الجزء الرابع من رواية الحلال والحرام

زينب بحتت في لجين : وين أختك ليش ما طلعتش ؟

لجين ببرود : شنو دخلني وهي تراجي في وحده حاتجيها

زينب : ومن البنت يلي حاتجيها هذي نعرفوها نحنا

لجين : لا ما تعرفيها واسمها ايلاف حاتجي بعدين اشويه

زينب : باهي انا ماشيه جارتكم مريضه حانجي بعدين

لجين : براحتك وكانت واجد زعلانه ومضايقه يمكن عشان مايا تغيرت عليها وديما اتهزب فيها علي أبسط حاجه أتقولها وهالشي مجننها ليش تغيرت عليها هكي بحتت فيها طلعت من غرفتها ومتأنقه وفرحانه واجد

مايا ببرود : كنك قالبه وجهك وامك وينها مش باينه ؟

لجين : قاعده عند جارتنا وانا حره في حالتي مش شورك

مايا ضحكت : كنك شنو صايرلك وقعدت جنبها ولا عشان نهزب فيكي زعلتي مني باهي انا اسفه لو زعلتك مني

لجين مابتش أترد واعيونها عالتليفزيون ومن جوا نار

مايا : اطربقي ماعندي ما انديرلك علي رنت الجرس عدت فتحت الباب : هلا نورتي وطولتي واجد علي فكره

ايلاف : زحمه في الطريق اسفه وسلمت عليها وخشت

لجين طنشتها وعدت لجنينة الحوش سمعت الاغاني والعه تأففت من تصرفات مايا يلي بدت تتغير واجد واجد

رغد عدت تصلي في العصر بعد كملت قمعزت عالكرسي في السور بحتت في خوها فتحي جاه توا ولقاها هنا ابتسم وجاه لعندها : كنك قاعده برا يا مهبوله انتي

رغد تنهدت : مقمعزه عادي ليش كفرت يعني

فتحي : بلا عصبيه وصبي جيبي شاهي بسرعه

رغد صبت وبحتت فيه لقاته يتأمل فيها انصدمت عدت بسرعه وفي نفسها شنو صايرله هضا وفوقها امي وباتي مش قاعدين وبروحي اخرا يا حبيبي كملت معايا

فتحي صبا ولحق اخته : وين باتي وامي ما شفتهم ؟

رغد ترعش وحست بالخوف : مانندريش لقيتهم مش قاعدين واعيونها عالزجاج متع الدلاب شفاته يقرب

فتحي : رايحه كابره يا رغودي ومتغيره واجد يا قمر

رغد غمضت اعيونها وترعش اول ما حط يده عليها عيطت بشويه ووخرت : شنو ادير وقعدت توخر وهو ايقرب بخطواته لعندها بدون ما ايقول حرف واحد

رغد : انا سألتك رد عليا وكلما اتوخر هو ايقدم شورها

فتحي : اهدي كنك خايفه انا خوكي مش حد غريب

رغد : وهضا يلي قاهرني انك خويا ولمعو عيونهاا

فتحي : وليش قاهرك شفتيني درتلك حاجه يعني وجاه يبي يكرها هربت تجري لغرفتها سكرت الباب وقلبها يدق من الخوف قعدت ترعش وحالتها حاله سمعاته يخبط عليها : افتحي عليش هربتي انا نلعب معاك لا اكتر

رغد مابتش اترد عليه وخشت لسريرها غطت روحها وترعش : ياربي والله خايفه واجد نتمنه نموت وتواااا

فتحي بحت في جهة الباب خشو عيلته تنحنح : ااه وين كنتو لقيتكم مش قاعدين وقمعز واعيونه علي غرفة رغد

امه ونيسه : عدينا للمستشفى سنوني يوجعو فيا واجد

باته خليفه : وين كنت قاعد امبدري وعليش مانشوفش فيك في الحوش بكل وماعش تتأخر في الليل فاهم

فتحي : عادي كنت برا مع الشباب تبيني نقعد في الحوش زي الصبايا وبعدين انا في الليل نشتغل ونستأذن توا حانمشي عندي مشوار وطلع وباته رقيتله منه

