الجزء الثاني والعشرون من رواية عاصفة الصمت

وفي الجزء الثاني والعشرون من رواية عاصفة الصمت دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .

الجزء الثاني والعشرون من رواية عاصفة الصمت

* شدلها راسها بين ايديه وقالها : شن تبي تاني عاد هي
لبنى : نبيك انت
نزار : كيف ادوي اهو نسمع فيك
لبنى : قصدي
نزار : شنو
لبنى :قصدي هكي … قصدي
نزار : ايه ؟
لبنى : نبيك اتنحي ظن السوء فيا .. افهم قبل ماتتصرف وجعتني منك انك تضربني كف
* لبنى اتفكر >> والله ماواجعني الكف بقدر ما ولجعني انك مشحاس بيا ومش شايفني *
نزار : والله نادم يالبنى سامحيني.. كان شخص تاني في مكاني كان حيدير احرف بس الكف هدا ﻻ اراديا و مافقتش لروحي اﻻ بعد ماضربتك وبعدها شديت روحي وقتلك امشي من اهنا … مانعرفش شن كنت خندير ساعتها …
لبنى : باهب فهمني السبب ششن فيه
نزار : ﻻﻻ مافيش داعي سوء فهم ومشي ع حاله… خﻻص ضرسي ابتسمي والله مانحب نشوفك حرجانة هكي
لبنى : مش قادرة
نزار : عندك الحق
لبنى : حاسة روحي مضايقة ومخنوقة …
نزار : عارف بسببي …
لبنى : ﻻ مش منك … مضايقة على نفسي … انحس ف روحي نجري ع حاجة مش ليا
نزار : انجيبهالك هالحاجة شاوري بس
لبنى : ﻻﻻ عموما اطمن مش زعﻻنة منك
نزار : اكيد ضرسي
لبنى : اكيد …
* طبطب نزار ع كتف لبنى وقالها : ربي يحفظك
على خشت صفاء فجاة وقتلهم : واحنا نقولوا لبنى ياناري قاعدة بروحها فدار ومضايقة وهوا تاريته معاك نيزو هدرزة وجو مليح وطبطيبات احنينات
ههه ورومنسيات
نزار بنبرة حادة : اتحشمي ع وجهك
شن الكﻻم هدا ! لبنى زيها زيك وزي مروة
* لبنى اتحطمت بكلمات نزار *
صفاء : مش قصدي والله قلتها هكي بعفوية
لبنى : عيب عليك ياصفاء كﻻمك ماعجبنيش …
نزار : اخر مرة والله نسمع منك كﻻم زي هدا انحشلك لسانك

* ناض نزار وطلع من الدار وهوا معصب من الموقف *

لبنى : خطرلك يعني تدوي وتقولي هالكﻻم قدامه استنيتي لين طلع وقلتيهولي ع راحتك
صفاء : الحق فيا كنت نبي انرطب اﻻجواء بينكم
لبنى : خوك مايترطبش وشوره اللي يكلم فيها عامياته عﻻخير لين معش شايف غيرها
صفاء : فوتيه مش عارفة ﻻش معنكشة فيه
لبنى : مش بيدي انحبه

غادة : انحبه ياحنين … كان نلقى توقف هالدنيا ونكون
انا وياه بروحنا
حنين : انتي هابلة رسمي
غادة : مش مصدقة انك باعتة تسجيل لزهيرر ههههه صوتك مش متع اغاني الصراحة
حنين : ضمي فمك كان مش من التسجيل راه توا متكية تبكي في تركينة

خ عايشة : غادة كظشنو كيف حالك تو
غادة : ﻻ باهية خير من امبكري
خ عايشة : به نوضي معاي لدار السطح نضموها عسريع
حنين : ﻻﻻ خليها ترتاح ياخالتي اهو تو نجي معاك انا
خ عايشة : به هي
غادة : اه ريحتيني صحيتي حنين
حنين : سلمك

