وفي الجزء الثاني من رواية عاصفة الصمت دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء الثاني من رواية عاصفة الصمت
الحويلو : واﻻ شنو
نزار : واﻻ نعرف شغلي معاك
الحويلو : حق او هههه حسك خوفتني
نزار : البضاعة ؟؟؟
الحويلو : هي استنى هي …
*حط صوابعه ف فمه وصفر تصفيرتين … ويخشوا اربعة نفار *
الحويلو : دونكم ليه ياجميعا
واﻻ ﻻﻻ استنوا … قبل مااديرو فيه حاجة خلي نخيروه برضوا انا شخص ديموقراطي …. قول يانزار شن رايك اتفوت القيافة وتشتغل معاي
نزار : تمينا
الحويلو : حق او
نزار : حق اي تمينا لو ماعلمتش ع جماعتك *مع غمزة *
*طلع نزار البوخوصة متعه وفتحه وبرشاقة تامة اتقدم لشخص اﻻول وضربه بونيه … جاه شخص شدله يديه من الخلف وشخص الثاني قدامه .. قام رجليه نزار ودفع الشخص ف صدره … وضرب الشخص اللي شاده بمرفقه وطبس قام بخوصة متعه ونخص واحد منهم ف جنبه طاح …جاه الثاني فغرزله نزار الموس في فخده … الثالت ضربه بونيتين ع عينه وبونيه ع سنونه ونزله راسه.. وضربه ع راسه بمفرقه لين طاح فاقد الوعي … والرابع اشكاب هرب
تقدم نزار لطاولة الحويلوا وقاله :البضاعة
الحويلو : باهي باهي بعد الموس من عليا
نزار : من غير غدر نحي ايديك من تحت الطاولة عارفك بطلع سﻻح
….طلع ايديك
الحويلو : الصبر حتى المفرخ بدوا يتمرجلوا علينا
نزار : سقدني
الحويلوا : اونيه بضاعتك ف الباكو خودها واطلع من اهنا وقول
لسيدك بينا اﻻيام
نزار : سيد نفسي انا يااحول
الحويلوا : كﻻم قوي يستحق ان نوصلوه ل القيافة بش يعرف شغله معاك
نزار : جرب انت بس … وتعرف شن ايصير فيك …نوض فيسع اوقف ف تركينة
*ناض الحويلو وقف وخدي بضاعته نزار وطلع من مستودع وركب عقرب الريح
ومافاتش ساعة اﻻ ربع …واﻻ كان نزار عند صﻻح *
صﻻح : ها شنو
نزار : بش قتلك ماتكون اﻻ راضي يااستاد صﻻح
صﻻح : عفارم عليك يانزار سبع والله… ادكر فيا بروحي وقت كنت بعمرك
نزار : كنت اتبيع حتى انت
صﻻح : هاهاهاها حاجة زي هكي
المهم توا روح ارتاح … ف الليل عندك مهمة تانية … بعدين وقت ايجي الفار تو نفهمكم عليها انتو الزوز
نزار : تمام هي السﻻم عليكم
صﻻح : استنى استنى
نزار : نعم
طلع صﻻح مبلغ وحدفه ع طرف الطاولة وهوا يدخن ف سيجارة وقاله : يوميتك متع امس وزيدها حصة الليلة عارفك انت قدها
وقدود
ابتسم نزار وخدي ظرف الفلوس وقاله : تم
طلع نزار من عند صﻻح …
و يفكر ياخد فرش جديد لحوشهم
وفعﻻ من فكر لتنفيذ خدي تاكسي ووصى على منادير جدد وبساط جديد وخدي مزهريات للحوش وسطل زواق وكل المستلزمات وروح بيهم للحوش
خ رقية : ئه ئه ئه هدا شنووو يانزار
نزار : هدا كل خير يمى …بنزوق الحوش ان شاء الله … وجايب حاجات تانية ..خشي خشي لدار وخششي معاك مروة وصفاء العامل بيخشش معاي المنادير
