وفي الجزء الرابع عشر من رواية رحلة الحب دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لين نزار .
الجزء الرابع عشر من رواية رحلة الحب
أمير : وين انت؟
معتز : مشوار اخلصه وبجي..
أمير : هسي دي تجيني راجع لازم افهم الحاصل..
معتز قالييه استناني جمب باب المستشفى.. جا راجع وساقو..
أمير : ماشي ل رؤى صح؟
معتز اتخلع
أمير : رؤى دخلها شنو ف الموضوع دا؟
معتز : انا اصلا كنت جاي اسمعك كلام رؤى وياهو ظهر الموضوع..
معتز فتح الريكورد ل أمير.. وسمع كلام رؤى عن القروش والمصلحه وكان مصدوم حرفيا في حب عمره 
معتز بعد انتهى الريكورد : وعشان انا م الحق اوريك الريكورد دا مشت تلهيك بموضوع تاني ضربت لي وقالت لي حمدالله على السلامه..
أمير :يعني كانت حتقتل أقرب انسانه لي وانا وريتا قبل كده انو هديل بالنسبه لي خط أحمر
أمير دموعو نزلت
معتز : م تخاف ح اطلع ليها الكلام دا من عيونا
امير :نكلم الشرطه بس م عندنا إثبات؟؟
معتز حخليها تعترف اصبر لي
اضرب لي لاصحابك بتاعين الشرطه ديلك فعلا ضرب ليهم وقالو حيجوه ف العنوان الاداهم ليه..
معتز نزل أمير ومشي على بيت رؤى..
دق الباب والجرس قرب يكسرهم ف النهايه فتحت ليه بت صغيره..
قاليها رؤى وين؟ قالت ليه مع ماما بتديها ف الدوا.. كورك ليها ي رؤى والله العظيم م تشوفي خير تاني تعالي مارقه.. ي رؤى وصوتو بقا أعلى..
جا ابوها وجا اخوها وجات رؤى زاتا اتخلعت لما شافتو
معتز : قايلاني م حعرف اصل بيتكم؟ولا م متوقعاني اخش جوه ي مجرمه
ابو رؤى : انت قايل نفسك منو بتتهجم على بيوت الناس والله اضرب للشرطه..
معتز :استهدوا بالله اصلا الشرطه جايه، بتك قايله انو عملتا دي م حتتكشف يعني..
اخو رؤى : عملتي شنو؟
رؤى: م عملت شي والله يخليك امي عيانه كده ضغطها حيرتفع
معتز : ولما جيتي تقتلي البت وراجلا ليه م ختيتي انو امها وابوها ممكن يموتو وراها ولاخايفه ع امك بس؟
ابو رؤي: انت مجنون ولاشنو بتقول ف شنو انت؟
معتز : بتك انسانه ماديه وأمير العايز يصلكم دا عايزاه عشان قروشو ولما اعترفت لي وقلت أوري أمير مشت ختت السم في أكل اخت أمير وراجلا عشان أمير يتلهي وم اقدر اوريه قدر شنو هي انسانه عفنه وم بتستاهل ذره حب من حبو ليها
ابو رؤى :رؤى
رؤى: ي ابوي الكلام دا م صاح
معتز : مكالمتك اتسجلت + اصلا ف ريكورد م تنكري.. وطلع تلفونو خشوا يلا..
بعد شويه جو تلاته من الشرطه..
معتز م تخافي : كلها مجرد قتل عمد مع سبق الترصد والاصرار يعني حسبي الله ونعم الوكيل فيك.. جو كلبشو ليها يدينا وابوها وقع جرا عليه اخوها
وهي بدت تكورك..
ف شرطي جراها من شعرا وساقوها..
معتز اول م خلص..طلع مشي لأمير..
لقى أمير جوه غرفتو وقافل الباب..
معتز :انا معتز..
جا فتح ليه الباب ورجع..