*ركبت ام غادة وحنين لسطح .. وعمك مصباح متكي راقد ف المربوعة شخيره يجيب لاخر الشارع ومن فيه مزال في الحوووش اكيد الذيب مكرم …
وطبعا غادة ف وسط الحوش تتفرج
قعمز بحداها مكرم وقالها : شن تتفرجي حبيبي
غادة : مش حبيبتك انا
مكرم : ههههه ﻻ حبيبتي ونص …
غادة : مش بالعافية
مكرم : عارف مش بالعافية ﻻنه بطيب وانتي حبيبي
غادة : مانحبكش
مكرم : مانصدقش
غادة : تصدق ماتصدقش هدا شئ يرجعلك
مكرم : سبحان الله امبكري قتيلي نبيك انت وانحبك
غادة : امتى
مكرم : في الصبح وقت كنتي مريضة
غادة : هاكا نهلوس بمسلسل تركي والكﻻم اللي قلته اكيد منه
مكرم : به عﻻش تغيرتي نبي نفهم … شن غيرك … قبل كنتي اتحبيني وتموتي عليا … اترفي لما تسمعي اسم مكرم … توا معش يعنيلك شي
غادة : حب طفولة ماتحسباش
مكرم : والله عاد كان انتي معش تحبيني وتخلفتي ع وعدك فانا قاعد ع وعدي وانحبك ونبيك
غادة : وانا مانبيكش مش بسيف
مكرم : الحاجة اللي نبيها هيا ليا
غادة : ماتحلمش هلبا يامكرم انا مستحيلة نكون ليك
مكرم : هيا هكي قصدك
غادة : ايه يامكرم
مكرم : صدقيني ماحد مسكر عليك باب غيري

نزار : ايشوف غيري … خطرله يعني انا بدات
القيافة : تسسسكت ومن يقدر يقول لبلقاسم ﻻ
نزار : به به شن اﻻخبار هي
صﻻح : بكل اسف يانزار … بلقاسم دار تلفون لصاحب الشركة اللي انت مقدم فيها وقاله يرفدك
نزار خدي طبلة الدخان او الطفاية ولوحها عالحيط وبكل تعصب قال : عﻻش ! #@//#
صﻻح : بش تتفرغ لخدمته بشكل تام
نزار : تي $## شن نتفرغ لخدمته يشبح فيا خدام بوه انا
صﻻح : ماهو … هئ حم … ماهو

نزار : ماهو شنو
صﻻح : ماهو فتحلك مكتب استشارات هندسية ….وهمي طبعا
نزار : كيف
صﻻح : باﻻسم انه استشارات هندسية لكن هوا عصابة وكان حيانا ربي حتكون اكبر واقوى عصابة
نزار : ومن قال انا نبي هكي
صﻻح : هوا يبي هكي ياديناري
* وقغ نزار وشفشف شعره و ﻻد على نفسه كم لود ويتأفأف وجوه ملخبط بكل
نزار : قيافة …. بالله عليك ياقيافة معش نبي نكمل نبي انكون شخص نظيف والله مطلبي بسيط ياناس
صﻻح : عارف ياولدي عارف …وسجلك حيقعد نظيف
نزار : شن فايدة نكتوب ع الورق نظيف وانا الله الله ايامي تعزق
صﻻح : اسمعني … شئ افضل من شئ …. كونك مقعمز ع مكتبك اتخطط وجماعتك اتنفذ خير من انك اتنفذ بروحك
نزار : تحساب روحك اتفرح فيا بهلكﻻم … في الحالتين انا خدمتي شنووز خدمتي متع حشيش
صﻻح : معليشي ياديناري اتحمل
نزار : ﻻمتى يالقيافة ﻻمتى
صﻻح : مش معروف لامتى
نزار : حسبي الله ونعم الوكيل

