وفي الجزء الحادي والثلاثون من رواية عاصفة الصمت دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء الحادي والثلاثون من رواية عاصفة الصمت
نزار : زابطه تطييبك ﻻزم تكتري فلفل ﻻزم
* ف هاللحظة وصل مسج لنزار من غادة *
لبنى : هههههه بش يقعد ناشط ومشطشط
* فتح المسج وقال : هههههه يامشطشط انتي
* وقري المسج من غادة كان مبتسم تﻻشت اﻻبتسامة
وطاح منه الكاشيك اللي كان شاده ف يده اليمين
خ رقية : ئه سمله خيرك نزار
*قلب نزار الصفرة من غيضه وفلق النقال جي طرف طرف ع الحيط
انخلعوا خواته ولبنى حطت يدها ع فمها تحساب رامي صارتله حاجة
خ رقية : شن فيه شن فيه يانزار
* ماردش نزار واصﻻ متعصب وباله مشغول … خدي عكوزه وحاول ينوض … بتسعده صفاء فلت ايده ووقف ومشي يعكز خش لداره وطربق الباب وسكر بالمفتاح وطاح منه عكوزه … ويبرطم بكﻻم مش مفهوم … نقز ووقت قريب يوصل سريره عثر وطاح وخنقاااااته خنق عمتك العبرة …. ودموع باينات ف عيونه ….
نزار : كلبة كللللللللبااااااااااااااااااااااااااا
خ رقية وصفاء ومروة يطقطقوا وينادوا ف نزار يبوه يفتح الباب
…مزق نزار تيشيرت اللي كان ﻻبسه وعض صبعه من الغيض لين انجرح
{اصحيح يبوك ويموتوا عليك بمجرد ماعرفت بنت الكلب باعتني مافاتش حتى ايام او شهور ف نفس اليوم اتفيه عليها }
نزار : اتفييييييييه
* خدي فازة عالكمدينوا ولوحها على النرايا واتكسرت
خ رقية : سلم ولدي غير حل الباب سمله شن جاك
صفاء : افتح يانزار
مروة : بالله عليك يانزار افتحنا
لبنى : على خاطرنا يانزار
* نزار مايسمعش فيهم راسه ايدخن من الخبر *
{سامحني ياربي سامحني اكيد تعاقب فيا على ايام ضﻻلي ياااا ربي فرج يارب والله ماطايق روحي مخنوق }
نزار : بنموووووووووت بنموت
*وقف نزار بعد جهد وطلع من بلكونة داره ويصيح ب
اعلى صوته وبحرقة في قلبه ودمعة على خده : اااااااااااااااااااه
خ رقية : حي عليا ولدي ولدي ووووه
* وساخت طاحت طول وعرض…
قاموها صفاء ومروة ولبنى مشت تجري لبلكونة دار الضيوف كانت جنب بلكونة دار نزار ….
لبنى : يانزار ماديرش ف روحك هكي … خش خﻻص وافتحنا الباب
نزار : خششششي داخل خشي
* خافت لبنى وخشت وسكرت البلكونة
{اقريب انقز من هالبلكونة قريب كيف تبيعني وانا 4 سنين قاعد ع خاطرها ونستنى فيها درت المستحيل بش نخطبها وفي النهاية ترميني لما انبترت رجلي اتفيه عليها والله كان بنت اصل والله وحق اسمه ماكانوا يطاوعوها انها تفسخ وعارف مش من اماليها عارف منها هيا}
نزار : احمااااااااااار انا احمااااااار
{حبت فلوسي ماحبتنيش شخصيا صارف عليها قرايتها ولبسها و فطورها وكل حاجة تحتاجها كنت نوفرهالها غير شن تبي}
نزار : ابيوووووووع بنت الكلب
{الله ﻻ يربحك كسرتي بخاطري }
غادة : بس والله واجعني
حنين : واجعك عينك … تره هدا كله دهب هوا جايبه
غادة : اح ايه
حنين : اوووف اوووف اوووف قريب جابلك محل تام … اسمعي الخاتم هدا عجبني
غادة : ﻻ عيب ﻻزم نردهمله هاتي اهنا
حنين : تي خاتم هوا وين بيزبط انه ناقص
غادة : ﻻﻻ مش خنابة انا … حي الخاتم
حنين : به هاه حطيته ….
