وفي الجزء الثامن من رواية لن استسلم دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء الثامن من رواية لن استسلم
جاها اسامة للمحل خش وهدرز معاها وقالها :
سمية انا هكي نبيك ف موضوع
سمية:تفضل
اسامة:والله مش عارف كيف بنقولها امممم انا نبيك سمية
سمية:كيف يعني ؟
اسامة:نبيك ارتباط يعني.
..ودارلها غمزة 
سمية انصدمت وقالت فبالها جاي بيضحك عليا هه بعد ماتمعشق هوا والست سندس .. ماشاء الله امي رباية ماناخد فضﻻت صبايا
اسامة:ها سمية شن ردك .
سمية قاعدة سارحة و ادكرت كيف تتجارى وراه طول سنين اللي فاتت وهوا يقولها انتي اختي اختي .اختي
وقتله : اسامة انت زي خوي انت اخ لم تلده امي !
انصدم اسامة وولى وجهه احمررررر وقالها :ربي يسعدك وطلع
اتصلت بعبير قتلها تعاليلي ضروري الشبلي كان اهني وقالي.. ..اسمعي اسمعي باي باي جﻻل خشلي انتظار
عبير:اوك باي
سمية:الووو جلوووو
جﻻل:مرووومة كيف الحال
سمية:تمام…شن مداير ووين قاعد
جﻻل:اهو ماشية..قاعد ف الحوش…حقا شنو امتى بنتﻻقو
سمية:مازال وقت ايسخر ربي حنتﻻقو
جﻻل:اوكي مش مشكلة كيف ماتحبي مرووم
سمية:حقاااا جلووو تتفكر ف شاب اللي حكيتلك عليه
جﻻل:اما شاب
سمية:اللي قتلك مبهدلني ف جرته وجابهالي صفار
جﻻل:اها ايه ادكرت ..خيره؟؟
سمية:ههههه بعد ماجرحني وصدني توا جاي يقولي نبيك وانا جاية بنقوله باهي لكن ادكرت لما كان بعﻻقة مع واحدة و انه مش معبرني
جﻻل:حلووو وشن قتيله
سمية:قتله انت زي خوي
جﻻل:هههههه خير مادرتيله مصح وجه يحساب امتى مايبي هوا
وقعدو يهدرزو وضحك وجو
على خشت عبير فجأة وقتلها بصوت عالي اتكلمي ف الشبلي واﻻه عارفاتك 32 سن باينات ههههه
اشرتلها سمية اسكتي
جﻻل:من هادي اللي تكلم فيك ومن هوا الشبلي ؟
سمية:هادي صاحبتي
جﻻل:من هوا الشبلي يامرام ؟؟؟؟
سمية:توا اللي قالي نبيك هوا هدا اسمه الشبلي
جﻻل انصدم وانعصر وتبهدل…
وقعد يفكر زعما هوا نفسه؟؟ وقالها:تقصدي اسمه اسامة؟؟
سمية انسمطتت وتفركست وهرب عليها الضي
جﻻل:معناها انتي سمية ! صح وكادبة عليا ومقايلتلي اسمي مرام !
سمية اتخزرطت: منين تعرفه انت ؟؟
جﻻل:هدا…
اسامة خش على جﻻل ف المربوعة
سكر جﻻل وحتى تلفون طاح منه
اسامة ل جﻻل :كله منك
جﻻل اتخزرط:ﻻﻻ انت فاهم غلط
اسامة يكشخ:انا اللي ماعمري طيحت روحي لبنت ايصيرلي هكي
جﻻل:ﻻﻻ غير افهمني
اسامة:انت اللي قتلي صارحها !
جﻻل ارتاح حس ان اسامة مايعرفش وقاله: عﻻش شن صار
اسامة حكي كل شي ل جﻻل
جﻻل:والله مش عارف شن بنقولك يااسامة
تلفون جﻻل يشرين فصل عليها..
اسامة :ماعندك ماتقول ..حول من قدامي
جﻻل:استنى يااسامة استنى ماتطلعش وانت والع هكي
اسامة:تي حول وراس امك تره
طلع اسامة وصرفق باب مربوعة متع حوش جﻻل وركب سيارته وقعد يلود ف شوارع متكنطي لين دار حادث
سمية لعبير:كله منك يا عبير
عبير:شن فيه شن سمعتي
سمية:راحت عليا ياعبير ضعت..
