الجزء الثاني عشر من رواية الحلال والحرام

بعد وقت جاه باتها الشيخ محمود وخوها اسلام يلي جاه وشايل كيس لعب لعويله اول ما شافها فرح : نسرين جيتي كيف حالك وحال ناصر ولد عمي كويس

نسرين : الحمدلله كويسين وعدت لباتها باست يده كيف حالك يا باتي وحال صحتك طمني عليك كويس

باتها : الحمدلله المهم انتي كويسه وأمورك تمام

نسرين : الحمدلله وقمعزو كلهم في الصاله واسلام عطاه عويله اللعب فرحو بيه واجد وريم عمرها سنتين ومحمد سنه شال محمد وقعد يلعب فيه ورغد كل اشويه تبحت فيه وتبتسم وخاصة بعد خشت تيلا وكتاكيتها الكبار اشويه عشان ياكلو مع بعضهم وكانو يجننو هما ال6

في العشيه /

اما ريم عندها منير بس وقاعده في الحديقه العامه تلعب فيه هي وهيثم يلي فرحان بعيلته الصغيره قرب شال منير وباس خده : يا بطل من تحب اكتر انا ولا ماما

منير شير عليهم هما الاتنين وبفرحه : انت وماما

نور ضحكت : لو مهما سألته حايقول انت وماماا

هيثم : ماعمره اختار واحد بينا هالمكار هضااا

نور : وليش يختار وعنده اب وام يحبوه وااجد

هيثم : بس الاب يحب زوجته اكتر من ولده

نور وجها احمر قعد : لو يفهم العيل توا يزعل منك

هيثم : معناها أنتي اتحبي منير اكتر مني صح

نور : انتو الاتنين بالنسبه ليا الحياه كلها وغلاوتكم كبيره

هيثم : انتي اساس حياتي وهيا نمشو لأمك تأخرنا عليها

نور : انا قتلها الساعه 5 توا انجوك وبعد شافت الساعه ضحكت تعرف الوقت يجري مانندريش ان توا 5 ههههه

هيثم بأبتسامه : كيف تعرفي وانتي فرحانه بفرحة منير

نور : صدقت وباست ولدها يلي ما تتحمل فيه حاجه

وهيثم ما شال اعيونه من عليها وحبه لها يزيد كل يوم

في اليوم التاني /

لجين سافرت هي وعيلتها للبلاد اخيرا وكانو معزومين عند خالتها ونيسه وبنتهم رغد في الحوش اول ما وصلو لعندهم لقوهم يرجو فيهم وفرحانين واجد بجيتهم بعد غياب 3 سنين حضنت زينب اختها ونيسه وهي تبكي كانت مرايفه علي اختها واجد بس زادت بكت زينب لان اختها ترحمت علي مايا : الله يرحمها ويصبركم يا زينب

وقتها قعدت تبكي : والله رايفتلها واجد وربي يرحمها

ونيسه : امين يارب هيا خشي تريحي وسلمت علي لجين يلي تمسح في دموعها وحضنتها : كيف حالك يا خالتي

ونيسه : الحمدلله بعد شفتك كويسه والحمدلله عالسلامه

لجين : الله يسلمك تسلمي يا خالتي وبحتت في رغد يلي طلعت توا وشافتها : لجين الحمدلله علي سلامتك

لجين : الله يسلمك يا رغد تسلمي وسلمت عليهااا

رغد : ربي يصبركم علي وفاة مايا وربي يرحمهاا

لجين : امين وكيف حالك انتي والعويله الصغار

رغد : الحمدلله كويسين وقاعدين جوا يلعبوو

لجين هزت راسها وخشو جوا وكانو تعبانين من السفر

ملك بحتت في احمد يلي يشرب في شاهي وسرحان اشويه وبأبتسامه قالت : شنو وين سرحان زعمه فيا

احمد ضحك وبحت فيها : لو فيك كنت بحتت فيكي وبعدين انتي جنبي مش بعيده عليا وانا نفكر في حاجه اخرااا عارفه صاحبتك يلي خوها وباتها شيخ ؟؟

ملك : اها كنها هذي نسرين ليش في حاجه ؟؟

احمد : لا ما في شي بس خوها متزوج بنت عم صاحبي واسمه علاء المهم هو قرر يتزوج وحبيت نساعده يدور

ملك ضحكت : هضا الموضوع نسحبه حاجه اتخوف

احمد : قصدك حاجه اتحير وانا نبي نساعده وحصلت

ملك : وعليش تحصل واطمن خليها عليا في وحده اتقول القمر صبي ونقعد مكانك ومستحيل صاحبك يلاقي كيفها