خ رقية :منادير شنو
نزار : غير خشي بس تو نقولك
خ رقية : باهي هي
*خشت خ رقية لدار هيا وبناتها ونقل نزار والعامل الحاجات اللي جابهم…
وخلص صاحب الطانطا والعامل وسكر الباب
نزار : يمى … مروة صفاء تعالوو
صفاء : هيا هي
خ رقية : ماشاااااء الله صلي عالنبي
نزار : الله صلى وسلم وبارك عليه
مروة : لينا هادو
نزار : ﻻ لجدي … تي لينا اماﻻ لمنو
صفاء : الله محﻻهم يانزار
خ رقية تشبحله بكل ريبة وشك وتفكر منين جاب الفلوس…
نزار : خيرك مش فرحانة يمى
خ رقية : منين جبت الفلوس يانزار …خدمت النظافة ماتجيبش هدا كله
نزار : ههههه شن شاكة فيا واﻻ شنو
خ رقية :اكيد بنشك شنو خنبت يانزار ؟؟؟
نزار : ﻻ يمى … مدير المصنع رفعتله شهادتي متع القراية وخﻻني مهندس متع صيانة وقتله ضروري تعطيني شهر امقدم فعطاني
خ رقية : حق او
نزار : حق يمى …ومن غدوة حنبدى انزوق وسط الحوش والمربوعة ان شاء الله
خ رقية : ان شاء الله ربي يفتحها ف وجهك اكثر واكثر
صفاء : نزار … خاطري ف شكﻻتة ورد
مروة : مصح وجهك غاليات الواحدة ب 2 اجنية …
صفاء : اسكتي ياكلبة
نزار : باهي ادللي تو نجيبلك
صفاء : هيييي موتي انتي بحسرتك يافرخة مروة
مروة : به خيرني انا
نزار : حتى انتي يامريوة ادللي تو نجيبلكم واحدة واحدة وامي حتى انتي نجيبلك
خ رقية : والله غالية عﻻش بزوز اجنية … اهو نديرلكم حلوة الكاكاوية وخﻻص
صفاء : ههههه ﻻﻻ نبوا شكﻻتة ورد بنات صفنا ياكلوا فيها ومايعطوش فينا
نزار : والله بتجلطيني ببنات صفك ياصفاء … فﻻنة عندها فﻻنة دارت
فﻻنة ترقص هههه فﻻنة تلعب كورة وبرا عاد
صفاء : ههههه ﻻﻻ
خ رقية : نوضي فيسع جيبي العالة والحلوات قبل العشية ماتطلع
صفاء : به هي
خ رقية: و جيبي الكاكاوية والطويجين الصغير
صفاء : تمام
نزار : شنو يمى مازال ماتبيش اتجينا خالتي ؟؟
خ رقية : اححح بالله
مروة : خالتي من هداك النهار وﻻ عاد شفناها
نزار : معقولة هكي يلعن بو الفلوس اللي يغيروا الشخص هكي …شن هما الفلوس وسخ دنيا
خ رقية : مش منها … من راجلها هالهبودي هدا
نزار : والله مانطيقه بكل … نتفكر فيها قبل عامين ياتﻻتة … قلت ل خالتي ناقصين عليا فلوس نبي انصور شيتات … مشت قتله اعطيني دينار .. نزار بيصور وراقي هههه قالها تي بري من عليا انتي وصغار اختك وهما ديما هات هات شن يحسابوني نلقى فيهم طايحات او
مروة : وقح
نزار : اتحشمي اكبر منك هدا !
خ رقية : بكل واهو قطعها علينا مرة واحدة
نزار : ربي يهديه وخﻻص لكن واللت مانحبه شهادة هكي كل مانشوفه قلبي ينغم الحق
خ رقية : وهوا ينحب هدا بوبريص عالحيط
*جت صفاء وجابت العالة وكل شي وقعمزت وششرين الحوش *
ناضت صفاء بتفتح … وفتحت
علي : 
_
صفاء : وعليكم السﻻم !