سالم : حسبي الله ونعم الوكييييل
منير : خيرك
سالم : جاني اتصال قالولي بعد غدوة اتكون مرزوع ف طرابلس
منير : بيبدى الشغل او
سالم : شوره واشبح شن بيكون هالديناري هدا … يستر الله وخﻻص
منير : صبر بالك ياسالم ان شاء الله خير
سالم : تعبت يا منير تعبت
منير : اسمع قاعد العمل هدا خير من التصفية راه اقلها مافيهاش قتل وارواح ناس
سالم : اللي هوا انا مليت سواء تصفية واﻻ اي خدمة عفن فديت

القيافة : تي بدل ماشادهالي فديت مليت مفروض تفرح …بتولي راس وتتحرك وتحتك جميعا
نزار : ماعندي ﻻش بنفرح … كله هم وخﻻص
صﻻح : عموما اتصرف ع انك مريض ياﻻيدز بش معش تطلع تنفد مهام وموصي دكتور خليفة بلعين ان يكتبلك كل سبوعين متابعة وجو اهواه
نزار : باهي باه تبي شي توا
صﻻح : سﻻمتك وراك تنسانا مصالحنا مشتركة … واي شخص ترتاب منه واﻻ اتحس عليه عﻻمة استفهام كلمني بس ونعطيك معلومات بالوافي
نزار : ان شاء الله ان شاء الله…سﻻمات

{نهار جده احرف بلقاسم الكلب … حسني الليلة بنهرب .. وانهرب معاي العيلة اي منطقة تانية .. ونبدى حياة جديدة وخﻻص …احسن شي اونه يفتح المكتب لروحه ولد }

صﻻح : قاعد اهنا
نزار : ايه سرحت شوية
صﻻح : ماتفكرش تهرب
نزار : وشن عرفك
صﻻح : شميتك
نزار : كيف صار
صﻻح : لان ردة فعلك كانت عادية جدا قلت هدا ايفكر في حاجة يا بيهرب
نزار : ايه بنهرب امنعني كان تقدر
*نفث دخانه القيافة وقاله : مانيش مانعك … تفضل هي … بالك نسمع خبرك … الديناري مات اتةفى قتلوه
نزار : عاجبك يعني
صﻻح : ﻻ بس فديت منك وعييت من اعادة الدوة وكثر الرغوة حسيت روحي نجري فجرتك بش معش اطيح بين يدين ناس ماترحمش…
نزار : اشبح
صﻻح : خود كﻻم الحق اذا كان انت ما خفتش على نفسك وعلى عيلتك بتتسلف شخص يخاف عليك … درت كل جهدي فيك ونحمي فيك واهو الولد يتعدل ويمشي فطوعهم وانت كل مرة طالعلي بموضوع
نزار :ماطلعتش بمةاضيع يالقيافة معش نبي نخدم باختصار
صﻻح : باختصار الموضوع مش في ايدي … دونك ليه بلقاسم براله هي
نزار : به به وانت حشيشتك الواصلين و الدواوي هادي
صﻻح : خﻻص زي ماقتلك مصالحنا مشتركة … تو انسقوا مع بعضنا
* اكتفى نزار بنظرة اسى على نفسه وتلفت وماشي ركب سيارته القيافة بلونها اﻻسود
الجميل وقال : خلينا نشوفوك ديناري
نزار : ان شاء الله ترتزى فيه الديناري
صﻻح : بعيد السو ان شاء الله فقطوستنا ياغالي
* وسطرب القيافة ومشي … اذن المغرب وجي تلفون ل نزار
نزار : نعم

مكرم : نعم في شنو تحتاجني يااستاذ بلقاسم …
حط بلقاسم رجل ع رجل ورشف رشفة من اﻻبسليوت وقال : انا نحتاجك انتاااا ؟؟
مكرم : العفو منك … حاشاك
بلقاسم : ايوه ادوي كﻻم موزون خيرلك ماانت اﻻ حشرة تخدم عندي
مكرم : اكيد استادي اكيد
بلقاسم : حتقعد اهنا لمدة شهرين..
مكرم : بارك الله فيك ربي ايدومك فوق روسنا
بلقاسم : ضم فمك ياحمار مازال ماكملتش دوتي
مكرم : اسف
بلقاسم : حتقعد اهنا شهرين … حتشتتغل تحت شخص وحنخوله بكل الصﻻحيات التامة لفعل اي شئ وانت حتنفذ
مكرم : لكن يااستادي انا مانشتغل تحت حد اﻻ انت … انا طول عمري يشتغلوا تحتي
بلقاسم : هدا شخص مش زي اي شخص … ولما نقول كلمة اتقول تم فاهم
مكرم : ان شاء الله ان شاء الله

