الجزء الثامن من رواية إمرأة بلا هوية

وفي الجزء الثامن من رواية إمرأة بلا هوية دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة بت محمد جمال الدين .

الجزء الثامن من رواية إمرأة بلا هوية

اتلفت عشان يقفل الباب بس لقي ميناس واقفه وعيونا لمن محمره بالغضب ،،،،
خطاب استجمع قواه وقال : ميناس حصلت كمان تراقبيني ؟
ميناس في غضب والدموع ماليه عيونها: لكن زي قوه عينك م قابلتني خااالص  اسمع اذا عايز الموضوع ينتهي تطرد السايبه المشرده دي اسي في الليل دا وتسلمني مفتاح الشقه كمان !!!! كدا ممكن انسي الشفتو والسمعتو…..
خطاب : مستحيل اطرد رهف،،،، بعدين هي م عندها ذنب اذا عندك حساب صفيه معاي انا ،،،،
رهف شالت تلفونا ودخلت جوه واتصلت ب كريم وطلبت منو يجيها الصباح بدري في حته معينه ،،،،
خطاب مسك ميناس من يدها وجراها علي العربيه الجات بيها ورسل رساله ل رهف ( آسف ي عمري اوعدك م حتتكرر تاني بحبك)

رهف فضلت سهرانه لحدي الصباح تفكر في حياتها ح تعمل شنو ؟ ومعقوله تقدر تعيش في بيت كريم بعد التعامل الشافتو من اهله ؟ وكيف تعيش معاهم وهي م معاها ولاجنيه وكمان م بتقدر تشتغل في الصيدليه بعد الحصل،، مستحيل تخرب بيت الراجل الوحيد الوقف معاها وكان السند الحقيقي ليها وحست معاه بالامان ،،،،
اخر شي لبست عبايتها وشالت معاها لبسه واحده بس ،،،،، وكتبت رساله ل خطاب وسلمت مفتاح الشقه للبواب ومشت تلاقي كريم في المكان المتفق عليه ،،،،

روضه غضبت جدا بعد سمعت من ميناس الحصل واتكلمت مع خطاب بي لهجه حاده وقالت ليه : انا عايزه اعرف قدام مرتك واختك،،، غرضك شنو ؟ يعني عايز من الاسمها رهف دي شنو ؟ اذا هي نزوه ح تنتهي متين ؟
ميناس : لا يا امي كان حاضنها وصارحها بي حبو 
خوله : ي جماعه كدا م ينفع انتو كدا بتضغطو عليه 
روضه في زجر : اسكتي انتي سكت حسك  شن عرفك بالامور دي ؟ م اسمع صوتك تاني فاهمه؟
خطاب بعد صمت طويل : انا عايش خمسه سنه في جحيم عمري م شفت يوم مع ميناس حلو ،،، انا حي ميت وكل يوم بموت من تصرفاتها سواء كان كلمه جارحه او معايره او تهديد انها ح تسوق ولدي وتمشي ،،، من الاخر كدا مافي زول يتدخل في حياتي اعمل البريحني طالما قايم بي واجبي كامل تجاهك وتجاه ولدي،،
ميناس والعبره ماسكاها : انت بتحبها عشان كدا م داير تتخلي عنها 
انا ؟ انا ست البنات فعلا راجل ناقص وناكر جميل حقيقه ديل الكلب عمر ما ين
بترت كلامها لما خطاب مد يده عايز يضربها بس خوله وقفت بينا وبينو وهو طلع طوالي وركب عربيته مشي شارع النيل ومنو علي الشقه ،،، وكان الشمس شرقت ،،،