علي مع ابتسامة عريضة : اسف السﻻم عليكم
صفاء : وعليكم السﻻم
علي : نزار قاعد ؟؟
صفاء : اي قاعد ستنى اناديهولك
علي : _
صفاء : o_O
*ردت الباب شوي وخشت *
صفاء : نزار يبيك علي
نزار : جاي هي … مروة وتيلنا صفرة الشاهي
مروة :به شوية وناديك
*وقف نزار ومشي للباب *
نزار : خش خش اعصومة
علي : هيا هي … اها وهادي اتقعميزة… شن مداير اماﻻ
نزار : اهو ماشية
علي : قاعد ف المصنع
نزار : وين بنمشي اماﻻ
علي : فوته المصنع جايبلك عمل ماﻻخير
نزار : شنو منو
علي : عضو ف اللجنة الشعبية اتكون معارف وجو وتبدى وين ماتمشي يحسبولك حساب
نزار : والله ماخاشتلي راس هالخدمة قالي عليها شخص لكن ياودي مهئه
علي : ياغبي والله فيها مكسب .. اي حد يقول كلمة هكي واﻻ هكي عالقائد.. اعطي فيه بﻻغ واﻻ تقرير وتاخد معاش وكلنا فداء القايد ياراجل
نزار : باهي ماقلنا شي لكن اﻻمور هيا متع سياسة والدولة مانحبش انخش فيها واصﻻ كله تطميع لشباب بالفلوس بش يخشوا ف مكاتب اللجان …
علي : به انا بنكتب فيك تقرير عالكﻻم اللي قلته توا
نزار : هههه والله كان بيغنوك الفلوس من وراء دقني اكتب صحتين عليك ..
علي : ههههه انبصر والله
صفاء : تعرفي علي يشبحلي ف نظرات هكي مش عادية
مروة : كيف
صفاء : مش عارفة نظرات اعجاب ممكن …
مروة : هني روحك والله كان يسمع بيك نزار ايقطعك
صفاء : هاتي الصفرة انا بناديه نزار
خ رقية : شن تتودودوا انتي وياها .. فيسع جيبوا الصفرة خلي نحط الشاهي اهو سخون
صفاء : هيا يمى هي
مروة : ارزني ياصفاء خير مايفيقلك نزار
نزار : شنو اتقنع فيا وبتعطي فيا تقرير اماﻻ سجلت انت ؟؟
علي : ﻻ مازال قلت نخطم عليك ونمشوا جميع
نزار : ﻻﻻ بالي مش صافي للحجات هادي
صفاء : نزااار … نززاار
نزار : جاي ..دقيفة بس ياعلي
*طلع نزار ل صفاء وخدي منها صفرة ورجع خش*
علي : صار ماتبيش تشتغل
نزار : ﻻﻻ قول لخوك عصام
علي : رد بالك اتقوله
نزار : عﻻش
علي : بوي مايحبش القايد وعصام طالعله …. اسسسس راك اتعاودها الدوة هادي والله نمشوا ف خبر كان
نزار : هههه باهي غير اشرب شاهي اشرب
*شرب الشاهي علي وكلي حلويات ومع اذان المغرب طلع و شوي وطلع وراه نزار ماشي لمستودع القيافة وتﻻقى مع حاتم بالصدفة *
حاتم : نزار نزار
*تلفت نزار عاليمين لقي حاتم مقعمز على بلوكة *
نزار : اها حاتم شن الجوو
حاتم : تمام .. تعال قعمز
نزار : ماشي لراس … يبيني قال نحسابك غادي انا
حاتم : ﻻﻻ شن صار معاك
نزار : مشت اﻻمور ورديتها اﻻمانة
