الجزء الخامس عشر من رواية الزوجة التائهة بين الأحلام والواقع

وإلي الجزء الخامس عشر ولنري ماذا يخبيء لنا من جميل الأحداث مع المبدعة كيندا، هيا بنا لنتعرف علي كل جديد في السطور التالية .

الجزء الخامس عشر من رواية الزوجة التائهة بين الأحلام والواقع

وبعدها صار الا صار وهنا قرر يرفعها لاول

عياده واول ماخشو لدكتور الصحه عامه سالها عدة اساله وبعدين طلب منها تحليل دم وبالفعل لما خشت ودارت تحليل وقعمزو يستنو فجأه ضبحت دكتورة تحاليل على احمد وقالتله …. دكتورة التحليل …. وخى تحليلك يبى وقت باش يطلع لانا دكتور طالب عليك مجموعة تحاليل وحنا خلاص توا بنصكرو معمل فاتقدر تولى بكرا صبح ان شالله وتلقاهم .. احمد …. ماشى ماشى اختى شكرا بارك الله فيك … ومشى جيهة الانتظار وقال لى ليلى تعالى معاى نتفاهمو مع دكتور شن المشكله …. وخشو لدكتور …

احمد …. دكتور انى توا مشيت للمعمل وخدو العينه وقالو بكرا نتيجه بكرا صبح شن الحل بعنى ؟؟؟ هوا ينفع يتأجل المرض لبكرا ولاشنى يادكتور ؟؟؟ دكتور …. لا لا طبعا ههههههه يعطيك سلامه … انى توا رح نعطيها مسكن فعال جدا وشريبو لو حست نفسها بترجع …..والدوخه هادى احتمال يكون عندها فقر دم فاانى كتبتلها توا فيتامينات تاخد منهم كويسات ومش رح يضروها سواء كان فقر دم او المدام تكون حامل بالعكس فى كلتا الحالتين رح يفيدوها…ومرات يكون فى شى اخر غيرهم فى كلتا الاحوال احنى مش رح نستبقو الاحدات ,, و مابتش ايضا نكتبلها على مضاد حيوى لين نعرف نتيجة التحليل ….

ماشى وخى وانى بكرا صبح ماعنديش فى العيادة … لدا بنقولكم على شى من الاتنين …. لو تعبت هلبه صبح تقدرو تجو لاى دكتور مناوب وتعطوه تحليل ويفيدكم ولو حالها تمام وخفت او مشى دواء معها تجيبهالى بعد بكرا انى شاد من صبح وتخطم على معمل تجيبلى تحليل … ماشى احمد …. ماشى وخى وشكرا ربارك الله فيك والله ماقصرت الدكتور …. كتبتلك دواء هدا وهدا وهدا بس نوع شيربو هوا صعب تلاقاه فى اى صيدليه ننصحك تخطم على صيدلية منشيه او العلامين طول وتاخده منهم لانا متوفر عندهم والاصلي… احمد …. شكرا دكتور بارك الله فيك دكتور … ولايهمك .. نحنا فى الواجب

طلع احمد وليلى وركبو للسياره وقاللها…. بعون الله تاخدى دوا وتوالى تمام انى نحس انها برده غير دكتور ياودى شكله مش فاهم هههههه ويلخبط فيينا … ليلى …. هههههه اى حتى انى حسيتها برده على بطنى وومكن دوخه لانى اليوم ماكليت شى بكل … احمد………. باهى توا خلى نمشو وناخدلك دواء وبعدين روحى ارتاحى ..

