وإلي الجزء الحادي عشر حيث مفاجآت قد تكون متوقعة في السطور التالية ولا تأتي علي البال ابداً او ستسير الامور برويه قليلاً قليلاً، سنعرف كيف سيكون الوضع داخل الجزء ولكن ما يمكن ان اخبركم به اننا مازال امامنا الكثير الكثير من الاحداث .
الجزء الحادي عشر من رواية همس العيون للكاتبة لوزة ليبية
ورس:صباح الخير رتوجة
رتاج:صباح النور …شنو اﻻبتسامة العريضة هادي ! شن السررر
نورس:متصبحة بناس قنينة يومي اكيييد حيمشي قنين
رتاج:غير بشوية علينا ع منو متصبحة
نورس:ع اياد صبح عليا وجابلي هدية عيد ميلادي
رتاج:بجدياااااات ؟؟؟
نورس:وحق ربي …
رتاج:سعدودك يامعفنة معيشك اميرة ومين قدك
سرحت نورس ف نقالها خيره ماتصلش
رتاج :شن جابلك
نورس تفكر …فاتو قريب عشرة دقايق وينك اياد
رتاج:هئ حم
نورس… مبردني مزال بكري عشرة دقايق وانا نسحن
رتاج:فمن انكلم انا !
نورس:معليشي سرحت شوية
شن كنتي اتقولي ؟؟؟
رتاج:شن جابلك
نورس:جبة حلوة شوفيها
رتاج:محﻻﻻﻻﻻاااااهااااا اتهبل … عطيهالي نورس انتي ماتحبيش الجبب
نورس:ﻻ بما ان جابها اياد حنحبها وحنزيد ناخد منهم بش نلبسها اكيد ايحب البنت بجبة ^^
صلاح: من م6 الى 03.. 03 حول
ﻻسلكي:نعم يا م6
صلاح:تم اختطاف 09
ﻻسلكي:وين وكيف
صلاح:شارع فﻻن فوﻻني وماعنديش اي معلومات عن نوع سيارة
ﻻسلكي:ابحث الشوارع المجاورة يا م6 وتو نرسل قوة ادير بوابات ع الطرق
صلاح:تمام ….ايمن خود سيارة هادي وانا ناخد سيارة اياد دور ف طرق تاجوراء البيفي والجيهة هديكا اي سيارة مشتبه بيها او حسيت بأذنى شك اعترض طريقها و كلمني طول وانا تو ناخد طريق عكس اتجهاك
ايمن :تمام
فتح عيونه اياد وغمضهم وفتحهم تاني بس ماشاف شي مدايريله رباط ع عيونه حس روحه دايخ… جت فباله نورس وكلامها مش ماتتصلش ش ش معش نكلمك بكللل كل كل
تحرك شوي لقي روحه ايديه مربوطات
حاول يسمع ويحدد مكانه من غير مايحسو بيه انه فاق
بربش بيديه جنبه لقي طرف مرشة صغيرة ف الكرسي حطها ف جيبه التلاني ويسمع ف الزوز يتكلمو
شخص1 يتكلم ف تلفون: ايه ايه … اتغير المكان ؟؟ باه باه خلاص تم بحدا منطقة كدة واﻻه اوكي
شخص2:وين قالولك بيستلموه ؟
شخص 1: في منطقة كدا
شخص 2 :بالك فيها بوابات غادي شخص1:ﻻ مافيهاش …
شخص2 :تعرف كان ﻻقتنا بوابة نهارك احرف بنقولهم حتى انا مخطوف
شخص1: ماتفكرش هكي ياحمار كان تمت العملية ع خير نقبضو فلوسنا ونمشو انهيجو
اياد:تهيجو بفلوس حرام ؟
تلفتله واحد منهم وقاله : ضم فمك ضم …. ماتخشش ف دوة خير مانزيدك خبطة تانية ع دماغك
فكر اياد معناها مش هادو اللي يبوني …اماﻻ منو وشن يبو مني خطرت فباله فكرة انه يفتح باب السيارة وينقز لكن خاف تجي سيارة وراء سيارة هادي وتسحنه
صلاح.. مصيبة وحلت ع دماغنا كيييف صاحبي خطفوه ان شاء الله مايديرو فيه شي …. ااااخ يا اياد الله يسامحك قتلك نخشو كلية طيران راهو افتكينا من المؤمرات والخطف
اياد قاعد يفكر..ياربي كيف اندير كان وصلو بيا للمكان متعهم او لشخص اللي بيسلموني ليه مش حيديرو فيا خير تعذيب وتشريد واعمال قذرة بكل …
نحاول نفتح رباطي بالمرشة وبعدين بالك نقدر نهرب
ايمن :صلاح فيه سيارة مسلفرة جيهة البيفي
صلاح:اعترض طريقها وفتشها فيسع
ايمن :علم
شخص1:شن سيارة هادي اللي ادعك
شخص2بالك شرطة واﻻ حاجة زيد ف سرعة ياراجل
فرح اياد وقلبه قريب طار ^^
اعترض ايمن طريق السيارة ونزل بسلاحه فتح صاحب السيارة المرش وقاله نعم ياخونا
ايمن:افتح بيبانك الخلفيات
الشاب:غير شن فيه بس
ايمن :تعاون معانا ياخوي بنشوف كان لقيت حاجتي بنشدك كان مالقيتهاش بنخليك ع حالك
الشاب:تفضل هي فتحتلك حتى الكوفيني
شاف ايمن كويس مالقي شي فقال لشاب :سامحنا
الشاب:مسامح ياخوي
ايمن:منور ربي يحفظك
شخص1:اها بنت تعاكس
شخص2:خلعتني بنت ……..