*حاتم يفكر هه مشي وردها البضاعة اكيدة توا ف نظر صﻻح البطل رجل مهمات الصعبة وانا مدايرني تشتوش *
نزار : شننو بتمشي
حاتم : ﻻﻻ هاك عندي ليك سبسي طيار ماﻻخير
نزار : شن فيه ؟؟
حاتم : غير سبسه مش عادي
نزار : ﻻ ماناخدش حشيش
حاتم : نقص صوتك … هاك جرب
نزار : لكن استاد صﻻح قالي ماتاخداش
حاتم : شن تسمع ف كﻻمه زي العيل خود خود جرب
نزار : باهي تو نجرب بعد مانتم المهمة متع الليل
*حاتم دار نظرة عالجنب ويفكر شن ايدير *
حاتم : اسمع رد بالك منه استاد صﻻح
نزار : عﻻش خيره
حاتم : نيته مش صافية كل اللي همه البضاعة واﻻمانات والفلوس وبس … تحساب يهتم بينا … احنا الكﻻب متعه متنا ايجيب غيرنا
نزار : كلب بروحك … وبعدين من خششني ف هالخدمة ماهو انتا … وكيف عارف هكي ﻻش وادهالي
حاتم : تي انا توا كيف اكتشفت
نزار : وشن اكتشفت ياعبقري زمانك
حاتم : اكتشفت انه مش مهم عنده
نزار : وكيف عرفت
حاتم : هكي وخﻻص
نزار : مافيش حاجة هكي وخﻻص اعطيني ادلة وبراهين اما اعتباطا هكي فوت الموضوع
حاتم : على راحتك … انا قتلك وخﻻص
نزار : باهي انا ماشيله بتجي ؟؟
حاتم : شوية بنتم اموري ونجي .. برا انت تو نلحقك
نزار : به تمام
*وقف نيزو ونفض سرواله وخطم ع محل عمي امراجع *
نزار : السﻻم عليكم ..
ع امراجع : وعليكم السﻻم ..
نزار : كيف حالك عمي مراجع
ع مراجع : الحمدلله كيف حالك انت
نزار : بخير … بكم مشروب القطوسة
ع مراجع : بخمسة وسبعين قرش
نزار : به اعطيني واحدة وتﻻتة شكﻻتة ورد …
ع امراجع : هي … مع بعضهم ستة جنية و خمسة وسبعين قرش
نزار : تمام … الشكﻻتة بالله ابعت واحد من الصغار يوصلها للحوش واعطيه الخمسين قرش هدا
ع مراجع : باه ان شاء الله …
نزار : هي السﻻم عليكم
وهوا طالع لقي شاب ف وجهه
الشاب : انت الديناري ؟؟
نزار : ﻻ نزار
الشاب : المهم تبع القيافة
نزار : من انت وشن تبي
*مدله الشاب ورقة ومشي فتحها نزار وكان محتواها >> تحساب بساهل بتفلت مني ياديناري … الصبر طيب كان مانجيبك تحت رجليا انت والقيافة متاعك *
زبطها الورقة من الحويلو طبقها وحطها ف جيبه وكمل طريقه ل مستودع القيافة
ووقف عالباب ويسمع ف صﻻح يتكلم ف الهاتف
صﻻح : تي ماتكون اﻻ هاني … اللي بنبعته تريس وقدها … ايه نعم .. نعم .. ..ﻻﻻ وين مانقدرش نبعته لصفقة زي هادي… شن عﻻش هدا بدات مانقدرش انفرط فيه…اسمعني صفقة زي هادي واعرة وتبي اتكتيك عالكاط العالي به خﻻص انت كلمني
عالرقم شجل عندك **02134448
