الجزء الخامس من رواية محظوظ ولكن

وفي الجزء الخامس من رواية محظوظ ولكن دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .

الجزء الخامس من رواية محظوظ ولكن

ندى : عاشت اﻻسامي والعمر كله وبالجودة
عمر :تسلمي الله يخليك …. بس بنقولك حاجة …
ندى : تفضل
عمر : ااا شن الجو
ندى : ههههه تمام شن جوك انت
عمر : كويس ربي يحفظك
ندى : كيف حال العويلة
عمر : بخير …ش شن بنقولك
ندى : تفضل
{عمر ياحليلي من هالصوت الحنين صارلي تشنجات ف قلبي يجلط ايخوووخم الشباب اكيدة فاهمين شعوري توا… لما تسمع صوت بنت ايهبل تخش بعضك }
ندى: وينك !
عمر:نبي نقولك ياندى ان انا فيا السكري … وامس بس كيف عرفت …واهو جيتك دغري قتلك مانبيش ندس عليك بش نكون واضح معاك من بداية …
ندى : اها …اممم

خ وداد : المهم انا اليوم جاية بنخطب بنتكم ل ولدي عمر
خ رقية : وشن يشتغل عمر ؟؟
خ وداد : يشتغل ياحنة ف خفر السواحل ويشتغل امن ف شركة
خ رقية : الله يبارك

توت توت
نحى عمر النقال من وذنه وشافه لقاها خلفية شاشة والخط مسكر
{اللطف ! قتلها فيا السكر سكرت عليا اماﻻ كان فيا مرض خطير ششن دارت ! ﻻ حول وﻻ قوة الا بالله خلي ناكل توسط متاعي خيرلي ﻻ بنات وﻻ دوة فاضية …جربوعة وجعتلي قلبي  …
قتلكم من قبل ونزيد نقولها مش كل اتنين يرتبطوا يتزوجوا وﻻ كل شخص معجب حيتجوز المعجب بيه… تأتي الرياح بما ﻻ تشتهي نفسي }

خ رقية : بنتي مهندسة نفط تشتغل ….السنة هادي كيف اتعينت
خ وداد : ماشاء الله… انا دلوني عليكم عيلة فﻻن … قالولي اخﻻق وادب وهاني جيت بش نخطب
خ رقية : الله يسلمك … خﻻص نشاور بوها وخوتها قبل ونرد عليك ان شاء الله
خ وداد : ﻻ خودوا راحتكم اﻻصول اصول …وهي نستأذنك تو
خ رقية : خليك مازال بكري
خ وداد : ﻻ هوا داك الحق ولدي يستنى فيا برا ومستعجل عنده مشوار
خ رقية : اها اماﻻ تفضلي

عمر : ها فرج ريتها …. سكرت عليا ندادين متاعك
فرج : شن متاعك هادي
عمر : تي مجرد ما قتلها فيا سكر سكرت عليا ياراجل  ماوجعنيش السكر وجعتني التسكيرة باهي دارت اي سبلة نستادنك امي تنادي … معليشي مزنوئة نبي الحمام … بنرقد بناكل اي حاجة
فرج : هههههههههه معليشي تو ندورلك واحدة تانية ….شنو بتطلع اليوم ؟؟
عمر : مش عارف مافيش حوايج محددات …
فرج:تي دور اي حاجة
عمر : تو نلبس توتة وخﻻص
فرج : باه اوك نتﻻقو بعد المغرب انا بنرقد والعمل متع ليل اتصلت بسعد بش ياخدلك اجازة مرضية تﻻتة ايام عمر : باه تمام

ندى ل هالة(بنت الجيران) : ضي هارب وكساااد
هالة : ههههه باهي اللي جيتي نكسدو مع بعض …خشي خشي
ندى : مش وقتهم هما وضيهم صقع الهم اﻻحرف
هالة : تسكتي بش هنادي اليوم جوها خطاب
ندى : من هنادي
هالة : هنادي بنت خالي
ندى : تتسهوكي
هالة : والله بجديات
ندى : احكيلي احكيلي شن مواصفاته وعمره
هالة : ماحكيناش هلبا المهم قتلي اسمه عمر ويشتغل خفر سواحل ويسكن ف منطقة كدا ..