لبنى : نوضي ياخالتي نوضي … ماديريش ف روحك هكي
خ رقية : نزار …. نزااار ياكبدي
لبنى : طلعت توا وكلمنه من بلكونة
صفاء و خ رقية : شن قال
لبنى : واحد من صحابه متع الجبهة اتوفى
خ رقية : ياناري
لبنى : ايه ونزار وجعه الشاب.. ماترعشيش روحك ياخالتي تو يهدى نزار غير خلوه بس
صفاء : ع اساس بيفتحنا تو… اهو مخليينه ع راحته
* قعمز نزار ف بلكونة وشاف لسمي والقمر باين … مضوي البلكونة … ودمعته تلمع ع خده بض ء القمر …
* قعد نزار مقعمز على هالحال لساعة 2 في الليل ولبنى مرة مرة اطلع راسها للبلكونة تشوف فيه هل قاعد او ﻻ .
نزار : عنجد السنين اللي ضيعتهم معاك … وكان مبتور شن فيها باعتني …
حارت لبنى وقعدت اتفكر…اكيد نقاله فيه الجواب
ومشت لوسط الحوش ولمت النقال وحطتله بتارية وفتحاته انكسر جهازه والشاشة انقسمت… مداير قفل … اكيدة صفار … تره نجرب … صح اربعة صفار ….
* وخشت عرسايل وقرت مسج غادة وانصدمت ومعش عرفت هل اتقول ل خالتها وخواتها
لبنى : زعما نقولهم ؟؟ لكن انا هكي اطفلت عليه بالك يوريني احسن شي نحاول نكلمه من بلكونة بالك يسمعلي …
{تعبان ياربي تعبان }
لبنى : ئه مهناكش ف البلكونة … خلي نمشي نطقطق عليه من الباب اكيدة خش لداره
*وكيف وصلت لبنى للباب فتح نزار الباب بش بيطلع
لبنى : جيت بش نطمن عليك
نزار : خليني فحالي بري ارقدي امشي …
وفاتها وطلع للحمام …
مشت لبنى لدارها وهيا متوجعة عاللي صار ل نزار … وجاها اتصال من رقم خارجي عرفاته رامي فطلعت لدار الجلسة تتكلم
لبنى : الو
رامي : اهلين لبنى
لبنى : اهلين بيك رامي …طيب فيك اتفكرتتي
رامي : والله عالبال
لبنى : كيف حالك وشن اخبارك طمني عليك
رامي : باهي كويس… شن مدايرة انتي
لبنى : اهو الحمدلله
رامي :والله ليك وحشة يابنت
لبنى : و الله ليك اكثر يارامي … امبكري كنت نسال ف نزار عليك
رامي : قالك نزار شن صارلي واﻻه
*في هالحظة نزار واصل بجنب دار جلسة عرف لبنى غادي كان بيفضفضلها فسمعها تدوي مع رامي
لبنى : ايه قالي ووجعتني هلبا الحق قعدت غير نبكي
رامي : بس نخاف معش تتقبليني ونخاف …نخاف تسيبيني
لبنى : معش اتقول هكي يارامي اللي صارلك حاجة من عند ربي ومكتوبلك هكي … وانت وقت خطبتني وافقت بيك عالحلوة والمرة وطنت معاي عالحلوة ماشاء الله عليك فوقت جت المرة بنسيبك ؟؟؟
* سمع هالكﻻم نزار وعض ع شاربه يبكي…
{ياحليلي عارفك يالبنى بنت اصل يافرحة رامي بيك …. ربي ايخليكم لبعض }
شبحت لبنى ظل نزار
فقالت ل رامي : شوية ونكلمك باهي
* سمع نزار هالكلمات فتلفت وماشي لداره *
رامي : اوكي بعد مادكتور ايمر عليا حنكلمك
لبنى : اوكي باي
طلعت من دار جري ولحقت نزار …
لبنى : نزار … نزار
نزار : نعم
لبنى : شفت ظلك وانا مقعمزة ف الدار …بالك تبي حاجة
نزار : ﻻﻻ ملنبي شي …بري ارقدي
لبنى : به خليني نساعدك نوصلك لسريرك
نزار : ﻻﻻ اهو تو نخش بروحي …
لبنى : به اماﻻ انخش قبلك بش نهدرزوا..