تم … هي ااسﻻم عليكم
*سكر الهاتف صﻻح وشبك ايديه وراء راسه واسترخى ف كرسيه *
{زعما شن هيا الصفقة الواعرة الخطيرة هيا اكيدة حيقولي خلي نخش عليه }
*طقطق نزار وخش *
نزار : السﻻم عليكم
صﻻح : وعليكم السﻻم … جيت بكري اليوم
نزار : وصلتني ورقة تهديد
*نحى ايديه من خلف راسه وواسى تقعميزته صﻻح وقاله : تهديد شنو
*طلع نزار الورقة من جيبه ومدها لصﻻح …
صﻻح : اممم هدا الحويلو … ماتخافش ماعنده مايدير
*قعد نزار يشوف ل صﻻح بنظرة شك *
{معناها كﻻم حاتم صح … مايهتمش ومايهماش ادا احنا صارتنا حاجة}
*صﻻح يشوف لنزار عالجنب … وقاله : زابطها نظرتك شن تعني راه
نزار : عﻻش شن تعني
صﻻح : حنقولك شن تعني
*خدي سماعة الهاتف ورص ازار التلفون الدائري واتصل
ينادي … ينادي …ينادي …
صﻻح : الو نعم
الحويلو : مني
صﻻح : القيافة معاك
الحويلو : شن تبي #$/**^@
صﻻح : بﻻ سبان …الورقة اللي وصلت لديناري انت باعتها
الحويلو : اي نعم
*نزار قام حواجبه واستغرب *
صﻻح : به معش تبعتله اي تهديدات وديني اتصيرله حاجة مانبدى اﻻ طاب عليك ف جيهتك ومدايرلك العار اطيح من عين اللي يعرفوك كلهم …وانت عارف القيافة شن ايدير
الحويلو : تي جماعتي خﻻها ف المشتشفى بناخد بتاري مش الحويلو اللي يديروله هكي
صﻻح : اعذر من اندر وانت عارفني
الحويلو : ااا
*سكر الخط صﻻح *
صﻻح ل نوار : نظرتك تعني انك مش مصدق ومدايرني ان معتبرك حتى لو صارتلك حاجة كلب ومات صح واﻻه
نزار : به كيف عرفت
صﻻح : مرت عليا هلبا حاجات ياولدي ونزبط اغلب الشي …
{باهي عﻻش حاتم قالي انه مايهماش … بالك مايهماش حاتم لكن اللي ريته عكس هكي}
نزار : به عﻻش يقولولي ديناري
صﻻح : هدا اﻻسم اللي طلعوه عليك كان تتفكر قتلك اسمك حيتغير مع الوقت حسب كفائتك وباهي جاك اﻻسم ديناري وتوقعاتي سموك هكي ع خاطر تحاسب فيهم بدينار وتاخد ف حقك كامل
نزار : اها … ايه صح
صﻻح : ليا وقت اندور ع شاب هكي عموما اليوم ااا…
حاتم : ااسﻻم عليكم
نزار وصﻻح : وعليكم السﻻم
حاتم : عطلت ؟؟
صﻻح : تي من امدورك يافار هههه زي قلتك مامدايرلي غير المشاكل
حاتم : هههه
*حاتم يضحك ومن داخله يسحن *
صﻻح : عموما خلونا ف مهمة الليلة
خاشة صفقة حشيش عن طريق الميناء … طبعا زي ماقتلكم هيا مش ليا لشخص اسمه الكورجا بس انا بنخنبها منه …
نزار : جماعة امن الميناء يعرفوا بيها
صﻻح : اكيد ﻻ … الكورجا مهربها ف بنابل دمى اطفال
حاتم : باهي كيف بنهربوهم هالدمى
