الجزء الثلاثون من رواية الزوجة التائهة بين الأحلام والواقع

وننتقل إلي الجزء الفاصل في الكثير من الأحداث داخل الرواية، لذلك جهز نفسك جيداً لمتابعة جميل الكلمات والخيال الواسع، وقراءة ممتعة بإذن الله .

الجزء الثلاثون من رواية الزوجة التائهة بين الأحلام والواقع

خشت ليلى لغرفة دكتور وخشت ممرضه معاهم وسكرو الغرفه وقعدو تقربيا حوالى ربع ساعه فى الغرفه ودكتور شرح لى ليلى شن
الا صار لى احمد بزبط وبعدها ليلى طلعت تبكى وشاده فى حيط وماوصلت لى ممر الا فيه صفاء وام احمد وعصام الا و اغمى عليها وهنا جتها الممرضه بسرعه وقاموها فى الباريلا وحطوها فى غرفة الملاحظه ودارولها كشف هيا والبيبى وطمنو عليهم وقاسولهم ضغطهم واعطوها ابره مسكن رقدت بيها لحد ساعه 2 فى الليل واول مافتحت عيونها شافت صفاء مقعمزه جنبها فاقالتلها ….
ليلى …… خيرنى انى راقداه هنا شن صار ؟؟؟
صفاء ….. لقيناك تمشى واول ماوصلتى لينا طحتى وجو الممرضات بسرعه وقاموك فى الباريلا ودارولك شوية كشوفات وطمنو عليك انتى والبيبى متعك والحمد لله لله طلع صارلك شوى هبوط بس سكر
ليلى ….. احمد شن حاله توا ؟؟؟
صفاء ….. الحمد لله بس للاسف ماخلو حد يخشله وقالولنا مش رح تقدرو تشوفوه لصبح لين يجى دكتور المسؤال علي حالته ويسمحلكم بس ياليلى انى حابه ندوى معاك فى موضوع قبل ماتجى امك راهو احمد والله مايستاهل منك شى ونتمنى انك تسامحيه ياليلى ….
ليلى ….. ان شالله خير يا صفاء وانى قبل كل شى انى بنت ناس مستحيل نتخلى عليه وقت ازمته حتى ولو انى شاده فى قلبى عليه
صفاء …. انى عارفتك ياليلى بنت اصل من غير ماتقولى وربى يرحم بطن الا جابتك …. وخلاص بالله عليك علاش تبكى والله احمد الا ماينوض زى حصان
ليلى …… ان شالله يارب
سهرو طول الليل ليلى وصفاء وقعدو يحكو على احمد واغلب الحكى كانت صفاء تحكى على صهيب وقلبها الا قريب ينفجر منه وقعدو على الحال هوا لحد ساعه 11 صبح تانى يوم وولا واحد فيهم قدر يرقد ولا يجيه نوووم وهما وحده تتطلع ووحده تخش ويطمنو على احمد من بعيد وبينما ام احمد اول ماطقت ساعه 12 فى الليل روح بيها عصام وقعدو بس ليلى وصفاء واول ماجت ساعه 11 فى الصبح خش الدكتور المسؤال على حالة احمد وبعدين طلع ووقااللهم …
دكتور …… تقدرو تشوفوه توا …. وحالته الحمد لله واليوم ان شالله رح نكتبله ورقة خروج وبالنسبه للى بنتوات يبو 15 يوم باش يبرو ويبو مدواه يوم بعد يوم اما بالنسبه للكسر الا فى ايده فا ان شالله شهر وتجيبهولى باش نقضه والباقى الحمد لله كدمات بسيطه تقدرى انتى تدويهمله كل يوم
ليلى …… اوك دكتور ولايهمك وشكرا بارك الله فيك
صفاء …… فيك بارك الله هدا واجبنا
خشت ليلى وصفاء لى احمد ….. واول ماخشو ليلى قعدت واقفه فم باب من برا وتشوفله من بعيد وقعدت رجل توخر ورجل تقدم بينما صفاء جاته تجرى وغمراته وقعدت تبكى وتقوله ….
