وفي الجزء الخامس من رواية لن استسلم دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء الخامس من رواية لن استسلم
خش وسيما خدي دوش وصلى اللي فايته وتم اليوم عادي
صبح الصبح فاقت سمية واتصلت ب اسامة
اسامة راقد :ايوه
سمية:صباح الورد وسيمااا
اسامة:صباح النور
سمية؛هيا نوض خلي نمشو محل
اسامة:بري بروحك
سمية:المفتاح عندك
اسامة:باهي ساعة كم توا
سمية:8 مزبوطة زبط
اسامة:شنووووووووو 8 ؟؟؟؟ بري ارقدي امشي
سمية:هيا سامووو الله يخليك هيا نمشو توا
اسامة:مش ماشي بري ارقدي سمية
سمية تدلع :سااام على خااااطريييي
اسامة:استغفر الله ياربي باهي ناخد دوش ونفطر ونمشي محل
سمية:هيييي خﻻص نستناك باي
حط اسامة تلفون وناض خدي دوش وفطر وطلع لمحل
بعتلها مسج وصلت انا
بعد 7 دقايق خشت عليه ف محل ثباااااح الحييير
اسامة:صباح النور
ستفو ونزكو المحل وعلى ساعة 11 كان كل شي ف مكانه ..
وروحت معاه لحوشهم قتله استاحشت زينب
خشت لدار زينب لقتها راقدة نوضي زووبة حبيبتي هياااا
زينب:بري من عليا بنرقد … وتسمع اسامة يهدرز ف تلفون
جاها فضول تعرف منو ولوحت وذنها
اسامة:باهي اوكي مش مشكلة خﻻص تم ع حسابي ..اما مطعم … كويك تايم؟؟ ايه ايه عرفته تم تم يابرو ..ﻻﻻ مش معروف نتم حاجتي ونلحقك بالك ياقبل بعد صﻻة الظهر اوكي..سﻻم
قالت سمية فبالها ﻻزم نمشي للمطعم قبله حسه موعد غرامي واتصلت بعبير
سمية:عبير حبيبتي نطلب منك طلب
عبير:قولي
سمية:نبيك ترفعيني لمطعم اسمه كويك تايم تعرفيه
عبير:ايه نعرفه
سمية:خﻻص تمشي معاي
عبير :عادي ايه
سكرت الخط وقالت لزينب انا مروحة توا نتﻻقو بعدين سﻻم
وصلت للحوش ..
ماما بنطلب منك طلب
خ نادية:شنوو
سمية:نبي نطلع عالسريع نع عبير مش حنعطل بناخد شوي حاجات للمحل بالله وافقي
خ نادية:به ماتعطليش
وتت روحها سمية وعلى ساعة 12:30 خطمت عليها عبير وطلعو للمطعم وتستنى ف اسامة
خش شاب طويل وعريض قنين جت عينه ف عين سمية
وقعد يشبحلها وتشبحله و
بعد 10 دقايق ناض الشاب وجي جيهة طاولة سمية وعبير
الشاب:مساء الخير
سمية مابتش ترد
ردت عبير مساء النور
شاف الشاب لسمية وقالها هدا رقمي ياانسة نتمنى تتواصلي معاي
سمية مابتش تاخده
الشاب:قصدك بنقعد واقف هكي وماد ايدي
عبير نخصت سمية
خداته سمية الرقم وولى شاب مكانه
عبير لسمية:والله سعدك متقوى يابنت جاك طرف اغبر
سمية:ههههه
عبير:تي وينه الشبلي متاعك ساعة 1 اﻻ عشرة
سمية:اصبري تو يجي
عبير: شنو شوره انقلبت اﻻية بدل مااطيحيه طيحك هوا
سمية:ههههه الحق انا مهبولة بيه برغم انه عصبي
عبير:فوتيه مش عاطيك وجه كلمي هدا اللي جاك توا بالك تشد معاك….لكن شوفيه باين عليه جاته مكالمة مزعجة
سمية:ع من تتكلمي
عبير:ع اللي عطاك الرقم توا وجهه مايتفسرش هههه حي خيره طلع من قبل مايطلب حاجة
