وفي الجزء الثاني من رواية الحلال والحرام للكاتبة سلطانة كوكي يا تري ماذا سيحدث من أحداث جميلة وسعيدة مع ابطالنا ؟ دعونا نعرف إجابة هذا التساؤل في السطور القادمة بإذن الله .
الجزء الثاني من رواية الحلال والحرام
نرجس بعد كملت المحاضره لحقت ملك : شويه لو سمحتي ممكن نحكي معاك في موضوع بس بروحنا
ملك بحتت في زياد : أنت أطلع وتوا نلحقك وبحتت فيها : نعم شنو الموضوع بس بسرعه مستعجله يعني
نرجس بأرتباك : غلط يلي اديري فيه مع الطالب زياد
ملك ما خلتها تكمل كلامها : وأنتي شنو دخلك ؟؟ !!
نرجس : تمام انا اسفه أني ضايقتك وعدت لعند البنات
وفاء : شكله مافيش نتيجه جيتي ومتعقده صح ومنها
نرجس : مع الأسف الواضح ان عاجبها يلي أدير فيه
نسرين : باهي أنا قررت نحاول معاها بس مش توا في الوقت المناسب بأذن الله لان حرام بنت زي الورده نخلوها في طريق غير صحيح وغلط هي ممتازه ولبسها مستور بس تصرفاتها غلط وان شاء الله خير نتمنه تفطن لنفسها
وفاء : ربي يهديها ويصلح حالها علي الاقل هي أهون من الخوات اليوم ماجوش اليوم بجديات مصدومه فيهم
نرجس : الخوات هدينا قصتهم قصه حالهم كلها غلط من لبس وقلة ذوق مافيش أحترام بكل وفوقها استغفر الله العظيم وأتوب اليه اكتر من مره زارقه عليهم في الحمام
نسرين استغربت : ليش شنو شفتي راه يطلع شاب معاهم
نرجس : شاب ههه اخر همهم الشاب هدينا والواضح ان الكبيره يلي اسمها مايا خطيره بكل يا ناري عليهم وخلاص بجديات مأساه هذي كليه او وسخ وعفن
وفاء : لو سمحتي احكي شنو شفتي نبي نعرف قولي
نرجس : لما ايجو بكرا عندهم محاضرات هما لما يخشو الحمام ألحقوهم وشوفو يلي ما ينشاف لكن مانقدرش نحكي ولا قادره نقوله اصلا شي يقهر ربي يهديهم وعدت
نسرين : شكلهم الخوات دايرات حاجه كبير شفتي نرجس كيف مضايقه عليهم لا حول ولا قوة الا بالله اسمعي انا اليوم تعبت نبي نروح ونتريح نهاية دوام توا مع السلامه
وفاء : ديري بالك علي روحك من الطريق انا نراجي في خويا وزي ما تشوفي نسكن بعيد اشويه لكن نرجس مع حافلة ملك يلي معنده وراسها يابس ربي يهديها والله
نسرين : ان شاء الله حانمشي توا وعدت وبالها في الخوات وفي ملك مستغربه ليش يتصرفو هكي وطول الطريق سرحانه لعند ما شافها خوها كان ماشي للحوش وهما حوشهم قريب من الجامعه خطوتين فقط قرب منها وهو يبتسم : ليش الغاليه زعلانه وفي عالم اخر احكي !