صفاء ……. شن حالك توا وخى ..
احمد ……. الحمد لله …. وين ليلى ….
صفاء ….. اهيا ليلى واقفه …… ليلى قربى احمد يسال عليك ..
احمد …… ليلى …. تعالى حبيبتى ….
ليلى ….. << قربت منه وقالتله >> شن حالك توا احمد ان شالله كويس
احمد ……. صفاء …. اطلعى شوى وخيتى …… انى احسن لما شفتك معاى توا …… انتى سامحتينى    ؟؟؟
ليلى …… احمد مش حابه ناقش موضوع هوا توا لانا مش وقته والا صار كله حطه فى كفه والا انت توا فىه فى كفه تانيه ولو انى رح نكون معاك ونوقف معاك فى مرضتك فهدا واجبى اكيد ….
احمد ….. شن تقصدى ….. الا بينا خلاص انتهى …. والا بينى وبينك مجرد واجب بس صح رددددى ..
ليلى ….. احمد انت تعبان توا مش وقت نقاش مهم انت توا شن حاسس ؟؟
احمد ……. انتى شن دخلك توا فى ام الا حاسه ردددى عليا انا خلاص معاش نكون شى بالنسبه ليك رددددى صدقتى كل شى وقررتى خلاص انا الا بينى وبينك مجرد واجب بس صح ……. معاااااااش تبكى ردى عليااااااااااا
صفاء …… << خشت بسرعه وقالتله >> احمد خيره صوتك نسمع فيه من بعيد …..
احمد ….. مافى شى ….. بعدين سكت شوى وقاللها وين امى ؟؟؟
ام احمد ….. جيييييييت ياوليدى ادكر القطوس يجيك يتط …. نهااااااار ابيض فروخ الربى علااااااااش هادم علاش مسكرين الا يركب << الاصنصيل >> ومخلينى نركب دروج والله لين دهشت وعرقت مع بعضى ياوليدى والله سلامتك وقلت سوك لا نوووض مابيكش بسرعه والله مافىا جهد لركوب ونزول كل يوم ..
ليلى ….. لالا ياماما الحمد لله اليوم قالى دكتور بيكتبوله ورقة الخروج اليوم …
ام احمد …… شدى دوتك معاااااااااااى ايوااااا ومن اليوم انتى فى تركينه وانى فى تركينه فى جراير مشاكلك انتى ولدى معرم كدس فى تركينه …..
احمد ……. امى علاش تدوى مع ليلى هكى …. من قالك بسبب ليلى مافيش منها دوه هيا ….. ودوا الا سمعتها منك نعتبر روحى ماسمعتهاش ماشى …
ام احمد ….. << قعدة تتمتم فى داخلها وتقول >> انى نربى وغيرى ياخد ….. اصلا هيا من اليوم الا خداتك منى سلمت فيك انى ضنا ضناى وفعل مش فعلى …
عصام ……. صباح الخير ….. اسمعى ليلى وتى احمد واهى توا تجى ممرضه تساعدك لانا خلاص توا بنطلععوه
ام احمد …. ياوالله نهارررر مبروك روووووووووووى
ليلى ….. حاظر عصام هيا انت خود ماما نزلها وصفاء توا تعاونك وانى توا نوتيه وبعدين تعال انت معاى نساعدوه ينزل لانا رجله الباين محصل كدمه عليها
عصام …… هيا مالا لبين ماانتى وممرضه وتيتوه نكون انى نزلت امى وكملت باقى الاجرأت
نزلت ام احمد وركبها عصام فى سياره وتم الاجرأت وبعدين ركب فوق لقى ليلى والممرضه موتين احمد ويستنو فيه فاخدى احمد وشده من ايده وساعده ينزل من دروج ونزلو واول ماوصلو لسياره شاف ليلى مشت فتحت باب سيارتها باش يركب معها فا قال لعصام …..
احمد ….. عصام خلاص تو نركب انى مع ليلى خود انت امى وصفاء وروحو وانى توا نلحقكم
عصام ….. اوك خلاص

