الجزء الثالث عشر من رواية إمرأة بلا هوية

مهند أدهميوليو 7, 2022

0 316 5 دقائق

وفي الجزء الثالث عشر من رواية إمرأة بلا هوية دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة بت محمد جمال الدين .

الجزء الثالث عشر من رواية إمرأة بلا هوية

رهف ودعتهم وطلعت واول م فتحت الباب لقت خطاب واقف جنب عربيته علي بعد كم متر منها ،،،،
رهف اخدت ليها وقفه وبعدها مسكت الاتجاه المعاكس عشان توقف حافله ،،،، بس خطاب جا عليها وهو بقول : رهف ،،،، انتظري ،،، دا م حل ،،، لازم نقعد ونتفاهم ،،،
رهف وقفت وادتو ضهرها وقالت في ضيق : نعم  خير
خطاب : يلا العربية،، نمشي نقعد في حته ونتفاهم….
رهف : آسفه م عندي زمن…. عن اذنك…
خطاب : رهف… يلا العربية عشان انا م اتهور معاك ….
رهف : سبحان الله فاتح نفسك كمان تهدد ؟؟!
خطاب مشي عليها وجراها بالقوه والناس بقت تعاين ليهم وفتح باب العربية وقعدها ومشي ركب وساق العربية ،،،،
خطاب : تحبي نمشي وين ؟
رهف في سخريه نقضي الخميس والجمعة في الشقه وبعدها تشتري لي هديه اساور
خطاب سكت وساق العربية بسرعه ومشي الشقه وبعدها فتح ليها الباب بس هي صرخت فيه : يا برود اعصابك ياخ  برضو جاييني هنا ؟ لكن الليله السبت يعني م الخميس،،،، ولا الايام م بتفرق معاك ؟ رجعني محل لقيتني  يا خطاب ،،،
خطاب : رهف بطلي حركات الشفع دي وانزلي يلا جوه ،،،،
رهف نزلت في عصبيه وهو مشي بسرعه قداما وفتح الباب ودخلت وقفله من جوه ،،،،
خطاب جا وقف قصادها ومسك يدينا الاتنين وباسهم وقال : والله وحياتك عندي،،، م حبيت زول غيرك في حياتي ،،،، انا عمري 30 سنه م حاسي اني عشتها ،،،، يوم ظهورك في حياتي هو يوم ميلادي ،،،، حياتي مع ميناس او زواجي منها عباره عن صفقه عقدوها ابوي وابوها ،،، ونحن الضحايا ،،،، انا وهي وحتي محمد ولدي ،،،،
م عرفت الحب الا معاك  حسيت معاك بمعني الحياه ،،، قبل م اعرفك زواجي كان رتيب وملل ،،، وبعد عرفتك حاسي انو حبل والتف حوالين رقبتي ،
الحاجات الشفتيها كلها سراب،،، انتي الواقع الوحيد في حياتي ،،،،
رهف : انا عارفه انها زوجتك وعندها حقوق عندك بس انا م بتحمل اشوفك معاها  م بتحمل يتقفل عليكم باب واحد كل ليله ،،،،
م بنكر اني حبيتك ،،، وبتمني انك تكون لي وحدي بس ليس كل م يتمناه المرء يدركه ،،،،
ح افضل احبك بس م بقدر ارتبط بيك و
خطاب في انهيار : رهف م تقولي كدا…. مستحيل تحكمي علي بالاعدام
رهف في حزن : يعلم ربي اني بقول ليك الكلام دا وقلبي بتقطع من جوه  بس م عايزه ابني سعادتي علي تعاسه الغير ،،، حمودي ولدك حبيب قلبي بحبو لانو قطعه منك ولانو امور وعسل ،،، م بتحمل اكون سبب في انهيار حياتو  م بقبل…
قطعت كلاما وبقت تبكي في تشنج  خطاب انهار وجا قعد جنبها يمسح في دموعها وهو كمان ببكي وبعد فتره قال : ممكن نتزوج ونعيش سعداء ،،، محمد وميناس م بظلمهم بتعامل مع ميناس بما يرضي الله ،،، فتشي معاي حل بس م تستسلمي بالسهوله دي
انا مستحيل اعيش بدونك  اخدي وقتك وعيدي التفكير بقبل بي اي حل الا انك تطلعي من حياتي ،،،،
رهف : اول حاجه انا م عايزه اقعد في الفيلا ديك تاني  الاء بتفتشت لي في داخلية،،، بس مضطره اشتغل في الصيدليه لحدي م اتعالج واجهز رسوم الجامعه…..
خطاب في ضيق : اسمعي يا رهف  قعاد في داخليه مع ناس م بنعرفهم ماف،، عندك الشقه وانا بجيب ليك بنات اتنين شهاده عربيه يسكنو معاك وانا اذا عايز اقابلك بجيك في الصيدليه او بقابلك بره
وكدا تعتبري نفسك ساكنه داخليه وشيلي الايجار منهم انتي ،،،،
سكت وبعدها واصل،،،، كدا م عندك مشكله صاح ؟
رهف : بنات منو ؟ ناس عدن ولا شنو ؟
خطاب في ارتباك : حبيبي دا طالما بغير علي معناه بحبني
سكت وبعدها واصل : رايك شنو في كلامي؟
رهف في استسلام : اشوف ،،،، م عارفه اقول ليك شنو ؟ ،،،،
خطاب : م تقولي اي حاجه يلا اوديك الدكتور ؟ ومعليش م بقدر ارجعك الصيدليه ،،، صحبي مهند جايي من بره ،،، ح امشي اجيبو من المطار م عنده زول غيري ،،،،
رهف : اوك ،،، حمد لله على السلامة….

