وفي الجزء الخامس من رواية أنت عدوي للكاتبة الموهوبة كيندا لنري ماذا تخبيء لنا الأحداث من جميل المواقف وهل ستسير الرواية علي وتيرة واحدة يا تري أم ماذا سيحدث ؟ كل هذا وأكثر سوف نعرفه في السطور التالية بإذن الله .
الجزء الخامس من رواية أنت عدوي
فاقعدة تشوف يمين ويسار بسرعه فالقت لوحة بولينع محطوطه علي جنب وخدتها ولبدت ورا الباب … لحد ماقرب من الباب ويتلفت وراه واول مافتح دار وخش … رزعاته باللوحه علي راسه جاباته اكوام في الارض مغمي عليه وبعدها وخرت وقعدة تعيط وتغم في فمها لماشافته طاح علي وجهه وراسه دم ومغمي عليه … وبعدين حاولت تقرب منه تشوفه مات او لا فاخافت فامشت خدت اليرغان بسرعه وحطاته عليه وماعرفتش كيف تتصرف وبعدها طلعت بسرعه وقعدة تنادي …
كنزي … (( تبكي وتعيط بصوت خايف )) .. بابا … باااااابا تعاااالي يابابا …
وهنا طلع بوها يجري زي مهبول وقاللها …
زيد وزوزجته ..(( بصوت مفزوع وماشي بسرعه جيهتها )) … خيرك شن في خيرررك ؟؟
كنزي … (( بكي وصوت يرعش وخايف )) … خانب خش عليا لدار وضربته علي راسه شكله مات يابابا اني قتللللللته بنمووووت يابابا …
وفجأءه خشو لدار وشافوه كيف فايق وكيف بينوض وشاد راجله ويتوجع وهنا امه اول ماشافاته قعدت تعيط وتقول …
زوجته … ووووووووه عليا وليدي قتلتيه … حسبي الله ونعم الوكيل فيك … اني عرفتك اصلا جيتك فيها هم وغم للحوش … والله قلتها ومن اولها قتلتيلي وليدي ووووووه عليا وين كنت ياوليدي وامتي روحت بس لين هالمتوحشه تضربك …
وهنا زيد شاد في بنته ويطبطب عليها وهيا تبكي وزيد وامه تعيط ومقعمزه جنبه وهوا يشبح لي امه ومره مره يخنس لي كنزي ويقول لامه …
أيهم … معليشي ياامي مافيها شي خبطه بسيطه شوي ويوقف دم … بالله معاش تبكي والله بتندميني اني روحت …
زيد …. سامحنا ياولدي مانحسابوكش بتروح والله تعالي هات ايدك تعالي قعمز في صاله وارتاح توا انك تجيبلك امك تنتوره وتنضفلك علي جرح … واني توا نديرلك طاسة ليموناظه ترجع فيك دم … حصل خير .. ورده نوضي بطلي بكي مافيه شي ضربه بسيطه ديرله ليموناضه وحاجه يتعشاها وهاتيلي تنتوره نضفله علي جرح
كنزي …. بابا اني بنخش نرقد تصبحو علي خير …
بوها …. كنزي … بنتي اعتدري لضيفنا لشخص قبل ماترقدي ههههه بسببك قريب مات …
كنزي …. (( وهنا شبحت لي ايهم الااعطاها ابتسامه خبيته وبعدين شبحت لبوها وقالتله )) … اسفه بابا اني مش رح نعتدر لانه هوا الغالط … تسلل علي غرفه زي حرامي …
وفي لحظه هيا أيهم فتح عيونه وبحلقهم فيها علي وقاحتها و ماقالش ولا حرف من صدمته … بس ورده خشت علي خط وقالتلها …
ورده … (( في ايدها طاسة ليموناضه وحطتها جنبه وقالت )) … انتي فاهمه غلط حبيبتي … هادي غرفة ولدي واحنا استقبلناك فيها لانه كان مسافر وتوا روح خلاص …
كنزي … تمام وصلت خالتي …
وانسحبت منهم ومشت لدار وبدت تاخد في شنطتها وحاجاتها …. بينما زيد قال …