نزار : ان شاء الله ايه ديناري معاك فيصل : انا .. انا فيصل
نزار : من فيصل
فيصل : ماتعرفنيش … ملقب ب الكوالي
نزار : وشن تبي
الكوالي : نبيك تحميني …
نزار : وشن قالولك عليا حامي الحمى او
الكوالي : غير افهمني … انا بيدهم عليا شخص والكل اتخلى عليا… ونبيك تواجهه معاي
نزار : شن مصلحتي من هدا كله
الكوالي : نعطيك اللي تبيه
نزار : مش محتاج
الكوالي : بالله عليك … انا مانترجاش في حد عادتا اسئل حتى القيافة
نزار : مانيش
الكوالي : بالك يجي يوم وتلقاني ماتدري …. ارجوك ياديناري والله بيقتلوني راهو … عندي بنت
** سكت فجأة الكوالي واجهش بالبكاء *
نزار : وحد الله ياراجل
الكوالي : والله ماعليا انا … عندي بنتي صغيرة عمرها ستة سنين … امها متوفية مافيش اﻻ انا
{شن الحصلة هدا }

الكوالي : خﻻص خﻻص سﻻمات سﻻمات ياديناري
* توووت توووت سكر الخط *

{منين طلعلي هذا تو هي ! }
09137715**
القيافة : ايواه
نزار : شن اﻻخبار
القيافة : زي ماخليتني
نزار : تعرف شخص اسمه فيصل الكوالي ؟؟؟
صﻻح : كوالي كوالي .. ايه ايه خيره
نزار : قال جماعته سيبوه و بيدهم عليه شخص مستقوي عليه ﻻنه بروحه
صﻻح : وعﻻش يقولك
نزار : يبيني نحميه دارني قرنديزر
صﻻح : براله براله … شخخص كويس راه حتستفيد منه في هلبا حاجات
نزار : زي شنو
صﻻح : بما انه اتصل بيك معناها متورط في حاجة فلهدا جماعته سيبوه … لكن بمجرد ماتتنحى هالورطة صدقني تلقاه ف هلبا امور متوغل في الدولة من تحت لتحت .. وشاد هلبا امور عالروس
نزار : المفروض ايكون عنده جماعة
رسمي مش اي كﻻم
صﻻح : ماندري عليه
نزار : لكن انا تعبان امس كنت عند الشقندي املحني
صﻻح : اسمع ديناري انا مش فاضي توا … كان بتمشيله برا و كان بتاخد رجالتي معاك خود… ماتبيش تمشي على كيفك
نزار : باهي باه …. سﻻم تو

مروة : يامهبولة عﻻش
قاصة شعرك
لبنى : ماقصيتاش حففته بس
مروة : فيك هبال مافي حد …
لبنى : مش هبال … عادي انشوف في نفسي هكي احلى
مروة : ع راحتك …

نزار : السﻻم عليكم
مروة و لبنى : وعليكم السﻻم …
نزار : مروة ديرلي حاجة ناكلها عسريع … بنطلع
مروة : والله دايخة يانزار
نزار : سﻻمتك … به ضرسي معليشي بنتعبك معاي
تنهدت لبنى وقالت : تعبك راحة .. شوية وتو نجيبلك الماكلة
نزار : تمام …
* خش نزار داره و رد الباب واتكى على سريره يفكر في الكوالي والكﻻم اللي قاله …
{واجعتني بنته بس … }
09255376**
سفيان : انعم يابش مهندس
نزار : بالله سفيان … لملي الجماعة كلها واستنوني وراء شارعنا
سفيان : شنن فيه
نزار : شخص بيدهموا عليه وانا بنوقف معاه بس
سفيان : فيها كاش ؟؟؟
نزار بنبرة حادة : فيها فشاش نوض فيسع لم الجماعة وتعالا
سفيان : ان شاء الله هي