انصدمت ندى نفس مواصفات اللي كان ايقولهم فيها عمر قبل ربع ساعة ومعش عرفت هل هوا نفسه واﻻ تشابه اسامي . .
هالة : بس خسارة نسيت نسالهت مواليد كم
ندى : اه … به
هالة : شوية نجيب تشيبس ومشقشقات نقضو بيهم الوقت
ندى : هالة نقالي فصل شحن والضي هارب … نبي ناخد نقالك نحط شفرتي
هالة : عادي خوديه
طلعت هالة وندى خدت النقال وحطت فيه الشفرة متعها واتصلت ب عمر

عمر : ايوه السﻻم عليكم
ندى : وعليكم السﻻم
عمر : ماتقوليليش خيرك سكرتي عليا امبكري ؟؟
ندى : شحن نقالي فصل و الضي هارب
{يعطيهالك خلعتيني نحسابك فتيني }
عمر : اها المهم قتلك فيا السكر اشبح سمعتيني او ﻻ
ندى : مش المشكلة ان عندك سكر ﻻن هدا مرض ومش بايدك… كل شي من ربي وكل شخص يمكن يمرض في اي لحظة والحمدلله على كل حال …و سامحني ف كلمتي المشكلة لما الشخص يكون كذاب …
عمر : كيف فاش كدبت عليك ؟؟
ندى : تتعرف عليا وباعت اماليك يخطبوا ..
عمر : شن اتقولي انتي ؟؟
ندى : الحمد لله ان اللي بتخطبوها هي بنت خالة بنت جيرانة كنهدا راهو لتوا راقدة على وذاني وتتعرف وتمشي معاي وتضحك عليا … بعدين تمشي تتجوز عن طريق الوالدة… هي سﻻم …
وسكرت الخط
عمر تنرفز وبدي يبكبك زي طنجرة المبكبكة ….
شن يخطبولي من غير علمي عيل انا نمص ف صبعي طلعوني ذكر قدام البنت استغفر الله
>>>اه من ظلم اﻻيام
عمر : فرج ياكلب اكيد تندري وتحبكوا فيها من وراي خليتوني ف موقف قدام البنت
فرج : شن اتقطف انت وخيرك اتلعلع عليا
عمر : اماﻻ شن تبيني نديرلك نجي نرقصلك عالواحدة ونص !
فرج : ريح روحك واحكيلي شن فيه
عمر ( حكي بزبط شن صار )
فرج : وك عليا من حظك تي شن هدا ياراجل برا امشي لشيخ يقرا عليك واﻻ حاجة اكيدة اشبح شن دايريلك
عمر : تي بﻻ تسهويك توا ماتندريش انتا
فرج : ﻻ والله مانندري
عمر : اسمع باين عليهم وصلوا صكر هي تو نكلمك بعدين
فرج : انا قريب من حوشكم تو انجي
عمر : باهي … سﻻم ..
وقف عمر وضرب ايده عالحيط وهو متنرفز ووجه احمر
فتحت الباب خ وداد وخشت هيا ونازك
عمر قارن حواجبه وبنبرة صوته الخشن اللي زي الرعد قال : وين كنتوا ؟
نازك : كنا عند مراة صاحبة امي
عمر : وين كنتوا ؟
خ وداد : بش قتلك اختك كنا عند مراة عمر ضرب ايده ع طاولة: ماتبوش تقولوا وين….به انا نقولكم وين كنتوا …. كنتوا تخطبوا للعيل واﻻه
كنتوا تخطبوا لعزري الحويل … اللي مالين منه …
خ وداد حلت عيونها حايرة كيف عرف
وقتله : ايه كنت نخطبلك سادك من اطوطيح اهنا وغادي ندادك فاتحين حياش وانت ادور غير ف تليفونات ودوة فاضية
عمر : حياتي يمى نبي نفصلها كيف مانبي
خ وداد : وهوا انت تعرف اتفصل كان تعرف اتفصل راك خشيت مهندس زي خوك واﻻ دكتور مش خفر سواحل ودوة فاضية
عمر : عارف روحي مش زي حاتم وان حاتم خير مني وان حاتم مهندس زمانه اللي رفعلك راسك وان حاتم اﻻبن المطيع وانا اللي مهما درت مش حنعجبك
خ وداد : الله يسامحه الحاج كان يساير فيك ف كل شي كنهدا ما هالحال حالك
عمر : شن ماهالحال حالي … حسستيني اني سكير وحشاش ومتع يباري وحبوب
خ وداد : ماقلتش هكي
تون تون
خ وداد : افتحي الباب يانازك
مشت نازك فتحت ولقت فرج خش وسكر الباب
عمر : المهم موضوع زواج مرفوض
خ وداد : ابتاخدها البنت مشيت وكلمت اماليها غير نستنى ف الرد بس ماتحشمنيش معاهم
عمر : تي هدا جواز راهو مش لعب نظلم بنت الناس معاي واﻻ نطلقها من اول شهر حتصير حشمة اكثر
فرج : مايصيرش يا وداد كيف تخطبيله من وراه وهوا مايندريش
خ وداد : اماﻻ نخليه هكي يهز ف راسه
عمر وجه احمر زي طمطمة وواقف ويشوف ل امه
فرج يعض ف شواربه يبيها تنقص دوة خاف ع عمر ..و خ وداد شي
عمر : مش حنتجوزها
خ وداد : ابتمشي ادير رؤية شرعية وتتعرف عليها
فرج : تي ياسر ياوداد مش وقته الكﻻم هدا راهو
خ وداد : ﻻ وقته وﻻزم يقتنع