نسرين بحتت فيه : مافيش شي بس حاسه بالعجز انا وصديقاتي في حاجات تتمنى انك اتغيرهم لطريق صح بس في عناد وتكسير راس علي اشياء غلط وهضا مجنني
اسلام : شوفي الواضح ان نوعا ما فهمت يلي قلتيه بس دابينهم هالناس مايبوش يتغيرو نتمنه يا اختي ما تشغليش روحك فيهم وادعيلهم بس وتوا خلينا نمشو لان اليوم كان متعب بالنسبه ليا كنت في الشغل وهلكت
نسرين : ربي يعطيك الصحه يا غالي وهيا نمشو
ابتسم خوها اسلام وعدو مع بعضهم للحوش يلي اي حد يخشله يتريح فيه السكينه والراحه فيه ولما شافو باتهم الشيخ قربو منه وسلمو الخوت عليه وباسو راسه وايديه
الشيخ محمود : الله يحفظكم يا شباب ويبارك فيكم
اسلام : ويحفظك ويطولنا بعمرك يا غالي حانمشي نغير
نسرين : حتى انا تبي حاجه يا باتي قبل ما نمشي ؟
الشيخ محمود : لا سلامتك مانبي شي هيا عدو وصلو الظهر له ربع ساعه وامكم تراجي فيكم عشان الغداء
نسرين : حاضر حانمشي وعدت لغرفتها وهي تعبانه
ملك اعيونها علي نرجس يلي تبحت فيها من بعيد ويراجو في الحافله وكان جنبها زياد تأففت : بجديات اضايقت منها انا مانحبش حد يدخل في حياتي وهي نضارتها ليا وكلامها يجعز فيا شنو تسحب روحها هذي
زياد بحت في نرجس يلي بحتت بعيد عليهم : ليش كنها
ملك : دايره روحها تنصح فيا وان يلي اندير فيه غلط وخاصة معاك انت تحاسب فيا معقوله شنو اختي هي
زياد ضحك : تصدقي نسحبها كلماتك امبدري عشان تسألك سؤال في المحاضره ماتوقعت تنصح فيك
ملك راقيتلها : لو سألتني اهون من نصائحها تخليهم لها مافيش داعي تدخل في شي ما يخصها هضا يلي ناقص
زياد بأبتسامه : للهدرجه مضايقه منها او عشان قالت غلط يلي اديري فيه وخاصة معايا شنو رايك في كلامها يعني
ملك ببرود : قتلك كلامها تخليه لنفسها انا نعرف بروحي
زياد مسك يدها : يعني راضيه أنتي علي كل شي انديرو فيه من مسكة يد وحتى لو طلعنا مع بعضنا لأي مكان بروحنا ومافيش داعي تمشي للحوش مزال بدري يعني
ملك نزلت يدها وبحتت في أعيونه : وقتها حاتشوف ملك تانيه ومش انا يلي نروح متأخر في حوش عيلتي ولا انا يلي نطلع برا الكليه بدون علمهم فاهم وبحتت فيه من فوق لتحت وعدت وكانت معصبه حاول يلحقها او يفهمها تصرفه وكلامه بس وصلت الحافله وركبت فيها نرجس وملك يلي قعدت جنبها وواضح انها معصبه بكل
نرجس ساكته وماحكتش حرف مع انها عجبها يلي دراته في زياد قبل اشويه القلب من جوا فرحان لان حرام تمسك يده وهو غريب عليها وخاصة ان مش زوجهاا
ملك بحتت في تليفونها يرن من زياد سكرت في وجه وبحتت في نرجس وقالت : شي يقهر بجد وتأففت
نرجس بدون ما تبحت فيها : عفوا تحكي معايا انتي
ملك بضحكة هزوه : لا نحكي مع الحافله يلي راكبه فيها
نرجس بثقه وبحتت فيها : لان ما توقعت تحاولي تحكي مع وحده حاقده عليها ومن أمبدري فأستغربت لا أكتر
ملك : علي فكره انتي مستفزه وكلامك يعصب فيا والله
نرجس بأبتسامه : وانا حانقولك علي فكره انتي بنت من بلادي ومعتبرتك اختي حتى لو ما نحكوش مع بعضنا ولا في صداقه بينا لكن خايفه عليكي من الذئاب يلي برا وصبت بعد وقفت الحافله قدام حوشها وبحتت فيها ديري بالك علي روحك يا ملك هضا يلي نقدر نقوله لك ونزلت وأعيون ملك عليها من عند الروشن وسارحه اشويه وفي نفسها : انسانه غريبه بس كلامها مقنع وأبتسمت لان خلتها تبتسم ركزت علي تليفونها هز لقت مسج بعته زياد : تصرفك يلي درتيه توا زعلني وحتى قدام الشباب غلط قعدو يتهزو عليا بسببك ولكن منوره