رهف بعد سلمت علي كريم قالت في صعوبه : انا كنت قاعده في شقه خطاب وانت عارف كلام الناس وهو متزوج م عايزه اخرب عليه خاصه هو زول وقف معاي  سببت ليه مشاكل كتيره ،،،،
سكتت مسافه وبعدها واصلت : هو شغلني في الصيدليه قسم التجميل بس مضطره اسيب الشغل كمان ،،، وعايزاك تفتش لي شغل وسكن…..
كريم ملامح وشو اتغيرت وجاوب في تردد : لكن انتي عارفه الشغل في البلد دي صعب شديد بس ح احاول ،،،، البقدر عليه حاليا ،،، اوديك البيت تقعدي معانا لحدي م نشوف ليك طريقه ،،،،
رهف : معليش تقلت عليك لكن اوعدك م اطول معاكم انا موصيه صحبتي ل داخليه……
كريم غمغم في صوت خافت : ربنا يستر
رهف : قلت حاجه ؟
كريم : لا لا قلت ربنا يسهل يلا علي البيت.
ركبو الحافله ومشو البيت وفي الصاله لقو اشجان بتنضف واول م شافت رهف قالت : مالك جايه من النجمه صحبك طردك ولا شنو ؟
كريم : اشجان بطلي نقه امشي اعملي شاي وين امي؟
بسمات جات من جوه : اهلا ي بتي اتفضلي ،،،،
رهف : شكرا
بسمات : ح تقضي معانا اليوم دا ؟
رهف في احراج : يعني اذا سمحتي لي عايزه اقعد اسبوعين لمن القي لي داخليه وشغل….
اشجان : شنوووو ؟ وصحبك المليونير خلي بيك ولا شنو ؟ بالمناسبه م سألك مني؟
رهف : مافي بيني وبينو حاجه كعبه ،،، وكمان م سأل عنك …. لييي في حاجه ؟ يعني انتي بتعرفيه ؟؟
اشجان في خوف : مافي شي انسي ،،،،،
كريم : ي زفت انتي اقفلي خشمك دا قبال اقوم عليك 
اتلفت علي رهف وقال : ادخلي جوه غيري ملابسك وارتاحي ،،، انا ماشي الشغل وبجي المساء

وقف نبيل الموتر حقه جنب الصيدليه ولقي الاء سلم عليها وسأل عن رهف ،،،، وعرف انها لسه م جات بس الاء سألته : الليله ماشاء الله المعنويات في السما فرحنا معاك… ريان جات ولا شنو ؟ 
نبيل حس بي ضيق وقال : علاقه ريان بي فرحي شنو ؟ عليك الله ي الويه م تقولي الكلام دا قدام رهف
الاء : ريان دي الفرح كلو ياخ عليك الله حاول حس بيها…
نبيل مشي بتفقد في الادويه وحاول تغيير الموضوع…
الاء : كالعاده هروب

رهف غيرت ملابسها وجات طالعه بس سمعت بسمات واشجان بجيبو في سيرتها ،،،،،
بسمات : دي جايه ل شنو تاني؟ موش كريم فهمها انو حبوبتها شالت نصيبهم من بيع البيت وسافرت والقروش تكون ضاعت في الحادث ،،، انا الفيني مكفيني  الغبي دا لسه بحبها يظهر ،،، اختها الكبيره سفتو وعرست وخلتو تاااااني شبك في دي كمان وبرضو عرست وخلتو قلنا