{وفي قائمة الحظ وجدت اسمي مخربشين عليه … انحس ف روحي مضايق ومخنوق مستاجع من امي كيف ادير فيا هكي مسامحها على معاملتها ليا اصﻻ من صغري هكي تعامل فيا وتحب حاتم لهسبب انا ديما ف البحر ومانقعدش ف الحوش من عمري 10 سنين يﻻ هداك كله ماضي وصار وعادي بس لكن مش لدرجة تمشي تخطبلي من وراي }
فرج :مايجيش اللي اديري فيه

عمر حس ب دوخة ﻻن فيه السكر ومامشاش يعاين بش يعطوه ادوية وطبعا امه ماتندريش عالشي هدا نازلة فيه مسكين لين معش يسمع في نقاش امه وخاله…. وطاح ثاني خ وداد : عمر عمر نوض …. خيره يافرج
فرج : من بكري نعض في شواربي لين ولو قﻻية …فيه السكر
خ وداد : اللطف
نازك : امتى صار
فرج : امس بس
خداه فرج للعيادة تاني وداروله اﻻزم وبعد شوي فاق وعطوه ادوية متعه
طلع فرج ف الممر واتصل ب ندى وفهمها
فرج : ياندى الولد تعرفيه عنده السكر واحدة واحدة عليه شن مقايلتله دوة زي السم
ندى : نحسابه يضحك عليا
فرج : ﻻ مايضحكش عليك … وامشي اتصلي بيه وااﻻ ابعتيله مسج
ندى : باهي به
فرج : هي سﻻم
طلعتله خ وداد وقتله : عﻻش ماقتليش يافرج عﻻش مسكين عمر عطيته كﻻم زي السم
فرج : انتي طول عمرك تعطي فيه كﻻم زي السم اتقولي مش ولدك ..
خ وداد : غير اينوض بس معش نديرله هكي
عمر طلع من دار اللي كان راقد فيها
فرج : خيرك نضت من سريرك مدايريلك تغدية
عمر : تعرفني مانحبش المستشفيات نبي نروح
خ وداد : هيا انروحوا هي
عمر : مش لحوشنا …بنروح معاك يافرج لحوشك
خ وداد : ئه شنهوا
تلفتلها فرج … دارلها باص عيون
خ وداد : باهي رد بالك ع روحك

روحو هما اﻻربعة وحط فرج اخته وبنت اخته ف حوشهم ونزل عمر خدي مستلزماته ورجع لسيارة وروح بيه فرج لحوشه اللي هوا حوش جد عمر

