وفي الجزء الخامس احداث مميزة تبدعها الكاتبة في سطورها ، لذلك جهز مشروبك المفضل وهيا لنبدأ قراءة الأحداث في السطور التالية من رواية حبيبتي لا تنسيني من المبدعة كيندا .
الجزء الخامس من رواية حبيبتي لا تنسيني
مشت ملاك لدارها بشوى وخدت تلفون بسرعه وفتحت الخط من غير ماتشوف للرقم واول ماردت قالت …
ملاك …. ماما والوصايا سبعه 
اليوم مااتصلتيش عاد كيف هههههه
الرقم …. احم … احم … الو
ملاك … من معاى ؟؟
الرقم … تصورى حاس روحى غبى … على عموم انى متأسف لو ضايقتك ومش رح ناخد من وقتك الا دقايق …
ملاك … ممكن نعرف قبل انت من ؟؟؟
الرقم … انى احمد … ومش حابب نضايقك والله ولا نحبه جو الفروخ هوا … بس كنت نبيك فى موضوع وخايف مانلاقاش كيف نوقف عليك او نكلمك ومانبيش نسببلك مشاكل …
ملاك … شن فى ؟؟
احمد … الولد الا اسمه اشرف فوتيه …
ملاك … علاش ؟؟
احمد … فوتيه وخلاص … انى نعرفه .. ولهدا نقولك فوتيه …
ملاك … انى ماحطيتش الموضوع فى بالى اصلا .. وعلى عموم شكرا
احمد … << سكت شوى وبعدين قاللها >> … اوك تقدرى تمسحى رقمى توا لو حابه وصدقينى مش رح نضايقك مره تانيه … ولو حابه اى شى تفضلى … اعتبرينى اخ وصديق ليك …
ملاك … اوك ..<< وسكتت >>
وهنا ملاك فى اللحظه هيا ماكانتش تبيه يسكر وكانت تتمنى يقوللها اى شى تانى يخليه يتصل بيها مره تانيه وفى نفس الوقت كبريائها منعها من انا تضيفله جمله تانيه تفتح بيها موضوع تانى … ولهدا اكتفت بصمت …
احمد … تبى اى شى قبل مانسكر …
ملاك … سلامتك ..
احمد .. ليلتك سعيده
سكرت ملاك تلفون وهنا خشت عليها سمر وقالتلها …
سمر … طيبت شكشوكه وانتى موتى فى دارك .. منى كان يكلم فيك ..
ملاك …. احمد
سمر … بجددددددددددددد ؟؟
ملاك … والله بجد …
سمر .. شن كان يبى ؟؟
ملاك … نصحنى انى نبعد على اشرف وماقاليش الاسباب ..
سمر .. وانتى شن قولتيله ؟؟
ملاك .. قوتله انى مااعطيتش للموضوع قيمه ..
سمر … هادى تبى تقعميزه .. نوضى نجيبو صفره ونتكتكو عليها هنا ..
ملاك .. اوك ..
جابت ملاك وسمر الصفره وقعمزو واول سؤال سمر قالته لى ملاك …
سمر …. شن قالك بزبط ؟؟ معقوله ماقدرتيش تسأليه علاش ؟؟
ملاك … سمر خيرك ياخفيفه .. اولا انى تفاجأت واولى بيا نقوله انت منين جبت رقمى مش نسأله على شخص مش هامنى وجوده من عدم وجوده ..
سمر … اووووووف يعنى منين جابه يافكيكه اكيد خداه من تلفون خوه .. واكيد نسيبكم مسجل رقم وارقام كل العيله .. اااااااااه بصراحه انتى عاهه ..
ملاك .. باهى باهى انطمرى وتعشى وارقدى … وخلينى نفكر …
سمر .. اسمعى عندى فيلم ليك يهبببببببل وجايبه لاب توبى معاى وهارد دسك … بنتفرجو اهو قتلك .. ليله صباحى … عندكم فوشار ؟؟
ملاك … ههههههههههههههههه اليوم بعون الله عسر هضم .. اى عندنا ..