مشو للصيدليه وخدو دواء وروحو …… وصلو لحوشهم خشت ليلى للحمام تجرى و….. وبعدها غسلت وجهها وقعدت تشبح للمرايه للحظات وتشوف فى وجهها كيف ولى اصفر وفى احساس بداخلها يقولها انا هيا حامل بس هيا حاولت تتجاهل الفكره هيا ووحست انا هيا مش متقبله الفكره لمجرد انها تخطر فى بالها بس… ممكن لانها محتاجه وقت اكتر باش تأكد لنفسها انها بجد هيا تبيه البيبى فى الوقت هوا…. لانا بينها وبين نفسها تحس انها مشوشه وتحس انا علاقتها بااحمد مازال محتاجه استقرار اكتر باش تقدر ترسم بيبى فى حياتها معاه…. وهنا طلعت لدار لقت احمد متكى وحط ايده ورا راسه ويشبحلها فاضحكت ومشت خدت عباية صلاه وطرحت صلايه وبدت تصلى وتدعى لربها انها ماتكونش حامل << مش بطر بالنعمه بس هيا حاسه نفسها فى وضع مشوش شوى >> وبعد ماكملت صلاة خدت دواء متعها

وقالت لااحمد…. ليلى … انى اسفه حبيبى كنت نتمنى نسهرو الليله هادى مع بعض بس حاسه نفسى تعبانه شوى … احمد ….. ولايهمك حبيبتى انتى خودى دواء وارقدى وكان ماحسيتيش تفسك تحسنتى نمشو بكرا لدكتور التانى …. طفت ليلى سهاره من جيهتها واحمد نفس شى وقعدو كل واحد منهم يشبح لتانى على ضى القمر ومايسمعوش الا فى انفاس بعضهم بس وسرح كل واحد فى عالمه الخاص بيه لحد ما مشووو فى نومه عميقه ….. وجى تانى يوم الصبح وهوا اليوم الحلو لصفاء وناض احمد قبل ليلى خش للحمام ودار لفته وبعدها خش لدار نوم فتح الروشن وولع دخانه وبدى يدخن وحاط ايده على روشن لحد ماحس بى حاجه دافيه شدة فيه من ظهره وقالتله .. ليلى …. صباح الورد حبيبى احمد….ااااااااااااااوه حالك اليوم تمااااااااااام دقو على خشب ههههههههه ليلى ……..مالا شنى تحسبانى عزوزه زيك ههههههههههه

احمد…….. انى شيبانى … ههههه باهى مالا تعالى شوفى شيبانى شن بيدير فيك هيا ههههه ليلى ………. ههههههههه لا لا خلاص واللهى توبه اخر مره نقولللللللها هههههههه خلاص احمد هههههه بطل يابارد …. احمد…. خلاص معاش تقوليها ……. قولى توووبه قولى هههههههه ليلى….. توبه توبه خلاص هههههههههه…. اسمع حمودى شن عندك نيه اليوم تفطر احمد …. ديرى انتى الا تحبيه وانى نفطر عادى اى شى بس خلينى توا نكمل دخان الا فى ايدى وبعدها نلحقك على مطبخ ماشى حبيبتى …. مشت للحمام ودارت لفتها معتاده وبعدها خشت للمطبخ وفتحت اغنية فيروز << كيفك انت>> وبدت تغنى معاها وولعت نار وبعدها خدت الطاوه وحطت بيض ووطرحت مفرش الاكل على طاولة وحطت طاوة البيض المقلى بالبسطرمه وزبدة ومربى فرواله وزيتون وهريسه وصونية جبنة حمرا وفنجانين قهوة وبراد شاى الكيس وبراد القهوه وخبزة وقعمزة على طاوله لحد ماجى

