وفي الجزء الثالث من رواية قد كفاني دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة آيه إبراهيم .
الجزء الثالث من رواية قد كفاني
رمت نفسها في حضني وبقت تبكي انا مسكتها وهديتها وجبت ليها موية تشرب وعلى كدا عدا اليوم ومثاني طبيعي بقت تراعي لكلماتها وعائلتي هادئة شديد بليل كدا جاتني صحية لقيت امي بتصلي وسلمت مشيت قعدتا جنبها قالت لي مهجة انا خايفة شدييد قولتا ليها خايفة من شنو قالت لي خايفة اموت وانا مقصرة في حق ربنا خايفة اموت قبل احج خايفة اموت وانا م حافظة غير قصار السور قلتا ليها يمة الله يطول بعمرك في الخير يا غالية ابشري تب م في عوجة من بكرة انا ببدا احفظك اما بالنسبة للحج بسعى اني اشوف ليك طريقة اصلك م تشيلي هم قالت لي بفرحة كدا عليك الله قلتا ليها بإذن الله قالت لي مهجة الله يقويك وينصرك ويحفظك انتي واخواتك عافية وراضية عنكم محل م تمشوا قولتا ليها اللهم آمين وبستها في راسها ويدينها قلتا ليها يمة انتي الجاب لينا الحاجات القبيل منو؟؟ قالت لي انا ذاتي م عارفة قال لي قولي لي مهجة لمن تجي تعالي الشركة القبيل كنتي فيها سكتا مسافة وقلت ياربي دا ياسر ولا زول تاني ( انتو تتوقعوا ياسر ولا زول تاني ) قلتا ليها يمة شكلو كيف؟ قالت لي مهجة انتي اكيد بتستهبلي نحنا من متين بنعاين في وجه الرجال عشان نحفظ شكلهم وهسي نفترض اني شفتو ووصفتوا ليك بتعرفيهو؟ قلت ليها ابدا والله وقولتا في سري سبحان الله امي دي فاهماني اكتر من نفسي قالت لي وين سرحتي امشي نومي ليك نوم ينفعك انا عايزة اتم صلاتي ،في حاجة بتقول لي م تمشي طوالي وقت احس بالاحساس دا بتوضأ وبصلي مشيت اتوضيت وانتظرت امي تصلي لانو مصلايتنا واحدة بس فترة سجود امي طالت مشيت شلتا لي مصحف قريت بس امي م قامت قولتا ليها يمة تمي عشان عايزة اصلي وراك برضو م قامت قعدتا جنبها في المصلاية قلت اكيد بتكون اشتاقت لي ابوي وقاعدة تدعي ليو لانو هو الدعوة الثابتة في كل صلاة ليها
هبشتها بي يدي جات واقعة انا هنا خلاص الفيني انتهت شغالة اقول ليها يمة ردي علي يمة كليتك واجعاك يمة مالك عليك الله ،م في ااي رد والساعة كانت ماشة على واحدة صباحا جريت عايزة اشوف عربية عشان اوديها الدكتور مثاني مسكتني وقالت لي تعالي، مهجة انتي من يومك قوية م تضعفي في الأوان الأخيرة نحن محتاجين ليك وزول بقع كدا الله اعلم يكون فيهو روح انا هنا يداب صحصحتا وكوركتا فيها قلت ليها تقصدي امي ماتت ابدا والله هسي كانت بتقول لي انا عايزة احج عايزة احفظ القرآن هسي قالت لي عافية وراضية عنكم هسي قالت امشي نومي مثاني ادتني كف وحضنتني عليها وقالت لي مهجة انتي ما مومنة انتي ما عارفة انو الأجل اقرب إلينا من حبل الوريد امي الله اداها ماتت وهي ساجدة يعني فازة في اخرتها مفروض نبكي على نفسنا الماعرفين نفسنا ح نموت حسن خاتمة ولا سوء خاتمة انا والله كلامها كلوو م سامعة بس بتردد في اضاني صوت امي فجاة اتذكرت رهف وقلت اكيد بتكون قامت لانو الكرسي بعيد منها جريت ودخلتا الاوضة عشان اخفف عن رهف لقيتا زحفت ووصلت امي وما كانت بتبكي خالص ووشها كان مختوف شديد شوية كدا واغمى عليها مثاني جات والاتنين في لحظة واحدة جرينا عليها صحيناها ابت تقوم مثاني جرت جابت موية رشتا ابت تقوم الساعة ماشة على اثنين صباحا مثاني قالت لي اكرام الميت دفنه لازم نحنا نتقوى ونغسل امي عشان مع صلاة الصبح نمشي المسجد وننادي الرجال عشان يصلوا عليها رفعتا رهف في السرير وجسمها كان خفيف شديد حتى انو انا ومثاني استغربنا شدييد من الحاجة دي المهم غسلنا امي وانا والله ما قادرة مثاني كانت اضعف مني بمراحل بس متقوية عشان انا ضعفي بقى ظاهر شديد وكلام امي بتردد في اضاني بعد انتهينا مثاني مشت اتوضت وجابت لي إبريق بس انا ابيت اقوم بعد تحنيس اتوضيت وقعدتا رجعت لي رهف بصحي فيها بس نهائي مافي حركة مثاني بعد اتوضت جابت المصحف وفتحت سورة البقرة وتحديدا( واذكروني اذكركم واشكروا لي ولا تكفرون يأيها الذين أمنوا إستعينو بالصبر والصلاة إن الله مع الصابرين ولا تقولوا لمن يقتل في سبيل الله اموات بل أحياء ولكن لا تشعرون (154) ولنبلونكم بشئ من الخوف والجوع ونقص من الاموال والانفس والثمرات وبشر الصابرين(155) الذين اذا اصابتهم مصيبة قالوا إنا لله وإنا إليه راجعون (156)
يلا تاني ما قدرت تواصل وجسمها رجف والمصحف قرب يقع من يدها وصوتها كان برجف لمن بتقرا لمن شوفتا حالتا دي قولتا ليها ( كل نفس ذائقة الموت وإنما توفون اجوركم يوم القيامة ومن زحزح عن النار وادخل الجنة فقد فاز وما الحياة الدنيا الإ متاع الغرور )
ومسكنا بعضنا وبكينا سمعنا الاذان الاول اذن قولتا لي مثاني انا لازم امشي المسجد اجيب الكفن والعطور عشان بعد الأذان الثاني ح يجيو ياخدوها الرجال وقلت ليها اقعدي مع رهف انا ماشة قالت لي م تمشي عليك الله مسكتها من يدينها وبستها وقولتا ليها لازم نصبر في امان الله مرقتا من البيت وانا والله جسمي مهبط شديد والألم الفي قلبي اكبر من انو يتكتب عنو وصلتا المسجد لقيت الإمام قاعد قولتا ليها السلام عليكم قال لي وعليكم السلام ورحمة الله وبركاته يا بتي الحاصل شنو جاية كدا ان شاء الله خير قولتا ليهو يا عمو عايزة كفن الإمام كان قاعد قام على حيلو وقال لي منو المات قولتا ليهو انا
————————————–
———————
*☆يتبــــــــــــــــــــــــــــــــــــــــــــع☆☆*
لقراءة الجزء التالي : الجزء الرابع من رواية قد كفاني
لقراءة الجزء السابق : الجزء الثاني من رواية قد كفاني
للإطلاع علي فهرس اجزاء الرواية : رواية قد كفاني ( جميع الأجزاء كاملة ) للكاتبة آيه إبراهيم
جميع الحقوق محفوظة للكاتبة آيه إبراهيم .
