وفي الجزء الثامن من رواية سر سعادتي دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء الثامن من رواية سر سعادتي
يوسف:انا انا م م م …
مسر:خيرك علقت في حرف الميم هههههه
خ فتحية بدت تنادي يامسرررررة
مسرة:فوسي حبيبي شوية بس
خشت للحجرة
نعم ماما
خ فتحية:طفي هالمكيف صقعت بنيتي
مسرة:باهي هي اهو طفيته ارجعي ارقدي وارتاحي
خ فتحية:به
طلعت مسرة ل يوسف
مسرة:ايه وين كنا
يوسف:مسرة انا حبيتك ويشهد عليا الله العالي في سماه لكن انا م م متجوز
مسرة:ههههههههههههههه
يوسف:هههههه
مسرة: مستحيل اكيد تتسهوك عليا
يوسف:ﻻ والله ياريتني نتسهوك
مسرة:شن قاعد اتقول يوسف
يوسف:سامحيني دسيت عليك بس والله انحبك ومن خوفي اني نخسرك فلهدا السبب دسيت وكذلك مرتي مش مريحتني وانتي كنتي سر سعادتي فحبيتك فدسيت عليك
مسرة:اما حب هذا اللي تقول عليه
وبدت مسرة ترعش وتبكي
وطاحت صايخة
قامها يوسف وحطها ف حجرة الكشف مسر حبيبي فيقي
دارلها برفان ف ايده وقربها من خشمها وستناها لين فاقت
يوسف:مسرة حبيبي خوفتيني عليك
مسرة تبكي:انساني يايوسف وﻻ تفكر فيا وﻻ تتصل بيا انت كدبت عليا مرتين وجرحتني ولعبت بيا واصﻻ خاين خنت مرتك حول تره
يوسف شدها من ايديها وقالها
انا تمرمدت هلبا ف حياتي وزوجوني لواحدة مهملة
مسرة:انا ماخصنيش ف هدا كله حول من قدامي
طلعت مسرة من حجرة الكشف وهيا تبكي مشت جنب سرير امها وقتلت روحها بكي
رويدة تتصل بسكينة
الو سكينة شن جو
سكينة:باهية
رويدة:اسمعي انا امس وقت قلت لخوك تعال خديت تلفونه وبنتصل بصاحبة يوسف وطلعت غالطة فرقم رد واحد مصري
سكينة:هههههه تستاهلي زي قلتك حتى رقم ماتعرفيش تنقليه
رويدة:شن ندير زعما
سكينة:زي ماقتلك اجبديه ليك
رويدة:ﻻ حنطين عيشته مش حنخليه متهني معاها
سكينة:وووه عليك بري من عليا راجلي ينادي باي باي
يوسف اتصل ب احمد
يوسف:تقدر تجيني تةا
احمد:عادي وين نجيك
يوسف:ف مستشفى
احمد:تم تم شوية بس
وبعد 20 دقيقة وصل احمد وخش مستشفى لقاه يوسف وخشو المكتب
يوسف ل احمد:قتلها يا احمد
احمد:انك متجوز ؟؟؟؟؟؟
يوسف:ايه
احمد:وشن قتلك
يوسف:قتلي كداب،خاين،انساني
احمد:اووووف صار عكس ماتوقعت
نقولك هيا توا معصبة ستناها تروق واتصل بيها
يوسف:انا بايت اهنا اليوم
احمد:باهي خﻻص فرصتك اليوم يايوسف
يوسف:مش عارف كيف درت هكي مش من طبعي نكدب ع حد جبت الدوة لروحي توجع لما حد يقولك كداب
احمد:الله غالب الغلط مني مفروض ماقتلكش اتعرف
يوسف:ان شاء الله تفهمني بس
بعد شاعة روح احمد وليل الليل
مشي يوسف لغرفة خ ففتحية مالقاش مسرة فقعد يهدرز ع خ فتحية
خ فتحية:والله ماشاء الله عليك ياوليدي هدراز ربي يحفظك
يوسف:سلمك ياحاجة ويحفظك
هي نخليك ترتاحي توا
ليلتك سعيدة
وهو طالع تﻻقى مع مسرة شافتله شبحة غضب وخشت للحجرة
فاتت الليلة على مسرة بكاء
وعلى يوسف بؤس وحزن
وماقدرش يرقد بكل
على ساعة 8 صباحا
فاق يوسف توضى وصلى وخدي قهوته
جاه منير :صباح العسل
يوسف:صباح النو
منير:غريبة اليوم واصل قبلي واﻻ بايت اهنا شكلك بايت ههههه
يوسف:ايه
منير:اليوم بنخطب البنت متع 96 قتلي مستحيل نعيش من غيرك وموافقة نرضى بيك متجوز