وقاللها…….. احمد….. ااااااااااااه جعان بنموت وريحة القوه شميتها من دار نوم تسلم ايدين العسل هيا الا دارتها ليلى …. صحه حبييبى نصبلك فنجان قهوه ولا تفطر قبل ؟؟؟ احمد…… صبييلى قهوه خلى نعدل راسى شوى قبل ما ينتشف فى الخدمه مره تانيه ….. اسمعى حقا بنقولك شى حبيبتى وتى روحك اليوم جايين ناس بيخطبو صفاء ليلى … حقا احمد والله فرحتنى هلبه الف الف مبروك والله فرحتلها هلببببببه …. احمد…. خلاص مالا يوم بعد الظهر انزلى حبيبتى شوى مرات بيطيبو شى ولا يبو مساعده ماشى حبيبتى ليلى …. ولايهمك حبيبى … اصلا حتى انى قولت هكى قولت بننزل نساعدهم وخاصة انى اليوم الحمد لله …. احمد….. خلاص حبيبتى انى توا بنبدل وبنطلع طول للخدمه لانا وقت عليا وعندى خدمه فوق راسى هكى كبرها وانتى مانوصيكش على روحك خودى دواك ولو حسيتى روحك تعبانه مش لازم تنزلى ماشى …. ليلى …. ولايهمك حبيبى …. اهو توا بناخده دواى … وانت خلاص برا توا بدل بدل احمد حوايجه بسرعه ولبس ساعته وبخ برفان ومشى للخدمه وهنا ليلى غسلت معايين الفطور وضمت حوش كله وعندها شوية غسل حوايج وتحديد دارتهم وبعدها بخرة الحوش وكملت هيا وادان ظهر فاتوضت وصلاة ظهر وخشت لدار لبست لبسه مستوره وخدت مفتاح شقتها وسكرتها ونزلت

…. ليلى ….. صباح الورد ماما ام احمد …. صباح الورد بنيتى …. ليلى …. شنى ماما تبينى نساعدك فى شى …. ام احمد …. واللهى يابنيتى بنات ظمو حوش وسيقو جنان وطلعو مع عصام باش يشرو الحلويات وشكلاته وصفاء طلعت قالت بناخد لبسه…. فاخلولى نطيب العشى والغدا وانى درت فاصوليا للغدا على نار وحطيت طنجرة بصله للعشى ومازال محشى ومبطن مادرتهمش …. ليلى ….. باهى خلينى انى نديرهم الزوز وانتى ارتاحى خلاص ام احمد…. صحيتى يابنيتى والله رجليا مبهدلينى وكل يوم نقول هاليوم بنمشى لتونس مع احمد بس ربى مايسخرش الحال وحتى هالمزتت الولد الكبير مشى هوا ومرته وصغاره وماقالش حتى هيا زودى معاى ياامى بالكدب …. تقول بناكل منهم رجل ولاايد بس مش يقولك ناس زمان << زى منى يربى فرخ الحنش فى كمه يطول زمان ويلدغه >> وهدا الا صار معاى انى توا

… ليلى …. معليشى ياماما قولى ان شالله ربى يهديهم بس وبعون الله ربى يستجيب دعوتك ام احمد ……. اااااااه يابنيتى … مش قتلك حميدا خير واحد فى ولادى واللهى عمره ماقالى لا ولا قصر معاى يابنيتى وصدقينى الا فيه خير فى امه فيه خير حتى فى مرته وصغاره . ليلى ….. اكيد ياماما هدا من غير كلامك وطبعا قعدت عزوزتها تهدرز من هنى وليلى حطت البطاطه والكيمه على نار وبدت تنظف فى الفلفل وبعدين قالتلها عزوزتها …. ام احمد …. ليلى …. هاتى خضرة المحشى نقرضها منك انى وانتى كملى باقى ….. انى مقعمزه مقعمزه وبالفعل ليلى عطتها قرضتلها خضرا وهيا طيبت مفروم وبطاطه وبعدها نضفت الفلفل ولقت عزوزتها ماا زال تقرض فا خدت قشرة بطاطه وقرضتها بالعرض شرائح وحطت مفروم بين كل شريحه وتانيه وستفتهم كلهم فى صفره وحطتهم على جنب وبعدين خدت الخضرا مصمصتها وخلتها تتصقطر وبدت فى تغميس مبطن فى دقيق ودحى ووهيا تقلى سمعت عزوزتها تقولها …. ام احمد…. ليلى بنيتى شنى مافى شى فى طريق …. ليلى …. والله مش عارفه ياماما الحق مازال ..