زيد …. (( بوجه عصبي )) … بنتي ماتطلعش من هنا هدا حوش بوها … وزي ماأيهم زي ولدي وحوش حوشه كنزي حوش حوشها … وكلمتي اني الاوله والاخيره …
أيهم …. (( تغيرت ملامحه لما حس ان بسببه بيتعاركو وقال )) … لا لا علاش هدا كله يابابا اني جايه زياره بس ومروح وكنت نبي نرقد في داري اليوم بس اهو نبي امي تتفاجي بيا ولكن اني من صبح كنت ناوي بننزل في اوتيل شهر هدا باش ناخد راحتي وتاخدو راحتكم …
زيد …. قسما بالله مافي واحد فيكم ويطلع من حوش كلام نهائي خلاص …
أيهم …. والله مافيها حشم يابابا اني عارف ان الحوش ضيق ومافيشي الا هالدار بس فاضيه ووسط الحوش فاعلاش تحلف واني مانرضاش ضيفتكم تتطلع واني نخش …
زيد … مافيش كلام تاني اهو صالون هدا ينفتح كنبه ترقد فيها ورح نفضولك جيهه في دولاب خوتك صغار تستف فيها حوايجك بس هدا حوشك زي ماهوا حوش بنتي ؟؟
أيهم .. (( بوجه مرتبك )) .. بصراحه عارف مش وقته بس هل بنت الا داخل بنتك كيف وامتي صار ؟؟ انت متزوج غير امي ؟؟
زيد … رح نحكيلك بكرا كل شي ولدي (( وشاب لي ورده وغمزله … فافهم ايهم مقصد بوه (( زوج امه بعد طلاقها من بوه الاصلي وينادي فيه بابا بحكم عشره)) وبعدين زيد قاله …. اعطيني راسك توا شوي اه وقف دم كويس خليك ضاغط عليه لين نجيبلك شاش …
ومشي زيد للحمام وورده توتي في عشي في مطبخ وتتطنفر مش عاجبها الا سمعاته من زيد قبل شوي … ولكن ماباليد حيله باب ونفتح عليها ومش عارفه كيف تسكر بابه …
بينما ايهم كان منزل رأسه وبعدين قام عينه قعد يشبح لباب دار المردوده شوي بعدين ابتسم ابتسامة علي جنب وهز راسه ونزل عيونه … علي جية امه لما حطت العشي قدامه …
ورده … عشي علي خفيف ياوليدي الله غالب ماقولتليش كان هدا راني من صبح في مطبخ وماخليت مادرتلك …
أيهم … واني لهدا مابيتش نقولك هادي وحده من اسباب … وكنت حقيقة نبي تنوضي صبح وتخشي لدار زي كل يوم باش تنضفيها حتي ولو ماكنتش فيها وتلقيني قدامك … ولكن الباين ان انقلب سحر علي ساحر ومشيت فيها اني ههههه يالله حصل خير … بس الله الله علي شكشوكه وشاهي وهريستك العربيه … قسما بالله هادم عندي احلي من مليون عشي في مطعم … تسلم ايديك ياامي الحلوه ♡♡
ورده …. صحه صحه وليدي … (وشبحت جيهة زيد الا كانت تسمع في صوته في حمام يقلب في صيدليه ويدور في شاش وبعدين شبحت لباب كنزي وقالتله …
ورده … (( طبست في ودنه)) هادي بنته من مرته الاوله الا كان متزوجها قبلي كانو خاطفينها اهلها وسفروها برا وتوا ودروحها كبرت وتدور في بوها وهربت من امها وجت هنا لياماتي سوده الا وين كانت مدسوسه بس … بس نهارك الاسود تطلع وتخليني … اني وياك هنا لين نطفشوها هاااادي واضحه مرسمه بتطلق امك ياولدي وبترد امها ليه …
أيهم … امي امي بالله عليك طلعيني من دوة نساوين … اني زيد نحبه زي بوي ومانعتبرش فيه الا بوي فامانبيش نخسره بسبب اوهام وكلام نساوين اني مالياش فيه …خليني هالشهر نشوفكم ونشبع منكم وبعدها نرجع بدون مشاكل ..
