وفي الجزء الأخير من الرواية دعونا نعرف ماذا سيحدث ؟ هل يا تري ستكون النهاية سعيدة ام حزينة ؟ ام ستكون عادية ؟ كل هذا وأكثر سوف نعرفه في السطور القادمة .
الجزء التاسع من رواية هدوء ما قبل العاصفة
واول ماخش للمستشفى لقى احلام دخلوها لغرفة العمليات طول …. فاكمل اجرأت العياده واتصل بى امه وخوته وبوه …. ومافاتتش ربع ساعه الا وانتشر الخبر وكانت العيادة تملى وتفرغ من اهل زوجها واهلها وقعدو يستنو قدام غرفة العمليات واللوم ودموع والبكى كلللللله نصب وللاسف فى هديكا اللحظه ماكانش ينفع الا الدعاء ….. وفجأه محمد شاف سستر طلعت من غرفة العمليات فامسح دموعه ومشالها يجرى وقاللها …..
محمد …… طمنينى دكتوره اختى شن صار فيها ومازال حيه ؟؟؟ بالله طمنينى
سستر…… الحمد لله هيا ناضت تمام بس الجنين ربى يعوضكم فيه خير يارب …
محمد ….. الحمد لله يارب … امى بوووووى احلام طلعت من عينها يابوووووى
امها ….. الحمد لله ياربى الحمد لله …
خالت مجدى << مبروكه >> …. الحمد لله ياربى مجدى طلع منها والله كانا احلام صارت فيها حاجه كان طخ فى الحبوس << الحمد لله ياررررربى >>
محمد ….. طخ فى الحبوس ههههههه تى جت الشرطه من بكرى وحققت معاى انتى شن تقولى تحسابوها سهله مالا …..وقولتلهم هوا الا ضاربها وزاد لبسها …. لما قتل ولده المسخ هوا …. تى وحق ربى الما نخليه يطخ فى الحبوس باش يحرم يمس وخيتى مره تانيه …
اب احلام ….. محمد تحشم على وجهك ياولد تحششششششم وصكر فمك …
محمد ….. نصكر فمى … نصكر فمى تى انتم ماريتو شى تو وحق ربى لو رجعتله مره تانيه الا مانولع فيه النار ونولع فى روحى المسخ هوا ماهوا ماريتوش اختى كيف طايحه بدمها فى صاله وسبته ملوحه عليها …. برى انتى وهوا شوفو جلد بنتكم كيف اسبته معلم فيها لطع لطع …. وسبت سبت …. انى من الاول مش راضى عليها زيجه هيا وتوا والله مانى متنازال على اى كلمه قولتها الا ما ولدك الجرو هوا الا ما يجيش راجل يطلق اختى ويعطيها كل حقها …
ام مجدى ….. والله ياولدى عندك الحق وماعندى مانقول شى اصلا ولدى معاش خلالى وجه نقابل بيه وانت مهما قولت مانقدر نقولك شى لانا فى الاخير هادى اختك وبالنسبه ليا انى والله ماهامنى ان شالله ينحرق بقازه المهم احلام بس تنوض حالها كويس …
قعدوا كل واحد فيهم يتناقش مع تانى وواحد يشح وواحد يرخى لحد ماطلعو احلام من غرفة العمليات وحطوها فى غرفتها … ومافاتتش 48 ساعه الا وسمحولهم يشوفوها واول ماخشت امها وعزوزتها …. شبحت احلام طول لعزوزتها وسيبت امها وقعدت تبكى وغمرة عزوزتها وعزوزتها قعدت تبكى وحضنتها بقوووووووه و قالتلها اهم شى صحتك يابنتى ماتحركى دمك والعيل يتعوض بس صحه ماتتعوض بالله عليك يابنيتى ماتخلى شى يحرق حاطرك ومرات لانا ربى عارفك رح تتعبى خدى امانته منك فاخلى ايمانك يالله كبير يابنتى
احلام ….. << وهيا تبكى >> الحمد لله ياماما على كل شى لا اعتراض على حكمة ربى وان شالله ربى يعوضنى خير ..