ومشت ليلى وقعدو ساكتين طول الطريق لحد ماوصلو للحوش واول ماوصلو لقو عصام يستنى فيهم فانزلو….. واحمد جى بيركب فوق بس امه طلعت وقالتله ….
ام احمد …… عصام خود خوك ودخله فى مربوعه
ليلى ….. ماما خليه يركب فوق نساعده يبدل حوايجه وبعدين ننزله بشوى
ام احمد ….. علاش من قالك ولدى معطى فى رقبه ماهو مش انتى الا ملحستيه الكمامين خلى الولد هنا ماعنداش جهد باش يركب وبرى اركبى جيبى حوايجه من فوق وانى توا نساعده يلبس…. بنات اخر زمان بتطلعى انتى افلح منى
…
احمد ….. شبح لى ليلى وقاللها خلاص برى اركب جيبى حوايجى من فوق وانزلى معليشى …
ام احمد …. وليدى خالتك وبناتها اليوم جايين بيسالو عليك العشيه واقاربنا كلهم حتى هما كلمتهم وبيجو العشيه ….. وراهو حتى ولاد خالتك وولاد عمك بيجو يطمنو عليك
احمد ….. باهى باه يصير خير انى تعبان توا بنرقد ….
ركبت ليلى جابت حوايج احمد ولما جت بتساعده فى لبس قالتلها عزوتها ….
ام احمد ……. برى انتى ساعدى صفاء فى تقريض البصل وانى توا نلبسله وخفو روحكم الناس قريب يوصلو …
ليلى …. ماشى ماما اهوا خاشه ….
مشت ليلى للمطبخ ولقت صفاء تقرض فى بصل فاجت جنبها وبدت تساعد فيها وهنا صفاء قالتلها ….
صفاء ….. تعرفى بتجى خالتى وبناويتها واحتمال يباتو مبرد دمهم زفت
ليلى …. بتجى اميره قصدك ؟؟؟
صفاء ….. اكيد كانا غابت عسيله من الا يحرقص فيها هههههه
ليلى …. تعرفى مش عارفه انى دمى محروق وكان بتلقحلى شن ندير فيها هههههه والله مانقصتنها انى ههههه
صفاء …. خلينى انى نرد فيها غيظ صهيب كله
ليلى …. هههههه شن جوك معاه باللهى ؟؟؟
صفاء …. متعوده ديماااااا كل يوم نتعاركو على ابسط الاسباب وديما يحسس فيا انى انا بديت تافهه ونفكر فى الامور سطحيه جدا وسبب بس لانى نغير عليه من زميلته الا الله عالم بناويها
ليلى …. تعرفى ننصحك نصيحه خفى روحك كملى هالسنه وحددو موعد العرس وخليها طق من قهرها ههههههه
صفاء ….. باين انا بنفركشو الخطوبه اصلا ولا بيصير من عرس ولا شى ؛؛؛؛..
ليلى …. علاش؟؟ …
صفاء …. معاش مرتاحه معاه الحق … حاسه انى بديى تفكيرى فى جهه وهوا فى جيهه تانيه تفكيره ونحسه تغير معاش صهيب قبل الا يخاف عليا ويحترم فى مشاعرى … وتصورى توا بدى حتى نتعاركو يقعد حتى 3 ايام مايدورنيش ولما بيجى يصالحنى يعميها اكتر خلاصه ربك يستر وخلاص ان شالله خير …. مهم انتى شن ناويه ديرى مع احمد ؟؟؟|…..
ليلى ….. انى حاليا حاسه نفسى تايهه جدا بيين قلبى وعقلى …. ورح نخلى الا يغلب هوا بس الا يقودنى ……. بس حاليا ماعنديش اى قرار وخاصة بعد الا صار مانقدرش نتخلى عليه وهوا محتاجنى حتى ولو انى شاده فى قلبى منه ومسامحتش…
صفاء ….. هههههه مالا شنى يابنتى مش يقولك خود بنت الاصول راهو زمان يطول 
ام احمد ……. بطلى انتى ويااها رغى ولوقنى زايد وكملو فيسع خلى نطلع نكنس جنان قبل مايجو ناس ….
عصام ….. يماااااااا .. يامااااااااا … وين مروه ؟؟
صفاء ….. امى طلعت يا عصام هونى مروه تلقيها فى دارها ..
عصام ….. مروه ….. مرووووووه << وبعدين خش لدار ولقها تتكلم فى تلفون فاقاللها …. هدا تلفون منى ؟؟؟
مروه ….. هدا تلفون امى …. ونكلم فى صاحبتى ؟؟
عصام …. هاتيه تلفون هاتيه …
مروه ….. علاش شن دخلك انت بيا شن وليت انت امى ولابوى ان شالله ؟؟؟
عصام ….. هاتى تلفون ياحيواااااانه هاتييييييه
مروه ….. ياماااااااااااااااااا ياماااااااااااااا عصام يضرب فيا يامااااااا
ام احمد ….. خيرك العقو تضرب فى اختك قسما بالله نسمع قى صوتها من جنان
عصام …. قولى لبنتك تجيب تلفون توا والا قسما بالله نتش فيها نار هاااااااااااااااتيه ..
؛
؛
يتبع…………….

لقراءة الجزء السابق : الجزء التاسع والعشرون من رواية الزوجة التائهة بين الأحلام والواقع

للإطلاع علي فهرس اجزاء الرواية : جميع الأجزاء كاملة لرواية الزوجة التائهة بين الأحلام والواقع

جميع الحقوق محفوظة للكاتبة كيندا من ليبيا .