وكيف بترد ورده علي خشت زيد …
زيد .. ورده شاش وينه شفته في صيدلية الحمام والدار ماليشي اتر نوضي شوفيلي وينه من غير كترة راغي للولد لانه باين عليه تعب …
ورده … اهو نايضه … اكيد من خبطه الا كلها … اسكت يالساني خير … (( وناضت وهيا تقلب في شواربها )) ..
زيد … لاحول ولاقوة الا بالله وخلاص … ماتحط شي في راسك ياوليدي ووالله احسن حاجه درتها انك روحت .. حتي تريحني من امك شوي هههههه
أيهم …. هههههههه ياودي صعبه … اني وياك وامي تاكلنا وتاكل عشره زينا …
زيد …. باش تعرف بس اني شهيد ههههههههه
ووهما يضحكو جت ورده وفي ايدها شاش وايدها تانيه مخده ويرغان وقالتله …
ورده …. خيرك وليدي كمل عشاك ؟؟
أيهم …. هوا هدكا ياأمي والله شبعت وتعبان نبي نغمض عيوني بس … يكملي بابا راسي وبنرقد طول …
زيد … اي خلاص قريب نكملك شوي بس اتبت … وانتي اطرحيله الكنبه ياورده ووتيله فرشه ..
ورده … حاضر … وماتطلعش بكرا نبي نفطرو مع بعض علي رواق …
أيهم … حاضر ياامي بكرا اليوم كامل رح نقعمزو مع بعض لين تملي مني …
ورده … ماشي خلاص اتفاهمنا وكان يوجع فيك راسك قولي نمشو نعاينو ..
أيهم … والله مافيا شي نرقد بس ..
ورده … خلي نقيم المعايين ونرقد اني … تصبحو علي خير …
ورفعت ورده صفره للمطبخ ومشت لدارها رقده بعد ماوتتله فراشه طبعا … بينما زيد عالجله راسه ولانه دكتور عرف انها كدمه بسيطه وجرح خارجي بس وانه داخ منه بس وفاق طول لكن مافيشي شي … فا كمله مدواه وعطاه حبتين مسكن بسيط وطفي عليه ضي عالي ورقد …
واول مارقد علي كنبه الا كانت في الصاله (( وسط الحوش )) والا كانت تفتح عليه دار وحده من ديار نوم وهيا داره فقط والا حاليا راقده فيها كنزي ومطبخ اوبن بوفي مفتوح علي صاله طول وبينما عيونه كانو علي بابا داره … شاف كنزي مطلعه راسها وتكبه وبعدين سكرت دار طقه وانطفي ضي … وبعد ما سكن الحوش هدوء في كل مكان … غمض عيونه أيهم ورقد وفاتت الليله … وبعد ساعات قليله من شروق شمس …. فاق أيهم علي صوت زيد يقول …
زيد …. (( فتح الباب)) وفي ايديه شكاير وقال صبااااح الخير … اليوم عطيت محاضره وروحتلكم نجري من ساعه 11 ونص علي خاطر ولدي ومانلقاش الفطور … وين العصيده ووين الفطور … راهو الظهر بي يأدن … راقدين مازلتو ولا شني ؟؟
ورده … اني في مطبخ نايضه بس الولاد مازال راقدين …
أيهم …. صباح الخير بابا … اه عصيده امي تخلي الميت يصحي مش الراقد ينوض ..ههههه
زيد … في هادي جبت فيها هههههه وين كنزي ناضت ؟؟
ورده … لا لا مازال في دارها برالها شوفها .