سمية:مش عارفة …
فاتت ربع ساعة خش اسامة
سمية:عبير اهواه اسامة ديري روحك تضحكي معاي وماتشوفيﻻش بكل
عبير:اوكي
قعمز اسامة ويتصل بجﻻل خارج التغطية
ويقول فباله خيره دعوة هدا خلي نستنى وخﻻص
سمية:شنو يشوف اهنا
عبير:ﻻﻻ ماشافش
نقال اسامة يشرين
اسامة:اها جﻻل وينك
جﻻل:والله مشيت للمطعم وستنيتك انت ماجيتش ورقمك خارج تغطية لكن شدت معاي ف بنية ماﻻخييير اطلع طووول هههه عجبتني
اسامة:هدا فاش فالح
جﻻل:ﻻ والله البنت هادي صاروخ وباين عليها متأدبة عطيتها رقمي ونستنى ف الرنة ههههه
اسامة:باهي وانت حكيت قصة حياتك..شنو بتولي نستناك؟؟؟
جﻻل:ﻻﻻ مش حنقدر جتني مكالمة امبكري ولد عمي دار حادث ف الزاوية ماشيله
((مﻻحظة:اكيد عرفتو ان الشاب هوا نفسه جﻻل))
اسامة: باهي باهي اوكي سﻻم
سكر اسامة متعفلق وينتبه لسمية @_@
شن ادير هادي اهني زعما يستنو ف حد واﻻ بروحهم
عبير لسمية:حي عالجو ختمت ياسميييية
سمية:شنو فيه
عبير:عبدو ياسمية عبدو
سمية:من عبدو…حي علمنا هدا شن ايدير اهنا
عبير:سمية حي جاي جيهتنا
سمية:نوضي نوضي فيسع نروحو خير مايفهمنا اسامة غلط نوووضي
عبير:هي هي
وهما وصلو نص الصالة وقفهم عبدو طبعا ماشافش اسامة..
قال لعبير:شن اديري اهنا روحي طول تو نحرش بوك.. وانتي تو نوريك ع العلقة اللي درتيهالي مع الشبلي
ويلمحهم اسامة التﻻتي المرح ناض وقلب الطاولة وهوا طالع عبدو قاله مرحباااا ياشبلي ي ي
اسامة ماعدلش عليه شاف شوفة لسمية تقتل وطلع
سمية جبدت عبير وطلعو يتجارو ومالقوش اسامة بكل فص ملح وذاب
سمية ل عبير :حي عليا والله اﻻ مايقتلني
عبير:شن هالسحنة هدا؟؟اتقول خوك
سمية:ماه تعرفي ان متربيين مع بعض
قبل وانا صغيرة مانسكتش اﻻ ف حوشهم من كثر ماواخدة عليهم
عبير:عليك عملة توقعي ياكلك
وحي عليا حتى انا ان شاء الله عبدو مايقولش لبابا يسحن عليا مايبينيش نسوق
سمية:عبدو تقدري تلخبطيه اما اسامة مايتلخبطش ان شاء الله مايقولش لماما
وصلت عبير سمية للحوش وروحت
خشت سمية :االسﻻم عليكم
خ نادية:وعليكم السﻻم
سمية:شن اديري ماما
خ نادية: نوتي في حاجات وبري حتى انتي وتي روحك
سمية:عﻻش من جاينا
خ نادية:بنمشو بحر صبراتة غدوة
سمية؛منو بيرفعنا ؟؟
خ نادية:خالتك نفيسة توا اتصلت وقالت اسامة بيرفعنا غدوة .
سمية صبو عليها اميا سخونة ماتتكلمش جاها تشنج ﻻ عرفت تضحك ﻻ تبكي عين تقلي وعين اتصب ف الزيت o_O ههههه
سمية:ﻻ مانيش ماشية
خ نادية:تحسابي بكيفك اماﻻ
سمية:ماما بري انتي خلي نقعد انا
خ نادية:والله ؟؟؟ مهبولة اماﻻ نخلي بنتي ونمشي نتفسح.. بالك حتى نقعدو يومين غادي بري بري سلم بنيتي وتي روحك
مشت سمية وهيا اتخمم ع هالموقف اللي صار ياحليلي وبنقعد ف وجهه يومين تامات
الصبر ياربي خلي نتصل بيه ….