ام احمد….. كيف ماتعرفيش يابنتى مفروض انك تعرفى وتحسبى توا خلاص انتى وليتى مدام مش زى قبل ماتدوريش … وطبعا ليلى تحشمت هلبه من عزوزتها وقالتلها ….. واللهى ياماما امتى ماربى يعطيه الحمد لله … ام احمد…. باهى باه يابنيتى على قولتك كله على تصخير ربى …. اهو من قال انى كنت حاطه فى بالى اول ماتروحو بنتسقد لتونس بس شوفى انى نقول قول وربى يفعل فعل … ليلى …. اكيد باماما …. وتوا انى كملت قلى مبطن وحطيته على كلينكس نخليه شوى يمص زيت وبعدين اعطينى حفاضه نستف فيها …

ام احمد…. باهى باه بنيتى انتى توا غير ابدى فى محشى وانى توا ندب لدار الخزين ونطلعلك حفاضه كبيره شوى ستفى فيها حاجات حاره .. كملت ليلى مبطن وبدت فى خلطة محشى وبعدها حشاته وحطاته على نار يبوخ فى كسكاس وبعدها بدت فى غسل معايين ووهيا تغسل فى معايين وساهيه وعزوزتها متكيه وناعسها النوم على منديرات الا محطوطات فى مطبخ جى حد من وراها ونخصها تلفتت لقت صفاء ضحكت وقالتله…. صفاء …. هههههههه خلعتك …. اسمعى تعالى تعالى نبيك فى دار شوى…. ليلى …. شوى بس نكمل باقى معايين ونجيك … امتى جيتو انتم ؟؟؟ صفاء ………. بسرعه بس ماتعطليش … توا توا كيف وصلنا وخشيتلك للمطبخ طول .. طلعت صفاء وقعدة تضبح …… يامروووووه يابلى انتى مسرع وصلتى وتلفون مرشوق فى ايدك نوضى حطى تلفون ودخلى الحاجات الا فوق طاوله للمطبخ خير ماوالله نحرش فيك عصام راهو وانتى تعرفيه شن يدير فيك بعدين… مروه …. غمت سماعه وقالتلها باهى باه خلاص ضمى فمك اهو بنسكر وبعدين قالت …. الو حبيبى ماما توا تضبح عليا قالتلى تعالى اشربى شاى معاى …. حنا عندنا تقاليد فى عيله لاززم الوقت هوا نشربو شاى وحاجه حلوه … فاخلاص سكر توا ولما نفضى نكلمك اهو قتلك مش تتصل انت بيا بابا يقتلنى بعدين راهو عصبى هلبه ويغار علينا …. حبيبها ….. ماشى ماش يحبى ….. غير اسمعى قووليلى كلمة سر هيااااااا مروه ……. ميدووووو حشمتنى …. صفاء ….. ياحيونه امتى بتصكرى تلفون لين واحد يهزبك … ااااااقلبى وجهك للمطبخ نشفي تحت اللودينو خلى تطلع ليلى نبيها شوى وطبعا مروه برستيجها كله طاح وقعدت غامه سماعه ووجها ركبله صفير وقالتله ….. باهى خلاص قونلك برى ضمى فمك وانتى زى بلوعة المجارى كان فاضة ريحتها يشموها كل ناس .. صفاء …. واللهى الامانحرش فيك عصام باهى واهوا بنطلع وبنقوله….. وطلعت صفاء …