واول ماتلفت زيد برمت شاربها طول وتلفتت … بينما زيد مشي لدار طول …
زيد .. كنزي … بنتي خيرك ؟؟ علاش تبكي من صبح ؟؟ شن في ..
كنزي … ماما يابابا … اكيد ناضت توا وقرت الرساله وقالبه عليا دنيا … اني خايفه يابابا … اني والله مانبي نسيبها … بس مانبيش نتزوج يابابا بي معتقدات حد … امي خلتني بين خيارين اصعب من بعض … وخلتني مجبره نختار الوضع الا اني فيه هدا (( وحضاناته وقعدة تبكي عليه وهوا يطبطب عليها وبعدين قاللها )) …
بوها … (( بوجه مبتسم )) بس اني عكسك يابنتي … اني ظروف هي هيا الا خلتني نشوفك وتدوريني ونلحق نشوفك قبل ماربي ياخد امانته … والله انك انتي امنيتي الوحيده قبل مانموت كانت بس …
كنزي … بعيد سوا عليك يابابا … ووالله انت في قلبي وفي داخلي كنت موجوده … وماما لطالما كانت تحكيلي عليك كانك بطل من ابطال الروايات وعمرها مادمت فيك … ولهدا حبك في قلبي ماكانش محتاج وجودك باش يكبر في قلبي ♡♡ ربي يخليك ليا انت وماما يارب ♡♡
زيد …. يارب حبيبتي … باهي توا كان تحبيني نوضي افطري مع بوك وتكسريش بدخلتي ليك ♡♡ وشوفي شن جبتلك معاي (( وطلعلها شكلاته كندر بوينو ))
فاخدتها منها وحضاناته ودموع الحب والحنان كلهم في عيونها ♡
زيد …. يالله نوضي وماتخافيش وبعون الله رح نحلوه موضوع …اليوم العشيه رح نمشي لجدك ونتفاهم معاه شن رأيك…
كنزي …. بجد بابا ؟؟ وتقدر تقنعه ؟؟
زيد …. بعون الله … انتي بنتي فامش رح يعرف يقول شي اصلا ورح يقتنع بالامر الواقع … وهيا نوضي اهي ورده تنادي …
كنزي …. تمام شوي ونلحقك بس …
وهنا ناض زيد وطلع وهيا لبست طاقيه علي رأسها باش تستر بيها شعرها وطلعت للحمام غسلت وجهها ونضفت سنونها وقعمز معاهم علي صفره … وصبحت بدون ماتحط عينها علي حد مباشر ولقت بوها يفتحلها في خبزه ودارلها سندوتش ومدهولها …
كنزي … شكرا بابا (( مع ابتسامة حب )) ونزلت عينها …
ولكن ايهم تكلم طول وقال …
أيهم .. شني يابابا اني مالياش حصه من دلع هدا ولااني مش ولدك ولا كيف ؟؟ راهو اني الا كنت مسافر واني الا نضربت امس (( وشبح لي كنزي وهوا يلقحلها ويبتسم ))
واول ماسمعت كنزي كلمته وتدكرت الخبطه ابتسمت طول … ولكن اول ماحست انه يشبحلها بدلت ملامحها بسرعه ودارت روحها تفطر وماسمعتش شي … بينما زيد قاله …
زيد … اكييييييد من عندي اني غيركم انتم اصلا … وخدي سندوتش تاني ويدي يفتح … وهنا اخواتهم صغار بدو يغارو وقعدو يقولو …
لارا وميرا …. واني واني واني واني اني اني ..