نزار : لبنى بري ارقدي والله اللي فيا كافيني مش ناقص شي ومش طايق شي عليم الله بحالي
تنهدت لبنى وقتله : باهي على راحتك نزار … تصبح ع خير
نزار : تﻻقي الخير ….
خش نزار وحاول يرقد وماقدرش ….
ساعة 8 صباحا بتوقيت المانيا .
الدكتور اﻻلماني يتكلم الماني راهو هههه غير بنترجملكم انا : صباح الخير
رامي : صباح النور …
الدكتور : شنو اتحس فروحك اليوم
رامي : باهي …
الدكتور : اليوم بنحيلك الرباط … واكيد شكلك متغير ماتخليش الشي هدا يأثر على نفسيتك … اوكي
رامي مافهمش هلبا كﻻم اللي فهمه انه بينحيله الفاشة بس فقاله : اوكي
* نحاله الفاشة من على جسمه ووجهه وانصعق عمك رامي في وجهه بدات شخص اخر… الوجه هوا طبعا المفروض منحيها من امتى لكن خالد موصي الدكتور خليهاله شهر على خاطر نفسية رامي فقط ليس اﻻ …
بكي رامي لين قال ياسر جاه خالد عاونه ولبسه حوايجه كان كل شبر في جسمه مكرمش ولون بني غامق المنظر مايسرش بكل ايرعش… يعتبر رامي مكتوبله عمر جديد …اللي فحالته مايعيشش
صبح الصبح في ليبيتنا الحبيبة ونزار مازااااال فايق ومهموم …
ولبنى شي مارقدتش مقعمزة فوسط الحوش اتعس على نزار بالك يدير ف روحه حاجة فجأة فتح الباب زطلع وايعكز بالعكوز و وجهه متعصب وواضح عليه مضايق
لبنى : وين ماشي يانزار … نزار
* بس نزار ماردش عليها وطلع من باب الحوش لحقاته لبنى وفتحت الباب لقاته ايعكز نازل من دروج خشت تجري جابت عباية ووشاح عرفاته ماشي لعيلة غادة …ولبست عبايتها وحطت الوشاح وطلعت جري من الباب … عثر نزار وطاح في اخر اربع درجات
نزار بصوت قهر والم : ااااااااه
جاته تجري لبنى بتساعده وقتله : عﻻش ادير ف روحك هكي
نزار : مقهوووووور مقهووووور
لبنى : اركب معاي يانزار اركب
نزار : والله اﻻ والله والله والله اﻻ مانوريهم ارخيني …
* فلت ايده نزار من ايد لبنى وتقدم خطوتين وفتح الباب وطلع و لحقاته لبنى
نزار : خشي يالبنى
لبنى : مانيش خاشة يانزار
نزار : خشي ياللبببببنى ماتخلينيش نعلي صوتي ف شارع
* فتح نزار السيارة وفتحت الباب وركبت وقتله : اركب يانزار عارفاتك ماشي لحوش غادة اركب
نزار : ماتهبلينيش كيف عرفتي
لبنى : اه هيا اتصلت بيا تطمن عليك وحكتلي وكانك ابتمشيلهم رجلي ع رجلك مانيش نازلة من سيارة
نزار : استغفر الله العلي العظيم
انزلي يالبنى
لبنى : ورحمت امي ماني ناااازلة وبنمشي معاك رجلب ع رجل
* ركب نزار وهوا يبرطم وولع سيارة وانطلق لحوش غادة *
خ رقية : ان شاء الله حاله باهي اليوم …خلي انشوفه
* خشت لداره ولقاته مش موجود ..
