الجزء الثاني عشر من رواية الزوجة التائهة بين الأحلام والواقع

وفي الجزء الثاني عشر هل برأيك سيحدث جديد مع بطل الحكاية ؟ أم ان المؤلفة ستأخذنا إلي طريق آخر مختلف لم نكن نتوقعه نهائياً ؟ كل هذا وأكثر سنعرفه في السطور التالية .

الجزء الثاني عشر من رواية الزوجة التائهة بين الأحلام والواقع

خشت امه وخالته واميره وصفاء بيطمنو على ليلى واهنى احمد شبح لى اميره شبحه مش حلوة لان حس انا نظرتها كلها شماته وقاللها …….
احمد… انتى شن جيبك هنا ….
اميره ….. جاية نواسى ليلى يانارى صخفتنى المصايب جتها ورا بعض منين بتلاقها لبتلاقها …..
احمد ….. خالتى صحيتى هلبه على سؤالك على ليلى وتوا ليلى راقده ومش عارف امتى تفيق من المهدئات الي اعطوهملها فمش لازم تستنو هنى مادمكم جايين بروحكم فى سياره ولما تنوض وتروح لحوشها تفضلو اهلا وسهلا بيكم ..
ام اميرة….. باهى باه ياولدى عندك الحق وانى توا غدوه نمشى للعزى شوى…. وبالله عليك قولها نيابة عنى ربى يرحمه قالتلك خالتك واصبرى واحتسبى عند ربى وكلنا طالعيين منها الدنيا راه..
احمد…. ان شالله خالتى ولايهمك…
ام اميره …. باهى توا فى امان الله …. هيا اميره خلى نطلعو بكرى بكرى
اميره ….. دقيقه بس نبى احمد على جنب ياامى
احمد …. شن فى قوليلى قدام ماليك مافى شى خاص بينى وبينك ندويه معاك .
اميره…… 5 دقايق بس
احمد …. امى ونبى دقيقه خليك جنب ليلى نشوفها ونجى
ام احمد…. حاظر وليدى غير ماطعتلش ليلى مرات تفيق فى اى لحظه واكيد تبى تشوفك …
قعدت ام احمد مع ام اميره فى الغرفة وهوا طلع معاها فى الممر الي قدام الغرفه وهنا قالتله ….
اميره ….. احمد تبى اى شى كلمنى رح نرد عليك ولو خالتى مشت للعزى وانت فى الحوش بروحك واحتجت اى شى نجيك عادى وااااااى شى تبيه بس انت كلمنى وراهو ليلى زى وخيتى انت بس اطلب وانى نشيلك فوق عيونى ….
احمد….. اميره ..شوفى لف والدوارن الزايد مانبيشى وحركات انك تبى تحطنى فى المصيده وجو العبيط هوا كله انى فاهمه لانك قبل شربتهولى فااطلعى من الدور هوا والا بينى وبين ليلى انظف من انا وحده زيك تخش فيه وتلعب دور الطاهره الشريفه فاياريت تطلعى منه جو هوا ……. ومشى وسيبها.
وطبعا لما شافته بيمشى شداته من ايده ودارت روحها بريئة .. وقالتله احمد انت فهمتنى غلط اعطينى فرصه بس فاقاللها تعرفى لو مانحيتيش ايدك قسما بالله نركك كف نخلى ناس كلهم يلتمو عليك وووجهك معاش نبيه هنا ماااااشى ولا لا ….. وخش للغرفه وجى جنب خالته وهمس بالشويه فى ودنها وقاللها …. خالتى بنقولك شى وماتعتبريشى تهديد بعدى بنتك من عليا خير مانديرلها -العار وانتى تعرفنى ياخالتى انى مهبول ونديرهااااااا ايوااااا وياسر الا درتوه فيا قيل …
ام احمد…. باهى باه ياوليدى وهيا وينها توا …
احمد …. هونى برا تستنى فيك قدام غرفة …
ام اميره … هيا مالا فاامان الله وعظم الله اجركم وان شالله هدا حد سوا يارب.
وبعدها اام اميره طلعت من الغرفه ولقت اميره واقفه فم الباب من برا و تبكى فاشبحتلها وقالتلها ….. شن درتى يامزتته يارزززززينى فيك شن درتى باش خليتيه يقولى هكى .. بنتى ونعرفك اكيد لسانك ماهناك اطلعى قدامى وتوا نتفاهمو فى حوش اطلعى ….
تمتمت اميره وقالتلها باهى باه تى والله مانكون اميره كانا ماطلقتها هال@#$ الا داخل وخديته انى … ويورينى بعدين من يحب ..