وتندب ف روحها
عبير :تي قولي خير بﻻك
سمية:جﻻل جﻻل ياعبير
عبير:خيره
سمية: طلع يعرف اسامة
عبير:حيه ع امك حييه
سمية تبكي:شن اندير …
عبير:عليك عملة ماعندك ماديري
سمية:اسكتي ماتزيدينيش
عبير:باهي شن بتقوليله توا توقعي جﻻل يقول ل اسامة
سمية:غبرت كنهدا ياعبير غبرت
عبير:وووه عليك موقف ان شاء الله مايقوﻻش يارب
سمية تبكي وعفجت الحوايج كلهم المعلقات ف المحل
عبير:اهدي اهدي ياسمية شن دخل المﻻبس
نقال سمﻻية يشرين
سمية ل عبير:هدا جﻻل نرد؟؟
عبير:ردي فيسع
سمية مصدومة : نعم
جﻻل:والله مامسامحك ياسمية
سمية:عﻻش انا وين نندري
جﻻل:تي كان ماكدبتيش عليا راني زبطت ياسمية خليتيني نجرح صاحبي النم ونتعلق بيك هكي
سمية:اياح اصﻻ هوا مايبينيش ومايحبنيش
جﻻل:اسامة ماعمراش حب بنت ياهانم
سمية:هه زي اللي حق
جﻻل:اسامة صاحبي راس ياسمية ونعرفه اكثر من نفسي و ماكنتش نحسابه هوا وعندك علم انك غالطة واﻻه الشبلي ماعمره كلم بنت ف حياته اخطا من عﻻقة مراهقة ف طفولة
سمية:شن قصدك انا ضيعته من ايدي
جﻻل:ايه ضيعتيه ونحب نقولك اني مش حنامنك مع حد اﻻ مع اسامة تي حتى مع روحي مانمنش عليك انا واحد متع بنات ومن بنت لبنت الحق سامحيني وياريتك ماتقوليش ل اسامة جﻻل كلمني مانبيش نخسر صاحبيمن اﻻخير خوديها هكي
سمية:شن اتقول انت شن تقووول
جﻻل:اللي سمعتيه وحي عليك جرحتيه وجعني كان شبحتيه توا كيف جاني وجه احمر ومتكنطي
سمية: كيف ندير
جﻻل:بري دوريه امشي وكن جهتي مش حنقوله انك كلمتيني وﻻ عمري حكيت معاك نهائي
سكرت سمية عليه واتصلت بزينب تبكي
الو زينب اسامة وين
زينب:كيف خش للحوش متكنطي كالعادة وراشق السيارة اشبح وين
سمية :باهي باي باي
اتصلت ب اسامة مرة واتنين وتﻻتة
مافيش رد
سكرت سمية المحل وهيا تبكي ومروحة تجري لحوش خ نفيسة
عترت وطاحت
وقفت وكملت طريقها
وصلت حوش خ نفيسة طقطقت عليهم فتحت زينب
زينب ل سمية:خيرك تبكي؟؟
سمية: وين وين وين اسامة
زينب:خش لداره متكنطي ومايبيش يتكلم مع حد
خشت سمية لوسط الحوش وصلت لقدام باب دار اسامة حطت راسها على الباب وتبكي وايدها على المانيلية وترعش وسمعت ..
وقفت قدام داره وبتفتح الباب سمعت اسامة يعزف بالقيتارة ويغني كيف الشووووق انطفي وكيف عيووووني اتغفي
كيف الشووق انطفي وكيف عيووومي اتغفى …مش متخيل هالدنيا بﻻك.. مش متخيل اﻻ وانا معاك مش متخيل وهادي حقيقة ! مش متخيل لو غبتي دقيقة ! وكيف الشوووق انطفي
يتبع …………
لقراءة الجزء التالي : الجزء التاسع من رواية لن استسلم
لقراءة الجزء السابق : الجزء السابع من رواية لن استسلم
للإطلاع علي فهرس اجزاء الرواية : رواية لن استسلم جميع الاجزاء كاملة
جميع الحقوق محفوظة للكاتبة لوزة .