حطاته في الحظر وهمست يلي جابك يجيب غيرك وفي نفسها وانا ليش مهتمه بالشباب وانصادق فيهم ليش مخليا البنات في جهه وانا في جهه يمكن عشان ماعنديش اخ وحابه نحكي مع شاب بس هضا مش سبب مقنع وقعدت تفكر في الموضوع لعند وصلتها للحوش خشت وسلمت علي امها : خيرات كيف حالك تمام
امها غزاله : الحمدلله يا بنتي وانتي كويسه والكليه تمام
ملك تنهدت : يعني بس حاسه روحي تعبانه ونعسانه والله
غزاله : انا كم مره قتلك ماعش تصهري لعند ال2 في الليل ارقدي بدري وعلي الاقل نوضي عالفجر وارقدي ساعتين وامشي لجامعتك وانتي ناشطه ووجهك ناير
ملك ضحكت ببراءه : ليش يا ماما يلي يرقد بدري يقعد وجهه ناير وبعدين انتي عارفه اني سبب صهري هو الرسم ماعش يفض والكليه ضاغطه عليا واجد وتعبوني والله
غزاله : ارسمي بدري من العشيه وبدل ما تسمعي الاغاني حطي قراءن عليش توجعي في راسك بالأغاني التافها
ملك بحتت فيها : انا عندي مواد اخرا غير الرسم وهو مأجلته في الليل وقصة الاغاني غصبا عليا نحبهم واجد
غزاله : حاولي تخففي منهم الله يربحك عشان خاطري
ملك ابتسمت : حاضر عشان خاطرك واليوم حانرقد بدري وحانسمع قراءن بدل الاغاني وادعيلي يا غاليه وبسس
امها فرحت : والله ديما ندعيلك انتي بنيتي الوحيده ونحبك واجد وما أنتحمل فيكي حاجه ربي يحفظك
ملك باست راسها وعدت وهي فرحانه تريحت واجد من كلام امها ولكن كلام نرجس سرحت فيه انا لازم نحكي معاها للبنت هذي واتصلت علي رقمها : الو كيف حالك
نرجس : تمام غريبه متصله بيا ولأول مره في حاجه
ملك ضحكت : اول شي لما خدينا ارقام بعضنا عشان انتي في نفس الحافله يلي انا فيها ومعايا في الدفعه وتاني شي حبيت نتصل وانقولك اني عازمتك اليوم عندي تعالي في الحوش وخلينا نقرو مع بعضنا 
نرجس مستغربه : لعندك في الحوش غريبه مستغربه
ملك : ما غريب الا شيطان تعالي واطمني ماعنديش خوت ومعايا امي لو هلك معارضين وباتي يروح في الليل
نرجس : تمام حانحكي مع عيلتي وأنرد عليكي باي
ملك : باي نراجي فيكي وكانت فرحانه اشويه
نرجس بحتت في امها : عزمتني زميلتي في الكليه اليوم
امها : من منهم وفاء او نسرين يلي تمشيلهم زي عادتك
نرجس : لا وحده تانيه اسمها ملك وتبينا نقرو مع بعضنا وهي ماعندهش خوت وباتها يروح في الليل قالتلي
امها : مش عارفه حانسأل باتك قبل لو وافق حايوصلك
نرجس : تمام اسأليه عشان انرد عالبنت تراجي فيا اصلا
امها : حاضر وعدت لزوجها ابراهيم : في بنت تعرفها نرجس اتصلت بيها وطلبت انها اتجي لحوشهم اليوم عازمتها ويبو يقرو مع بعضهم شنو رايك موافق ؟
ابراهيم : نفس البنات يلي قبل تمشيلهم او وحده تانيه
تهاني : لا وحده تانيه وقالت أسمها ملك وماعندهش خوت وباتها يروح متأخر يعني الحوش في امها بس
ابراهيم هز راسه : كلميها ليا نسألها عالبنت اشويه
تهاني : حاضر وعدت كلمت نرجس وعدتله دغري : نعم
ابراهيم : الله ينعم عليك قوليلي ملك هذي العيت من
نرجس بتفكير : علي ما اظن ملك مفتاح الفيتوري
ابراهيم بحت فيها : مفتاح الفيتوري وتعرفي اسم جدها
نرجس استغربت : حسين جدها عليش في حاجه ؟
ابراهيم قعد يبتسم : شوفي يا تهاني مش قتلك في واحد نعرفه ليا سنين طويله بكل ايام العسكريه وعزيز عليا ماعش شفته بعد تخرجنا وتوا بنتك وصلتني له
نرجس ضحكت : يعني باتها تعرفه انت معقوله