وطبعا ليلى قعدت فى مستشفى اسبوع كامل نظرا لتأزم حالتها نفسيه هلبا وامتنعها عن الاكل فاخلها تتعب جسديا وبعد مرور اسبوع طلعت من مستشفى وطلبت انها تقعد شوى مع امها واحمد وافق ووتالها شنطتها ومشت لحوش بوها ووهما فى طريق قاللها …..
احمد …. قداش بتقعدى فى حوش بوك ليلى …
ليلى …. مش عارفه يااحمد لحد مانحس انا امى قدرت تتعود على قعده بروحها ..
احمد …. وانى منى بيعودنى على قعده بروحى ؟؟؟؟
ليلى ….. حتى انى رح نستاحشك يااحمد بس الله غالب مانقدرش نسيب امى بروحها بس اكيد رح نتكلمو فى تلفون….
احمد …. خلاص معناها رح نكلمك كل يوم ماشى … وخلى عندك 1000 جنى هما مرات تحتاجو شى ولا ينقصكم شى انتى ولا امك واى شى كلمينى طول
ليلى …. ان شالله احمد ….. وشكرا على وقفتك معاى ومع امى طول العزى وقعدت دموع تنزل منها لاارديا ..
احمد … ولايهمك ياشفشه انتى مرتى وقبل كل شى حبيبتى راهو فا كيف ماتبينيش نكون جنبك وجنب امك
وطبعا وصلها لحوش ماليها واول ماوصلت لقت امها وبدت تبكى بس امها كانت قويا وقالتلها
ام ليلى …. معليشى بنتى بكاك مش رح يعوض وجود بوك توا وانى امس حلمت بيه قالى معاش تبكو عليا نبى نرتاااااااح معاش تبكو عليا ف يا بنتى نبيك توعدنى انا هادى اخر دموع رح تنزل منك لانك هكى تحرقى فى قلب بوك عليك وهوا فى قبره فالو تحبى بوك خليه يرتاح ..
ليلى …. والله نحاول ياماما بس مش بايدى الموضوع والله حرقه فى قلبى وغصه مابتش تتنحى منى بكل .
ام احمد …. بنيتى معاش تبكى خلاص انتى عريسه ومرات تكونى حامل ويصيرلك شى …
وطبعا هنا لما امها قالتلها هكى حست كأن حد ضربها كف فيقها و رجعت بدكرتها للاوتيل فى لندن وهنا تدكرت انا احمد هوا الا قام كل الحاجات متعهم الا فى الاوتيل معقووووله مافتحش الشنطه وشافهم وهنا قلبها طاح من مكانه وبعدها قالت باهى ولو ماشافهمش توا رح يفتح الشنطه اليوم باش يضمها ومرات يفتح شنطه صغيره ااااااااااااه ياربى بس انى مانقدر ندير شى الا ندعي انا احمد مايشوفش الحبوب بس لانا نفسيتى توا والله مامتحمله مصيبه تانيه يارب …
ومر يوم واتين وتلاته وايام واحمد صابر ومتحمل بعد ليلى عليه ونقان امها الا كل يوم ماينتهيش واخر نقان صار على بكرة صبح قالتله …….
ام احمد….. صفاء ترا باللهى مديلى براد شاهى وهريسه من جنبك …… توا باللهى قولى يااحمد توا هدا صح الا انتم تديرو فيه مرتك فى مكان وانت فى مكان قداش ليها توا فاتت شهر ولما نجى ونكلمك تقولى انى نعرف شن ندير مش عيل نرضع فى صبعى …. باهى بالله شن بيقولو علينا ناس ماصدق راجلها افتك منها ولا شنى برا ياوليدى جيب مرتك هنا اقلها تبات هنا ومع العشيه ترجع لحوش بوها لكن هكى واللهى ماصح وعيبه حتى فى وجهنا حنا قدام ناس
احمد….. باهى باه خلاص يصير خير توا نكلمها توا ووانى مروح من خدمه نجيبها هنا
احمد… انى بنلبس وبنطلع طول وقت على الخدمه تبى شى ؟؟
ام احمد …… لا لا سلامتك وليدى فى حفظ المولى
ركب احمد فوق وخدى تلفونه واتص بى ليلى وردت عليه ….
احمد … صباح الورد حبيبتى…..
ليلى …. صباح الورد حبيبى
احمد ….. شنى اليوم نروح بيك خلاص
ليلى ….. ايه اصلا حتى انى من امس جيت بنتصل بيك وبنقولك ووتيت حتى شنطى من امس ….
احمد …. خلاص مالا وانى مروح نخطم على حوشكم نتغدى عندكم ونروح بيك ماشى …
ليلى …. باهى حبيبى خلاص نستنى فيك
احمد …… اسمعى بنقولك شى …. استاحشتك هلبه راهو … هلبه هلبه
ليلى ….. حبيبى امتى غبنا على بعضنا انى كل يوم نكلم فيك