مروه …. حبيبى خلاص مامى زعلت منى هسا سلام توا سلام ……. وهوا كان كيف بيقولها غير اسمعى …..بس سمعت عصام يضبح ويقولها …… انتى يازفته ووووووينك …. فا سكرت سماعه بسرعه وخلاته يتكلم ومشت تجرى لامها وانبلطت فوقها …. ام احمد ……. ها البلى فيك خلعتينى مش تشوفى فيا راقده وانتم زى عيلة دردنو مايعرفش الواحد ياخد معاكم غفطه … مروة …. ا ه ه ه ه ه عصام ولدك بيضربنى على خاطر حرشت فيى بنتك بلوعة مجارى هيا … عصام ………. انتى يازفته تعالى هنا مش نضبح عليك من بكرى علاش ماترديش تعاااااالى هنا وبعدين كم مره قتلك تلفون الارضى معاش تشديه هلبه اااااااه ردى ردى … تى والله الا جايته تقطيعه وتو تشوفى بدل ماتلهى فى قرايتك وتشوفى امك شن تبى اربعه وعشرين ساعه تلفون فى ودنك ومسيبه كله على امك وهيا تساير فيك ومدلعاتك …. وبعدين قسما بالله مازال تطولى لسانك على صفاء ماعاد ضايقه منى حاجه حتى مصروف صبح ولاعاد تطلبى منى شى وفوقها تشوفى طريحه مااااااشى ام احمد…. والله ماك ماسها المره هيا خلاص معاش تعودها توا نتفاهم معاها انى … عصام …. باهى باهى توا تبى شى انى راجع للمحل خليته بروحه ام احمد…. لا لا سلامتك وليدى وكانا فى شى نقص توا نكلم احمد يجيبه معاه وهوا مروح……. ليلى بنيتى شكلك كملتى سامحنى تعبتك معاى …. ليلى….. لا لا عادى ماما تعبك راحه …. انى بنمشى توا لصفاء تبينى شوى وبعدها بنولى ندير سلاطه ماشى … ام احمد …… باهى باه يابنيتى …. مروه بنبتى نوضى ديرى حاجه عيب البنت بروحها من بكرى مروه …. لا لا تعبانه وماعنديش نيه بنخش نرقد وظهرى يوجع فيا هونى بلوعة مجارى توا تساعدها … اهو بنخش لدار انى ماينوضنى حد .. ام احمد …. برى دمدرى برى مافيك طميعه انتى اصلا ..مشت ليلى لى صفاء وطقطقت على دار فاقالتله …. صفاء … خشى خشى ليلى ليلى ….

هادى لبسه الا بتلبسيها اليوم … طالعه عليك تهبببببل صفاء …..تسلمى حبيبتى …تعرفى صهيب اليوم قالى امى بتجى وبتتفاهم معاهم حتى على موعد عرس طول وانى قوتله مش لازم بيان…..عرس على طول مادما انت تبيه بعد شهر ونص … وهوا قالى باهى خلاص وقال انا بنقول لامى تقول لامك انا حنا بنت شفناها خلاص وعاجبتنا ونبوها لولدنا والا تبوه حنا فيه ……..وانى بصراحه يا ليلى خايفه امى نزبط كل شى لانا اكيد بتتقول كيف صفاء ماشفهاش حد الا اخته بس ومكرشين فيها … وخايفه ننفضح.. ليلى …. لالا امك مش خبتيه يااصفاء وبعدين عادى مرات هما واتقين فى دوق بنتهم والبنت دروحا شكرة فيك هلبه وفى عيلتك على حسب ماشافت وسمعت من صاحبتك وصدقينى تمشى عادى …. بس قوليلى انتم علاض مسعجلين هكى …. صفاء … واللهى ياليلى ماهو احتمال طالعتله بعته وكان تم فيها مفروض يتسقد بعد شهر ونص وهوا قالى مادبيا نتزوجك ونتسقدو طول لانا كان هدا صعب يروح قبل سنه او اكتر وخاصة انا سفرة جايته لامريكا وانتى عارفه غير تأشيره تبى باش يتم فيها مشيه للمغرب وجيه لانا قالو نهاية سنه هادى بيصكروها سفاره الا هنا فاهدا علاش قولنا مادما سفاره مفتوحه توا هنا خلى ناخد تأشبره بسرعه ونتسقد معاه وهوا عنده واسطه باش نتمو الاجرأت فيسع … ليلى …. اااه همت عليك ….. وانتىم كانا سفرتو كم بتقعدو غادى ؟؟؟