ونيسه : كنك معاه هو شاب ومش صغير تبي تحبسه

خليفه : نبي نعرف وين يمشي وشنو يشتغل بس

ونيسه : اكيد شغله كويس ونضيف هضا فتحي ولدك

خليفه : باهي بنتك كنها راقده وخلاص نوضيها اتسخن الشاهي وعدا للسور وبعد شاف قطوسه تمشي عالسور لزها ورغد سمعت صوته وهو يهزب في القطوسه نزلو دموعها : لعند امتى وانا بالوضع هضا حاسه بغمه والله

هيثم وقف قدام مركز الشرطه وبحت فيها : اسمك ؟

نور : اسمي نور وانت شنو اسمك وشكرا علي مساعدتك

هيثم : انا اسمي هيثم ومافيش داعي للشكر وحاننزل معاك عشان انوصلك ونزل وهي مستغربه لاصق فيها وخلاص تأففت وخشت جوا وكان معاها حكت عالمكان السري وعنوانه وشيرت علي هيثم : هضا شاف حالتي ووصلني لعند حوشي تقدرو تسألوه وكان المكان مليان

هيثم : صح هالكلام وقفتني عالطريق وقعدت تبكي

شرطي : شنو اسمك انتي واسم يلي اغتصبك امس

نور : انا اسمي نور ويلي اغتصبني اسمه نادر خبشت وجه

شرطي : وانتي غلطانه ماكنش المفروض تمشي غادي ومع واحد حقير خدعك وشالك لمكان وسخ واعيونه عليها وهي قرت نضارته لها ويسحبها مش كويسه

نور بثقه : اول شي انا توقعته مكان عادي لكن حسيت بالخوف لما شفتهم يشربو وامورهم مش تمام قررت نهرب وانت تعرف الباقي يعني ويلي صار غصبا عليا وقربت واجد من المكتب واعيونها عليه بخبث : ولولايا كنتو ماعرفتوش شنو يديرو هالناس في المكان السري المخالف للقانون يمكن حتى اختك موجوده غادي فخليك كويس

هيثم رقيتله من تصرفها : نور لو سمحتي وتنحنح

نور سمعاته ومطنشته واعيونها عالشرطي لان حكاه عليها هكي ويبحت فيها بنضارت ضايقوها : ليش ساكت عارف روحك غلطان والمهم بالنسبه ليا لما تمسكو الوسخ يلي اسمه نادر كلموني حانكتب رقمي عندكم عشان نبي انشوفه ونهزبه وحقي اندير فيه يلي نبيه وبجوي انا

الشرطي صبا وبحت فيها : هضا شغلنا مش شغلك وتقدري تمشي توا ومافيش داعي تطلعي واجد تريحي

نور بحتت فيه زين : هالشي يخصني انت مش شورك

هيثم : نور خلينا نمشو هيا لو سمحتي هيا نمشو وتوااا

نور بحتت فيه : انت شنو صايرلك اتزن فوق راسي خليني في حالي وحانمشي مع تاكسي تاني تمام هكي وطلعت وهي معصبه وراقيتلها من الشرطي وزاد عليها هيثم جعزها واجد لقاته يلحق فيها : شنو فهمتك توا

هيثم : نبي انوصلك انا هيا وركب في سيارته يرجا فيها بس هي خدعاته ووقفت تاكسي تاني ركبت فيه وتبتسم

هيثم : وحق ربي انتي نار حرقتي كل الناس وانا منهم تنهد وروح للحوش شاف اخته وفاء ترسم : شنو الجو

وفاء : تمام انت وين غاطس رايح تختفي واجد !

هيثم : انتي عارفه الشغل والتاكسي يوصل في ناس

وفاء : بس حالتك عكس قبل وكأن في شي شاغلك

هيثم : في نار حارقتني وخشيت في دوامه فيها

وفاء بحتت فيه : شنو هالنار احكيلي لو حابب نسمعك

هيثم : مره تانيه توا نحكي حانمشي نرقد توا باي

وفاء : باي وكملت رسمتها وعقلها مع خوها هيثم

نور روحت للحوش ولقت امها تراجي فيها وشيرت عالساعه : غريبه جيتي والساعه 5 في العشيه بس مافيش طلوع بعدين مفهوم هيا خشي جوا تريحي

نور بحتت فيها : خطرتي عليا واحد متسلط خفيها يا غاليه عليا لو تبيني نقعد هنا حانموتو من الجوع وعدت