يوسف:سعدودك بخت والله بخت
منير:هههههه هيا تتعالا وقع خروج للمراة يستنو فيك
يوسف:هي جاي
مشي يوسف للحجرة صبح ع حازم و خ فتحية ووقعلها خروج وكتبلها مرتجعة بعد 10 ايام وشاف ل مسرة ابتسملها
مسرة نزلت راسها وساعدت امها وطلعو من مستشفى
روح يوسف لحوشه
رويدة:اي طيب فيك عرفت طريق الحوش .. واﻻ تجوزت من وراي وامس دخلتك ﻻش مروح قيلت عندها شن بدير بيا انا
يوسف يسمعلها وساكت
رويدة:انت اديرها مش بعيدة عليك ياخاين
خش يوسف للحمام وفتح الميا وقعد يفكر تحت الميا … عﻻش يامسرة مافهمتينيش انا حبيتك عﻻش ماشفتيش لنقطة هادي
تم دوشه يوسف وطلع من حمام لبس ومشي ل احمد
مسرة ل عفاف :عفاف يوسف كدب عليا وطلع متجوزززز
عفاف:ﻻه ماتقوليهاش
مسرة :متجوز هالمعفن خزيه عليه
عفاف:غير هدي بالك واحكيلي من اﻻول
مسرة:شن بنحكيلك وقت تصالحنا قالي انه متجوز هدا اللي صار
عفاف:والله مايتحشم به عﻻش دار هكي
مسرة :قالي السبب وبعثلي مسج كتب فيه تبريرات زي وجهه ستني نفتحه بش نقراهولك ….وحكتلها قصته مع رويدة
عفاف:ياناري يوجع مسكين
مسرة:ماتبراريلاش وانا شنو مانوجعش اخيه ع الوقت اخيه..
في محل احمد
يوسف:مخنوق يااحمد مخنوق شن ندير زعما نمشي العشية نخطبها ؟
احمد:ﻻ رد بالك ..فوت حتى شهر على اﻻقل البنت تهدى واعصابها تروق وف خﻻل شهر هدا بالك تكلمك وترضى
يوسف:ان شاء الله ترضى بس.. المشكلة حبيتها ماكنتش نلعب بيها ياحمد مالعبتش بيها اااااخ اااخ
احمد:ماديرش ف روحك هكي يايوسف
يوسف:انا الغبي ضيعتها من بين ايديا عندها الحق هكي ادير وعندها الحق تسيبني تاخد شاب عزابي خيرلها
احمد:ماتيأسش كان نصيبك حتاخدها
يوسف:صحة ليه منير بيخطب صاحبته مواليد 96 قتله راضية بيك متجوز مش زي حالتي ريت الحظ
ليل الليل وروح يوسف متكدر خش الحوش ومشي مطبخ بياخد اميا و
يلقى زقرلو يجري على الرخامة
يوسف ينادي:
رويدددددددة رويداااااا
جاته رويدة:شنو فيه
يوسف:ريتي اهمالك وين وصلنا ! تفضلي ياهانم زقرلو ف الحوش تاكلي وتلوحي على الوطا وتخلي ف ماعين العشي لتاني يوم الصبح وكان طاحت منك حاجة ف الكوجينة تشوطيها برجلك تحت الدوﻻب شوفي شي ايقزز راني فديت من هالعيشة
رويدة:شن درت منه قضية خايف من زقرلو ! اقتله وخﻻص
يوسف:ماطلعينيش عن طوري رويدة
الزقرلو هدا جي من عدم نظافة الحوش… انا اكثر الوقت برا وقت نروح نلقى حاجات زي هكي فديت افهمي فديييت
وقعدو يتعاركو زي كل ليلة ونزاد يوسف هم على همه
وفات الشهر ونص و مسرة متشفرة من حياة يوسف عانى هلبا واضايق هلبا وقرر انه يمشي يخطبها من خوها ..
مشي جيهة حوش مسرة ونزل من سيارة وطق طق عليهم
فتحله خوها علي
يوسف:السﻻم عليكم
علي:وعليكم السﻻم تفضل ياخونا
يوسف:بالله استاذ حازم موجود
علي :ايه موجود من نقوله
يوسف:قوله يوسف الغاوي
علي:دقيقة هي
يتبع……..
لقراءة الجزء التالي : الجزء التاسع من رواية سر سعادتي
لقراءة الجزء السابق : الجزء السابع من رواية سر سعادتي
للإطلاع علي فهرس اجزاء الرواية : رواية سر سعادتي ( جميع الأجزاء كاملة ) للكاتبة لوزة
جميع الحقوق محفوظة للكاتبة لوزة .
