وفي الجزء الخامس من رواية جعلني انثي يا تري هل سنري احداث مشوقة وسعيدة ام احداث حزينة يا تري ؟ دعونا نعرف ذلك في السطور التالية بإذن الله مع الكاتبة ميشو محمد .
الجزء الخامس من رواية جعلني انثي
وصلو للكافي بعيييددد عليه نزلت اينور بس بروحها وطبعاا شافت واصف ف الصورة ونزلت وخشت وقربت ع شخص لابسة بدلة شرطه
اينور لابسة سماعه: واخيراا شفتك… هشام صح
واصف ابتسم ومد ايده: اهلين اي
اينور شافت ايده: اسفه مانسلمش.. وقعمزت
واصف قعمز: نطلبلك شي او بتوريني شن عندك
اينور: اممم مستعجله(سكتت لم حست بيه موجه مسدس علها من تحت الطاولة) انت شن ادير
هشام يسمعلهم: في شي؟!
واصف ابتسم ومد ايده: الهاتف
اينور قلبها طاح ف بطنها عطاته الهاتف: هشاام اهدى
واصف خدي الهاتف: ياحلوة مش هشام تقدري تقولي واصف
اينور بلعة ريقها: اوكى واصف
واصف ابتسم: فرخه طلعتي توا ياحلوة بتجي معاي عشان نعرف شن تعرفي ومتقعديليش عائق
هشام سمعه من السماعه فتح عيونه بصدمه: في شي مش تمام بياخد البنت
النائب: خليك هادي متنساش انه معاها زوز شرطه متنكرين في الكافي
هشام بصوت عصبي: البنت صغيرة من صوتها واضح خايفه
عادل: نشالله تجي سليمه
اينور تنهدت بخوف: منعرف شي الهاتف عندك بس
واصف: بس انتي شاهده وقفي بهدؤ واطلعي معاي
اينور فداخلها مش رح نخلي مشيتي تجي ع الفاضي: اوكي رح انوض بس فهمني انت مني (تبي السماعه تسجل)
واصف قام حاجبه: ضمي فمك افضل ونوضي واني بنوض بعدك وانت شايفه اني لابس بدلة شرطه يعني لو انوض توا نقتلك مش رح يخاف مني حد بحكم شرطي رح يفكروك مجرمه فا نوضي منبيلكش البهدله
اينور وقفت وواصف وقف
عطول قربولهم الشرطيين بسلاحهم: اوقف مكانك
اينور تنهدت وبعدت تلفتت بتطلع وقفت مصدمه بشخص ليشوفلها 
مؤيد قربلها كان مقعمز ف الكافي: من بكري نكدب في عيوني انتي شن اديري
الشرطي شاف اينور: شكراا ع تعاونك.. وطلعو واصف
مؤيد: شن المسراحيه لصارت؟!
هشام خش مبتسم شاف الناس لفي الكافي: اهدو ياجمعه مافي شي صارت عملية قبض ع شخص خاين وتم الموضوع تقدرو ترتاحو يومكم طيب… قرب ع اينور
اينور عيونها علقو ف مؤيد
هشام لابس السبته ع كثافه وفها مسدس مبتسم: تمت مهمتك هي نرجعك لحوشكم
مؤيد شاف هشام: اينور تكللمي متقعديش تشوفيلي شن اديري هني ومن هدا لمعاك قبضو عليه
اينور تنهدت بخوف وترجف بتتكلم
هشام: لو في شي نفهمك اني لو ممكن
مؤيد: الامر عائلي لو سمححت تمشي
هشام شاف اينور: خوي نوضحلك بس… قاطعه
مؤيد بصوت عالي: تككككككللللللممممي
اينور ترجف بصوت واطي وترجف وتحرك ف ايدها برعب: مؤيد اني درت ه هك لانه ف شخص مظلوم كان رح ينحكم
مؤيد: عُلا قتلي انه جاتك الشرطه ف الجامعه مصدقتش
اينور عيونها تعبو دموع: مؤيد نحكيلك قعمز
مؤيد يشوف ف الشرطه يشوفولهم: انت بين 14ذكر وشرطه شن اديري بين المجرم هادا والشرطه بتنحرفي ولاشني
اينور دموعها نزلو وشفايفها يرجفو
هشام تعصب: اسمع انت عاطي للموضوع اكبر من حجمه الناس تتفرج فضحت بـ البنت
اينور: اول مره مؤيد…. قاطعها
مؤيد شافلها: من ليوم اينور لانعرفك لا تعرفيني باهي ولكان بيني وبينك تنسيه…وطلع
اينور بدت تبكي
هشام فهم انها ع علاقه مع هادا شاف زملائه: انتم تصرفو للمركز اني نلحقكم
طلعوو كلهم
هشام وقف قدام اينور: اينور فهميني شن لصار ممكن نساعدك