ابراهيم : طبعا خلاص قوليلها حانجوك اليوم
نرجس : تمام حانقوللها باهي نجيب سيرتك مع باتها
ابراهيم : اها وقوليلها تحكي لباتها يجي بدري اليوم
نرجس : حاضر وعدت وهي فرحانه : عيلتي موافقه وباتي قالك اطلبي من باتك مفتاح ايجي بدري اليوم
ملك استغربت : ليش شنو دخل باتي في جيتك
نرجس : لان طلع يعرفه زميله في العسكريه زمان بكل وقالي انه عزيز عليه وفرح واجد لما لقاه واخيرا
ملك بأبتسامه : معناها حايقعد بينا معزه كبيره زيهم
نرجس : وليش لا واليوم أسعد يوم في حياتي والله
ملك : للهدرجه يا نرجس فرحانه برفقتي معقوله
نرجس : لان قلبي حاسس انك بنت نضيفه من جوا ونبيك تكوني بخير وفي طريق كويسه خايفه عليكي
ملك : اطمني انا قويه من يوم يومي وشكرا لكل شي انا اسفه لاني حكيت معاك بقلة ذوق امبدري اسفه واجد
نرجس : يلي يزعل بسرعه يرضى بسرعه يا طيبه
ملك ابتسمت : انا سعيده واجد ونراجي فيك ما اطوليش
نرجس ضحكت : بعد العصر مزال توا حتى الغداء مزال
ملك ضحكت : تمام معناها حانتغدا ونرقد اشويه اوكي
نرجس : تمام وهيا مع السلامه وربي يحفظك 
ملك ابتسمت وعدت حكت لأمها علي نرجس وكل شي
غزاله : باهي واخيرا يلي شفتك تحكي مع بنات وتعزميهم في الحوش ماعمرك درتيها شكلها نرجس مأثره عليك
ملك : يمكن بس انا بصراحه كنت وقحه اشويه معاها وخاصة انها نصحتني مانحكيش مع شباب وهو زميل بس
امها بحتت فيها : يا بنتي الشباب فوتيهم حتى لو زميل انا خايفه عليك ونرجس عندها الحق مافيش داعي تحكي معاهم وقاطعتها ملك بخجل : كنا اصدقاء واقراب واجد يعني كان في سلام بينا 
وهدرزه ومعزه بس اليوم عقدني منه لان كنت معصبه من نرجس وتدخلها هو قال كلام عصبني بزياده وخلاني نخليه ونمشي انا اسفه لان كنت نحكي معاه وكان قريب واجد مني سامحيني 
وهدرزه ومعزه بس اليوم عقدني منه لان كنت معصبه من نرجس وتدخلها هو قال كلام عصبني بزياده وخلاني نخليه ونمشي انا اسفه لان كنت نحكي معاه وكان قريب واجد مني سامحيني امها ابتسمت : المهم انك عرفتي روحك غلطانه يكفيني هالشي والبنت يلي اسمها نرجس ما تخليها صاحبي بنات صالحات وفوتي الشباب سلم بنتي ومرحبتين بنرجس وباتها قولي لباتك عليه اكيد حايفرح وايجي بدري
ملك : حاضر يا احلى ام في الدنيا كلها وحضنتهااا
نور روحت من المختبر وهي مطنشه نادر ولا شايفته قعدت تمشي علي كرعيها واعيونها ساحره بيهم كل شاب وكأنها تتصرف بقصد منها خشت لمحل متع ملابس وصاحبه شاب ما شال اعيونه من عليها : انستي والله
نور مطنشه ورافعه خشمها خدت شال وبحتت فيه : كم ؟
رد : بدون كم سعره خوديه هو هديه مني لكي تمام
نور قربت من عند الطاوله وبحتت فيه : انت تهدي في كل البنات او انا بس لاني مستغربه بصراحه يعني
رد : والله انتي غير فيكي سحر مش طبيعي والله 
نور بغرور : والله للهدرجه يعني بس تمام حانخد الهديه
رد : تبيديه بالهنا وحط الشال في كيس وعزق رقمه جوا
بحتت فيه : شكرا عالهديه بس مش شكرا عالرقم وطلعاته وشرطاته قدام اعيونه ونفخت الورقه في وجه
رد : علي فكره هذي اهانه كان المفروض اديريها مش هنا
نور بخبث : انا حابه انديرها قدامك عندك اعتراض ؟
رد : اطلعي برا انتي وقحه وقليلة ادب اخرا برااا هيا
نور برد صدمه : انا طالعه مش لأنك طلعتني لالا يا حلو لاني مش شايفتك راجل عشان ناخد رقمك وغمزتله وعزقت الكيس في وجه : الهديه خليها عندك بباي وطلعت والفرحه واضحه في وجها استمرت تمشي بغرور وسحر في أعيونها لا يوصف وخشت لحوشها وسكرت الباب وراها : يعني مافيش واحد كويس يخطبني اوف