معتز :امك وابوك وين؟
أمير : كلهم مشوا لهديل وفارس
معتز قعد جمبو حاليا رؤى ف الحراصه
أمير غضب وشات اي شي جمبو : ليه تعمل فيني كده انا سويت ليها شنو كنت بحبها اكتر من نفسي وعارضتكم كلكم عشانا كانت لو اتمنت شي بجيب ليها عشره زيو ليه تغدر بي كده..
كان منفعل جدا.. معتز مسكه وحضنه
معتز : اهدا، روق ي أمير ان شاء الله ح يعدي..
أمير صرخ وكورك ف حضن معتز لحدي م راق..
يمه الصحاب طاقات امان، تحميني من جور الزمان 
..
في المستشفى..بعد ٣ يوم
فارس :حبيبتي
هديل :فارس
فارس :انتي كويسه؟
هديل :لا م كويسه عايزاك جمبي هنا
فارس :انا جنبك م تخافي 
سرايرنا كانت قريبه لبعض مد يدو مسك يدي
جا بابا داخل..
عبدو :اطمنوو ي اولاد، كلها يوم بكره بس وحتنورونا
فارس :تسلم ي عمي تعبناك معانا
عبدو :م تقول كده انت ولدي،
مع كلمه انت ولدي جا خالد ابو فارس داخل..
خالد :السلام عليكم
كلهم :وعليكم السلام
ابوي سلم عليه وضيفو..
….
امل ام أمير : قومي خشي لراجلك..
امل ام فارس : لا م خاشه يختي..
….
ابوي طلع وخلانا معاه..
خالد :حمدالله على السلامه ي عرسان
انا :تسلم ي عمو..
فارس م رد عليه
خالد :فارس انا عارفك زعلان مني ي ولدي، بس عايزك تعفي لي 
غلطت في حقك كتير سامحني.. فعلا كلامك طلع ف محلو وانو فهد طول الفتره دي كان كعب وانا اتغشيت والله ي ولدي م عارف ألقاها من الشركه ولا من فهد ولا من امك اللي خلتني ومشت وطالبه الطلاق ولا من حسره قلبي عليك..
فارس :حصل خير ي ابوي اهم شي انك شفت الحقيقه بعيونك
خالد:عارف دا م وقت مناسب للكلام، بس أول م تطلع من هنا بنتفاهم 
فارس : ان شاء الله
وقام طلع..
بعد مسافه جات ام فارس داخله..
ام فارس : اها نبذك احرجك قدام مرتك إساءك..؟
فارس:امي براحه ههههه،، اعتذر والله
ام فارس: بعرف يعتذر يعني..
فارس :امي الزول كان ابيتي خافي الله فيه 
ام فارس : مشتاقه ليو والله بس فششششر كفايه لحدي هنا..
هديل: ههههههه البحب بيسامح ي خالتو، بعدين شكلو اتغير والله وكلامو كلو طيب
ام فارس :مصيري ح ارجع بس لازم يتعب عشاني شويع 
وطلعت
انا وفارس ضحكنا..
فارس : مشتاق ليك حبيبتي..
انا : وانا كمان يقلبي
فارس : وانا كمان دي قوليها لأمير اخوك
ضحكنا وفرفشنا مع بعض.. يعني حتى المستشفى مع فارس كانت حلوه
..
بعد يوم..
عبدو : خلاص حنطلع ي اولاد
هديل : واخيرا
فارس :الحمد لله
وطلعنا من المستشفى..
ف البيت..
اول م وصلنا كان هادي..
فارس وانا : أمير وين يخوانا؟ضحكنا..
عبدو : أمير الايام دي م عاجبني،،
بعدهم جا معتز داخل شايل أكياس..
معتز :نورتو والله..
فارس :تسلم ي ابو الشباب،. وين انت وصحبك من ديك وعيك..
معتز :انت نايم ف العسل خليك خالتو امل انا كلمت ناس امي انكم طالعين الليله ف اي لحظه يمكن يجوك…
امل : البيت بيتهم
معتز طلع ورراه ابوي وفاارس قالي خليك هنا..
طلعوا وراه..
معتز :أمري لله..