ورده …. قهوه فاجت نسيتهااااااا (( وناضت تجري بسرعه ))
وناضت ورده وكنزي شبحت لخوتها صغار وضحكت وقالتلهم …
كنزي … واني رح نديرلكم انتم ♡♡ شن رأيكم وخدت التوست وبدت تدهن في المربي وتمدلهم والابتسامه في عيونها … بينما لار خدت منها وشبحتلها شوي وبعدين شبحت لبوها وقالتلها …
لارا …. بابا مني هادي ؟؟ ايهم امتي روح ؟؟ علاش كلهم اليوم هنا يابابا ؟؟
فاشبحو لبعض كلهم وبعدين انفلق اايهم بالضحك وقاللها …
أيهم … (( تعالي نقولك في ودنك )) وطبس في ودنها وقاللها … هادي اختك الحلوه كنزي ♡♡ كانت مسافره وامس روحت … واني امس بس روحت ♡♡
فاضحكت طول لار وبعدين شبحت لاختها وقالتلها … لارا ….. ميرا أيهم قالي هادي اختك الحلوه كنزي ههههههه وكانو مسافرين وامس وصلو مع بعض هههههههه
ميرا …. علاش كنتم مسافرين يأيهم انتم صحاب ولا زي ماما وبابا ♡♡
وهنا كنزي ولي وجهها احمر واتمنت الارض انشقت وبلعتها وأيهم ولي وجهه احمر وبعدين ضحك وحاول يغير موضوع بسرعه وقاللها …
أيهم … جبتلكم العاب هلبااااااا توا افطرو كووويس باش بعدين نلعبو بيها شن رأيكم ؟؟
ميرا ولار …. اووووووووووك يااحلي يهومي انت ♡♡
وناضو بسرعه وغمروه وباسوه ورجعو يضحكو ويفطرو … بينما كنزي قعدة عيونها في صونيتها وماقهمتهاش الا علي صوت ورده تقوللها …
ورده … شني كنزي ماعجبكش الفطور ؟؟
كنزي …. لا لا تسلم ايدك خالتي بس شبعت خلاص … وبدت تقيم في معاينها بس بوها وقفها وقاللها …
زيد … خليهم انتي ارتاحي توا تقيمهم ورده ..
كنزي … لا لا بابا خليني نساعدها اني تعودت هكي حتي في حوشنا …
ورده …. خليها براحتها البنت الحوش حوشها تضم زي ماتبي خيرك انت مش برانيه هيا ♡
وهنا شبحت لبوها وابتسمتله باش تطمنه وقامت معاينها ورفعتهم للمطبخ …
بينما أيهم شبح لامه شبحات كانت فاهمه معناها وحاولت تتجاهلها … فانزل عيونه لوطه وقال …
ايهم … الحمد لله … وقام معاينه معاه وهنا قالتله …
ورده … خليهم وليدي اني توا نقيمهم انت ارتاح بس ..
ولكن أيهم شبح لي بوه الا يشبح لورده مصدوم كيف ردة الفعل تبدلت وبعدين قاللها …
زيد … خليني براحتي ياامي الحوش حوشي ونتصرف فيه براحتي اني مش براني (( وغمزلها بتلقيحه وضحك ومشي )) …
ورفع المعايين وحطهم في الحوض الا كانت كنزي واقفه تغسل فيه معايين … وهنا حطهم وبعدين قعد واقف شوي بعدين قاللها …
أيهم … ((تلفتلها وسكر عين وفتح عين … قنصلها وقاللها )) مازال ماراجعتيش نفسك وقررتي تعتدري ؟؟
كنزي … طبعا لا … مش رح نعتدر انت اسلوبك اسلوب خنابين فالغلط فيك مش فيا ،
أيهم …. وانتي متعجرفه وشايفه نفسك ورح تعتدري …
كنزي …. مش رح نعتدر … انت مني باش تأمرني نعتدر …
أيهم …. (( وهنا ماعرفش شن يقول وقاللها )) … اني صاحب الغرفه الا انتي راقده فيها حاليا … يعني اني صاحب الفضل ليك تمااااام ..
