إكمال الرحلة في قراءة الرواية يزداد إثارة وتشويق اكثر واكثر فالاحداث تجعل عقلك يقول ماهذا الجمال ! ويود المزيد منه، لذلك كاتبتنا الموهوبة لوزة تبدع اكثر في صياغة السطور القادمة من الرواية حيث احداث ستفاجيء خلايا عقلك من الروعة لذلك دون اي مقدمات لنبدأ قراءة احداث الجزء سوياً .
الجزء الحادي عشر من رواية حالة حب للكاتبة لوزة ليبية
طلع شمسي من الدوش ولف نصه بفوطة وجسمه كله مبلول فتح الباب …. اذ بها جمانة خشت فحضنه طول بدون اي مقدمات ….
شمسي معش فهم شي من شي شعور رهيب سيطر عليه اتملك عواطفه واستوطن بداخله لدرجة حس بقشعريرة تسري في جسمه لين غمض عيونه…. حس بخدودها يداعبوا جسمه ويديها خلف ظهره وماسكاته بكل قوة….
شمسي…نحبك جمانة عرفت انك تبيني واتحبيني
جمانة….نموت فيك حبيبي انمووووت فيييك ….نبيك انا من زمان غير ماقدرتش انقولك
شمسي….ياريتك قلتي …معش تبعدي عليا اجمنو
جمانة…. ولا عمري حنبعد عليك ياقلبي…. حضنك مريح ضمني ليك اكثرررر شموستي ضمني شمسي
* خيال شمسي فقط ليس الا ….
بعد الافكار من راسه وحاير فيها شادة فيه وتبكي … حط يديه ع شعرها وقالها بكل حنية – معش تبكي جمانة هدي بالك واحكيلي شن فيه
جمانة حست وجها مبلول فتحت عيونها وشبحت عضلات شمسي عليه قطرات ماء …. شهقت وبعداته عليها
وطاح منها تلفونها وساخت من شدة صدمة اللي شافاته عالفايبر زيد عليها منظر شمسي بالفوطة ….
قامها وحطها عالسرير وسكر باب الغرفة …. خش للحمام لبس بيجامة ورجع بخلها اميا ع وجها …
بعد عدة ثواني فاقت جمانة …لقت شمسي مقعمز على مقربة منها …. شبحتله وبدت تبكي تاني
شمسي – خيرك جمانة شن فيه والله خلعتيني شن فيه
جمانة – حاتم ياشمسي حاتم
شمسي – خيره شن قالك
جمانة ناضت خدت النقال وفتحت القفل وفتحت الفايبر ومدتهوله
خدي منها النقال وكبر الصورة لقاها
عقد قران حاتم البيالي ومنيرة الغيران ….. ووراها صورة ثانية سيلفي في السرير حاتم ومعاه واحدة وجها مضلل بتاكيد منيرة …
شمسي – انهاااااار اكحل من بعتهالك هادي ….حي ستني ستني .. رقم منيرة هذا …. شن جابها ع خطيبك
جمانة تبكي وتريش ف شعرها – تعرفها قصدك تعرفها شمسي ؟؟؟
شدلها يديها شمسي وبدت تضرب فيه ع صدره .. وقتله – انت باعتها ياشمسي انت باعتها بش اتلف ع حااااتممممممممم كله منك ياشمسي كله منك معقولة هكي ادير فيا
شمسي بصوت عالي – اهفتي ياجمانة
سكتت جمانة جمرة طاحت ف اميا …
شمسي – مش حنلومك عاللي قلتيه اوكي وبندير روحي ماسمعت شي لان عارفتيني مانديرش حاجة وسخة زي هادي
* اتحشمت جمانة ونزلت عيونها …
شمسي – توا هدي بالك وقعمزي خلي نفهم منك
جمانة – امنين تعرفها انت وكيف هكي حاتم متجوز
شمسي – غير قعمزي بس
جمانة – اهو قعمزت هي
شمسي – بالنسبة لجوازت حاتم مانعرفش بيها لكن قتلك مارجعلك الا وراه سبب … وبالنسبة لمنيرة كانت اخت خطيبتي
جمانة – خاطب انت
شمسي – كنت كنت ….وللاسف اتوفت
جمانة – الله يرحمها ويغفرلها ….به ياشمسي قولي كيف حاتم متجوز كيف وكيف هكي يدير فيا
شمسي – قتلك من الاول انه مش راجل والاه وانتي شادة فيه
جمانة – مش لدرجة انه متجوز ياشمسي مش لدرجة هادي
شمسي – باه بما انه متجوز انتي بتفسخي والاه
جمانة هزت راسها ودموعها ع خدها وقالت – اكيد
شمسي – معش تبكي جمانة … هوا مايستاهلش دموعك…. بكاك هلبا هالتافه….
