الجزء الثالث من رواية كنت للروح سقيا

وفي الجزء الثالث من رواية كنت للروح سقيا دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة شهد محمد .

الجزء الثالث من رواية كنت للروح سقيا

ويضئ قلبي ما كان حديثنا صوت وبضعة أحرف وكلام 

=افهم اني كنتي منتظرني؟ 
انا :ما منتظراك منتظراك بالمعنى الحرفي بس كان نفسي اتعرف على الشخصيه المطارداني في اي مكان دي
=يعني لاحظتي لوجودي؟
انا:طبعا لاحظت
=لي ما جيتي وشاكلتيني زي ما بعملو في العاده
انا :لانو وجودك يمكن بقا أمان بالنسبة لي ومطمنه انو لو حصلت لي اي مشكله انك ح تنقذني وحتى شجن ربنا يرحمها كانت بتقول لي طالما الود ده وراك اما كده مطمنه عليك 
= ربنا يرحمها ويغفر ليها وربنا يرحم الوالد برضو ويسكنه فسيح جناته
انا :اللهم امين يارب… يلا انا ماشه
=برضو ح تدخلي!
انا:لا انت فاهم غلط انا جيت أزور صحبتي بس ما اكتر
=طيب ممكن بعد صحبتك اخد من زمنك شويه!
انا :عمري ما كنت متساهله بالطريقة دي مع زول ما بعرفو بس لازم أسألك اسئله كتيره ف اوك
=طيب عندي شغله بسيطه كده وح انتظرك اتاكدي انك ح تطلعي تلقيني منتظرك
******
قعدت مع صحباتي وحقيقي طلعوني من جو الكآبه الانا فيهو وم فشلو في أنهم يطبطبو على جروحي  بعد خلصنا كل وحده اتحركت على وجهتها وانا كنت عارفه وجهتي وين 
طلعت وفعلا اول ما طلعت لقيتو في وشي مشيت عليهو وقال لي رايك شنو أوديك مكان قريب ظريف؟ قلت ليهو طيب واتحركنا حقيقي المكان كان ظريف وهادي اول ما قعدنا بديت ب
انا :معقول ما تعبت؟ ليك 8شهور متابعني؟ 8 شهور مصر انك تظهر لي في كل مره؟
=الماشي على حلمو ما بتعب بعافر وبعافر لحدي ما يصل 8 شهور عدت زي الكانها يوم 8 شهور ما كانت كفايه بأني كل يوم احبك اكتر واكتر 8 شهور ما في يوم جاتني القوه ولا فكرت اني أوقف قصادك واواجهك ولا كنت عارف ح أقرب عليك متين بس كل الكنت عارفو ومتاكد منو انو لو في شي صح اعملو ف هو اني اخترتك انتي من دون الناس 
انا:والليله كيف جاتك القوه؟
=ما كنت قايلك ح تزوري صحبتك كنت مفتكر انك ح تقابلي دكتور نفسي ما اقول ليك هم اي كلام زي ما بقولو الناس بس كنت شايف انو انا أحق بالكلام الح تقولي انا أحق بانو اداوي جروحك وانا أحق بدموعك. الح تنزل وانتي بتحكي قصة موت اختك وابوك في نفس اليوم ما تتخيلي انا لمن نفسي كيف انو ما قدرت اكون معاك ولا قدرت أقرب ليك بس كنت متأكد بأنك ح تقوي في يوم من الايام وح توقفي على رجولك زي ما انا شايفك اسي 
انا:انا اسفه بس ممكن نمشي بعد ده عارفه كانت فتره بسيطه شديد بس محتاجه امشي البيت اسي
=جدا انتي اطلبي وانا بلبي
…………………….
وصلنا وشكرتو ومشيت من غير ما اسالو عن اسمو حتى لاني عارفه ومتاكده انو ح الاقيهو تاني وتالت ورابع عارفه بانو ح اقعد معاهو قعدات كتيره جدا أن شاء الله 

=ما سألتها عن شي جديد لاني عارف كل شي عنها عارف اي تفصيله بتخصها وبتهمها 

******
دخلت الغرفه غيرت ملابسي عاينت ناحية الحيطه لقيت صوره لينا انا وشجن وامي وابوي وفي صوره لينا انا وشجن برانا اما بالجهة التانيه ف كانت كلها عباره عن صور لينا انا وشجن او صوره لي انا بس أو لشجن بس شحن كانت بتحب تعلق الصور في كل مكان كل الغرفه كانت فيها لمسات شجن كل مكان فيهو خيال شجن جيت على صوره لينا انا وهي كانت صوره عاديه جدا بس اتذكرت موقف ظريف حصل في وقتها

