وفي الجزء الثالث من رواية المنبوذة ماذا يا تري سيحدث من مواقف مشوقة مع ابطال الرواية ؟ دعونا نعرف ذلك في السطور التالية بإذن الله مع الكاتبة آلاء آدم .
الجزء الثالث من رواية المنبوذة
منار ما عارفة نفسها في الواقع ولا بتحلم!! كانت في مكان مجهول! والاضاءة خافتة واقرب للظلام! بقتت تتلفت يمين شمال وما شي غير الضباب وم متسمع غير صوت الارض!! صدقوني الارض كانت بتتنفس!! وكأنة في بركان ثائر وعلي وشك الانفجار!! بقت تقول انا وين؟! سمعت الصوت الما بيخفى عليها!! بتقول ليها نحنا في ديارنا!!
منار الخوف بدا يتسلل لدواخلها وقالت ليها انتِ منو؟ وعايزة مني شنو؟! فجأة قام اعصار وفيه نار لاهبة وبقى يلف حولين منار وهي ف نصو!! ولمن جلدها بدا يتقشر من شدة اللهب!! بس الغريبة ما كانت حاسة بالالم!! وبتعاين لجسمها مزهولة!! وفي وسط النار شافت طيف اقرب لجسم المرأة من الرجل!! قالت ليها ملكتك………….؟ وذكرت اسم سرياني اذا اتذكر اعوذ بالله قد يحضر عفريت من الجن اعوذبالله من الشيطان الرجيم!! منار رددت الاسم!! الطيف بقت تضحك بفرح وقالت لمنار انتي المختارة!! انتي الوحيدة الما احترقتي بعد ذكر اسمي!! وفجأة وبسرعة عالية غيمة سودا غطت منار!! وفي اثناء ما بتحاول تشوف البيحصل حولينها ولقت نفسها في سريرها وناس البيت حولينها وبقولو الحمد لله فتحت!! بادرت بالسؤال وقالت ليهم ف شنو؟! نادر قال ليها سمعناك صرختي!؟ ولم دخلنا عليك كنتي فاقدة الوعي بس لم امك رشتك بالموية فتحتي الحمدلله!! انتي كويسة!! قالت ليهم شكلي كنت بحلم!! الام كل شوية خوفها بزيد علي بنتها.. وحسبت الساعات في يدها لحدي ما. اليوم التاني جا! ومن الشمس شرقت طلعت علي اختها وساقت معاها منار!! في الاول رفضت تمشي معاها واتحججت بأنها ممتحنة والامتحان حيفوتها!! امها رفضت وقالت ليها اصلا انت م قريتي وغير كده شايلين ليك اورنيك من المدرسة!!! في الاخر قدرت تقنعها وطلعو!! وخالتها لاقتهم في السوق وودتهم للشيخ؟! شكلهم وصلو بدري لقو الحتة فاضية!! واخت حنان لانها متعودة تجي قالت ليهم ما شفتو المكان ده بتملي كيف لحدي الظهر!! والله محل تقعدي فيه م تلقي!! سألو عن الشيخ! حوارو قال ليهم الشيخ في خلوه بطلع بعد يومين!! مريم اخت حنان بتعرفو لانها مواظبة علي الجية! وبقت تحنس فيه عليك الله ي فلان شوف ابونا الشيخ وبت اختي حالتها صعبة!! قال ليها والله م بقدر اساعدك الا بعد يومين وليك علي ادخلك بعد بكرة اول زول لابونا الشيخ!! فجأة وهم طالعين جا طالع راجل مبشتن ولابس مشرط ومسك منار من يدها!! كلهم اتخلعو ولمن منار بقت تلاوي فيه قايلاه مجنون!!؟
بس الحوار قال ابونا الشيخ!!؟ بخلعة كده!! الشيخ اتلفت عليه وقال ليه دخلهم لي سريع!! ودخل لنفس الغرفة الطلع منها! ! الحوار اتخلع!! وقال ليهم لي عشرين سنة بخدم ابوي الشيخ ما حصل قطع خلوتو عشان اي شي ومهما كان السبب!! امو ماتت ما طلع من خلوتو يطلع عشان بتكم دي؟! مريم قالت ليه عشان بتنا تعبانة وقلبها ابيض ابونا الشيخ بكون شافها في الخيرة!! منار خطوتين ما مشتهم سمعت الهمس!! قالت ليها ده كلب مطيع لينا ما حيفيدك! امها لما شافتها واقفة مسكتها وقالت ليها ارح ادخلي!! ومنار مترددة!! خالتها قالت ليها عارضها قوي بتك دي ودفرتها دفر ودخلو!! الشيخ نهرهم وقال منار بس!! الباقي برا!! خالتها بقت تكبر وتهلل!! من كرامات الشيخ انه عرف اسم منار وهو ما حصل شافاها ولا بيعرفها!! قمة الجهل والتخلف!!؟
قالت لامها خليك معاي!! امها قالت ليها انا قريبة جنب الباب!! وطلعو!! جاها ملهوف! مسك يدينها وبعاين فيهم بطريقة غريبة كأنه بقرأ ليها كفها!! وبسأل فيها نظرك كيف؟ عندك قصر نظر ولا لا!! وعينك فيها حول!! وكان مرتبك شديد!! وقال ليها لسانك اهم شي اللسان مشقوق!! عندك شقة في لسانك!! وعايز يجر ليها نقابها قامت مزعورة وقالت ليه انت شيخ!! كان حيطير من الفرح وكأنو لقى ليه كنز!!