امها لحقتها : انتي شغلك في صبح للظهر ليش لعند توا

نور : انا سيبت الشغل خلاص حاندور علي شغل تاني

امها : وليش سيبتيه لكي فتره عندهم ومتريحه فيه

نور : بس توا مش متريحه وخشت لسريرها وهي تعبانه

امها : المهم ما تطلعيش اليوم لو تطلعي نزعل منك راه

نور : مش حانطلع لاني تعبانه واجد ونفسيتي مدمره

امها بحنان قعدت علي حاشية السرير وحطت ايديها علي جبهتها قعدت تقرا عليها في ايات ونور غمضت اعيونها وقعدت تكح : تعبانه واجد نبي نرقد طفي الضي توا

امها صبت : باهي ماتبيش تاكلي رايحه عود انتي

نور : كولي انتي وكأني كليت انا مانبيش ناكل شي

امها : يا بنتي شنو صايرلك ما تاكليش ووجهك اصفر وطاقتك هذي ماتضعفش بكل نشيطه اكتر مني اخرا

نور : عطتيني بالعين اهو تعبت ومرضت شنو الفايده

امها : انا مش حانسمع كلامك وحانديرلك حاجه تاكليها

نور : لو اتجيبي سفره لعندي صدقيني نقلبها لكي

امها مصدومه : جنيتي انتي حاتموتي لك كم يوم بدون اكل احكي لك كم يوم ما تاكليش وما تشربيش ؟؟؟

نور مابتش اترد وغمضت اعيونها من التعب والأرهاق

امها زعلت علي وضعها واجد وخاصة ان حرارتها ارتفعت حاولت تنزلها بس مافيش فايده طلبت من خوها مفتاح يشيلها للمستشفى وفعلا جاه وشالها وهي مش حاسه بشي من التعب وكانت مريضه واجد ويلي صار معاها امس كابوس مجننها قعدت تخترف بيه لدرجة انها قتلت نادر في الحلم دمعو اعيونها وامها تبحت فيها وحتى زوجة خالها وملك زاروها وقاعدين في الغرفه معاهاا

مفتاح : بنتك واجد تعبانه هي زي امس او اليوم اخف

فاطمه : لا عكس امس بس واضح انها تعبانه ومريضه

مفتاح : واخده برد ومش واكله ولا شاربه شي اليوم

فاطمه : يعني اليوم مش واكله اه منها اه جننتني واجد

ملك : ما تخافيش عليها يا عمتي ونور قويه عارفتها

فاطمه : نور قوتها ذابحتني وماتسمعش في الكلام

مفتاح : لو تسمعو الكلام واتعيشو معانا حانربيها لكي

نور جات في وذنها كلمته فتحت اعيونها بتعب وبصوت تاعب وهي اتشير عليه : قبل ما تربيني ربي روحك

مفتاح انصدم : بنتك ناويه تجنني حتى وهي تعبانه لسانها طويل بس اه ربي يصبرني زيدي وكتري يا بنت

نور غمضت اعيونها : خليني في حالي نكرهكم انااا

ملك : يا نور عيب هالكلام هضا خالك وهو يحبك

نور تكح : خودي باتك وعدو أنا تعبانه واجد ومريضه

فاطمه نزلو دموعها وخشت الدكتوره بحتت فيهم : تم الكشف عليها لقيناها متعرضه لأغتصاب ونفسيتها مدمره مع الاسف كلهم انصدمو ونور حركت صوابعها وشدت عليهم ماقدرتش تهزبها بس حفظت شكلها وفي نفسها بعد نتحسن حانوريكي يا بصاصه وغمضت اعيونهاا

مفتاح : شنو امتى صار هالكلام معقوله وليش ما حكتش

فاطمه تبكي : والله مانعرفش حتى انا وما حكتليش

دكتوره : اغتصاب واثار الضرب جديده ولها ساعات

مفتاح : معناها امس عليش جات معصبه وحالتها حاله وتبكي بس من هالحقير يلي دار فيها هكي وبحت فيها : نور ردي قولي اي حاجه من هضا وانا حانوريه ونشكي فيه ونور في نفسها : خديت حقي بروحي وخلاته يدوي ومابتش اترد عليه كانت مكاره ولئيمه جدا ومن جوا عاجبها الجو مخليتهم منهارين ويحكو بالسيره هذي ودايره روحها راقده وتسمع فيهم اكويس اكويس