صفاء … واللهى مش معروف …. بس على توا بياخد دكتوراه وبيروح بس مرات نقعدو غادى كانا حصل فرصه كويسه … ليلى … باهى ان شالله ربى يفرحكم يارب وبعون الله مايصير الا الخير انى مطمنه … وتوا انتى وتى روحك براحتك وانى نمشى ندير سلاطه ماشى .. وطلعت ليلى وخشت للمطبخ وقعدت توتى فى سلاطه …. وبعدين قالت خلى نتصل بااحمد نتطمن عليه ونأكدلها يجيب فاكهه معاه .. ليلى .. اهلين حبيبى .. احمد … اهلين شن الاخيار ليلى .. تماما شكلك مشغول مانبيش نعطل عليك غير جيب فاكهه معاك وانت مروح احمد … ماشى ماشى اصلا انى كيف بنروح .. وبالفعل طلع احمد ولقى سكريتره مع موظفه تانيه واقفه فاقاللها اسمعى وراق دارسة المشروع نبيه بكرا على مكتبى ماشى وانى توا مروح .. سكرتيره … اوك حاظر ولا يهمك …. وقعدت تتبسمله وتشوفله لين طلع فا قالتلها موظفه الا جنبها .. شنى مالا سناره غمزة عليه هههههه سكرتيره … ااااااه من قبل هيا بس هوا تقولى اعمى ومايشوفش هيا … هههه زيدى عشمى روحك هوا من الاول مش عاطيك وجه واى تكشيخه فيك يادبك توا واخدها زى القمر على حسب مايقولو سكرتيره …. ههههههه ياوخيتى يهبل يجنن بنموووت عليه حتى عصبيته فيها زايد |… واها كان ماتشوفيشى يوم من نصيبى وبعدين قولى ماقالتهاش غير يمل من مرته بس بعون الله انى تانيه وشرع حلله باربعه يا فالحه هههههههه باهى باه برى خلاص توا نى بنروح وانتى اقعدى على احلامك الا رح تنفلق فلق ان شالله هيا سلام وومشت موظفه وقعدت سكرتيره توتى فى ورق المشروع لاحمد واحمد طبعا طلع من خدمه ومشى خطم على محل فاكهه وجاب منه كل شى وصاته عليه وبعدين روح وخش للمطبخ باش يحط الفاكهه فالقى ليلى فى مطبخ واقفه…..

فاقاللها … احمد …. حبيبتى خيرك قاعده فى مطبخ بروحك … وش حالك اليوم ان شالله احسن ليلى …. تمام الحمد لله ……بنات مشغولين وماما اكيد جنب بوك تلقاها … احمد … باهى فى شى غدى ولا نخش نرقد …. ليلى …. لا لا اهو واتى الغدا دقيقه بس نصبلك ونوتيلك صفره …. احمد….. اهى مالا خلاص نغير حوايجى ونجى نلقى الغدا على طاوله ماشى حبيبتى… وتت ليلى الغدا لاحمد وقعمز وقعدو يتغدو مع بعض لانا عزوزتها قالت ماعندىش نيه والبنات وحده خشت رقدت وتانيه مسدوده نيتها وتفكر شن بيصير….. والاولاد واحد يلود وقاعد ماروحش وتانى رجع للمحل …. فاتغدو وقعدو يهدرزو مع بعض لين خشت صفاء على ليلى فى مطبخ وقالتله … ليلى انتى مازال ماوتيتيش روحك راهو اكيد قريب يوصلو … ليلى …. اهو بنركب توا مع احمد فوق و5 دقايق ونكون واتيه ماتخمميش فيا حبيبتى ….. ركبت ليلى ووات روحها وطبعا لبست قفطان بسيط عبارة جلد نمر وقصيرون وفردت شعرها وشوى ميك اب خفيف وخلاص ولما شافها احمد قعد يشبحلها وقاللها برى لدار العربيه تلقى مفاجأه بسيطه من قبل كنت نبى نجيبهالك بس ماجتش مناسبه ….ولما مشت لقت بوكى ورد احمر كبير ومكتوب عليه تعاليلى فى دار نوم نبيك ولما جاته ….. طلع من وراء ظهره تعليقة دهب ولبسهالها وقاللها .. احمد …مالقيتش احق منك يلبسها … ولا رح تطلع على حد زيك … كل يوم نخطم قدام المحل ونقول بننزل وناخدهالك بس اليوم بس نزلت وخديتها … ليلى …. شكرا حبيبيى … نموووووووت فيك هلببببببه هلببببااااات ههههه شكرا بجد تهبببببل ربى يخليك ليك ياتاج راس اموووووه احمد …. وراس امك زيدى وحده تانيه وغدوا تلقى محل دهب كله عندك ..