صﻻح : اهنا الموضوع … تقعمزوا اتمزقوا الدمى و تاخدوا اللي وسطها وتحطوا ف الشنطة
نزار : اممم
حاتم : بالك يطبوا علينا
صﻻح : ديما انت وتوقعاتك …كان طلعت عن المخطط بيطبوا عليك
نزار : كم عندنا ساعة بش ايفضوا الناقلة
صﻻح : البابور (سفينة) ..يرسى ساعة 11 في الليل … تقريبا و بش ايفضوها تبيلهم متع شي تﻻت ساعات اربعة ومرات للفجر المهم انتوا توصل ساعة 2 اطلعوا من غادي
نزار : كيف بنخشولها واﻻمن موجود
صﻻح : حتغطسوا ف البحر وتعوموا لين توصلوا للبابور اسمه فريشكا لونها ازرق … وقت توصلوا حتلقوا سفيان على النقالة ماهو يشتغل عليها النقالة .. حيرميلكم حبل وانتوا اركبوا …شنو تميتوا اسئلة
نزار : سؤال اخير
صﻻح : نسمع
نزار : كيف حنطلعوا من الناقلة نرجعوا بنفس الطريقة غطس ؟؟ والبضاعة حدوب ف الميا
صﻻح : مشكلتي مش ف الصافي انا وجماعة الميناء كان هدا قتلهم يطلعوكم لكن ﻻ ماترجعوش بنفس الطريقة
نزار : اماﻻ كيف ؟؟
صﻻح : عارفك دكي ياديناري وقدها حتطلع منها
*شاف حاتم لنزار متع جاك كﻻمي هاه مايهماش … نزل راسه نزار زبط ان صﻻح يقرا ف العيون *
صﻻح : بﻻ خوف ياحاتم تو يطلعك نزار معاه شن بيخليك غادي
حاتم : مرااات
نزار : مصح وجهك
صﻻح : مايديرهاش الديناري . مممن لو كان العكس . انا متاكد انك حتخليه وتهرب هههههه
نزار :يستر الله
صﻻح : هو الستار وبالله ماتنسوش تلبسوا قوانطيات ماعنديش خلوق نخش ف دوامة وتارات مع الكورجا
نزار : ان شاء الله
ساعة 10:45 مساء ميناء طرابلس
*نزار درس سيارة صﻻح العقرب ريح بعيد ونزل هوا وحاتم *
نزار : امشي وراي وماديرش دوشة وماتتكلمش اﻻ اد كلمتك
حاتم :باهي
*كان فيه زوز من اﻻمن واقفين يسبسوا ف دخان .. تقدم نزار بكل خفة ووراه حاتم … ووقت قريب يصلوا للحاوية حاتم ضربت رجله ف شيشة مشروب مرش
جبد نزار حاتم وراء الحاوية
وتلفتوا اﻻمن ويدوروا مصدر الصوت … فتقدموا بيتحققوا شن فيه
نزار يهمس : ياكلب قتلك رد بالك واﻻه
حاتم : ماهو
نزار : اششش
لقي فار ف تركينة شده وحطه ع حافة الحاوية وطلقه
اﻻمن 1 : ﻻﻻ فار ولي ولي
اﻻمن 2 : اففف الفيران الحرف والله كرهوني ف الخدمة
{تي باهي كان حصلتوا ف فار زي هاللي بحداي شن اديروا }
حاتم : شديت فار ب ايدك ؟؟؟
نزار : كان مش من هالفار راهو انا وياك ف خبر كان يافالح يامتع العمايل … خﻻص اسكت توا ماتتكلمش وﻻ حرف لين ترسى الناقلة
حاتم : به
*وقعدوا يستنوا في السفينة *
نزار : اهو صوت السفينة ..