طلعت منو مسرعة وشبة مهرولة!! امها حصلتها وبقول في شنو مالك الحصل شنو؟! بس منار ابت تقيف وطلعت برا البيت وامها وراها!! وخالتها دخلت للشيخ الدجال!! قالت لينا بتنا عندها عارض مووووش ي شيخنا!! ضحك وقال ليها كلنا معانا عوارض بس بنتحصن!! وشال بيانات منار وسكنها ورقم تلفون امها ووعدها انه يجي للبيت يعمل ليها رقية شرعية وطلعت منو مبسوطة نظام اجزت وساعدت بت اختها بس ما عارفة المصيبة الوقعت فيها بنت اختها شنو؟!
منار رجعت البيت والصوت بيهمس ليها كشفو حقيقتك!! حيتنافسو عليك بس انا بحميك لانك ملكي!!
منار خالفت واعترفت لامها بأنها بتسمع اصوات وفي مرا بتتكلم معاها!! من هي صغيرة!! الام من الخلعة صدمت!! منار بعد امها فاقت خلت معاها خالتها مريم وطلعت علي مستشفى للامراض العقلية!! بقت تبكي وبتقول ليهم انا مجنونة عالجوني انا بقيت خطر علي ناس بيتنا انا تعبانة!! وبقت تصرخ!!لحسن حظها كان في دكتور في حوش المستشفى وسمع كلامها مع الحراس الرفضو يخلوها تدخل!! جا عليها وقال ليهم خلوها تجي علي عيادتي!! فعلا في خلال خمس دقائق ودوها ليه!! سلم عليها بطيبة وشاغلها ولشنو بنتي الحلوه الامورة تجي مستشفى امراض عقليه!! وقايلها بتمر بمشكلة اسرية وقال ليها انا اولادي لم اشاكلهم بشيلو ملابسهم في كيس وبقولو حنخلي ليك البيت ي بابا!! ضحك وقال ليها جيلكم ده غريب شديد!! نحنا زمان الواحد دمعتو في عينو واثر اصابع الكف في وشو ويقعد ياكل غصب!! اسسسه انتو كان الاكل ما عجبكم ساااي ممكن تطردونا من البيت!! منار قلعت نقابها!! لم شاف التشوه الخلقي!! اتجمدت ضحكتو!! وعرف انها بتمر ب ازمة حقيقية!! وبقي يحفز فيها انتي حلوه ودي طفرة جينية وعادي بترجعي طبيعية انا بساعدك وبوصلك لجراح تجميلي شاطر!! وما تشتغلي بالمجتمع لانك لو كنتي ملكة جمال مستعدين يطلعو فيك عيب!!
بكت وقالت ليه عمري م شلت هم لشكلي وصدقني شكلي ونظرة الناس لي دي ابسط همومي ومشاكلي!! الدكتور بإستغراب قال ليها طيب مشكلتك شنو؟! وحكت ليه قصتها بالتفصيل!! الدكتور لمن ملامحو اتغيرت!! بالجد خاف!! ولم هبش الرزنامة بدون قصد ووقعت علي الارض لم قام ناطي!! منار ابتسمت!! وقالت ليه انت موووش بتمر بالحالات دي كتير!! ولا المجانين البتتعامل معاهم ديل لابسهم مهرج ما جن!! قال ليها اعوذبالله من الشيطان الرجيم!! نحنا بنتعامل مع مرضى يعني بشر زينا بنديهم ادوية ومرات كهرباء وبنفضفض معاهم زي ونستنا دي!! بس ما حصل اتعاملنا مع دلاك مباشرة!!! واستعاذ بالله منار قالت ليه فما بالك انا متعايشة معاها من صغري واااسه حاساها جنبي!! الدكتور قام على حيلو ووقف جنب الباب!! قال ليها معليش ما بقدر اساعدك شوفي ليك شيخ حقيقي وبعالج بالقرأن ما دجال!! اما زولك المشيتو ليه ده من عبدة الشيطان اعوذبالله ومفتكرك شخص زهروي!! قالت ليه كيف يعني زهروي؟! قال ليها في اطفال بتولدو بميزة انهم بتواصلو مع العالم الاخر!! قلت ليه مع الاموات!! قال ليها لا اعوذبالله من ان يحضرون!! العالم الاخر نوع البتتكلم معاك دي!! المهم ابحثي عن الموضوع في النت وان شاءالله تتعالجي وابعدي عن الدجال ده لانو شكة فيك وحيعمل المستحيل عشان يحصل عليك!! اختفي من سكنك لفترة ولا امشي محل ما يقدرو يصلو ليك فيه!! وكل الكلام ده وهم جنب باب عيادة الدكتور!! في طالب امتياز لقط كلمة زهروي لانه ده بحث تخرجو واجازو زمان بس ما حصل لاقى شخص حقيقي وفي قصص ما بتتصدق اساسا!! وهي طالعة حصلها جنب باب المستشفى افتكرتو عايز يعاكسها قلعت نقابها وعاينت ليه بغضب وكملت طريقها وقبل ما تقطع الزلط وقفت ليها عربية في وشها وخطفوها وهو الوحيد الكان في الشارع وشاف الحصل!!؟
نواصل بعدين
يتبع ……..
لقراءة الجزء التالي : الجزء الرابع من رواية المنبوذة
لقراءة الجزء السابق : الجزء الثاني من رواية المنبوذة
للإطلاع علي فهرس أجزاء الرواية : جميع روابط اجزاء رواية المنبوذة للكاتبة آلاء آدم
جميع الحقوق محفوظة للكاتبة آلاء آدم .