احمد رفع حاجبها : ومن هذي انتي تعرفيها للبنت يعني

ملك : طبعا وانت اول ما تعرفت عليا مش شفتها معايا

احمد قعد يذكر : قصدك البنت يلي كريتيها بالغصب عشان توصليها للحوش بعد عطلت حافلتكم صح ؟

ملك هزت راسها ببراءه : طبعا نرجس وتخرجت معانا

احمد ابتسم : تستاهلي هديه والله ريحتيني انا نفكر في اقاربي وانتي عندك رفيقه علي قولتك قمر وكذاا

ملك تحولت ابتسامتها : تفكر في اقاربك قصدك في بنات اقاربك وانا زعلت واجد ووصلتني هديتك وجات تبي تمشي من الغيره وقفها : كنك غيوره انتي نفكر بس

ملك : التفكير بحد ذاته ممنوع وترضاها انت نفكر في شباب عيلتي اكيد لا وهو صبا دغري : تي نذبحك بعدها

ملك : اه ريت انت حكيت عالذبح وانا ندير اشر منننننه

احمد : وشنو حاديري تشويني وتاكليني مثلا

ملك : لا بس حانقعد عند عيلتي شهر كاااااااامل

احمد : لو حاتمشي شهر كامل حانتزوج غيرك

ملك وجعتها : تمام الواضح ان عيونك برا يا دكتور وشكرا بارك الله فيك وانا حانمشي نقعد علي طول عند عيلتي وقصة نرجس انساها وانا انساني وعدت تجري لغرفتها

احمد يضحك ولحقها دغري بعد شال بنته مايا معاه لجوا وخش عليها : لا اسمعيني نبصر معاكي انتي الاساس ولو حاتمشي صدقيني حانموت بدونك مش حانتحمل والله

ملك : لا واضح مش قلت حاتتزوج وحده تانيه

احمد : نقصد نزوج صاحبي صاحبتك نرجس وبس

ملك : انا سمعتك وما انخرف انت قلت حاتتزوج غيري

احمد : يانعليا عليك عناد عندك راه انجيب امي لعندك عشان تصالحنا مش معقوله هكي والله نبصر معاكي

ملك : انا مانحبش اتجيب سيرة البنات علي لسانك

احمد : لانك ما اتحبيش سيرة البنات انحب نشوف غيرتك ونحب نعصبك ونخليك تغاري بجنون اخرا

ملك : يعني تقنعني ان كل شي درته عشان تعصبني

احمد : والله عشان هكي وانا اصلا ما انشوف غيرك

ملك : باهي ليش ما حكيتلي الموضوع من بدايه ليش تفكر في بنات اقاربك عشان صاحبك بدون ما تسألني

احمد : لاني نسيت نقولك بس في الاخير عرفتي

ملك : ياربي صبرني انا نهايتي علي يدك وركبلي الضغط والسكر منك والله حرام عليك تلعب علي اعصابي انت

احمد ببراءه ومشاكسه : انا حرام عليكي شنو درتلك ههه

ملك : وتسأل اخرا حتى مايا جبتها هنا تحضر في عركه

احمد انفجر ضحك : توا هذي عركه ليش في سلاح

ملك : طبعا في سلاح وسلاحي يقولك نبي نقعد بروحي

احمد : لو تبيني نطلع من هنا حانزعل واجد منك وزعلتي تعرفيها كويس يعني مش حانحكي معاك ولا نرد عليك

ملك اذكرت ان دايرها من قبل ونشف ريقها عشان يرد عليها تنهدت : انت بجديات ناوي تجلطني علي يدك

احمد : لاني نحبك ونحب نتعبك معايا تحمليني

ملك : لاني حبيتك متحملتك لعند توا وربي يصبرني

احمد : والله اصيله انتي متحملتيني وصابره عليااا

ملك ابتسمت علي كلامه ونضارته لها : باهي خلاص

احمد : شنو يلي خلاص ليش كملت كلامي انا ههههه

ملك : مزلت ما كملت يعني انت يا تسكت بكل يا تحكي وماعش تسكت وبحتت في مايا : باتك ناوي علي جنوني

احمد يضحك وحالته حاله وهي تبحت فيه وهو يضحك الضحكه يلي تموت فيها واترد الروح لها رغم ان مجننها اشويه ويعصب فيها ديمه بس ماتقدرش تعيش بدوونه