احمد ….. توا لما تروحى للحوش نقولك علاش استاحشتك هههههه ماشى ياقطوستى ….
ليلى …… قاعد صايع ماتغيرتش هههههه
احمد ….. لا لا الحق زدت توا هههههههه ….. خلاص برى توا ياشفشه وقت عليا ماشى ووتى روحك بعدين .. كمل احمد تلفونه ومشى بدل حوايجه وطلع مشى للخدمه وقعدت ليلى مع امها تضم فى حوش وقالتلها …
ليلى … ماما احمد اليوم متغدى عندنا شن بتطيبى
ام ليلى …. واللهى مانى عارفه بس انتى شن يحب راجلك نديرله
ليلى …. خلاص ماما ديرى اليوم الغدى بازين باللحم احمد يحبه هلبه وانى بنمشى عندى شوية حاجات بنديرها لروحى قبل مانروح … تبى اى شى نادى عليا…
وطبعا ليلى دارت لفه على روحها وجى احمد وتغدا وطلعو وبعدها قاللها اسمعى انى مانيش مروح بيك طول ….. اليوم مقرر بنطلعك تغيرى جوك
ليلى …… تسلم حبيبى والله اليوم محتاجته بجد نطلع بس وين بتطلعنى ؟؟؟
احمد ….توا نقولك لما نوصلو بس توا اطلعى خلى ناخدو حاجات من طريق قبل مانوصلو..
وبالفعل لبست ومشت هيا وياه وخطمو على محلات خدو شوى حاجات وبعدها رفعها لقريه سياحيه وهوا كان حاجز 2 كراسى وطاوله على بحر وهنى قعمزو وحطو حاجاتهم وقعدو يتمشو على بحر وشاديين ايدهم فى بعض وهنا قاللها لامتى بتقعدى بتدلعى عليا ولا كانك دلوعتى معناها خلاص بتقعدى كل يوم تشدينى من ايدى الا توجعنى …
ليلى …. ههههههه علاش شن درتلك …
احمد ….. ترا ارجعى شوى لندن وقبل ماتصير كل الاحدات هيا شن سألتك ؟؟؟
ليلى ,….. شن سألتنى ههههههههه..
احمد … بجد ولا تتسهوكى … قصدك تتمهتكى عليا باهى تعالى مالا نوريك تسهويك كيف شكله على اصوله << على بابا الكلم ده ياماما >>….
ليلى …. شن تدير يا مهبول ارخى ايدى ههههههههههه مانعرفش نعوم ههههههه اررررررررررخينى
احمد ……….. هههههههههه شن رايك مياه مسقعه ولا نزيد نغطسك هههههههههه قولى نحبك قوووولى هبلتيييييييينى قوووووووووووولى ..
ليلى ….. حرام عليك شربت مية البحر كلها طلعنى يامهببببببببول طلعنى باللهى عليك يا احمد حرام عليك حاسه انى مش واقفه على شى طلعننننننننننننننننننننننننننننننننى
احمد ….. قوليها نطلعلك …… ههههههههههه
ليلى ….. اه اه اه اه نحبك واللهى يااحمد ونموت فيك بس طلعنننننى مانحبش البحر انى
احمد….. هههههههه استنى بنبتزك شوى هههههه قولى انت تاج راسى وحبيبى وعمرى قووووولى يابخيله دهشتنى وراك تعبتنى وراك بهدلتنى وراك ههههه مدايره جو التقيله عليا وانتى مكرشه فى رقبتى من بكرى وفوقها قولتى نحبببببك …
بعدين شبحلها شبحه تدل على صدق مشاعره اتجاهها وقاللها……
احمد … انتى بجد تحبنى ليلى؟؟؟؟ …
ليلى …. انى نحبك يااحمد من اول يوم شفتك فيه وكنت نستنى انك تبادلنى نفس المشاعر شوى ولما بادلتنى مشاعرك بخلت عليا بشوى دلع نتدلعه عليك..
احمد …. هههههه خودى راحتك توا وتدلعى مهم سمعتها منك وتوا حطى ايديك على كتافى وارخى روحك مشى تكرشى فيا نغرق معاك خاطر تديرها انتى هههه
ليلى اوك …. بس طلعنى
وطبعا طلعو وقعمزو قدام شمس على قزه وقعدو يهدرزو وقاللها….
ليلى …. توعدينى مستحيل نتخلو عبى بعض حتى فى اسوء ظروفنا ومشاكلنا
ليلى … اكيد حبيبى مستحيل يقدر يفرقنا اى شى الا موت
احمد …. تفاولى خير زفت وانى من قالك نفكر فى موت وانتى طول تبى تقتلنى ههههههه انتم هكى نساوين اهم شى عندكم تدفنون حنا قبل وبعدين عادى الا يصيير يصيير هههه وكانا نحصلو شوط من بعداكم عاد كيف ؟؟؟
ليلى …. ههههههههه باهى انتى ماجوعتش بصراحه انى جوعت لانى مبكرى ماتغديتش لانى مانحباش بازين