ايلاف عدت من حوش مايا ولجين غامه عليهاا واجد خشت جوا ولقت مايا فرحانه وطاير عقلهاا

مايا : اليوم اسعد يوم في حياتي يا فصعونه هههه

لجين تأففت وخشت لسريرها وغطت روحها وكانت نعسانه واجد رقدت دغري وخلت اختها فرحانه وترقص بروحها بعد كملت الرقص قعدت تتفرج عالفيدوهات وكانت مدمنه عليهم وأترو فيها وفرحتها لا توصف

اسلام في الجامع واعيونه عالشيخ يعقوب يلي يبحت فيه وراقيتله قعد يراقب فيه وهالشي مش راضي عليه

اسلام بحت في طلابه وبدا يسمع عليهم في السور وكل اشويه يبحت فيه شافها ضرب طالب بالعصاه يلي في يده علي راسه صبا لعنده : لو سمحت الضرب ممنوع

رد : خليك في حالك وامشي لمكانك امشي مش ناقصك

اسلام : خاف ربي وماعش تضربهم علمهم بدون ضرب

الشيخ : ما شاء الله تعال اضربني وخلاص هضا يلي ناقص امشي لمكانك عقاب فرخ ماسكرش 27 سنه يتمرجل عليا ويبي يعلمني شنو اندير عدي ارضع من حليب امك مزلت صغير عالجو يلي ادير فيه واسلام رفع يده عليه يبي يضربه بس نزلها : صدقني مزلت ماسك روحي ونحاول نحترمك فنصيحه مني أفطن لروحك وانتو يا طلاب لو ضربكم اشكو عيلتكم فيه مفهوم وعدا وكان معصب شير لطلابه : خلاص امشو لحوشكم هيااا وقعد يراجي في طلاب الشيخ يروحو كلهم وعدا وراهم وبهدوء : لو يضربكم اشكو فيه ولو نداكم بروحكم ماتمشوش معاه فاهمين اسمعو كلامي وانا نحبكم واجد

ردو بأبتسامه : ونحنا نحبوك واجد يا استاذ اسلام

في الليل مسكت الشرطه الشله كلها في الحوش ولقوه مشاريب وحتى مخدرات حطو نادر ومراد وفتحي بروحهم والبنات في الحجز واتصلو بعيلتهم بلغوهم عالفضيحه هذي بنات اصغار يديرن هكي بدون علم عيلتهم وكل بنت كاذبه انها تمشي لصديقتها وصهرانه عندها وهضا اكبر غلط طلع الشرطي من عندهم وخش لعند الشباب ال3 : وين نادر يجي يصبي هنا وشير قدام

نادر بحت فيه وقدم لعنده : نعم انا نادر عليش السؤال

الشرطي : انت شاكيه فيك بنت اسمها نور لأنك اغتصبتها امس وفتحي وينه هو الاول حاول يقرب منهاا بالغصب

فتحي خاف بالايش عدا جنب نادر لكن مراد سكران وفي عالم اخر مغمض اعيونه ويشخر وحالته حاله شرب واجد بحت الشرطي في فتحي : ربي يهديكم ولكن انت يا نادر مشكلتك كبيره ورافعه عليك قضيه احتمال تقعد كم سنه في الحبس انصدم وقعد يرعش : لا لو سمحت واجد كم سنه انا يوم وحاسس برعب كيف لو سنه يعني

الشرطي : عشان تتأدب وماعش تقرب من بنات الناس ونسيت المشاريب والمخدرات والفضل لنور مسكناكم

نادر رقيتله وحقد عليها اول ما طلع الشرطي قعد يسب في نور هو وفتحي وكانو معصبين واجد منها وهزبو مراد يلي شالها بنفسه لمكانهم الخاص بيهم …

في اليوم التاني /

زياد شاف ملك نزلت من الحافله قرب منها بس طنشاته

زياد : ملك انا نحبك صدقيني امس متجاهلتيني وانا حسيت بأحساس شين انا اسف علي كل شي قلته لكي