حاتم – خسارة …..ماحبنيش حاتم زي ماحبيته
شمسي – افتكيتي منه…. قصدي غير اهدي انتي توا
جمانة – فلوسي ياشمسي عنده فلوسي حيه عليا من بوي حيه والله يحرج مني بالك معش ايكلمني حتى
شمسي – تو انجيبهم منه
جمانة – كيف
شمسي – انجيبهم بالقوة ماتشغليش بالك بيهم
جمانة – لا ياشمسي حاتم واحد نذل يقتلك مرات لا قدر الله
شمسي – هههه مايقدرش
جمانة – قتلك واحد نذل حيقولك باهي وتم وتو نجيبهملك و يخليك تتلفت ويعطيك رصاصة باهية
شمسي – اللي كاتبه ربي بيصير المهم نجيبلك فلوس
جمانة – والله ماك ماشيها ياشمسي
شمسي – معش تحلفي
جمانة – نخاف عليك والله يحطك ف راسه حتى اشبح بعد قداش شهر يدير حاجة
شمسي بكل استغراب – وانتي عارفتيه نوعيته هكي وقاعدة معاه
جمانة – ماه انحبه قصدي كنت
شمسي – والله شي يقهر تو هذا ينحب ياجمانة
جمانة – المهم اوعدني شمسي انك مش حتمشيله بالله عليك ودرة الفلوس…. اصلا صدقني حيديرلي مشاكل ف شارع ويجي يقول لبوي بنتك وراها واحد ويركب هلبا كلام من عنده
شمسي – باهي باهي معش تبكي حتى لو كلمته مايسترجاش يجي لشارعك اطمني
جمانة – عارفاتك اتساير فيا
شمسي – خلاص مانسايرش فيك غير خودي نفس عميق وارتاحي وريحي بالك
جمانة – به فرضا مشيتله وجي كلم بوي وقاله
شمسي – مش خايف انا…. مستعد نكلمه بوك وانفهمه اني زميل عمل وساعدتك
(ومنه بالمرة نتقدملك …. الله ياربي ماتوقعتش ان تصير حاجة زي هادي )
جمانة – امممم باهي اللي اتشوفه ياشمسي
شمسي – تمام
* سرح شمسي في عيونها اللي يدمعوا قهر على حاتم … تقدم منها مسحلها دموعها وشدلها راسها بين يديه وباسلها جبينها وقالها – معش تبكي اجمنو مانتحملش نشوفك تبكي
* رخالها راسها …. خدت المخدة جمانة وغمت بيها وجها وبدت اتصيح رختها وضربت وجها مرة واتنين … شدلها يدها شمسي معش تبي تهفت فخداها فحضنه احتواها بعطفه …. سكتت جمانة للحظات وقتله – شمسي قتلك معش تسرح انا
رخاها وقالها – انتي معش تبي تهفتي معش عرفت شن اندير تريشي ف شعرك وتضربي فحالك…. نوضي
نوضي توا لغرفتك اغسلي وجهك وارتاحي والصباح رباح
جمانة – تمام … على فكرة
شمسي – نعم
جمانة – البيجامة الحمراء طالعة عليك 
….
شمسي – ههههه تتسهوكي عليا 
جمانة – هههههه…..اه حقا … معليشي رعشتك في هالليل 
…
شمسي – مادوريش صار خير 
جمانة – بجد مانندريش ع روحي 
شمسي اكتفى ببتسامة 
….
