الجزء الثالث عشر من رواية طبيبة قلبي

مهند أدهميونيو 19, 2022

0 180 7 دقائق

وفي الجزء الثالث عشر من رواية طبيبة قلبي دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة اسماء محمد .

الجزء الثالث عشر من رواية طبيبة قلبي

حكمت المحكمة علي المتهم أنور سعيد… المتهم بقضية الإتجار بالأعضاء و….حسب القانون من المادة…
بالإفراج عنه مع دفع غرامة بمبلغ……..

بعد كلام القاضي دا عمت تكبيرات الله أكبر ، الله أكبر وتهليل في قاعة المحكمة وأصوات مباركات وزغاريد وبكى وأيمن دا لمن سجد سجدة شكر في الأرض وجو بعديها أصحابي يباركو لي والأهل ودكاترة المستشفى ومندفعين وفرحانين وأبوي الجاء والدموع في عيوني حضني وهو بقول اللهم لك الحمد ولااا أمي الما أدت زول فرصة تاني يسلم علي حضنتني وبقت بتبكي وبتكرر وتقول الحمدلله ، الحمدلله يا ولدي الحمدلله وحبوبة بإتجاه وكانت بتقول الله غالب قلم الظلم ما بدوم الله غالب الله كريم ربنا قادر الحمدلله ، ولااا سومة ، ، ، سومة اللسا كانت قاعدة محلها وبس بتبكى وصحبتها أمل الكانت جمبها وبتهدي فيها وأمها الجات باركت لي ورجعت ليها
الفرحة الكانو حاسين بيها دي نهائي ما أثرت فيني ولا حركت ذرة فرح جوا قلبي وكأنو مشاعري إتلبدت وإتصلبت أو عديل ماتت بعد الأجواء دي إتحركنا علي البيت وتقريبا معظم أهلي من أعمام وخيلان كأنو معانا وأبوي قبل يجي البيت جاب معاهو خروف وضبحو وعمي برضو كذلك وفي ثواني بس البيت إتملى ناس وأهل داخلين ومارقين دا غير الجيران الكل مرة بجو مجموعات مجموعات ، صاح مرقتا من السجن بس انا ما كويس وعمري ما حأرجع كويس زي ما كنتا من برا ااي كويس بس جواي حروب شغالة حروب ما فيها غير موت القادة وإنتصار الأعداء وآسر الجنود ، وإبتسامتي المصطنعة غصب قدامهم وراها جبال أحزان وقهر وخيبة ، ما عارف هل هم جد مبسوطين!؟ ولااا هم بمثلو إنهم صدقوني عشان يخففو عني ، بعد أخدتا لي دش وخففتا لحيتي البقت كثيفة ومبعثرة وما مرتبة وشعر رأسي الزاد حتى مشيت قعدتا معاهم ، نفسي كان أبعد بعيد منهم كلهم محتاج اقعد براي ، ما داير زول جمبي حاليا بس حتى دا غلبني أقولوا ولو قلتا كدا ماف زول حيشتغل بي ، وفي المنهم قالوا أنا محتاج لطبيب نفسي ، بعد اللمة دي وجوطة الناس الما وقفوا لحدي بالليل بعديها طلعتا فوق بحجة عاوز أنوم حبة بس كالعادة ما عديت مسافة طويلة وقمتا مخلوع بنفس الكابوس وسومة جات داخلة مع قومتي دي إتوجهتا علي الحمام بعد غسلتا وشي وصدى الجمل دي لسا في رأسي وبتكرر …قتلتا ولدي..يا مجرم…يا عديم الرحمة….تاجر أعضاء…دكتور دي كتيرة عليك…عمرك ما حتتهنى…الله يحرقك، الله يقتل اولادك ويعذبهم زي ما دمرتنا…الله يدمر حياتك ويحرمك من البتحبهم…و…….ختيت يديني الإتنين وقفلتا بيهم اضاني الإتنين وغمتا عيوني شديييد وهزيت راسي ولسا حاسي الأصوات دي في رأسي ، مجرم ، قاتل ، تاجر أعضاااء ، الله يحرمك من اولادك……فتحتا الماسورة وبقيت أشيل موية بيديني وأكشحها في وشي بسرعة وأكرر الحركة دي مرة ومرتين وتلاتة وخمسة وعشرة ، عسى يمكن يكون حلم او كذبة أوكابوس وأصحى منو ووقفتا وبقيت أعاين لنفسي في المرآيا القدامي دي وقطرات الموية لسا جارية في وشي وضربة الحجر الإتنت بحديدة في السجن في نفس المحل وبقت معلمة فوق جبيني وواصلة لحدي فاصدة حواجبي اليمين ، سندتا يديني في جوانب حوض الماسورة عاينتا تاني في المراية ولصحتي النزلت كم كيلو وملامحي البقت شاحبة وكأنو تعب السنين الفاتت دي كلها إتهدا فيني ، حاولتا أبتسم بس حتى الإبتسامة المصطنعة زاتها خذلتني هل أنا كدا فعلا حياتي إتدمرت!؟ ، وذنب الناس ديل لسا فيني ، فتحتا يديني قدامي وبقيت بعاين ليهم وهم برجفو ، إنتا فعلا إتدمرتا يا دكتور…..هههه دكتور!!!؟؟ ولااا… إتدمرتا لدرجة إنك حقنة ما حتقدر تمسكها تاني من الرجفة الحاصلة ليك دي فما بال المشارط والعمليات بين الشعيرات الدموية والأوردة والشرايين الرفيعة!!؟؟؟ وفي أخطر مكان الرأس!! ، يا ريت لو ما كان عندي مستشفى ، لو ما إتخصصتا مخ وأعصاب ، لو ما كنتا طبيب أصلا،،،،