بعد اسبوع /

لجين لبست كمامه ونضاره وماتبيش حد يعرفها لما تمشي للجامعه وتبي تتجنب الكلام مع الناس يلي تعرفهم وصلها باتها للكليه وعدا خشت بخطوات بطيئه وذكريات الكليه مره وصعبه عليها واجد قعدت تمشي والخوف متملكهاا خشت جددت قيدها يلي وقفه لها باتها ل3 سنين لكن انصدمت لما لقت في نفس الغرفه هشام وسمع صوتها ولما قالت اسمها وانها كانت مسافره بعد كملت التجديد طلعت بسرعه وتتهرب منه بس لحقها دغري هو كان في نفس الغرفه يحكي مع استاذ يقربله لكن سمع صوتها وقعد يلحق فيها ووقفها بصوته : لجين وقفي لو سمحتي

لجين بالايش وقفت وهي راقيتلها اشويه : نعم شنو تبي

هشام : عليش تحكي معايا هكي وتتهربي مني شنو درت

لجين : انت ما درتلي شي بس مانبيك تحكي معاياااا

هشام : ليش حرام عليك والله سنين نراجي فيكي

لجين : اتراجي عالفاضي نتمنه اطلعني من راسك

هشام : بس انتي مش في راسي انتي في قلبي والله

لجين تجمدت مكانها وحست الكلام بداه يريح منهااا

هشام : ليش ساكته هذي الحقيقه انا والله نبيكي

لجين بلعت ريقها : انا مش لك وحب بنت غيررررري

هشام : قلبي اختارك انتي ليش تتهربي مني في واحد ؟

لجين : طبعا لا وماعمري درت علاقه مع راجل ومانبيش

هشام : بس انا مانبيش علاقه نبيكي حلالي وزوجتي

لجين : مستحيييييل وانا لازم نمشي خليني في حالي

هشام مابش يستسلم ولحقها مره تانيه : ارجوكي فهميني ليش قولي اي شي عليش تتهربي مني شنو درتلك

لجين وجعها صوته يلي واضح زعل بحتت فيه : قتلك انا مش لكي افهمني لو سمحت وفي بنات واجد ليش انا

هشام : اسألي قلبي حايجاوبك والله حبيتك ورايفت عليك ومش مصدق انك قدامي توا رايفتلك واجد

لجين : لو سمحت الناس تبحت فينا وماعش تلحقني

هشام : انا الناس اخر همي كل يلي ذابحني رفضك ليا

لجين بعصبيه وبصوت سكته : انا كنت مريضه بالايدز تبي وحده كانت مريضه بالمرض الوسخ هضااااا ؟؟؟؟

هشام انصدم وقعد يبحت فيها : شنو قلتي ايدز ؟؟

لجين : يلي سمعته وهضا سبب يخليك اتفوتني صح ؟

هشام قعد يبحت في اعيونها لوقت طويل بعد حولت النضاره وقالت الايدز ماردتش النضاره : أعيونك بريئه ومستحيل يجيك الايدز من شي يخليني انفوتك وفي عدة اشياء تنقل المرض هضا ممكن نعرف شنو هو ؟؟

لجين قلبها يدق وتهربت تبحت فيه : هضا شي خاص انت تفتح في الماضي يلي ذابحني مافيش داعي تعرف

هشام : انا اسف بس من حقي نعرف قولي يلي عندك ونوعدك مش حانلحقك هالمره بس حانفكر فيه تمام

لجين نزلت راسها وماقدرتش تحكي عدت تجري وهو يبحت فيها ومصدوم : منين جاك وانتي بريئه ولطيفه حيرتيني معاك وحق الله شافها طلعت من الجامعه تنهد وقمعز وتفكيره مشتت في الموضوع هضا بس ما استسلم رجاها اتجي في اليوم التاني وقرب من جهتها : امس عديتي بدون ما اتقوليلي ممكن نعرف من وين جاك ؟

لجين طلعت رساله من شنطتها ومدتها له : انا كتبتلك كيف جاني وشنو صار بعدها بس نتمنه ما توريني وجهك مره تانيه ولا عاد تحكي معايا وخليني في حالي وعدت للمحاضره وخلاته يبحت فيها وحاير واجد معاها قمعز عالكرسي وفتح الرساله يلي كانت طويله تعتبر 4 اوراق مدبسات مع بعضهم قعد يقرا في كل صفحه بدقه وصدمه لا توصف كان مصدوم واجد من كل شي صار وحكاته حرف حرف وكان واضح دموعها عالورقه وهي تكتب تنهد وحط الرساله في جيبه وطلع من الجامعه وعدا يتمشى حداه الشط وتفكيره في الموضوع هضا توقع جاها من نقل دم او اي شي بسيط بس ان يجيها مع اختها يلي توفت هالشي كان صدمه بالنسبه له وكان واضح الندم في كلامها وحالتها يلي تتهرب من الناس بشكل عام قعد كل يوم يراقب فيها من بعيد بدون ما ايقرب منها او يحاول يحكي معاها كان في شي عاجزه وقادر عليه بس أعيونه عليها طول الوقت وتهمه واجد وملاحظ انها تقعد بروحها واوقات يلمحها تمسح في دموعها من البكاء قدم بخطواته لعندها وبحت فيها : ليا حوالي اسبوعين ماجيتش شورك ولا حاولت نحكي معاك