جمانة ناضت ومشت للباب فتحاته وقتله – ليلة سعيدة شمسي
شمسي – ليلتك اسعد اجمنو …
~~~
شمسي – ها معتز روحت
معتز – ايه روحت ماتشبحش فيا اون عالفايبر
شمسي – به تعالالي ف الدار فيسع
معتز – باهي هي
~~~
[كيف حاتم ايدير هكي كيف … ماتوقعتش منه النذالة هادي … متجوز وجاي بيتجوزني حسبي الله ونعم الوكيل فيه كلب حقيررررر ]
~~~
معتز – شن الجو
شمسي – احسن جو واحلى ايطاليا واحلى يوم
معتز – شن فيه ياراجل فرحنا معاك
شمسي – جمانة يامعتززززز
معتز – خيرها ياشمسييييي
شمسي – خطيبها نذل طلع متجوز
معتز – كيف
شمسي – طلع متجوز منيرة
معتز – من منيرة
شمسي – خلي نكلمها منيرة نفهم منها علاش دارت هكي وهل تندري عليه خاطب والا لا
معتز – مافهمت شي راه
شمسي – غير اصبر اصبر …. ندير اتصال بس
معتز – اوك
شمسي – ماتردش …. خلي نعاود ثاني ….. ايوه
منيرة – نعم من معاي
شمسي – انا شمسي يامنيرة
منيرة – اه اهلين
شمسي – اهلين بيك … كيف حالك
منيرة – ماشي الحال
شمسي – شن اخر اخبارك …شن مدايرة ….. انخطبتي اتجوزتي والا شن صاير فيك
منيرة – لا مازال لا انخطبت ولا اتجوزت
شمسي – باهي ان شاء الله ربي يسخرلك الحال
منيرة – ان شاء الله ماتبي شي شمسي
شمسي – خيرك انحس فيك مضايقة
منيرة – ايه تو نهدرزوا ف يوم تاني سلام ….
شمسي – اوك سلام
معتز – هي فهمني
شمسي – خطيب جمانة طلع متجوز …
معتز – اووووف
شمسي – مش عارف خيرني انا عارفها متجوزة واتصلت بيها في هالوقت …. لكن اهو طلعوا متجوزين بالسر
معتز – لا ياراجل ومن هيا اللي كلمتها توا
شمسي – اخت ريفاء هيا مرت حاتم
معتز – ياسبحان الله قداش الدنيا صغيرة …. منيرة متجوزة بالسر !
شمسي – خليه موضوع منيرة تو نتصرف فيه بعدين …. المهم توا جمانة كيف بنردلها فلوسها من حاتم النذل
معتز – برا عطيه ع حموم سعده وجيب منه الفلوس
شمسي -جاي بنمشيله ونبهدله لكن حذرتني منه جمانة…. ماتبينيش نمشي قتلي مشراني
معتز – تبي نبعت الباجقني
شمسي – ياريت والله
معتز – تم غير خودلي نعتة حوشه حاتم واعتبر الموضوع تام
شمسي – خلاص تم
* مضي الوقت مش حلو على جمانة برغم ان يومها كان مليان سعادة برفقة شمسي مع الاجواء الايطالية الجميلة ….حست روحها جمانة مضحوك عليها للمرة الثانية قعدت تبكي من الحسرة اللي فقلبها …
*ام بالنسبة لشمسي فكان مبسوط وسعيد لان جمانة حتفسخ من حاتم وحتكون ملكه ليه هوا وبس … من بعد جول انتظار قريب يوصل لحبه حب حياته جمانة ….
(واخيرا نقدر نقول ان جمانة حتكون ليا ان شاء الله انحبك جمانة انحبك)
* تأخر الوقت وكلهم رقدوا …. مع ساعة 8 تماما فاق شمسي شاف اموره وطلع للمطار يسئل ع الطايرة وقالولهوحتكون جاهزة عالساعة 12 ظهرا …. خطم شمسي ع محل ورد خدي منه وردة حمراء … وخدي كرت صغيرون كتب فيه … صباحكي سكر اميرتي … نستنى فيك في ردهة الفندق بش نفطروا مع بعض….
ومشالها ف دارها طقطق عليها عدة طرقات …. فاقت جمانة حكت عيونها قعزت واثاوبت واتكسلت …. ولوحت اليرغان ووقفت وفتحت الباب مالقت حد … لقت وردة محطوطة عالارض
خدتها قرت اللي فيها وابتسمت برغم انها رقدت امس ودمعتها ع خدها ….
خشت وشافت امورها ولبست اللبسة الوحيدة اللي عندها اللي خدهالها شمسي ….
ونزلت لردهة جت من وراء شمسي وحطت يديها ع عيونه ….