أمير فتح ليه
.. فارس وابوي استغربو كان وش أمير شاحب وعيونو واقعه وذقنو مربيه وحالتو كانت كئيبه شديد..
فارس : أمير الحاصل شنو؟
عبدو : دا شنو ي ولد مالك؟
معتز: بطلو اسأله لانو والله م بتحمل..
عبدو : شنو م بتحمل دي،، راجل ولا م راجل.. شي يخليه يصل المرحله دي ماف،، انا ربيتك انك دايما قوي مهما كان قوه العاصفه الحاصله صاح؟
أمير : دا لمن تكون شغال بعقلك، بس لمن قلبك هو اليشتغل تاني صعبه انك تكون قوي
فارس: دي رؤى صح
عبدو : رؤى العروس..
أمير : انفعل دي عمرها م تكونن عروس دي انسانه مجرمه الله لابارك فيها..
معتز : روق ي أمير م كده..
أمير : جرحتني، كسرت قلبي الله لايسامحا
عبدو : خانتو يعني؟
معتز: عايزه تعرس عشان القروش م عشان بتحبو وعملت حاجه قذره بس م بنقدر نقولا..
فارس : هي السبب ورا الحصل لينا انا وهديل صح..
أمير عاين لفارس وعيونو اتملت دموع
فارس قعد جمبو ف طرف السرير : ي راجل ربك ستر ولطف وعرفت حقيقتها من بدري من زمان انا ومعتز كنا بنقوليك وانت أعمى واطرش بركه والله حتى لو كانت على حسابي بس الحمد لله مبسوط والله.. حتجي ست ستها ان شاء الله
عبدو : اكيد ي أمير ست ستها والله زي امك كده طيبه وحنينه..
….
الباب دق..
لينه وامها دخلو..وحمدو ليهم السلامه..
لينة : كفاره ي هديل الف سلامه عليك انتي وراجلك عين السواد والرماد
هديل : تسلمي ي لينو والله الحمد لله لطف وستر
ام معتز: قلنا نجيكم ف المستشفى بس انت ي معتز حلفت وقسمت اعفي لي ي امل ي اختي..
امل ام أمير : هو انا خلوني؟ امشي اشوفهم واطمن بس ويقولي يلا ارجعي غايتو جنس وجع قلب كان..
ام معتز: لو عارفاك ف البيت كان جيتك والله..
ام أمير : م بتقصري والله..
ام معتز : وتشرفنا ي ام فارس ماشاءالله تبارك الله رغم معرفة معتز وفارس القديمه بس م حصل اتصادفنا..
ام فارس : اي والله والغريبة كل م يجي يقولي ي امي بس فاضل ام معتز واصلو ربنا م سهل
ام معتز : اي كلو مسهل من ربنا وربنا يلاقينا ساعات خير..
انا قمت : الناس ديل اتأخرو فوق ليه أمير مالو؟
لينه : وين هم ارح بمشي معاك..
ومشينا..
دقينا الباب..
فتح لينا ابوي..
عبدو : اهلا
انا : بابا أمير وين؟
لينه: اهلين ي عمو
معتز سمع صوت لينه جا مارق
معتز : اهلا وسهلا جيتو؟
لينه : لا لسه م جينا
هديل: بابا أمير وين..
بابا زح لي وخشيت وشفتو ف حالتو التي يرثى لها..
جريت عليه.. أمير انت كويس دا شنو دا اغيب يومين والقاك كده وحضنتو عارفاك م بتستحمل غيابي بس م للدرجه دي
بابا نزل وجات لينه خاشه ولمن شافتو كده..نططت عيونا.. لحدي م عينو جات في عينها..
☆يتبــــــــــــــــــــــــــــــــــــــــــــع☆☆
لقراءة الجزء التالي : الجزء الخامس عشر من رواية رحلة الحب
لقراءة الجزء السابق : الجزء الثالث عشر من رواية رحلة الحب
للإطلاع علي فهرس أجزاء الرواية : جميع روابط اجزاء رواية رحلة الحب للكاتبة لين نزار
جميع الحقوق محفوظة للكاتبة لين نزار