كنزي …. تمام …. مانبيهاش دار رح نرقد في صاله وانت اشبع بيها دار …
ايهم …. ههههههههه ميه ميه اتفاهمنا بس حطي في بالك … اني نمشي للمطبخ عشره مرات ونمشي للحمام عشره زيهم ونمشي في نومي وصراحة يقولو لما نمشي في نومي مايحاليلش الا وسط الحوش ♡♡ شن رأيك انتي …
كنزي …. (( واهنا نفخت في وجهه ووجهتله صبعها بشكل تهديدي وقالتله )) اوووووووف من سمحلك اساسا انت تحكي معاي … مافيش بين شن يخلينا نحكو تمام … خلييييييك في حالك وبعد عليااااااا … اني حياتي كلها مليانه كوابيس مش ناقصني كابوس اضافي …
أيهم …. بالله عليك فكينا من صبع هوا لتلقيه طاير ورح تعتدري غصبن عنك يامتعجرفه ياشينه …
كنزي …. لا انت فت حدودك … اني شينه ؟؟ انت قاصد عليا اني ؟؟
وهنا أيهم اتكي علي باب تلاجها وقاللها …
ايهم …اوف كورس (( بالتأكيد )) …
كنززززززي …. تماااااام … اني اعصابي خلقه فايضه ونفسيتي تعبانه (( وشدت موس وهيا تهدد فيه )) ومن لحظه هيا تشوفني لا تكلمني ولاتسلم ولا حتي تقيم عينك فيا … تماااااام اعتبرنا اعداء تمام … انت عدوي …. واني بادلني نفش الشعور بزبط …. تماااااااام …
وهنا قرب منها ايهم وخدي منها الموس وقاللها …
أيهم …. تمام … تمام اهدي خلاص ناس برا يفطرو …وحط موس وطلع وبمجرد ماطلع من الباب هيا تلفتت للوندينو وقربعت الكاشيك ووقفت شوي ولكن هوا رجع وكبهلها وقاللها ….
أيهم …. (( بوجه مستفز )) … يعني انتي مصره ماتبيش تعتدري انتي الا بديتي والبادي اضلم ؟؟
وهرب وخلها قبل ماتتلفتله … وهيا شده في راسه وقالت …
كنزي ….. ااااااه مهبول هوا بجد اكيد مش بعقله …. ناقصني اني ياربي بس … وقغمزة علي الارض لنا تقكرة مشكلتها الاصليه وامها وجدها وخطيبها وهما توا كيف …
وهنا تنهدة وبعدين ناضت بسرعه لما سمعت خطوات تقرب منها … وبالفعل كانت ورده خاشه للمطبخ ..ظ فاحطتلها معايين وقالتلها … اغسلي هادم بنتي خلي نمشي اني نوتي لبوك لبسه يمشي بيها العشيه لجدك ياش يعرف شن بيصير … ونقغمز مع ولدي شوي انتي تعرفي مستاحشاته هلباااا
كنزي … تمام …. وخدت منها وتلفتت تغسل في معايين بينما ورده رجعت تسخن في القهوه ورفعتها لولدها في البلكونه وقعمزة تهدرز معاه …
وبما انهم ماكملو فطورهم وناضو وغسلت كنزي معايين ورجعت لدارها تستف في باقي حاجاتها وكملت ورده تهدريزها مع ولدها الا وجت ساعه اربعه … وهنا لقت زيد وطلع لابس وبيطلع ….
ورده … بتطلع توا باهي غير استنيت لغدي قبل ؟؟
زيد …. علي اساس انتي حطيتي الغدا … انتي شفتي ولدك نسيتينا كلنا خلاص …
ورده …. هههههههه عندك الحق بس كمل مشوار وتعالي تلقي الغدا واتي … بعون الله … ماشي في خفظ الله ..