اتكى على المندار واتغطى …
على اتصال ندى … سكر عليها عمر وعاودلها …
ندى : مساء الخير
عمر : مساء النور
ندى : كيف حالك عمر
عمر : الحمدلله كيف حالك انتي
ندى : بخير …. عمر انا اسفة عاللي صار … انا ظلمتك وفرج وضحلي كل شي و نتمنى انك تتقبل اعتذاري
عمر : صار خير .. اصﻻ الذنب مش ذنبك وانا لو كنت مكانك كنت حندير هكي واحرف
ندى : المهم ان شاء الله ﻻباس عليك عمر : الله ﻻ ايوريك باس
ندى : باهي اماﻻ نخليك ترتاح توا

{ماك ماتندريش ان صوتك ايريح زي بانادول اكسترا }
عمر : ﻻﻻ خليك مرتاح انا …
ندى : اوك
عمر : مطر اتصب
ندى : اي ماشاء الله قوية
عمر : بالله غنيلي هههه عارفه طلب مفاجئ لكن هكي الجو حلو مع غنائك اكيد حيزيد يحلو
ندى : ههههه مانعرفش انغني
عمر : هههه يﻻ حتى مقطع بسيط
ندى : امممبه …

خ وداد : عليك عملة
نازك : ايه بكل
خ وداد : تو قوليلي شن بنقولهم الناس هي مافيش نصيب ؟؟
نازك : نحسابك تدوي على السكر اللي ف عمر
خ وداد : هديكا عملة خليها بروحها
نازك : تو نكلمهم انا ونقولهم راهو ماصارش
خ وداد : اح وخﻻص مع ان البنت ماتتعوضش
نازك : الله غالب نصيب

عمر : احكيلي على حياتك
ندى : حياتي عادية جدا ومليئة بالشقاء… تخرجت من معهد حاسوب قبل عامين … نسكن ف حوش بسيط انا وامي … بوي اتوفى وقت كنت 14 العام اااه
عمر : الله يرحمه ويغفرله كملي…
ندى : ربتني امي وكبرتني طبعا امي وبوي الزوز مقطوعين من شجرة هههه ماعندنا حد ﻻ عم وﻻ خال.. عموما تبهدلت امي بش وصلتني لهلعمر ومرضت قبل تﻻتة سنين ومن يومها هي في الفراش
عمر : ﻻ حول وﻻ قوة اﻻ بالله .. ان شاء الله ربي يشفيها
ندى : ان شاء الله يارب… المهم بعد ما مرضت امي طلعت اشتغلت في معمل حلو وحار بعدين اشتغلت في مشغل خياطة بعدين اشتغلت في مستوصف نعطي رقم للمرضى
عمر : وعﻻش تتنقلي من عمل ل عمل
كل مرة حاجة … صاحبة المعمل كلت عليا شهر ماخلصتنيش فاسيبت العمل … صاحب مشغل الخياطة حشاك مايستحيش اللي تعجبه يبي يلف عليها …
عمر : خزيه مش راجل
ندى : اي والمستوصف تعاركت مع ممرضات غادي بدو يضايقوا فيا فسيبت العمل .
عمر : اممم
ندى : وهدا الي صار وحاليا ندور على عمل … يﻻ دورك احكيلي ع روحك
عمر : والله شن بنقولك شخص متملح كركباته اﻻيام والعتراث …
اغلب وقتي برا الحوش … ديما ف البحر … انحس فيه حنين عليا …
يحويني واحتويه … ننسى فيه كل همومي
ندى : حلو بالك نديرو سفينة ونكتشفوا العالم بيها
عمر : ههههه جوو
ندى : عمر .. تو انكلمك شوي تاني اوكي
عمر : اووكي خودي راحتك
ندى : تمام .. سﻻم
عمر : سﻻم

فرج طلع من مطبخ وقعمز بحدا عمر وقاله : عمر .. بنقولك
عمر : ها قول
فرج : راهو ندى……
يتبع……….

لقراءة الجزء التالي : الجزء السادس من رواية محظوظ ولكن

لقراءة الجزء السابق : الجزء الرابع من رواية محظوظ ولكن

للإطلاع علي فهرس اجزاء الرواية : رواية محظوظ ولكن ( جميع الاجزاء كاملة ) للكاتبة لوزة

جميع الحقوق محفوظة للكاتبة لوزة .