اينور شافت هشام ودموعها ينزلو: حتى لو صار هكي اني مدرت شي غلط صح اني ساعدة شخص كان مستقبله رح يضيع صح
هشام: اهدي اني ممنونك ولو نشكرك من اليوم لـ اخر يوم ف عمري مش رح نكافيك ع الشي لدرتيه انتي ساعدتيني ومتنسيش انك ساعدتي ولدي انه مينحرمش من بوه ويتشرد انتي ساعدتيني اني وولدي يوسف
اينور دارت ايدها ع وجها وتبكي
هشام قعمز مقابلها وشاف من المرش السيارة الشرطه مشو كلهم قعدة سيارة وحده متع شرطه
هشام: اسمعي اني مستعد نمشي لحوشكم ونحكي انتي شن درتي صدقيني بوك يفتخر بيك
اينور وقفت ومسحت عيونها
هشام شاف القرسون: كأسة اميه يامعلم بسرعه
القرسون جابها بسرعه
هشام خدها ومدها لـ اينور: اشربي ونوصلك
اينور شربت وطلعت
هشام لحقها ركبو ف السيارة ولع
اينور من الخلف
طول الطريق ساكته
اينور: انت رح تنزل معاي تمام هشام ورح تحكي لـ بوي انه مؤيد فهمني غلط
هشام يسوق: اكيد بدون ماتقولي
بعد سكوت
هشام: كيف فهمك غلط هدا يدور ف سبله شن فهمك غلط قصدي واضح منظرك تساعدي ف الشرطه شفتي نظرات الناس ليك ف الكافي
اينور تعفلقت: انت ولد مدينه عندك عندكم كل شي عادي لكن اني بنت الشيخ حني عندنا عيب بنت تخش للكافي وعيب تقعمز مع حد غريب نشالله بوي يوقف معاي بس
هشام تعصب: اني مش رح نطلع من حوشكم الا بكلمة من بوك وعارف انكم مش ز المدينه
اينور بخوف: يارب
وصلو ونزلت
اينور خشت وتنهدت ف الجنان وهوبا يطلع قدامها مؤيد ملامحها تغيرت
هشام شافله وحس انه القصه تعقدت وكبرت
هشام قرب شد مرفق مؤيد: علاش المشاكل يافتان خش قدامي… ودفها وخشو
مصطفى طلع
اينور شافت بوها خلاااص رجلها يرجفو بطيح
هشام: السلام عليكم
مصطفى: ارجعي منين جيتي
اينور هني حست بدم بيجف ف عروقها
هشام دف مؤيد بقوة: ياحاج كل شي ينحل هادا فهم كل شي غلط
مصطفى: من انت جاي توضح وتشرح بصفتك منو اني نقوللها تطللللع
هشام بصوت عالي: بنتك لـ تلز فها طلعت شرطي من الحبس شرطي كان رح ينحكم عليه سنين بنتك هادي لتلز فها طلعت شرطي من الحبس برائه (شاف مؤيد) ولكذاب هدا ابصر شن مألف قصة
مؤيد: شرطي قتلي اي باهي شن كانت ادير ف الكافي تهدرز مع راجل ف الكافي
مصطفى شاف بنته: اني علمتك ادافعي ع روحك تكلمي انتي دافعي ع روحك
اينور ريقها جفففف اول مره تنحط ف موقف هكي
هشام: اهو تشوف فيا لابس سبته ع كثفي وعندي مسدس اني شرطي غير بطاقتي قعدت ف المركز صدقني بنتك مش كيف ماانت مفكرها هي ساعدتني نشد شخص كان يخنب ف اوراق حكوميه وتزوير
مصطفى ارتاح نوعا ما: شنو تكلمي قوليلي
اينور بسبب سهرها وانها بدون فطور ومن الصبح ف رعايش وخش للمركز ووقفت قدام واصف ورعشت للمسدس ومتحملتش رعشت بوها الدنيا دارت بيها داخت
مصطفى قربلها قام راسها: ياساتر سترك يارب
صبرية كانت تبيت من الشباك شافت بنتها داخت طلعت وطرف المصليه ع راسها
مصطفى شاف صبرية: اميه هاتي اميه
صبرية خشت جابت اميه بلتلها وجها اينور فتحت عيونها وبدت تبكي
اينور تبكي وكلامتها مقطوعات وبصوت واطي: اني مهو هو مظلوم مقدرتش ندير روحي مانعرفش يابوي كان كل شي عندي لو نحبس ربي بيحاسبني لاني سكتت 
يتبع ……
لقراءة الجزء التالي : الجزء السادس من رواية جعلني انثي
لقراءة الجزء السابق : الجزء الرابع من رواية جعلني انثي
للإطلاع علي فهرس اجزاء الرواية : جميع روابط اجزاء رواية جعلني انثي للكاتبة ميشو محمد
جميع الحقوق محفوظة للكاتبة ميشو محمد .