خ رقية حطت يدها على
فمها اتخمم : ئه سمله وين مشي من صباح الله خير …
وخيرها دار البنات محلولة ودنيا مشرتعة …
* طلت ولقت لبنى مهناش …
ومشت شافت الحمام وكل الديار
خ رقية : صفاااااء ياصفااااء نوضي نووووضي
صفاء : نعم يمى نعم
خ رقية : لبنى ونزار مهناكش
صفاء : اللطف كيف
خ رقية : وووك عليا وين مشوا وين عليك عمله شن صار ياربي ف هالليل شن صار
طلعت راسها مروة
من شرشاف وقالت : ماتحطيش فبالك هكي يمى شن بيديروا يعني قداش ليها عايشة معنا ماخطرش اﻻ توا يديروا العيبة !
خ رقية :ياحليلي الولد توا عنده ظرف خاص يبدى غير يبي من ايحن عليه
صفاء : ﻻﻻ شن هالكﻻم ماتوقعتش منك يمى
خ رقية : زودي اتصلي بيها فيسع
لبنى : غير بشوية يانزار استهدى بالله
نزار : باعتني باعتني يالبنى
لبنى : باهي خلينا انروحوا خلي نمشولهم ف العشية توا صبح
نزار : قتلك اقعدي ف الحوش انا واﻻه
صفاء : تلفونها اهنا يمى
خ رقية : خزييييه عليهم خززززيه
مروة : نحي اﻻفكار من راسك راهو الزوز خاطبين
نزار : كان بتقعدي ف سيارة اقعدي
لبنى : ﻻﻻ جاية معاك
* نزلو هما الزوز وسعادته لبنى وطقطقوا على حوش عمك مصباح وفتحلهم حاتم امطيينها حشيش وعيونه حمرررر
حاتم : يامرحب بديناري وامه يامرحب
نزار : حول من قدامي حول
حاتم : غير وين ماشي وين خيرها رجلك طالعة اجازة واﻻ شنو هئهئهئ
* تجاهله نزار وركب هوا ولبنى لحوش عمك مصباح وطقطقوا وفتحتله خ عايشة
خ عايشة : خير ان شاء الله جاي من بكرة الصبح
نزار : السﻻم عليكم قبل كل شي
خ عايشة : وعليكم السﻻم
نزار : معليشي ناديلي غادة
خ : اعتقد انها فسخت منك استنى خلي نجيبلك حاجتك
نزار : ناديهالي !
* فاقت غادة من نومها وسمعت صوت نزار تحساب روحها تتخيل فطلعت لوسط الحوش وجاته *
غادة : شن فيه
نزار : حسبي الله ونعم الوكيل فيك يابيوع يوم اللي كنت بصحتي اتقولي ف كﻻم معسول وعلى اساس تحبيني وقفت معاك ف قرايتك وفي كل شي كنت انا اﻻول حاضر معاك ماعمري نقثت عليك فحاجة حطيتك في عيوني
خ عايشة : هي وي…
نزار : خليني نكملللل …. حطيتك في عيوني ويوم اللي انبترت رجلي مافكرتيش حتى توقفي جنبي لين نطلع من اللي انا فيه … قتلك مع المغرب بعتيلي رسالة مع صﻻة العشي وين …. وين
ووووين الحب
* في اللحظة هادي نزار معش شد روحه فدمعت عينه *
نزار : وين الحب اللي كنت تتكلمي عليه اربعة سنين اربعة سنين عفستي عليا فساعة .