احمد …. شوى بس نمشى نجيب حاجات من سياره ونجى … وبالفعل جاب حاجات من سياره وكلو وبعدها قعدو لحد مبدت تظلم عليهم الدنيا وبعدين خدو حاجتهم وروحو واول ماوصلو تلقتهم امه فى جنان وقالتله
ام احمد … اللطف وليدى …. وين كنتم وخيركم متحمرجين مع بعض وحوايجكم قزه ووووين كنتم يامزتتين مشيتو للبحر ولا لا
ليلى …. هههه خالتى احمد خطمنى مبكرى شوى على بحر
ام احمد…… وخيركم الللطف ماقولتناش رهو مشينا معاكم واللهى انى وبنات خلقونا فى حكه وخاطرنا فيه قداش لينا
وطبعا هنا شبح احمد لى ليلى شوى وتدكرو موقف الميه طووول وضخكو وبعدين قاللها …
احمد …… هيا حويجه تبى شى توا احنا تعبانين وبنركبو…
ام احمد … برا برا وليدى على اساس كانا نقولك توا ارفعنا للبحر تقول باهى مالا علاش تعرض فى خدماتك <<< فزاع ورامى حوليه >> … برا برا وليدى مربوحه
… وركبو وهما يضحكو ووصلو فوق حطت ليلى شنطت حوايجها وخشت لدارها طلعت روب نوم والاستشوار وشوى ميك اب والحبوب وخشت للحمام حطت الحبوب على الرف و فتحت دوش على مياه دافيه وقعدت تحت دوش لحد ماطقطق عليها احمد وقاللها شنى ليلى مطوله ننزل ندوش فى حوش بوى …
ليلى …. ايه… احمد مطوله شوى … انزل …
فانزل احمد هوا كيف فتح باب الحوش تلقته امه وقالتله شن فى جاى توا شنى مالا نزلت بترضينى ؟؟؟
احمد … لا لا حق نزلت ندوش وراقى ههههههههههه
ام احمد …. انتم عومو وفرهدو وانى نظفلكم قزه ….. خش وليدى خش للحمام وانتى سرافتك تقول سرفة كلب مرمد فى القزه خش وانى لاحقاتك …
احمد …….. هههههههههه وين لاحقتنى غبره حتى مرتى مادرتها بتديرها انتى وصحيتى توا انى كلب ……وقبلها بنقول لوليدى حميدا يرفعنى لتونس بالفعل والله صدق عصيووو الا قال عيلة مصالح
ام احمد …. ههههههه قصدى بنلحقك بنشافه ونشف وراك بعد ماتكمل ياعطيك الهنى هههههه لا عاد وليدى سيد تريس ….. حقا امتى بترفعنى لتونس … *ـ*
احمد …. غير خلنى توا ندوش وبكرا ان شالله نتفاهمو ماشى …
ام احمد … ماشى ماشى وفى داخلها تقول … << غير على شنى متصربع بس تقول بتطير يعنى >>
غسل احمد وركب ولقى ليلى كيف طالعم من حمام وقعد يشوفلها زى مستبله تقول اول مره بشوفها وبعدين قاللها ….
احمد …… << الليله ليلتك ياجميل >> هههههههه
ليلى …. احمد انى تعبانه الحق وبنرقد ياحمودى والله البحر دوخنى هلبه
.احمد ….. غير تعالى نقولك حاجه وبعدين ارقدى ههههههه
ليلى ….. باهى استنى بس نخش الحمام دقيقه << وفى داخلها تقول انى حماره علاش ماخديتش حبه قبل مانطلع >>
احمد …. حمام خلاص سكرناه كيف كنتى فيه غير تعالى تعالى وفيكك من سبل وطروحات بتقعدى ساعه لين ينعسنى نوم عندى منه حتى انى ههههههههه اصصصص ولا كلمه ولاحرف وقماها ودخلها لدار نوم ومشو فى خبار كان لحد نص الليل وهنى احمد خش للحمام والباين ليلى خششت معاها الحبوب للحمام ونستهم فوق الرف وكانت تبى تاخد حبه منهم وتقيمهم بس باين انها نست موضوع بعدين ورقدت……. فا وهوا يغسل فى وجهه قام وجهه وشبح جيهت الرف وفجأه …..

يتيع …..

لقراءة الجزء التالي : الجزء الثالث عشر من رواية الزوجة التائهة بين الأحلام والواقع

لقراءة الجزء السابق : الجزء الحادي عشر من رواية الزوجة التائهة بين الأحلام والواقع

للإطلاع علي فهرس اجزاء الرواية : جميع الأجزاء كاملة لرواية الزوجة التائهة بين الأحلام والواقع

جميع الحقوق محفوظة للكاتبة كيندا من ليبيا .