أيهم … تبيني في شي او نسايرك في مشوارك ؟؟
زيد … لا لا ارتاح ولدي هدا مشوار بدات ظروري نمشيله بروحي
ورده …. عندك الحق … في حفظ الله وطمني اول ماتطلع … سلام … خيرك انت هبلت بتخش في مخشايش مش ليك …هنا عظماتك وريح روحك وقعمز معي واحكيلي وادعي ان شالله اليوم ينحل موضوع وترجع لاهلها وتنحل مشكلتهم وترجعلك دويرتك …
ايهم …. علاش تقولي هكي ياامي بالعكس اني مرتاح في دار او علي صالون طالما اني معاكم … والبنت شكلها كويسه ومحترمه ومش رح تضايقك …
ورده .. (( شبحتله شبحت لؤم وقالتله)) امتي انت شفتها لين عرفتها … ولا انت تشوف بعيون غير عيونا ؟؟ انت اكيد فاهمني ؟؟؟
أيهم …. انتي فهمتي غلط ياامي هادي زي اختي صدقيني وماتفرقش علي ميرا ولار في شي بس حسيت من شكلها هكي
ورده …. هادي غير امس فاتحه راسك مكسراته … بس الباين من عدواه الا محبه …
أيهم …. ااااه ياامي انتي مايندوش معاك بكل … اني طالع بنشوف صحابي ساعتين ونروح تكوني انتي درتيلنا غدي من ايدياتك الحلوين تمام …
ورده …. ماشي تمام ماتعطلش بس … نهارك يجي بوك ماتكونش انت هنا …
ايهم … ماشي ياودي ساعه بس …
ومشي أيهم بدل حوايجه وطلع … وورده خشت للمطبخ طلعت دجاجه ودخلتها للكوشه وطيبت رز بالكبده وعندها مصيرنات نضاف قرضتلهم خضرتهم بمساعدة كنزي وحطتهم علي نار وغسلو معاأيين وخلت مطبخ علي تنشيف بس وكنزي تنشف فيه … وبعدين شبحت لساعه وقالتلها …
ورده …. غريبه ساعه سابعه زوز تاخرو ان شالله خير وخلاص … اسمعي بنتي بنطلع مشوار ربع ساعه بس لجارتي جنبنا ونجي اني دجاج ورز طفيت عليه وعصبان شوووي بس وطفي عليه وخليك شوي ونكون هنا …
كنزي … تمام …
وطلعا من مطبخ بسرعه لبست عبايتها وطلعت تجري لجارتها …
بينما كنزي قعدة مثعمزه تستني في عصبان لين طاب وطفت عليه وطلعت واول ماجت بتخش لدار ضرب الجرس متع الحوش فاحست انه بوها فاحطت البرنوص بسرعه وفتحت الباب …. ولكن صدمه لما لقت …
شعبان … (( بوجه متعصب )) … هاتي شنطتك وتعالي بسررررعه ؟؟
كنزي … (( بصوت خايف يتظاهر بشجاعه ))مانيش طالعه نحي ايدك … انت مني اصلا باش تأمرني ؟؟
شعبان … اني الا مفروض بمرا نكون زوجك ونحكم فيك اكتر مابوك يحكم …. اطلعي والا قسما بالله تشوفي وجه وسخ …
كنزي …. (( وهنا كنزي تدف في ايدها منه وتبكي وتدف فيه وهوا يشح فيها وبياخدها بالغصب … ولكن فجأءه شدع واحد من رقبته دفه وجاه بوكس طاير جابه لوطه … وناض شعبان وردله بوكس وشدو في بعض ضرب وأيهم يعيط ويقولها …
أيهم …. (( بوجه متعصب وواحمر )) خوووووووشي وسكري الباااااااب خشي … وفي لحظه الا سكرت فيها كنزي باب وهيا تبكي وخايفه جي زيد وكان وجهه متعصب ومتضايق ومايشوفش في شي قدامه اساسا من غضب …. واول ماشافهم يتعاركو جي يجري وفك بينهم وقال ….
زيد ….
يتبع……….
لقراءة الجزء التالي : الجزء السادس من رواية أنت عدوي
لقراءة الجزء السابق : الجزء الرابع من رواية أنت عدوي
للإطلاع علي فهرس الأجزاء : جميع اجزاء رواية أنت عدوي للكاتبة كيندا
جميع الحقوق محفوظة للكاتبة كيندا .