وصلت رهف العياده وبعد جا دورها بدا معاها الدكتور جلسات التنويم المغناطيسي لانها فعاله في علاج فقدان الذاكره ،،،، وحكت ليه عن قلاده الذهب وقال ليها دا تقدم ملحوظ وطمنها واداها علاجات ومشت الصيدليه ،،،،،
الاء استقبلتها في لهفه وقالت بعد سلمت : اها يومك كان كيف في بيت عمك ؟
رهف حكت ليها اي حاجه….
نبيل : قابلتي خطاب ؟ كان مقلق عليك شديد
الاء : هو في شنو ؟ الشمار حارقني
رهف في حزن : مافي حاجه…. فجأه اتذكرت عدن م سألت خطاب منها وعلاقته بيها شنو بالضبط ؟؟ المواضيع كتيره زحمت راسا بس قالت في نفسها موش قررت تنسحب من المعركه ؟ يبقي الاسئله م ليها لزوم اذا عدن او غيرها م بتفرق كتير !!!!!
الاء : انتي شكلك اتكسسرتي في خطاب  يعني وقعتي وم سميتي ،،،،
نبيل وشو اتغير وقال بدون م يشعر : تكون مجنونه لو عملت كدا!!
الاء ورهف عاينو ليه وبعدها صلح كلامو : بقصد عشان ميناس زوله م ساهله وبتحب خطاب شديد ،،،،
رهف : تآخدو ساي انا خلاص بقي همي كلو اتعالج واقرأ وبس
نبيل فرح شديييبد وقال : كدا احسن ،،، بالمناسبه عازمكم يوم الجمعه قهوه في البيت مع الحجه ،،،
الاء : طوالي  هوفا رايك شنو ؟
رهف : تمام ،،، فرصه نتعرف علي ست الكل،،
نبيل مشي مصنع الادويه ورهف بسرعه جات قعدت جنب الاء
وقالت في قلق : معقوله انا اكون زي م قالت مره عمي بسمات ماديه وصائده ثروات ؟؟؟؟
الاء في حيره : والله يا هوفا هي طبعا حضرت ماضيك ،،، يعني نحن نخت كلامها في عين الاعتبار ،،،، لكن ي روحي م تزعلي ما مهم انك كنت شنو ؟ المهم اسي انتي شنو….. انت اطيب وارقي بت قابلتني وسعيده اننا بقينا اصحاب ،،،، اتخيلي حسام قال عليك طيوبه وحلوه
رهف : تسلمي حبيبتي والله انتي الاروع والاحلي وهو محظوظ وامو داعيه ليه لانك ح تبقي مرتو

خطاب جا داخل ومعاه مهند صحبه وحجه روضه وخوله وميناس جو سلمو عليه في حراره ،،،، مهند صديق خطاب قرو سوا من الاساس لحدي الجامعه وبعدها هاجر هو اخوانه مشو كندا بس ارتباط مهند بالسودان كان كبير،،، بقي يجي كل سنه الا الجيه الاخيره دي قرر يعيش هنا علي طول وخطاب ح يظبط ليه الامور من سكن وغيره وجهز ليه دراسه جدوي ل كم مشروع بالاضافه لاختياره في لجنه تحكيم برنامج عربي،،،،،
روضه : طولت شديد المره دي ي ولدي
مهند : خلاص ي حجه تاني لمن تزهجي مني
روضه : نحن لاقنك وين ي ولدي ؟ احسن جيت من بلد الكفار دي بعد ترتب امورك تشوف ليك بت حلال وتستقر ،،،،
خوله بقت تتبسم براها لكن مهند احبطها بعد رد : عرس ؟ انا بتين بقيت للعرس ؟ خليني اشوف نفسي شويه بعدين العرس ملحوق  ولا م كدا يا خطاب ؟؟
كلهم بقو يضحكو الا خوله دخلت غرفتها وهي صاره وشها ،،،،
بعد الكل مشي،،، مهند سأل خطاب : مالك ي صحبي شكلك م رايق وامورك جايطه ؟
خطاب : بالله باين علي ؟
مهند : م شديد بس نحن عشره عمر وانا بحس بيك يا اخوي ؟
سكت مسافه وواصل كلامه : شكلك بتحب  مافي شي بلخبط كيان الزول غير الحب..
خطاب اخد نفس عميق وبعدها قال : اخوك وقع وم سمي ،،، حبيت زي المجنون وطفله م كملت 17 سنه  المهم خلينا فيك انت ،،، بكره عيد ميلاد محمد وكالعاده ميناس مقومه الدنيا وعامله حفل كبير وعازمين ناس مهمه شديد ،،،، تخلص الحفله ونبدأ شغلنا ومنو تكون اخدت راحتك من السفر ،،،
————————————–
———————
*☆إمتناني *
*☆بت محمد جمال الدين☆*
*☆يتبــــــــــــــــــــــــــــــــــــــــــــع☆*