جمانة – منو انا
شمسي – انتي الغلا
جمانة – هههه منو انا
شمسي – انتي الود
جمانة – هههههههه منووو انااااا
شمسي – انتي حياتي …. وروح سكنت روحي …
* نحت يديها جمانة وقعمزت قبالته وقتله – صباح الخير …. وشكرا ع الوردة الحلوة
شمسي – لو بيدي نفرشلك الدنيا كلها ورود يااحلى واجمل وردة …… كيف حالك اليوم
جمانة – باهية بس متحسرة ع نفسي
شمسي – عاللي صار امس
جمانة – ايه انحس ف روحي غبية
شمسي – نقولك حاجة …. مش ذنبك انك حبيتيه ….في النهاية الانسان كتلة من المشاعر فيه اللي يقدر ايوازن بين قلبه وعقله ويتصرف بالاتنين تصرف منطقي …ام انتي كلك عاطفة جياشة مانظرتيش لعقلك تغاضيتي عن كل عيوب حاتم من اجل انك تكوني معاه بس هوا طلع مايستاهلش هالحب …. ماتحسيش انك غبية لان هوا الغبي لانه خسرك
جمانة – كلامك ياشمسي كلامك
شمسي – خيىه ياجمانة خيره
جمانة – ايريح الخاطر ويهدي البال اتقول بلسم
شمسي – هههه باهي الحمدلله قدرت نريحلك بالك ….
* ظلوا يهدرزوا وفطروا مع بعض ومشوا يدهوروا في روما خدوا عدة صور سيلفي …. ركبوا قارب في النهر وصاحب القارب ايجدف بيهم والتاني واقف على حاشية القارب شاد قيتارة ويعزف لحن رومنسي بكلمات رومنسية ايطالية شاعرية … حست جمانة بالفرح لوجود شمسي في موقفها الاخير …. كونك انك تواجهي موقف محزن مع شخص ينسيك همك شئ جميل فعلا …افضل من غرفة مضلمة وانعزال عن العالم وانقطاع عن الاكل ولا شئ سوا الدموع ….
(الحمدلله ياربي الحمدلله قدرت نواجه انكساري ونتخطاه نوعا ما مش حاسة بالزعل لان حاتم متجوز الطيور ع اشكالها تقع وشمسي فتحلي عيوني هلبا ….)
شمسي – مبسوطة جمانة
جمانة – اكيد مبسوطة ….شكرا لانك في حياتي شمسي
فرح شمسي لهذه الجملة وقريب طار من الفرح .. وقالها – وانتي كل حياتي واحلى مافيها
اكتفت جمانة ببتسامة ….
* قضوا وقت ممتع مع بعض وجي موعد رحلتهم لبس كل منهم الزي الرسمي للعمل وعادوا لارض الوطن
شمسي – ابعتيلي عنوان ف رسالة اوكي
جمانة – اوكي
شمسي – يلا ردي بالك ع روحك اجمنو
جمانة – ان شاء الله حتى انت …. سلام شموسة
شمسي – سلامات ….. هيا معتز … كلمت الباجقني
معتز – ايه كلمته اهو قدام المطار ….
شمسي – اوك هي
~~~
عفاف – كلللللللبةةةةةة ايطاليا مرة واحدة
جمانة – ههههههه والله جوووو ياعفو تمنيتكم معاي
عفاف – ياريت والله شن قالك الكلب حاتم اكيد دارلك فدف الرز عظام
جمانة (حكت شن صار معاها)
عفاف – قتلك انا وياما حذرتك منه انتي ماتسمعيش ف الكلام
جمانة – هيا خلي انروحو توا استحشت امي ونورة
عفاف – هي
~~~
وصلت الرسالة ل شمسي فيها عنوان حاتم …. مشي شمسي والباجقني ومعتز لحاتم …. كلمه شمسي بالطيب مانفعش معاه واصر انه يعرف هوا مني وشن علاقته بجمانة ….فلما ماباش يستجيب لشمسي صفر شمسي لباجقني نزل من السيارة وجاهم وبصدفة طلع حاتم سامع بالباجقني شخص مشراني ومايرحمش المهم بهدلوه هما الثلاتة لين قال ياسر وخش وقتي للحوش جاب نص المبلغ والمبلغ وعدهم غدوة ايكون عند الباجقني وتام برغم علامات استفهام حول الموضوع ….
شمسي – تقطع علاقتك بيها جمانة فاهم وديني نلقى اتصال منك ف تلفونها والا مهددها والا جاي جيهتها نقتلك فاهم
حاتم – تباهي فهمنا #@$&
*روح شمسي واللي معاه ….
ومن ثاني يوم مع العشية جاب الباجقني باقي الفلوس لشمسي ….
فرحت جمانة للخبر …. وطلعلها شفرة جديدة ….