ليلى … هههههههه تسلم حبيبى … وبطل صايعه هههههه احمد ….. خلاص برى انزلى توا .. اكيد بنات يراجو فيك لوطه اجرررى…….. وماتعطليش فى الليل زى عوايدك اهو قتلك ان شالله فجر بنستناك ليلى …. ههههههه اوك وطبعا نزلت ليلى ولقت ناس كيف واصليين … خشت سلمت عليهم … وبدو فى تفريق واحمد نزل لقى الراجل برا فاشد فيه انا يخش يشرب طاسه عصير وبالفعل خش وبدو فى نقاش وطلبو ايد صفاء رسميا وامه نعجبت بى صفاء هلبببببه وقالتلهم الا تبوه احنا فيه وراهو وليدى مستعجل هلبه لانا بياخدها وبيمشو امريكا بيحضر غادى فا مادبيا ياخدها ويتم كل شى قبل السفر ام احمد ….. لا صح كلامك عندك الحق ام العربس …. وبصراحه بنتى عييت وهيا تشكر وتحط فيها وحتى انتم ناس مشكورين والله سألنا عليكم وماحد عاب فيكم الحق ولهدا حنا جينا وبنتمو فى بنتكم طول وكا ن وافقتم بنحددو يوم نديرو الفضانيه وبعدها العرس طول راهو وزى ماقلتلك الولد توا متسقد بعد شهر ونص بس ام احمد … باهى باهى عطينا بس يومين تلاتاء نشاورو بنتنا وخوتها وبوها ونردو عليكم وكانا وافقو نتوكلو على ربى ان شالله ام العريس ….

باهى خلاص مالا حنا خلينا نستأدنو توا مانعطلوش عليكم … ام احمد …… لالالا والله مايصير منه خشيتو فى حوشنا كأنكم خشيتو فى قلبونا وماكم طالعيين الا ماتتعشو ايوااااااا ام العريس ……. صحيتى هلبه وخيتى كبر مقدارك يارب والله بعد هالحلفه مانقدر نردك وطبعا قعدو وتعشو وهدرزو وبعدها روحو على امل انهم يستنو فى خبر من اهل صفاء … وبعد ماروحو ناس اللتمة العيله كلها قعدو يتناقشو فى الموضوع واحمد قالى لمروه مروه نوضى جيبى تلج من حوشى من فوق وخلطينا مالقى ميه مسقعه لانا فتحت فريز ومالقيتش هنا … مروه …. اوووف اووووف نبى نسمع علاش ديما ديرولى فى جو هوا شن تحسابونى قاعده صغيره ام احمد…. تبى بتنوضى يامقصوفة رقبه ولا لا نوضى اسمعى كلام خوك جدرى يرفعك وانتى مافيك الا نط مشت مروه وركبت فوق بعد ماعطها خوها المفتاح وقعدت طول طريق تتتمتم وركبت للحوش وخدت تلج حطاته فى صونيه سكرت باب وطلعت وهيا طالعه طاحو منها مكعبات تلج فاجت بتقيمهم …سمعة الارضى يشرين فا نزلت طبق لوطه تقولك مرات الكبيده يتصل وهنا خشت مروه للحوش وبلطت تلج فى مطبخ وخشت للدار الا فيها الارضى بينما وهما فى عز نقاشهم شرين نقال صفاء واستأدنت منهم وطلعت برا تكلم فيه وهنا قاللها صهيب…. واخيررررررا حبيبتى وصلننا للى نبوه واخيراااااااا بناخدك وبنهج بيك من هالبلاد ههه صفاء …واللهى انى فرحانه اكتر منك ياصهيب واللهى ونتمنى يارب يكمل موضوع على خير … صهيب … ان شالله بجد حبيبتى …