جاتها امها : جيتي وبعدين كنك لابسه هكي ؟؟
نور : اه يا ماما ليش شنو درت يعني هضا لبس بنات
امها : ما اسمه لبس هضا وكأنك مش لابسه شي
نور : انا مروحه تعبانه ومش مستعده للمحاضرات يلي كل يوم تسمعيها ليا خليني علي راحتي مليت قرفت من الحياه هذي انا كبيره مش صغيره ما تعلقي علي لبسي
امها : الله يسامحك والله يرحم باتك لو عايش ماكنتيش قلتي هكي ولا لبستي هكي وكأنك فرحانه بالحريه هذي
نور بهزوه : حريه ؟ ليش اسمها حريه هذي هضا سجن وتحكم انا حره وبالغه وراشده اندير يلي نبيها مافيش حد يتحكم فيا لا انتي ولا اي حد في هالدنيا الوسخه تمام
امها : انتي قليلة ادب وبعدين لما تتزوجي قوليه الكلام هضا لزوجك مش اتشوفي تصرف مش حايعجبك مافيش راجل يخلي زوجته ادوح باللبس هضا وريحة عطرها فايحه وفوقها مكياج وكأنك ماشيه لعرس مش لعمل
نور : انا عصبت راه كلامك كبير واصلا هضا لو يقدر يتحكم فيا لان يلي يبيني نحطه خاتم في صبعي ورفعت صوابعها بغرور انا بنت وكل الرجاله مش شايفه غيري مستعده نقنعه يسمع الكلام بس مزلت ما لقيت المناسب
امها : ما شاء الله عليك شكلي حانتصل بخالك يتفاهم معاك مش قادره عليك وانتي تغيرتي واجد بعد وفاة باتك وكأنك فرحتي عشان اديري يلي تبيها بدون حشم 
نور بحتت فيها زين : لو تتصلي بخالي عارفه هالحوش ماعش اتحقيني فيه حانهرب والله انديرها صدقيني
امها : حسبي الله ونعم الوكيل تهددي في امك خزي عليك
نور : وانتي تهددي فيا وكل شي اتقوليه لخالي مش شوره بيا ولا انتي شورك بيا مفهوم وعدت لغرفتها وهي معصبه ونار شاعله فيها : هالحكايه قرفت منها ليش مافيش حد خطبني اوف مليت من الحوش هضا والتحكم ذابحني
زينب حطت الغداء وأعيونها علي بناتها يلي يتهامسو ويضحكو مع بعضهم ربعت يديها : كنكم انتن شنو في
مايا ضحكت : والله ما في حاجه كنك تراقبي فيناا
لجين : بجديات اتراقبي فينا واجد شنو صايرلك
زينب : لا حول ولا قوة الا بالله تعالو تغدو وانتن ساكتات وصليتو الظهر او لا فارحات تتهامسو وتسهوكو وخلاص
لجين بكذب : صلينا واول وحدين اخرا تمام هكي
زينب : عليك قلة ادب ياريت رغد بنت خالتكم بنتي عليك ادب واخلاق نحطها في اعيوني مش زيكم
مايا بغيره : يعني ما اخترتي الا رغد الفصعونه هذي
زينب : وكنها بنت خالتك وبعدين هي مريضه حانمشو نزوروها في الحوش طلعت من المستشفى اليوم
لجين : ليش كنها شنو صايرلها ومنين جاها المرض لو باتها وخوها حارمينها من الدراسه ومعقدين بكل 
مايا : اي والله متحكمين فيها الهبله لو انا نوريهم عليها
زينب : سكرو افوامكم وتغدن وانتن ساكتات وهي راضيه الله غالب طبع باتها صعب شنو حادير تعصيه كيفكم
مايا صبت ونار والعه فيها : شبعت ماعش نبي ناكل وخشت لغرفتها وهي معصبه عليك حب لرغد ديما في سيرتها رغد ورغد هالبنت انا حانوريها بسيطه اليوم حانمشولها وحانحاول نقرب منها بشويه بشويه وضحكت خشت عليها لجين وشافتها تضحك : خير ليش تضحكي
مايا بخبث : حاتعرفي بعدين وغمزتلها وقعدت تراجي بفارغ الصبر مشيتهم بعد جاه باتها وتغدا جهزن رواحهم مع ان العصر اذن توا بس ماعدلوش عالصلاه ودارو مكياج وامورهم ولا علي البال خشت امهم : صليتن او لا
لجين : حانصلو غادي في حوش خالتي ونيسه