ارتحنا منها جات تاني كتمت علي نفسنا 
كريم جا راجع يشيل اوراق سمع الكلام بس بسمات طوالي وجهت ليه الكلام : كل المصايب دي منك انت بعدين نسيت انو حبوبتك حرشتها ورمت ليك الدبله في وشك وعرست العجوز الغني داك بس ربك رب الخير قطعها ليهن في راسن مات واولاده طلعوها من المولد بلا حمص وخلو ابوهم يتنازل عن كل ثروته ليهم قبل يموت،،،، والغبيه بت عمك دي فعلا فاقده الذاكره!!! لو م كدا كان شرشحتهم في المحاكم تربيه حبوبتها ،،،،،،
رهف رجعت الغرفه و بكت في حرقه ونادت
كريم وسألتو عن عنوان اهل زوجها في الخرطوم عشان تمشي تجيب شهاده الوفاه منهم ،،،،،،،، بعد شويه جات بسمات وعادت ليها نفس الكلام بس كريم قال ليها في غضب : يا امي مافي داعي للكلام دا ،،
رهف وشها بقي احمر من الغضب وقالت : اطمني انا م عايزه منك حاجه جيت اسأل من عنوان المرحوم عشان اجيب شهاده الوفاة……
كريم : انا اسف رهف علي تصرف امي معاك لحظه اشوف ليك صوره من رقمك الوطني كانت معاي،،، بس باقي الاوراق شلتيها لمن سافرتي…
دخل جوه الغرفه وبعد مسافه جا شايل صوره الرقم ومداها ليها……
رهف بعد مسكت الورقه قالت ليه : طيب ليه كان معاك الصوره ؟
كريم : كنت محتاج ليها في بيع البيت،، انتي من ضمن الورثه
بسمات في غضب : كنتي خادعه المسكين دا ومعشماه بالعرس بس حبوبتك حرشتك قالت ليك انتي شاطره وح تجيبي مجموع يدخلك كليه الطب او الصيدله وهو معاه شهاده ثانويه بس،، وموظف صغير في السكه حديد،، وخلتك تعرسي العجوز داك حبوبتك كانت بانيه آمال كبيره عليك بس ربك كريم م تم ليكم مرادكم 
رهف طلعت و الدموع في عيونها بعد شالت العنوان وصوره الرقم الوطني …..
بقت ماشه وم عارفه علي وين ياربي تتصل ب الاء وتسألها عن موضوع الداخليه ؟؟! بس حتي اذا لقت داخليه ح تدفع من وين وح تآكل شنو ؟؟
طلعت التلفون عشان تتصل واول م فتحته لقت ميه مكالمه من خطاب وكميه رسايل واتألمت جدا لانها كسرت قلبه ،،،، اثناء م هي بتفتش في رقم الاء اتصل خطاب،،،،، قلبها بقي يضرب في قوه وم اتحملت وردت عليه واول م فتحت الخط : حبيبتي  نور عيوني والله حرااام عليك القسوه دي م بتشبهك انتي وين ؟
رهف شالت نفسها وردت : قريب من بيت كريم
خطاب : ليه ي روحي مشيتي ليهم تاني ؟ انتي موش طلعتي منهم زعلانه،،،،، انا م برضي فيك حاجه ،،،،
فضل يتكلم معاها لحدي م وقف العربية جنبها وجا نازل سلم عليها في حراره وفتح ليها الباب ركبت وقفله ومشي ركب في مقعد القياده ،،،،،
وصلو مطعم راقي وطلب ليها فطور وعصير وفطر معاها وطول الوقت بعاين ليها وهو م مصدق وقال : خفت م القاك تاني بس وحياتك كان قلبت البلد دي قلب لحدي م القاك ومنها علي المأذون الشرعي وغصبا عنك او بي رضاك ح اعرسك ونعيش برانا ،،، نعيش في جنه 
رهف في ابتسامه : مجنوووون
خطاب : تحبي اوديك الشقه ولا الصيدليه ؟ ولا نفضل مع بعض كدا لاخر اليوم واخر العمر ،،
رهف في جديه : عايزاك توديني مشوار اهل زوجي المرحوم عايزه اجيب شهاده الوفاه وكمان القسيمه
خطاب : ايوه لكن م بخليك تمشي ليهم براك لحظه اتصل بي كريم عشان ود عمك
رهف : رغم اني كنت عايزه اطوي صفحه كريم دي بس معليش المضطر يركب الصعب ،،، اتصل عليه.

نبيل بدخل ويمرق ويعاين للساعه والاء مراقباه واخر شي طلب قهوه وبقي يشرب فيها في عصبيه ويقول : رهف اتأخرت شديد م تكون عيانه ؟
الاء : لا ي عمي الحنون اعتذرت قالت عندها مشوار وبتجي بعدين….
نبيل : سبحان الله ليه طيب م كلمتيني ؟؟
الاء : انا عارفاك ي اخوي!!! شايفاك تدخل وتمرق زي ام العروس
نبيل : بمناسبه العروس انتي ح تريحينا من طلتك بتين ؟؟
الاء : طبعا عايز توزعني عشان يخلي ليك الجو ،،، بس ي خساااره والف خساره مززتك مشفره ومنافسك قوي وخطير
نصيحه مني ،،، معركه خسرانه ،،،،
نبيل بدأ عليه الحزن وقال : مززه شنو ؟ ومنافس شنو ؟ يظهر العرس دا ح يفوت بيك الحقي نفسك ،،،،

كريم اخد اذن من الشغل وجا بسرعه ووصلهم خطاب بيت المرحوم زوج رهف وقعد في مطعم قريب منتظرهم لما يخلصو ،،
ضغطت رهف جرس الباب وجات الشغاله عشان تفتح ودخلتهم الصالون وبعد شويه جات بت المرحوم ورهف قامت عشان تسلم عليها بس هي اختصرتها وقعدت وقالت : خير بعد كتلتي ابونا ولهفتي العندو كله تاني جايه لي شنو ؟؟ وعجوز غابرين حبوبتك ان شاء الله تكون اسي في الدرك الأسفل من النار 
————————————–
———————
*☆إمتناني *
*☆بت محمد جمال الدين☆*
*☆يتبــــــــــــــــــــــــــــــــــــــــــــع☆*

لقراءة الجزء التالي : الجزء التاسع من رواية إمرأة بلا هوية

لقراءة الجزء السابق : الجزء السابع من رواية إمرأة بلا هوية

للإطلاع علي فهرس أجزاء الرواية : رواية إمرأة بلا هوية ( جميع الأجزاء كاملة ) للكاتبة بت محمد جمال الدين

جميع الحقوق محفوظة للكاتبة بت محمد جمال الدين