*وخبط يده في الحيط *
خ عايشة خشت تجري بتجيب جابت شكاير حاجات البيان
غادة : انا مش قصدي
لبنى : اللي نعرفه بنت الناس تقعد مع خطيبها عالحلوة والمرة .. وانتي بعتيه من اول ماصارتله حاجة الله كريم ياغادة …وحتشوفي ربي شن ايدير فيك
غادة : معليشي هادي رغبت اماليا وجيت فكرت فيها قلت نفسخ خير ماتصير بينا الحاجة القدام ونوصلوا لطﻻق
نزار : والله ماتتحشمي الله …
لبنى : سبحان الله قبل ماتفسخي كنتي في عينه وتوا طحتي من عينه وبديتي تحت رجله
غادة : شن جاية لحوشي بش تشميني انتي
نزار : كلميها باحترام واصﻻ مفروض ماجيتكش…جيتي عندك غلط فغلط…
غادة : سامحني يانزار صح انحبك لكن مانقدرش نستمر
لبنى : اصﻻ هوا مش جاي يقولك والنبي اقعدي معاي هوا جاي ايقولك ان انتي ماتستاهليشي بس
غادة : ان…
نزار : مانبي نسمع
منك شي خﻻص … افتكيت منك واحدة بيوع …
* بكت غادة وجت امها وقالت : وهادي بضاعتك ويادار مادخلت شر
…
خدت لبنى الشكاير وقالت : سامحيني فكلمتي مفروض حتى بنتك قالت بنفسخ ماطاوعتيهاش لكن كيف انتي هكي مانستغربش بنتك
خ عايشة : والله جاية بتعلميني الصخ والغلط انتي
نزار : خﻻص لبنى خﻻص …
*تلفتت لبنى وبتنزل من الدروج شبح نزار شبحة تقتل ل غادة
وقالها : ايجيك يوم وتندمي …
ايجيك يوم وتعرفي قدري …
* خششت بنتها خ عيشة وطربقت الباب *
نزار مازال يشوف للباب وسارح … رجعت لبنى وخداته من ايده ونزلت هيا وياه … وخشوا سيارة …
نزار : مغموم يالبنى مغموم
لبنى : معليشي نزار هدي بالك …
* ولع سيارة ومشي للبحر بيشم هواء …
خ رقية : حي عليا يافضيحتي بين العربان
مروة : استهدي بالله يمة اكيدة طلعوا يشروا حاجة
خ رقية : ماعمرهم دارووووها ماعمرهم قلبي واكلني فيه
نزار : كان بتقعدي اهنا ف سيارة اقعدي … وكان بتنزلي ماتتكلميش بكل
لبنى : به ننزل و مش حنتكلم …
نزار : تمام …
نزلوا هما الزوز ومشوا وقعمزوا عالشط ….
حط يده نزار ع رجله ومتحسر
نزار : بﻻ موجعة فارق عزيز عليا وﻻ لغيبته سابق انذار غياب …
* لبنى ساكتة وتشبح للبحر *
نزار : تعبت والله تعبت الوقت الوحيد اللي فرحت فيه لما سيبت خدمتي من المكتب وكنت حاسب حنتجوز ونفرح مع البنت اللي حبيتها وكنت حاااااسب انها حبتني بس هيهات الشخص لما بصحته بعكس لما يكون عاجز … انا مش نادم اني شاركت في الثورة بالعكس الحمدلله حتى ولو انبترت رجلي اقلها هالبترة ورتني ناس كانت متخفية وراء قناع … ناس كنت حنقضي معاها عمري وهما مخادعيني على خاطر جيبي … الحمدلله ع كل حال … نستاهل كل اللي يصيرلي … اللي درته قبل مش شوية …
لبنى جاها فضول وسئلاته : عﻻش ..شن درت قبل
نزار : شي ياضرسي… هكي وخﻻص …. تو بش قتلك ماتتكلميش شفشة
لبنى : به اسفة …
نزار : اخ اخ اخ حتفرج ان شاء الله حتفرج … لكن اصدقتي لما قتيلها كنتي في عينه وتوا تحت رجله فعﻻ …اللي ماتوقفش مع خطيبها ف وقت محنته ماتستاهلض ان الشخص يخششها حوشه … لو انها بنت اصل واصول ماكانتش حتخليني هكي مكسور الخاطر ياضرسي … ماكانتش تفكر تجرحني بهده الطريقة … وجعتني ف نص كبدي امها واقفة معاها بدل ماتقولها هدا غلط … وتقولها ربي فوق منك ماتدري شن يصير فيك القدام من دعوت الناس ﻻﻻ واقفة معاها وتناصي..