حاتم : جبت ساعتك
نزار : ايه
حاتم : معدلة ؟؟؟
نزار : شن رايك انتا
حاتم : المفروض معدلة
نزار : المشكلة مش اهنا
حاتم : اماﻻ وين
نزار : المشكلة ان بنغطسوا ف الميا والساعة حتوقف
حاتم : باهي بش قبل ف التانوي كنت تعرف اتقدر الوقت تقدير
نزار : ايه
حاتم : خﻻص دير هكي
نزار : ليا وقت عليها اللقطة هادي يﻻ ان شاء الله نقدر انقدره تقدير
*رست الناقلة ونزل الكابتن وبعض من الطاقم متعه قام راسه نزار لقي مازال فيه متع 5 اشخاص علي السفينة *
نزار : تره شوف اما واحد فيهم سفيان
حاتم : اونه اللي شعره مريندا
نزار : تمام
* بعد ربع ساعة نزلوا اﻻربعة اشخاص وسفيان اتركن *
نزار : وراي ياحاتم
حاتم : به
* جو في زاوية ونقزوا ف الميناء *
حاتم : بنغرق يانزار
نزار : بﻻ دلع ماعمرك عمت ف الميناء توا ؟؟؟
حاتم : اول مرة
نزار : مش حتغرق هات ايدك ونقص دوشة …
حاتم : باه
*وصلوا لسفينة وقعدوا يستنوا ف سفيان … بعد شوي طل سفيان وحدف الحبل وهوا خايف …ركب حاتم بعدين نزار …وقاموا الحبل
سفيان : مرحب
نزار وحاتم : مرحبتين كيف الحال
سفيان : باهي …طبسوا ماتخلوش اﻻمن ايشوفكم … كان شدوكم ماتتكلموش عليا باهي
نزار : تم … وينها جيهة اﻻمانة ..
سفيان ف الحاوية الحمراء تعالوا
*مشوا هما التﻻتة لمكان الحاوية *
سفيان : فك القفل ياحاتم بالتل ووقت ينفتح القفل افتحوا بابهل بشوية وبزاوية حادة … كان فتحتوها بزاوية منفرجة … الباب متعها حيدير دوشة كبيرة وحيفيقوا بيكم
نزار : به تمام
*مشي سفيان ولبس حاتم قوانتي وقعمز ايفك ف القفل ويعاند فيه *
نزار : شنو خبرة شورنا …
حاتم : ايه كنت نخدم خناب
نزار : بجديات تدوي
حاتم : ﻻﻻ هكي تعلمت فتح القفال هواية بس …. اها انفتح ..
نزار : نحي يديك بشوية ووخر
حاتم : عﻻش
نزار : ﻻن كان انت بتفتحه بتنسى دوة سفيان و حتفتحه ع وسعه ويدير دوشة
حاتم قام يديه وقاله : تفضل يابش مهندس هي
قدم نزار ولبس قوانتي وفتح الحاوية ب زاوية حادة وخشش حاتم وخش وراه وطلع ايده حط طرف بلوكة من برا بش معش الباب ينفتح ..
حاتم : وين المصباح
نزار : اهواه ف ايدي ستنى ن… هي فيسع حل الصندوق وخلي نبدوا قدامنا ساعتين كحد اقصى …
حاتم : تمام ..
*وفتحوا الصندوق اﻻول وطلعوا الدمى اللي فيهم … ويطلعوا في الحشيش كياس صغيرات .. ويحطوا ف الشنطة *
حاتم : قتلك استاد صﻻح مايهتمش
نزار : مش وقته ياحاتم توا … فيسع كمل وبعدين نهدرزوا …
بعد ساعة وربع …
حاتم : كم مزالنا وقت
نزار : تقديريا والله اعلم مزلنا 40 دقيقة والله اعلم
حاتم : كيف بنطلعوا باهي
نزار : غير فيسع معش تهدرز …انت نوعك اتركز ف حاجة واحدة يايديك يالسانك خليك مع ايديك
حاتم بصوت عالي : خيرك اتهين فيااا
واحد من اللي يشتغلوا ف السفينة :فيه صوت ياسفيان
نزار بالهمس ل حاتم: يا#@$&*
*طلع ايده قام البلوكة وسكر الحاوية وسكر المصباح ..