مايا : وعليش مدققه عالصلاه ليش كفار نحنا يعني
زينب : بلا وقاحه وبعدين لو انشوفكم معدلات عليها ما نحكيش بس العين اتشوف في بلاوي منكم هابا وخلاص
مايا تهزت علي كلام امها وخدت شنطتها وطلعت وفي نفسها البلاوي منك وحق الله وقمعزت في الصاله
لجين استغربت ردت فعل اختها يلي علمتها جميع الاغلاط وقعدت زيها لحقتها وقمعزت جنبها : كنك في حاجه
مايا ببرود : مخنوقه من امك رايحه ضاغطه عليا واجد
لجين : مش انتي بس حتى انا تعامل فيا هكي
مايا : انا غير لاني الكبيره وماعندهاش غيرنا
باتهم خش للصاله : ها يا بناتي السمحات جاهزات
لجين : طبعا يا بابا هيا نمشو وبحتت في امها يلي متعقده منهم ومن كل شي يديرو فيه وعدو مع بعضهم لحوش خالتهم ونيسه سلمو علي بعضهم وخشو علي رغد الحزينه علي فوفو يلي قتلها باتها بحتت فيهم وقمعزت كويس : اهلين كيف حالكم وسلمت علي خالتها زينب يلي تحبها واجد : بعيد الشر عليك يا بنتي فيا ولا فيكي
مايا في نفسها : قريب تعبدها عباده عليك حاله وخلاص
رغد : يا خالتي شنو اتقولي انتي والحمدلله علي كل حال
زينب ابتسمت : ربي يحفظك وحانخليك توا مع بنات وبحتت فيهم : راكم تزعلوها هذي بنت خالتكم وعدت
لجين بهزوه قعدت جنبها : معقوله يا رغد اضري روحك عشان قطوسه وكلب ههههه للهدرجه ميته عليهم يعني
مايا : لان الحيوانات يحبو بعضهم وهي حيوانه
رغد شدت علي يدها : تعرفو عشان خاطر خالتي بس متحملتكم لان بجديات متقززه منكم شنو طينتكم بس
مايا بضحكه : لا عاد الكلام كبير نحنا بنات في الاخير وخلت اختها لجين تصبي وقعدت في مكانها وبحتت في رغد وبصوت حنون : انتي بنت خالتي في الاخير صح
رغد بهزوه : انشك انك مريضه بجد وتجاهلتها ببرود
مايا فاتت كلمتها غصبا عليها ومسكت يدها : لا عاد عيب هالكلام وخلينا حبايب بلاش وقاحه يا ست الحسن
رغد فكت يدها منها وبحتت فيها : شنو صايرلك انتي وليش تبحتي فيا هك وخري من جنبي وتوا الوقت
لجين في نفسها معقوله يا مايا ناويه تقربي منها 
مايا صبت واعيونها علي رغد : انتي معقده والله
رغد : وانتي قليلة ادب وافعى اخرا السم في اعيونك
مايا ضحكت بحقاره : والله جد للهدرجه ذكيه وخطيره
رغد تعقدت : انا تعبت منكم اطلعن برا انتي وياهااااا
لجين : نحنا حانقولو لخالتك يلي اتحبك انك لزيتي بناتها
رغد : وانا حانقول لأمك شنو قلتو عليا وشنو اتصرفتو
مايا ردت وقمعزت جنبها : يا رغد يا سموحه نبصرو معاك في الاخير ليش هالعناد وحاولت تمسك يدها مره تانيه وتتصرف تصرف تاني عطتها رغد كف خله خدها احمر
مايا بحقد بحتت فيها : انتي وحده وقحه ونكرهك اخرا
رغد بعصبيه : اطلعي برا من قدام وجهي امشي قرفتك
لجين مصدومه طلعت قبل اختها الكبيره يلي حاطه رغد في راسها من زمان بس رغد صعبه رغم صغرها قعدت سارحه واعيونها في الدار يلي طلعت منها مايا وواضح انها معصبه وكأن رغد حطمت غرورها وتصرفها الوقح
لجين ببرود : ليش تبيها وتحاولي تقربي منها احكي
مايا : انتي شنو دخلك وخليك في حالك مفهوم وادبالك تدخلي فيا وعدت بغرور وقعدت معاهم ومش معدله علي شي لحقتها لجين يلي اوقات تخاف منها لانها مش ساهله
جاه ولد خالتهم سلم عليهم : كيف حالكم تمام واعيونه علي بنات خالته ويبتسم بس مش معدلات عليه خاصة مايا طنشاته وتعض في ضوافرها وتهز في كرعيها بحقد
زينب : مايا عيب قمعزي كويس قدام ولد خالتك تحشمي