بعد ساعة ونص …
نزار : نوضي نوضي خلي انروحوا نسيت روحي انا هنا …
لبنى : خليك بالك ترتاح اكثر اهنا
نزار : لالا ساد هوا داك
صفاء : جيبي زهر يامروة امك ركبلها ضغط
مروة : هيا هي
خالد : استهدى بالله يارامي انت شخص مؤمن بالله
وهدا قضاء وقدر …
* خدي مراية رامي وشاف روحه تاني وحدفها ع طول ايده ….
خ رقية : ياكبدي هييييه ياكبدي هيييه العيب ع زايد العقل ولدي اللي نحساااابه عاقل طلع امراهق ياكبدي هييييه
* فتح نزار الحوش وخش وراه لبنى
خ رقية : وين كنت انت وياها وين طالعين من صباح الله خير يلي ماتتحشموش
صفاء : بشوية يمى
نزار : كنت ف مشوار زي قلته ولبنى شدت فيا تبي تمشي معاي
خ رقية : وين كنتوا وين عيب عليكم
نزار : شن عيب عليا شن درت يمى
خ رقية : وين كنت انت وياها وين
نزار : تعبان انا تعبان … بنخش لداري بنرتاح اهو كان ب
تحكيلكم لبنى تحكيلكم…
خ رقية : شن هشكاير يالبنى
* شبح نزار ل لبنى بكل حزن ونزل راسه وكمل طريقه لدار خش وسكر الباب …
خ رقية : اتكلمي يابنت
لبنى : خالتي … خطيبت نزار فسخت منه …
خ رقية : اللطف ولواه
لبنى : على خاطر رجله مبتورة والصياح اللي داره امس على خاطر هالموضوع
خ رقية : هلي ماتتحشمش خزيه عليها وعلى وجها هالفانص
لبنى : والصبح طلع يجري فلحقته اصريت لين رفعني معاه ومشينا لحوشها …
صفاء : كلبة ﻻنها
مروة : يعطيها بترة فمكاسيرها الزوز
لبنى : تعرفوا حتى كﻻمهم واضح مش متحسرين واﻻ متحشمين ﻻﻻ بكل عين بقحة يتكلموا ويناصوا
خ رقية : حسبي الله ونعم الوكيل فيها هيا وامها …. مجربتها قبل وقت خطبت بنتها المرة اﻻولى ولزتني انا واختي …
مروة : ياناري نزار وجعني والله
صفاء : يوجع حق
* ظل نزار مهموم ومضايق ومايطلعش من داره اﻻ لضرورة … اكثر شخص كان يتقبل انه يهدرز عليه هيا لبنى … وكلمتين وقص شبه انه خش فحالة نفسية ورامي احرف منه …. بعد شهر من فسخت نزار رامي روح للبلاد … ومتحاشي انه يتصل ب لبنى …
لين طربق عليه نزار ف الحوش وانصدم بوجه رامي رايح زي شيباني بس نزار مابينﻻش انه مصدوم …
رامي :صار امورك طيبة
نزار : ماشي الحال
رامي : اماﻻ امتى عرسك نزار
{شن بنقولك فسخت بش انت تفقد اﻻمل …ﻻﻻ مش حنقوله اللي فيه كافيه }
نزار : مزال شوي امها مريضة فقلت نزيد ناجل
رامي : اه باهي … شن بنقولك … عارفك انك بتحرج من كﻻمي … بس ﻻزم نقوله
نزار : قول
رامي : انا ….انا نبي نفسخ من لبنى
يتبع……….
لقراءة الجزء التالي : الجزء الثاني والثلاثون من رواية عاصفة الصمت
لقراءة الجزء السابق : الجزء الثلاثون من رواية عاصفة الصمت
للإطلاع علي فهرس اجزاء الرواية : رواية عاصفة الصمت ( جميع الاجزاء كاملة ) للكاتبة لوزة
جميع الحقوق محفوظة للكاتبة لوزة .