اياد:خلعاتك انثى! ماك كان مش داير شي ماتخليش انثاية تخلعك هههه
شخص2:ضم فمك خير مانجي نرنك كف انطرك ورا السمس
اياد:احترم نفسك ..مستنصر ﻻقي يديا مربوطات ياعافن فكلي يديا وتو نوريك الشمس شن شكلها
نورس واقفة عالروشن وتسحن ع اياد …. معقولة… معقولة يا
اياد ليا ساعة وربع نستنى فيك وانت ماتصلتش … كل دقيقة تفوت نحس ف روحي بنختنق ونموت … باهي كان ماتبينيش عﻻش تجيبلي هدية واﻻ هدية وداع بش اتنحي الذنب ع نفسك انك معش بتكلمني ! … ياودي بالك ظالماته…نزيد نستنى للقايلة برغم اني قتله اتصل وقالي بمجرد ماتخشي للمركز نتصل بيك …
ايمن:اها صلاح
صلاح:شنو حصلته
ايمن:ﻻﻻ ماحصلتاش وانت
صلاح:ﻻ والله
ايمن:به
صلاح:انت خاطف شخص وين حتمشي بيه فكر معاي تره
ايمن:والله ماعارف عطيت بﻻغات لكل الدوريات وان شاء الله خير
اياد معش عرف شن ايدير غمض عيونه يفكر ف نورس … اخخخ ياربي شن هالحظ اكيد تحسابني نجري بيها وانا حالتي حالة اهنا … نورس ان شاء الله ماتفاهنينيش غلط انا مش معروف مصيري شنو مرات انموت 
شخص1:اها ياصوندا… ايه يا راس انا ف المكان اللي قتلي عليه باه نستنى فيك …
بعد شوي طلع الصوندا من مبنى خدي اياد ودفع فلوس لزوز المختطفين ومشو الشخصين ع حالهم
صوندا:تي اتحرك وانت زي المسبوه
اياد:ممكن نعرف شن سبب الخطف !
الصوندا :ﻻ مش ممكن
اتكزمت اياد ومعش عرف كيف يدير
اتكنطى وحاول يفك رباطه ماقدرش
خششه الصوندا لمكان واسع ومظلم ونحاله عصبت عيونه وسكر عليه الباب
شاف يمين يسار مالقاش مخرج …
واخيرا انفتح رباط يديه قرب جيهة يسمع ف صوت عدة اشخاص يهدرزو قعمز اياد ع الوطى وحط ايديه ع راسه معش عرف شن ايدير …
يتمام سامحيني يمى … عمار رد بالك ع خواتك وامك … نورس ان شاء الله تحصلي شخص افضل مني مهندس وبشغل ماافيشي ضغائن … يوم ضاربيني برصاص ويوم مخطوف هم احرف … حنبعد عليك يانورس بس معش نسببلك مشاكل معاي
نورس..علاش بس علاش ..ماتوقعتكش هكي اياد كنت نتوقع منك اﻻحسن بقدر اهتمامك ليا
توا ساعة 1 بتوصل التﻻتة ومع وصلتي للحوش ينسى اني نرد عليه
عمار:يمى بنقولك حاجة …
خ مريم:قول ان شاء الله خير
عمار:ااا ااا هداااا اممم
خ مريم:تي اتكلم وانت اااا وخﻻص
عمار:اياد … خطفوه
خ مريم:انهاااااااار احرش ووووك وووك عليا وووك
عمار:ياريتني ماقتلك يمى
خ مريم:ياوك عليا وليدي البكر ياكبدي ياحليلي …
عمار:هدي بالك يمى
خ مريم تبكي حتى شاربتها نحتها وردت علبه:وين نهدي بالي وين ااااه ياضناي حتى الصبح طلع بكري من غير مانشوفه …قلبي غم عليا امبكري ووووووه اوليدي وووه
عمار:تي ادعيله ربي يفك اسره خير من ووه ووه
خ مريم:ان شاء الله ربي يفك اسره ويردلي سالم مابيه ﻻ سو وﻻ سوية
انفتح الباب وخشو تلاتة انفار
ععفجو اياد طريحة وهوا حاط راسه بين ايديه دشدشوه لين قال ياسر
بعدين خش عليهم الراس متعهم وقاله :الظابط اياد… هاهاهاهاهاها محلاك وانت مضروب احلا بهلبا من وقت ﻻبس القيافة متعك ..