سومة جات وقفت قدامي قالت لي أنور! وإتكلت علي الحيطة وبقت تعاين لي أنا طوالي شلتا المنشفة وجففتا وشي ويديني وطلعتا من غير أعاين ليها حتى ، كيف حأقدر أعاين ليها!؟ خايف نظراتي تفضحني ، نظراتي الكلها بقت خيبة وخوف من المجهول والواقع والقادم كلها نظرات إستسلام وكسرة نفس قعدتا لمن هي جات عملتا نفسي مشغول بالأوراق الفي التربيزة حقتي قدامي جات قعدت جمبي وأنا عامل نفسي مشغول شلتا ورقة وقلم نظام داير أكتب حاجة او كدا بس يديني خذلوني من الرجفة وهي ملاحظة الحاجة دي طوالي ختيت الورقة والقلم وفتحتا اللابتوب وعملتا نفسي مركز فيهو وداير أتصفح بس برضو حتى الأزرار حقتو ما قادر أدوس عليها بثبات وقبل تتكلم معاي او تقول حاجة قفلتا اللابتوب وقمتا قلتا ليها عاوز انوم وما إنتظرتا ردها ومشيت وخليتها قاعدة في محلها رقدتا وأنا بحاول أنوم وأتقلب يمين وشمال بس ما قدرتا في النهاية قمتا وقعدتا في السرير ودا كلو وهي بتعاين لي ، مشت شوية وجات لبست عباية الصلاة وجات قعدت جمبي تاني قالت لي دايرة أصلى ركعتين قلتا ليها طيب صلي وما قبلتا عليها أصلا ، قالت لي لا بس دايراك إنتا تصلي بي ( فعلا يمكن دي الحاجة الأنا محتاجة حاليا مشيت إتوضيت وجيت وقفتا في المصلاية عاينتا ليها سريع كدا إبتسمت لي ووقفت وبديت الصلاة بكل هدوء بعد خلصتا ولسا قاعد في المصلاية قامت وجات جابت لي المصحف وفتحت سورة يس قالت لي أقرأ عاوزة اسمعك بديت أقرأ علي أقل من مهلتي لحدي إنتهيت منها ولسا قاعد في المصلاية قالت لي أحسنت قولا كريما وشالت مني المصحف رجعتو في محلو وجات قعدت قدامي في المصلاية ومسكت يديني شديد بالرغم من إني كنتا ما داير أعاين ليها بس غصب عني رفعتا عيوني وعاينتا ليها جوا عيونها لكن ما النظرات الإتعودت تشوفها مني ، ما النظرات الثابتة الكلها حب وثقة بالنفس وأمان ، ما النظرات الكلها دعم ونجاح وتفاؤل ، نظرات كلها مهزوزة ومكسورة وعيون كلها حزن وخيبة وفقدان ثقة بالنفس ، إتكلمت وأول حاجة قالتها لي بعد إبتسمت أنا بثق فيك شدييد وعمرها الثقة دي ما إتغيرت ولاا إهتزت ومتأكدة وواثقة إنك ما حتعمل حاجة زي دي او تفكر فيها مجرد تفكير ، أنا عارفة إنو الطب من البداية ما كان إختيارك ورغبتك بس إنتا أخلصتا فيهو وأثبتا إنك قادر وبقيت مصدر فخر وقدوة لغيرك وتلاميذك وأهلك ، يا أنور كل حاجة قضاء وقدر ، وقدر أخف من قدر ، إنتا عارف إنو دكتور ماهر وأشرف وجون طلع إنو المستشفى الفي الهند هناك كلها لتجارة الأعضاء!! ( عاينتا ليها بخلعة وإستغراب) قالت لي أيوا وخلو دكتور جون يديرها وهم يجو يديروا القسم حق الكلى الهنا الفي مستشفاك عارف لييه؟ لأنو المستشفى حقتهم الهناك فيها دكاترة من كل التخصصات من دكاترة قلب ، كلى ، عيون، جراحين ، ممرضين ، أطباء مختبر ، وغيرو يعني طاقم طبي كااامل لكل الأعضاء ، في الشغالين بإرادتهم وفي الورطوهم غصب في الحكاية دي وما قدرو يطلعو منها، بس كانو بفتقدو لدكتور متخصص في المخ والأعصاب ولمن لقوك إنتا شاطر وناجح كانو حيكلموك عديل ويخلوك تنضم ليهم بس إنتا كنتا بتتهرب من أجواء المستشفيات دي ومكتفي بواحدة بس فدكتور ماهر لمن شافك كدا بقى يلح عليك لحدي ما إنتا قبلتا تنضم ليهو لكن بشرط بعد دكتور ويليام يجي يمسك محلو وبعد تنضم هم يورطوك وتلقى نفسك بين خيارين يا تواصل معاهم يا يكون آخرك السجن والعقاب ويمكن (سكتت حبة وواصلت) الإعدام ، فعشان كدا هو ياداب القسم الهنا ليهو شهرين من إتفتح وإنتا مسكتهم القسم وضمنو محلهم حتى بدو ينفذو خطتهم وعم متوكل وعبودي ربنا يرحمهم والشاب زياد كانوا أول تلاتة ضحايا للخطة دي
طيب يا أنور برجع وأقول ليك قدر أخف من قدر عارف لييه؟؟ (عاينتا ليها بتساؤل) ، قالت لي إتخيل معاي لو كنتا إنضميت لدكتور ماهر من سفرتك حقت الهند ديك! إتخيل معاي الحيحصل شنو كان!!؟؟
عارف كان حتكون ساهمت ما في تجارة أعضاء لتلاتة بس يمكن 300 أو 3000 أو أو أو …والعدد حيضاعف علي قدر الأيام والحالات البتجي فيها والعمليات البتتعمل فيها كمان ، بس ربنا رحيم شديييد بعبادو ولطيف وعرف نواياك عشان كدا سخر ليك رجعة سريعة سببها كان الحادث الحصل لخالتو منال أمك ونجاك من الكان حيصل معاك ، قدر أخف من قدر يا أنووور أحمد الله كتيير كان ممكن نتحرم كلنا من شوفتك تاني ، ،
وأزيدك حبة دكتور ماهر صاح ورطك وخلى كل الأدلة عليك بس هو نسى إنو ربنا عادل وقادر إنو يقلب الموازين ما عارفة كيف بس دكتور ويليام والدكتارة الهناك إتعاونو مع الدكاترة الفي المستشفى الهنا والمحامين الجابوهم في قضيتك لحدي قدروا يجيبو أدلة وشهود ، ولمن دكتور ماهر لقى في النهاية إنو القضية بقت ماشة لصالحك حاول يهرب بس قبضوهو وكل المعاهو وحيتخذوا معاهم كل الإجراءات والعقاب اللازم واكيد ربنا ما بضيع حق المظلوم ، معاي إنتا يا أنور؟؟ قلتا ليها ااي معاك وأنا لسا في حالة صدمة من السمعتو وبتخيل في حجم المصيبة الكان جايني
قالت لي طيب الخطوة الجاية شنو!؟؟ يعني حتوقف حياتك في النقطة دي وتنسى كل مجهوداتك وبحوثك وسهرك وشهاداتك ….وبالسهولة دي!؟ وبعد دا تخلي مجالك دا!؟؟
لا طبعا وإنتا ما محتاج طبيب نفسي إنتا محتاج تواجه مخاوفك وتخت النقاط علي الحروف وتبدأ تاني وترجع أحسن من ما كنتا ، وأول خطوة هي إنو لازم تمشي لأهل عم متوكل وعبودي وزياد وتواجهم مش تهرب منهم لأنو إنتا ما حتهرب من حاجة ما عملتها عمرك كلو! وأنا معاك في الصغيرة قبل الكبيرة وجمبك وحبي ليك ما نقص ولاا ذرة ولسا إنتا أنور دكتوري وما دايرة أشوفك كدا لأني جد بتقوى بيك، ، ، وقامت علي حيلها وطلعت برا الغرفة ، وأنا لسا قاعد في مكاني وبستوعب وبراجع لسا في كلامها دا لحدي بعد مسافة جات شايلة صينية فيها كوبين قهوة ختتهم علي التربيزة إبتسمت وقالت لي إشتقتا أشرب معاك قهوة الليل دي قوم تعال ولااا أجي أشربها معاك في الأرض!؟ ، شالت الصينية وتاني رجعتها قالت لي هيي صدقتا ولاا شنو ما بقدر والله قوم تعال ، ضحكتا ضحكة قصيرة بس صدقوني كانت من جواي قمتا وأول شيء بعد حصلتها ضميتها علي بكل الإمتنان والحب وقلتا ليها جد أنا بحبك يا سومة إنتي بتقولي إنك بتتقوي بي وإنتي ما عارفة إنك قوتي كلها ، ضحكت وقالت لي ما أنا براي صاح وختت يدها علي بطنها ضحكتا فيها وقلتا ليها ايوا إنتو الإتنين وشربتا أحلى قهوة من إيديها بعد فترة طالت شهرين وإسبوعين وبعترف إني الليلة أول مرة أنوم فترة طويلة من دون كوابيس وإن شاء الله أرجع دكتور أنور زي ما كنتا……..

كغيمة مطر مرت علي في عز هجيري وصيفي
فأحيت أزهار ربيعي و روت ظمأ جوفي
وبعثت الراحة في قلبي