سمر .. خلاص انتى اغسلى معايين وانى ندير فوشار … تراق ولى شن جايبتلك معاى اليوم من افلام ؟؟
ملاك .. منى ؟؟
سمر … taken 3
ملاك … كداااااااااااااااااااااااابه قولى والله ؟؟ الجزء التالت متأكده ..
سمر…. مش تعرفى بس .. جايبتلك هاردسك فيه 250 فيلم
ملاك …. هههههههههه يالله بينا على مطبخ
غسلت معايين وطيبو الفشار وفتحو لاب توب واطفو الاضواء وقعمزو على فيلم … وبدى تشويق وماتم الفيلم لين صاخو ومعاش فاقو الا على صوت تلفون ملاك ..
سمر … يابلى مش قنالك امك توا تتصل ديريه صامت …
ملاك … هههههههههه تمرقدى مرقد ناس يقولو صباح الخير .. اكيد بتسألنى درتى الفطور لبوك او لا ماهو عنده سكر .. الله لا تربحك امس سهرتينى لقريب الفجر ..ز
سمر .. ردى على تلفون ولا نضربه نكسره بنررررقد يابلوه وانتى جهازك صوته تقول كسار لوز …لا
ملاك … اهو طالعه مرض يسبلك تمرقدى هههههههههههه طلعت ملاك وخلت صاحبتها راقده … ردت على امها وبعدين ضمت الحوش وبخارته وحطت فاصوليا على نار .. وكيف بدت تقرض فى بطاطه خشت عليها سمر ..
سمر … << تتاوب >> ااااااااااااااااااااه ساعه كم توا ؟؟
ملاك .. ساعه 1 ظهر يافالحه … صحه نوم ..
سمر … بالله امك ساعه كم نايضه تسعسع وتتصل ؟؟
ملاك .. ساعه 9 ياحلوه … وانتى زى ميته ضميت الحوش وبخرته وبديت فى تطيب الغدى وانتى لاحياة لمن تنادى ..
سمر … لا ياماما كانا انتى واخده على تشحطيط انى مش واخده عليه …,, باهى شن كانت تبى هيا ؟؟ ان شالله غير مادرتلكش كبسه ؟؟
ملاك … تعرفيها انتى الوصيا سبعه .. وفى عشيه قالتلى كانا سمر روحت تعالى غادى لانا الحوش زحمه عند اختى
سمر … بتشوفى حبيب القلب اليوم … اطمنى بنقول لبابا بنبات حتى الليله … ومافيش مشى ..
ملاك … ونبى لا ههههههههه يامصح حتى وجهك … شايده بلا فايده .. الولد مافى بينى وبينه شى ..
سمر … على ماما الكلام دا هههههههههه
ملاك .. باهى خلاص برى اقلبى وجهك اغسلى وجهك وطرافك وسنونك وتعالى نفطرو .. مابيتش نفطر باش نفطرو مع بعض …
سمر … عارفتك اصلا لقمه ماتنزلش من غيرى هههههه دقه واكون عندك
مشت سمر للحمام … وفطرو وغسلو المعاين .. وومع ساعه 3 ظهر اب سمر جاها فاروحت … اما ملاك فايدوبك كملت تشطيبات الحوش ولبست حوايجها ووتت بيجامه لانا كانت عارفه انها رح تبات وولعت سيارتها ومشت … وطول ماكانت ماشيه فى طريق .. كانت تتمنى تشوف احمد ولو من بعيد .. بس سئلت نفسها سؤال وجيه .. هل ياترى الا صار معاها اعجاب من اول نظره ؟؟
اما الا انتم رح تسألوه … هل رح تلقى احمد ؟؟ وهل رح يصير بينهم شى ؟؟ وهل رح تكرهه هالشخص او تتعلق بيه وتحبه ؟؟؟
يتبع
لقراءة الجزء التالي : الجزء السادس من رواية حبيبتي لا تنسيني
لقراءة الجزء السابق : الجزء الرابع من رواية حبيبتي لا تنسيني
للإطلاع علي فهرس اجزاء الرواية : جميع أجزاء رواية حبيبتي لا تنسيني كاملة للكاتبة كيندا
جميع الحقوق محفوظة للكاتبة كيندا من ليبيا .