ياصوندا
صوندا:انعم ياهكر
هكر:صورله صورة وهوا هكي مضروب وافتح ايميل جديد وابعتها لصفحة الخال
اياد:اتفيه عليك
هكر:قصدك مازال تتكلم …
اشر ب ايده … جماعة الهكر ضربت اياد تاني
هكر:صوره ياصوندا
صوندا:صورته
هكر: زيده صور تانية
اياد عيونه يلعبو من الضرب وفمه دم وجيهة عيونه وخشمه كله منفوخ … تلفت للهكر وقاله :ش شن سبب خطفي.. كان فيه حاجة اقتلوني وتم
هكر:هاهاها شرطي مايخافش من الموت لو انه انسان عادي كنت حنقتله من بكري … ام شرطي اضربه حتى الموت ويالله ايحسها
اياد:شن تبي فيا
هكر:قبل شهور ياخايب شديتلي خوي الصغير ضربته ع رجليه
اياد يعصر ف راسه امتى صارت الدوة هادي بعدين ادكر متع عمارة اللي قدام مركز روايات لوزة…
اياد: اخطيني انك قاتل 4 اشخاص ف هديكا الشقة المشكلة مش ف نقطة هادي …المشكلة ف انك رافع خوك الصغير معاك يا $#$&*
عطي الصوندا ل اياد تيرو
هكر:ماليكش عﻻقة المهم انا حنشردك اليوم ياو$#^*&$#
اياد: ماك كلب انت واللي معاك كان مش كلب راك واجهتني ببروحك مش مستنصر بكمشة هفاك بحداك
هكر:عطوه ع حموم سعده شردوه خلوه يضوق جميع انواع العذاب لكن ماتقتلوشي نبيه كل يوم يستمتع بضرب ..اه وصوندا برا قصقصلي ع عيلته جيهة حوشه خلي نشدو خوه الصغير حتى كان ماعنداش خو صغير خود اخته
صوندا :تم
اياد:خلي عيلتي فحالها ياتافه
هكر:عطوه ملحوه لين معش يقدر يتكلم هال*****
فاتت ساعتين ونورس بكت ووجعها خاطرها فتحت دوﻻب المكتب وحطت فيه كيسة هدية اياد .. وطربقت الباب …كان مازال كلمتك يا اياد وﻻ حنفكر انرد عليك نهائي… حست روحها غبية خدت شنطتها وروحت..
هكر مد ل اياد نقال وقاله: اتصل بالمركز متعك بش يطلقو سراح خوي
قام راسه اياد والدم سايل من شفايفه وقاله: مستحيل ان شاء الله تكلب ماني مكلمهم
هكر: به زيدو اضربوه زيدو … ماهوش طالع من اهني اليوم ياام تتصل بيهم يبدلو بيك بدل بخوي المحبوس يا تنضرب حتى الموت وانت اختار
اياد:اقتلني مش حنكلم حد
يتبع…….
لقراءة الجزء التالي : الجزء الثاني عشر من رواية همس العيون للكاتبة لوزة ليبية
لقراءة الجزء السابق : الجزء العاشر من رواية همس العيون للكاتبة لوزة ليبية
لقراءة فهرس الاجزاء كاملة : جميع اجزاء رواية همس العيون كاملة للكاتبة لوزة ليبية
جميع الحقوق محفوظة للكاتبة لوزة .