الرقم المطلوب مقفل وتمتم بينها وبين نفسها
ياريتني مادرت هالعفسة كنهدا راني لخبطه ع البحر مش عارفة ﻻش نتسرع زي الغبية
خشت سمية صلت وتت روحها حطت حاجاتها وعيونها يبكووو
تيشرت سماوي وسروال واسع وشوي حاجات
وفاتت العشية روح اسامة للحوش خش للحمام حلق لحيته دارها خفيفة و خدي دوش وطلع لداره لبس سورية سماوية قريب للابيض وسروال جينز اكحل وهوا طالع جاته خ نفيسة قتله: شنو مدكر واﻻه
اسامة:ايه ايه مدكر يمى
خ نفيسة:خيرك مكشر
اسامة:ﻻ شي هكي جو مش تمام بس
هي خلي نطلع انا
خ نفيسة:باه ف امان الله
طلع اسامة ويلود ويلود ف الشوارع ومعش عارف وين يمشي
نقال اسامة يشرين
اسامة:اها جﻻل
جﻻل:وينك من بكري نتصل
اسامة:جو مشكشك شوي
جﻻل:انت وين توا
اسامة:قاعد جنب جردينة اﻻداعة
جﻻل:اهو جايك
فاتو 10 دقايق وجي جﻻل
ها ياشبلي خيره جوك
اسامة:سمية قتلها باعدي ع عبدو يا جﻻل وهيا قاعدة تكلم فيه شوره
جﻻل:صح عبدو مش كويس لكن خليها يااسامة هيا تعرف مصلحتها واكيد تعرف الصح من الغلط
اسامة تنهد
كمل جﻻل دوته فلهدا انت معش تضغط عليها المكروه مرغوب راه خليها ع راحتها
اسامة:يستر الله حتى انا هكي فكرت
جﻻل:باهي انت تفكر فيها ك حب
اسامة:تي شن تقول ياراجل امس كنت نقولك زي اختي خيره هدا
جﻻل:باهي به نوض نوض خلي نتعشو وماادورش خﻻص هادي حياتها ياشبلي انت قاعد حاط فبالك انها قاعدة صغيرة
اسامة:ان شاء الله هي… وبش تقول لخوك يعطيني اﻻفيكو وياخد سيارتي غدوة مطلع العيلة للبحر
جﻻل:اوكي تمام…. حقا ماحكيتلكش ع البنت متع اليوم
اسامة:والله مامتحمل نسمع حاجة توا ..خليها مرة تانية
سمية اتصلت ب اسامة رن رن وماحد رد
اتصلت بعبير
عبير ل سمية ؛شن صار
سمية :ماردش عليا
عبير:معش تتصلي يادنقا تو يقول بما انها تتصل هلبا معناها مدايرة حاجة غلط
سمية:اسكتي ساكتة غدوة يرفعنا للبحر
عبير:غبرت رسمي…باي باي امي تنادي
سمية:باي
ورقدت سمية ومافاقتش اﻻ ع صوت امها تي نوضي ساعة 6 فيسع
وصلت ووتت روحها وقعدت تستنى ههي وامها
بيب بيييب
خ نادية:هيا سمية اسامة جي
وطلعو وركبو اﻻفيكو ومشو لصبراتة
طول الطريق اسامة قارن حواجبه
سندس مقعمزة وراه وسيما وسيما وتتدلع عليه وسمية فبالها حولي من وراه ياجيفا
سمية لزينب:خيرها بنت عمتك
زينب مش عارفة تتلصق
سمية :زينب بنحكيلك امس شن صار معاي عارفاتك حتهزبيني
زينب:قولي
سمية حكت كل شي
زينب :يانهارك امطشطش امغبر امدوحس على دماغك ياسمية واﻻ وبكل صحة وجه جاية معانا اليوم ؟؟؟ حيحطلك كﻻم وﻻ عمرك سمعتيه
سمية:والنبي ماتزيدينيش
ووصلو بحر صبراتة خداالهم عريشة وهوا عريشة بجنبهم مش من عادته ياخدها بروحه وبدل حوايجه لبس كانتيرا كحلة وشورت وقعد ف العريش متكي فيها
خ نفيسة:تي نوض وانت من الصبح مكشر
اسامة:ﻻ تاعب شوي بس … وغمض عيونه وكمل تتكايته
طلعت خ نفيسة من العريشة فات شوي وخشتله سندس على اطراف صوابعها
وقعمزت جنبه وخدت قشة وبديرها على خده….
….يتبع….
لقراءة الجزء التالي : الجزء السادس من رواية لن استسلم
لقراءة الجزء السابق : الجزء الرابع من رواية لن استسلم
للإطلاع علي فهرس اجزاء الرواية : رواية لن استسلم جميع الاجزاء كاملة
جميع الحقوق محفوظة للكاتبة لوزة .