فلاش باك 
شجن :عايني الصوره طلعت حلوه كيف
انا :عشان انا معاك 
شجن :ما تنسى انو ظهوري في الصوره مؤثر برضو 
انا : امممم
شجن :خلينا ندخل جو الهنود شويه كده… ف عندك وقت اقولك فيه!
انا :مبرتاحش الا وانا جنبك 
شجن :وم بستحملش اغيب عنك … بس حقيقي ي شهد انا من غيرك ولا شي انتي أهم حاجه عندي بعد امي وابوي طبعا أهم شي عندي انك تكوني مبسوطه وكويسه ف عايزه أسألك انتي كويسه؟ اسفه لاني انشغلت عنك كم يوم وم قعدت معاك ولا سألتك الحاصل معاك شنو ولا عملت معاك حاجات كتيره ولا طبخنا ولا اتصورنا ولا اي شي.
انا:انا كويسه بوجودك معاي من غير م تسالي حس انك في حياتي براهو مطمن وبديني طاقه 
شجن: وبعدين شايفه انك قدرتي تتجاوزي انا كلمتك انك قدها وقدود انتي اختي ف لازم تكوني قويه زي
انا:خلاص خلاص نبطل الجو بتاع الهنود ده 

لأول مره اتذكر حاجه بتخصها وم ابكي هي ما تستاهل بأني اعذبها بسبب دموعي هي محتاجه دعواتي بس
……………………………………
مشيت على امي واتكلمت معاها شويه أثناء كلامنا قالت لي بتذكر في مره كنتي عيانه ما عارفه بالضبط عندك شنو بس كل البتذكرو انو ابوك كان خايف عليك شديد كان شايل همك اكتر مني كان بجري بيك من مستشفى لمستشفى اااي شي كنتي بتطلبي كان بجيبو ليك وحتى شجن استفادت من الحاجه دي وبقت تشهيك في الحاجات الهي بتحبها وانتي بالتالي بتكلمي ابوك وهو بجيبا ابوك كان بحبكم شديد قلت ليها وكان بحبك برضو 
قالت لي لازم 

قلت ليها عززززززه ياااا 
(امي اسمها عزه وابوي كان بناديها بعزتيابوي كان مثال للزوج والأب المثالي)
……………………………………..
تاني يوم طلعت مع العصر للسوبر ماركت لاقيتو تاني
انا: انت ساكن قريب
=يعني ما بعيد
انا :على فكره اول ايام كنت بقول عليك شماسي ساي
=ما مشكله مقبوله منك… كيف خالتي؟
انا:كويسه الحمد لله
=وانتي كويسه؟
انا:ايوه الحمد لله
=المره الفاتت ما قدرت اشيل رقمك ف ممكن رقمك؟
أنا :نشوف اخرتك بقاا
=ما تنكري انو في بشدك اتجاهي برضو
انا:الناس تبطل ثقة 
اديتو الرقم ومشيت البيت اول ما وصلت مسكت التلفون منتظره رساله أو مكالمه منو بس ماف شي
انتظرت وانتظرت قريب العشاء جاتني مسج مكتوب فيها
ازيك يا ستهم
عرفتها انها منو بس المحيرني انو رقمي اساسا عندو والدليل انو رسل لي قبل كده ف لي سألني؟
قلت ليهو الحمدلله وانت؟
=بخير الحمد لله.. ح اجاوبك قبل ما تسالي
انا :ياريت
=رسلت رقمك الليله مع انو عندي عشان اتأكد انو برضاك والمره الفاتت ما قدرت ما اعزيك ف قلت الوتسب احسن حل
انا :اممم فهمت… اسمك منو عشان اسيفك؟
=اسمي لؤي
(ده اسمو احفظو عشان ما تقولو لؤي ده منو لقدام)
انا :سيفتو
لؤى :في تلفونك بس قلبك متين؟
انا:لسه بدري عليك
لؤى :ما عندي مشكله بنتظر 

بقينا شويه كده وأستاذن انو طالع ف قلت ليهو طيب 

بعدها امي نادتني عشان نمشي انا وهمس نجيب اللبن من الدكان
(همس وخالتو من يوم البكا ما رجعو خالتو قررت تقعد لحدي طلعة امي)

طلعنا واحنا ماشين على الدكان وقفت مكاني بعد ما شفت مروان

“وتظن أن الدائرة مغلقة ف تكتشف ان هناك ثقب صغير لا يُرى ”

يتبع …………

لقراءة الجزء التالي : الجزء الرابع من رواية كنت للروح سقيا

لقراءة الجزء السابق : الجزء الثاني من رواية كنت للروح سقيا

للإطلاع علي فهرس اجزاء الرواية : جميع روابط اجزاء رواية كنت للروح سقيا للكاتبة شهد محمد

جميع الحقوق محفوظة للكاتبة شهد محمد .