سفيان : اها ايه انا ندوي مع روحي يامؤنس
مؤنس : هبلت اماﻻ
سفيان : ايه هبلوني
مؤنس : منو
سفيان : بنخطب واحدة وفاتتني تزوجت خوي
مؤنس : ﻻااااا بجديات
سفيان : ايه ايه … تعال خلي ننزلوا من اهنا فديت منه البابور اﻻحرف هدا
مؤنس : هي
نزار : كﻻ كل مصيبة اتصير من تحت راسك
حاتم : باهي اهو بنسكت
نزار : خﻻص معش وقت نوض نوض حاتم : به
*حط الشنطة نزار على ظهره وفتح الباب شوية طلع حاتم وطلع وراه وحط طرف البلوكة سكر بيها الباب *
نزار : وراي ياحاتم …
*ومشي بخفة ووقف وراء حاوية يدرس فيها …
{امن واقف بداية الميناء … سفيان وصاحبه عالجيهة اليمين …الربان ف المكتب والواجهة زجاج لو تحركت حيشوفوني … كيف الراي يانزار كيف … }
حاتم : هيا طلعنا يافهيم
نزار : اصبر
حاتم : صابرين
*شاف يساره لقي عوامة …. شاف يمينه لقي كشافيتي وطرف لوحة .. وطول ركبت فكرة فراسه *
نزار : استنى اهنا ماتتحركش
حاتم : به ..
*زحف نزار خدي العوامة وزحف جيهة تانية جاب طرف لوحة ورجع تاني للحاوية خدي صندوق لم البنابل المزقات وحطهم فيه وحط العوامة وطرف اللوحة وطلع وسكر الحاوية ورجع بحدا حاتم … *
حاتم : هدا شنو
نزار : استنى …
حاتم : شن بدير بيه
نزار : خليك اهنا تو انجي
حاتم : تي شن هدا كل شوي خليك اهنا تو انجي
نزار : معش فيه وقت اقعد اهنا ياحاتم
حاتم : باهي برا هي
*تسلل نزار لجيهة المحرك ويتفتف ويدور *
{معقولة مافيش مادة قابلة للاشتعال بكل شن هالحظ … ايووواه واخيرا … قاز }
*طلع من غرقة المحرك ومشي لجيهة حاتم قام الصندوق وتسلل بيه لجيهة اليمنى …
حاتم : غير شن بدير
نزار : حريقة
حاتم : وعﻻش
نزار : بش نطلعوا يافهيم … طلع وﻻاعتك
حاتم : فسدت غطصنا ف الميا
نزار : ﻻﻻ قاعدة تشتغل .
* وطلع نزار وﻻعته وصب القاز عالحجات ودار فتيلة وولع في الصندوق وخدي الوﻻعة التانية ونحالها الحديدة وطربقها…
نزار : وراي يا حاتم خليك ﻻصق فيا بتتحرك عكس اتجاهي بتحصل اهنا فاهم
حاتم : فهمنا
*وشبت حريقة ف هداك الصندوق وهرب نزار وحاتم لجيهة اليسار ولبدوا وراء حاوية تانية .. *
مؤنس : ياكابتن رفعت كابتن رفعت حريقة ف السفينة
ركبوا اﻻمن لجيهة الحريقة ووراه الكابتن و مؤنس وشوية عمالة
نزار : افطن لروحك …. هي بشوية تعال وراي
*طلع بشوية نزار ويلبد من حاوية لحاوية
وكيف وصلوا لدروج الخشبي متع السفينة …شاف نزار واحد جاي نزل شوي ولبد عالجنب وجبد حاتم للاسفل
حاتم صيح : تي خيرك !
وصل فيهم شاب متع اﻻمن كيف كان مكمل طريقه لكن سمع صوت حاتم جي جيهتهم وطلع سﻻحه ..ووقف عليهم
شاب اﻻمن : شن ادير انت وياه اهنا
يتبع………
لقراءة الجزء التالي : الجزء الثالث من رواية عاصفة الصمت
لقراءة الجزء السابق : الجزء الأول من رواية عاصفة الصمت
للإطلاع علي فهرس اجزاء الرواية : رواية عاصفة الصمت ( جميع الاجزاء كاملة ) للكاتبة لوزة
جميع الحقوق محفوظة للكاتبة لوزة .