* حط تلفونه نزار وحط يده ع راسه يفكر … وناض لدوﻻب .. نحى التيشرت ولبس واقي الصدرية … وحط البوخوصة فجييه وطلع السلاح وحط في خسره في هاللحظة خشتله لبنى …وطبعا عاطي بالظهر مازال ماشافهاش
وقعدت واقفة مسموطة من شوفة السﻻح وﻻبس صدرية استغربت تلفت نزار ويشوف لبنى واقفة فاتحة فمها
نزار : ﻻزم اي حاجة خايبة مني اتجي تحت عينك ﻻاااازم

*حطت السفرة لبنى عالكمدينو وقتله : نزار ﻻش السﻻح وﻻش الصدرية
نزار : عركة عركة ماتخافيش
لبنى : امس كنت مش قادر تتحرك وجسمك كله خريطة واليوم ناط بتمشي تتعارك …
تقدم نزار بنظرات وابتسامة غامضة ولبنى اتوخر لين لصقت في الحيط … حط ايده عالحيط بجنب راسها وقالها : تخافي عليا
لبنى : اكيد نخاف اتصير فيك حاجة

نزار : حتى لو صارتلي حاجة واﻻ روحت متصاوب عارف ضرسي مش حتخليني … حتستناني وتعتني بيا عارفك ضرسي اللبني …
لبنى نزلت راسها ع وتشبح ع جنب وحزينة ووجهى احمررر
نزار : خيرك ضرسي ﻻش الزعل اهواه …. والله تصدقي وجهك قاعد طفولي ومليان براءة لدرجة اني مانتحملش نشوفك حرجانة
لبنى : مانبيش نخسرك نزار
* وانهمرت بالبكاء كعادتها *
لبنى : مانبيش نشوف حاجة طاقة فيك … من لينا غيرك يانزار … انت راجل الحوش واكثر من هكي … شن انا من غيرك ؟؟ نقصد شن احنا من غيرك … والله خايفة عليك … خايفة عليك نزار افهم …
نزار : اششش معش تبكي… وانتي تحبي تبكي مش عارف عﻻش
* مسحلها دمعتها ب ظهر اصابعه وكمل كﻻمه : ماتقلبيهاش حزن … خﻻص ضرسي ان شاء الله انروح مابياش… ونسهروا ونهدرزوا في السطح انا وياك ومروة وصفاء
لبنى : ماتمشيش نزار
نزار : مانقدرش لبنى …ﻻزم نمشي حاجات اتجي لعندي مش بيدي
لبنى : فوتهم
نزار : ماتعلمتش هكي
لبنى : به سكر تلفونك
نزار : مش نزار اللي يديرها ياضرسي …
* شدلها نهاية شعرها وقال : قصيتي شعرك ؟؟؟
لبنى : ﻻﻻ حففته بس
* وبما انه يحب شعر لبنى من كان كانت صغيرة…
{جذابة هالبنى … فيها شئ جميل جدا يصعب وصفه}
شد اطراف شعرها وكعادته بتصرفاته العفوية مع لبنى ﻻ اراديا حطه على خشمه وغمض عيونه و استنشقه بقوة واندفاع …
ومع استنشاقت نزار.. لبنى غمضت عيونها وارتعشت ارتعاشة بسيطة.. حست بأنفاسه اداعب رقبتها ……….

يتبع………

لقراءة الجزء التالي : الجزء الثالث والعشرون من رواية عاصفة الصمت

لقراءة الجزء السابق : الجزء الحادي والعشرون من رواية عاصفة الصمت

للإطلاع علي فهرس اجزاء الرواية : رواية عاصفة الصمت ( جميع الاجزاء كاملة ) للكاتبة لوزة

جميع الحقوق محفوظة للكاتبة لوزة .