لجين بحتت فيه وكانو عيونها حمر من بكاء : ليش جيت

هشام : لانك انسانه نضيفه من جوا ولو انك سيئه حالك وطريقك مش هضا ولا كنت حبيتك اصلا من البدايه وانا عارف ان يلي صار معاك هو سبب حزنك الشديد خاصة وفاة اختك بس نبي انقولك شي واحد لو كنت انا مكانك وغلطت واعترفتلك انتي وقتها تعطيني فرصه للحياه ؟

لجين انصدمت من كلامه : انت تقارن فياا فيك وانت واحد كويس ومتفوق وشاطر في كل شي وانا كنت غبيه صدقت كل شي حكاته ليا اختي رغم ان واضح انه غلط

هشام : انا سألتك لو سمحتي وجاوبيني حاتعطيني فرصه

لجين قعدت تبحت فيه : ولو ما جاوبتك شنو ادير ؟

هشام : حانفكر بأنك ما حبتيني اساسا لان يلي يحب ما يكره وانا حبيتك من كل قلبي وهضا كله مزلت نبيكي

لجين : انت تعذب فيا بالطريقه هذي ولو انا كنت مكانك وفعلا حبيتك من كل قلبي اكيد حانعطيك فرصه وحده

هشام ابتسم : معناها وافقي وخلينا نقعدو مخطوبين

لجين : بس انا غلطت وكنت مريضه شنو تبي فيااااا

هشام : انتي بروحك قلتيها كنتي مريضه وكنت من الماضي ولازم اطلعيه من راسك ولو قصة الغلط كلنا نغلطو مافيش حد احسن من حد وانحب انقولك لما كان عمري 14 سنه تعرفت علي اصحاب عطوني حشيش وانا خديته مع ان عارف شنو هضا بس خديته واستمريت بيه لكن سيبته في الاخير وقطعت علاقتي بيهم وكملت قرايتي ونسيت الموضوع اساسا وتوا اذكرته وحكيته لكي مافيش انسان ما يغلط وعارف انك غلطتك مدمره نفسيتك واجد ومع هضا انا نبيكي ومستعد نرد روحك بس انتي وافقي صدقيني حبيتك ونراجي فيك ليا 3 سنين ومانبيش غيرك انتي الشمس يلي تنور في الحياه يلي عايش فيها ولو غابت الشمس تقعد مظلمه حياتي زي ما كانت مظلمه ل3 سنين ارجوكي انسي الماضي امتعك وابدي صفحه جديده وخلينا نكونو مخطوبين للوقت يلي تبيه انتي حتى لو شهور طويله نتعرفو اكتر علي بعضنا ولو تبي حاجه نساعدك ونقريك فيها حانكون اسعد انسان في العالم هضا كله انتي فكري وحانخليك اتفكري يومين بس وانجيك ناخد الرد منك ونتمنه نسمع خبر حلو

لجين نزلت راسها تهربت تبحت فيه وهو عدا وكل اشويه يبحت فيها ويبتسم بحب ولو شافت بسمته لها كانت ماقدرت اتنزل راسها وتشوف البسمه يلي ترد الروح من جمالهاا عدا وكان متفائل وعنده يقين بموافقتها عليه خلال يومين بس زعما حايكون في رد منها او لا ؟؟؟

لجين روحت للحوش وتفكيرها في كل حرف سمعاته اليوم بس سمعت امها تبكي وكأنها تحكي مع حد عالتليفون عدت وشافتها وسمعت يلي انقال !!

يتبع …….

لقراءة الجزء التالي : الجزء الثالث عشر من رواية الحلال والحرام

لقراءة الجزء السابق : الجزء الحادي عشر من رواية الحلال والحرام

للإطلاع علي فهرس اجزاء الرواية : جميع روابط اجزاء رواية الحلال والحرام للكاتبة سلطانة كوكي

جميع الحقوق محفوظة للكاتبة سلطانة كوكي