شمسي – منيرة فهميني كيف ترضي تنجوزي بالسر
منيرة – وانت شن تبي فيا نتجوز بالسر والا بالعلن المهم حلال
شمسي – من وراء امك
منيرة – اللي صار صار توا
شمسي – واللي تجوزتيه ياريته يستاهل … خيرك هكي خيرك ماتكونيش زي اختك ريفاء كانت زي النسمة
منيرة – وانت اصلا منين عرفت
شمسي – اللي بعتيلها الصور اتكون صديقتي
منيرة – صديقتك صار باهي عموما ماليكش علاقة في الموضوع اختي وماتت انقطعت علاقتك بينا شن جاي تبي
شمسي – الله يرحمها كانت زي النسمة … تنحط عالجرح يبرا
منيرة – برا من قدامي والله ماناقصاتك تره صدقت فيك ريفاء لما كانت بتلعب عليك وبتخليك تكتب الحوش باسمها بعدين تعطيك تيرو امدرجح ياريتها عايشة بس كان هذا راني شمتت فيك توا
انصدم شمسي من هالكلام … وقالها – شن هوا
منيرة – زي ماسمعت هي سلام خلي نمشي ع حالي مش ناقصة وجع راس …..
مشت منيرة بدون ماضيف ولا كلمة غضبها خلاها اتحط اللي في الشكارة وتمشي ….شمسي قعد في حيرة من امره وحط الموضوع وراه *
بعد هالموقف بشهرين خطب شمسي جمانة رسمي وعوضها عن كل دمعة الم بكتها حست بطعم السعادة الحقيقي مع شمسي … وقعدت تشتغل مضيفة مشوا لكدا بلاد خدت ملابس بتاتها وعاشوا احلا ايام …. بعد شهر من الخطوبة داروا عرسهم في صالة بانوراما ….
25-8-2015
جت اللحظة اللي كل بنت تتمناها انفتح باب الصالة وكانت ريحة الوشق مفحفحة المكان وكانت جمانة شادة في يد شمسي لابس بدلة ومتأنق كاي عريس … وعلى اغنية محمد فؤاد خشوا بشوية بشوية …. يدرجوا كاجمل عروسين سطروا حكايتهم الكابتن والمضيفة تبعه….
ولما وصلوا للكوشة انفتحت اغنية
عايشة حالة حب شبحوا لبعض هما الأثنين وعيونهم مليانة حب …. وقف شمسي ومد ايده ل جمانة … حطت يدها ف يده ووقفت و رقص هوا وياها وكانت كل الانظار عليهم …… يهمسوا لبعض ويضحكوا وخدوا احلا لقطات صور ….
تمت حفلة جمانة وكل مراسم العرس كالتدريجة وغيرها …
دخل شمسي ع عروسته وسكر الباب
جمانة كانت في دار النوم …. تنتظر في فارسها …. خش شمسي بباقة الورد …
شمسي – السلام عليكم
جمانة بكل خجل – وعليكم السلام ..
شمسي تقدم وشدها من يدها بكل حنية …. وباسهالها …. وقعمز جنبها
شمسي – مش مصدق ياجمانة واخيرا انتي معاي …. انريد نضمك … ضمت حنان وشوق … انضمك ضمة نين خاطري يبرى وينسى همه ويبقن عروقي يشربن من دمك انريد انضمك
جمانة – جيتك جيتك نا عارفة طيب ومصفي نيتك … مرايفة عليك نريد نضمك
شمسي قرب منها وطبع قبله ع شفايفها – امممموه حبيبتي انحبك ربي ايخليك ليا
جمانة – امممموه يااغلا من ضي العين
*وهل يوجد اروع من قصة حب انتهت بالقفص الذهبي….
سافروا ثاني يوم يوم لجزر المالديف كشهر عسل ….
عفاف انخطبت لحبيبها جهاد …
بعد عرس جمامة بسبوعين
*منيرة طلبت الطلاق من حاتم وطلقها …. ومعش فكر في الزواج مرة ثانية
* نورة تعرفت ع معتز بالصدفة وقاعدين علاقة ووعدها انه يخطبها في اقرب وقت ….
* وهادي كانت نهاية قصة حالة حب بين شمسي وجمانة …..
لقراءة الجزء السابق : الجزء العاشر من رواية حالة حب للكاتبة لوزة ليبية
للإطلاع علي فهرس الاجزاء كاملة : جميع اجزاء رواية حالة حب كاملة للكاتبة لوزة ليبية
جميع الحقوق محفوظة للكاتبة لوزة ليبية .