… واول ماشافت امها هالموقف عرفت انا احلام واخده على خاطرها منها وعرفت انا مكانة ام مجدى فى قلب احلام اكبر من مكانتها بهلبه << وهيا كانت سبب بتصرفتها مع بنتها >> فهنا طول قعدت تشبحلهم وعيونها تعبو دمعه واخدة زوايه وقعدة تشبخ لبنتها من بعيد ودموع ينزلو منها وهنا عرفت انا هيا خسرة بنتها ……ومافاتتش توانى الا و معاش قدرة عزوتها تتحمل تشوف دموع احلام فاخدت فرشيتها وقعدت تبكى وطلعت وسيبت الغرفه بسرعه لانا حست غلط ولدها من غلطها بينما احلام قامت عينها شويه وحطتها فى امها بعدين ابتسمتلها فاجت امها حضتها بقوه وقالتلها ……
امها …. سامحينى يابنتى …. غرنى كلام ناس ودورت راحت ناس ونسيتك ودفعت تمن غالى …. فى لحظه كنتى رح تضيعى بين ايديا وانى سبب فى كل شى …..الله لاتسامحنى يوم على الا درته فيك ….. والله لين يحطو عليا تراب مانى مسامحه روحى …. ولارح نجى نطلب منك سماح لانى مش قادره حتى نقيم عينى فى عينك …
احلام ….. انى عرفت قيمتك ياامى لما مات عيلى توا ويعلم ربى قداش تعبت فيه وقداش حلمت بيه وقداش كنت نبى نضحى على خاطره وقداش تالمت وانى فى غرفة العمليات عليه حسيت انا قصو منى ايدى ولارجلى وبيدفنوها … لدلك ياامى مهما درتى ومهما فعلتى مش رح نكافيك يوم على تعبك معاى من اول مانخلقت فى هالدنيا ….. ولو انتى تحبنى زى مانى نحبك ماتدوريش سعادة غيرى على حساب سعادتى ….
امها …. سامحينى يابنتى والله من اليوم اهم شى راحتك وراحت خوتك والا يجرب يطق فيكم بس ناكله بسنونى ماكله ….
محمد …… اسمعى بالنسبه ليا انى اهو بنقولك شى يااحلام … << لاتخشى شى >> انتى اطلقى من هنا وانى موتيلك عرسان من هنا اه انتى اطلبى بس وانى نجيبهولك من ودنه وشدى عندك << الباكو _ مسقم _ معتوق _ والبالو _ تيحه >> انتى قولى بس انى وافقت وانى نجيبه من ودنه < 3 
.
احلام …… ههههههههههههههه خلاص من توا انى واتيه
مرام ….. كانا زيك ياودى بلاش تقعد مقطنه فى حوش بوها خير ..
وهنا طبس على ودنها وقاللها << سكرى فمك خير مانقول على بوى على باقة الورد والجو الفايح الا انتى وخطيبك تديرو فيه ولا بالك تحسابينى راقد على ودانى …. انى نطبخلك فيها بس >>
مرام ….. لا لا خلاص محمد ميه ميه ولا فراخ الجمعيه ….
احلام …… حبوبى انت يامحمد ربى يخليك ليا ياررررررب ويخليك ديما ساندلى ظهرى << وقعدو دموع يصبو منها >> وهوا طبس وحضنها بالقوه وقعدو يبكو مع بعض ويبوسلها فى جبهتها ويبكى ..
مرام ….. خلاص خلاص بطلى بكى واحمدى ربك انى يفشخ فيا كل يوم وانتى على قولت الاغنيه << سلم خوى عرف مقدارى جاب صحابه وقالى اختارى >> هما صح مايتسموش عرسان بس ياللله اى حاجه فى اى حتى وخلاص … برعاية برجلو ماشى باايدو ماشى …
محمد ….. بوووووووووووى بنقولك شى حقااااااا
مرام ….. صكر فمك سكر …. شى بابا شى هدا يخفف فى دمه بس
مرام وبوها وامها ….. ههههههههههه هههههههههههه ههههههه
… ناضت احلام من المستشفى وروحت لحوش بوها وهنا سمعت انا شرطه شدو مجدى وقاعد على دمة تحقيق ويستنو يسمعو شهادة احلام باش يحولوه لنيابه ويصدرو حكم فيه وهنا مشت هيا وخوها واختها ولمت دهبها وحوايجها كلهمممممم وطلعت من حوش وقالت لبوها يمشى بزوره وقوله كلمتين ….
انى مستعده انى نتنازال على القضيه انى ومحمد … المهم يطلقنى ويعطينى جميع حقوقى ومايتعرضليش فى اى مكان
وبالفعل مش بوها وفى الاول مجدى دار جو وماباش يطلقها بس لما تمرمط 5 ايام فى حبس واعطوه طريحه نباشة قبور قرر انا يوافق وهنا جى المحامى وطلقها ووقعو اوراق طلاق بشكل رسمى واقر بكل حقوقها وتنازلت هيا وخوها على قضيه …….
تمت…….
لقراءة الجزء السابق : الجزء الثامن من رواية هدوء ما قبل العاصفة
للإطلاع علي فهرس اجزاء الرواية : جميع اجزاء رواية هدوء ما قبل العاصفة كاملة للكاتبة كيندا
جميع الحقوق محفوظة للكاتبة كيندا من ليبيا .