ونيسه اختها : خليها علي راحتها وفتحي زي خوهم صح
فتحي عيونه علي مايا : هي بنت خالتي مش اختي
مايا طنشتهم وهي راقيتلها ماتحبش الرجاله ولا أطيقهم
فتحي ما شال اعيونه من عليها يحاول يلفت نضرها بس مش معدله بحت في لجين وهي نفس الطبع وكأنها تقلد في اختها الكبيره في نفسه هدينا حجر ما يحسو
رغد دموعها نزلو يا خساره وخلاص معقوله مايا تتصرف هكي والله واجعتني خالتي المسكينه كيف حانقوللها اكيد مش حاتصدقني وخاصة مايا راس الافعى هذي ويلي صار قبل اشويه مجننها معقوله ناويه تبوسني التافها هذي استغفر الله العظيم بجديات جنت رسمي ناقصتك انا وناقصه حقارتك ربي يهديك ويصلح حالك انتي واختك
اسلام طلع في العشيه وعدا للجامع مع باته الشيخ محمود وكان في بهجه علي وجهم قمعز اسلام مع طلابه يلي يدرس فيهم ويحفظ فيهم المصحف الشريف : كيف حالكم اليوم يا شباب اموركم تمام وكويسين
ردو : الحمدلله يا استاذ اسلام وربي يحفظك
اسلام : دوم ويحفظكم وبحت في الشيخ يعقوب يلي صوته واصل لعندهم وهو يهزب في الطلبه ويضرب فيهم بالعصاء صبا اسلام وقرب منه : يا شيخي عليش تضرب فيهم حرام عليك احكي بدون ضرب علمهم بهدوء
رد : انت شنو دخلك خليك في طلابك وانت ساكت احسن ما نقولها لباتك خليه يوريك علي تدخلك فاهم هيا امشي
اسلام رقيتله : يا شيخي انا ما غلطت ولا ادخلت بس يلي انت قاعد ادير فيه غلط هضا جامع وهما طلابك الصغار حرام تعاملهم هكي والله حرام حتى قدامك يعني
الشيخ يعقوب صبا : ما شاء الله عليك ادب واخلاق انت قليل ادب تحشم علي وجهك وامشي لمكانك خيرلك
جاه الشيخ محمود وشاف ولده مع الشيخ يعقوب وكأن في خلاف بينهم : خير شنو في كنكم ليش اصواتكم عاليه
قبل ما يحكي اسلام قال الشيخ : والله ولدك مش متربي يقلل في ادبه معايا ويدخل في اشياء ما اتخصه ابداااا
اسلام : والله ما غلطت يا باتي حكيت معاه بأحترام
باته عارف اخلاق ولده : انت امشي لطلابك وخليك في حالك هيا بسرعه وبحت في الشيخ : انا اسف علي تصرف ولدي ومش حايتكرر وبحت فيه وفي الطفل يلي يبكي عليش يبكي شنو دار عشان تضربه بالشكل هضاا
الشيخ يعقوب : اليوم تسميع ومش حافظ السوره
رد : باهي ليش تضربه هكي اسمع اعذاره حرام والله
يعقوب : مش حانلوم علي ولدك لان زيك مع الاسف وهضا شي خاص فيا وفي طلابي نتمنه ما تدخلوش
رقيتله الشيخ محمود عدا لمكانه وغامه عليه منه
اسلام اعيونه عالشيخ كل شويه وكان معصب بكل
ملك فتحت الباب : اهلا كيف حالك شرفتينا والله
نرجس ابتسمت : اكويسه تسلمي وانتي كيف حالك
ملك : الحمدلله وتفضلي حانعرفك علي امي الغاليه
نرجس خشت وسلمت علي ام ملك : كيف حالك
غزاله : كويسه يا بنتي ما شاء الله عليك وحكتلي ملك عليك ربي يحفظك تفضلي قمعزي الحوش حوشك
نرجس : تسلمي يا خالتي وقمعزت في الصاله وملك ضيفتها بعد وقت وبدو يقرو مع بعضهم في الصاله وامها تبحت فيهم وتبتسم كانو منسجمين واجد مع بعضهم كل مره وحده تشرح للتانيه بس خلتهم ياخدو راحتهم اشويه
نرجس : وين واصله في الرسمات يلي طلبتهم المهندسه
ملك : لرقم 6 والباقي رسمتهم كل ليله نرسم وانتي
نرجس : انا مزالي 2 بس ونكمل بس تعبت واجد الحق
ملك : انا لما نرسم ننسجم بعد ندير سماعات ونسمع الأغاني كأني خشيت لعالم اخر والصوت يكون عالي
نرجس بحتت فيها : بس يا ملك الأغاني حرام والشياطين يتراقصو لما تسمعيهم كأنك تسلي فيهم
ملك أنصدمت !!!!