صفاء …. حبييبى نبى نقولك شى … فى موضوع ماتناقشناش فيه مع بعض ونحس انها مفروض نتاقشوفيه طالما وصلنا للاخير مع بعض ..انى بصراحه لو مشيت معاك نبى ننتسب انتساب لقرايتى ونروح من سنه الا سنه نمتحن هدا اقل شى . صهيب … شنى… شن تقولى … صفاء انى مانقدرش الحق نوعدك انى نروح بيك كل سنه تمتحنى وتورحى لانا الموضوع والله ماهو سهل يابنت الناس راهو وانى من الاول قولت بنقولك توقفى قيدك لحد ما نروحو وبعدين ارجعى .. صفاء … هدا مش عدل ياصهيب انت انانى وماتفكرش الا فى نفسك … يعنى انت ماشى بتكمل قرايتك بس انى نمشى معاك ونوقفها .. صهيب … انى اناتى صحيتى ياصفاء … انى لو انانى راهو سافرت وخليتك معلقه تستنى فيا واشبح نروح واشبح لا .. صفاء … اااها يعنى انت قولتها اشبح تروح واشبح لا يعنى قرايتى بتقعد بناء على مروحك او لا صهيب …. انتى شن تبى توا صفاء ؟؟ صفاء ….. ××××××× نبى نسكر بس .. يلا سلام وسكرت صفاء وخشت لدارها تبكى بينما ليلى قالت لاحمد … احمد انى حاسه نفسى زاهقه ودايخه لدا بنركب فوق ناخد دواى وبعدها ننزل نساعدهم اوك حبييى احمد … اوك حبيبتى الا يريحك ديريه ولو ماتبيش تساعديهم فوتيه موضوع ليلى … لا لا حبيبى مش مشكله نكملو فيسع فيسع ونركبو مع بعض غير توا اعطينى 5 دقايق بس ركبت ليلى ومركبه معاها شوى معايين يخصوها ولما وصلت لاخر درجه فى دروج فحأه …….

…..مروه …… جتهم من دار تجرى …. سمعتو تبرزيمه الا برا … .احمد لوح الا فى ايده وطلع يجرى … وبعدها قعد يعيط ويقول .. احمد ……صفاء هاتى شرشاف وهاتى مفاتيح سياره بسررررعه بسرررعه…. ليلى فيقى ليلى …. والا يطلع يقعد يعيط ويخش يبكى ولما شافتها امه قعدت تعيط وتقول ام احمد …. وووه عليا شن بس قولولى …. ووووه قولولى شن صار خيرها بنت تصب دم من فوق ومن لوطه …. احمد ….. خلاااااااص اسكتو مانبيش نسمع حد …وقامها فوق وحط عليها شرشاف وطلع يجرى بسياره للعياده واول ماوصلت دخلوها طول للقسم طوارى وقعدو يستنو برا لمدة ساعتين وبعد ساعتتين طلع دكتور وقاله احمد …. طمنى دكتور شن حال ليلى توا … دكتور …. الحمد لله ليلى حالتها تمام ومستقره بس المدام كانت حامل احمد …. جاته صاعقه وقاله …. اه اه والعيل شن صار فيه الدكتور ……

يتبع…….

لقراءة الجزء التالي : الجزء السادس عشر من رواية الزوجة التائهة بين الأحلام والواقع

لقراءة الجزء السابق : الجزء الخامس عشر من رواية الزوجة التائهة بين الأحلام والواقع

للإطلاع علي فهرس اجزاء الرواية : جميع الأجزاء كاملة لرواية الزوجة التائهة بين الأحلام والواقع

جميع الحقوق محفوظة للكاتبة كيندا من ليبيا .