمشو لحد ماوصلو لشارع الاكسفورد ستريت وبعد ها قعدو يتفرجو على مولات من برا وهيا مصكره .. ونظر الشوراع فى الليل كيف حلوووووه وبعدين خطمو من جنب مول كبير شوى اسمه برى مارك مشى قالتله …
ليلى ….. باللهى احمد كانا ولينا لشارع هدا بكرا خاطرى نخشله مول هوا ؟؟؟؟
احمد …… باللهى عليك مانحب نخشله هالسوق وينك ياليبى تلقيه فيه والشى الا يقهرك بضاعه فيه باارخص الاسعار وتلقيها فى لبييا مشيطين فيها نار لدلك فوتيه …. واسمعى حقا بنقولك حاجه راهو World War Zمادخلنيش فيك فى فيلم جديد اليوم بينعرض لى برد بيت اسمه
ونبيك تحضريه معاى والسينما مش بعيده على هنا على فكره
ليلى …… اوك اصلا انى فنان هوا نموووووووت فيه…
احمد …… تموتى فى منى ياحنه ؟؟؟ … قووولى حسنى ماسمعتش قولى قولى اصلا انتى باين جانيك يحكو فيك وشكلك الفيلم مش رح تحضريه نهائيا وتقعدى فى شارع لين انى نحضره
ليلى ….. هههههههه نموووت فيك انت بس ياسيدى …. غير نقص صوتك فضحت بينا
احمد ….. ايواااااااا مالا اعرفى انى مهبول فانسمع منك كلمه زى الا قولتيها توا مره تانيه نديرلك العاااااااار
ليلى …… باهى باه خلاص توبه يابرد بيت انت
احمد…… تانى برد بيت … تانى … اطلعى للحوش طول قصدى للاوتيل انتى مش وجهك وجه افلام اصلا …. هههههههه
ليلى …… هههههههههه انت مهبوووووول رسمى وخش لانا فيلم بيفوت علينا على هبالك هوا ..
وطبعا حجزو تداكر وخدو فوشار وقعمزو فى الصفه الاولى وبدو يتفرجو وليلى طبعا طول فيلم من خوف قريب طبقة روحها وخشة فى جيب احمد وماكمل الفيلم وطلعو لين طلعت روح احمد … كملو الفيلم وروحو مع ساعة12 ونص للاوتيل واول ماوصلو خشت ليلى للحمام وغسلت وجهها وخطرت فى بالها انها تكلم خالتها وتعرف شن في ﻻن هداكا اليوم اتصلت بامها بعد اليوم الي ماردوش فيه حست صوتها مايطمنش وكل الايام الي فاتو تحس امها توزع فيها وتسكر بسرعة …. فافتحت شنطه وخدت حبتها المعتاده وطلعت وخش بعدها احمد للحمام وهيا مشت جيهت تلفون وقامت سماعه واتصلت بى خالتها …
ليلى ….. اهلين خالتى شن اخبارك
خالة ليلى….. الحمد لله يابنتي … وبعدها …….
….احمد طلع من حمام ولقي ……………………………….

يتبع…….

لقراءة الجزء التالي : الجزء العاشر من رواية الزوجة التائهة بين الأحلام والواقع

لقراءة الجزء السابق : الجزء الثامن من رواية الزوجة التائهة بين الأحلام والواقع

للإطلاع علي فهرس اجزاء الرواية : جميع الأجزاء كاملة لرواية الزوجة التائهة بين الأحلام والواقع

جميع الحقوق محفوظة للكاتبة كيندا من ليبيا .