ملك بحتت فيه : انا ماعش نبي نحكي معاك وخليني في حالي عدت وانصدمت بعد لحقها ووقفها مره تانيه : انا قتلك اني أنحبك من كل قلبي ونبي نخطبك اليوم قبل بكرا لو موافقه اندز عيلتي يخطبوك ليا شنو رايك ؟

ملك شافت نرجس ابتسمتلها وهزتلها راسها بالموافقه

زياد : ردي قولي اي شي مستعد ندير يلي تبيها المهم تسامحيني وترديلي والله الدنيا ظلمت عليا بدونك

ملك بأبتسامه : امتى حاتجيبهم عيلتك وبعد الخطبه ياريت ماتحكيش واجد معايا لان ما اتجيش وعيب

زياد : اليوم لو تحبي وقصة ان مانحكوش واجد ربي يصبرني عليها وانا نوعدك انك حاتكوني كل شي في حياتي ونبيك بالحلال وابتسم ونضارته اول مره يبان الحب فيهم ملك ابتسمت وعدت وقلبها يدق فرحولها البنات واجد : المهم ان حايخطبك رسمي فرحتلك واجد

ملك : تسلمي يا نرجس وانا خلاص نبي كل شي حلال في حياتي ونبي طريقي صح مش غلط وبحتت في الخوات : هدينا ليش يجو وهما مايحضروش في محاضرات انحس فيهم برا وخلاص 24 ساعه

نرجس : مع الاسف مش للدراسه يحضرو بس ربي يهديهم وشافو مايا طلعت من الكليه بروحها ولجين قاعده وتبحت في اختها يلي عدت وركبت مع ايلاف في سيارتها ، قربت ملك ونرجس من لجين الحزينه

تنهدت ملك : كنك يا لجين في حاجه من امس وانتي مضايقه نحس فيكي فأحكي وفضفضي اشويه معانا

لجين ساكته وماردتش عليهم فطنت لعيون طالب عليها من بعيد ولما شفاته نزل راسه وقعد يقرا في كتابه

نرجس : يا بنت ردي ليش ساكته خايفين عليك نحنا

لجين صبت وعدت قمعزت بروحها وتجاهلت البنات يلي مصدومات ومش فاهمين كنها ووين عدت مايا ؟؟؟

رغد سمعت امها تبكي وباتها يهزب وجاب سيرة فتحي استغربت لان كان معصب واجد ولما شفاته عدا دغري خشت علي امها : شنو في ليش تبكي شغلتوني والله

امها : خوك من امس وهو في مركز الشرطه في كارثه يارب يطلع منها والله حانموت من الخوف عليه

رغد سكتت وفي نفسها معناها داير غلط وزعما شنو ؟

امها حالتها حاله وتبكي ورغد قربت منها تهدي فيهاااا وبصعوبه نطقت : امس فتحي حاول يقرب مني

امها سكتت وبحتت فيها : شنو أتقولي انتي ؟؟؟؟

رغد !!!

نور طلعت بصعوبه بعد فكت التغديه واستغلت الفرصه بعد لقت الغرفه فاضيه عدت وقفت تاكسي وطلبت يشيلها لمركز الشرطه وبتعب خشت عالشرطي بعد خلوها اتخش : مسكتو نادر الحقير ولو مسكتوه نبي انشوفه توا

شرطي شاف حالتها : اها مسكناه وكنك تعبانه هكي ؟

نور : نتريح لما انشوفه قدامي وتوا الوقت هيا وريه ليا

الشرطي صبا وعدا لحقاته دغري وبعد فتحو الباب وشفاته هو وفتحي ابتسمت زي الطفله والشرطي بحت فيها قعدت تضحك وهي تبحت فيهم وتشير عليهم وضحكتها سحرت الكل خاصة الشرطي مصدوم ويبحت فيها بعد الضحك يلي ضحكاته قالت : !!!

يتبع ……….

لقراءة الجزء التالي : الجزء الخامس من رواية الحلال والحرام

لقراءة الجزء السابق : الجزء الثالث من رواية الحلال والحرام

للإطلاع علي فهرس اجزاء الرواية : جميع روابط اجزاء رواية الحلال والحرام للكاتبة سلطانة كوكي

جميع الحقوق محفوظة للكاتبة سلطانة كوكي