نور طلعت عالمغرب تمشي وتدهور في الشوارع وعايشه حياتها بحتت في الشاب يلي وراها من امبدري وقفت وبحتت فيه : نعم عليش تمشي ورايا في حاجه يعني
رد بأعجاب : بصراحه جمالك خلاني نلحقك وشير عالمول العائلي علي يمينه : ممكن نعزمك علي عصير فريش
نور بخبث : ممكن ليش لا هيا وعدت معاه وهي فرحانه يمكن عجبها لان يستأذن منها عكس الباقي قعدو علي طاوله وحده وبحت فيها : شنو اسم الحلو يلي معايا
نور وهي تلعب علي يديها وتبتسم : انت فكر شنو ؟
رد : بالطريقه هذي حاتخليني ندوخ اشويه معاك بس انتي اجمل من القمر اكيد غاير منك لانك جميله والله
نور : للهدرجه يعني وانا أسمي نور وأنت يا حلو 
ابتسم علي كلمتها : عاشت الاسامي يا نور وانا مراد
نور : راه تطلع علم دار ومانندريش عليك ههههههه
مراد بضحكه : نعجبك وأشر للموظف يجيب العصير وبحت فيها مره تانيه : احكيلي عليك وشنو روتينك
نور عاجبها الأهتمام : عادي روتيني بس كساد واجد وملل
مراد بخبث : لو تحبي نعرفك علي شله حاتعجبك ومش حاتحسي بالملل ابدا بس هالمكان سري مافيش حد يعلم بيه لو علمو بيه يسكروه الأمن لان ممنوع في بلادنا
نور ضحكت : مش قتلك مراد علم دار صار سري المكان ليش شنو في اسلحه يعني هههه احكي وسمعنا وغمزتله
مراد بأبتسامه : في بنات وشباب يجو كل ليله وجو سمح من اغاني ورقص حايعجبك الجو واجد وحاتقعدي ديما اتجي في المكان امتعنا جربي شوفيه ومش حاتندمي
نور بتفكير : اذا في ناس تمام ليش لا وامتى نشوفه
مراد : نمشو توا شنو رايك بس أشربي عصيرك قبل
نور : تمام وشرباته واعيونها عليه قعد يبتسم وفرحان بالبنت الحلوه يلي حايخليها في شلته بعد شربو العصير عدت معاه في السياره وشالها للمكان السري كان بعيد اشويه عالمدينه وجوا بكل في الشارع نزلت هي وياه وخشو جوا مع بعضهم كان مليان شباب وبنات ابتسمت وعجبها الجو قمعزت عالكنبه وقعد جنبها مراد : رايك ؟
نور : ياريت لو عرفتك من زمان في جو هنا والله ههه وسكتت بعد شافت نادر ماسك ايدين بنت وفرحانين مع بعضهم قعدت تبحت فيه وفي نفسها !!!!!
اسلام مستغرب لان تأخر الوقت والشيخ يعقوب مايبيش يطلع الطلاب ويخليهم يمشو دار روحه عدا وأعيونه من بعيد عليه شافه اشرلهم يمشو ويروحو الا طالب واحد قاعد معاه وكان يحكي معاه بس مش عارف شنو قاله وعدو مع بعضهم في أتجاه الحمام وحسه مهتم بالطفل هضا واجد عدا في أتجاه الحمام يلي مسكر بابه وقعد يبرم حواليه اشويه وفجأه فتحه وأعيونه جات علي الشيخ يلي يسلح في ملابس الطفل انصدم 
!!!
!!!يتبع ………
لقراءة الجزء التالي : الجزء الثالث من رواية الحلال والحرام
لقراءة الجزء السابق : الجزء الأول من رواية الحلال والحرام
للإطلاع علي فهرس اجزاء الرواية : جميع روابط اجزاء رواية الحلال والحرام للكاتبة سلطانة كوكي
جميع الحقوق محفوظة للكاتبة سلطانة كوكي
